| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၁၄. အန္တေဝာသိကဝတ္တကထာ
14. Antevāsikavattakathā
၃၈၁. တေန ခော ပန သမယေန အာစရိယာ အန္တေဝာသိကေသု န သမ္မာ ဝတ္တန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာစရိယာ အန္တေဝာသိကေသု န သမ္မာ ဝတ္တိသ္သန္တီ’’တိ! အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, အာစရိယာ အန္တေဝာသိကေသု န သမ္မာ ဝတ္တန္တီ’’တိ? ‘‘သစ္စံ ဘဂဝာ’’တိ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ –
381. Tena kho pana samayena ācariyā antevāsikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ācariyā antevāsikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ācariyā antevāsikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
၃၈၂. ‘‘တေန ဟိ, ဘိက္ခဝေ, အာစရိယာနံ အန္တေဝာသိကေသု ဝတ္တံ ပညပေသ္သာမိ ယထာ အာစရိယေဟိ အန္တေဝာသိကေသု သမ္မာ ဝတ္တိတဗ္ဗံ။ 1 အာစရိယေန, ဘိက္ခဝေ, အန္တေဝာသိကမ္ဟိ သမ္မာ ဝတ္တိတဗ္ဗံ။ တတ္ရာယံ သမ္မာဝတ္တနာ –
382. ‘‘Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. 2 Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā –
‘‘အာစရိယေန, ဘိက္ခဝေ, အန္တေဝာသိကော သင္ဂဟေတဗ္ဗော အနုဂ္ဂဟေတဗ္ဗော ဥဒ္ဒေသေန ပရိပုစ္ဆာယ ဩဝာဒေန အနုသာသနိယာ။ သစေ အာစရိယသ္သ ပတ္တော ဟောတိ, အန္တေဝာသိကသ္သ ပတ္တော န ဟောတိ, အာစရိယေန အန္တေဝာသိကသ္သ ပတ္တော ဒာတဗ္ဗော, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ ပတ္တော ဥပ္ပဇ္ဇိယေထာတိ။ သစေ အာစရိယသ္သ စီဝရံ ဟောတိ, အန္တေဝာသိကသ္သ စီဝရံ န ဟောတိ, အာစရိယေန အန္တေဝာသိကသ္သ စီဝရံ ဒာတဗ္ဗံ, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ စီဝရံ ဥပ္ပဇ္ဇိယေထာတိ။ သစေ အာစရိယသ္သ ပရိက္ခာရော ဟောတိ, အန္တေဝာသိကသ္သ ပရိက္ခာရော န ဟောတိ, အာစရိယေန အန္တေဝာသိကသ္သ ပရိက္ခာရော ဒာတဗ္ဗော, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ ပရိက္ခာရော ဥပ္ပဇ္ဇိယေထာတိ။
‘‘Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ – kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ – kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ – kinti nu kho antevāsikassa parikkhāro uppajjiyethāti.
‘‘သစေ အန္တေဝာသိကော ဂိလာနော ဟောတိ, ကာလသ္သေဝ ဥဋ္ဌာယ ဒန္တကဋ္ဌံ ဒာတဗ္ဗံ, မုခောဒကံ ဒာတဗ္ဗံ, အာသနံ ပညပေတဗ္ဗံ။ သစေ ယာဂု ဟောတိ , ဘာဇနံ ဓောဝိတ္ဝာ ယာဂု ဥပနာမေတဗ္ဗာ။ ယာဂုံ ပီတသ္သ ဥဒကံ ဒတ္ဝာ ဘာဇနံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန ဓောဝိတ္ဝာ ပဋိသာမေတဗ္ဗံ ။ အန္တေဝာသိကမ္ဟိ ဝုဋ္ဌိတေ အာသနံ ဥဒ္ဓရိတဗ္ဗံ။ သစေ သော ဒေသော ဥက္လာပော ဟောတိ, သော ဒေသော သမ္မဇ္ဇိတဗ္ဗော။
‘‘Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti , bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ . Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘သစေ အန္တေဝာသိကော ဂာမံ ပဝိသိတုကာမော ဟောတိ, နိဝာသနံ ဒာတဗ္ဗံ, ပဋိနိဝာသနံ ပဋိဂ္ဂဟေတဗ္ဗံ, ကာယဗန္ဓနံ ဒာတဗ္ဗံ, သဂုဏံ ကတ္ဝာ သင္ဃာဋိယော ဒာတဗ္ဗာ, ဓောဝိတ္ဝာ ပတ္တော သောဒကော ဒာတဗ္ဗော။
‘‘Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.
‘‘ဧတ္တာဝတာ နိဝတ္တိသ္သတီတိ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ, ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဟေတဗ္ဗံ, ပဋိနိဝာသနံ ဒာတဗ္ဗံ, နိဝာသနံ ပဋိဂ္ဂဟေတဗ္ဗံ။ သစေ စီဝရံ သိန္နံ ဟောတိ, မုဟုတ္တံ ဥဏ္ဟေ ဩတာပေတဗ္ဗံ, န စ ဥဏ္ဟေ စီဝရံ နိဒဟိတဗ္ဗံ။ စီဝရံ သင္ဃရိတဗ္ဗံ။ စီဝရံ သင္ဃရန္တေန စတုရင္ဂုလံ ကဏ္ဏံ ဥသ္သာရေတ္ဝာ စီဝရံ သင္ဃရိတဗ္ဗံ – မာ မဇ္ဈေ ဘင္ဂော အဟောသီတိ။ ဩဘောဂေ ကာယဗန္ဓနံ ကာတဗ္ဗံ။
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘သစေ ပိဏ္ဍပာတော ဟောတိ, အန္တေဝာသိကော စ ဘုဉ္ဇိတုကာမော ဟောတိ, ဥဒကံ ဒတ္ဝာ ပိဏ္ဍပာတော ဥပနာမေတဗ္ဗော။ အန္တေဝာသိကော ပာနီယေန ပုစ္ဆိတဗ္ဗော။ ဘုတ္တာဝိသ္သ ဥဒကံ ဒတ္ဝာ ပတ္တံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန ဓောဝိတ္ဝာ ဝောဒကံ ကတ္ဝာ မုဟုတ္တံ ဥဏ္ဟေ ဩတာပေတဗ္ဗော, န စ ဥဏ္ဟေ ပတ္တော နိဒဟိတဗ္ဗော။ ပတ္တစီဝရံ နိက္ခိပိတဗ္ဗံ။ ပတ္တံ နိက္ခိပန္တေန။ပေ.။ စီဝရံ နိက္ခိပန္တေန။ပေ.။ ပာရတော အန္တံ ဩရတော ဘောဂံ ကတ္ဝာ စီဝရံ နိက္ခိပိတဗ္ဗံ။ အန္တေဝာသိကမ္ဟိ ဥဋ္ဌိတေ အာသနံ ဥဒ္ဓရိတဗ္ဗံ, ပာဒောဒကံ ပာဒပီဌံ ပာဒကထလိကံ ပဋိသာမေတဗ္ဗံ။ သစေ သော ဒေသော ဥက္လာပော ဟောတိ, သော ဒေသော သမ္မဇ္ဇိတဗ္ဗော။
‘‘Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe… cīvaraṃ nikkhipantena…pe… pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘သစေ အန္တေဝာသိကော နဟာယိတုကာမော ဟောတိ, နဟာနံ ပဋိယာဒေတဗ္ဗံ။ သစေ သီတေန အတ္ထော ဟောတိ, သီတံ ပဋိယာဒေတဗ္ဗံ။ သစေ ဥဏ္ဟေန အတ္ထော ဟောတိ, ဥဏ္ဟံ ပဋိယာဒေတဗ္ဗံ။
‘‘Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘သစေ အန္တေဝာသိကော ဇန္တာဃရံ ပဝိသိတုကာမော ဟောတိ, စုဏ္ဏံ သန္နေတဗ္ဗံ, မတ္တိကာ တေမေတဗ္ဗာ, ဇန္တာဃရပီဌံ အာဒာယ 3 ဂန္တ္ဝာ ဇန္တာဃရပီဌံ ဒတ္ဝာ စီဝရံ ပဋိဂ္ဂဟေတ္ဝာ ဧကမန္တံ နိက္ခိပိတဗ္ဗံ, စုဏ္ဏံ ဒာတဗ္ဗံ, မတ္တိကာ ဒာတဗ္ဗာ။ သစေ ဥသ္သဟတိ ဇန္တာဃရံ ပဝိသိတဗ္ဗံ။ ဇန္တာဃရံ ပဝိသန္တေန မတ္တိကာယ မုခံ မက္ခေတ္ဝာ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရံ ပဝိသိတဗ္ဗံ။ န ထေရေ ဘိက္ခူ အနုပခဇ္ဇ နိသီဒိတဗ္ဗံ။ န နဝာ ဘိက္ခူ အာသနေန ပဋိဗာဟိတဗ္ဗာ ။ ဇန္တာဃရေ အန္တေဝာသိကသ္သ ပရိကမ္မံ ကာတဗ္ဗံ။ ဇန္တာဃရာ နိက္ခမန္တေန ဇန္တာဃရပီဌံ အာဒာယ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရာ နိက္ခမိတဗ္ဗံ။
‘‘Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā . Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘ဥဒကေပိ အန္တေဝာသိကသ္သ ပရိကမ္မံ ကာတဗ္ဗံ။ နဟာတေန ပဌမတရံ ဥတ္တရိတ္ဝာ အတ္တနော ဂတ္တံ ဝောဒကံ ကတ္ဝာ နိဝာသေတ္ဝာ အန္တေဝာသိကသ္သ ဂတ္တတော ဥဒကံ ပမဇ္ဇိတဗ္ဗံ, နိဝာသနံ ဒာတဗ္ဗံ, သင္ဃာဋိ ဒာတဗ္ဗာ, ဇန္တာဃရပီဌံ အာဒာယ ပဌမတရံ အာဂန္တ္ဝာ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ, အန္တေဝာသိကော ပာနီယေန ပုစ္ဆိတဗ္ဗော။
‘‘Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.
‘‘ယသ္မိံ ဝိဟာရေ အန္တေဝာသိကော ဝိဟရတိ, သစေ သော ဝိဟာရော ဥက္လာပော ဟောတိ, သစေ ဥသ္သဟတိ, သောဓေတဗ္ဗော။ ဝိဟာရံ သောဓေန္တေန ပဌမံ ပတ္တစီဝရံ နီဟရိတ္ဝာ ဧကမန္တံ နိက္ခိပိတဗ္ဗံ။ပေ.။ အာစမနကုမ္ဘိယာ ဥဒကံ န ဟောတိ, အာစမနကုမ္ဘိယာ ဥဒကံ အာသိဉ္စိတဗ္ဗံ။
‘‘Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘သစေ အန္တေဝာသိကသ္သ အနဘိရတိ ဥပ္ပန္နာ ဟောတိ, အာစရိယေန ဝူပကာသေတဗ္ဗော, ဝူပကာသာပေတဗ္ဗော, ဓမ္မကထာ ဝာသ္သ ကာတဗ္ဗာ။ သစေ အန္တေဝာသိကသ္သ ကုက္ကုစ္စံ ဥပ္ပန္နံ ဟောတိ, အာစရိယေန ဝိနောဒေတဗ္ဗံ, ဝိနောဒာပေတဗ္ဗံ, ဓမ္မကထာ ဝာသ္သ ကာတဗ္ဗာ။ သစေ အန္တေဝာသိကသ္သ ဒိဋ္ဌိဂတံ ဥပ္ပန္နံ ဟောတိ, အာစရိယေန ဝိဝေစေတဗ္ဗံ, ဝိဝေစာပေတဗ္ဗံ, ဓမ္မကထာ ဝာသ္သ ကာတဗ္ဗာ။ သစေ အန္တေဝာသိကော ဂရုဓမ္မံ အဇ္ဈာပန္နော ဟောတိ, ပရိဝာသာရဟော, အာစရိယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အန္တေဝာသိကသ္သ ပရိဝာသံ ဒဒေယ္ယာတိ။ သစေ အန္တေဝာသိကော မူလာယပဋိကသ္သနာရဟော ဟောတိ, အာစရိယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အန္တေဝာသိကံ မူလာယ ပဋိကသ္သေယ္ယာတိ။ သစေ အန္တေဝာသိကော မာနတ္တာရဟော ဟောတိ, အာစရိယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အန္တေဝာသိကသ္သ မာနတ္တံ ဒဒေယ္ယာတိ။ သစေ အန္တေဝာသိကော အဗ္ဘာနာရဟော ဟောတိ, အာစရိယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အန္တေဝာသိကံ အဗ္ဘေယ္ယာတိ။ သစေ သင္ဃော အန္တေဝာသိကသ္သ ကမ္မံ ကတ္တုကာမော ဟောတိ, တဇ္ဇနီယံ ဝာ နိယသ္သံ ဝာ ပဗ္ဗာဇနီယံ ဝာ ပဋိသာရဏီယံ ဝာ ဥက္ခေပနီယံ ဝာ, အာစရိယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အန္တေဝာသိကသ္သ ကမ္မံ န ကရေယ္ယ , လဟုကာယ ဝာ ပရိဏာမေယ္ယာတိ။ ကတံ ဝာ ပနသ္သ ဟောတိ, သင္ဃေန ကမ္မံ, တဇ္ဇနီယံ ဝာ နိယသ္သံ ဝာ ပဗ္ဗာဇနီယံ ဝာ ပဋိသာရဏီယံ ဝာ ဥက္ခေပနီယံ ဝာ, အာစရိယေန ဥသ္သုက္ကံ ကာတဗ္ဗံ – ကိန္တိ နု ခော အန္တေဝာသိကော သမ္မာ ဝတ္တေယ္ယ, လောမံ ပာတေယ္ယ, နေတ္ထာရံ ဝတ္တေယ္ယ, သင္ဃော တံ ကမ္မံ ပဋိပ္ပသ္သမ္ဘေယ္ယာတိ။
‘‘Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ – kinti nu kho saṅgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ – kinti nu kho saṅgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ abbheyyāti. Sace saṅgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho saṅgho antevāsikassa kammaṃ na kareyya , lahukāya vā pariṇāmeyyāti. Kataṃ vā panassa hoti, saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho antevāsiko sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘သစေ အန္တေဝာသိကသ္သ စီဝရံ ဓောဝိတဗ္ဗံ ဟောတိ, အာစရိယေန အာစိက္ခိတဗ္ဗံ – ဧဝံ ဓောဝေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ စီဝရံ ဓောဝိယေထာတိ။ သစေ အန္တေဝာသိကသ္သ စီဝရံ ကာတဗ္ဗံ ဟောတိ, အာစရိယေန အာစိက္ခိတဗ္ဗံ – ဧဝံ ကရေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ စီဝရံ ကရိယေထာတိ။ သစေ အန္တေဝာသိကသ္သ ရဇနံ ပစိတဗ္ဗံ ဟောတိ, အာစရိယေန အာစိက္ခိတဗ္ဗံ – ဧဝံ ပစေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ ရဇနံ ပစိယေထာတိ။ သစေ အန္တေဝာသိကသ္သ စီဝရံ ရဇိတဗ္ဗံ ဟောတိ, အာစရိယေန အာစိက္ခိတဗ္ဗံ – ဧဝံ ရဇေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော အန္တေဝာသိကသ္သ စီဝရံ ရဇိယေထာတိ။ စီဝရံ ရဇန္တေန သာဓုကံ သမ္ပရိဝတ္တကံ သမ္ပရိဝတ္တကံ ရဇိတဗ္ဗံ။ န စ အစ္ဆိန္နေ ထေဝေ ပက္ကမိတဗ္ဗံ။ သစေ အန္တေဝာသိကော ဂိလာနော ဟောတိ, ယာဝဇီဝံ ဥပဋ္ဌာတဗ္ဗော, ဝုဋ္ဌာနမသ္သ အာဂမေတဗ္ဗံ။ ဣဒံ ခော, ဘိက္ခဝေ, အာစရိယာနံ အန္တေဝာသိကေသု ဝတ္တံ ယထာ အာစရိယေဟိ အန္တေဝာသိကေသု သမ္မာ ဝတ္တိတဗ္ဗ’’န္တိ။
‘‘Sace antevāsikassa cīvaraṃ dhovitabbaṃ hoti, ācariyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabba’’nti.
ဝတ္တက္ခန္ဓကော အဋ္ဌမော။
Vattakkhandhako aṭṭhamo.
ဣမမ္ဟိ ခန္ဓကေ ဝတ္ထူ ဧကူနဝီသတိ, ဝတ္တာ စုဒ္ဒသ။
Imamhi khandhake vatthū ekūnavīsati, vattā cuddasa.
တသ္သုဒ္ဒာနံ –
Tassuddānaṃ –
သဥပာဟနာ ဆတ္တာ စ၊ ဩဂုဏ္ဌိ သီသံ ပာနီယံ။
Saupāhanā chattā ca, oguṇṭhi sīsaṃ pānīyaṃ;
နာဘိဝာဒေ န ပုစ္ဆန္တိ၊ အဟိ ဥဇ္ဈန္တိ ပေသလာ။
Nābhivāde na pucchanti, ahi ujjhanti pesalā.
ဩမုဉ္စိ ဆတ္တံ ခန္ဓေ စ၊ အတရဉ္စ ပဋိက္ကမံ။
Omuñci chattaṃ khandhe ca, atarañca paṭikkamaṃ;
ပတ္တစီဝရံ နိက္ခိပာ၊ ပတိရူပဉ္စ ပုစ္ဆိတာ။
Pattacīvaraṃ nikkhipā, patirūpañca pucchitā.
အာသိဉ္စေယ္ယ ဓောဝိတေန၊ သုက္ခေနလ္လေနုပာဟနာ။
Āsiñceyya dhovitena, sukkhenallenupāhanā;
ဝုဍ္ဎော နဝကော ပုစ္ဆေယ္ယ၊ အဇ္ဈာဝုဋ္ဌဉ္စ ဂောစရာ။
Vuḍḍho navako puccheyya, ajjhāvuṭṭhañca gocarā.
သေက္ခာ ဝစ္စာ ပာနီ ပရိ၊ ကတ္တရံ ကတိကံ တတော။
Sekkhā vaccā pānī pari, kattaraṃ katikaṃ tato;
ကာလံ မုဟုတ္တံ ဥက္လာပော၊ ဘူမတ္ထရဏံ နီဟရေ။
Kālaṃ muhuttaṃ uklāpo, bhūmattharaṇaṃ nīhare.
ပဋိပာဒော ဘိသိဗိဗ္ဗော၊ မဉ္စပီဌဉ္စ မလ္လကံ။
Paṭipādo bhisibibbo, mañcapīṭhañca mallakaṃ;
အပသ္သေနုလ္လောကကဏ္ဏာ၊ ဂေရုကာ ကာဠ အကတာ။
Apassenullokakaṇṇā, gerukā kāḷa akatā.
သင္ကာရဉ္စ ဘူမတ္ထရဏံ၊ ပဋိပာဒကံ မဉ္စပီဌံ။
Saṅkārañca bhūmattharaṇaṃ, paṭipādakaṃ mañcapīṭhaṃ;
ဘိသိ နိသီဒနမ္ပိ၊ မလ္လကံ အပသ္သေန စ။
Bhisi nisīdanampi, mallakaṃ apassena ca.
ပတ္တစီဝရံ ဘူမိ စ၊ ပာရန္တံ ဩရတော ဘောဂံ။
Pattacīvaraṃ bhūmi ca, pārantaṃ orato bhogaṃ;
ပုရတ္ထိမာ ပစ္ဆိမာ စ၊ ဥတ္တရာ အထ ဒက္ခိဏာ။
Puratthimā pacchimā ca, uttarā atha dakkhiṇā.
သီတုဏ္ဟေ စ ဒိဝာရတ္တိံ၊ ပရိဝေဏဉ္စ ကောဋ္ဌကော။
Sītuṇhe ca divārattiṃ, pariveṇañca koṭṭhako;
ဥပဋ္ဌာနဂ္ဂိ သာလာ စ၊ ဝတ္တံ ဝစ္စကုဋီသု စ။
Upaṭṭhānaggi sālā ca, vattaṃ vaccakuṭīsu ca.
ပာနီ ပရိဘောဇနိယာ၊ ကုမ္ဘိ အာစမနေသု စ။
Pānī paribhojaniyā, kumbhi ācamanesu ca;
နေဝာသနံ န ဥဒကံ၊ န ပစ္စု န စ ပာနိယံ။
Nevāsanaṃ na udakaṃ, na paccu na ca pāniyaṃ;
နာဘိဝာဒေ နပညပေ၊ ဥဇ္ဈာယန္တိ စ ပေသလာ။
Nābhivāde napaññape, ujjhāyanti ca pesalā.
ဝုဍ္ဎာသနဉ္စ ဥဒကံ၊ ပစ္စုဂ္ဂန္တ္ဝာ စ ပာနိယံ။
Vuḍḍhāsanañca udakaṃ, paccuggantvā ca pāniyaṃ;
ဥပာဟနေ ဧကမန္တံ၊ အဘိဝာဒေ စ ပညပေ။
Upāhane ekamantaṃ, abhivāde ca paññape.
ဝုတ္ထံ ဂောစရသေက္ခော စ၊ ဌာနံ ပာနိယဘောဇနံ။
Vutthaṃ gocarasekkho ca, ṭhānaṃ pāniyabhojanaṃ;
ကတ္တရံ ကတိကံ ကာလံ၊ နဝကသ္သ နိသိန္နကေ။
Kattaraṃ katikaṃ kālaṃ, navakassa nisinnake.
အဘိဝာဒယေ အာစိက္ခေ၊ ယထာ ဟေဋ္ဌာ တထာ နယေ။
Abhivādaye ācikkhe, yathā heṭṭhā tathā naye;
နိဒ္ဒိဋ္ဌံ သတ္ထဝာဟေန ဝတ္တံ အာဝာသိကေဟိမေ။
Niddiṭṭhaṃ satthavāhena vattaṃ āvāsikehime.
ဂမိကာ ဒာရုမတ္တိ စ၊ ဝိဝရိတ္ဝာ န ပုစ္ဆိယ။
Gamikā dārumatti ca, vivaritvā na pucchiya;
နသ္သန္တိ စ အဂုတ္တဉ္စ၊ ဥဇ္ဈာယန္တိ စ ပေသလာ။
Nassanti ca aguttañca, ujjhāyanti ca pesalā.
ပဋိသာမေတ္ဝာ ထကေတ္ဝာ၊ အာပုစ္ဆိတ္ဝာဝ ပက္ကမေ။
Paṭisāmetvā thaketvā, āpucchitvāva pakkame;
ဘိက္ခု ဝာ သာမဏေရော ဝာ၊ အာရာမိကော ဥပာသကော။
Bhikkhu vā sāmaṇero vā, ārāmiko upāsako.
ပာသာဏကေသု စ ပုဉ္ဇံ၊ ပဋိသာမေ ထကေယ္ယ စ။
Pāsāṇakesu ca puñjaṃ, paṭisāme thakeyya ca;
သစေ ဥသ္သဟတိ ဥသ္သုက္ကံ၊ အနောဝသ္သေ တထေဝ စ။
Sace ussahati ussukkaṃ, anovasse tatheva ca.
သဗ္ဗော ဩဝသ္သတိ ဂာမံ၊ အဇ္ဈောကာသေ တထေဝ စ။
Sabbo ovassati gāmaṃ, ajjhokāse tatheva ca;
အပ္ပေဝင္ဂာနိ သေသေယ္ယုံ၊ ဝတ္တံ ဂမိကဘိက္ခုနာ။
Appevaṅgāni seseyyuṃ, vattaṃ gamikabhikkhunā.
နာနုမောဒန္တိ ထေရေန၊ ဩဟာယ စတုပဉ္စဟိ။
Nānumodanti therena, ohāya catupañcahi;
ဝစ္စိတော မုစ္ဆိတော အာသိ၊ ဝတ္တာနုမောဒနေသုမေ။
Vaccito mucchito āsi, vattānumodanesume.
ဆဗ္ဗဂ္ဂိယာ ဒုန္နိဝတ္ထာ၊ အထောပိ စ ဒုပ္ပာရုတာ။
Chabbaggiyā dunnivatthā, athopi ca duppārutā;
အနာကပ္ပာ စ ဝောက္ကမ္မ၊ ထေရေ အနုပခဇ္ဇနေ။
Anākappā ca vokkamma, there anupakhajjane.
နဝေ ဘိက္ခူ စ သင္ဃာဋိ၊ ဥဇ္ဈာယန္တိ စ ပေသလာ။
Nave bhikkhū ca saṅghāṭi, ujjhāyanti ca pesalā;
တိမဏ္ဍလံ နိဝာသေတ္ဝာ၊ ကာယသဂုဏဂဏ္ဌိကာ။
Timaṇḍalaṃ nivāsetvā, kāyasaguṇagaṇṭhikā.
န ဝောက္ကမ္မ ပဋိစ္ဆန္နံ၊ သုသံဝုတောက္ခိတ္တစက္ခု။
Na vokkamma paṭicchannaṃ, susaṃvutokkhittacakkhu;
ဥက္ခိတ္တောဇ္ဇဂ္ဃိကာသဒ္ဒော၊ တယော စေဝ ပစာလနာ။
Ukkhittojjagghikāsaddo, tayo ceva pacālanā.
ခမ္ဘောဂုဏ္ဌိဥက္ကုဋိကာ၊ ပဋိစ္ဆန္နံ သုသံဝုတော။
Khambhoguṇṭhiukkuṭikā, paṭicchannaṃ susaṃvuto;
ဩက္ခိတ္တုက္ခိတ္တဥဇ္ဇဂ္ဃိ၊ အပ္ပသဒ္ဒော တယော စလာ။
Okkhittukkhittaujjagghi, appasaddo tayo calā.
ခမ္ဘောဂုဏ္ဌိပလ္လတ္ထိ စ၊ အနုပခဇ္ဇ နာသနေ။
Khambhoguṇṭhipallatthi ca, anupakhajja nāsane;
ဩတ္ထရိတ္ဝာန ဥဒကေ၊ နီစံ ကတ္ဝာန သိဉ္စိယာ။
Ottharitvāna udake, nīcaṃ katvāna siñciyā.
ပဋိ သာမန္တာ သင္ဃာဋိ၊ ဩဒနေ စ ပဋိဂ္ဂဟေ။
Paṭi sāmantā saṅghāṭi, odane ca paṭiggahe;
သူပံ ဥတ္တရိဘင္ဂေန၊ သဗ္ဗေသံ သမတိတ္ထိ စ။
Sūpaṃ uttaribhaṅgena, sabbesaṃ samatitthi ca.
သက္ကစ္စံ ပတ္တသညီ စ၊ သပဒာနဉ္စ သူပကံ။
Sakkaccaṃ pattasaññī ca, sapadānañca sūpakaṃ;
န ထူပတော ပဋိစ္ဆာဒေ၊ ဝိညတ္တုဇ္ဈာနသညိနာ။
Na thūpato paṭicchāde, viññattujjhānasaññinā.
မဟန္တမဏ္ဍလဒ္ဝာရံ၊ သဗ္ဗဟတ္ထော န ဗ္ယာဟရေ။
Mahantamaṇḍaladvāraṃ, sabbahattho na byāhare;
ဥက္ခေပော ဆေဒနာဂဏ္ဍ၊ ဓုနံ သိတ္ထာဝကာရကံ။
Ukkhepo chedanāgaṇḍa, dhunaṃ sitthāvakārakaṃ.
ဇိဝ္ဟာနိစ္ဆာရကဉ္စေဝ၊ စပုစပု သုရုသုရု။
Jivhānicchārakañceva, capucapu surusuru;
ဟတ္ထပတ္တောဋ္ဌနိလ္လေဟံ၊ သာမိသေန ပဋိဂ္ဂဟေ။
Hatthapattoṭṭhanillehaṃ, sāmisena paṭiggahe.
ယာဝ န သဗ္ဗေ ဥဒကေ၊ နီစံ ကတ္ဝာန သိဉ္စိယံ။
Yāva na sabbe udake, nīcaṃ katvāna siñciyaṃ;
ပဋိ သာမန္တာ သင္ဃာဋိ၊ နီစံ ကတ္ဝာ ဆမာယ စ။
Paṭi sāmantā saṅghāṭi, nīcaṃ katvā chamāya ca.
သသိတ္ထကံ နိဝတ္တန္တေ၊ သုပ္ပဋိစ္ဆန္နမုက္ကုဋိ။
Sasitthakaṃ nivattante, suppaṭicchannamukkuṭi;
ဓမ္မရာဇေန ပညတ္တံ၊ ဣဒံ ဘတ္တဂ္ဂဝတ္တနံ။
Dhammarājena paññattaṃ, idaṃ bhattaggavattanaṃ.
ဒုန္နိဝတ္ထာ အနာကပ္ပာ၊ အသလ္လေက္ခေတ္ဝာ စ သဟသာ။
Dunnivatthā anākappā, asallekkhetvā ca sahasā;
ဒူရေ အစ္စ စိရံ လဟုံ၊ တထေဝ ပိဏ္ဍစာရိကော။
Dūre acca ciraṃ lahuṃ, tatheva piṇḍacāriko.
ပဋိစ္ဆန္နောဝ ဂစ္ဆေယ္ယ၊ သုံသဝုတောက္ခိတ္တစက္ခု။
Paṭicchannova gaccheyya, suṃsavutokkhittacakkhu;
ဥက္ခိတ္တောဇ္ဇဂ္ဃိကာသဒ္ဒော၊ တယော စေဝ ပစာလနာ။
Ukkhittojjagghikāsaddo, tayo ceva pacālanā.
ခမ္ဘောဂုဏ္ဌိဥက္ကုဋိကာ၊ သလ္လက္ခေတ္ဝာ စ သဟသာ။
Khambhoguṇṭhiukkuṭikā, sallakkhetvā ca sahasā;
ဒူရေ အစ္စ စိရံ လဟုံ၊ အာသနကံ ကဋစ္ဆုကာ။
Dūre acca ciraṃ lahuṃ, āsanakaṃ kaṭacchukā.
ဘာဇနံ ဝာ ဌပေတိ စ၊ ဥစ္စာရေတ္ဝာ ပဏာမေတ္ဝာ။
Bhājanaṃ vā ṭhapeti ca, uccāretvā paṇāmetvā;
ပဋိဂ္ဂဟေ န ဥလ္လောကေ၊ သူပေသုပိ တထေဝ တံ။
Paṭiggahe na ulloke, sūpesupi tatheva taṃ.
ဘိက္ခု သင္ဃာဋိယာ ဆာဒေ၊ ပဋိစ္ဆန္နေဝ ဂစ္ဆိယံ။
Bhikkhu saṅghāṭiyā chāde, paṭicchanneva gacchiyaṃ;
သံဝုတောက္ခိတ္တစက္ခု စ၊ ဥက္ခိတ္တောဇ္ဇဂ္ဃိကာယ စ။
Saṃvutokkhittacakkhu ca, ukkhittojjagghikāya ca;
အပ္ပသဒ္ဒော တယော စာလာ၊ ခမ္ဘောဂုဏ္ဌိကဥက္ကုဋိ။
Appasaddo tayo cālā, khambhoguṇṭhikaukkuṭi.
ပဌမာသနဝက္ကာရ ၊ ပာနိယံ ပရိဘောဇနီ။
Paṭhamāsanavakkāra , pāniyaṃ paribhojanī;
ပစ္ဆာကင္ခတိ ဘုဉ္ဇေယ္ယ၊ ဩပိလာပေယ္ယ ဥဒ္ဓရေ။
Pacchākaṅkhati bhuñjeyya, opilāpeyya uddhare.
ပဋိသာမေယ္ယ သမ္မဇ္ဇေ၊ ရိတ္တံ တုစ္ဆံ ဥပဋ္ဌပေ။
Paṭisāmeyya sammajje, rittaṃ tucchaṃ upaṭṭhape;
ဟတ္ထဝိကာရေ ဘိန္ဒေယ္ယ၊ ဝတ္တိဒံ ပိဏ္ဍစာရိကေ။
Hatthavikāre bhindeyya, vattidaṃ piṇḍacārike.
ပာနီ ပရိ အဂ္ဂိရဏိ၊ နက္ခတ္တဒိသစောရာ စ။
Pānī pari aggiraṇi, nakkhattadisacorā ca;
သဗ္ဗံ နတ္ထီတိ ကောဋ္ဋေတ္ဝာ၊ ပတ္တံသေ စီဝရံ တတော။
Sabbaṃ natthīti koṭṭetvā, pattaṃse cīvaraṃ tato.
ဣဒာနိ အံသေ လဂ္ဂေတ္ဝာ၊ တိမဏ္ဍလံ ပရိမဏ္ဍလံ။
Idāni aṃse laggetvā, timaṇḍalaṃ parimaṇḍalaṃ;
ယထာ ပိဏ္ဍစာရိဝတ္တံ၊ နယေ အာရညကေသုပိ။
Yathā piṇḍacārivattaṃ, naye āraññakesupi.
ပတ္တံသေ စီဝရံ သီသေ၊ အာရောဟိတ္ဝာ စ ပာနိယံ။
Pattaṃse cīvaraṃ sīse, ārohitvā ca pāniyaṃ;
ပရိဘောဇနိယံ အဂ္ဂိ၊ အရဏီ စာပိ ကတ္တရံ။
Paribhojaniyaṃ aggi, araṇī cāpi kattaraṃ.
နက္ခတ္တံ သပ္ပဒေသံ ဝာ၊ ဒိသာပိ ကုသလော ဘဝေ။
Nakkhattaṃ sappadesaṃ vā, disāpi kusalo bhave;
သတ္တုတ္တမေန ပညတ္တံ၊ ဝတ္တံ အာရညကေသုမေ။
Sattuttamena paññattaṃ, vattaṃ āraññakesume.
အဇ္ဈောကာသေ ဩကိရိံသု၊ ဥဇ္ဈာယန္တိ စ ပေသလာ။
Ajjhokāse okiriṃsu, ujjhāyanti ca pesalā;
သစေ ဝိဟာရော ဥက္လာပော၊ ပဌမံ ပတ္တစီဝရံ။
Sace vihāro uklāpo, paṭhamaṃ pattacīvaraṃ.
ဘိသိဗိဗ္ဗောဟနံ မဉ္စံ၊ ပီဌဉ္စ ခေဠမလ္လကံ။
Bhisibibbohanaṃ mañcaṃ, pīṭhañca kheḷamallakaṃ;
အပသ္သေနုလ္လောကကဏ္ဏာ၊ ဂေရုကာ ကာဠ အကတာ။
Apassenullokakaṇṇā, gerukā kāḷa akatā.
သင္ကာရံ ဘိက္ခုသာမန္တာ၊ သေနာဝိဟာရပာနိယံ။
Saṅkāraṃ bhikkhusāmantā, senāvihārapāniyaṃ;
ပရိဘောဇနသာမန္တာ၊ ပဋိဝာတေ စ အင္ဂဏေ။
Paribhojanasāmantā, paṭivāte ca aṅgaṇe.
အဓောဝာတေ အတ္ထရဏံ၊ ပဋိပာဒကမဉ္စော စ။
Adhovāte attharaṇaṃ, paṭipādakamañco ca;
ပီဌံ ဘိသိ နိသီဒနံ၊ မလ္လကံ အပသ္သေန စ။
Pīṭhaṃ bhisi nisīdanaṃ, mallakaṃ apassena ca.
ပတ္တစီဝရံ ဘူမိ စ၊ ပာရန္တံ ဩရတော ဘောဂံ။
Pattacīvaraṃ bhūmi ca, pārantaṃ orato bhogaṃ;
ပုရတ္ထိမာ စ ပစ္ဆိမာ၊ ဥတ္တရာ အထ ဒက္ခိဏာ။
Puratthimā ca pacchimā, uttarā atha dakkhiṇā.
သီတုဏ္ဟေ စ ဒိဝာ ရတ္တိံ၊ ပရိဝေဏဉ္စ ကောဋ္ဌကော။
Sītuṇhe ca divā rattiṃ, pariveṇañca koṭṭhako;
ဥပဋ္ဌာနဂ္ဂိသာလာ စ၊ ဝစ္စကုဋီ စ ပာနိယံ။
Upaṭṭhānaggisālā ca, vaccakuṭī ca pāniyaṃ.
အာစမနကုမ္ဘိ ဝုဍ္ဎေ စ၊ ဥဒ္ဒေသပုစ္ဆနာ သဇ္ဈာ။
Ācamanakumbhi vuḍḍhe ca, uddesapucchanā sajjhā;
ဓမ္မော ပဒီပံ ဝိဇ္ဈာပေ၊ န ဝိဝရေ နပိ ထကေ။
Dhammo padīpaṃ vijjhāpe, na vivare napi thake.
ယေန ဝုဍ္ဎော ပရိဝတ္တိ၊ ကဏ္ဏေနပိ န ဃဋ္ဋယေ။
Yena vuḍḍho parivatti, kaṇṇenapi na ghaṭṭaye;
ပညပေသိ မဟာဝီရော၊ ဝတ္တံ သေနာသနေသု တံ။
Paññapesi mahāvīro, vattaṃ senāsanesu taṃ.
နိဝာရိယမာနာ ဒ္ဝာရံ၊ မုစ္ဆိတုဇ္ဈန္တိ ပေသလာ။
Nivāriyamānā dvāraṃ, mucchitujjhanti pesalā;
ဆာရိကံ ဆဍ္ဍယေ ဇန္တာ၊ ပရိဘဏ္ဍံ တထေဝ စ။
Chārikaṃ chaḍḍaye jantā, paribhaṇḍaṃ tatheva ca.
ပရိဝေဏံ ကောဋ္ဌကော သာလာ၊ စုဏ္ဏမတ္တိကဒောဏိကာ။
Pariveṇaṃ koṭṭhako sālā, cuṇṇamattikadoṇikā;
မုခံ ပုရတော န ထေရေ၊ န နဝေ ဥသ္သဟတိ သစေ။
Mukhaṃ purato na there, na nave ussahati sace.
ပုရတော ဥပရိမဂ္ဂော၊ စိက္ခလ္လံ မတ္တိ ပီဌကံ။
Purato uparimaggo, cikkhallaṃ matti pīṭhakaṃ;
ဝိဇ္ဈာပေတ္ဝာ ထကေတ္ဝာ စ၊ ဝတ္တံ ဇန္တာဃရေသုမေ။
Vijjhāpetvā thaketvā ca, vattaṃ jantāgharesume.
နာစမေတိ ယထာဝုဍ္ဎံ၊ ပဋိပာဋိ စ သဟသာ။
Nācameti yathāvuḍḍhaṃ, paṭipāṭi ca sahasā;
ဥဗ္ဘဇိ နိတ္ထုနော ကဋ္ဌံ၊ ဝစ္စံ ပသ္သာဝ ခေဠကံ။
Ubbhaji nitthuno kaṭṭhaṃ, vaccaṃ passāva kheḷakaṃ.
ဖရုသာ ကူပ သဟသာ၊ ဥဗ္ဘဇိ စပု သေသေန။
Pharusā kūpa sahasā, ubbhaji capu sesena;
ဗဟိ အန္တော စ ဥက္ကာသေ၊ ရဇ္ဇု အတရမာနဉ္စ။
Bahi anto ca ukkāse, rajju ataramānañca.
သဟသာ ဥဗ္ဘဇိ ဌိတေ၊ နိတ္ထုနေ ကဋ္ဌ ဝစ္စဉ္စ။
Sahasā ubbhaji ṭhite, nitthune kaṭṭha vaccañca;
ပသ္သာဝ ခေဠ ဖရုသာ၊ ကူပဉ္စ ဝစ္စပာဒုကေ။
Passāva kheḷa pharusā, kūpañca vaccapāduke.
နာတိသဟသာ ဥဗ္ဘဇိ၊ ပာဒုကာယ စပုစပု။
Nātisahasā ubbhaji, pādukāya capucapu;
န သေသယေ ပဋိစ္ဆာဒေ၊ ဥဟတပိဓရေန စ။
Na sesaye paṭicchāde, uhatapidharena ca.
ဝစ္စကုဋီ ပရိဘဏ္ဍံ၊ ပရိဝေဏဉ္စ ကောဋ္ဌကော။
Vaccakuṭī paribhaṇḍaṃ, pariveṇañca koṭṭhako;
အာစမနေ စ ဥဒကံ၊ ဝတ္တံ ဝစ္စကုဋီသုမေ။
Ācamane ca udakaṃ, vattaṃ vaccakuṭīsume.
ဥပာဟနာ ဒန္တကဋ္ဌံ၊ မုခောဒကဉ္စ အာသနံ။
Upāhanā dantakaṭṭhaṃ, mukhodakañca āsanaṃ;
ယာဂု ဥဒကံ ဓောဝိတ္ဝာ၊ ဥဒ္ဓာရုက္လာပ ဂာမ စ။
Yāgu udakaṃ dhovitvā, uddhāruklāpa gāma ca.
နိဝာသနာ ကာယဗန္ဓာ၊ သဂုဏံ ပတ္တသောဒကံ။
Nivāsanā kāyabandhā, saguṇaṃ pattasodakaṃ;
ပစ္ဆာ တိမဏ္ဍလော စေဝ၊ ပရိမဏ္ဍလ ဗန္ဓနံ။
Pacchā timaṇḍalo ceva, parimaṇḍala bandhanaṃ.
သဂုဏံ ဓောဝိတ္ဝာ ပစ္ဆာ၊ နာတိဒူရေ ပဋိဂ္ဂဟေ။
Saguṇaṃ dhovitvā pacchā, nātidūre paṭiggahe;
ဘဏမာနသ္သ အာပတ္တိ၊ ပဌမာဂန္တ္ဝာန အာသနံ။
Bhaṇamānassa āpatti, paṭhamāgantvāna āsanaṃ.
ဥဒကံ ပီဌကထလိ၊ ပစ္စုဂ္ဂန္တ္ဝာ နိဝာသနံ။
Udakaṃ pīṭhakathali, paccuggantvā nivāsanaṃ;
ဩတာပေ နိဒဟိ ဘင္ဂော၊ ဩဘောဂေ ဘုဉ္ဇိတု နမေ။
Otāpe nidahi bhaṅgo, obhoge bhuñjitu name.
ပာနီယံ ဥဒကံ နီစံ၊ မုဟုတ္တံ န စ နိဒဟေ။
Pānīyaṃ udakaṃ nīcaṃ, muhuttaṃ na ca nidahe;
ပတ္တစီဝရံ ဘူမိ စ၊ ပာရန္တံ ဩရတော ဘောဂံ။
Pattacīvaraṃ bhūmi ca, pārantaṃ orato bhogaṃ.
ဥဒ္ဓရေ ပဋိသာမေ စ၊ ဥက္လာပော စ နဟာယိတုံ။
Uddhare paṭisāme ca, uklāpo ca nahāyituṃ;
သီတံ ဥဏ္ဟံ ဇန္တာဃရံ၊ စုဏ္ဏံ မတ္တိက ပိဋ္ဌိတော။
Sītaṃ uṇhaṃ jantāgharaṃ, cuṇṇaṃ mattika piṭṭhito.
ပီဌဉ္စ စီဝရံ စုဏ္ဏံ၊ မတ္တိကုသ္သဟတိ မုခံ။
Pīṭhañca cīvaraṃ cuṇṇaṃ, mattikussahati mukhaṃ;
ပုရတော ထေရေ နဝေ စ၊ ပရိကမ္မဉ္စ နိက္ခမေ။
Purato there nave ca, parikammañca nikkhame.
ပုရတော ဥဒကေ န္ဟာတေ၊ နိဝာသေတ္ဝာ ဥပဇ္ဈာယံ။
Purato udake nhāte, nivāsetvā upajjhāyaṃ;
နိဝာသနဉ္စ သင္ဃာဋိ၊ ပီဌကံ အာသနေန စ။
Nivāsanañca saṅghāṭi, pīṭhakaṃ āsanena ca.
ပာဒော ပီဌံ ကထလိဉ္စ၊ ပာနီယုဒ္ဒေသပုစ္ဆနာ။
Pādo pīṭhaṃ kathaliñca, pānīyuddesapucchanā;
ဥက္လာပံ သုသောဓေယ္ယ၊ ပဌမံ ပတ္တစီဝရံ။
Uklāpaṃ susodheyya, paṭhamaṃ pattacīvaraṃ.
နိသီဒနပစ္စတ္ထရဏံ၊ ဘိသိ ဗိဗ္ဗောဟနာနိ စ။
Nisīdanapaccattharaṇaṃ, bhisi bibbohanāni ca;
မဉ္စော ပီဌံ ပဋိပာဒံ၊ မလ္လကံ အပသ္သေန စ။
Mañco pīṭhaṃ paṭipādaṃ, mallakaṃ apassena ca.
ဘူမ သန္တာန အာလောက၊ ဂေရုကာ ကာဠ အကတာ။
Bhūma santāna āloka, gerukā kāḷa akatā;
ဘူမတ္ထရပဋိပာဒာ၊ မဉ္စော ပီဌံ ဗိဗ္ဗောဟနံ။
Bhūmattharapaṭipādā, mañco pīṭhaṃ bibbohanaṃ.
နိသီဒတ္ထရဏံ ခေဠ၊ အပသ္သေ ပတ္တစီဝရံ။
Nisīdattharaṇaṃ kheḷa, apasse pattacīvaraṃ;
ပုရတ္ထိမာ ပစ္ဆိမာ စ၊ ဥတ္တရာ အထ ဒက္ခိဏာ။
Puratthimā pacchimā ca, uttarā atha dakkhiṇā.
သီတုဏ္ဟဉ္စ ဒိဝာ ရတ္တိံ၊ ပရိဝေဏဉ္စ ကောဋ္ဌကော။
Sītuṇhañca divā rattiṃ, pariveṇañca koṭṭhako;
ဥပဋ္ဌာနဂ္ဂိသာလာ စ၊ ဝစ္စပာနိယဘောဇနီ။
Upaṭṭhānaggisālā ca, vaccapāniyabhojanī.
အာစမံ အနဘိရတိ၊ ကုက္ကုစ္စံ ဒိဋ္ဌိ စ ဂရု။
Ācamaṃ anabhirati, kukkuccaṃ diṭṭhi ca garu;
မူလမာနတ္တအဗ္ဘာနံ၊ တဇ္ဇနီယံ နိယသ္သကံ။
Mūlamānattaabbhānaṃ, tajjanīyaṃ niyassakaṃ.
ပဗ္ဗာဇ ပဋိသာရဏီ၊ ဥက္ခေပဉ္စ ကတံ ယဒိ။
Pabbāja paṭisāraṇī, ukkhepañca kataṃ yadi;
ဓောဝေ ကာတဗ္ဗံ ရဇဉ္စ၊ ရဇေ သမ္ပရိဝတ္တကံ။
Dhove kātabbaṃ rajañca, raje samparivattakaṃ.
ပတ္တဉ္စ စီဝရဉ္စာပိ၊ ပရိက္ခာရဉ္စ ဆေဒနံ။
Pattañca cīvarañcāpi, parikkhārañca chedanaṃ;
ပရိကမ္မံ ဝေယ္ယာဝစ္စံ၊ ပစ္ဆာ ပိဏ္ဍံ ပဝိသနံ။
Parikammaṃ veyyāvaccaṃ, pacchā piṇḍaṃ pavisanaṃ.
န သုသာနံ ဒိသာ စေဝ၊ ယာဝဇီဝံ ဥပဋ္ဌဟေ။
Na susānaṃ disā ceva, yāvajīvaṃ upaṭṭhahe;
သဒ္ဓိဝိဟာရိကေနေတံ၊ ဝတ္တုပဇ္ဈာယကေသုမေ။
Saddhivihārikenetaṃ, vattupajjhāyakesume.
ဩဝာဒသာသနုဒ္ဒေသာ၊ ပုစ္ဆာ ပတ္တဉ္စ စီဝရံ။
Ovādasāsanuddesā, pucchā pattañca cīvaraṃ;
ပရိက္ခာရော ဂိလာနော စ၊ န ပစ္ဆာသမဏော ဘဝေ။
Parikkhāro gilāno ca, na pacchāsamaṇo bhave.
ဥပဇ္ဈာယေသု ယေ ဝတ္တာ၊ ဧဝံ အာစရိယေသုပိ။
Upajjhāyesu ye vattā, evaṃ ācariyesupi;
သဒ္ဓိဝိဟာရိကေ ဝတ္တာ၊ တထေဝ အန္တေဝာသိကေ။
Saddhivihārike vattā, tatheva antevāsike.
အာဂန္တုကေသု ယေ ဝတ္တာ၊ ပုန အာဝာသိကေသု စ။
Āgantukesu ye vattā, puna āvāsikesu ca;
ဂမိကာနုမောဒနိကာ၊ ဘတ္တဂ္ဂေ ပိဏ္ဍစာရိကေ။
Gamikānumodanikā, bhattagge piṇḍacārike.
အာရညကေသု ယံ ဝတ္တံ၊ ယဉ္စ သေနာသနေသုပိ။
Āraññakesu yaṃ vattaṃ, yañca senāsanesupi;
ဇန္တာဃရေ ဝစ္စကုဋီ၊ ဥပဇ္ဈာ သဒ္ဓိဝိဟာရိကေ။
Jantāghare vaccakuṭī, upajjhā saddhivihārike.
အာစရိယေသု ယံ ဝတ္တံ၊ တထေဝ အန္တေဝာသိကေ။
Ācariyesu yaṃ vattaṃ, tatheva antevāsike;
ဧကူနဝီသတိ ဝတ္ထူ၊ ဝတ္တာ စုဒ္ဒသ ခန္ဓကေ။
Ekūnavīsati vatthū, vattā cuddasa khandhake.
ဝတ္တံ အပရိပူရေန္တော၊ န သီလံ ပရိပူရတိ။
Vattaṃ aparipūrento, na sīlaṃ paripūrati;
အသုဒ္ဓသီလော ဒုပ္ပညော၊ စိတ္တေကဂ္ဂံ န ဝိန္ဒတိ။
Asuddhasīlo duppañño, cittekaggaṃ na vindati.
ဝိက္ခိတ္တစိတ္တောနေကဂ္ဂော၊ သမ္မာ ဓမ္မံ န ပသ္သတိ။
Vikkhittacittonekaggo, sammā dhammaṃ na passati;
အပသ္သမာနော သဒ္ဓမ္မံ၊ ဒုက္ခာ န ပရိမုစ္စတိ။
Apassamāno saddhammaṃ, dukkhā na parimuccati.
ယံ ဝတ္တံ ပရိပူရေန္တော၊ သီလမ္ပိ ပရိပူရတိ။
Yaṃ vattaṃ paripūrento, sīlampi paripūrati;
ဝိသုဒ္ဓသီလော သပ္ပညော၊ စိတ္တေကဂ္ဂမ္ပိ ဝိန္ဒတိ။
Visuddhasīlo sappañño, cittekaggampi vindati.
အဝိက္ခိတ္တစိတ္တော ဧကဂ္ဂော၊ သမ္မာ ဓမ္မံ ဝိပသ္သတိ။
Avikkhittacitto ekaggo, sammā dhammaṃ vipassati;
သမ္ပသ္သမာနော သဒ္ဓမ္မံ၊ ဒုက္ခာ သော ပရိမုစ္စတိ။
Sampassamāno saddhammaṃ, dukkhā so parimuccati.
တသ္မာ ဟိ ဝတ္တံ ပူရေယ္ယ၊ ဇိနပုတ္တော ဝိစက္ခဏော။
Tasmā hi vattaṃ pūreyya, jinaputto vicakkhaṇo;
ဩဝာဒံ ဗုဒ္ဓသေဋ္ဌသ္သ၊ တတော နိဗ္ဗာနမေဟိတီတိ။
Ovādaṃ buddhaseṭṭhassa, tato nibbānamehitīti.
ဝတ္တက္ခန္ဓကံ နိဋ္ဌိတံ။
Vattakkhandhakaṃ niṭṭhitaṃ.
Footnotes:
