| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. අනුග්‌ගහිතසුත්‌තවණ්‌ණනා
5. Anuggahitasuttavaṇṇanā
25. පඤ්‌චමෙ සම්‌මාදිට්‌ඨීති විපස්‌සනාසම්‌මාදිට්‌ඨි. චෙතොවිමුත්‌තිඵලාතිආදීසු චෙතොවිමුත්‌තීති මග්‌ගඵලසමාධි. පඤ්‌ඤාවිමුත්‌තීති ඵලඤාණං. සීලානුග්‌ගහිතාති සීලෙන අනුග්‌ගහිතා අනුරක්‌ඛිතා. සුතානුග්‌ගහිතාති බාහුසච්‌චෙන අනුග්‌ගහිතා. සාකච්‌ඡානුග්‌ගහිතාති ධම්‌මසාකච්‌ඡාය අනුග්‌ගහිතා. සමථානුග්‌ගහිතාති චිත්‌තෙකග්‌ගතාය අනුග්‌ගහිතා.
25. Pañcame sammādiṭṭhīti vipassanāsammādiṭṭhi. Cetovimuttiphalātiādīsu cetovimuttīti maggaphalasamādhi. Paññāvimuttīti phalañāṇaṃ. Sīlānuggahitāti sīlena anuggahitā anurakkhitā. Sutānuggahitāti bāhusaccena anuggahitā. Sākacchānuggahitāti dhammasākacchāya anuggahitā. Samathānuggahitāti cittekaggatāya anuggahitā.
ඉමස්‌ස පනත්‌ථස්‌ස ආවිභාවත්‌ථං මධුරම්‌බබීජං රොපෙත්‌වා සමන්‌තා මරියාදං බන්‌ධිත්‌වා කාලානුකාලං උදකං ආසිඤ්‌චිත්‌වා කාලානුකාලං මූලානි සොධෙත්‌වා කාලානුකාලං පතිතපාණකෙ හාරෙත්‌වා කාලානුකාලං මක්‌කටජාලං ලුඤ්‌චිත්‌වා අම්‌බං පටිජග්‌ගන්‌තො පුරිසො දස්‌සෙතබ්‌බො. තස්‌ස හි පුරිසස්‌ස මධුරම්‌බබීජරොපනං විය විපස්‌සනාසම්‌මාදිට්‌ඨි දට්‌ඨබ්‌බා, මරියාදබන්‌ධනං විය සීලෙන අනුග්‌ගණ්‌හනං, උදකාසෙචනං විය සුතෙන අනුග්‌ගණ්‌හනං, මූලපරිසොධනං විය සාකච්‌ඡාය අනුග්‌ගණ්‌හනං, පාණකහරණං විය ඣානවිපස්‌සනාපාරිපන්‌ථිකසොධනවසෙන සමථානුග්‌ගණ්‌හනං, මක්‌කටජාලලුඤ්‌චනං විය බලවවිපස්‌සනානුග්‌ගණ්‌හනං, එවං අනුග්‌ගහිතස්‌ස රුක්‌ඛස්‌ස ඛිප්‌පමෙව වඩ්‌ඪිත්‌වා ඵලප්‌පදානං විය ඉමෙහි සීලාදීහි අනුග්‌ගහිතාය මූලසම්‌මාදිට්‌ඨියා ඛිප්‌පමෙව මග්‌ගවසෙන වඩ්‌ඪිත්‌වා චෙතොවිමුත්‌තිපඤ්‌ඤාවිමුත්‌තිඵලප්‌පදානං වෙදිතබ්‌බං.
Imassa panatthassa āvibhāvatthaṃ madhurambabījaṃ ropetvā samantā mariyādaṃ bandhitvā kālānukālaṃ udakaṃ āsiñcitvā kālānukālaṃ mūlāni sodhetvā kālānukālaṃ patitapāṇake hāretvā kālānukālaṃ makkaṭajālaṃ luñcitvā ambaṃ paṭijagganto puriso dassetabbo. Tassa hi purisassa madhurambabījaropanaṃ viya vipassanāsammādiṭṭhi daṭṭhabbā, mariyādabandhanaṃ viya sīlena anuggaṇhanaṃ, udakāsecanaṃ viya sutena anuggaṇhanaṃ, mūlaparisodhanaṃ viya sākacchāya anuggaṇhanaṃ, pāṇakaharaṇaṃ viya jhānavipassanāpāripanthikasodhanavasena samathānuggaṇhanaṃ, makkaṭajālaluñcanaṃ viya balavavipassanānuggaṇhanaṃ, evaṃ anuggahitassa rukkhassa khippameva vaḍḍhitvā phalappadānaṃ viya imehi sīlādīhi anuggahitāya mūlasammādiṭṭhiyā khippameva maggavasena vaḍḍhitvā cetovimuttipaññāvimuttiphalappadānaṃ veditabbaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. අනුග්‌ගහිතසුත්‌තං • 5. Anuggahitasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. අනුග්‌ගහිතසුත්‌තවණ්‌ණනා • 5. Anuggahitasuttavaṇṇanā
