| Library / Tipiṭaka / තිපිටක • Tipiṭaka / මජ්‌ඣිමනිකාය • Majjhimanikāya |
5. අනුමානසුත්‌තං
5. Anumānasuttaṃ
181. එවං මෙ සුතං – එකං සමයං ආයස්‌මා මහාමොග්‌ගල්‌ලානො භග්‌ගෙසු විහරති සුසුමාරගිරෙ 1 භෙසකළාවනෙ මිගදායෙ. තත්‍ර ඛො ආයස්‌මා මහාමොග්‌ගල්‌ලානො භික්‌ඛූ ආමන්‌තෙසි – ‘‘ආවුසො, භික්‌ඛවො’’ති. ‘‘ආවුසො’’ති ඛො තෙ භික්‌ඛූ ආයස්‌මතො මහාමොග්‌ගල්‌ලානස්‌ස පච්‌චස්‌සොසුං. ආයස්‌මා මහාමොග්‌ගල්‌ලානො එතදවොච –
181. Evaṃ me sutaṃ – ekaṃ samayaṃ āyasmā mahāmoggallāno bhaggesu viharati susumāragire 2 bhesakaḷāvane migadāye. Tatra kho āyasmā mahāmoggallāno bhikkhū āmantesi – ‘‘āvuso, bhikkhavo’’ti. ‘‘Āvuso’’ti kho te bhikkhū āyasmato mahāmoggallānassa paccassosuṃ. Āyasmā mahāmoggallāno etadavoca –
‘‘පවාරෙති චෙපි, ආවුසො, භික්‌ඛු – ‘වදන්‌තු මං ආයස්‌මන්‌තො, වචනීයොම්‌හි ආයස්‌මන්‌තෙහී’ති, සො ච හොති දුබ්‌බචො, දොවචස්‌සකරණෙහි ධම්‌මෙහි සමන්‌නාගතො, අක්‌ඛමො අප්‌පදක්‌ඛිණග්‌ගාහී අනුසාසනිං, අථ ඛො නං සබ්‍රහ්‌මචාරී න චෙව වත්‌තබ්‌බං මඤ්‌ඤන්‌ති, න ච අනුසාසිතබ්‌බං මඤ්‌ඤන්‌ති, න ච තස්‌මිං පුග්‌ගලෙ විස්‌සාසං ආපජ්‌ජිතබ්‌බං මඤ්‌ඤන්‌ති.
‘‘Pavāreti cepi, āvuso, bhikkhu – ‘vadantu maṃ āyasmanto, vacanīyomhi āyasmantehī’ti, so ca hoti dubbaco, dovacassakaraṇehi dhammehi samannāgato, akkhamo appadakkhiṇaggāhī anusāsaniṃ, atha kho naṃ sabrahmacārī na ceva vattabbaṃ maññanti, na ca anusāsitabbaṃ maññanti, na ca tasmiṃ puggale vissāsaṃ āpajjitabbaṃ maññanti.
‘‘කතමෙ චාවුසො, දොවචස්‌සකරණා ධම්‌මා? ඉධාවුසො, භික්‌ඛු පාපිච්‌ඡො හොති, පාපිකානං ඉච්‌ඡානං වසං ගතො. යම්‌පාවුසො, භික්‌ඛු පාපිච්‌ඡො හොති, පාපිකානං ඉච්‌ඡානං වසං ගතො – අයම්‌පි ධම්‌මො දොවචස්‌සකරණො.
‘‘Katame cāvuso, dovacassakaraṇā dhammā? Idhāvuso, bhikkhu pāpiccho hoti, pāpikānaṃ icchānaṃ vasaṃ gato. Yampāvuso, bhikkhu pāpiccho hoti, pāpikānaṃ icchānaṃ vasaṃ gato – ayampi dhammo dovacassakaraṇo.
‘‘පුන චපරං, ආවුසො, භික්‌ඛු අත්‌තුක්‌කංසකො හොති පරවම්‌භී. යම්‌පාවුසො, භික්‌ඛු අත්‌තුක්‌කංසකො හොති පරවම්‌භී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu attukkaṃsako hoti paravambhī. Yampāvuso, bhikkhu attukkaṃsako hoti paravambhī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු කොධනො හොති කොධාභිභූතො. යම්‌පාවුසො, භික්‌ඛු කොධනො හොති කොධාභිභූතො – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu kodhano hoti kodhābhibhūto. Yampāvuso, bhikkhu kodhano hoti kodhābhibhūto – ayampi dhammo dovacassakaraṇo.
‘‘පුන චපරං, ආවුසො , භික්‌ඛු කොධනො හොති කොධහෙතු උපනාහී. යම්‌පාවුසො, භික්‌ඛු කොධනො හොති කොධහෙතු උපනාහී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso , bhikkhu kodhano hoti kodhahetu upanāhī. Yampāvuso, bhikkhu kodhano hoti kodhahetu upanāhī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු කොධනො හොති කොධහෙතු අභිසඞ්‌ගී. යම්‌පාවුසො, භික්‌ඛු කොධනො හොති කොධහෙතු අභිසඞ්‌ගී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu kodhano hoti kodhahetu abhisaṅgī. Yampāvuso, bhikkhu kodhano hoti kodhahetu abhisaṅgī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු කොධනො හොති කොධසාමන්‌තා 3 වාචං නිච්‌ඡාරෙතා. යම්‌පාවුසො, භික්‌ඛු කොධනො හොති කොධසාමන්‌තා වාචං නිච්‌ඡාරෙතා – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu kodhano hoti kodhasāmantā 4 vācaṃ nicchāretā. Yampāvuso, bhikkhu kodhano hoti kodhasāmantā vācaṃ nicchāretā – ayampi dhammo dovacassakaraṇo.
‘‘පුන චපරං, ආවුසො, භික්‌ඛු චොදිතො 5 චොදකෙන චොදකං පටිප්‌ඵරති. යම්‌පාවුසො, භික්‌ඛු චොදිතො චොදකෙන චොදකං පටිප්‌ඵරති – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu codito 6 codakena codakaṃ paṭippharati. Yampāvuso, bhikkhu codito codakena codakaṃ paṭippharati – ayampi dhammo dovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන චොදකං අපසාදෙති. යම්‌පාවුසො, භික්‌ඛු චොදිතො චොදකෙන චොදකං අපසාදෙති – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu codito codakena codakaṃ apasādeti. Yampāvuso, bhikkhu codito codakena codakaṃ apasādeti – ayampi dhammo dovacassakaraṇo.
‘‘පුන චපරං , ආවුසො, භික්‌ඛු චොදිතො චොදකෙන චොදකස්‌ස පච්‌චාරොපෙති. යම්‌පාවුසො, භික්‌ඛු චොදිතො චොදකෙන චොදකස්‌ස පච්‌චාරොපෙති – අයම්‌පි ධම්‌මො දොවචස්‌සකරණො.
‘‘Puna caparaṃ , āvuso, bhikkhu codito codakena codakassa paccāropeti. Yampāvuso, bhikkhu codito codakena codakassa paccāropeti – ayampi dhammo dovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන අඤ්‌ඤෙනඤ්‌ඤං පටිචරති, බහිද්‌ධා කථං අපනාමෙති, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති. යම්‌පාවුසො, භික්‌ඛු චොදිතො චොදකෙන අඤ්‌ඤෙනඤ්‌ඤං පටිචරති, බහිද්‌ධා කථං අපනාමෙති, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti. Yampāvuso, bhikkhu codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti – ayampi dhammo dovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන අපදානෙ න සම්‌පායති. යම්‌පාවුසො, භික්‌ඛු චොදිතො චොදකෙන අපදානෙ න සම්‌පායති – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu codito codakena apadāne na sampāyati. Yampāvuso, bhikkhu codito codakena apadāne na sampāyati – ayampi dhammo dovacassakaraṇo.
‘‘පුන චපරං, ආවුසො, භික්‌ඛු මක්‌ඛී හොති පළාසී. යම්‌පාවුසො, භික්‌ඛු මක්‌ඛී හොති පළාසී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu makkhī hoti paḷāsī. Yampāvuso, bhikkhu makkhī hoti paḷāsī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු ඉස්‌සුකී හොති මච්‌ඡරී. යම්‌පාවුසො, භික්‌ඛු ඉස්‌සුකී හොති මච්‌ඡරී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu issukī hoti maccharī. Yampāvuso, bhikkhu issukī hoti maccharī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු සඨො හොති මායාවී. යම්‌පාවුසො, භික්‌ඛු සඨො හොති මායාවී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu saṭho hoti māyāvī. Yampāvuso, bhikkhu saṭho hoti māyāvī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු ථද්‌ධො හොති අතිමානී. යම්‌පාවුසො, භික්‌ඛු ථද්‌ධො හොති අතිමානී – අයම්‌පි ධම්‌මො දොවචස්‌සකරණො.
‘‘Puna caparaṃ, āvuso, bhikkhu thaddho hoti atimānī. Yampāvuso, bhikkhu thaddho hoti atimānī – ayampi dhammo dovacassakaraṇo.
‘‘පුන චපරං, ආවුසො, භික්‌ඛු සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී. යම්‌පාවුසො, භික්‌ඛු සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී – අයම්‌පි ධම්‌මො දොවචස්‌සකරණො. ඉමෙ වුච්‌චන්‌තාවුසො, දොවචස්‌සකරණා ධම්‌මා.
‘‘Puna caparaṃ, āvuso, bhikkhu sandiṭṭhiparāmāsī hoti ādhānaggāhī duppaṭinissaggī. Yampāvuso, bhikkhu sandiṭṭhiparāmāsī hoti ādhānaggāhī duppaṭinissaggī – ayampi dhammo dovacassakaraṇo. Ime vuccantāvuso, dovacassakaraṇā dhammā.
182. ‘‘නො චෙපි, ආවුසො, භික්‌ඛු පවාරෙති – ‘වදන්‌තු මං ආයස්‌මන්‌තො, වචනීයොම්‌හි ආයස්‌මන්‌තෙහී’ති, සො ච හොති සුවචො, සොවචස්‌සකරණෙහි ධම්‌මෙහි සමන්‌නාගතො, ඛමො පදක්‌ඛිණග්‌ගාහී අනුසාසනිං, අථ ඛො නං සබ්‍රහ්‌මචාරී වත්‌තබ්‌බඤ්‌චෙව මඤ්‌ඤන්‌ති, අනුසාසිතබ්‌බඤ්‌ච මඤ්‌ඤන්‌ති, තස්‌මිඤ්‌ච පුග්‌ගලෙ විස්‌සාසං ආපජ්‌ජිතබ්‌බං මඤ්‌ඤන්‌ති.
182. ‘‘No cepi, āvuso, bhikkhu pavāreti – ‘vadantu maṃ āyasmanto, vacanīyomhi āyasmantehī’ti, so ca hoti suvaco, sovacassakaraṇehi dhammehi samannāgato, khamo padakkhiṇaggāhī anusāsaniṃ, atha kho naṃ sabrahmacārī vattabbañceva maññanti, anusāsitabbañca maññanti, tasmiñca puggale vissāsaṃ āpajjitabbaṃ maññanti.
‘‘කතමෙ චාවුසො, සොවචස්‌සකරණා ධම්‌මා? ඉධාවුසො, භික්‌ඛු න පාපිච්‌ඡො හොති, න පාපිකානං ඉච්‌ඡානං වසං ගතො. යම්‌පාවුසො, භික්‌ඛු න පාපිච්‌ඡො හොති න පාපිකානං ඉච්‌ඡානං වසං ගතො – අයම්‌පි ධම්‌මො සොවචස්‌සකරණො.
‘‘Katame cāvuso, sovacassakaraṇā dhammā? Idhāvuso, bhikkhu na pāpiccho hoti, na pāpikānaṃ icchānaṃ vasaṃ gato. Yampāvuso, bhikkhu na pāpiccho hoti na pāpikānaṃ icchānaṃ vasaṃ gato – ayampi dhammo sovacassakaraṇo.
‘‘පුන චපරං, ආවුසො, භික්‌ඛු අනත්‌තුක්‌කංසකො හොති අපරවම්‌භී. යම්‌පාවුසො, භික්‌ඛු අනත්‌තුක්‌කංසකො හොති අපරවම්‌භී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu anattukkaṃsako hoti aparavambhī. Yampāvuso, bhikkhu anattukkaṃsako hoti aparavambhī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු න කොධනො හොති න කොධාභිභූතො. යම්‌පාවුසො, භික්‌ඛු න කොධනො හොති න කොධාභිභූතො – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu na kodhano hoti na kodhābhibhūto. Yampāvuso, bhikkhu na kodhano hoti na kodhābhibhūto – ayampi dhammo sovacassakaraṇo.
‘‘පුන චපරං, ආවුසො, භික්‌ඛු න කොධනො හොති න කොධහෙතු උපනාහී. යම්‌පාවුසො, භික්‌ඛු න කොධනො හොති න කොධහෙතු උපනාහී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu na kodhano hoti na kodhahetu upanāhī. Yampāvuso, bhikkhu na kodhano hoti na kodhahetu upanāhī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු න කොධනො හොති න කොධහෙතු අභිසඞ්‌ගී. යම්‌පාවුසො, භික්‌ඛු න කොධනො හොති න කොධහෙතු අභිසඞ්‌ගී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu na kodhano hoti na kodhahetu abhisaṅgī. Yampāvuso, bhikkhu na kodhano hoti na kodhahetu abhisaṅgī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු න කොධනො හොති න කොධසාමන්‌තා වාචං නිච්‌ඡාරෙතා. යම්‌පාවුසො , භික්‌ඛු න කොධනො හොති න කොධසාමන්‌තා වාචං නිච්‌ඡාරෙතා – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu na kodhano hoti na kodhasāmantā vācaṃ nicchāretā. Yampāvuso , bhikkhu na kodhano hoti na kodhasāmantā vācaṃ nicchāretā – ayampi dhammo sovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන චොදකං නප්‌පටිප්‌ඵරති. යම්‌පාවුසො, භික්‌ඛු චොදිතො චොදකෙන චොදකං නප්‌පටිප්‌ඵරති – අයම්‌පි ධම්‌මො සොවචස්‌සකරණො .
‘‘Puna caparaṃ, āvuso, bhikkhu codito codakena codakaṃ nappaṭippharati. Yampāvuso, bhikkhu codito codakena codakaṃ nappaṭippharati – ayampi dhammo sovacassakaraṇo .
‘‘පුන චපරං, ආවුසො, භික්‌ඛු චොදිතො චොදකෙන චොදකං න අපසාදෙති. යම්‌පාවුසො, භික්‌ඛු චොදිතො චොදකෙන චොදකං න අපසාදෙති – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu codito codakena codakaṃ na apasādeti. Yampāvuso, bhikkhu codito codakena codakaṃ na apasādeti – ayampi dhammo sovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන චොදකස්‌ස න පච්‌චාරොපෙති. යම්‌පාවුසො, භික්‌ඛු චොදිතො චොදකෙන චොදකස්‌ස න පච්‌චාරොපෙති – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu codito codakena codakassa na paccāropeti. Yampāvuso, bhikkhu codito codakena codakassa na paccāropeti – ayampi dhammo sovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන න අඤ්‌ඤෙනඤ්‌ඤං පටිචරති, න බහිද්‌ධා කථං අපනාමෙති, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති. යම්‌පාවුසො, භික්‌ඛු චොදිතො චොදකෙන න අඤ්‌ඤෙනඤ්‌ඤං පටිචරති, න බහිද්‌ධා කථං අපනාමෙති, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu codito codakena na aññenaññaṃ paṭicarati, na bahiddhā kathaṃ apanāmeti, na kopañca dosañca appaccayañca pātukaroti. Yampāvuso, bhikkhu codito codakena na aññenaññaṃ paṭicarati, na bahiddhā kathaṃ apanāmeti, na kopañca dosañca appaccayañca pātukaroti – ayampi dhammo sovacassakaraṇo.
‘‘පුන චපරං, ආවුසො, භික්‌ඛු චොදිතො චොදකෙන අපදානෙ සම්‌පායති. යම්‌පාවුසො, භික්‌ඛු චොදිතො චොදකෙන අපදානෙ සම්‌පායති – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu codito codakena apadāne sampāyati. Yampāvuso, bhikkhu codito codakena apadāne sampāyati – ayampi dhammo sovacassakaraṇo.
‘‘පුන චපරං, ආවුසො, භික්‌ඛු අමක්‌ඛී හොති අපළාසී. යම්‌පාවුසො, භික්‌ඛු අමක්‌ඛී හොති අපළාසී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu amakkhī hoti apaḷāsī. Yampāvuso, bhikkhu amakkhī hoti apaḷāsī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු අනිස්‌සුකී හොති අමච්‌ඡරී. යම්‌පාවුසො, භික්‌ඛු අනිස්‌සුකී හොති අමච්‌ඡරී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu anissukī hoti amaccharī. Yampāvuso, bhikkhu anissukī hoti amaccharī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු අසඨො හොති අමායාවී. යම්‌පාවුසො, භික්‌ඛු අසඨො හොති අමායාවී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu asaṭho hoti amāyāvī. Yampāvuso, bhikkhu asaṭho hoti amāyāvī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු අත්‌ථද්‌ධො හොති අනතිමානී. යම්‌පාවුසො, භික්‌ඛු අත්‌ථද්‌ධො හොති අනතිමානී – අයම්‌පි ධම්‌මො සොවචස්‌සකරණො.
‘‘Puna caparaṃ, āvuso, bhikkhu atthaddho hoti anatimānī. Yampāvuso, bhikkhu atthaddho hoti anatimānī – ayampi dhammo sovacassakaraṇo.
‘‘පුන චපරං, ආවුසො, භික්‌ඛු අසන්‌දිට්‌ඨිපරාමාසී හොති අනාධානග්‌ගාහී සුප්‌පටිනිස්‌සග්‌ගී. යම්‌පාවුසො, භික්‌ඛු අසන්‌දිට්‌ඨිපරාමාසී හොති, අනාධානග්‌ගාහී සුප්‌පටිනිස්‌සග්‌ගී – අයම්‌පි ධම්‌මො සොවචස්‌සකරණො. ඉමෙ වුච්‌චන්‌තාවුසො, සොවචස්‌සකරණා ධම්‌මා.
‘‘Puna caparaṃ, āvuso, bhikkhu asandiṭṭhiparāmāsī hoti anādhānaggāhī suppaṭinissaggī. Yampāvuso, bhikkhu asandiṭṭhiparāmāsī hoti, anādhānaggāhī suppaṭinissaggī – ayampi dhammo sovacassakaraṇo. Ime vuccantāvuso, sovacassakaraṇā dhammā.
183. ‘‘තත්‍රාවුසො , භික්‌ඛුනා අත්‌තනාව අත්‌තානං එවං අනුමිනිතබ්‌බං 7 – ‘යො ඛ්‌වායං පුග්‌ගලො පාපිච්‌ඡො, පාපිකානං ඉච්‌ඡානං වසං ගතො, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං පාපිච්‌ඡො පාපිකානං ඉච්‌ඡානං වසං ගතො, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න පාපිච්‌ඡො භවිස්‌සාමි, න පාපිකානං ඉච්‌ඡානං වසං ගතො’ති චිත්‌තං උප්‌පාදෙතබ්‌බං.
183. ‘‘Tatrāvuso , bhikkhunā attanāva attānaṃ evaṃ anuminitabbaṃ 8 – ‘yo khvāyaṃ puggalo pāpiccho, pāpikānaṃ icchānaṃ vasaṃ gato, ayaṃ me puggalo appiyo amanāpo; ahañceva kho panassaṃ pāpiccho pāpikānaṃ icchānaṃ vasaṃ gato, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na pāpiccho bhavissāmi, na pāpikānaṃ icchānaṃ vasaṃ gato’ti cittaṃ uppādetabbaṃ.
‘‘‘යො ඛ්‌වායං පුග්‌ගලො අත්‌තුක්‌කංසකො පරවම්‌භී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං අත්‌තුක්‌කංසකො පරවම්‌භී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අනත්‌තුක්‌කංසකො භවිස්‌සාමි අපරවම්‌භී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo attukkaṃsako paravambhī, ayaṃ me puggalo appiyo amanāpo; ahañceva kho panassaṃ attukkaṃsako paravambhī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘anattukkaṃsako bhavissāmi aparavambhī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො කොධනො කොධාභිභූතො, අයං මෙ පුග්‌ගලො අප්‌පියො අමනාපො. අහඤ්‌චෙව ඛො පනස්‌සං කොධනො කොධාභිභූතො, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධාභිභූතො’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo kodhano kodhābhibhūto, ayaṃ me puggalo appiyo amanāpo. Ahañceva kho panassaṃ kodhano kodhābhibhūto, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhābhibhūto’ti cittaṃ uppādetabbaṃ.
‘‘‘යො ඛ්‌වායං පුග්‌ගලො කොධනො කොධහෙතු උපනාහී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං කොධනො කොධහෙතු උපනාහී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධහෙතු උපනාහී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo kodhano kodhahetu upanāhī, ayaṃ me puggalo appiyo amanāpo; ahañceva kho panassaṃ kodhano kodhahetu upanāhī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhahetu upanāhī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො කොධනො කොධහෙතු අභිසඞ්‌ගී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං කොධනො කොධහෙතු අභිසඞ්‌ගී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධහෙතු අභිසඞ්‌ගී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo kodhano kodhahetu abhisaṅgī, ayaṃ me puggalo appiyo amanāpo; ahañceva kho panassaṃ kodhano kodhahetu abhisaṅgī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhahetu abhisaṅgī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො කොධනො කොධසාමන්‌තා වාචං නිච්‌ඡාරෙතා, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං කොධනො කොධසාමන්‌තා වාචං නිච්‌ඡාරෙතා, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘න කොධනො භවිස්‌සාමි න කොධසාමන්‌තා වාචං නිච්‌ඡාරෙස්‌සාමී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo kodhano kodhasāmantā vācaṃ nicchāretā, ayaṃ me puggalo appiyo amanāpo; ahañceva kho panassaṃ kodhano kodhasāmantā vācaṃ nicchāretā, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhasāmantā vācaṃ nicchāressāmī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො චොදිතො චොදකෙන චොදකං පටිප්‌ඵරති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන චොදකං පටිප්‌ඵරෙය්‍යං , අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන චොදකං නප්‌පටිප්‌ඵරිස්‌සාමී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo codito codakena codakaṃ paṭippharati, ayaṃ me puggalo appiyo amanāpo; ahañceva kho pana codito codakena codakaṃ paṭipphareyyaṃ , ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakaṃ nappaṭippharissāmī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො චොදිතො චොදකෙන චොදකං අපසාදෙති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන චොදකං අපසාදෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන චොදකං න අපසාදෙස්‌සාමී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo codito codakena codakaṃ apasādeti, ayaṃ me puggalo appiyo amanāpo; ahañceva kho pana codito codakena codakaṃ apasādeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakaṃ na apasādessāmī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො චොදිතො චොදකෙන චොදකස්‌ස පච්‌චාරොපෙති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන චොදකස්‌ස පච්‌චාරොපෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන චොදකස්‌ස න පච්‌චාරොපෙස්‌සාමී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo codito codakena codakassa paccāropeti, ayaṃ me puggalo appiyo amanāpo; ahañceva kho pana codito codakena codakassa paccāropeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakassa na paccāropessāmī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො චොදිතො චොදකෙන අඤ්‌ඤෙනඤ්‌ඤං පටිචරති, බහිද්‌ධා කථං අපනාමෙති, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන අඤ්‌ඤෙනඤ්‌ඤං පටිචරෙය්‍යං, බහිද්‌ධා කථං අපනාමෙය්‍යං , කොපඤ්‌ච දොසඤ්‌ච අප්‌පච්‌චයඤ්‌ච පාතුකරෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන න අඤ්‌ඤෙනඤ්‌ඤං පටිචරිස්‌සාමි, න බහිද්‌ධා කථං අපනාමෙස්‌සාමි, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරිස්‌සාමී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti, ayaṃ me puggalo appiyo amanāpo; ahañceva kho pana codito codakena aññenaññaṃ paṭicareyyaṃ, bahiddhā kathaṃ apanāmeyyaṃ , kopañca dosañca appaccayañca pātukareyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena na aññenaññaṃ paṭicarissāmi, na bahiddhā kathaṃ apanāmessāmi, na kopañca dosañca appaccayañca pātukarissāmī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො චොදිතො චොදකෙන අපදානෙ න සම්‌පායති, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පන චොදිතො චොදකෙන අපදානෙ න සම්‌පායෙය්‍යං, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘චොදිතො චොදකෙන අපදානෙ සම්‌පායිස්‌සාමී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo codito codakena apadāne na sampāyati, ayaṃ me puggalo appiyo amanāpo; ahañceva kho pana codito codakena apadāne na sampāyeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena apadāne sampāyissāmī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො මක්‌ඛී පළාසී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං මක්‌ඛී පළාසී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අමක්‌ඛී භවිස්‌සාමි අපළාසී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo makkhī paḷāsī, ayaṃ me puggalo appiyo amanāpo; ahañceva kho panassaṃ makkhī paḷāsī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘amakkhī bhavissāmi apaḷāsī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො ඉස්‌සුකී මච්‌ඡරී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං ඉස්‌සුකී මච්‌ඡරී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අනිස්‌සුකී භවිස්‌සාමි අමච්‌ඡරී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo issukī maccharī, ayaṃ me puggalo appiyo amanāpo; ahañceva kho panassaṃ issukī maccharī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘anissukī bhavissāmi amaccharī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො සඨො මායාවී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං සඨො මායාවී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අසඨො භවිස්‌සාමි අමායාවී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo saṭho māyāvī, ayaṃ me puggalo appiyo amanāpo; ahañceva kho panassaṃ saṭho māyāvī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘asaṭho bhavissāmi amāyāvī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො ථද්‌ධො අතිමානී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං ථද්‌ධො අතිමානී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අත්‌ථද්‌ධො භවිස්‌සාමි අනතිමානී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo thaddho atimānī, ayaṃ me puggalo appiyo amanāpo; ahañceva kho panassaṃ thaddho atimānī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘atthaddho bhavissāmi anatimānī’ti cittaṃ uppādetabbaṃ.
‘‘‘යො ඛ්‌වායං පුග්‌ගලො සන්‌දිට්‌ඨිපරාමාසී ආධානග්‌ගාහී දුප්‌පටිනිස්‌සග්‌ගී, අයං මෙ පුග්‌ගලො අප්‌පියො අමනාපො; අහඤ්‌චෙව ඛො පනස්‌සං සන්‌දිට්‌ඨිපරාමාසී ආධානග්‌ගාහී දුප්‌පටිනිස්‌සග්‌ගී, අහංපාස්‌සං පරෙසං අප්‌පියො අමනාපො’ති. එවං ජානන්‌තෙනාවුසො, භික්‌ඛුනා ‘අසන්‌දිට්‌ඨිපරාමාසී භවිස්‌සාමි අනාධානග්‌ගාහී සුප්‌පටිනිස්‌සග්‌ගී’ති චිත්‌තං උප්‌පාදෙතබ්‌බං.
‘‘‘Yo khvāyaṃ puggalo sandiṭṭhiparāmāsī ādhānaggāhī duppaṭinissaggī, ayaṃ me puggalo appiyo amanāpo; ahañceva kho panassaṃ sandiṭṭhiparāmāsī ādhānaggāhī duppaṭinissaggī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘asandiṭṭhiparāmāsī bhavissāmi anādhānaggāhī suppaṭinissaggī’ti cittaṃ uppādetabbaṃ.
184. ‘‘තත්‍රාවුසො , භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි පාපිච්‌ඡො, පාපිකානං ඉච්‌ඡානං වසං ගතො’ති? සචෙ, ආවුසො , භික්‌ඛු පච්‌චවෙක්‌ඛමානො එවං ජානාති – ‘පාපිච්‌ඡො ඛොම්‌හි, පාපිකානං ඉච්‌ඡානං වසං ගතො’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි පාපිච්‌ඡො, න පාපිකානං ඉච්‌ඡානං වසං ගතො’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
184. ‘‘Tatrāvuso , bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi pāpiccho, pāpikānaṃ icchānaṃ vasaṃ gato’ti? Sace, āvuso , bhikkhu paccavekkhamāno evaṃ jānāti – ‘pāpiccho khomhi, pāpikānaṃ icchānaṃ vasaṃ gato’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi pāpiccho, na pāpikānaṃ icchānaṃ vasaṃ gato’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි අත්‌තුක්‌කංසකො පරවම්‌භී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘අත්‌තුක්‌කංසකො ඛොම්‌හි පරවම්‌භී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අනත්‌තුක්‌කංසකො ඛොම්‌හි අපරවම්‌භී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi attukkaṃsako paravambhī’ti? Sace, āvuso, bhikkhu paccavekkhamāno evaṃ jānāti – ‘attukkaṃsako khomhi paravambhī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘anattukkaṃsako khomhi aparavambhī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධාභිභූතො’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘කොධනො ඛොම්‌හි කොධාභිභූතො’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි කොධනො කොධාභිභූතො’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhābhibhūto’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhābhibhūto’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhābhibhūto’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධහෙතු උපනාහී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති ‘කොධනො ඛොම්‌හි කොධහෙතු උපනාහී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති ‘න ඛොම්‌හි කොධනො කොධහෙතු උපනාහී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhahetu upanāhī’ti? Sace, āvuso, bhikkhu paccavekkhamāno evaṃ jānāti ‘kodhano khomhi kodhahetu upanāhī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti ‘na khomhi kodhano kodhahetu upanāhī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධහෙතු අභිසඞ්‌ගී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘කොධනො ඛොම්‌හි කොධහෙතු අභිසඞ්‌ගී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි කොධනො කොධහෙතු අභිසඞ්‌ගී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhahetu abhisaṅgī’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhahetu abhisaṅgī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhahetu abhisaṅgī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි කොධනො කොධසාමන්‌තා වාචං නිච්‌ඡාරෙතා’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘කොධනො ඛොම්‌හි කොධසාමන්‌තා වාචං නිච්‌ඡාරෙතා’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘න ඛොම්‌හි කොධනො කොධසාමන්‌තා වාචං නිච්‌ඡාරෙතා’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhasāmantā vācaṃ nicchāretā’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhasāmantā vācaṃ nicchāretā’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhasāmantā vācaṃ nicchāretā’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන චොදකං පටිප්‌ඵරාමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති ‘චොදිතො ඛොම්‌හි චොදකෙන චොදකං පටිප්‌ඵරාමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකං නප්‌පටිප්‌ඵරාමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakaṃ paṭippharāmī’ti? Sace, āvuso, bhikkhu paccavekkhamāno evaṃ jānāti ‘codito khomhi codakena codakaṃ paṭippharāmī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakaṃ nappaṭippharāmī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන චොදකං අපසාදෙමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති ‘චොදිතො ඛොම්‌හි චොදකෙන චොදකං අපසාදෙමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකං න අපසාදෙමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakaṃ apasādemī’ti? Sace, āvuso, bhikkhu paccavekkhamāno evaṃ jānāti ‘codito khomhi codakena codakaṃ apasādemī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakaṃ na apasādemī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන චොදකස්‌ස පච්‌චාරොපෙමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකස්‌ස පච්‌චාරොපෙමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන චොදකස්‌ස න පච්‌චාරොපෙමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakassa paccāropemī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena codakassa paccāropemī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakassa na paccāropemī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන අඤ්‌ඤෙනඤ්‌ඤං පටිචරාමි, බහිද්‌ධා කථං අපනාමෙමි, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන අඤ්‌ඤෙනඤ්‌ඤං පටිචරාමි, බහිද්‌ධා කථං අපනාමෙමි, කොපඤ්‌ච දොසඤ්‌ච අප්‌පච්‌චයඤ්‌ච පාතුකරොමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන න අඤ්‌ඤෙනඤ්‌ඤං පටිචරාමි, න බහිද්‌ධා කථං අපනාමෙමි, න කොපඤ්‌ච දොසඤ්‌ච අප්‌පච්‌චයඤ්‌ච පාතුකරොමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena aññenaññaṃ paṭicarāmi, bahiddhā kathaṃ apanāmemi, kopañca dosañca appaccayañca pātukaromī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena aññenaññaṃ paṭicarāmi, bahiddhā kathaṃ apanāmemi, kopañca dosañca appaccayañca pātukaromī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena na aññenaññaṃ paṭicarāmi, na bahiddhā kathaṃ apanāmemi, na kopañca dosañca appaccayañca pātukaromī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි චොදිතො චොදකෙන අපදානෙ න සම්‌පායාමී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන අපදානෙ න සම්‌පායාමී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘චොදිතො ඛොම්‌හි චොදකෙන අපදානෙ සම්‌පායාමී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena apadāne na sampāyāmī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena apadāne na sampāyāmī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena apadāne sampāyāmī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං , ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි මක්‌ඛී පළාසී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘මක්‌ඛී ඛොම්‌හි පළාසී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අමක්‌ඛී ඛොම්‌හි අපළාසී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ , āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi makkhī paḷāsī’ti? Sace, āvuso, bhikkhu paccavekkhamāno evaṃ jānāti – ‘makkhī khomhi paḷāsī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘amakkhī khomhi apaḷāsī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි ඉස්‌සුකී මච්‌ඡරී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘ඉස්‌සුකී ඛොම්‌හි මච්‌ඡරී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අනිස්‌සුකී ඛොම්‌හි අමච්‌ඡරී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi issukī maccharī’ti? Sace, āvuso, bhikkhu paccavekkhamāno evaṃ jānāti – ‘issukī khomhi maccharī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘anissukī khomhi amaccharī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි සඨො මායාවී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘සඨො ඛොම්‌හි මායාවී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අසඨො ඛොම්‌හි අමායාවී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi saṭho māyāvī’ti? Sace, āvuso, bhikkhu paccavekkhamāno evaṃ jānāti – ‘saṭho khomhi māyāvī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘asaṭho khomhi amāyāvī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි ථද්‌ධො අතිමානී’ති? සචෙ, ආවුසො, භික්‌ඛු පච්‌චවෙක්‌ඛමානො එවං ජානාති – ‘ථද්‌ධො ඛොම්‌හි අතිමානී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අත්‌ථද්‌ධො ඛොම්‌හි අනතිමානී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi thaddho atimānī’ti? Sace, āvuso, bhikkhu paccavekkhamāno evaṃ jānāti – ‘thaddho khomhi atimānī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘atthaddho khomhi anatimānī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘පුන චපරං, ආවුසො, භික්‌ඛුනා අත්‌තනාව අත්‌තානං එවං පච්‌චවෙක්‌ඛිතබ්‌බං – ‘කිං නු ඛොම්‌හි සන්‌දිට්‌ඨිපරාමාසී ආධානග්‌ගාහී දුප්‌පටිනිස්‌සග්‌ගී’ති? සචෙ, ආවුසො , භික්‌ඛු පච්‌චවෙක්‌ඛමානො එවං ජානාති – ‘සන්‌දිට්‌ඨිපරාමාසී ඛොම්‌හි ආධානග්‌ගාහී දුප්‌පටිනිස්‌සග්‌ගී’ති, තෙනාවුසො, භික්‌ඛුනා තෙසංයෙව පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො එවං ජානාති – ‘අසන්‌දිට්‌ඨිපරාමාසී ඛොම්‌හි අනාධානග්‌ගාහී සුප්‌පටිනිස්‌සග්‌ගී’ති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං අහොරත්‌තානුසික්‌ඛිනා කුසලෙසු ධම්‌මෙසු.
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi sandiṭṭhiparāmāsī ādhānaggāhī duppaṭinissaggī’ti? Sace, āvuso , bhikkhu paccavekkhamāno evaṃ jānāti – ‘sandiṭṭhiparāmāsī khomhi ādhānaggāhī duppaṭinissaggī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘asandiṭṭhiparāmāsī khomhi anādhānaggāhī suppaṭinissaggī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘සචෙ , ආවුසො, භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ අප්‌පහීනෙ අත්‌තනි සමනුපස්‌සති, තෙනාවුසො, භික්‌ඛුනා සබ්‌බෙසංයෙව ඉමෙසං පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ පහීනෙ අත්‌තනි සමනුපස්‌සති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං, අහොරත්‌තානුසික්‌ඛිනා කුසලෙසු ධම්‌මෙසු.
‘‘Sace , āvuso, bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṃyeva imesaṃ pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṃ, ahorattānusikkhinā kusalesu dhammesu.
‘‘සෙය්‍යථාපි, ආවුසො, ඉත්‌ථී වා පුරිසො වා, දහරො යුවා මණ්‌ඩනජාතිකො, ආදාසෙ වා පරිසුද්‌ධෙ පරියොදාතෙ, අච්‌ඡෙ වා උදකපත්‌තෙ, සකං මුඛනිමිත්‌තං පච්‌චවෙක්‌ඛමානො, සචෙ තත්‌ථ පස්‌සති රජං වා අඞ්‌ගණං වා, තස්‌සෙව රජස්‌ස වා අඞ්‌ගණස්‌ස වා පහානාය වායමති; නො චෙ තත්‌ථ පස්‌සති රජං වා අඞ්‌ගණං වා, තෙනෙව අත්‌තමනො හොති – ‘ලාභා වත මෙ, පරිසුද්‌ධං වත මෙ’ති. එවමෙව ඛො, ආවුසො, සචෙ භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ අප්‌පහීනෙ අත්‌තනි සමනුපස්‌සති, තෙනාවුසො, භික්‌ඛුනා සබ්‌බෙසංයෙව ඉමෙසං පාපකානං අකුසලානං ධම්‌මානං පහානාය වායමිතබ්‌බං. සචෙ පනාවුසො, භික්‌ඛු පච්‌චවෙක්‌ඛමානො සබ්‌බෙපිමෙ පාපකෙ අකුසලෙ ධම්‌මෙ පහීනෙ අත්‌තනි සමනුපස්‌සති, තෙනාවුසො, භික්‌ඛුනා තෙනෙව පීතිපාමොජ්‌ජෙන විහාතබ්‌බං, අහොරත්‌තානුසික්‌ඛිනා කුසලෙසු ධම්‌මෙසූ’’ති.
‘‘Seyyathāpi, āvuso, itthī vā puriso vā, daharo yuvā maṇḍanajātiko, ādāse vā parisuddhe pariyodāte, acche vā udakapatte, sakaṃ mukhanimittaṃ paccavekkhamāno, sace tattha passati rajaṃ vā aṅgaṇaṃ vā, tasseva rajassa vā aṅgaṇassa vā pahānāya vāyamati; no ce tattha passati rajaṃ vā aṅgaṇaṃ vā, teneva attamano hoti – ‘lābhā vata me, parisuddhaṃ vata me’ti. Evameva kho, āvuso, sace bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṃyeva imesaṃ pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṃ, ahorattānusikkhinā kusalesu dhammesū’’ti.
ඉදමවොචායස්‌මා මහාමොග්‌ගල්‌ලානො. අත්‌තමනා තෙ භික්‌ඛූ ආයස්‌මතො මහාමොග්‌ගල්‌ලානස්‌ස භාසිතං අභිනන්‌දුන්‌ති.
Idamavocāyasmā mahāmoggallāno. Attamanā te bhikkhū āyasmato mahāmoggallānassa bhāsitaṃ abhinandunti.
අනුමානසුත්‌තං නිට්‌ඨිතං පඤ්‌චමං.
Anumānasuttaṃ niṭṭhitaṃ pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) / 5. අනුමානසුත්‌තවණ්‌ණනා • 5. Anumānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 5. අනුමානසුත්‌තවණ්‌ණනා • 5. Anumānasuttavaṇṇanā
