| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
අඞ්‌ගුත්‌තරනිකායෙ
Aṅguttaranikāye
චතුක්‌කනිපාත-අට්‌ඨකථා
Catukkanipāta-aṭṭhakathā
1. පඨමපණ්‌ණාසකං
1. Paṭhamapaṇṇāsakaṃ
1. භණ්‌ඩගාමවග්‌ගො
1. Bhaṇḍagāmavaggo
1. අනුබුද්‌ධසුත්‌තවණ්‌ණනා
1. Anubuddhasuttavaṇṇanā
1. චතුක්‌කනිපාතස්‌ස පඨමෙ අනනුබොධාති අබුජ්‌ඣනෙන අජානනෙන. අප්‌පටිවෙධාති අප්‌පටිවිජ්‌ඣනෙන අපච්‌චක්‌ඛකිරියාය. දීඝමද්‌ධානන්‌ති චිරකාලං. සන්‌ධාවිතන්‌ති භවතො භවං ගමනවසෙන සන්‌ධාවිතං. සංසරිතන්‌ති පුනප්‌පුනං ගමනාගමනවසෙන සංසරිතං. මමඤ්‌චෙව තුම්‌හාකඤ්‌චාති මයා ච තුම්‌හෙහි ච. අථ වා සන්‌ධාවිතං සංසරිතන්‌ති සන්‌ධාවනං සංසරණං මමඤ්‌චෙව තුම්‌හාකඤ්‌ච අහොසීති එවමෙත්‌ථ අත්‌ථො වෙදිතබ්‌බො. අරියස්‌සාති නිද්‌දොසස්‌ස. සීලං සමාධි පඤ්‌ඤාති ඉමෙ පන තයො ධම්‌මා මග්‌ගඵලසම්‌පයුත්‌තාව වෙදිතබ්‌බා, විමුත්‌තිනාමෙන ඵලමෙව නිද්‌දිට්‌ඨං. භවතණ්‌හාති භවෙසු තණ්‌හා. භවනෙත්‌තීති භවරජ්‌ජු. තණ්‌හාය එව එතං නාමං. තාය හි සත්‌තා ගොණා විය ගීවාය බන්‌ධිත්‌වා තං තං භවං නීයන්‌ති, තස්‌මා භවනෙත්‌තීති වුච්‌චති.
1. Catukkanipātassa paṭhame ananubodhāti abujjhanena ajānanena. Appaṭivedhāti appaṭivijjhanena apaccakkhakiriyāya. Dīghamaddhānanti cirakālaṃ. Sandhāvitanti bhavato bhavaṃ gamanavasena sandhāvitaṃ. Saṃsaritanti punappunaṃ gamanāgamanavasena saṃsaritaṃ. Mamañceva tumhākañcāti mayā ca tumhehi ca. Atha vā sandhāvitaṃ saṃsaritanti sandhāvanaṃ saṃsaraṇaṃ mamañceva tumhākañca ahosīti evamettha attho veditabbo. Ariyassāti niddosassa. Sīlaṃ samādhi paññāti ime pana tayo dhammā maggaphalasampayuttāva veditabbā, vimuttināmena phalameva niddiṭṭhaṃ. Bhavataṇhāti bhavesu taṇhā. Bhavanettīti bhavarajju. Taṇhāya eva etaṃ nāmaṃ. Tāya hi sattā goṇā viya gīvāya bandhitvā taṃ taṃ bhavaṃ nīyanti, tasmā bhavanettīti vuccati.
අනුත්‌තරාති ලොකුත්‌තරා. දුක්‌ඛස්‌සන්‌තකරොති වට්‌ටදුක්‌ඛස්‌ස අන්‌තකරො. චක්‌ඛුමාති පඤ්‌චහි චක්‌ඛූහි චක්‌ඛුමා. පරිනිබ්‌බුතොති කිලෙසපරිනිබ්‌බානෙන පරිනිබ්‌බුතො. ඉදමස්‌ස බොධිමණ්‌ඩෙ පඨමපරිනිබ්‌බානං, පච්‌ඡා පන යමකසාලානමන්‌තරෙ අනුපාදිසෙසාය නිබ්‌බානධාතුයා පරිනිබ්‌බුතොති යථානුසන්‌ධිනා දෙසනං නිට්‌ඨාපෙසි.
Anuttarāti lokuttarā. Dukkhassantakaroti vaṭṭadukkhassa antakaro. Cakkhumāti pañcahi cakkhūhi cakkhumā. Parinibbutoti kilesaparinibbānena parinibbuto. Idamassa bodhimaṇḍe paṭhamaparinibbānaṃ, pacchā pana yamakasālānamantare anupādisesāya nibbānadhātuyā parinibbutoti yathānusandhinā desanaṃ niṭṭhāpesi.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. අනුබුද්‌ධසුත්‌තං • 1. Anubuddhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-2. අනුබුද්‌ධසුත්‌තාදිවණ්‌ණනා • 1-2. Anubuddhasuttādivaṇṇanā
