| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৫. অনুমানসুত্তং
5. Anumānasuttaṃ
১৮১. এৰং মে সুতং – একং সমযং আযস্মা মহামোগ্গল্লানো ভগ্গেসু ৰিহরতি সুসুমারগিরে 1 ভেসকল়াৰনে মিগদাযে। তত্র খো আযস্মা মহামোগ্গল্লানো ভিক্খূ আমন্তেসি – ‘‘আৰুসো, ভিক্খৰো’’তি। ‘‘আৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং। আযস্মা মহামোগ্গল্লানো এতদৰোচ –
181. Evaṃ me sutaṃ – ekaṃ samayaṃ āyasmā mahāmoggallāno bhaggesu viharati susumāragire 2 bhesakaḷāvane migadāye. Tatra kho āyasmā mahāmoggallāno bhikkhū āmantesi – ‘‘āvuso, bhikkhavo’’ti. ‘‘Āvuso’’ti kho te bhikkhū āyasmato mahāmoggallānassa paccassosuṃ. Āyasmā mahāmoggallāno etadavoca –
‘‘পৰারেতি চেপি, আৰুসো, ভিক্খু – ‘ৰদন্তু মং আযস্মন্তো, ৰচনীযোম্হি আযস্মন্তেহী’তি, সো চ হোতি দুব্বচো, দোৰচস্সকরণেহি ধম্মেহি সমন্নাগতো, অক্খমো অপ্পদক্খিণগ্গাহী অনুসাসনিং, অথ খো নং সব্রহ্মচারী ন চেৰ ৰত্তব্বং মঞ্ঞন্তি, ন চ অনুসাসিতব্বং মঞ্ঞন্তি, ন চ তস্মিং পুগ্গলে ৰিস্সাসং আপজ্জিতব্বং মঞ্ঞন্তি।
‘‘Pavāreti cepi, āvuso, bhikkhu – ‘vadantu maṃ āyasmanto, vacanīyomhi āyasmantehī’ti, so ca hoti dubbaco, dovacassakaraṇehi dhammehi samannāgato, akkhamo appadakkhiṇaggāhī anusāsaniṃ, atha kho naṃ sabrahmacārī na ceva vattabbaṃ maññanti, na ca anusāsitabbaṃ maññanti, na ca tasmiṃ puggale vissāsaṃ āpajjitabbaṃ maññanti.
‘‘কতমে চাৰুসো, দোৰচস্সকরণা ধম্মা? ইধাৰুসো, ভিক্খু পাপিচ্ছো হোতি, পাপিকানং ইচ্ছানং ৰসং গতো। যম্পাৰুসো, ভিক্খু পাপিচ্ছো হোতি, পাপিকানং ইচ্ছানং ৰসং গতো – অযম্পি ধম্মো দোৰচস্সকরণো।
‘‘Katame cāvuso, dovacassakaraṇā dhammā? Idhāvuso, bhikkhu pāpiccho hoti, pāpikānaṃ icchānaṃ vasaṃ gato. Yampāvuso, bhikkhu pāpiccho hoti, pāpikānaṃ icchānaṃ vasaṃ gato – ayampi dhammo dovacassakaraṇo.
‘‘পুন চপরং, আৰুসো, ভিক্খু অত্তুক্কংসকো হোতি পরৰম্ভী। যম্পাৰুসো, ভিক্খু অত্তুক্কংসকো হোতি পরৰম্ভী – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu attukkaṃsako hoti paravambhī. Yampāvuso, bhikkhu attukkaṃsako hoti paravambhī – ayampi dhammo dovacassakaraṇo.
‘‘পুন চপরং, আৰুসো, ভিক্খু কোধনো হোতি কোধাভিভূতো। যম্পাৰুসো, ভিক্খু কোধনো হোতি কোধাভিভূতো – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu kodhano hoti kodhābhibhūto. Yampāvuso, bhikkhu kodhano hoti kodhābhibhūto – ayampi dhammo dovacassakaraṇo.
‘‘পুন চপরং, আৰুসো , ভিক্খু কোধনো হোতি কোধহেতু উপনাহী। যম্পাৰুসো, ভিক্খু কোধনো হোতি কোধহেতু উপনাহী – অযম্পি ধম্মো দোৰচস্সকরণো।
‘‘Puna caparaṃ, āvuso , bhikkhu kodhano hoti kodhahetu upanāhī. Yampāvuso, bhikkhu kodhano hoti kodhahetu upanāhī – ayampi dhammo dovacassakaraṇo.
‘‘পুন চপরং, আৰুসো, ভিক্খু কোধনো হোতি কোধহেতু অভিসঙ্গী। যম্পাৰুসো, ভিক্খু কোধনো হোতি কোধহেতু অভিসঙ্গী – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu kodhano hoti kodhahetu abhisaṅgī. Yampāvuso, bhikkhu kodhano hoti kodhahetu abhisaṅgī – ayampi dhammo dovacassakaraṇo.
‘‘পুন চপরং, আৰুসো, ভিক্খু কোধনো হোতি কোধসামন্তা 3 ৰাচং নিচ্ছারেতা। যম্পাৰুসো, ভিক্খু কোধনো হোতি কোধসামন্তা ৰাচং নিচ্ছারেতা – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu kodhano hoti kodhasāmantā 4 vācaṃ nicchāretā. Yampāvuso, bhikkhu kodhano hoti kodhasāmantā vācaṃ nicchāretā – ayampi dhammo dovacassakaraṇo.
‘‘পুন চপরং, আৰুসো, ভিক্খু চোদিতো 5 চোদকেন চোদকং পটিপ্ফরতি। যম্পাৰুসো, ভিক্খু চোদিতো চোদকেন চোদকং পটিপ্ফরতি – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu codito 6 codakena codakaṃ paṭippharati. Yampāvuso, bhikkhu codito codakena codakaṃ paṭippharati – ayampi dhammo dovacassakaraṇo.
‘‘পুন চপরং, আৰুসো, ভিক্খু চোদিতো চোদকেন চোদকং অপসাদেতি। যম্পাৰুসো, ভিক্খু চোদিতো চোদকেন চোদকং অপসাদেতি – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu codito codakena codakaṃ apasādeti. Yampāvuso, bhikkhu codito codakena codakaṃ apasādeti – ayampi dhammo dovacassakaraṇo.
‘‘পুন চপরং , আৰুসো, ভিক্খু চোদিতো চোদকেন চোদকস্স পচ্চারোপেতি। যম্পাৰুসো, ভিক্খু চোদিতো চোদকেন চোদকস্স পচ্চারোপেতি – অযম্পি ধম্মো দোৰচস্সকরণো।
‘‘Puna caparaṃ , āvuso, bhikkhu codito codakena codakassa paccāropeti. Yampāvuso, bhikkhu codito codakena codakassa paccāropeti – ayampi dhammo dovacassakaraṇo.
‘‘পুন চপরং, আৰুসো, ভিক্খু চোদিতো চোদকেন অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি। যম্পাৰুসো, ভিক্খু চোদিতো চোদকেন অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti. Yampāvuso, bhikkhu codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti – ayampi dhammo dovacassakaraṇo.
‘‘পুন চপরং, আৰুসো, ভিক্খু চোদিতো চোদকেন অপদানে ন সম্পাযতি। যম্পাৰুসো, ভিক্খু চোদিতো চোদকেন অপদানে ন সম্পাযতি – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu codito codakena apadāne na sampāyati. Yampāvuso, bhikkhu codito codakena apadāne na sampāyati – ayampi dhammo dovacassakaraṇo.
‘‘পুন চপরং, আৰুসো, ভিক্খু মক্খী হোতি পল়াসী। যম্পাৰুসো, ভিক্খু মক্খী হোতি পল়াসী – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu makkhī hoti paḷāsī. Yampāvuso, bhikkhu makkhī hoti paḷāsī – ayampi dhammo dovacassakaraṇo.
‘‘পুন চপরং, আৰুসো, ভিক্খু ইস্সুকী হোতি মচ্ছরী। যম্পাৰুসো, ভিক্খু ইস্সুকী হোতি মচ্ছরী – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu issukī hoti maccharī. Yampāvuso, bhikkhu issukī hoti maccharī – ayampi dhammo dovacassakaraṇo.
‘‘পুন চপরং, আৰুসো, ভিক্খু সঠো হোতি মাযাৰী। যম্পাৰুসো, ভিক্খু সঠো হোতি মাযাৰী – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu saṭho hoti māyāvī. Yampāvuso, bhikkhu saṭho hoti māyāvī – ayampi dhammo dovacassakaraṇo.
‘‘পুন চপরং, আৰুসো, ভিক্খু থদ্ধো হোতি অতিমানী। যম্পাৰুসো, ভিক্খু থদ্ধো হোতি অতিমানী – অযম্পি ধম্মো দোৰচস্সকরণো।
‘‘Puna caparaṃ, āvuso, bhikkhu thaddho hoti atimānī. Yampāvuso, bhikkhu thaddho hoti atimānī – ayampi dhammo dovacassakaraṇo.
‘‘পুন চপরং, আৰুসো, ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী। যম্পাৰুসো, ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী – অযম্পি ধম্মো দোৰচস্সকরণো। ইমে ৰুচ্চন্তাৰুসো, দোৰচস্সকরণা ধম্মা।
‘‘Puna caparaṃ, āvuso, bhikkhu sandiṭṭhiparāmāsī hoti ādhānaggāhī duppaṭinissaggī. Yampāvuso, bhikkhu sandiṭṭhiparāmāsī hoti ādhānaggāhī duppaṭinissaggī – ayampi dhammo dovacassakaraṇo. Ime vuccantāvuso, dovacassakaraṇā dhammā.
১৮২. ‘‘নো চেপি, আৰুসো, ভিক্খু পৰারেতি – ‘ৰদন্তু মং আযস্মন্তো, ৰচনীযোম্হি আযস্মন্তেহী’তি, সো চ হোতি সুৰচো, সোৰচস্সকরণেহি ধম্মেহি সমন্নাগতো, খমো পদক্খিণগ্গাহী অনুসাসনিং, অথ খো নং সব্রহ্মচারী ৰত্তব্বঞ্চেৰ মঞ্ঞন্তি, অনুসাসিতব্বঞ্চ মঞ্ঞন্তি, তস্মিঞ্চ পুগ্গলে ৰিস্সাসং আপজ্জিতব্বং মঞ্ঞন্তি।
182. ‘‘No cepi, āvuso, bhikkhu pavāreti – ‘vadantu maṃ āyasmanto, vacanīyomhi āyasmantehī’ti, so ca hoti suvaco, sovacassakaraṇehi dhammehi samannāgato, khamo padakkhiṇaggāhī anusāsaniṃ, atha kho naṃ sabrahmacārī vattabbañceva maññanti, anusāsitabbañca maññanti, tasmiñca puggale vissāsaṃ āpajjitabbaṃ maññanti.
‘‘কতমে চাৰুসো, সোৰচস্সকরণা ধম্মা? ইধাৰুসো, ভিক্খু ন পাপিচ্ছো হোতি, ন পাপিকানং ইচ্ছানং ৰসং গতো। যম্পাৰুসো, ভিক্খু ন পাপিচ্ছো হোতি ন পাপিকানং ইচ্ছানং ৰসং গতো – অযম্পি ধম্মো সোৰচস্সকরণো।
‘‘Katame cāvuso, sovacassakaraṇā dhammā? Idhāvuso, bhikkhu na pāpiccho hoti, na pāpikānaṃ icchānaṃ vasaṃ gato. Yampāvuso, bhikkhu na pāpiccho hoti na pāpikānaṃ icchānaṃ vasaṃ gato – ayampi dhammo sovacassakaraṇo.
‘‘পুন চপরং, আৰুসো, ভিক্খু অনত্তুক্কংসকো হোতি অপরৰম্ভী। যম্পাৰুসো, ভিক্খু অনত্তুক্কংসকো হোতি অপরৰম্ভী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu anattukkaṃsako hoti aparavambhī. Yampāvuso, bhikkhu anattukkaṃsako hoti aparavambhī – ayampi dhammo sovacassakaraṇo.
‘‘পুন চপরং, আৰুসো, ভিক্খু ন কোধনো হোতি ন কোধাভিভূতো। যম্পাৰুসো, ভিক্খু ন কোধনো হোতি ন কোধাভিভূতো – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu na kodhano hoti na kodhābhibhūto. Yampāvuso, bhikkhu na kodhano hoti na kodhābhibhūto – ayampi dhammo sovacassakaraṇo.
‘‘পুন চপরং, আৰুসো, ভিক্খু ন কোধনো হোতি ন কোধহেতু উপনাহী। যম্পাৰুসো, ভিক্খু ন কোধনো হোতি ন কোধহেতু উপনাহী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu na kodhano hoti na kodhahetu upanāhī. Yampāvuso, bhikkhu na kodhano hoti na kodhahetu upanāhī – ayampi dhammo sovacassakaraṇo.
‘‘পুন চপরং, আৰুসো, ভিক্খু ন কোধনো হোতি ন কোধহেতু অভিসঙ্গী। যম্পাৰুসো, ভিক্খু ন কোধনো হোতি ন কোধহেতু অভিসঙ্গী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu na kodhano hoti na kodhahetu abhisaṅgī. Yampāvuso, bhikkhu na kodhano hoti na kodhahetu abhisaṅgī – ayampi dhammo sovacassakaraṇo.
‘‘পুন চপরং, আৰুসো, ভিক্খু ন কোধনো হোতি ন কোধসামন্তা ৰাচং নিচ্ছারেতা। যম্পাৰুসো , ভিক্খু ন কোধনো হোতি ন কোধসামন্তা ৰাচং নিচ্ছারেতা – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu na kodhano hoti na kodhasāmantā vācaṃ nicchāretā. Yampāvuso , bhikkhu na kodhano hoti na kodhasāmantā vācaṃ nicchāretā – ayampi dhammo sovacassakaraṇo.
‘‘পুন চপরং, আৰুসো, ভিক্খু চোদিতো চোদকেন চোদকং নপ্পটিপ্ফরতি। যম্পাৰুসো, ভিক্খু চোদিতো চোদকেন চোদকং নপ্পটিপ্ফরতি – অযম্পি ধম্মো সোৰচস্সকরণো ।
‘‘Puna caparaṃ, āvuso, bhikkhu codito codakena codakaṃ nappaṭippharati. Yampāvuso, bhikkhu codito codakena codakaṃ nappaṭippharati – ayampi dhammo sovacassakaraṇo .
‘‘পুন চপরং, আৰুসো, ভিক্খু চোদিতো চোদকেন চোদকং ন অপসাদেতি। যম্পাৰুসো, ভিক্খু চোদিতো চোদকেন চোদকং ন অপসাদেতি – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu codito codakena codakaṃ na apasādeti. Yampāvuso, bhikkhu codito codakena codakaṃ na apasādeti – ayampi dhammo sovacassakaraṇo.
‘‘পুন চপরং, আৰুসো, ভিক্খু চোদিতো চোদকেন চোদকস্স ন পচ্চারোপেতি। যম্পাৰুসো, ভিক্খু চোদিতো চোদকেন চোদকস্স ন পচ্চারোপেতি – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu codito codakena codakassa na paccāropeti. Yampāvuso, bhikkhu codito codakena codakassa na paccāropeti – ayampi dhammo sovacassakaraṇo.
‘‘পুন চপরং, আৰুসো, ভিক্খু চোদিতো চোদকেন ন অঞ্ঞেনঞ্ঞং পটিচরতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি। যম্পাৰুসো, ভিক্খু চোদিতো চোদকেন ন অঞ্ঞেনঞ্ঞং পটিচরতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu codito codakena na aññenaññaṃ paṭicarati, na bahiddhā kathaṃ apanāmeti, na kopañca dosañca appaccayañca pātukaroti. Yampāvuso, bhikkhu codito codakena na aññenaññaṃ paṭicarati, na bahiddhā kathaṃ apanāmeti, na kopañca dosañca appaccayañca pātukaroti – ayampi dhammo sovacassakaraṇo.
‘‘পুন চপরং, আৰুসো, ভিক্খু চোদিতো চোদকেন অপদানে সম্পাযতি। যম্পাৰুসো, ভিক্খু চোদিতো চোদকেন অপদানে সম্পাযতি – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu codito codakena apadāne sampāyati. Yampāvuso, bhikkhu codito codakena apadāne sampāyati – ayampi dhammo sovacassakaraṇo.
‘‘পুন চপরং, আৰুসো, ভিক্খু অমক্খী হোতি অপল়াসী। যম্পাৰুসো, ভিক্খু অমক্খী হোতি অপল়াসী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu amakkhī hoti apaḷāsī. Yampāvuso, bhikkhu amakkhī hoti apaḷāsī – ayampi dhammo sovacassakaraṇo.
‘‘পুন চপরং, আৰুসো, ভিক্খু অনিস্সুকী হোতি অমচ্ছরী। যম্পাৰুসো, ভিক্খু অনিস্সুকী হোতি অমচ্ছরী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu anissukī hoti amaccharī. Yampāvuso, bhikkhu anissukī hoti amaccharī – ayampi dhammo sovacassakaraṇo.
‘‘পুন চপরং, আৰুসো, ভিক্খু অসঠো হোতি অমাযাৰী। যম্পাৰুসো, ভিক্খু অসঠো হোতি অমাযাৰী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu asaṭho hoti amāyāvī. Yampāvuso, bhikkhu asaṭho hoti amāyāvī – ayampi dhammo sovacassakaraṇo.
‘‘পুন চপরং, আৰুসো, ভিক্খু অত্থদ্ধো হোতি অনতিমানী। যম্পাৰুসো, ভিক্খু অত্থদ্ধো হোতি অনতিমানী – অযম্পি ধম্মো সোৰচস্সকরণো।
‘‘Puna caparaṃ, āvuso, bhikkhu atthaddho hoti anatimānī. Yampāvuso, bhikkhu atthaddho hoti anatimānī – ayampi dhammo sovacassakaraṇo.
‘‘পুন চপরং, আৰুসো, ভিক্খু অসন্দিট্ঠিপরামাসী হোতি অনাধানগ্গাহী সুপ্পটিনিস্সগ্গী। যম্পাৰুসো, ভিক্খু অসন্দিট্ঠিপরামাসী হোতি, অনাধানগ্গাহী সুপ্পটিনিস্সগ্গী – অযম্পি ধম্মো সোৰচস্সকরণো। ইমে ৰুচ্চন্তাৰুসো, সোৰচস্সকরণা ধম্মা।
‘‘Puna caparaṃ, āvuso, bhikkhu asandiṭṭhiparāmāsī hoti anādhānaggāhī suppaṭinissaggī. Yampāvuso, bhikkhu asandiṭṭhiparāmāsī hoti, anādhānaggāhī suppaṭinissaggī – ayampi dhammo sovacassakaraṇo. Ime vuccantāvuso, sovacassakaraṇā dhammā.
১৮৩. ‘‘তত্রাৰুসো , ভিক্খুনা অত্তনাৰ অত্তানং এৰং অনুমিনিতব্বং 7 – ‘যো খ্ৰাযং পুগ্গলো পাপিচ্ছো, পাপিকানং ইচ্ছানং ৰসং গতো, অযং মে পুগ্গলো অপ্পিযো অমনাপো; অহঞ্চেৰ খো পনস্সং পাপিচ্ছো পাপিকানং ইচ্ছানং ৰসং গতো, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘ন পাপিচ্ছো ভৰিস্সামি, ন পাপিকানং ইচ্ছানং ৰসং গতো’তি চিত্তং উপ্পাদেতব্বং।
183. ‘‘Tatrāvuso , bhikkhunā attanāva attānaṃ evaṃ anuminitabbaṃ 8 – ‘yo khvāyaṃ puggalo pāpiccho, pāpikānaṃ icchānaṃ vasaṃ gato, ayaṃ me puggalo appiyo amanāpo; ahañceva kho panassaṃ pāpiccho pāpikānaṃ icchānaṃ vasaṃ gato, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na pāpiccho bhavissāmi, na pāpikānaṃ icchānaṃ vasaṃ gato’ti cittaṃ uppādetabbaṃ.
‘‘‘যো খ্ৰাযং পুগ্গলো অত্তুক্কংসকো পরৰম্ভী, অযং মে পুগ্গলো অপ্পিযো অমনাপো; অহঞ্চেৰ খো পনস্সং অত্তুক্কংসকো পরৰম্ভী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘অনত্তুক্কংসকো ভৰিস্সামি অপরৰম্ভী’তি চিত্তং উপ্পাদেতব্বং।
‘‘‘Yo khvāyaṃ puggalo attukkaṃsako paravambhī, ayaṃ me puggalo appiyo amanāpo; ahañceva kho panassaṃ attukkaṃsako paravambhī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘anattukkaṃsako bhavissāmi aparavambhī’ti cittaṃ uppādetabbaṃ.
‘‘‘যো খ্ৰাযং পুগ্গলো কোধনো কোধাভিভূতো, অযং মে পুগ্গলো অপ্পিযো অমনাপো। অহঞ্চেৰ খো পনস্সং কোধনো কোধাভিভূতো, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধাভিভূতো’তি চিত্তং উপ্পাদেতব্বং।
‘‘‘Yo khvāyaṃ puggalo kodhano kodhābhibhūto, ayaṃ me puggalo appiyo amanāpo. Ahañceva kho panassaṃ kodhano kodhābhibhūto, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhābhibhūto’ti cittaṃ uppādetabbaṃ.
‘‘‘যো খ্ৰাযং পুগ্গলো কোধনো কোধহেতু উপনাহী, অযং মে পুগ্গলো অপ্পিযো অমনাপো; অহঞ্চেৰ খো পনস্সং কোধনো কোধহেতু উপনাহী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধহেতু উপনাহী’তি চিত্তং উপ্পাদেতব্বং।
‘‘‘Yo khvāyaṃ puggalo kodhano kodhahetu upanāhī, ayaṃ me puggalo appiyo amanāpo; ahañceva kho panassaṃ kodhano kodhahetu upanāhī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhahetu upanāhī’ti cittaṃ uppādetabbaṃ.
‘‘‘যো খ্ৰাযং পুগ্গলো কোধনো কোধহেতু অভিসঙ্গী, অযং মে পুগ্গলো অপ্পিযো অমনাপো; অহঞ্চেৰ খো পনস্সং কোধনো কোধহেতু অভিসঙ্গী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধহেতু অভিসঙ্গী’তি চিত্তং উপ্পাদেতব্বং।
‘‘‘Yo khvāyaṃ puggalo kodhano kodhahetu abhisaṅgī, ayaṃ me puggalo appiyo amanāpo; ahañceva kho panassaṃ kodhano kodhahetu abhisaṅgī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhahetu abhisaṅgī’ti cittaṃ uppādetabbaṃ.
‘‘‘যো খ্ৰাযং পুগ্গলো কোধনো কোধসামন্তা ৰাচং নিচ্ছারেতা, অযং মে পুগ্গলো অপ্পিযো অমনাপো; অহঞ্চেৰ খো পনস্সং কোধনো কোধসামন্তা ৰাচং নিচ্ছারেতা, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধসামন্তা ৰাচং নিচ্ছারেস্সামী’তি চিত্তং উপ্পাদেতব্বং।
‘‘‘Yo khvāyaṃ puggalo kodhano kodhasāmantā vācaṃ nicchāretā, ayaṃ me puggalo appiyo amanāpo; ahañceva kho panassaṃ kodhano kodhasāmantā vācaṃ nicchāretā, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhasāmantā vācaṃ nicchāressāmī’ti cittaṃ uppādetabbaṃ.
‘‘‘যো খ্ৰাযং পুগ্গলো চোদিতো চোদকেন চোদকং পটিপ্ফরতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন চোদকং পটিপ্ফরেয্যং , অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘চোদিতো চোদকেন চোদকং নপ্পটিপ্ফরিস্সামী’তি চিত্তং উপ্পাদেতব্বং।
‘‘‘Yo khvāyaṃ puggalo codito codakena codakaṃ paṭippharati, ayaṃ me puggalo appiyo amanāpo; ahañceva kho pana codito codakena codakaṃ paṭipphareyyaṃ , ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakaṃ nappaṭippharissāmī’ti cittaṃ uppādetabbaṃ.
‘‘‘যো খ্ৰাযং পুগ্গলো চোদিতো চোদকেন চোদকং অপসাদেতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন চোদকং অপসাদেয্যং, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘চোদিতো চোদকেন চোদকং ন অপসাদেস্সামী’তি চিত্তং উপ্পাদেতব্বং।
‘‘‘Yo khvāyaṃ puggalo codito codakena codakaṃ apasādeti, ayaṃ me puggalo appiyo amanāpo; ahañceva kho pana codito codakena codakaṃ apasādeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakaṃ na apasādessāmī’ti cittaṃ uppādetabbaṃ.
‘‘‘যো খ্ৰাযং পুগ্গলো চোদিতো চোদকেন চোদকস্স পচ্চারোপেতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন চোদকস্স পচ্চারোপেয্যং, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘চোদিতো চোদকেন চোদকস্স ন পচ্চারোপেস্সামী’তি চিত্তং উপ্পাদেতব্বং।
‘‘‘Yo khvāyaṃ puggalo codito codakena codakassa paccāropeti, ayaṃ me puggalo appiyo amanāpo; ahañceva kho pana codito codakena codakassa paccāropeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakassa na paccāropessāmī’ti cittaṃ uppādetabbaṃ.
‘‘‘যো খ্ৰাযং পুগ্গলো চোদিতো চোদকেন অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন অঞ্ঞেনঞ্ঞং পটিচরেয্যং, বহিদ্ধা কথং অপনামেয্যং , কোপঞ্চ দোসঞ্চ অপ্পচ্চযঞ্চ পাতুকরেয্যং, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘চোদিতো চোদকেন ন অঞ্ঞেনঞ্ঞং পটিচরিস্সামি, ন বহিদ্ধা কথং অপনামেস্সামি, ন কোপঞ্চ দোসঞ্চ অপ্পচ্চযঞ্চ পাতুকরিস্সামী’তি চিত্তং উপ্পাদেতব্বং।
‘‘‘Yo khvāyaṃ puggalo codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti, ayaṃ me puggalo appiyo amanāpo; ahañceva kho pana codito codakena aññenaññaṃ paṭicareyyaṃ, bahiddhā kathaṃ apanāmeyyaṃ , kopañca dosañca appaccayañca pātukareyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena na aññenaññaṃ paṭicarissāmi, na bahiddhā kathaṃ apanāmessāmi, na kopañca dosañca appaccayañca pātukarissāmī’ti cittaṃ uppādetabbaṃ.
‘‘‘যো খ্ৰাযং পুগ্গলো চোদিতো চোদকেন অপদানে ন সম্পাযতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন অপদানে ন সম্পাযেয্যং, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘চোদিতো চোদকেন অপদানে সম্পাযিস্সামী’তি চিত্তং উপ্পাদেতব্বং।
‘‘‘Yo khvāyaṃ puggalo codito codakena apadāne na sampāyati, ayaṃ me puggalo appiyo amanāpo; ahañceva kho pana codito codakena apadāne na sampāyeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena apadāne sampāyissāmī’ti cittaṃ uppādetabbaṃ.
‘‘‘যো খ্ৰাযং পুগ্গলো মক্খী পল়াসী, অযং মে পুগ্গলো অপ্পিযো অমনাপো; অহঞ্চেৰ খো পনস্সং মক্খী পল়াসী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘অমক্খী ভৰিস্সামি অপল়াসী’তি চিত্তং উপ্পাদেতব্বং।
‘‘‘Yo khvāyaṃ puggalo makkhī paḷāsī, ayaṃ me puggalo appiyo amanāpo; ahañceva kho panassaṃ makkhī paḷāsī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘amakkhī bhavissāmi apaḷāsī’ti cittaṃ uppādetabbaṃ.
‘‘‘যো খ্ৰাযং পুগ্গলো ইস্সুকী মচ্ছরী, অযং মে পুগ্গলো অপ্পিযো অমনাপো; অহঞ্চেৰ খো পনস্সং ইস্সুকী মচ্ছরী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘অনিস্সুকী ভৰিস্সামি অমচ্ছরী’তি চিত্তং উপ্পাদেতব্বং।
‘‘‘Yo khvāyaṃ puggalo issukī maccharī, ayaṃ me puggalo appiyo amanāpo; ahañceva kho panassaṃ issukī maccharī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘anissukī bhavissāmi amaccharī’ti cittaṃ uppādetabbaṃ.
‘‘‘যো খ্ৰাযং পুগ্গলো সঠো মাযাৰী, অযং মে পুগ্গলো অপ্পিযো অমনাপো; অহঞ্চেৰ খো পনস্সং সঠো মাযাৰী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘অসঠো ভৰিস্সামি অমাযাৰী’তি চিত্তং উপ্পাদেতব্বং।
‘‘‘Yo khvāyaṃ puggalo saṭho māyāvī, ayaṃ me puggalo appiyo amanāpo; ahañceva kho panassaṃ saṭho māyāvī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘asaṭho bhavissāmi amāyāvī’ti cittaṃ uppādetabbaṃ.
‘‘‘যো খ্ৰাযং পুগ্গলো থদ্ধো অতিমানী, অযং মে পুগ্গলো অপ্পিযো অমনাপো; অহঞ্চেৰ খো পনস্সং থদ্ধো অতিমানী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘অত্থদ্ধো ভৰিস্সামি অনতিমানী’তি চিত্তং উপ্পাদেতব্বং।
‘‘‘Yo khvāyaṃ puggalo thaddho atimānī, ayaṃ me puggalo appiyo amanāpo; ahañceva kho panassaṃ thaddho atimānī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘atthaddho bhavissāmi anatimānī’ti cittaṃ uppādetabbaṃ.
‘‘‘যো খ্ৰাযং পুগ্গলো সন্দিট্ঠিপরামাসী আধানগ্গাহী দুপ্পটিনিস্সগ্গী, অযং মে পুগ্গলো অপ্পিযো অমনাপো; অহঞ্চেৰ খো পনস্সং সন্দিট্ঠিপরামাসী আধানগ্গাহী দুপ্পটিনিস্সগ্গী, অহংপাস্সং পরেসং অপ্পিযো অমনাপো’তি। এৰং জানন্তেনাৰুসো, ভিক্খুনা ‘অসন্দিট্ঠিপরামাসী ভৰিস্সামি অনাধানগ্গাহী সুপ্পটিনিস্সগ্গী’তি চিত্তং উপ্পাদেতব্বং।
‘‘‘Yo khvāyaṃ puggalo sandiṭṭhiparāmāsī ādhānaggāhī duppaṭinissaggī, ayaṃ me puggalo appiyo amanāpo; ahañceva kho panassaṃ sandiṭṭhiparāmāsī ādhānaggāhī duppaṭinissaggī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘asandiṭṭhiparāmāsī bhavissāmi anādhānaggāhī suppaṭinissaggī’ti cittaṃ uppādetabbaṃ.
১৮৪. ‘‘তত্রাৰুসো , ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি পাপিচ্ছো, পাপিকানং ইচ্ছানং ৰসং গতো’তি? সচে, আৰুসো , ভিক্খু পচ্চৰেক্খমানো এৰং জানাতি – ‘পাপিচ্ছো খোম্হি, পাপিকানং ইচ্ছানং ৰসং গতো’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি পাপিচ্ছো, ন পাপিকানং ইচ্ছানং ৰসং গতো’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
184. ‘‘Tatrāvuso , bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi pāpiccho, pāpikānaṃ icchānaṃ vasaṃ gato’ti? Sace, āvuso , bhikkhu paccavekkhamāno evaṃ jānāti – ‘pāpiccho khomhi, pāpikānaṃ icchānaṃ vasaṃ gato’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi pāpiccho, na pāpikānaṃ icchānaṃ vasaṃ gato’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি অত্তুক্কংসকো পরৰম্ভী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘অত্তুক্কংসকো খোম্হি পরৰম্ভী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘অনত্তুক্কংসকো খোম্হি অপরৰম্ভী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi attukkaṃsako paravambhī’ti? Sace, āvuso, bhikkhu paccavekkhamāno evaṃ jānāti – ‘attukkaṃsako khomhi paravambhī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘anattukkaṃsako khomhi aparavambhī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধাভিভূতো’তি? সচে, আৰুসো, ভিক্খু পচ্চৰেক্খমানো এৰং জানাতি – ‘কোধনো খোম্হি কোধাভিভূতো’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি কোধনো কোধাভিভূতো’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhābhibhūto’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhābhibhūto’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhābhibhūto’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধহেতু উপনাহী’তি? সচে, আৰুসো, ভিক্খু পচ্চৰেক্খমানো এৰং জানাতি ‘কোধনো খোম্হি কোধহেতু উপনাহী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি ‘ন খোম্হি কোধনো কোধহেতু উপনাহী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhahetu upanāhī’ti? Sace, āvuso, bhikkhu paccavekkhamāno evaṃ jānāti ‘kodhano khomhi kodhahetu upanāhī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti ‘na khomhi kodhano kodhahetu upanāhī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধহেতু অভিসঙ্গী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘কোধনো খোম্হি কোধহেতু অভিসঙ্গী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি কোধনো কোধহেতু অভিসঙ্গী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhahetu abhisaṅgī’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhahetu abhisaṅgī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhahetu abhisaṅgī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধসামন্তা ৰাচং নিচ্ছারেতা’তি? সচে, আৰুসো, ভিক্খু পচ্চৰেক্খমানো এৰং জানাতি – ‘কোধনো খোম্হি কোধসামন্তা ৰাচং নিচ্ছারেতা’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি কোধনো কোধসামন্তা ৰাচং নিচ্ছারেতা’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhasāmantā vācaṃ nicchāretā’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhasāmantā vācaṃ nicchāretā’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhasāmantā vācaṃ nicchāretā’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন চোদকং পটিপ্ফরামী’তি? সচে, আৰুসো, ভিক্খু পচ্চৰেক্খমানো এৰং জানাতি ‘চোদিতো খোম্হি চোদকেন চোদকং পটিপ্ফরামী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকং নপ্পটিপ্ফরামী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakaṃ paṭippharāmī’ti? Sace, āvuso, bhikkhu paccavekkhamāno evaṃ jānāti ‘codito khomhi codakena codakaṃ paṭippharāmī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakaṃ nappaṭippharāmī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন চোদকং অপসাদেমী’তি? সচে, আৰুসো, ভিক্খু পচ্চৰেক্খমানো এৰং জানাতি ‘চোদিতো খোম্হি চোদকেন চোদকং অপসাদেমী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকং ন অপসাদেমী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakaṃ apasādemī’ti? Sace, āvuso, bhikkhu paccavekkhamāno evaṃ jānāti ‘codito khomhi codakena codakaṃ apasādemī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakaṃ na apasādemī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন চোদকস্স পচ্চারোপেমী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকস্স পচ্চারোপেমী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকস্স ন পচ্চারোপেমী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakassa paccāropemī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena codakassa paccāropemī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakassa na paccāropemī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন অঞ্ঞেনঞ্ঞং পটিচরামি, বহিদ্ধা কথং অপনামেমি, কোপঞ্চ দোসঞ্চ অপ্পচ্চযঞ্চ পাতুকরোমী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন অঞ্ঞেনঞ্ঞং পটিচরামি, বহিদ্ধা কথং অপনামেমি, কোপঞ্চ দোসঞ্চ অপ্পচ্চযঞ্চ পাতুকরোমী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন ন অঞ্ঞেনঞ্ঞং পটিচরামি, ন বহিদ্ধা কথং অপনামেমি, ন কোপঞ্চ দোসঞ্চ অপ্পচ্চযঞ্চ পাতুকরোমী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena aññenaññaṃ paṭicarāmi, bahiddhā kathaṃ apanāmemi, kopañca dosañca appaccayañca pātukaromī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena aññenaññaṃ paṭicarāmi, bahiddhā kathaṃ apanāmemi, kopañca dosañca appaccayañca pātukaromī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena na aññenaññaṃ paṭicarāmi, na bahiddhā kathaṃ apanāmemi, na kopañca dosañca appaccayañca pātukaromī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন অপদানে ন সম্পাযামী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন অপদানে ন সম্পাযামী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন অপদানে সম্পাযামী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena apadāne na sampāyāmī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena apadāne na sampāyāmī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena apadāne sampāyāmī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং , আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি মক্খী পল়াসী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘মক্খী খোম্হি পল়াসী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘অমক্খী খোম্হি অপল়াসী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ , āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi makkhī paḷāsī’ti? Sace, āvuso, bhikkhu paccavekkhamāno evaṃ jānāti – ‘makkhī khomhi paḷāsī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘amakkhī khomhi apaḷāsī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি ইস্সুকী মচ্ছরী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘ইস্সুকী খোম্হি মচ্ছরী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘অনিস্সুকী খোম্হি অমচ্ছরী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi issukī maccharī’ti? Sace, āvuso, bhikkhu paccavekkhamāno evaṃ jānāti – ‘issukī khomhi maccharī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘anissukī khomhi amaccharī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি সঠো মাযাৰী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘সঠো খোম্হি মাযাৰী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘অসঠো খোম্হি অমাযাৰী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi saṭho māyāvī’ti? Sace, āvuso, bhikkhu paccavekkhamāno evaṃ jānāti – ‘saṭho khomhi māyāvī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘asaṭho khomhi amāyāvī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি থদ্ধো অতিমানী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘থদ্ধো খোম্হি অতিমানী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘অত্থদ্ধো খোম্হি অনতিমানী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi thaddho atimānī’ti? Sace, āvuso, bhikkhu paccavekkhamāno evaṃ jānāti – ‘thaddho khomhi atimānī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘atthaddho khomhi anatimānī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি সন্দিট্ঠিপরামাসী আধানগ্গাহী দুপ্পটিনিস্সগ্গী’তি? সচে, আৰুসো , ভিক্খু পচ্চৰেক্খমানো এৰং জানাতি – ‘সন্দিট্ঠিপরামাসী খোম্হি আধানগ্গাহী দুপ্পটিনিস্সগ্গী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো এৰং জানাতি – ‘অসন্দিট্ঠিপরামাসী খোম্হি অনাধানগ্গাহী সুপ্পটিনিস্সগ্গী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi sandiṭṭhiparāmāsī ādhānaggāhī duppaṭinissaggī’ti? Sace, āvuso , bhikkhu paccavekkhamāno evaṃ jānāti – ‘sandiṭṭhiparāmāsī khomhi ādhānaggāhī duppaṭinissaggī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘asandiṭṭhiparāmāsī khomhi anādhānaggāhī suppaṭinissaggī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘সচে , আৰুসো, ভিক্খু পচ্চৰেক্খমানো সব্বেপিমে পাপকে অকুসলে ধম্মে অপ্পহীনে অত্তনি সমনুপস্সতি, তেনাৰুসো, ভিক্খুনা সব্বেসংযেৰ ইমেসং পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো সব্বেপিমে পাপকে অকুসলে ধম্মে পহীনে অত্তনি সমনুপস্সতি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং, অহোরত্তানুসিক্খিনা কুসলেসু ধম্মেসু।
‘‘Sace , āvuso, bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṃyeva imesaṃ pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṃ, ahorattānusikkhinā kusalesu dhammesu.
‘‘সেয্যথাপি, আৰুসো, ইত্থী ৰা পুরিসো ৰা, দহরো যুৰা মণ্ডনজাতিকো, আদাসে ৰা পরিসুদ্ধে পরিযোদাতে, অচ্ছে ৰা উদকপত্তে, সকং মুখনিমিত্তং পচ্চৰেক্খমানো, সচে তত্থ পস্সতি রজং ৰা অঙ্গণং ৰা, তস্সেৰ রজস্স ৰা অঙ্গণস্স ৰা পহানায ৰাযমতি; নো চে তত্থ পস্সতি রজং ৰা অঙ্গণং ৰা, তেনেৰ অত্তমনো হোতি – ‘লাভা ৰত মে, পরিসুদ্ধং ৰত মে’তি। এৰমেৰ খো, আৰুসো, সচে ভিক্খু পচ্চৰেক্খমানো সব্বেপিমে পাপকে অকুসলে ধম্মে অপ্পহীনে অত্তনি সমনুপস্সতি, তেনাৰুসো, ভিক্খুনা সব্বেসংযেৰ ইমেসং পাপকানং অকুসলানং ধম্মানং পহানায ৰাযমিতব্বং। সচে পনাৰুসো, ভিক্খু পচ্চৰেক্খমানো সব্বেপিমে পাপকে অকুসলে ধম্মে পহীনে অত্তনি সমনুপস্সতি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং, অহোরত্তানুসিক্খিনা কুসলেসু ধম্মেসূ’’তি।
‘‘Seyyathāpi, āvuso, itthī vā puriso vā, daharo yuvā maṇḍanajātiko, ādāse vā parisuddhe pariyodāte, acche vā udakapatte, sakaṃ mukhanimittaṃ paccavekkhamāno, sace tattha passati rajaṃ vā aṅgaṇaṃ vā, tasseva rajassa vā aṅgaṇassa vā pahānāya vāyamati; no ce tattha passati rajaṃ vā aṅgaṇaṃ vā, teneva attamano hoti – ‘lābhā vata me, parisuddhaṃ vata me’ti. Evameva kho, āvuso, sace bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṃyeva imesaṃ pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṃ, ahorattānusikkhinā kusalesu dhammesū’’ti.
ইদমৰোচাযস্মা মহামোগ্গল্লানো। অত্তমনা তে ভিক্খূ আযস্মতো মহামোগ্গল্লানস্স ভাসিতং অভিনন্দুন্তি।
Idamavocāyasmā mahāmoggallāno. Attamanā te bhikkhū āyasmato mahāmoggallānassa bhāsitaṃ abhinandunti.
অনুমানসুত্তং নিট্ঠিতং পঞ্চমং।
Anumānasuttaṃ niṭṭhitaṃ pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৫. অনুমানসুত্তৰণ্ণনা • 5. Anumānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৫. অনুমানসুত্তৰণ্ণনা • 5. Anumānasuttavaṇṇanā
