| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
५. अनुग्गहितसुत्तवण्णना
5. Anuggahitasuttavaṇṇanā
२५. पञ्चमे सम्मादिट्ठीति विपस्सनासम्मादिट्ठि। चेतोविमुत्तिफलातिआदीसु चेतोविमुत्तीति मग्गफलसमाधि। पञ्ञाविमुत्तीति फलञाणं। सीलानुग्गहिताति सीलेन अनुग्गहिता अनुरक्खिता। सुतानुग्गहिताति बाहुसच्चेन अनुग्गहिता। साकच्छानुग्गहिताति धम्मसाकच्छाय अनुग्गहिता। समथानुग्गहिताति चित्तेकग्गताय अनुग्गहिता।
25. Pañcame sammādiṭṭhīti vipassanāsammādiṭṭhi. Cetovimuttiphalātiādīsu cetovimuttīti maggaphalasamādhi. Paññāvimuttīti phalañāṇaṃ. Sīlānuggahitāti sīlena anuggahitā anurakkhitā. Sutānuggahitāti bāhusaccena anuggahitā. Sākacchānuggahitāti dhammasākacchāya anuggahitā. Samathānuggahitāti cittekaggatāya anuggahitā.
इमस्स पनत्थस्स आविभावत्थं मधुरम्बबीजं रोपेत्वा समन्ता मरियादं बन्धित्वा कालानुकालं उदकं आसिञ्चित्वा कालानुकालं मूलानि सोधेत्वा कालानुकालं पतितपाणके हारेत्वा कालानुकालं मक्कटजालं लुञ्चित्वा अम्बं पटिजग्गन्तो पुरिसो दस्सेतब्बो। तस्स हि पुरिसस्स मधुरम्बबीजरोपनं विय विपस्सनासम्मादिट्ठि दट्ठब्बा, मरियादबन्धनं विय सीलेन अनुग्गण्हनं, उदकासेचनं विय सुतेन अनुग्गण्हनं, मूलपरिसोधनं विय साकच्छाय अनुग्गण्हनं, पाणकहरणं विय झानविपस्सनापारिपन्थिकसोधनवसेन समथानुग्गण्हनं, मक्कटजाललुञ्चनं विय बलवविपस्सनानुग्गण्हनं, एवं अनुग्गहितस्स रुक्खस्स खिप्पमेव वड्ढित्वा फलप्पदानं विय इमेहि सीलादीहि अनुग्गहिताय मूलसम्मादिट्ठिया खिप्पमेव मग्गवसेन वड्ढित्वा चेतोविमुत्तिपञ्ञाविमुत्तिफलप्पदानं वेदितब्बं।
Imassa panatthassa āvibhāvatthaṃ madhurambabījaṃ ropetvā samantā mariyādaṃ bandhitvā kālānukālaṃ udakaṃ āsiñcitvā kālānukālaṃ mūlāni sodhetvā kālānukālaṃ patitapāṇake hāretvā kālānukālaṃ makkaṭajālaṃ luñcitvā ambaṃ paṭijagganto puriso dassetabbo. Tassa hi purisassa madhurambabījaropanaṃ viya vipassanāsammādiṭṭhi daṭṭhabbā, mariyādabandhanaṃ viya sīlena anuggaṇhanaṃ, udakāsecanaṃ viya sutena anuggaṇhanaṃ, mūlaparisodhanaṃ viya sākacchāya anuggaṇhanaṃ, pāṇakaharaṇaṃ viya jhānavipassanāpāripanthikasodhanavasena samathānuggaṇhanaṃ, makkaṭajālaluñcanaṃ viya balavavipassanānuggaṇhanaṃ, evaṃ anuggahitassa rukkhassa khippameva vaḍḍhitvā phalappadānaṃ viya imehi sīlādīhi anuggahitāya mūlasammādiṭṭhiyā khippameva maggavasena vaḍḍhitvā cetovimuttipaññāvimuttiphalappadānaṃ veditabbaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ५. अनुग्गहितसुत्तं • 5. Anuggahitasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५. अनुग्गहितसुत्तवण्णना • 5. Anuggahitasuttavaṇṇanā
