| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៧-១០. អនុធម្មសុត្តាទិវណ្ណនា
7-10. Anudhammasuttādivaṇṇanā
៣៩-៤២. អបាយទុក្ខេ សកលសំសារទុក្ខេ ច បតិតុំ អទត្វា ធារណដ្ឋេន ធម្មោ, មគ្គផលនិព្ពានានិ។ តទនុលោមិកា ចស្ស បុព្ពភាគបដិបទាតិ អាហ ‘‘ធម្មានុធម្មបដិបន្នស្សា’’តិអាទិ។ ‘‘និព្ពិទាពហុលោ’’តិ អដ្ឋកថាយំ បទុទ្ធារោ កតោ, បាឡិយំ បន ‘‘និព្ពិទាពហុលំ វិហរេយ្យា’’តិ អាគតំ។ ឧក្កណ្ឋនពហុលោតិ សព្ពភវេសុ ឧក្កណ្ឋនពហុលោ។ តីហិ បរិញ្ញាហីតិ ញាតតីរណប្បហានបរិញ្ញាហិ។ បរិជានាតីតិ តេភូមកធម្មេ បរិច្ឆិជ្ជ ជានាតិ, វិបស្សនំ ឧស្សុក្កាបេតិ។ បរិមុច្ចតិ សព្ពសំកិលេសតោ ‘‘មគ្គោ បវត្តិតោ បរិមុច្ចតី’’តិ វុត្តត្តា។ តថាតិ ឥមិនា ឥតោ បរេសុ តីសុ មគ្គោ ហោតីតិ ទស្សេតិ។ ឥធាតិ ឥមស្មិំ សុត្តេ។ អនិយមិតាតិ អគ្គហិតា។ តេសុ និយមិតា ‘‘អនិច្ចានុបស្សី’’តិអាទិវចនតោ។ សាតិ អនុបស្សនា។ តត្ថ និយមិតវសេនេវាតិ ឥទំ លក្ខណវចនំ យថា ‘‘យទិ មេ ព្យាធយោ ភវេយ្យុំ , ទាតព្ពមិទមោសធ’’ន្តិ។ ន ហិ សក្កា ឯតិស្សា ឯវ អនុបស្សនាយ វសេន សម្មសនាចារំ មត្ថកំ បាបេតុន្តិ។
39-42. Apāyadukkhe sakalasaṃsāradukkhe ca patituṃ adatvā dhāraṇaṭṭhena dhammo, maggaphalanibbānāni. Tadanulomikā cassa pubbabhāgapaṭipadāti āha ‘‘dhammānudhammapaṭipannassā’’tiādi. ‘‘Nibbidābahulo’’ti aṭṭhakathāyaṃ paduddhāro kato, pāḷiyaṃ pana ‘‘nibbidābahulaṃ vihareyyā’’ti āgataṃ. Ukkaṇṭhanabahuloti sabbabhavesu ukkaṇṭhanabahulo. Tīhi pariññāhīti ñātatīraṇappahānapariññāhi. Parijānātīti tebhūmakadhamme paricchijja jānāti, vipassanaṃ ussukkāpeti. Parimuccati sabbasaṃkilesato ‘‘maggo pavattito parimuccatī’’ti vuttattā. Tathāti iminā ito paresu tīsu maggo hotīti dasseti. Idhāti imasmiṃ sutte. Aniyamitāti aggahitā. Tesu niyamitā ‘‘aniccānupassī’’tiādivacanato. Sāti anupassanā. Tattha niyamitavasenevāti idaṃ lakkhaṇavacanaṃ yathā ‘‘yadi me byādhayo bhaveyyuṃ , dātabbamidamosadha’’nti. Na hi sakkā etissā eva anupassanāya vasena sammasanācāraṃ matthakaṃ pāpetunti.
អនុធម្មសុត្តាទិវណ្ណនា និដ្ឋិតា។
Anudhammasuttādivaṇṇanā niṭṭhitā.
នតុម្ហាកំវគ្គវណ្ណនា និដ្ឋិតា។
Natumhākaṃvaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
៧. អនុធម្មសុត្តំ • 7. Anudhammasuttaṃ
៨. ទុតិយអនុធម្មសុត្តំ • 8. Dutiyaanudhammasuttaṃ
៩. តតិយអនុធម្មសុត្តំ • 9. Tatiyaanudhammasuttaṃ
១០. ចតុត្ថអនុធម្មសុត្តំ • 10. Catutthaanudhammasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧-១០. អនុធម្មសុត្តាទិវណ្ណនា • 7-10. Anudhammasuttādivaṇṇanā
