| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗಪಾಳಿ • Cūḷavaggapāḷi |
೧೪. ಅನ್ತೇವಾಸಿಕವತ್ತಕಥಾ
14. Antevāsikavattakathā
೩೮೧. ತೇನ ಖೋ ಪನ ಸಮಯೇನ ಆಚರಿಯಾ ಅನ್ತೇವಾಸಿಕೇಸು ನ ಸಮ್ಮಾ ವತ್ತನ್ತಿ। ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ॰… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಚರಿಯಾ ಅನ್ತೇವಾಸಿಕೇಸು ನ ಸಮ್ಮಾ ವತ್ತಿಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ। ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಆಚರಿಯಾ ಅನ್ತೇವಾಸಿಕೇಸು ನ ಸಮ್ಮಾ ವತ್ತನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ…ಪೇ॰… ವಿಗರಹಿತ್ವಾ…ಪೇ॰… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –
381. Tena kho pana samayena ācariyā antevāsikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ācariyā antevāsikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ācariyā antevāsikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
೩೮೨. ‘‘ತೇನ ಹಿ, ಭಿಕ್ಖವೇ, ಆಚರಿಯಾನಂ ಅನ್ತೇವಾಸಿಕೇಸು ವತ್ತಂ ಪಞ್ಞಪೇಸ್ಸಾಮಿ ಯಥಾ ಆಚರಿಯೇಹಿ ಅನ್ತೇವಾಸಿಕೇಸು ಸಮ್ಮಾ ವತ್ತಿತಬ್ಬಂ। 1 ಆಚರಿಯೇನ, ಭಿಕ್ಖವೇ, ಅನ್ತೇವಾಸಿಕಮ್ಹಿ ಸಮ್ಮಾ ವತ್ತಿತಬ್ಬಂ। ತತ್ರಾಯಂ ಸಮ್ಮಾವತ್ತನಾ –
382. ‘‘Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. 2 Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā –
‘‘ಆಚರಿಯೇನ, ಭಿಕ್ಖವೇ, ಅನ್ತೇವಾಸಿಕೋ ಸಙ್ಗಹೇತಬ್ಬೋ ಅನುಗ್ಗಹೇತಬ್ಬೋ ಉದ್ದೇಸೇನ ಪರಿಪುಚ್ಛಾಯ ಓವಾದೇನ ಅನುಸಾಸನಿಯಾ। ಸಚೇ ಆಚರಿಯಸ್ಸ ಪತ್ತೋ ಹೋತಿ, ಅನ್ತೇವಾಸಿಕಸ್ಸ ಪತ್ತೋ ನ ಹೋತಿ, ಆಚರಿಯೇನ ಅನ್ತೇವಾಸಿಕಸ್ಸ ಪತ್ತೋ ದಾತಬ್ಬೋ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಪತ್ತೋ ಉಪ್ಪಜ್ಜಿಯೇಥಾತಿ। ಸಚೇ ಆಚರಿಯಸ್ಸ ಚೀವರಂ ಹೋತಿ, ಅನ್ತೇವಾಸಿಕಸ್ಸ ಚೀವರಂ ನ ಹೋತಿ, ಆಚರಿಯೇನ ಅನ್ತೇವಾಸಿಕಸ್ಸ ಚೀವರಂ ದಾತಬ್ಬಂ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ಉಪ್ಪಜ್ಜಿಯೇಥಾತಿ। ಸಚೇ ಆಚರಿಯಸ್ಸ ಪರಿಕ್ಖಾರೋ ಹೋತಿ, ಅನ್ತೇವಾಸಿಕಸ್ಸ ಪರಿಕ್ಖಾರೋ ನ ಹೋತಿ, ಆಚರಿಯೇನ ಅನ್ತೇವಾಸಿಕಸ್ಸ ಪರಿಕ್ಖಾರೋ ದಾತಬ್ಬೋ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಪರಿಕ್ಖಾರೋ ಉಪ್ಪಜ್ಜಿಯೇಥಾತಿ।
‘‘Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ – kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ – kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ – kinti nu kho antevāsikassa parikkhāro uppajjiyethāti.
‘‘ಸಚೇ ಅನ್ತೇವಾಸಿಕೋ ಗಿಲಾನೋ ಹೋತಿ, ಕಾಲಸ್ಸೇವ ಉಟ್ಠಾಯ ದನ್ತಕಟ್ಠಂ ದಾತಬ್ಬಂ, ಮುಖೋದಕಂ ದಾತಬ್ಬಂ, ಆಸನಂ ಪಞ್ಞಪೇತಬ್ಬಂ। ಸಚೇ ಯಾಗು ಹೋತಿ , ಭಾಜನಂ ಧೋವಿತ್ವಾ ಯಾಗು ಉಪನಾಮೇತಬ್ಬಾ। ಯಾಗುಂ ಪೀತಸ್ಸ ಉದಕಂ ದತ್ವಾ ಭಾಜನಂ ಪಟಿಗ್ಗಹೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಧೋವಿತ್ವಾ ಪಟಿಸಾಮೇತಬ್ಬಂ । ಅನ್ತೇವಾಸಿಕಮ್ಹಿ ವುಟ್ಠಿತೇ ಆಸನಂ ಉದ್ಧರಿತಬ್ಬಂ। ಸಚೇ ಸೋ ದೇಸೋ ಉಕ್ಲಾಪೋ ಹೋತಿ, ಸೋ ದೇಸೋ ಸಮ್ಮಜ್ಜಿತಬ್ಬೋ।
‘‘Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti , bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ . Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘ಸಚೇ ಅನ್ತೇವಾಸಿಕೋ ಗಾಮಂ ಪವಿಸಿತುಕಾಮೋ ಹೋತಿ, ನಿವಾಸನಂ ದಾತಬ್ಬಂ, ಪಟಿನಿವಾಸನಂ ಪಟಿಗ್ಗಹೇತಬ್ಬಂ, ಕಾಯಬನ್ಧನಂ ದಾತಬ್ಬಂ, ಸಗುಣಂ ಕತ್ವಾ ಸಙ್ಘಾಟಿಯೋ ದಾತಬ್ಬಾ, ಧೋವಿತ್ವಾ ಪತ್ತೋ ಸೋದಕೋ ದಾತಬ್ಬೋ।
‘‘Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.
‘‘ಏತ್ತಾವತಾ ನಿವತ್ತಿಸ್ಸತೀತಿ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಟಿನಿವಾಸನಂ ದಾತಬ್ಬಂ, ನಿವಾಸನಂ ಪಟಿಗ್ಗಹೇತಬ್ಬಂ। ಸಚೇ ಚೀವರಂ ಸಿನ್ನಂ ಹೋತಿ, ಮುಹುತ್ತಂ ಉಣ್ಹೇ ಓತಾಪೇತಬ್ಬಂ, ನ ಚ ಉಣ್ಹೇ ಚೀವರಂ ನಿದಹಿತಬ್ಬಂ। ಚೀವರಂ ಸಙ್ಘರಿತಬ್ಬಂ। ಚೀವರಂ ಸಙ್ಘರನ್ತೇನ ಚತುರಙ್ಗುಲಂ ಕಣ್ಣಂ ಉಸ್ಸಾರೇತ್ವಾ ಚೀವರಂ ಸಙ್ಘರಿತಬ್ಬಂ – ಮಾ ಮಜ್ಝೇ ಭಙ್ಗೋ ಅಹೋಸೀತಿ। ಓಭೋಗೇ ಕಾಯಬನ್ಧನಂ ಕಾತಬ್ಬಂ।
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘ಸಚೇ ಪಿಣ್ಡಪಾತೋ ಹೋತಿ, ಅನ್ತೇವಾಸಿಕೋ ಚ ಭುಞ್ಜಿತುಕಾಮೋ ಹೋತಿ, ಉದಕಂ ದತ್ವಾ ಪಿಣ್ಡಪಾತೋ ಉಪನಾಮೇತಬ್ಬೋ। ಅನ್ತೇವಾಸಿಕೋ ಪಾನೀಯೇನ ಪುಚ್ಛಿತಬ್ಬೋ। ಭುತ್ತಾವಿಸ್ಸ ಉದಕಂ ದತ್ವಾ ಪತ್ತಂ ಪಟಿಗ್ಗಹೇತ್ವಾ ನೀಚಂ ಕತ್ವಾ ಸಾಧುಕಂ ಅಪ್ಪಟಿಘಂಸನ್ತೇನ ಧೋವಿತ್ವಾ ವೋದಕಂ ಕತ್ವಾ ಮುಹುತ್ತಂ ಉಣ್ಹೇ ಓತಾಪೇತಬ್ಬೋ, ನ ಚ ಉಣ್ಹೇ ಪತ್ತೋ ನಿದಹಿತಬ್ಬೋ। ಪತ್ತಚೀವರಂ ನಿಕ್ಖಿಪಿತಬ್ಬಂ। ಪತ್ತಂ ನಿಕ್ಖಿಪನ್ತೇನ…ಪೇ॰… ಚೀವರಂ ನಿಕ್ಖಿಪನ್ತೇನ…ಪೇ॰… ಪಾರತೋ ಅನ್ತಂ ಓರತೋ ಭೋಗಂ ಕತ್ವಾ ಚೀವರಂ ನಿಕ್ಖಿಪಿತಬ್ಬಂ। ಅನ್ತೇವಾಸಿಕಮ್ಹಿ ಉಟ್ಠಿತೇ ಆಸನಂ ಉದ್ಧರಿತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಪಟಿಸಾಮೇತಬ್ಬಂ। ಸಚೇ ಸೋ ದೇಸೋ ಉಕ್ಲಾಪೋ ಹೋತಿ, ಸೋ ದೇಸೋ ಸಮ್ಮಜ್ಜಿತಬ್ಬೋ।
‘‘Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe… cīvaraṃ nikkhipantena…pe… pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘ಸಚೇ ಅನ್ತೇವಾಸಿಕೋ ನಹಾಯಿತುಕಾಮೋ ಹೋತಿ, ನಹಾನಂ ಪಟಿಯಾದೇತಬ್ಬಂ। ಸಚೇ ಸೀತೇನ ಅತ್ಥೋ ಹೋತಿ, ಸೀತಂ ಪಟಿಯಾದೇತಬ್ಬಂ। ಸಚೇ ಉಣ್ಹೇನ ಅತ್ಥೋ ಹೋತಿ, ಉಣ್ಹಂ ಪಟಿಯಾದೇತಬ್ಬಂ।
‘‘Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘ಸಚೇ ಅನ್ತೇವಾಸಿಕೋ ಜನ್ತಾಘರಂ ಪವಿಸಿತುಕಾಮೋ ಹೋತಿ, ಚುಣ್ಣಂ ಸನ್ನೇತಬ್ಬಂ, ಮತ್ತಿಕಾ ತೇಮೇತಬ್ಬಾ, ಜನ್ತಾಘರಪೀಠಂ ಆದಾಯ 3 ಗನ್ತ್ವಾ ಜನ್ತಾಘರಪೀಠಂ ದತ್ವಾ ಚೀವರಂ ಪಟಿಗ್ಗಹೇತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ, ಚುಣ್ಣಂ ದಾತಬ್ಬಂ, ಮತ್ತಿಕಾ ದಾತಬ್ಬಾ। ಸಚೇ ಉಸ್ಸಹತಿ ಜನ್ತಾಘರಂ ಪವಿಸಿತಬ್ಬಂ। ಜನ್ತಾಘರಂ ಪವಿಸನ್ತೇನ ಮತ್ತಿಕಾಯ ಮುಖಂ ಮಕ್ಖೇತ್ವಾ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಂ ಪವಿಸಿತಬ್ಬಂ। ನ ಥೇರೇ ಭಿಕ್ಖೂ ಅನುಪಖಜ್ಜ ನಿಸೀದಿತಬ್ಬಂ। ನ ನವಾ ಭಿಕ್ಖೂ ಆಸನೇನ ಪಟಿಬಾಹಿತಬ್ಬಾ । ಜನ್ತಾಘರೇ ಅನ್ತೇವಾಸಿಕಸ್ಸ ಪರಿಕಮ್ಮಂ ಕಾತಬ್ಬಂ। ಜನ್ತಾಘರಾ ನಿಕ್ಖಮನ್ತೇನ ಜನ್ತಾಘರಪೀಠಂ ಆದಾಯ ಪುರತೋ ಚ ಪಚ್ಛತೋ ಚ ಪಟಿಚ್ಛಾದೇತ್ವಾ ಜನ್ತಾಘರಾ ನಿಕ್ಖಮಿತಬ್ಬಂ।
‘‘Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā . Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘ಉದಕೇಪಿ ಅನ್ತೇವಾಸಿಕಸ್ಸ ಪರಿಕಮ್ಮಂ ಕಾತಬ್ಬಂ। ನಹಾತೇನ ಪಠಮತರಂ ಉತ್ತರಿತ್ವಾ ಅತ್ತನೋ ಗತ್ತಂ ವೋದಕಂ ಕತ್ವಾ ನಿವಾಸೇತ್ವಾ ಅನ್ತೇವಾಸಿಕಸ್ಸ ಗತ್ತತೋ ಉದಕಂ ಪಮಜ್ಜಿತಬ್ಬಂ, ನಿವಾಸನಂ ದಾತಬ್ಬಂ, ಸಙ್ಘಾಟಿ ದಾತಬ್ಬಾ, ಜನ್ತಾಘರಪೀಠಂ ಆದಾಯ ಪಠಮತರಂ ಆಗನ್ತ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಅನ್ತೇವಾಸಿಕೋ ಪಾನೀಯೇನ ಪುಚ್ಛಿತಬ್ಬೋ।
‘‘Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.
‘‘ಯಸ್ಮಿಂ ವಿಹಾರೇ ಅನ್ತೇವಾಸಿಕೋ ವಿಹರತಿ, ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಸಚೇ ಉಸ್ಸಹತಿ, ಸೋಧೇತಬ್ಬೋ। ವಿಹಾರಂ ಸೋಧೇನ್ತೇನ ಪಠಮಂ ಪತ್ತಚೀವರಂ ನೀಹರಿತ್ವಾ ಏಕಮನ್ತಂ ನಿಕ್ಖಿಪಿತಬ್ಬಂ…ಪೇ॰… ಆಚಮನಕುಮ್ಭಿಯಾ ಉದಕಂ ನ ಹೋತಿ, ಆಚಮನಕುಮ್ಭಿಯಾ ಉದಕಂ ಆಸಿಞ್ಚಿತಬ್ಬಂ।
‘‘Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘ಸಚೇ ಅನ್ತೇವಾಸಿಕಸ್ಸ ಅನಭಿರತಿ ಉಪ್ಪನ್ನಾ ಹೋತಿ, ಆಚರಿಯೇನ ವೂಪಕಾಸೇತಬ್ಬೋ, ವೂಪಕಾಸಾಪೇತಬ್ಬೋ, ಧಮ್ಮಕಥಾ ವಾಸ್ಸ ಕಾತಬ್ಬಾ। ಸಚೇ ಅನ್ತೇವಾಸಿಕಸ್ಸ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ, ಆಚರಿಯೇನ ವಿನೋದೇತಬ್ಬಂ, ವಿನೋದಾಪೇತಬ್ಬಂ, ಧಮ್ಮಕಥಾ ವಾಸ್ಸ ಕಾತಬ್ಬಾ। ಸಚೇ ಅನ್ತೇವಾಸಿಕಸ್ಸ ದಿಟ್ಠಿಗತಂ ಉಪ್ಪನ್ನಂ ಹೋತಿ, ಆಚರಿಯೇನ ವಿವೇಚೇತಬ್ಬಂ, ವಿವೇಚಾಪೇತಬ್ಬಂ, ಧಮ್ಮಕಥಾ ವಾಸ್ಸ ಕಾತಬ್ಬಾ। ಸಚೇ ಅನ್ತೇವಾಸಿಕೋ ಗರುಧಮ್ಮಂ ಅಜ್ಝಾಪನ್ನೋ ಹೋತಿ, ಪರಿವಾಸಾರಹೋ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಸ್ಸ ಪರಿವಾಸಂ ದದೇಯ್ಯಾತಿ। ಸಚೇ ಅನ್ತೇವಾಸಿಕೋ ಮೂಲಾಯಪಟಿಕಸ್ಸನಾರಹೋ ಹೋತಿ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಂ ಮೂಲಾಯ ಪಟಿಕಸ್ಸೇಯ್ಯಾತಿ। ಸಚೇ ಅನ್ತೇವಾಸಿಕೋ ಮಾನತ್ತಾರಹೋ ಹೋತಿ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಸ್ಸ ಮಾನತ್ತಂ ದದೇಯ್ಯಾತಿ। ಸಚೇ ಅನ್ತೇವಾಸಿಕೋ ಅಬ್ಭಾನಾರಹೋ ಹೋತಿ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಂ ಅಬ್ಭೇಯ್ಯಾತಿ। ಸಚೇ ಸಙ್ಘೋ ಅನ್ತೇವಾಸಿಕಸ್ಸ ಕಮ್ಮಂ ಕತ್ತುಕಾಮೋ ಹೋತಿ, ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಸಙ್ಘೋ ಅನ್ತೇವಾಸಿಕಸ್ಸ ಕಮ್ಮಂ ನ ಕರೇಯ್ಯ , ಲಹುಕಾಯ ವಾ ಪರಿಣಾಮೇಯ್ಯಾತಿ। ಕತಂ ವಾ ಪನಸ್ಸ ಹೋತಿ, ಸಙ್ಘೇನ ಕಮ್ಮಂ, ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ, ಆಚರಿಯೇನ ಉಸ್ಸುಕ್ಕಂ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕೋ ಸಮ್ಮಾ ವತ್ತೇಯ್ಯ, ಲೋಮಂ ಪಾತೇಯ್ಯ, ನೇತ್ಥಾರಂ ವತ್ತೇಯ್ಯ, ಸಙ್ಘೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇಯ್ಯಾತಿ।
‘‘Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ – kinti nu kho saṅgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ – kinti nu kho saṅgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ abbheyyāti. Sace saṅgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho saṅgho antevāsikassa kammaṃ na kareyya , lahukāya vā pariṇāmeyyāti. Kataṃ vā panassa hoti, saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho antevāsiko sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘ಸಚೇ ಅನ್ತೇವಾಸಿಕಸ್ಸ ಚೀವರಂ ಧೋವಿತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ಧೋವೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ಧೋವಿಯೇಥಾತಿ। ಸಚೇ ಅನ್ತೇವಾಸಿಕಸ್ಸ ಚೀವರಂ ಕಾತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ಕರೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ಕರಿಯೇಥಾತಿ। ಸಚೇ ಅನ್ತೇವಾಸಿಕಸ್ಸ ರಜನಂ ಪಚಿತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ಪಚೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ರಜನಂ ಪಚಿಯೇಥಾತಿ। ಸಚೇ ಅನ್ತೇವಾಸಿಕಸ್ಸ ಚೀವರಂ ರಜಿತಬ್ಬಂ ಹೋತಿ, ಆಚರಿಯೇನ ಆಚಿಕ್ಖಿತಬ್ಬಂ – ಏವಂ ರಜೇಯ್ಯಾಸೀತಿ, ಉಸ್ಸುಕ್ಕಂ ವಾ ಕಾತಬ್ಬಂ – ಕಿನ್ತಿ ನು ಖೋ ಅನ್ತೇವಾಸಿಕಸ್ಸ ಚೀವರಂ ರಜಿಯೇಥಾತಿ। ಚೀವರಂ ರಜನ್ತೇನ ಸಾಧುಕಂ ಸಮ್ಪರಿವತ್ತಕಂ ಸಮ್ಪರಿವತ್ತಕಂ ರಜಿತಬ್ಬಂ। ನ ಚ ಅಚ್ಛಿನ್ನೇ ಥೇವೇ ಪಕ್ಕಮಿತಬ್ಬಂ। ಸಚೇ ಅನ್ತೇವಾಸಿಕೋ ಗಿಲಾನೋ ಹೋತಿ, ಯಾವಜೀವಂ ಉಪಟ್ಠಾತಬ್ಬೋ, ವುಟ್ಠಾನಮಸ್ಸ ಆಗಮೇತಬ್ಬಂ। ಇದಂ ಖೋ, ಭಿಕ್ಖವೇ, ಆಚರಿಯಾನಂ ಅನ್ತೇವಾಸಿಕೇಸು ವತ್ತಂ ಯಥಾ ಆಚರಿಯೇಹಿ ಅನ್ತೇವಾಸಿಕೇಸು ಸಮ್ಮಾ ವತ್ತಿತಬ್ಬ’’ನ್ತಿ।
‘‘Sace antevāsikassa cīvaraṃ dhovitabbaṃ hoti, ācariyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabba’’nti.
ವತ್ತಕ್ಖನ್ಧಕೋ ಅಟ್ಠಮೋ।
Vattakkhandhako aṭṭhamo.
ಇಮಮ್ಹಿ ಖನ್ಧಕೇ ವತ್ಥೂ ಏಕೂನವೀಸತಿ, ವತ್ತಾ ಚುದ್ದಸ।
Imamhi khandhake vatthū ekūnavīsati, vattā cuddasa.
ತಸ್ಸುದ್ದಾನಂ –
Tassuddānaṃ –
ಸಉಪಾಹನಾ ಛತ್ತಾ ಚ, ಓಗುಣ್ಠಿ ಸೀಸಂ ಪಾನೀಯಂ।
Saupāhanā chattā ca, oguṇṭhi sīsaṃ pānīyaṃ;
ನಾಭಿವಾದೇ ನ ಪುಚ್ಛನ್ತಿ, ಅಹಿ ಉಜ್ಝನ್ತಿ ಪೇಸಲಾ॥
Nābhivāde na pucchanti, ahi ujjhanti pesalā.
ಓಮುಞ್ಚಿ ಛತ್ತಂ ಖನ್ಧೇ ಚ, ಅತರಞ್ಚ ಪಟಿಕ್ಕಮಂ।
Omuñci chattaṃ khandhe ca, atarañca paṭikkamaṃ;
ಪತ್ತಚೀವರಂ ನಿಕ್ಖಿಪಾ, ಪತಿರೂಪಞ್ಚ ಪುಚ್ಛಿತಾ॥
Pattacīvaraṃ nikkhipā, patirūpañca pucchitā.
ಆಸಿಞ್ಚೇಯ್ಯ ಧೋವಿತೇನ, ಸುಕ್ಖೇನಲ್ಲೇನುಪಾಹನಾ।
Āsiñceyya dhovitena, sukkhenallenupāhanā;
ವುಡ್ಢೋ ನವಕೋ ಪುಚ್ಛೇಯ್ಯ, ಅಜ್ಝಾವುಟ್ಠಞ್ಚ ಗೋಚರಾ॥
Vuḍḍho navako puccheyya, ajjhāvuṭṭhañca gocarā.
ಸೇಕ್ಖಾ ವಚ್ಚಾ ಪಾನೀ ಪರಿ, ಕತ್ತರಂ ಕತಿಕಂ ತತೋ।
Sekkhā vaccā pānī pari, kattaraṃ katikaṃ tato;
ಕಾಲಂ ಮುಹುತ್ತಂ ಉಕ್ಲಾಪೋ, ಭೂಮತ್ಥರಣಂ ನೀಹರೇ॥
Kālaṃ muhuttaṃ uklāpo, bhūmattharaṇaṃ nīhare.
ಪಟಿಪಾದೋ ಭಿಸಿಬಿಬ್ಬೋ, ಮಞ್ಚಪೀಠಞ್ಚ ಮಲ್ಲಕಂ।
Paṭipādo bhisibibbo, mañcapīṭhañca mallakaṃ;
ಅಪಸ್ಸೇನುಲ್ಲೋಕಕಣ್ಣಾ, ಗೇರುಕಾ ಕಾಳ ಅಕತಾ॥
Apassenullokakaṇṇā, gerukā kāḷa akatā.
ಸಙ್ಕಾರಞ್ಚ ಭೂಮತ್ಥರಣಂ, ಪಟಿಪಾದಕಂ ಮಞ್ಚಪೀಠಂ।
Saṅkārañca bhūmattharaṇaṃ, paṭipādakaṃ mañcapīṭhaṃ;
ಭಿಸಿ ನಿಸೀದನಮ್ಪಿ, ಮಲ್ಲಕಂ ಅಪಸ್ಸೇನ ಚ॥
Bhisi nisīdanampi, mallakaṃ apassena ca.
ಪತ್ತಚೀವರಂ ಭೂಮಿ ಚ, ಪಾರನ್ತಂ ಓರತೋ ಭೋಗಂ।
Pattacīvaraṃ bhūmi ca, pārantaṃ orato bhogaṃ;
ಪುರತ್ಥಿಮಾ ಪಚ್ಛಿಮಾ ಚ, ಉತ್ತರಾ ಅಥ ದಕ್ಖಿಣಾ॥
Puratthimā pacchimā ca, uttarā atha dakkhiṇā.
ಸೀತುಣ್ಹೇ ಚ ದಿವಾರತ್ತಿಂ, ಪರಿವೇಣಞ್ಚ ಕೋಟ್ಠಕೋ।
Sītuṇhe ca divārattiṃ, pariveṇañca koṭṭhako;
ಉಪಟ್ಠಾನಗ್ಗಿ ಸಾಲಾ ಚ, ವತ್ತಂ ವಚ್ಚಕುಟೀಸು ಚ॥
Upaṭṭhānaggi sālā ca, vattaṃ vaccakuṭīsu ca.
ಪಾನೀ ಪರಿಭೋಜನಿಯಾ, ಕುಮ್ಭಿ ಆಚಮನೇಸು ಚ।
Pānī paribhojaniyā, kumbhi ācamanesu ca;
ನೇವಾಸನಂ ನ ಉದಕಂ, ನ ಪಚ್ಚು ನ ಚ ಪಾನಿಯಂ।
Nevāsanaṃ na udakaṃ, na paccu na ca pāniyaṃ;
ನಾಭಿವಾದೇ ನಪಞ್ಞಪೇ, ಉಜ್ಝಾಯನ್ತಿ ಚ ಪೇಸಲಾ॥
Nābhivāde napaññape, ujjhāyanti ca pesalā.
ವುಡ್ಢಾಸನಞ್ಚ ಉದಕಂ, ಪಚ್ಚುಗ್ಗನ್ತ್ವಾ ಚ ಪಾನಿಯಂ।
Vuḍḍhāsanañca udakaṃ, paccuggantvā ca pāniyaṃ;
ಉಪಾಹನೇ ಏಕಮನ್ತಂ, ಅಭಿವಾದೇ ಚ ಪಞ್ಞಪೇ॥
Upāhane ekamantaṃ, abhivāde ca paññape.
ವುತ್ಥಂ ಗೋಚರಸೇಕ್ಖೋ ಚ, ಠಾನಂ ಪಾನಿಯಭೋಜನಂ।
Vutthaṃ gocarasekkho ca, ṭhānaṃ pāniyabhojanaṃ;
ಕತ್ತರಂ ಕತಿಕಂ ಕಾಲಂ, ನವಕಸ್ಸ ನಿಸಿನ್ನಕೇ॥
Kattaraṃ katikaṃ kālaṃ, navakassa nisinnake.
ಅಭಿವಾದಯೇ ಆಚಿಕ್ಖೇ, ಯಥಾ ಹೇಟ್ಠಾ ತಥಾ ನಯೇ।
Abhivādaye ācikkhe, yathā heṭṭhā tathā naye;
ನಿದ್ದಿಟ್ಠಂ ಸತ್ಥವಾಹೇನ ವತ್ತಂ ಆವಾಸಿಕೇಹಿಮೇ॥
Niddiṭṭhaṃ satthavāhena vattaṃ āvāsikehime.
ಗಮಿಕಾ ದಾರುಮತ್ತಿ ಚ, ವಿವರಿತ್ವಾ ನ ಪುಚ್ಛಿಯ।
Gamikā dārumatti ca, vivaritvā na pucchiya;
ನಸ್ಸನ್ತಿ ಚ ಅಗುತ್ತಞ್ಚ, ಉಜ್ಝಾಯನ್ತಿ ಚ ಪೇಸಲಾ॥
Nassanti ca aguttañca, ujjhāyanti ca pesalā.
ಪಟಿಸಾಮೇತ್ವಾ ಥಕೇತ್ವಾ, ಆಪುಚ್ಛಿತ್ವಾವ ಪಕ್ಕಮೇ।
Paṭisāmetvā thaketvā, āpucchitvāva pakkame;
ಭಿಕ್ಖು ವಾ ಸಾಮಣೇರೋ ವಾ, ಆರಾಮಿಕೋ ಉಪಾಸಕೋ॥
Bhikkhu vā sāmaṇero vā, ārāmiko upāsako.
ಪಾಸಾಣಕೇಸು ಚ ಪುಞ್ಜಂ, ಪಟಿಸಾಮೇ ಥಕೇಯ್ಯ ಚ।
Pāsāṇakesu ca puñjaṃ, paṭisāme thakeyya ca;
ಸಚೇ ಉಸ್ಸಹತಿ ಉಸ್ಸುಕ್ಕಂ, ಅನೋವಸ್ಸೇ ತಥೇವ ಚ॥
Sace ussahati ussukkaṃ, anovasse tatheva ca.
ಸಬ್ಬೋ ಓವಸ್ಸತಿ ಗಾಮಂ, ಅಜ್ಝೋಕಾಸೇ ತಥೇವ ಚ।
Sabbo ovassati gāmaṃ, ajjhokāse tatheva ca;
ಅಪ್ಪೇವಙ್ಗಾನಿ ಸೇಸೇಯ್ಯುಂ, ವತ್ತಂ ಗಮಿಕಭಿಕ್ಖುನಾ॥
Appevaṅgāni seseyyuṃ, vattaṃ gamikabhikkhunā.
ನಾನುಮೋದನ್ತಿ ಥೇರೇನ, ಓಹಾಯ ಚತುಪಞ್ಚಹಿ।
Nānumodanti therena, ohāya catupañcahi;
ವಚ್ಚಿತೋ ಮುಚ್ಛಿತೋ ಆಸಿ, ವತ್ತಾನುಮೋದನೇಸುಮೇ॥
Vaccito mucchito āsi, vattānumodanesume.
ಛಬ್ಬಗ್ಗಿಯಾ ದುನ್ನಿವತ್ಥಾ, ಅಥೋಪಿ ಚ ದುಪ್ಪಾರುತಾ।
Chabbaggiyā dunnivatthā, athopi ca duppārutā;
ಅನಾಕಪ್ಪಾ ಚ ವೋಕ್ಕಮ್ಮ, ಥೇರೇ ಅನುಪಖಜ್ಜನೇ॥
Anākappā ca vokkamma, there anupakhajjane.
ನವೇ ಭಿಕ್ಖೂ ಚ ಸಙ್ಘಾಟಿ, ಉಜ್ಝಾಯನ್ತಿ ಚ ಪೇಸಲಾ।
Nave bhikkhū ca saṅghāṭi, ujjhāyanti ca pesalā;
ತಿಮಣ್ಡಲಂ ನಿವಾಸೇತ್ವಾ, ಕಾಯಸಗುಣಗಣ್ಠಿಕಾ॥
Timaṇḍalaṃ nivāsetvā, kāyasaguṇagaṇṭhikā.
ನ ವೋಕ್ಕಮ್ಮ ಪಟಿಚ್ಛನ್ನಂ, ಸುಸಂವುತೋಕ್ಖಿತ್ತಚಕ್ಖು।
Na vokkamma paṭicchannaṃ, susaṃvutokkhittacakkhu;
ಉಕ್ಖಿತ್ತೋಜ್ಜಗ್ಘಿಕಾಸದ್ದೋ, ತಯೋ ಚೇವ ಪಚಾಲನಾ॥
Ukkhittojjagghikāsaddo, tayo ceva pacālanā.
ಖಮ್ಭೋಗುಣ್ಠಿಉಕ್ಕುಟಿಕಾ, ಪಟಿಚ್ಛನ್ನಂ ಸುಸಂವುತೋ।
Khambhoguṇṭhiukkuṭikā, paṭicchannaṃ susaṃvuto;
ಓಕ್ಖಿತ್ತುಕ್ಖಿತ್ತಉಜ್ಜಗ್ಘಿ, ಅಪ್ಪಸದ್ದೋ ತಯೋ ಚಲಾ॥
Okkhittukkhittaujjagghi, appasaddo tayo calā.
ಖಮ್ಭೋಗುಣ್ಠಿಪಲ್ಲತ್ಥಿ ಚ, ಅನುಪಖಜ್ಜ ನಾಸನೇ।
Khambhoguṇṭhipallatthi ca, anupakhajja nāsane;
ಓತ್ಥರಿತ್ವಾನ ಉದಕೇ, ನೀಚಂ ಕತ್ವಾನ ಸಿಞ್ಚಿಯಾ॥
Ottharitvāna udake, nīcaṃ katvāna siñciyā.
ಪಟಿ ಸಾಮನ್ತಾ ಸಙ್ಘಾಟಿ, ಓದನೇ ಚ ಪಟಿಗ್ಗಹೇ।
Paṭi sāmantā saṅghāṭi, odane ca paṭiggahe;
ಸೂಪಂ ಉತ್ತರಿಭಙ್ಗೇನ, ಸಬ್ಬೇಸಂ ಸಮತಿತ್ಥಿ ಚ॥
Sūpaṃ uttaribhaṅgena, sabbesaṃ samatitthi ca.
ಸಕ್ಕಚ್ಚಂ ಪತ್ತಸಞ್ಞೀ ಚ, ಸಪದಾನಞ್ಚ ಸೂಪಕಂ।
Sakkaccaṃ pattasaññī ca, sapadānañca sūpakaṃ;
ನ ಥೂಪತೋ ಪಟಿಚ್ಛಾದೇ, ವಿಞ್ಞತ್ತುಜ್ಝಾನಸಞ್ಞಿನಾ॥
Na thūpato paṭicchāde, viññattujjhānasaññinā.
ಮಹನ್ತಮಣ್ಡಲದ್ವಾರಂ, ಸಬ್ಬಹತ್ಥೋ ನ ಬ್ಯಾಹರೇ।
Mahantamaṇḍaladvāraṃ, sabbahattho na byāhare;
ಉಕ್ಖೇಪೋ ಛೇದನಾಗಣ್ಡ, ಧುನಂ ಸಿತ್ಥಾವಕಾರಕಂ॥
Ukkhepo chedanāgaṇḍa, dhunaṃ sitthāvakārakaṃ.
ಜಿವ್ಹಾನಿಚ್ಛಾರಕಞ್ಚೇವ, ಚಪುಚಪು ಸುರುಸುರು।
Jivhānicchārakañceva, capucapu surusuru;
ಹತ್ಥಪತ್ತೋಟ್ಠನಿಲ್ಲೇಹಂ, ಸಾಮಿಸೇನ ಪಟಿಗ್ಗಹೇ॥
Hatthapattoṭṭhanillehaṃ, sāmisena paṭiggahe.
ಯಾವ ನ ಸಬ್ಬೇ ಉದಕೇ, ನೀಚಂ ಕತ್ವಾನ ಸಿಞ್ಚಿಯಂ।
Yāva na sabbe udake, nīcaṃ katvāna siñciyaṃ;
ಪಟಿ ಸಾಮನ್ತಾ ಸಙ್ಘಾಟಿ, ನೀಚಂ ಕತ್ವಾ ಛಮಾಯ ಚ॥
Paṭi sāmantā saṅghāṭi, nīcaṃ katvā chamāya ca.
ಸಸಿತ್ಥಕಂ ನಿವತ್ತನ್ತೇ, ಸುಪ್ಪಟಿಚ್ಛನ್ನಮುಕ್ಕುಟಿ।
Sasitthakaṃ nivattante, suppaṭicchannamukkuṭi;
ಧಮ್ಮರಾಜೇನ ಪಞ್ಞತ್ತಂ, ಇದಂ ಭತ್ತಗ್ಗವತ್ತನಂ॥
Dhammarājena paññattaṃ, idaṃ bhattaggavattanaṃ.
ದುನ್ನಿವತ್ಥಾ ಅನಾಕಪ್ಪಾ, ಅಸಲ್ಲೇಕ್ಖೇತ್ವಾ ಚ ಸಹಸಾ।
Dunnivatthā anākappā, asallekkhetvā ca sahasā;
ದೂರೇ ಅಚ್ಚ ಚಿರಂ ಲಹುಂ, ತಥೇವ ಪಿಣ್ಡಚಾರಿಕೋ॥
Dūre acca ciraṃ lahuṃ, tatheva piṇḍacāriko.
ಪಟಿಚ್ಛನ್ನೋವ ಗಚ್ಛೇಯ್ಯ, ಸುಂಸವುತೋಕ್ಖಿತ್ತಚಕ್ಖು।
Paṭicchannova gaccheyya, suṃsavutokkhittacakkhu;
ಉಕ್ಖಿತ್ತೋಜ್ಜಗ್ಘಿಕಾಸದ್ದೋ, ತಯೋ ಚೇವ ಪಚಾಲನಾ॥
Ukkhittojjagghikāsaddo, tayo ceva pacālanā.
ಖಮ್ಭೋಗುಣ್ಠಿಉಕ್ಕುಟಿಕಾ, ಸಲ್ಲಕ್ಖೇತ್ವಾ ಚ ಸಹಸಾ।
Khambhoguṇṭhiukkuṭikā, sallakkhetvā ca sahasā;
ದೂರೇ ಅಚ್ಚ ಚಿರಂ ಲಹುಂ, ಆಸನಕಂ ಕಟಚ್ಛುಕಾ॥
Dūre acca ciraṃ lahuṃ, āsanakaṃ kaṭacchukā.
ಭಾಜನಂ ವಾ ಠಪೇತಿ ಚ, ಉಚ್ಚಾರೇತ್ವಾ ಪಣಾಮೇತ್ವಾ।
Bhājanaṃ vā ṭhapeti ca, uccāretvā paṇāmetvā;
ಪಟಿಗ್ಗಹೇ ನ ಉಲ್ಲೋಕೇ, ಸೂಪೇಸುಪಿ ತಥೇವ ತಂ॥
Paṭiggahe na ulloke, sūpesupi tatheva taṃ.
ಭಿಕ್ಖು ಸಙ್ಘಾಟಿಯಾ ಛಾದೇ, ಪಟಿಚ್ಛನ್ನೇವ ಗಚ್ಛಿಯಂ।
Bhikkhu saṅghāṭiyā chāde, paṭicchanneva gacchiyaṃ;
ಸಂವುತೋಕ್ಖಿತ್ತಚಕ್ಖು ಚ, ಉಕ್ಖಿತ್ತೋಜ್ಜಗ್ಘಿಕಾಯ ಚ।
Saṃvutokkhittacakkhu ca, ukkhittojjagghikāya ca;
ಅಪ್ಪಸದ್ದೋ ತಯೋ ಚಾಲಾ, ಖಮ್ಭೋಗುಣ್ಠಿಕಉಕ್ಕುಟಿ॥
Appasaddo tayo cālā, khambhoguṇṭhikaukkuṭi.
ಪಠಮಾಸನವಕ್ಕಾರ , ಪಾನಿಯಂ ಪರಿಭೋಜನೀ।
Paṭhamāsanavakkāra , pāniyaṃ paribhojanī;
ಪಚ್ಛಾಕಙ್ಖತಿ ಭುಞ್ಜೇಯ್ಯ, ಓಪಿಲಾಪೇಯ್ಯ ಉದ್ಧರೇ॥
Pacchākaṅkhati bhuñjeyya, opilāpeyya uddhare.
ಪಟಿಸಾಮೇಯ್ಯ ಸಮ್ಮಜ್ಜೇ, ರಿತ್ತಂ ತುಚ್ಛಂ ಉಪಟ್ಠಪೇ।
Paṭisāmeyya sammajje, rittaṃ tucchaṃ upaṭṭhape;
ಹತ್ಥವಿಕಾರೇ ಭಿನ್ದೇಯ್ಯ, ವತ್ತಿದಂ ಪಿಣ್ಡಚಾರಿಕೇ॥
Hatthavikāre bhindeyya, vattidaṃ piṇḍacārike.
ಪಾನೀ ಪರಿ ಅಗ್ಗಿರಣಿ, ನಕ್ಖತ್ತದಿಸಚೋರಾ ಚ।
Pānī pari aggiraṇi, nakkhattadisacorā ca;
ಸಬ್ಬಂ ನತ್ಥೀತಿ ಕೋಟ್ಟೇತ್ವಾ, ಪತ್ತಂಸೇ ಚೀವರಂ ತತೋ॥
Sabbaṃ natthīti koṭṭetvā, pattaṃse cīvaraṃ tato.
ಇದಾನಿ ಅಂಸೇ ಲಗ್ಗೇತ್ವಾ, ತಿಮಣ್ಡಲಂ ಪರಿಮಣ್ಡಲಂ।
Idāni aṃse laggetvā, timaṇḍalaṃ parimaṇḍalaṃ;
ಯಥಾ ಪಿಣ್ಡಚಾರಿವತ್ತಂ, ನಯೇ ಆರಞ್ಞಕೇಸುಪಿ॥
Yathā piṇḍacārivattaṃ, naye āraññakesupi.
ಪತ್ತಂಸೇ ಚೀವರಂ ಸೀಸೇ, ಆರೋಹಿತ್ವಾ ಚ ಪಾನಿಯಂ।
Pattaṃse cīvaraṃ sīse, ārohitvā ca pāniyaṃ;
ಪರಿಭೋಜನಿಯಂ ಅಗ್ಗಿ, ಅರಣೀ ಚಾಪಿ ಕತ್ತರಂ॥
Paribhojaniyaṃ aggi, araṇī cāpi kattaraṃ.
ನಕ್ಖತ್ತಂ ಸಪ್ಪದೇಸಂ ವಾ, ದಿಸಾಪಿ ಕುಸಲೋ ಭವೇ।
Nakkhattaṃ sappadesaṃ vā, disāpi kusalo bhave;
ಸತ್ತುತ್ತಮೇನ ಪಞ್ಞತ್ತಂ, ವತ್ತಂ ಆರಞ್ಞಕೇಸುಮೇ॥
Sattuttamena paññattaṃ, vattaṃ āraññakesume.
ಅಜ್ಝೋಕಾಸೇ ಓಕಿರಿಂಸು, ಉಜ್ಝಾಯನ್ತಿ ಚ ಪೇಸಲಾ।
Ajjhokāse okiriṃsu, ujjhāyanti ca pesalā;
ಸಚೇ ವಿಹಾರೋ ಉಕ್ಲಾಪೋ, ಪಠಮಂ ಪತ್ತಚೀವರಂ॥
Sace vihāro uklāpo, paṭhamaṃ pattacīvaraṃ.
ಭಿಸಿಬಿಬ್ಬೋಹನಂ ಮಞ್ಚಂ, ಪೀಠಞ್ಚ ಖೇಳಮಲ್ಲಕಂ।
Bhisibibbohanaṃ mañcaṃ, pīṭhañca kheḷamallakaṃ;
ಅಪಸ್ಸೇನುಲ್ಲೋಕಕಣ್ಣಾ, ಗೇರುಕಾ ಕಾಳ ಅಕತಾ॥
Apassenullokakaṇṇā, gerukā kāḷa akatā.
ಸಙ್ಕಾರಂ ಭಿಕ್ಖುಸಾಮನ್ತಾ, ಸೇನಾವಿಹಾರಪಾನಿಯಂ।
Saṅkāraṃ bhikkhusāmantā, senāvihārapāniyaṃ;
ಪರಿಭೋಜನಸಾಮನ್ತಾ, ಪಟಿವಾತೇ ಚ ಅಙ್ಗಣೇ॥
Paribhojanasāmantā, paṭivāte ca aṅgaṇe.
ಅಧೋವಾತೇ ಅತ್ಥರಣಂ, ಪಟಿಪಾದಕಮಞ್ಚೋ ಚ।
Adhovāte attharaṇaṃ, paṭipādakamañco ca;
ಪೀಠಂ ಭಿಸಿ ನಿಸೀದನಂ, ಮಲ್ಲಕಂ ಅಪಸ್ಸೇನ ಚ॥
Pīṭhaṃ bhisi nisīdanaṃ, mallakaṃ apassena ca.
ಪತ್ತಚೀವರಂ ಭೂಮಿ ಚ, ಪಾರನ್ತಂ ಓರತೋ ಭೋಗಂ।
Pattacīvaraṃ bhūmi ca, pārantaṃ orato bhogaṃ;
ಪುರತ್ಥಿಮಾ ಚ ಪಚ್ಛಿಮಾ, ಉತ್ತರಾ ಅಥ ದಕ್ಖಿಣಾ॥
Puratthimā ca pacchimā, uttarā atha dakkhiṇā.
ಸೀತುಣ್ಹೇ ಚ ದಿವಾ ರತ್ತಿಂ, ಪರಿವೇಣಞ್ಚ ಕೋಟ್ಠಕೋ।
Sītuṇhe ca divā rattiṃ, pariveṇañca koṭṭhako;
ಉಪಟ್ಠಾನಗ್ಗಿಸಾಲಾ ಚ, ವಚ್ಚಕುಟೀ ಚ ಪಾನಿಯಂ॥
Upaṭṭhānaggisālā ca, vaccakuṭī ca pāniyaṃ.
ಆಚಮನಕುಮ್ಭಿ ವುಡ್ಢೇ ಚ, ಉದ್ದೇಸಪುಚ್ಛನಾ ಸಜ್ಝಾ।
Ācamanakumbhi vuḍḍhe ca, uddesapucchanā sajjhā;
ಧಮ್ಮೋ ಪದೀಪಂ ವಿಜ್ಝಾಪೇ, ನ ವಿವರೇ ನಪಿ ಥಕೇ॥
Dhammo padīpaṃ vijjhāpe, na vivare napi thake.
ಯೇನ ವುಡ್ಢೋ ಪರಿವತ್ತಿ, ಕಣ್ಣೇನಪಿ ನ ಘಟ್ಟಯೇ।
Yena vuḍḍho parivatti, kaṇṇenapi na ghaṭṭaye;
ಪಞ್ಞಪೇಸಿ ಮಹಾವೀರೋ, ವತ್ತಂ ಸೇನಾಸನೇಸು ತಂ॥
Paññapesi mahāvīro, vattaṃ senāsanesu taṃ.
ನಿವಾರಿಯಮಾನಾ ದ್ವಾರಂ, ಮುಚ್ಛಿತುಜ್ಝನ್ತಿ ಪೇಸಲಾ।
Nivāriyamānā dvāraṃ, mucchitujjhanti pesalā;
ಛಾರಿಕಂ ಛಡ್ಡಯೇ ಜನ್ತಾ, ಪರಿಭಣ್ಡಂ ತಥೇವ ಚ॥
Chārikaṃ chaḍḍaye jantā, paribhaṇḍaṃ tatheva ca.
ಪರಿವೇಣಂ ಕೋಟ್ಠಕೋ ಸಾಲಾ, ಚುಣ್ಣಮತ್ತಿಕದೋಣಿಕಾ।
Pariveṇaṃ koṭṭhako sālā, cuṇṇamattikadoṇikā;
ಮುಖಂ ಪುರತೋ ನ ಥೇರೇ, ನ ನವೇ ಉಸ್ಸಹತಿ ಸಚೇ॥
Mukhaṃ purato na there, na nave ussahati sace.
ಪುರತೋ ಉಪರಿಮಗ್ಗೋ, ಚಿಕ್ಖಲ್ಲಂ ಮತ್ತಿ ಪೀಠಕಂ।
Purato uparimaggo, cikkhallaṃ matti pīṭhakaṃ;
ವಿಜ್ಝಾಪೇತ್ವಾ ಥಕೇತ್ವಾ ಚ, ವತ್ತಂ ಜನ್ತಾಘರೇಸುಮೇ॥
Vijjhāpetvā thaketvā ca, vattaṃ jantāgharesume.
ನಾಚಮೇತಿ ಯಥಾವುಡ್ಢಂ, ಪಟಿಪಾಟಿ ಚ ಸಹಸಾ।
Nācameti yathāvuḍḍhaṃ, paṭipāṭi ca sahasā;
ಉಬ್ಭಜಿ ನಿತ್ಥುನೋ ಕಟ್ಠಂ, ವಚ್ಚಂ ಪಸ್ಸಾವ ಖೇಳಕಂ॥
Ubbhaji nitthuno kaṭṭhaṃ, vaccaṃ passāva kheḷakaṃ.
ಫರುಸಾ ಕೂಪ ಸಹಸಾ, ಉಬ್ಭಜಿ ಚಪು ಸೇಸೇನ।
Pharusā kūpa sahasā, ubbhaji capu sesena;
ಬಹಿ ಅನ್ತೋ ಚ ಉಕ್ಕಾಸೇ, ರಜ್ಜು ಅತರಮಾನಞ್ಚ॥
Bahi anto ca ukkāse, rajju ataramānañca.
ಸಹಸಾ ಉಬ್ಭಜಿ ಠಿತೇ, ನಿತ್ಥುನೇ ಕಟ್ಠ ವಚ್ಚಞ್ಚ।
Sahasā ubbhaji ṭhite, nitthune kaṭṭha vaccañca;
ಪಸ್ಸಾವ ಖೇಳ ಫರುಸಾ, ಕೂಪಞ್ಚ ವಚ್ಚಪಾದುಕೇ॥
Passāva kheḷa pharusā, kūpañca vaccapāduke.
ನಾತಿಸಹಸಾ ಉಬ್ಭಜಿ, ಪಾದುಕಾಯ ಚಪುಚಪು।
Nātisahasā ubbhaji, pādukāya capucapu;
ನ ಸೇಸಯೇ ಪಟಿಚ್ಛಾದೇ, ಉಹತಪಿಧರೇನ ಚ॥
Na sesaye paṭicchāde, uhatapidharena ca.
ವಚ್ಚಕುಟೀ ಪರಿಭಣ್ಡಂ, ಪರಿವೇಣಞ್ಚ ಕೋಟ್ಠಕೋ।
Vaccakuṭī paribhaṇḍaṃ, pariveṇañca koṭṭhako;
ಆಚಮನೇ ಚ ಉದಕಂ, ವತ್ತಂ ವಚ್ಚಕುಟೀಸುಮೇ॥
Ācamane ca udakaṃ, vattaṃ vaccakuṭīsume.
ಉಪಾಹನಾ ದನ್ತಕಟ್ಠಂ, ಮುಖೋದಕಞ್ಚ ಆಸನಂ।
Upāhanā dantakaṭṭhaṃ, mukhodakañca āsanaṃ;
ಯಾಗು ಉದಕಂ ಧೋವಿತ್ವಾ, ಉದ್ಧಾರುಕ್ಲಾಪ ಗಾಮ ಚ॥
Yāgu udakaṃ dhovitvā, uddhāruklāpa gāma ca.
ನಿವಾಸನಾ ಕಾಯಬನ್ಧಾ, ಸಗುಣಂ ಪತ್ತಸೋದಕಂ।
Nivāsanā kāyabandhā, saguṇaṃ pattasodakaṃ;
ಪಚ್ಛಾ ತಿಮಣ್ಡಲೋ ಚೇವ, ಪರಿಮಣ್ಡಲ ಬನ್ಧನಂ॥
Pacchā timaṇḍalo ceva, parimaṇḍala bandhanaṃ.
ಸಗುಣಂ ಧೋವಿತ್ವಾ ಪಚ್ಛಾ, ನಾತಿದೂರೇ ಪಟಿಗ್ಗಹೇ।
Saguṇaṃ dhovitvā pacchā, nātidūre paṭiggahe;
ಭಣಮಾನಸ್ಸ ಆಪತ್ತಿ, ಪಠಮಾಗನ್ತ್ವಾನ ಆಸನಂ॥
Bhaṇamānassa āpatti, paṭhamāgantvāna āsanaṃ.
ಉದಕಂ ಪೀಠಕಥಲಿ, ಪಚ್ಚುಗ್ಗನ್ತ್ವಾ ನಿವಾಸನಂ।
Udakaṃ pīṭhakathali, paccuggantvā nivāsanaṃ;
ಓತಾಪೇ ನಿದಹಿ ಭಙ್ಗೋ, ಓಭೋಗೇ ಭುಞ್ಜಿತು ನಮೇ॥
Otāpe nidahi bhaṅgo, obhoge bhuñjitu name.
ಪಾನೀಯಂ ಉದಕಂ ನೀಚಂ, ಮುಹುತ್ತಂ ನ ಚ ನಿದಹೇ।
Pānīyaṃ udakaṃ nīcaṃ, muhuttaṃ na ca nidahe;
ಪತ್ತಚೀವರಂ ಭೂಮಿ ಚ, ಪಾರನ್ತಂ ಓರತೋ ಭೋಗಂ॥
Pattacīvaraṃ bhūmi ca, pārantaṃ orato bhogaṃ.
ಉದ್ಧರೇ ಪಟಿಸಾಮೇ ಚ, ಉಕ್ಲಾಪೋ ಚ ನಹಾಯಿತುಂ।
Uddhare paṭisāme ca, uklāpo ca nahāyituṃ;
ಸೀತಂ ಉಣ್ಹಂ ಜನ್ತಾಘರಂ, ಚುಣ್ಣಂ ಮತ್ತಿಕ ಪಿಟ್ಠಿತೋ॥
Sītaṃ uṇhaṃ jantāgharaṃ, cuṇṇaṃ mattika piṭṭhito.
ಪೀಠಞ್ಚ ಚೀವರಂ ಚುಣ್ಣಂ, ಮತ್ತಿಕುಸ್ಸಹತಿ ಮುಖಂ।
Pīṭhañca cīvaraṃ cuṇṇaṃ, mattikussahati mukhaṃ;
ಪುರತೋ ಥೇರೇ ನವೇ ಚ, ಪರಿಕಮ್ಮಞ್ಚ ನಿಕ್ಖಮೇ॥
Purato there nave ca, parikammañca nikkhame.
ಪುರತೋ ಉದಕೇ ನ್ಹಾತೇ, ನಿವಾಸೇತ್ವಾ ಉಪಜ್ಝಾಯಂ।
Purato udake nhāte, nivāsetvā upajjhāyaṃ;
ನಿವಾಸನಞ್ಚ ಸಙ್ಘಾಟಿ, ಪೀಠಕಂ ಆಸನೇನ ಚ॥
Nivāsanañca saṅghāṭi, pīṭhakaṃ āsanena ca.
ಪಾದೋ ಪೀಠಂ ಕಥಲಿಞ್ಚ, ಪಾನೀಯುದ್ದೇಸಪುಚ್ಛನಾ।
Pādo pīṭhaṃ kathaliñca, pānīyuddesapucchanā;
ಉಕ್ಲಾಪಂ ಸುಸೋಧೇಯ್ಯ, ಪಠಮಂ ಪತ್ತಚೀವರಂ॥
Uklāpaṃ susodheyya, paṭhamaṃ pattacīvaraṃ.
ನಿಸೀದನಪಚ್ಚತ್ಥರಣಂ, ಭಿಸಿ ಬಿಬ್ಬೋಹನಾನಿ ಚ।
Nisīdanapaccattharaṇaṃ, bhisi bibbohanāni ca;
ಮಞ್ಚೋ ಪೀಠಂ ಪಟಿಪಾದಂ, ಮಲ್ಲಕಂ ಅಪಸ್ಸೇನ ಚ॥
Mañco pīṭhaṃ paṭipādaṃ, mallakaṃ apassena ca.
ಭೂಮ ಸನ್ತಾನ ಆಲೋಕ, ಗೇರುಕಾ ಕಾಳ ಅಕತಾ।
Bhūma santāna āloka, gerukā kāḷa akatā;
ಭೂಮತ್ಥರಪಟಿಪಾದಾ, ಮಞ್ಚೋ ಪೀಠಂ ಬಿಬ್ಬೋಹನಂ॥
Bhūmattharapaṭipādā, mañco pīṭhaṃ bibbohanaṃ.
ನಿಸೀದತ್ಥರಣಂ ಖೇಳ, ಅಪಸ್ಸೇ ಪತ್ತಚೀವರಂ।
Nisīdattharaṇaṃ kheḷa, apasse pattacīvaraṃ;
ಪುರತ್ಥಿಮಾ ಪಚ್ಛಿಮಾ ಚ, ಉತ್ತರಾ ಅಥ ದಕ್ಖಿಣಾ॥
Puratthimā pacchimā ca, uttarā atha dakkhiṇā.
ಸೀತುಣ್ಹಞ್ಚ ದಿವಾ ರತ್ತಿಂ, ಪರಿವೇಣಞ್ಚ ಕೋಟ್ಠಕೋ।
Sītuṇhañca divā rattiṃ, pariveṇañca koṭṭhako;
ಉಪಟ್ಠಾನಗ್ಗಿಸಾಲಾ ಚ, ವಚ್ಚಪಾನಿಯಭೋಜನೀ॥
Upaṭṭhānaggisālā ca, vaccapāniyabhojanī.
ಆಚಮಂ ಅನಭಿರತಿ, ಕುಕ್ಕುಚ್ಚಂ ದಿಟ್ಠಿ ಚ ಗರು।
Ācamaṃ anabhirati, kukkuccaṃ diṭṭhi ca garu;
ಮೂಲಮಾನತ್ತಅಬ್ಭಾನಂ, ತಜ್ಜನೀಯಂ ನಿಯಸ್ಸಕಂ॥
Mūlamānattaabbhānaṃ, tajjanīyaṃ niyassakaṃ.
ಪಬ್ಬಾಜ ಪಟಿಸಾರಣೀ, ಉಕ್ಖೇಪಞ್ಚ ಕತಂ ಯದಿ।
Pabbāja paṭisāraṇī, ukkhepañca kataṃ yadi;
ಧೋವೇ ಕಾತಬ್ಬಂ ರಜಞ್ಚ, ರಜೇ ಸಮ್ಪರಿವತ್ತಕಂ॥
Dhove kātabbaṃ rajañca, raje samparivattakaṃ.
ಪತ್ತಞ್ಚ ಚೀವರಞ್ಚಾಪಿ, ಪರಿಕ್ಖಾರಞ್ಚ ಛೇದನಂ।
Pattañca cīvarañcāpi, parikkhārañca chedanaṃ;
ಪರಿಕಮ್ಮಂ ವೇಯ್ಯಾವಚ್ಚಂ, ಪಚ್ಛಾ ಪಿಣ್ಡಂ ಪವಿಸನಂ॥
Parikammaṃ veyyāvaccaṃ, pacchā piṇḍaṃ pavisanaṃ.
ನ ಸುಸಾನಂ ದಿಸಾ ಚೇವ, ಯಾವಜೀವಂ ಉಪಟ್ಠಹೇ।
Na susānaṃ disā ceva, yāvajīvaṃ upaṭṭhahe;
ಸದ್ಧಿವಿಹಾರಿಕೇನೇತಂ, ವತ್ತುಪಜ್ಝಾಯಕೇಸುಮೇ॥
Saddhivihārikenetaṃ, vattupajjhāyakesume.
ಓವಾದಸಾಸನುದ್ದೇಸಾ, ಪುಚ್ಛಾ ಪತ್ತಞ್ಚ ಚೀವರಂ।
Ovādasāsanuddesā, pucchā pattañca cīvaraṃ;
ಪರಿಕ್ಖಾರೋ ಗಿಲಾನೋ ಚ, ನ ಪಚ್ಛಾಸಮಣೋ ಭವೇ॥
Parikkhāro gilāno ca, na pacchāsamaṇo bhave.
ಉಪಜ್ಝಾಯೇಸು ಯೇ ವತ್ತಾ, ಏವಂ ಆಚರಿಯೇಸುಪಿ।
Upajjhāyesu ye vattā, evaṃ ācariyesupi;
ಸದ್ಧಿವಿಹಾರಿಕೇ ವತ್ತಾ, ತಥೇವ ಅನ್ತೇವಾಸಿಕೇ॥
Saddhivihārike vattā, tatheva antevāsike.
ಆಗನ್ತುಕೇಸು ಯೇ ವತ್ತಾ, ಪುನ ಆವಾಸಿಕೇಸು ಚ।
Āgantukesu ye vattā, puna āvāsikesu ca;
ಗಮಿಕಾನುಮೋದನಿಕಾ, ಭತ್ತಗ್ಗೇ ಪಿಣ್ಡಚಾರಿಕೇ॥
Gamikānumodanikā, bhattagge piṇḍacārike.
ಆರಞ್ಞಕೇಸು ಯಂ ವತ್ತಂ, ಯಞ್ಚ ಸೇನಾಸನೇಸುಪಿ।
Āraññakesu yaṃ vattaṃ, yañca senāsanesupi;
ಜನ್ತಾಘರೇ ವಚ್ಚಕುಟೀ, ಉಪಜ್ಝಾ ಸದ್ಧಿವಿಹಾರಿಕೇ॥
Jantāghare vaccakuṭī, upajjhā saddhivihārike.
ಆಚರಿಯೇಸು ಯಂ ವತ್ತಂ, ತಥೇವ ಅನ್ತೇವಾಸಿಕೇ।
Ācariyesu yaṃ vattaṃ, tatheva antevāsike;
ಏಕೂನವೀಸತಿ ವತ್ಥೂ, ವತ್ತಾ ಚುದ್ದಸ ಖನ್ಧಕೇ॥
Ekūnavīsati vatthū, vattā cuddasa khandhake.
ವತ್ತಂ ಅಪರಿಪೂರೇನ್ತೋ, ನ ಸೀಲಂ ಪರಿಪೂರತಿ।
Vattaṃ aparipūrento, na sīlaṃ paripūrati;
ಅಸುದ್ಧಸೀಲೋ ದುಪ್ಪಞ್ಞೋ, ಚಿತ್ತೇಕಗ್ಗಂ ನ ವಿನ್ದತಿ॥
Asuddhasīlo duppañño, cittekaggaṃ na vindati.
ವಿಕ್ಖಿತ್ತಚಿತ್ತೋನೇಕಗ್ಗೋ, ಸಮ್ಮಾ ಧಮ್ಮಂ ನ ಪಸ್ಸತಿ।
Vikkhittacittonekaggo, sammā dhammaṃ na passati;
ಅಪಸ್ಸಮಾನೋ ಸದ್ಧಮ್ಮಂ, ದುಕ್ಖಾ ನ ಪರಿಮುಚ್ಚತಿ॥
Apassamāno saddhammaṃ, dukkhā na parimuccati.
ಯಂ ವತ್ತಂ ಪರಿಪೂರೇನ್ತೋ, ಸೀಲಮ್ಪಿ ಪರಿಪೂರತಿ।
Yaṃ vattaṃ paripūrento, sīlampi paripūrati;
ವಿಸುದ್ಧಸೀಲೋ ಸಪ್ಪಞ್ಞೋ, ಚಿತ್ತೇಕಗ್ಗಮ್ಪಿ ವಿನ್ದತಿ॥
Visuddhasīlo sappañño, cittekaggampi vindati.
ಅವಿಕ್ಖಿತ್ತಚಿತ್ತೋ ಏಕಗ್ಗೋ, ಸಮ್ಮಾ ಧಮ್ಮಂ ವಿಪಸ್ಸತಿ।
Avikkhittacitto ekaggo, sammā dhammaṃ vipassati;
ಸಮ್ಪಸ್ಸಮಾನೋ ಸದ್ಧಮ್ಮಂ, ದುಕ್ಖಾ ಸೋ ಪರಿಮುಚ್ಚತಿ॥
Sampassamāno saddhammaṃ, dukkhā so parimuccati.
ತಸ್ಮಾ ಹಿ ವತ್ತಂ ಪೂರೇಯ್ಯ, ಜಿನಪುತ್ತೋ ವಿಚಕ್ಖಣೋ।
Tasmā hi vattaṃ pūreyya, jinaputto vicakkhaṇo;
ಓವಾದಂ ಬುದ್ಧಸೇಟ್ಠಸ್ಸ, ತತೋ ನಿಬ್ಬಾನಮೇಹಿತೀತಿ॥
Ovādaṃ buddhaseṭṭhassa, tato nibbānamehitīti.
ವತ್ತಕ್ಖನ್ಧಕಂ ನಿಟ್ಠಿತಂ।
Vattakkhandhakaṃ niṭṭhitaṃ.
Footnotes:
