| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
164. அந்தோவுட்டா²தி³படிக்கே²பகதா²
164. Antovuṭṭhādipaṭikkhepakathā
274. அத² கோ² ப⁴க³வா அனுபுப்³பே³ன சாரிகங் சரமானோ யேன ராஜக³ஹங் தத³வஸரி. தத்ர ஸுத³ங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வதோ உத³ரவாதாபா³தோ⁴ ஹோதி. அத² கோ² ஆயஸ்மா ஆனந்தோ³ – ‘புப்³பே³பி ப⁴க³வதோ உத³ரவாதாபா³தோ⁴ தேகடுலயாகு³யா பா²ஸு ஹோதீ’தி – ஸாமங் திலம்பி, தண்டு³லம்பி, முக்³க³ம்பி விஞ்ஞாபெத்வா, அந்தோ வாஸெத்வா, அந்தோ ஸாமங் பசித்வா ப⁴க³வதோ உபனாமேஸி – ‘‘பிவது ப⁴க³வா தேகடுலயாகு³’’ந்தி. ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி; காலங் விதி³த்வா புச்ச²ந்தி, காலங் விதி³த்வா ந புச்ச²ந்தி; அத்த²ஸங்ஹிதங் ததா²க³தா புச்ச²ந்தி, நோ அனத்த²ஸங்ஹிதங். அனத்த²ஸங்ஹிதே ஸேதுகா⁴தோ ததா²க³தானங். த்³வீஹி ஆகாரேஹி பு³த்³தா⁴ ப⁴க³வந்தோ பி⁴க்கூ² படிபுச்ச²ந்தி – த⁴ம்மங் வா தே³ஸெஸ்ஸாம, ஸாவகானங் வா ஸிக்கா²பத³ங் பஞ்ஞபெஸ்ஸாமாதி. அத² கோ² ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘குதாயங், ஆனந்த³ , யாகூ³’’தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ங் ஆரோசேஸி. விக³ரஹி பு³த்³தோ⁴ ப⁴க³வா – ‘அனநுச்ச²விகங், ஆனந்த³, அனநுலோமிகங், அப்பதிரூபங், அஸ்ஸாமணகங், அகப்பியங், அகரணீயங். கத²ஞ்ஹி நாம த்வங், ஆனந்த³, ஏவரூபாய பா³ஹுல்லாய சேதெஸ்ஸஸி. யத³பி, ஆனந்த³, அந்தோ வுட்ட²ங் 1 தத³பி அகப்பியங்; யத³பி அந்தோ பக்கங் தத³பி அகப்பியங்; யத³பி ஸாமங் பக்கங், தத³பி அகப்பியங். நேதங், ஆனந்த³, அப்பஸன்னானங் வா பஸாதா³ய…பே॰… விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அந்தோ வுட்ட²ங், அந்தோ பக்கங், ஸாமங் பக்கங் பரிபு⁴ஞ்ஜிதப்³ப³ங். யோ பரிபு⁴ஞ்ஜேய, ஆபத்தி து³க்கடஸ்ஸ. அந்தோ சே, பி⁴க்க²வே, வுட்ட²ங், அந்தோ பக்கங், ஸாமங் பக்கங் தஞ்சே பரிபு⁴ஞ்ஜெய்ய, ஆபத்தி திண்ணங் து³க்கடானங். அந்தோ சே, பி⁴க்க²வே, வுட்ட²ங், அந்தோ பக்கங், அஞ்ஞேஹி பக்கங், தஞ்சே பரிபு⁴ஞ்ஜெய்ய, ஆபத்தி த்³வின்னங் து³க்கடானங். அந்தோ சே, பி⁴க்க²வே, வுட்ட²ங், ப³ஹி பக்கங், ஸாமங் பக்கங், தஞ்சே பரிபு⁴ஞ்ஜெய்ய, ஆபத்தி த்³வின்னங் து³க்கடானங். ப³ஹி சே, பி⁴க்க²வே, வுட்ட²ங், அந்தோ பக்கங், ஸாமங் பக்கங், தஞ்சே பரிபு⁴ஞ்ஜெய்ய, ஆபத்தி த்³வின்னங் து³க்கடானங். அந்தோ சே, பி⁴க்க²வே, வுட்ட²ங், ப³ஹி பக்கங், அஞ்ஞேஹி பக்கங், தஞ்சே பரிபு⁴ஞ்ஜெய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுட்ட²ங், அந்தோ பக்கங், அஞ்ஞேஹி பக்கங், தஞ்சே பரிபு⁴ஞ்ஜெய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுட்ட²ங், ப³ஹி பக்கங், ஸாமங் பக்கங், தஞ்சே பரிபு⁴ஞ்ஜெய்ய, ஆபத்தி து³க்கடஸ்ஸ. ப³ஹி சே, பி⁴க்க²வே, வுட்ட²ங், ப³ஹி பக்கங் , அஞ்ஞேஹி பக்கங், தஞ்சே பரிபு⁴ஞ்ஜெய்ய, அனாபத்தீ’’’தி.
274. Atha kho bhagavā anupubbena cārikaṃ caramāno yena rājagahaṃ tadavasari. Tatra sudaṃ bhagavā rājagahe viharati veḷuvane kalandakanivāpe. Tena kho pana samayena bhagavato udaravātābādho hoti. Atha kho āyasmā ānando – ‘pubbepi bhagavato udaravātābādho tekaṭulayāguyā phāsu hotī’ti – sāmaṃ tilampi, taṇḍulampi, muggampi viññāpetvā, anto vāsetvā, anto sāmaṃ pacitvā bhagavato upanāmesi – ‘‘pivatu bhagavā tekaṭulayāgu’’nti. Jānantāpi tathāgatā pucchanti, jānantāpi na pucchanti; kālaṃ viditvā pucchanti, kālaṃ viditvā na pucchanti; atthasaṃhitaṃ tathāgatā pucchanti, no anatthasaṃhitaṃ. Anatthasaṃhite setughāto tathāgatānaṃ. Dvīhi ākārehi buddhā bhagavanto bhikkhū paṭipucchanti – dhammaṃ vā desessāma, sāvakānaṃ vā sikkhāpadaṃ paññapessāmāti. Atha kho bhagavā āyasmantaṃ ānandaṃ āmantesi – ‘‘kutāyaṃ, ānanda , yāgū’’ti? Atha kho āyasmā ānando bhagavato etamatthaṃ ārocesi. Vigarahi buddho bhagavā – ‘ananucchavikaṃ, ānanda, ananulomikaṃ, appatirūpaṃ, assāmaṇakaṃ, akappiyaṃ, akaraṇīyaṃ. Kathañhi nāma tvaṃ, ānanda, evarūpāya bāhullāya cetessasi. Yadapi, ānanda, anto vuṭṭhaṃ 2 tadapi akappiyaṃ; yadapi anto pakkaṃ tadapi akappiyaṃ; yadapi sāmaṃ pakkaṃ, tadapi akappiyaṃ. Netaṃ, ānanda, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, anto vuṭṭhaṃ, anto pakkaṃ, sāmaṃ pakkaṃ paribhuñjitabbaṃ. Yo paribhuñjeya, āpatti dukkaṭassa. Anto ce, bhikkhave, vuṭṭhaṃ, anto pakkaṃ, sāmaṃ pakkaṃ tañce paribhuñjeyya, āpatti tiṇṇaṃ dukkaṭānaṃ. Anto ce, bhikkhave, vuṭṭhaṃ, anto pakkaṃ, aññehi pakkaṃ, tañce paribhuñjeyya, āpatti dvinnaṃ dukkaṭānaṃ. Anto ce, bhikkhave, vuṭṭhaṃ, bahi pakkaṃ, sāmaṃ pakkaṃ, tañce paribhuñjeyya, āpatti dvinnaṃ dukkaṭānaṃ. Bahi ce, bhikkhave, vuṭṭhaṃ, anto pakkaṃ, sāmaṃ pakkaṃ, tañce paribhuñjeyya, āpatti dvinnaṃ dukkaṭānaṃ. Anto ce, bhikkhave, vuṭṭhaṃ, bahi pakkaṃ, aññehi pakkaṃ, tañce paribhuñjeyya, āpatti dukkaṭassa. Bahi ce, bhikkhave, vuṭṭhaṃ, anto pakkaṃ, aññehi pakkaṃ, tañce paribhuñjeyya, āpatti dukkaṭassa. Bahi ce, bhikkhave, vuṭṭhaṃ, bahi pakkaṃ, sāmaṃ pakkaṃ, tañce paribhuñjeyya, āpatti dukkaṭassa. Bahi ce, bhikkhave, vuṭṭhaṃ, bahi pakkaṃ , aññehi pakkaṃ, tañce paribhuñjeyya, anāpattī’’’ti.
தேன கோ² பன ஸமயேன பி⁴க்கூ² ‘‘ப⁴க³வதா ஸாமங்பாகோ படிக்கி²த்தோ’’தி புன பாகே குக்குச்சாயந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, புன பாகங் பசிதுந்தி.
Tena kho pana samayena bhikkhū ‘‘bhagavatā sāmaṃpāko paṭikkhitto’’ti puna pāke kukkuccāyanti. Bhagavato etamatthaṃ ārocesuṃ. Anujānāmi, bhikkhave, puna pākaṃ pacitunti.
தேன கோ² பன ஸமயேன ராஜக³ஹங் து³ப்³பி⁴க்க²ங் ஹோதி. மனுஸ்ஸா லோணம்பி, தேலம்பி, தண்டு³லம்பி, கா²த³னீயம்பி ஆராமங் ஆஹரந்தி. தானி பி⁴க்கூ² ப³ஹி வாஸெந்தி; உக்கபிண்ட³காபி கா²த³ந்தி, சோராபி ஹரந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அந்தோ வாஸேதுந்தி. அந்தோ வாஸெத்வா ப³ஹி பாசெந்தி. த³மகா பரிவாரெந்தி. பி⁴க்கூ² அவிஸ்ஸட்டா² பரிபு⁴ஞ்ஜந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அந்தோ பசிதுந்தி. து³ப்³பி⁴க்கே² கப்பியகாரகா ப³ஹுதரங் ஹரந்தி, அப்பதரங் பி⁴க்கூ²னங் தெ³ந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸாமங் பசிதுங். அனுஜானாமி, பி⁴க்க²வே, அந்தோ வுட்ட²ங், அந்தோ பக்கங், ஸாமங் பக்கந்தி.
Tena kho pana samayena rājagahaṃ dubbhikkhaṃ hoti. Manussā loṇampi, telampi, taṇḍulampi, khādanīyampi ārāmaṃ āharanti. Tāni bhikkhū bahi vāsenti; ukkapiṇḍakāpi khādanti, corāpi haranti. Bhagavato etamatthaṃ ārocesuṃ. Anujānāmi, bhikkhave, anto vāsetunti. Anto vāsetvā bahi pācenti. Damakā parivārenti. Bhikkhū avissaṭṭhā paribhuñjanti. Bhagavato etamatthaṃ ārocesuṃ. Anujānāmi, bhikkhave, anto pacitunti. Dubbhikkhe kappiyakārakā bahutaraṃ haranti, appataraṃ bhikkhūnaṃ denti. Bhagavato etamatthaṃ ārocesuṃ. Anujānāmi, bhikkhave, sāmaṃ pacituṃ. Anujānāmi, bhikkhave, anto vuṭṭhaṃ, anto pakkaṃ, sāmaṃ pakkanti.
அந்தோவுட்டா²தி³படிக்கே²பகதா² நிட்டி²தா.
Antovuṭṭhādipaṭikkhepakathā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கு³ளாதி³அனுஜானநகதா² • Guḷādianujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கு³ளாதி³அனுஜானநகதா²வண்ணனா • Guḷādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கு³ளாதி³அனுஜானநகதா²வண்ணனா • Guḷādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கு³ளாதி³அனுஜானநகதா²வண்ணனா • Guḷādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 163. கு³ளாதி³அனுஜானநகதா² • 163. Guḷādianujānanakathā
