| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၆. အနုလေပဒာယကတ္ထေရအပဒာနဝဏ္ဏနာ
6. Anulepadāyakattheraapadānavaṇṇanā
အနောမဒသ္သီမုနိနောတိအာဒိကံ အာယသ္မတော အနုလေပဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော အနောမဒသ္သိသ္သ ဘဂဝတော ကာလေ ကုလဂေဟေ နိဗ္ဗတ္တော မဟဒ္ဓနော မဟာဘောဂော တသ္သ ဘဂဝတော ဗောဓိရုက္ခသ္သ ဝေဒိကာဝလယံ ကာရေတ္ဝာ သုဓာကမ္မဉ္စ ကာရေတ္ဝာ ဝာလုကသန္ထရဏံ ဒဒ္ဒဠ္ဟမာနံ ရဇတဝိမာနမိဝ ကာရေသိ။ သော တေန ပုညေန သုခပ္ပတ္တော ဥပ္ပန္နုပ္ပန္နဘဝေ ရဇတဝိမာနရဇတဂေဟရဇတပာသာဒေသု သုခမနုဘဝိတ္ဝာ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္ဝာ သတ္ထရိ ပသန္နော ပဗ္ဗဇိတ္ဝာ ဝိပသ္သနမနုယုတ္တော နစိရသ္သေဝ အရဟာ အဟောသိ။
Anomadassīmuninotiādikaṃ āyasmato anulepadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle kulagehe nibbatto mahaddhano mahābhogo tassa bhagavato bodhirukkhassa vedikāvalayaṃ kāretvā sudhākammañca kāretvā vālukasantharaṇaṃ daddaḷhamānaṃ rajatavimānamiva kāresi. So tena puññena sukhappatto uppannuppannabhave rajatavimānarajatageharajatapāsādesu sukhamanubhavitvā imasmiṃ buddhuppāde kulagehe nibbatto viññutaṃ patvā satthari pasanno pabbajitvā vipassanamanuyutto nacirasseva arahā ahosi.
၂၆. သော အပရဘာဂေ ‘‘ကိံ နု ခော ကုသလံ ကတ္ဝာ မယာ အယံ ဝိသေသော အဓိဂတော’’တိ ပုဗ္ဗေနိဝာသာနုသ္သတိဉာဏေန ပဋိပာဋိယာ အနုသ္သရိတ္ဝာ ပုဗ္ဗေ ကတကုသလံ ဇာနိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော အနောမဒသ္သီမုနိနောတိအာဒိမာဟ။ တတ္ထ အနောမံ အလာမကံ ဒသ္သနံ ဒသ္သနီယံ သရီရံ ယသ္သ သော အနောမဒသ္သီ, ဒ္ဝတ္တိံသမဟာပုရိသလက္ခဏအသီတာနုဗ္ယဉ္ဇနဗ္ယာမပ္ပဘာသမုဇ္ဇလဝိရာဇိတသရီရတ္တာ သုန္ဒရဒသ္သနောတိ အတ္ထော။ သုဓာယ ပိဏ္ဍံ ဒတ္ဝာနာတိ ဗောဓိဃရေ ဝေဒိကာဝလယံ ကာရေတ္ဝာ သကလေ ဗောဓိဃရေ သုဓာလေပနံ ကတ္ဝာတိ အတ္ထော။ ပာဏိကမ္မံ အကာသဟန္တိ သာရကဋ္ဌေန ဖလကပာဏိယော ကတ္ဝာ တာဟိ ပာဏီဟိ မဋ္ဌကမ္မံ အကာသိန္တိ အတ္ထော။ သေသံ သုဝိညေယ္ယမေဝာတိ။
26. So aparabhāge ‘‘kiṃ nu kho kusalaṃ katvā mayā ayaṃ viseso adhigato’’ti pubbenivāsānussatiñāṇena paṭipāṭiyā anussaritvā pubbe katakusalaṃ jānitvā somanassajāto pubbacaritāpadānaṃ pakāsento anomadassīmuninotiādimāha. Tattha anomaṃ alāmakaṃ dassanaṃ dassanīyaṃ sarīraṃ yassa so anomadassī, dvattiṃsamahāpurisalakkhaṇaasītānubyañjanabyāmappabhāsamujjalavirājitasarīrattā sundaradassanoti attho. Sudhāya piṇḍaṃ datvānāti bodhighare vedikāvalayaṃ kāretvā sakale bodhighare sudhālepanaṃ katvāti attho. Pāṇikammaṃ akāsahanti sārakaṭṭhena phalakapāṇiyo katvā tāhi pāṇīhi maṭṭhakammaṃ akāsinti attho. Sesaṃ suviññeyyamevāti.
အနုလေပဒာယကတ္ထေရအပဒာနဝဏ္ဏနာ သမတ္တာ။
Anulepadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၆. အနုလေပဒာယကတ္ထေရအပဒာနံ • 6. Anulepadāyakattheraapadānaṃ
