| Library / Tipiṭaka / ਤਿਪਿਟਕ • Tipiṭaka / ਚੂਲ਼વਗ੍ਗਪਾਲ਼ਿ • Cūḷavaggapāḷi |
੧੪. ਅਨ੍ਤੇવਾਸਿਕવਤ੍ਤਕਥਾ
14. Antevāsikavattakathā
੩੮੧. ਤੇਨ ਖੋ ਪਨ ਸਮਯੇਨ ਆਚਰਿਯਾ ਅਨ੍ਤੇવਾਸਿਕੇਸੁ ਨ ਸਮ੍ਮਾ વਤ੍ਤਨ੍ਤਿ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਚਰਿਯਾ ਅਨ੍ਤੇવਾਸਿਕੇਸੁ ਨ ਸਮ੍ਮਾ વਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍વਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖવੇ, ਆਚਰਿਯਾ ਅਨ੍ਤੇવਾਸਿਕੇਸੁ ਨ ਸਮ੍ਮਾ વਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗવਾ’’ਤਿ…ਪੇ॰… વਿਗਰਹਿਤ੍વਾ…ਪੇ॰… ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ –
381. Tena kho pana samayena ācariyā antevāsikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ācariyā antevāsikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ācariyā antevāsikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
੩੮੨. ‘‘ਤੇਨ ਹਿ, ਭਿਕ੍ਖવੇ, ਆਚਰਿਯਾਨਂ ਅਨ੍ਤੇવਾਸਿਕੇਸੁ વਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਚਰਿਯੇਹਿ ਅਨ੍ਤੇવਾਸਿਕੇਸੁ ਸਮ੍ਮਾ વਤ੍ਤਿਤਬ੍ਬਂ। 1 ਆਚਰਿਯੇਨ, ਭਿਕ੍ਖવੇ, ਅਨ੍ਤੇવਾਸਿਕਮ੍ਹਿ ਸਮ੍ਮਾ વਤ੍ਤਿਤਬ੍ਬਂ। ਤਤ੍ਰਾਯਂ ਸਮ੍ਮਾવਤ੍ਤਨਾ –
382. ‘‘Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. 2 Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā –
‘‘ਆਚਰਿਯੇਨ, ਭਿਕ੍ਖવੇ, ਅਨ੍ਤੇવਾਸਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਦ੍ਦੇਸੇਨ ਪਰਿਪੁਚ੍ਛਾਯ ਓવਾਦੇਨ ਅਨੁਸਾਸਨਿਯਾ। ਸਚੇ ਆਚਰਿਯਸ੍ਸ ਪਤ੍ਤੋ ਹੋਤਿ, ਅਨ੍ਤੇવਾਸਿਕਸ੍ਸ ਪਤ੍ਤੋ ਨ ਹੋਤਿ, ਆਚਰਿਯੇਨ ਅਨ੍ਤੇવਾਸਿਕਸ੍ਸ ਪਤ੍ਤੋ ਦਾਤਬ੍ਬੋ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਪਤ੍ਤੋ ਉਪ੍ਪਜ੍ਜਿਯੇਥਾਤਿ। ਸਚੇ ਆਚਰਿਯਸ੍ਸ ਚੀવਰਂ ਹੋਤਿ, ਅਨ੍ਤੇવਾਸਿਕਸ੍ਸ ਚੀવਰਂ ਨ ਹੋਤਿ, ਆਚਰਿਯੇਨ ਅਨ੍ਤੇવਾਸਿਕਸ੍ਸ ਚੀવਰਂ ਦਾਤਬ੍ਬਂ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਚੀવਰਂ ਉਪ੍ਪਜ੍ਜਿਯੇਥਾਤਿ। ਸਚੇ ਆਚਰਿਯਸ੍ਸ ਪਰਿਕ੍ਖਾਰੋ ਹੋਤਿ, ਅਨ੍ਤੇવਾਸਿਕਸ੍ਸ ਪਰਿਕ੍ਖਾਰੋ ਨ ਹੋਤਿ, ਆਚਰਿਯੇਨ ਅਨ੍ਤੇવਾਸਿਕਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾਤਿ।
‘‘Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ – kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ – kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ – kinti nu kho antevāsikassa parikkhāro uppajjiyethāti.
‘‘ਸਚੇ ਅਨ੍ਤੇવਾਸਿਕੋ ਗਿਲਾਨੋ ਹੋਤਿ, ਕਾਲਸ੍ਸੇવ ਉਟ੍ਠਾਯ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ। ਸਚੇ ਯਾਗੁ ਹੋਤਿ , ਭਾਜਨਂ ਧੋવਿਤ੍વਾ ਯਾਗੁ ਉਪਨਾਮੇਤਬ੍ਬਾ। ਯਾਗੁਂ ਪੀਤਸ੍ਸ ਉਦਕਂ ਦਤ੍વਾ ਭਾਜਨਂ ਪਟਿਗ੍ਗਹੇਤ੍વਾ ਨੀਚਂ ਕਤ੍વਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋવਿਤ੍વਾ ਪਟਿਸਾਮੇਤਬ੍ਬਂ । ਅਨ੍ਤੇવਾਸਿਕਮ੍ਹਿ વੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ। ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ।
‘‘Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti , bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ . Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘ਸਚੇ ਅਨ੍ਤੇવਾਸਿਕੋ ਗਾਮਂ ਪવਿਸਿਤੁਕਾਮੋ ਹੋਤਿ, ਨਿવਾਸਨਂ ਦਾਤਬ੍ਬਂ, ਪਟਿਨਿવਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍વਾ ਸਙ੍ਘਾਟਿਯੋ ਦਾਤਬ੍ਬਾ, ਧੋવਿਤ੍વਾ ਪਤ੍ਤੋ ਸੋਦਕੋ ਦਾਤਬ੍ਬੋ।
‘‘Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.
‘‘ਏਤ੍ਤਾવਤਾ ਨਿવਤ੍ਤਿਸ੍ਸਤੀਤਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍વਾ ਪਤ੍ਤਚੀવਰਂ ਪਟਿਗ੍ਗਹੇਤਬ੍ਬਂ, ਪਟਿਨਿવਾਸਨਂ ਦਾਤਬ੍ਬਂ, ਨਿવਾਸਨਂ ਪਟਿਗ੍ਗਹੇਤਬ੍ਬਂ। ਸਚੇ ਚੀવਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀવਰਂ ਨਿਦਹਿਤਬ੍ਬਂ। ਚੀવਰਂ ਸਙ੍ਘਰਿਤਬ੍ਬਂ। ਚੀવਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍વਾ ਚੀવਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ। ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ।
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘ਸਚੇ ਪਿਣ੍ਡਪਾਤੋ ਹੋਤਿ, ਅਨ੍ਤੇવਾਸਿਕੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍વਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ। ਅਨ੍ਤੇવਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ। ਭੁਤ੍ਤਾવਿਸ੍ਸ ਉਦਕਂ ਦਤ੍વਾ ਪਤ੍ਤਂ ਪਟਿਗ੍ਗਹੇਤ੍વਾ ਨੀਚਂ ਕਤ੍વਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋવਿਤ੍વਾ વੋਦਕਂ ਕਤ੍વਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ। ਪਤ੍ਤਚੀવਰਂ ਨਿਕ੍ਖਿਪਿਤਬ੍ਬਂ। ਪਤ੍ਤਂ ਨਿਕ੍ਖਿਪਨ੍ਤੇਨ…ਪੇ॰… ਚੀવਰਂ ਨਿਕ੍ਖਿਪਨ੍ਤੇਨ…ਪੇ॰… ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍વਾ ਚੀવਰਂ ਨਿਕ੍ਖਿਪਿਤਬ੍ਬਂ। ਅਨ੍ਤੇવਾਸਿਕਮ੍ਹਿ ਉਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ। ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ।
‘‘Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe… cīvaraṃ nikkhipantena…pe… pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘ਸਚੇ ਅਨ੍ਤੇવਾਸਿਕੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ। ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ। ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ।
‘‘Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘ਸਚੇ ਅਨ੍ਤੇવਾਸਿਕੋ ਜਨ੍ਤਾਘਰਂ ਪવਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ 3 ਗਨ੍ਤ੍વਾ ਜਨ੍ਤਾਘਰਪੀਠਂ ਦਤ੍વਾ ਚੀવਰਂ ਪਟਿਗ੍ਗਹੇਤ੍વਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ। ਸਚੇ ਉਸ੍ਸਹਤਿ ਜਨ੍ਤਾਘਰਂ ਪવਿਸਿਤਬ੍ਬਂ। ਜਨ੍ਤਾਘਰਂ ਪવਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍વਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍વਾ ਜਨ੍ਤਾਘਰਂ ਪવਿਸਿਤਬ੍ਬਂ। ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ। ਨ ਨવਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ । ਜਨ੍ਤਾਘਰੇ ਅਨ੍ਤੇવਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ। ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍વਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ।
‘‘Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā . Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘ਉਦਕੇਪਿ ਅਨ੍ਤੇવਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ। ਨਹਾਤੇਨ ਪਠਮਤਰਂ ਉਤ੍ਤਰਿਤ੍વਾ ਅਤ੍ਤਨੋ ਗਤ੍ਤਂ વੋਦਕਂ ਕਤ੍વਾ ਨਿવਾਸੇਤ੍વਾ ਅਨ੍ਤੇવਾਸਿਕਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿવਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍વਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਅਨ੍ਤੇવਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ।
‘‘Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.
‘‘ਯਸ੍ਮਿਂ વਿਹਾਰੇ ਅਨ੍ਤੇવਾਸਿਕੋ વਿਹਰਤਿ, ਸਚੇ ਸੋ વਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ। વਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀવਰਂ ਨੀਹਰਿਤ੍વਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ…ਪੇ॰… ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ।
‘‘Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘ਸਚੇ ਅਨ੍ਤੇવਾਸਿਕਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਆਚਰਿਯੇਨ વੂਪਕਾਸੇਤਬ੍ਬੋ, વੂਪਕਾਸਾਪੇਤਬ੍ਬੋ, ਧਮ੍ਮਕਥਾ વਾਸ੍ਸ ਕਾਤਬ੍ਬਾ। ਸਚੇ ਅਨ੍ਤੇવਾਸਿਕਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ વਿਨੋਦੇਤਬ੍ਬਂ, વਿਨੋਦਾਪੇਤਬ੍ਬਂ, ਧਮ੍ਮਕਥਾ વਾਸ੍ਸ ਕਾਤਬ੍ਬਾ। ਸਚੇ ਅਨ੍ਤੇવਾਸਿਕਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ વਿવੇਚੇਤਬ੍ਬਂ, વਿવੇਚਾਪੇਤਬ੍ਬਂ, ਧਮ੍ਮਕਥਾ વਾਸ੍ਸ ਕਾਤਬ੍ਬਾ। ਸਚੇ ਅਨ੍ਤੇવਾਸਿਕੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ, ਪਰਿવਾਸਾਰਹੋ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇવਾਸਿਕਸ੍ਸ ਪਰਿવਾਸਂ ਦਦੇਯ੍ਯਾਤਿ। ਸਚੇ ਅਨ੍ਤੇવਾਸਿਕੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇવਾਸਿਕਂ ਮੂਲਾਯ ਪਟਿਕਸ੍ਸੇਯ੍ਯਾਤਿ। ਸਚੇ ਅਨ੍ਤੇવਾਸਿਕੋ ਮਾਨਤ੍ਤਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇવਾਸਿਕਸ੍ਸ ਮਾਨਤ੍ਤਂ ਦਦੇਯ੍ਯਾਤਿ। ਸਚੇ ਅਨ੍ਤੇવਾਸਿਕੋ ਅਬ੍ਭਾਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇવਾਸਿਕਂ ਅਬ੍ਭੇਯ੍ਯਾਤਿ। ਸਚੇ ਸਙ੍ਘੋ ਅਨ੍ਤੇવਾਸਿਕਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ વਾ ਨਿਯਸ੍ਸਂ વਾ ਪਬ੍ਬਾਜਨੀਯਂ વਾ ਪਟਿਸਾਰਣੀਯਂ વਾ ਉਕ੍ਖੇਪਨੀਯਂ વਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇવਾਸਿਕਸ੍ਸ ਕਮ੍ਮਂ ਨ ਕਰੇਯ੍ਯ , ਲਹੁਕਾਯ વਾ ਪਰਿਣਾਮੇਯ੍ਯਾਤਿ। ਕਤਂ વਾ ਪਨਸ੍ਸ ਹੋਤਿ, ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ વਾ ਨਿਯਸ੍ਸਂ વਾ ਪਬ੍ਬਾਜਨੀਯਂ વਾ ਪਟਿਸਾਰਣੀਯਂ વਾ ਉਕ੍ਖੇਪਨੀਯਂ વਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕੋ ਸਮ੍ਮਾ વਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ વਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ।
‘‘Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ – kinti nu kho saṅgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ – kinti nu kho saṅgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ abbheyyāti. Sace saṅgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho saṅgho antevāsikassa kammaṃ na kareyya , lahukāya vā pariṇāmeyyāti. Kataṃ vā panassa hoti, saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho antevāsiko sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘ਸਚੇ ਅਨ੍ਤੇવਾਸਿਕਸ੍ਸ ਚੀવਰਂ ਧੋવਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏવਂ ਧੋવੇਯ੍ਯਾਸੀਤਿ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਚੀવਰਂ ਧੋવਿਯੇਥਾਤਿ। ਸਚੇ ਅਨ੍ਤੇવਾਸਿਕਸ੍ਸ ਚੀવਰਂ ਕਾਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏવਂ ਕਰੇਯ੍ਯਾਸੀਤਿ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਚੀવਰਂ ਕਰਿਯੇਥਾਤਿ। ਸਚੇ ਅਨ੍ਤੇવਾਸਿਕਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏવਂ ਪਚੇਯ੍ਯਾਸੀਤਿ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਰਜਨਂ ਪਚਿਯੇਥਾਤਿ। ਸਚੇ ਅਨ੍ਤੇવਾਸਿਕਸ੍ਸ ਚੀવਰਂ ਰਜਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏવਂ ਰਜੇਯ੍ਯਾਸੀਤਿ, ਉਸ੍ਸੁਕ੍ਕਂ વਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇવਾਸਿਕਸ੍ਸ ਚੀવਰਂ ਰਜਿਯੇਥਾਤਿ। ਚੀવਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿવਤ੍ਤਕਂ ਸਮ੍ਪਰਿવਤ੍ਤਕਂ ਰਜਿਤਬ੍ਬਂ। ਨ ਚ ਅਚ੍ਛਿਨ੍ਨੇ ਥੇવੇ ਪਕ੍ਕਮਿਤਬ੍ਬਂ। ਸਚੇ ਅਨ੍ਤੇવਾਸਿਕੋ ਗਿਲਾਨੋ ਹੋਤਿ, ਯਾવਜੀવਂ ਉਪਟ੍ਠਾਤਬ੍ਬੋ, વੁਟ੍ਠਾਨਮਸ੍ਸ ਆਗਮੇਤਬ੍ਬਂ। ਇਦਂ ਖੋ, ਭਿਕ੍ਖવੇ, ਆਚਰਿਯਾਨਂ ਅਨ੍ਤੇવਾਸਿਕੇਸੁ વਤ੍ਤਂ ਯਥਾ ਆਚਰਿਯੇਹਿ ਅਨ੍ਤੇવਾਸਿਕੇਸੁ ਸਮ੍ਮਾ વਤ੍ਤਿਤਬ੍ਬ’’ਨ੍ਤਿ।
‘‘Sace antevāsikassa cīvaraṃ dhovitabbaṃ hoti, ācariyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabba’’nti.
વਤ੍ਤਕ੍ਖਨ੍ਧਕੋ ਅਟ੍ਠਮੋ।
Vattakkhandhako aṭṭhamo.
ਇਮਮ੍ਹਿ ਖਨ੍ਧਕੇ વਤ੍ਥੂ ਏਕੂਨવੀਸਤਿ, વਤ੍ਤਾ ਚੁਦ੍ਦਸ।
Imamhi khandhake vatthū ekūnavīsati, vattā cuddasa.
ਤਸ੍ਸੁਦ੍ਦਾਨਂ –
Tassuddānaṃ –
ਸਉਪਾਹਨਾ ਛਤ੍ਤਾ ਚ, ਓਗੁਣ੍ਠਿ ਸੀਸਂ ਪਾਨੀਯਂ।
Saupāhanā chattā ca, oguṇṭhi sīsaṃ pānīyaṃ;
ਨਾਭਿવਾਦੇ ਨ ਪੁਚ੍ਛਨ੍ਤਿ, ਅਹਿ ਉਜ੍ਝਨ੍ਤਿ ਪੇਸਲਾ॥
Nābhivāde na pucchanti, ahi ujjhanti pesalā.
ਓਮੁਞ੍ਚਿ ਛਤ੍ਤਂ ਖਨ੍ਧੇ ਚ, ਅਤਰਞ੍ਚ ਪਟਿਕ੍ਕਮਂ।
Omuñci chattaṃ khandhe ca, atarañca paṭikkamaṃ;
ਪਤ੍ਤਚੀવਰਂ ਨਿਕ੍ਖਿਪਾ, ਪਤਿਰੂਪਞ੍ਚ ਪੁਚ੍ਛਿਤਾ॥
Pattacīvaraṃ nikkhipā, patirūpañca pucchitā.
ਆਸਿਞ੍ਚੇਯ੍ਯ ਧੋવਿਤੇਨ, ਸੁਕ੍ਖੇਨਲ੍ਲੇਨੁਪਾਹਨਾ।
Āsiñceyya dhovitena, sukkhenallenupāhanā;
વੁਡ੍ਢੋ ਨવਕੋ ਪੁਚ੍ਛੇਯ੍ਯ, ਅਜ੍ਝਾવੁਟ੍ਠਞ੍ਚ ਗੋਚਰਾ॥
Vuḍḍho navako puccheyya, ajjhāvuṭṭhañca gocarā.
ਸੇਕ੍ਖਾ વਚ੍ਚਾ ਪਾਨੀ ਪਰਿ, ਕਤ੍ਤਰਂ ਕਤਿਕਂ ਤਤੋ।
Sekkhā vaccā pānī pari, kattaraṃ katikaṃ tato;
ਕਾਲਂ ਮੁਹੁਤ੍ਤਂ ਉਕ੍ਲਾਪੋ, ਭੂਮਤ੍ਥਰਣਂ ਨੀਹਰੇ॥
Kālaṃ muhuttaṃ uklāpo, bhūmattharaṇaṃ nīhare.
ਪਟਿਪਾਦੋ ਭਿਸਿਬਿਬ੍ਬੋ, ਮਞ੍ਚਪੀਠਞ੍ਚ ਮਲ੍ਲਕਂ।
Paṭipādo bhisibibbo, mañcapīṭhañca mallakaṃ;
ਅਪਸ੍ਸੇਨੁਲ੍ਲੋਕਕਣ੍ਣਾ, ਗੇਰੁਕਾ ਕਾਲ਼ ਅਕਤਾ॥
Apassenullokakaṇṇā, gerukā kāḷa akatā.
ਸਙ੍ਕਾਰਞ੍ਚ ਭੂਮਤ੍ਥਰਣਂ, ਪਟਿਪਾਦਕਂ ਮਞ੍ਚਪੀਠਂ।
Saṅkārañca bhūmattharaṇaṃ, paṭipādakaṃ mañcapīṭhaṃ;
ਭਿਸਿ ਨਿਸੀਦਨਮ੍ਪਿ, ਮਲ੍ਲਕਂ ਅਪਸ੍ਸੇਨ ਚ॥
Bhisi nisīdanampi, mallakaṃ apassena ca.
ਪਤ੍ਤਚੀવਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ।
Pattacīvaraṃ bhūmi ca, pārantaṃ orato bhogaṃ;
ਪੁਰਤ੍ਥਿਮਾ ਪਚ੍ਛਿਮਾ ਚ, ਉਤ੍ਤਰਾ ਅਥ ਦਕ੍ਖਿਣਾ॥
Puratthimā pacchimā ca, uttarā atha dakkhiṇā.
ਸੀਤੁਣ੍ਹੇ ਚ ਦਿવਾਰਤ੍ਤਿਂ, ਪਰਿવੇਣਞ੍ਚ ਕੋਟ੍ਠਕੋ।
Sītuṇhe ca divārattiṃ, pariveṇañca koṭṭhako;
ਉਪਟ੍ਠਾਨਗ੍ਗਿ ਸਾਲਾ ਚ, વਤ੍ਤਂ વਚ੍ਚਕੁਟੀਸੁ ਚ॥
Upaṭṭhānaggi sālā ca, vattaṃ vaccakuṭīsu ca.
ਪਾਨੀ ਪਰਿਭੋਜਨਿਯਾ, ਕੁਮ੍ਭਿ ਆਚਮਨੇਸੁ ਚ।
Pānī paribhojaniyā, kumbhi ācamanesu ca;
ਨੇવਾਸਨਂ ਨ ਉਦਕਂ, ਨ ਪਚ੍ਚੁ ਨ ਚ ਪਾਨਿਯਂ।
Nevāsanaṃ na udakaṃ, na paccu na ca pāniyaṃ;
ਨਾਭਿવਾਦੇ ਨਪਞ੍ਞਪੇ, ਉਜ੍ਝਾਯਨ੍ਤਿ ਚ ਪੇਸਲਾ॥
Nābhivāde napaññape, ujjhāyanti ca pesalā.
વੁਡ੍ਢਾਸਨਞ੍ਚ ਉਦਕਂ, ਪਚ੍ਚੁਗ੍ਗਨ੍ਤ੍વਾ ਚ ਪਾਨਿਯਂ।
Vuḍḍhāsanañca udakaṃ, paccuggantvā ca pāniyaṃ;
ਉਪਾਹਨੇ ਏਕਮਨ੍ਤਂ, ਅਭਿવਾਦੇ ਚ ਪਞ੍ਞਪੇ॥
Upāhane ekamantaṃ, abhivāde ca paññape.
વੁਤ੍ਥਂ ਗੋਚਰਸੇਕ੍ਖੋ ਚ, ਠਾਨਂ ਪਾਨਿਯਭੋਜਨਂ।
Vutthaṃ gocarasekkho ca, ṭhānaṃ pāniyabhojanaṃ;
ਕਤ੍ਤਰਂ ਕਤਿਕਂ ਕਾਲਂ, ਨવਕਸ੍ਸ ਨਿਸਿਨ੍ਨਕੇ॥
Kattaraṃ katikaṃ kālaṃ, navakassa nisinnake.
ਅਭਿવਾਦਯੇ ਆਚਿਕ੍ਖੇ, ਯਥਾ ਹੇਟ੍ਠਾ ਤਥਾ ਨਯੇ।
Abhivādaye ācikkhe, yathā heṭṭhā tathā naye;
ਨਿਦ੍ਦਿਟ੍ਠਂ ਸਤ੍ਥવਾਹੇਨ વਤ੍ਤਂ ਆવਾਸਿਕੇਹਿਮੇ॥
Niddiṭṭhaṃ satthavāhena vattaṃ āvāsikehime.
ਗਮਿਕਾ ਦਾਰੁਮਤ੍ਤਿ ਚ, વਿવਰਿਤ੍વਾ ਨ ਪੁਚ੍ਛਿਯ।
Gamikā dārumatti ca, vivaritvā na pucchiya;
ਨਸ੍ਸਨ੍ਤਿ ਚ ਅਗੁਤ੍ਤਞ੍ਚ, ਉਜ੍ਝਾਯਨ੍ਤਿ ਚ ਪੇਸਲਾ॥
Nassanti ca aguttañca, ujjhāyanti ca pesalā.
ਪਟਿਸਾਮੇਤ੍વਾ ਥਕੇਤ੍વਾ, ਆਪੁਚ੍ਛਿਤ੍વਾવ ਪਕ੍ਕਮੇ।
Paṭisāmetvā thaketvā, āpucchitvāva pakkame;
ਭਿਕ੍ਖੁ વਾ ਸਾਮਣੇਰੋ વਾ, ਆਰਾਮਿਕੋ ਉਪਾਸਕੋ॥
Bhikkhu vā sāmaṇero vā, ārāmiko upāsako.
ਪਾਸਾਣਕੇਸੁ ਚ ਪੁਞ੍ਜਂ, ਪਟਿਸਾਮੇ ਥਕੇਯ੍ਯ ਚ।
Pāsāṇakesu ca puñjaṃ, paṭisāme thakeyya ca;
ਸਚੇ ਉਸ੍ਸਹਤਿ ਉਸ੍ਸੁਕ੍ਕਂ, ਅਨੋવਸ੍ਸੇ ਤਥੇવ ਚ॥
Sace ussahati ussukkaṃ, anovasse tatheva ca.
ਸਬ੍ਬੋ ਓવਸ੍ਸਤਿ ਗਾਮਂ, ਅਜ੍ਝੋਕਾਸੇ ਤਥੇવ ਚ।
Sabbo ovassati gāmaṃ, ajjhokāse tatheva ca;
ਅਪ੍ਪੇવਙ੍ਗਾਨਿ ਸੇਸੇਯ੍ਯੁਂ, વਤ੍ਤਂ ਗਮਿਕਭਿਕ੍ਖੁਨਾ॥
Appevaṅgāni seseyyuṃ, vattaṃ gamikabhikkhunā.
ਨਾਨੁਮੋਦਨ੍ਤਿ ਥੇਰੇਨ, ਓਹਾਯ ਚਤੁਪਞ੍ਚਹਿ।
Nānumodanti therena, ohāya catupañcahi;
વਚ੍ਚਿਤੋ ਮੁਚ੍ਛਿਤੋ ਆਸਿ, વਤ੍ਤਾਨੁਮੋਦਨੇਸੁਮੇ॥
Vaccito mucchito āsi, vattānumodanesume.
ਛਬ੍ਬਗ੍ਗਿਯਾ ਦੁਨ੍ਨਿવਤ੍ਥਾ, ਅਥੋਪਿ ਚ ਦੁਪ੍ਪਾਰੁਤਾ।
Chabbaggiyā dunnivatthā, athopi ca duppārutā;
ਅਨਾਕਪ੍ਪਾ ਚ વੋਕ੍ਕਮ੍ਮ, ਥੇਰੇ ਅਨੁਪਖਜ੍ਜਨੇ॥
Anākappā ca vokkamma, there anupakhajjane.
ਨવੇ ਭਿਕ੍ਖੂ ਚ ਸਙ੍ਘਾਟਿ, ਉਜ੍ਝਾਯਨ੍ਤਿ ਚ ਪੇਸਲਾ।
Nave bhikkhū ca saṅghāṭi, ujjhāyanti ca pesalā;
ਤਿਮਣ੍ਡਲਂ ਨਿવਾਸੇਤ੍વਾ, ਕਾਯਸਗੁਣਗਣ੍ਠਿਕਾ॥
Timaṇḍalaṃ nivāsetvā, kāyasaguṇagaṇṭhikā.
ਨ વੋਕ੍ਕਮ੍ਮ ਪਟਿਚ੍ਛਨ੍ਨਂ, ਸੁਸਂવੁਤੋਕ੍ਖਿਤ੍ਤਚਕ੍ਖੁ।
Na vokkamma paṭicchannaṃ, susaṃvutokkhittacakkhu;
ਉਕ੍ਖਿਤ੍ਤੋਜ੍ਜਗ੍ਘਿਕਾਸਦ੍ਦੋ, ਤਯੋ ਚੇવ ਪਚਾਲਨਾ॥
Ukkhittojjagghikāsaddo, tayo ceva pacālanā.
ਖਮ੍ਭੋਗੁਣ੍ਠਿਉਕ੍ਕੁਟਿਕਾ, ਪਟਿਚ੍ਛਨ੍ਨਂ ਸੁਸਂવੁਤੋ।
Khambhoguṇṭhiukkuṭikā, paṭicchannaṃ susaṃvuto;
ਓਕ੍ਖਿਤ੍ਤੁਕ੍ਖਿਤ੍ਤਉਜ੍ਜਗ੍ਘਿ, ਅਪ੍ਪਸਦ੍ਦੋ ਤਯੋ ਚਲਾ॥
Okkhittukkhittaujjagghi, appasaddo tayo calā.
ਖਮ੍ਭੋਗੁਣ੍ਠਿਪਲ੍ਲਤ੍ਥਿ ਚ, ਅਨੁਪਖਜ੍ਜ ਨਾਸਨੇ।
Khambhoguṇṭhipallatthi ca, anupakhajja nāsane;
ਓਤ੍ਥਰਿਤ੍વਾਨ ਉਦਕੇ, ਨੀਚਂ ਕਤ੍વਾਨ ਸਿਞ੍ਚਿਯਾ॥
Ottharitvāna udake, nīcaṃ katvāna siñciyā.
ਪਟਿ ਸਾਮਨ੍ਤਾ ਸਙ੍ਘਾਟਿ, ਓਦਨੇ ਚ ਪਟਿਗ੍ਗਹੇ।
Paṭi sāmantā saṅghāṭi, odane ca paṭiggahe;
ਸੂਪਂ ਉਤ੍ਤਰਿਭਙ੍ਗੇਨ, ਸਬ੍ਬੇਸਂ ਸਮਤਿਤ੍ਥਿ ਚ॥
Sūpaṃ uttaribhaṅgena, sabbesaṃ samatitthi ca.
ਸਕ੍ਕਚ੍ਚਂ ਪਤ੍ਤਸਞ੍ਞੀ ਚ, ਸਪਦਾਨਞ੍ਚ ਸੂਪਕਂ।
Sakkaccaṃ pattasaññī ca, sapadānañca sūpakaṃ;
ਨ ਥੂਪਤੋ ਪਟਿਚ੍ਛਾਦੇ, વਿਞ੍ਞਤ੍ਤੁਜ੍ਝਾਨਸਞ੍ਞਿਨਾ॥
Na thūpato paṭicchāde, viññattujjhānasaññinā.
ਮਹਨ੍ਤਮਣ੍ਡਲਦ੍વਾਰਂ, ਸਬ੍ਬਹਤ੍ਥੋ ਨ ਬ੍ਯਾਹਰੇ।
Mahantamaṇḍaladvāraṃ, sabbahattho na byāhare;
ਉਕ੍ਖੇਪੋ ਛੇਦਨਾਗਣ੍ਡ, ਧੁਨਂ ਸਿਤ੍ਥਾવਕਾਰਕਂ॥
Ukkhepo chedanāgaṇḍa, dhunaṃ sitthāvakārakaṃ.
ਜਿવ੍ਹਾਨਿਚ੍ਛਾਰਕਞ੍ਚੇવ, ਚਪੁਚਪੁ ਸੁਰੁਸੁਰੁ।
Jivhānicchārakañceva, capucapu surusuru;
ਹਤ੍ਥਪਤ੍ਤੋਟ੍ਠਨਿਲ੍ਲੇਹਂ, ਸਾਮਿਸੇਨ ਪਟਿਗ੍ਗਹੇ॥
Hatthapattoṭṭhanillehaṃ, sāmisena paṭiggahe.
ਯਾવ ਨ ਸਬ੍ਬੇ ਉਦਕੇ, ਨੀਚਂ ਕਤ੍વਾਨ ਸਿਞ੍ਚਿਯਂ।
Yāva na sabbe udake, nīcaṃ katvāna siñciyaṃ;
ਪਟਿ ਸਾਮਨ੍ਤਾ ਸਙ੍ਘਾਟਿ, ਨੀਚਂ ਕਤ੍વਾ ਛਮਾਯ ਚ॥
Paṭi sāmantā saṅghāṭi, nīcaṃ katvā chamāya ca.
ਸਸਿਤ੍ਥਕਂ ਨਿવਤ੍ਤਨ੍ਤੇ, ਸੁਪ੍ਪਟਿਚ੍ਛਨ੍ਨਮੁਕ੍ਕੁਟਿ।
Sasitthakaṃ nivattante, suppaṭicchannamukkuṭi;
ਧਮ੍ਮਰਾਜੇਨ ਪਞ੍ਞਤ੍ਤਂ, ਇਦਂ ਭਤ੍ਤਗ੍ਗવਤ੍ਤਨਂ॥
Dhammarājena paññattaṃ, idaṃ bhattaggavattanaṃ.
ਦੁਨ੍ਨਿવਤ੍ਥਾ ਅਨਾਕਪ੍ਪਾ, ਅਸਲ੍ਲੇਕ੍ਖੇਤ੍વਾ ਚ ਸਹਸਾ।
Dunnivatthā anākappā, asallekkhetvā ca sahasā;
ਦੂਰੇ ਅਚ੍ਚ ਚਿਰਂ ਲਹੁਂ, ਤਥੇવ ਪਿਣ੍ਡਚਾਰਿਕੋ॥
Dūre acca ciraṃ lahuṃ, tatheva piṇḍacāriko.
ਪਟਿਚ੍ਛਨ੍ਨੋવ ਗਚ੍ਛੇਯ੍ਯ, ਸੁਂਸવੁਤੋਕ੍ਖਿਤ੍ਤਚਕ੍ਖੁ।
Paṭicchannova gaccheyya, suṃsavutokkhittacakkhu;
ਉਕ੍ਖਿਤ੍ਤੋਜ੍ਜਗ੍ਘਿਕਾਸਦ੍ਦੋ, ਤਯੋ ਚੇવ ਪਚਾਲਨਾ॥
Ukkhittojjagghikāsaddo, tayo ceva pacālanā.
ਖਮ੍ਭੋਗੁਣ੍ਠਿਉਕ੍ਕੁਟਿਕਾ, ਸਲ੍ਲਕ੍ਖੇਤ੍વਾ ਚ ਸਹਸਾ।
Khambhoguṇṭhiukkuṭikā, sallakkhetvā ca sahasā;
ਦੂਰੇ ਅਚ੍ਚ ਚਿਰਂ ਲਹੁਂ, ਆਸਨਕਂ ਕਟਚ੍ਛੁਕਾ॥
Dūre acca ciraṃ lahuṃ, āsanakaṃ kaṭacchukā.
ਭਾਜਨਂ વਾ ਠਪੇਤਿ ਚ, ਉਚ੍ਚਾਰੇਤ੍વਾ ਪਣਾਮੇਤ੍વਾ।
Bhājanaṃ vā ṭhapeti ca, uccāretvā paṇāmetvā;
ਪਟਿਗ੍ਗਹੇ ਨ ਉਲ੍ਲੋਕੇ, ਸੂਪੇਸੁਪਿ ਤਥੇવ ਤਂ॥
Paṭiggahe na ulloke, sūpesupi tatheva taṃ.
ਭਿਕ੍ਖੁ ਸਙ੍ਘਾਟਿਯਾ ਛਾਦੇ, ਪਟਿਚ੍ਛਨ੍ਨੇવ ਗਚ੍ਛਿਯਂ।
Bhikkhu saṅghāṭiyā chāde, paṭicchanneva gacchiyaṃ;
ਸਂવੁਤੋਕ੍ਖਿਤ੍ਤਚਕ੍ਖੁ ਚ, ਉਕ੍ਖਿਤ੍ਤੋਜ੍ਜਗ੍ਘਿਕਾਯ ਚ।
Saṃvutokkhittacakkhu ca, ukkhittojjagghikāya ca;
ਅਪ੍ਪਸਦ੍ਦੋ ਤਯੋ ਚਾਲਾ, ਖਮ੍ਭੋਗੁਣ੍ਠਿਕਉਕ੍ਕੁਟਿ॥
Appasaddo tayo cālā, khambhoguṇṭhikaukkuṭi.
ਪਠਮਾਸਨવਕ੍ਕਾਰ , ਪਾਨਿਯਂ ਪਰਿਭੋਜਨੀ।
Paṭhamāsanavakkāra , pāniyaṃ paribhojanī;
ਪਚ੍ਛਾਕਙ੍ਖਤਿ ਭੁਞ੍ਜੇਯ੍ਯ, ਓਪਿਲਾਪੇਯ੍ਯ ਉਦ੍ਧਰੇ॥
Pacchākaṅkhati bhuñjeyya, opilāpeyya uddhare.
ਪਟਿਸਾਮੇਯ੍ਯ ਸਮ੍ਮਜ੍ਜੇ, ਰਿਤ੍ਤਂ ਤੁਚ੍ਛਂ ਉਪਟ੍ਠਪੇ।
Paṭisāmeyya sammajje, rittaṃ tucchaṃ upaṭṭhape;
ਹਤ੍ਥવਿਕਾਰੇ ਭਿਨ੍ਦੇਯ੍ਯ, વਤ੍ਤਿਦਂ ਪਿਣ੍ਡਚਾਰਿਕੇ॥
Hatthavikāre bhindeyya, vattidaṃ piṇḍacārike.
ਪਾਨੀ ਪਰਿ ਅਗ੍ਗਿਰਣਿ, ਨਕ੍ਖਤ੍ਤਦਿਸਚੋਰਾ ਚ।
Pānī pari aggiraṇi, nakkhattadisacorā ca;
ਸਬ੍ਬਂ ਨਤ੍ਥੀਤਿ ਕੋਟ੍ਟੇਤ੍વਾ, ਪਤ੍ਤਂਸੇ ਚੀવਰਂ ਤਤੋ॥
Sabbaṃ natthīti koṭṭetvā, pattaṃse cīvaraṃ tato.
ਇਦਾਨਿ ਅਂਸੇ ਲਗ੍ਗੇਤ੍વਾ, ਤਿਮਣ੍ਡਲਂ ਪਰਿਮਣ੍ਡਲਂ।
Idāni aṃse laggetvā, timaṇḍalaṃ parimaṇḍalaṃ;
ਯਥਾ ਪਿਣ੍ਡਚਾਰਿવਤ੍ਤਂ, ਨਯੇ ਆਰਞ੍ਞਕੇਸੁਪਿ॥
Yathā piṇḍacārivattaṃ, naye āraññakesupi.
ਪਤ੍ਤਂਸੇ ਚੀવਰਂ ਸੀਸੇ, ਆਰੋਹਿਤ੍વਾ ਚ ਪਾਨਿਯਂ।
Pattaṃse cīvaraṃ sīse, ārohitvā ca pāniyaṃ;
ਪਰਿਭੋਜਨਿਯਂ ਅਗ੍ਗਿ, ਅਰਣੀ ਚਾਪਿ ਕਤ੍ਤਰਂ॥
Paribhojaniyaṃ aggi, araṇī cāpi kattaraṃ.
ਨਕ੍ਖਤ੍ਤਂ ਸਪ੍ਪਦੇਸਂ વਾ, ਦਿਸਾਪਿ ਕੁਸਲੋ ਭવੇ।
Nakkhattaṃ sappadesaṃ vā, disāpi kusalo bhave;
ਸਤ੍ਤੁਤ੍ਤਮੇਨ ਪਞ੍ਞਤ੍ਤਂ, વਤ੍ਤਂ ਆਰਞ੍ਞਕੇਸੁਮੇ॥
Sattuttamena paññattaṃ, vattaṃ āraññakesume.
ਅਜ੍ਝੋਕਾਸੇ ਓਕਿਰਿਂਸੁ, ਉਜ੍ਝਾਯਨ੍ਤਿ ਚ ਪੇਸਲਾ।
Ajjhokāse okiriṃsu, ujjhāyanti ca pesalā;
ਸਚੇ વਿਹਾਰੋ ਉਕ੍ਲਾਪੋ, ਪਠਮਂ ਪਤ੍ਤਚੀવਰਂ॥
Sace vihāro uklāpo, paṭhamaṃ pattacīvaraṃ.
ਭਿਸਿਬਿਬ੍ਬੋਹਨਂ ਮਞ੍ਚਂ, ਪੀਠਞ੍ਚ ਖੇਲ਼ਮਲ੍ਲਕਂ।
Bhisibibbohanaṃ mañcaṃ, pīṭhañca kheḷamallakaṃ;
ਅਪਸ੍ਸੇਨੁਲ੍ਲੋਕਕਣ੍ਣਾ, ਗੇਰੁਕਾ ਕਾਲ਼ ਅਕਤਾ॥
Apassenullokakaṇṇā, gerukā kāḷa akatā.
ਸਙ੍ਕਾਰਂ ਭਿਕ੍ਖੁਸਾਮਨ੍ਤਾ, ਸੇਨਾવਿਹਾਰਪਾਨਿਯਂ।
Saṅkāraṃ bhikkhusāmantā, senāvihārapāniyaṃ;
ਪਰਿਭੋਜਨਸਾਮਨ੍ਤਾ, ਪਟਿવਾਤੇ ਚ ਅਙ੍ਗਣੇ॥
Paribhojanasāmantā, paṭivāte ca aṅgaṇe.
ਅਧੋવਾਤੇ ਅਤ੍ਥਰਣਂ, ਪਟਿਪਾਦਕਮਞ੍ਚੋ ਚ।
Adhovāte attharaṇaṃ, paṭipādakamañco ca;
ਪੀਠਂ ਭਿਸਿ ਨਿਸੀਦਨਂ, ਮਲ੍ਲਕਂ ਅਪਸ੍ਸੇਨ ਚ॥
Pīṭhaṃ bhisi nisīdanaṃ, mallakaṃ apassena ca.
ਪਤ੍ਤਚੀવਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ।
Pattacīvaraṃ bhūmi ca, pārantaṃ orato bhogaṃ;
ਪੁਰਤ੍ਥਿਮਾ ਚ ਪਚ੍ਛਿਮਾ, ਉਤ੍ਤਰਾ ਅਥ ਦਕ੍ਖਿਣਾ॥
Puratthimā ca pacchimā, uttarā atha dakkhiṇā.
ਸੀਤੁਣ੍ਹੇ ਚ ਦਿવਾ ਰਤ੍ਤਿਂ, ਪਰਿવੇਣਞ੍ਚ ਕੋਟ੍ਠਕੋ।
Sītuṇhe ca divā rattiṃ, pariveṇañca koṭṭhako;
ਉਪਟ੍ਠਾਨਗ੍ਗਿਸਾਲਾ ਚ, વਚ੍ਚਕੁਟੀ ਚ ਪਾਨਿਯਂ॥
Upaṭṭhānaggisālā ca, vaccakuṭī ca pāniyaṃ.
ਆਚਮਨਕੁਮ੍ਭਿ વੁਡ੍ਢੇ ਚ, ਉਦ੍ਦੇਸਪੁਚ੍ਛਨਾ ਸਜ੍ਝਾ।
Ācamanakumbhi vuḍḍhe ca, uddesapucchanā sajjhā;
ਧਮ੍ਮੋ ਪਦੀਪਂ વਿਜ੍ਝਾਪੇ, ਨ વਿવਰੇ ਨਪਿ ਥਕੇ॥
Dhammo padīpaṃ vijjhāpe, na vivare napi thake.
ਯੇਨ વੁਡ੍ਢੋ ਪਰਿવਤ੍ਤਿ, ਕਣ੍ਣੇਨਪਿ ਨ ਘਟ੍ਟਯੇ।
Yena vuḍḍho parivatti, kaṇṇenapi na ghaṭṭaye;
ਪਞ੍ਞਪੇਸਿ ਮਹਾવੀਰੋ, વਤ੍ਤਂ ਸੇਨਾਸਨੇਸੁ ਤਂ॥
Paññapesi mahāvīro, vattaṃ senāsanesu taṃ.
ਨਿવਾਰਿਯਮਾਨਾ ਦ੍વਾਰਂ, ਮੁਚ੍ਛਿਤੁਜ੍ਝਨ੍ਤਿ ਪੇਸਲਾ।
Nivāriyamānā dvāraṃ, mucchitujjhanti pesalā;
ਛਾਰਿਕਂ ਛਡ੍ਡਯੇ ਜਨ੍ਤਾ, ਪਰਿਭਣ੍ਡਂ ਤਥੇવ ਚ॥
Chārikaṃ chaḍḍaye jantā, paribhaṇḍaṃ tatheva ca.
ਪਰਿવੇਣਂ ਕੋਟ੍ਠਕੋ ਸਾਲਾ, ਚੁਣ੍ਣਮਤ੍ਤਿਕਦੋਣਿਕਾ।
Pariveṇaṃ koṭṭhako sālā, cuṇṇamattikadoṇikā;
ਮੁਖਂ ਪੁਰਤੋ ਨ ਥੇਰੇ, ਨ ਨવੇ ਉਸ੍ਸਹਤਿ ਸਚੇ॥
Mukhaṃ purato na there, na nave ussahati sace.
ਪੁਰਤੋ ਉਪਰਿਮਗ੍ਗੋ, ਚਿਕ੍ਖਲ੍ਲਂ ਮਤ੍ਤਿ ਪੀਠਕਂ।
Purato uparimaggo, cikkhallaṃ matti pīṭhakaṃ;
વਿਜ੍ਝਾਪੇਤ੍વਾ ਥਕੇਤ੍વਾ ਚ, વਤ੍ਤਂ ਜਨ੍ਤਾਘਰੇਸੁਮੇ॥
Vijjhāpetvā thaketvā ca, vattaṃ jantāgharesume.
ਨਾਚਮੇਤਿ ਯਥਾવੁਡ੍ਢਂ, ਪਟਿਪਾਟਿ ਚ ਸਹਸਾ।
Nācameti yathāvuḍḍhaṃ, paṭipāṭi ca sahasā;
ਉਬ੍ਭਜਿ ਨਿਤ੍ਥੁਨੋ ਕਟ੍ਠਂ, વਚ੍ਚਂ ਪਸ੍ਸਾવ ਖੇਲ਼ਕਂ॥
Ubbhaji nitthuno kaṭṭhaṃ, vaccaṃ passāva kheḷakaṃ.
ਫਰੁਸਾ ਕੂਪ ਸਹਸਾ, ਉਬ੍ਭਜਿ ਚਪੁ ਸੇਸੇਨ।
Pharusā kūpa sahasā, ubbhaji capu sesena;
ਬਹਿ ਅਨ੍ਤੋ ਚ ਉਕ੍ਕਾਸੇ, ਰਜ੍ਜੁ ਅਤਰਮਾਨਞ੍ਚ॥
Bahi anto ca ukkāse, rajju ataramānañca.
ਸਹਸਾ ਉਬ੍ਭਜਿ ਠਿਤੇ, ਨਿਤ੍ਥੁਨੇ ਕਟ੍ਠ વਚ੍ਚਞ੍ਚ।
Sahasā ubbhaji ṭhite, nitthune kaṭṭha vaccañca;
ਪਸ੍ਸਾવ ਖੇਲ਼ ਫਰੁਸਾ, ਕੂਪਞ੍ਚ વਚ੍ਚਪਾਦੁਕੇ॥
Passāva kheḷa pharusā, kūpañca vaccapāduke.
ਨਾਤਿਸਹਸਾ ਉਬ੍ਭਜਿ, ਪਾਦੁਕਾਯ ਚਪੁਚਪੁ।
Nātisahasā ubbhaji, pādukāya capucapu;
ਨ ਸੇਸਯੇ ਪਟਿਚ੍ਛਾਦੇ, ਉਹਤਪਿਧਰੇਨ ਚ॥
Na sesaye paṭicchāde, uhatapidharena ca.
વਚ੍ਚਕੁਟੀ ਪਰਿਭਣ੍ਡਂ, ਪਰਿવੇਣਞ੍ਚ ਕੋਟ੍ਠਕੋ।
Vaccakuṭī paribhaṇḍaṃ, pariveṇañca koṭṭhako;
ਆਚਮਨੇ ਚ ਉਦਕਂ, વਤ੍ਤਂ વਚ੍ਚਕੁਟੀਸੁਮੇ॥
Ācamane ca udakaṃ, vattaṃ vaccakuṭīsume.
ਉਪਾਹਨਾ ਦਨ੍ਤਕਟ੍ਠਂ, ਮੁਖੋਦਕਞ੍ਚ ਆਸਨਂ।
Upāhanā dantakaṭṭhaṃ, mukhodakañca āsanaṃ;
ਯਾਗੁ ਉਦਕਂ ਧੋવਿਤ੍વਾ, ਉਦ੍ਧਾਰੁਕ੍ਲਾਪ ਗਾਮ ਚ॥
Yāgu udakaṃ dhovitvā, uddhāruklāpa gāma ca.
ਨਿવਾਸਨਾ ਕਾਯਬਨ੍ਧਾ, ਸਗੁਣਂ ਪਤ੍ਤਸੋਦਕਂ।
Nivāsanā kāyabandhā, saguṇaṃ pattasodakaṃ;
ਪਚ੍ਛਾ ਤਿਮਣ੍ਡਲੋ ਚੇવ, ਪਰਿਮਣ੍ਡਲ ਬਨ੍ਧਨਂ॥
Pacchā timaṇḍalo ceva, parimaṇḍala bandhanaṃ.
ਸਗੁਣਂ ਧੋવਿਤ੍વਾ ਪਚ੍ਛਾ, ਨਾਤਿਦੂਰੇ ਪਟਿਗ੍ਗਹੇ।
Saguṇaṃ dhovitvā pacchā, nātidūre paṭiggahe;
ਭਣਮਾਨਸ੍ਸ ਆਪਤ੍ਤਿ, ਪਠਮਾਗਨ੍ਤ੍વਾਨ ਆਸਨਂ॥
Bhaṇamānassa āpatti, paṭhamāgantvāna āsanaṃ.
ਉਦਕਂ ਪੀਠਕਥਲਿ, ਪਚ੍ਚੁਗ੍ਗਨ੍ਤ੍વਾ ਨਿવਾਸਨਂ।
Udakaṃ pīṭhakathali, paccuggantvā nivāsanaṃ;
ਓਤਾਪੇ ਨਿਦਹਿ ਭਙ੍ਗੋ, ਓਭੋਗੇ ਭੁਞ੍ਜਿਤੁ ਨਮੇ॥
Otāpe nidahi bhaṅgo, obhoge bhuñjitu name.
ਪਾਨੀਯਂ ਉਦਕਂ ਨੀਚਂ, ਮੁਹੁਤ੍ਤਂ ਨ ਚ ਨਿਦਹੇ।
Pānīyaṃ udakaṃ nīcaṃ, muhuttaṃ na ca nidahe;
ਪਤ੍ਤਚੀવਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ॥
Pattacīvaraṃ bhūmi ca, pārantaṃ orato bhogaṃ.
ਉਦ੍ਧਰੇ ਪਟਿਸਾਮੇ ਚ, ਉਕ੍ਲਾਪੋ ਚ ਨਹਾਯਿਤੁਂ।
Uddhare paṭisāme ca, uklāpo ca nahāyituṃ;
ਸੀਤਂ ਉਣ੍ਹਂ ਜਨ੍ਤਾਘਰਂ, ਚੁਣ੍ਣਂ ਮਤ੍ਤਿਕ ਪਿਟ੍ਠਿਤੋ॥
Sītaṃ uṇhaṃ jantāgharaṃ, cuṇṇaṃ mattika piṭṭhito.
ਪੀਠਞ੍ਚ ਚੀવਰਂ ਚੁਣ੍ਣਂ, ਮਤ੍ਤਿਕੁਸ੍ਸਹਤਿ ਮੁਖਂ।
Pīṭhañca cīvaraṃ cuṇṇaṃ, mattikussahati mukhaṃ;
ਪੁਰਤੋ ਥੇਰੇ ਨવੇ ਚ, ਪਰਿਕਮ੍ਮਞ੍ਚ ਨਿਕ੍ਖਮੇ॥
Purato there nave ca, parikammañca nikkhame.
ਪੁਰਤੋ ਉਦਕੇ ਨ੍ਹਾਤੇ, ਨਿવਾਸੇਤ੍વਾ ਉਪਜ੍ਝਾਯਂ।
Purato udake nhāte, nivāsetvā upajjhāyaṃ;
ਨਿવਾਸਨਞ੍ਚ ਸਙ੍ਘਾਟਿ, ਪੀਠਕਂ ਆਸਨੇਨ ਚ॥
Nivāsanañca saṅghāṭi, pīṭhakaṃ āsanena ca.
ਪਾਦੋ ਪੀਠਂ ਕਥਲਿਞ੍ਚ, ਪਾਨੀਯੁਦ੍ਦੇਸਪੁਚ੍ਛਨਾ।
Pādo pīṭhaṃ kathaliñca, pānīyuddesapucchanā;
ਉਕ੍ਲਾਪਂ ਸੁਸੋਧੇਯ੍ਯ, ਪਠਮਂ ਪਤ੍ਤਚੀવਰਂ॥
Uklāpaṃ susodheyya, paṭhamaṃ pattacīvaraṃ.
ਨਿਸੀਦਨਪਚ੍ਚਤ੍ਥਰਣਂ, ਭਿਸਿ ਬਿਬ੍ਬੋਹਨਾਨਿ ਚ।
Nisīdanapaccattharaṇaṃ, bhisi bibbohanāni ca;
ਮਞ੍ਚੋ ਪੀਠਂ ਪਟਿਪਾਦਂ, ਮਲ੍ਲਕਂ ਅਪਸ੍ਸੇਨ ਚ॥
Mañco pīṭhaṃ paṭipādaṃ, mallakaṃ apassena ca.
ਭੂਮ ਸਨ੍ਤਾਨ ਆਲੋਕ, ਗੇਰੁਕਾ ਕਾਲ਼ ਅਕਤਾ।
Bhūma santāna āloka, gerukā kāḷa akatā;
ਭੂਮਤ੍ਥਰਪਟਿਪਾਦਾ, ਮਞ੍ਚੋ ਪੀਠਂ ਬਿਬ੍ਬੋਹਨਂ॥
Bhūmattharapaṭipādā, mañco pīṭhaṃ bibbohanaṃ.
ਨਿਸੀਦਤ੍ਥਰਣਂ ਖੇਲ਼, ਅਪਸ੍ਸੇ ਪਤ੍ਤਚੀવਰਂ।
Nisīdattharaṇaṃ kheḷa, apasse pattacīvaraṃ;
ਪੁਰਤ੍ਥਿਮਾ ਪਚ੍ਛਿਮਾ ਚ, ਉਤ੍ਤਰਾ ਅਥ ਦਕ੍ਖਿਣਾ॥
Puratthimā pacchimā ca, uttarā atha dakkhiṇā.
ਸੀਤੁਣ੍ਹਞ੍ਚ ਦਿવਾ ਰਤ੍ਤਿਂ, ਪਰਿવੇਣਞ੍ਚ ਕੋਟ੍ਠਕੋ।
Sītuṇhañca divā rattiṃ, pariveṇañca koṭṭhako;
ਉਪਟ੍ਠਾਨਗ੍ਗਿਸਾਲਾ ਚ, વਚ੍ਚਪਾਨਿਯਭੋਜਨੀ॥
Upaṭṭhānaggisālā ca, vaccapāniyabhojanī.
ਆਚਮਂ ਅਨਭਿਰਤਿ, ਕੁਕ੍ਕੁਚ੍ਚਂ ਦਿਟ੍ਠਿ ਚ ਗਰੁ।
Ācamaṃ anabhirati, kukkuccaṃ diṭṭhi ca garu;
ਮੂਲਮਾਨਤ੍ਤਅਬ੍ਭਾਨਂ, ਤਜ੍ਜਨੀਯਂ ਨਿਯਸ੍ਸਕਂ॥
Mūlamānattaabbhānaṃ, tajjanīyaṃ niyassakaṃ.
ਪਬ੍ਬਾਜ ਪਟਿਸਾਰਣੀ, ਉਕ੍ਖੇਪਞ੍ਚ ਕਤਂ ਯਦਿ।
Pabbāja paṭisāraṇī, ukkhepañca kataṃ yadi;
ਧੋવੇ ਕਾਤਬ੍ਬਂ ਰਜਞ੍ਚ, ਰਜੇ ਸਮ੍ਪਰਿવਤ੍ਤਕਂ॥
Dhove kātabbaṃ rajañca, raje samparivattakaṃ.
ਪਤ੍ਤਞ੍ਚ ਚੀવਰਞ੍ਚਾਪਿ, ਪਰਿਕ੍ਖਾਰਞ੍ਚ ਛੇਦਨਂ।
Pattañca cīvarañcāpi, parikkhārañca chedanaṃ;
ਪਰਿਕਮ੍ਮਂ વੇਯ੍ਯਾવਚ੍ਚਂ, ਪਚ੍ਛਾ ਪਿਣ੍ਡਂ ਪવਿਸਨਂ॥
Parikammaṃ veyyāvaccaṃ, pacchā piṇḍaṃ pavisanaṃ.
ਨ ਸੁਸਾਨਂ ਦਿਸਾ ਚੇવ, ਯਾવਜੀવਂ ਉਪਟ੍ਠਹੇ।
Na susānaṃ disā ceva, yāvajīvaṃ upaṭṭhahe;
ਸਦ੍ਧਿવਿਹਾਰਿਕੇਨੇਤਂ, વਤ੍ਤੁਪਜ੍ਝਾਯਕੇਸੁਮੇ॥
Saddhivihārikenetaṃ, vattupajjhāyakesume.
ਓવਾਦਸਾਸਨੁਦ੍ਦੇਸਾ, ਪੁਚ੍ਛਾ ਪਤ੍ਤਞ੍ਚ ਚੀવਰਂ।
Ovādasāsanuddesā, pucchā pattañca cīvaraṃ;
ਪਰਿਕ੍ਖਾਰੋ ਗਿਲਾਨੋ ਚ, ਨ ਪਚ੍ਛਾਸਮਣੋ ਭવੇ॥
Parikkhāro gilāno ca, na pacchāsamaṇo bhave.
ਉਪਜ੍ਝਾਯੇਸੁ ਯੇ વਤ੍ਤਾ, ਏવਂ ਆਚਰਿਯੇਸੁਪਿ।
Upajjhāyesu ye vattā, evaṃ ācariyesupi;
ਸਦ੍ਧਿવਿਹਾਰਿਕੇ વਤ੍ਤਾ, ਤਥੇવ ਅਨ੍ਤੇવਾਸਿਕੇ॥
Saddhivihārike vattā, tatheva antevāsike.
ਆਗਨ੍ਤੁਕੇਸੁ ਯੇ વਤ੍ਤਾ, ਪੁਨ ਆવਾਸਿਕੇਸੁ ਚ।
Āgantukesu ye vattā, puna āvāsikesu ca;
ਗਮਿਕਾਨੁਮੋਦਨਿਕਾ, ਭਤ੍ਤਗ੍ਗੇ ਪਿਣ੍ਡਚਾਰਿਕੇ॥
Gamikānumodanikā, bhattagge piṇḍacārike.
ਆਰਞ੍ਞਕੇਸੁ ਯਂ વਤ੍ਤਂ, ਯਞ੍ਚ ਸੇਨਾਸਨੇਸੁਪਿ।
Āraññakesu yaṃ vattaṃ, yañca senāsanesupi;
ਜਨ੍ਤਾਘਰੇ વਚ੍ਚਕੁਟੀ, ਉਪਜ੍ਝਾ ਸਦ੍ਧਿવਿਹਾਰਿਕੇ॥
Jantāghare vaccakuṭī, upajjhā saddhivihārike.
ਆਚਰਿਯੇਸੁ ਯਂ વਤ੍ਤਂ, ਤਥੇવ ਅਨ੍ਤੇવਾਸਿਕੇ।
Ācariyesu yaṃ vattaṃ, tatheva antevāsike;
ਏਕੂਨવੀਸਤਿ વਤ੍ਥੂ, વਤ੍ਤਾ ਚੁਦ੍ਦਸ ਖਨ੍ਧਕੇ॥
Ekūnavīsati vatthū, vattā cuddasa khandhake.
વਤ੍ਤਂ ਅਪਰਿਪੂਰੇਨ੍ਤੋ, ਨ ਸੀਲਂ ਪਰਿਪੂਰਤਿ।
Vattaṃ aparipūrento, na sīlaṃ paripūrati;
ਅਸੁਦ੍ਧਸੀਲੋ ਦੁਪ੍ਪਞ੍ਞੋ, ਚਿਤ੍ਤੇਕਗ੍ਗਂ ਨ વਿਨ੍ਦਤਿ॥
Asuddhasīlo duppañño, cittekaggaṃ na vindati.
વਿਕ੍ਖਿਤ੍ਤਚਿਤ੍ਤੋਨੇਕਗ੍ਗੋ, ਸਮ੍ਮਾ ਧਮ੍ਮਂ ਨ ਪਸ੍ਸਤਿ।
Vikkhittacittonekaggo, sammā dhammaṃ na passati;
ਅਪਸ੍ਸਮਾਨੋ ਸਦ੍ਧਮ੍ਮਂ, ਦੁਕ੍ਖਾ ਨ ਪਰਿਮੁਚ੍ਚਤਿ॥
Apassamāno saddhammaṃ, dukkhā na parimuccati.
ਯਂ વਤ੍ਤਂ ਪਰਿਪੂਰੇਨ੍ਤੋ, ਸੀਲਮ੍ਪਿ ਪਰਿਪੂਰਤਿ।
Yaṃ vattaṃ paripūrento, sīlampi paripūrati;
વਿਸੁਦ੍ਧਸੀਲੋ ਸਪ੍ਪਞ੍ਞੋ, ਚਿਤ੍ਤੇਕਗ੍ਗਮ੍ਪਿ વਿਨ੍ਦਤਿ॥
Visuddhasīlo sappañño, cittekaggampi vindati.
ਅવਿਕ੍ਖਿਤ੍ਤਚਿਤ੍ਤੋ ਏਕਗ੍ਗੋ, ਸਮ੍ਮਾ ਧਮ੍ਮਂ વਿਪਸ੍ਸਤਿ।
Avikkhittacitto ekaggo, sammā dhammaṃ vipassati;
ਸਮ੍ਪਸ੍ਸਮਾਨੋ ਸਦ੍ਧਮ੍ਮਂ, ਦੁਕ੍ਖਾ ਸੋ ਪਰਿਮੁਚ੍ਚਤਿ॥
Sampassamāno saddhammaṃ, dukkhā so parimuccati.
ਤਸ੍ਮਾ ਹਿ વਤ੍ਤਂ ਪੂਰੇਯ੍ਯ, ਜਿਨਪੁਤ੍ਤੋ વਿਚਕ੍ਖਣੋ।
Tasmā hi vattaṃ pūreyya, jinaputto vicakkhaṇo;
ਓવਾਦਂ ਬੁਦ੍ਧਸੇਟ੍ਠਸ੍ਸ, ਤਤੋ ਨਿਬ੍ਬਾਨਮੇਹਿਤੀਤਿ॥
Ovādaṃ buddhaseṭṭhassa, tato nibbānamehitīti.
વਤ੍ਤਕ੍ਖਨ੍ਧਕਂ ਨਿਟ੍ਠਿਤਂ।
Vattakkhandhakaṃ niṭṭhitaṃ.
Footnotes:
