| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ • Majjhimanikāya |
੫. ਅਨੁਮਾਨਸੁਤ੍ਤਂ
5. Anumānasuttaṃ
੧੮੧. ਏવਂ ਮੇ ਸੁਤਂ – ਏਕਂ ਸਮਯਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗ੍ਗੇਸੁ વਿਹਰਤਿ ਸੁਸੁਮਾਰਗਿਰੇ 1 ਭੇਸਕਲ਼ਾવਨੇ ਮਿਗਦਾਯੇ। ਤਤ੍ਰ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਿਕ੍ਖੂ ਆਮਨ੍ਤੇਸਿ – ‘‘ਆવੁਸੋ, ਭਿਕ੍ਖવੋ’’ਤਿ। ‘‘ਆવੁਸੋ’’ਤਿ ਖੋ ਤੇ ਭਿਕ੍ਖੂ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਪਚ੍ਚਸ੍ਸੋਸੁਂ। ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਤਦવੋਚ –
181. Evaṃ me sutaṃ – ekaṃ samayaṃ āyasmā mahāmoggallāno bhaggesu viharati susumāragire 2 bhesakaḷāvane migadāye. Tatra kho āyasmā mahāmoggallāno bhikkhū āmantesi – ‘‘āvuso, bhikkhavo’’ti. ‘‘Āvuso’’ti kho te bhikkhū āyasmato mahāmoggallānassa paccassosuṃ. Āyasmā mahāmoggallāno etadavoca –
‘‘ਪવਾਰੇਤਿ ਚੇਪਿ, ਆવੁਸੋ, ਭਿਕ੍ਖੁ – ‘વਦਨ੍ਤੁ ਮਂ ਆਯਸ੍ਮਨ੍ਤੋ, વਚਨੀਯੋਮ੍ਹਿ ਆਯਸ੍ਮਨ੍ਤੇਹੀ’ਤਿ, ਸੋ ਚ ਹੋਤਿ ਦੁਬ੍ਬਚੋ, ਦੋવਚਸ੍ਸਕਰਣੇਹਿ ਧਮ੍ਮੇਹਿ ਸਮਨ੍ਨਾਗਤੋ, ਅਕ੍ਖਮੋ ਅਪ੍ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਂ, ਅਥ ਖੋ ਨਂ ਸਬ੍ਰਹ੍ਮਚਾਰੀ ਨ ਚੇવ વਤ੍ਤਬ੍ਬਂ ਮਞ੍ਞਨ੍ਤਿ, ਨ ਚ ਅਨੁਸਾਸਿਤਬ੍ਬਂ ਮਞ੍ਞਨ੍ਤਿ, ਨ ਚ ਤਸ੍ਮਿਂ ਪੁਗ੍ਗਲੇ વਿਸ੍ਸਾਸਂ ਆਪਜ੍ਜਿਤਬ੍ਬਂ ਮਞ੍ਞਨ੍ਤਿ।
‘‘Pavāreti cepi, āvuso, bhikkhu – ‘vadantu maṃ āyasmanto, vacanīyomhi āyasmantehī’ti, so ca hoti dubbaco, dovacassakaraṇehi dhammehi samannāgato, akkhamo appadakkhiṇaggāhī anusāsaniṃ, atha kho naṃ sabrahmacārī na ceva vattabbaṃ maññanti, na ca anusāsitabbaṃ maññanti, na ca tasmiṃ puggale vissāsaṃ āpajjitabbaṃ maññanti.
‘‘ਕਤਮੇ ਚਾવੁਸੋ, ਦੋવਚਸ੍ਸਕਰਣਾ ਧਮ੍ਮਾ? ਇਧਾવੁਸੋ, ਭਿਕ੍ਖੁ ਪਾਪਿਚ੍ਛੋ ਹੋਤਿ, ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ। ਯਮ੍ਪਾવੁਸੋ, ਭਿਕ੍ਖੁ ਪਾਪਿਚ੍ਛੋ ਹੋਤਿ, ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Katame cāvuso, dovacassakaraṇā dhammā? Idhāvuso, bhikkhu pāpiccho hoti, pāpikānaṃ icchānaṃ vasaṃ gato. Yampāvuso, bhikkhu pāpiccho hoti, pāpikānaṃ icchānaṃ vasaṃ gato – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਤ੍ਤੁਕ੍ਕਂਸਕੋ ਹੋਤਿ ਪਰવਮ੍ਭੀ। ਯਮ੍ਪਾવੁਸੋ, ਭਿਕ੍ਖੁ ਅਤ੍ਤੁਕ੍ਕਂਸਕੋ ਹੋਤਿ ਪਰવਮ੍ਭੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu attukkaṃsako hoti paravambhī. Yampāvuso, bhikkhu attukkaṃsako hoti paravambhī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਾਭਿਭੂਤੋ। ਯਮ੍ਪਾવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਾਭਿਭੂਤੋ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu kodhano hoti kodhābhibhūto. Yampāvuso, bhikkhu kodhano hoti kodhābhibhūto – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ , ਭਿਕ੍ਖੁ ਕੋਧਨੋ ਹੋਤਿ ਕੋਧਹੇਤੁ ਉਪਨਾਹੀ। ਯਮ੍ਪਾવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਹੇਤੁ ਉਪਨਾਹੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso , bhikkhu kodhano hoti kodhahetu upanāhī. Yampāvuso, bhikkhu kodhano hoti kodhahetu upanāhī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਹੇਤੁ ਅਭਿਸਙ੍ਗੀ। ਯਮ੍ਪਾવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਹੇਤੁ ਅਭਿਸਙ੍ਗੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu kodhano hoti kodhahetu abhisaṅgī. Yampāvuso, bhikkhu kodhano hoti kodhahetu abhisaṅgī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਸਾਮਨ੍ਤਾ 3 વਾਚਂ ਨਿਚ੍ਛਾਰੇਤਾ। ਯਮ੍ਪਾવੁਸੋ, ਭਿਕ੍ਖੁ ਕੋਧਨੋ ਹੋਤਿ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu kodhano hoti kodhasāmantā 4 vācaṃ nicchāretā. Yampāvuso, bhikkhu kodhano hoti kodhasāmantā vācaṃ nicchāretā – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ 5 ਚੋਦਕੇਨ ਚੋਦਕਂ ਪਟਿਪ੍ਫਰਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਪਟਿਪ੍ਫਰਤਿ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito 6 codakena codakaṃ paṭippharati. Yampāvuso, bhikkhu codito codakena codakaṃ paṭippharati – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਅਪਸਾਦੇਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਅਪਸਾਦੇਤਿ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena codakaṃ apasādeti. Yampāvuso, bhikkhu codito codakena codakaṃ apasādeti – ayampi dhammo dovacassakaraṇo.
‘‘ਪੁਨ ਚਪਰਂ , ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਸ੍ਸ ਪਚ੍ਚਾਰੋਪੇਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਸ੍ਸ ਪਚ੍ਚਾਰੋਪੇਤਿ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ , āvuso, bhikkhu codito codakena codakassa paccāropeti. Yampāvuso, bhikkhu codito codakena codakassa paccāropeti – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਅਞ੍ਞੇਨਞ੍ਞਂ ਪਟਿਚਰਤਿ, ਬਹਿਦ੍ਧਾ ਕਥਂ ਅਪਨਾਮੇਤਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਅਞ੍ਞੇਨਞ੍ਞਂ ਪਟਿਚਰਤਿ, ਬਹਿਦ੍ਧਾ ਕਥਂ ਅਪਨਾਮੇਤਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਤਿ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti. Yampāvuso, bhikkhu codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਅਪਦਾਨੇ ਨ ਸਮ੍ਪਾਯਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਅਪਦਾਨੇ ਨ ਸਮ੍ਪਾਯਤਿ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena apadāne na sampāyati. Yampāvuso, bhikkhu codito codakena apadāne na sampāyati – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਮਕ੍ਖੀ ਹੋਤਿ ਪਲ਼ਾਸੀ। ਯਮ੍ਪਾવੁਸੋ, ਭਿਕ੍ਖੁ ਮਕ੍ਖੀ ਹੋਤਿ ਪਲ਼ਾਸੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu makkhī hoti paḷāsī. Yampāvuso, bhikkhu makkhī hoti paḷāsī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਇਸ੍ਸੁਕੀ ਹੋਤਿ ਮਚ੍ਛਰੀ। ਯਮ੍ਪਾવੁਸੋ, ਭਿਕ੍ਖੁ ਇਸ੍ਸੁਕੀ ਹੋਤਿ ਮਚ੍ਛਰੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu issukī hoti maccharī. Yampāvuso, bhikkhu issukī hoti maccharī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਸਠੋ ਹੋਤਿ ਮਾਯਾવੀ। ਯਮ੍ਪਾવੁਸੋ, ਭਿਕ੍ਖੁ ਸਠੋ ਹੋਤਿ ਮਾਯਾવੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu saṭho hoti māyāvī. Yampāvuso, bhikkhu saṭho hoti māyāvī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਥਦ੍ਧੋ ਹੋਤਿ ਅਤਿਮਾਨੀ। ਯਮ੍ਪਾવੁਸੋ, ਭਿਕ੍ਖੁ ਥਦ੍ਧੋ ਹੋਤਿ ਅਤਿਮਾਨੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ।
‘‘Puna caparaṃ, āvuso, bhikkhu thaddho hoti atimānī. Yampāvuso, bhikkhu thaddho hoti atimānī – ayampi dhammo dovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਸਨ੍ਦਿਟ੍ਠਿਪਰਾਮਾਸੀ ਹੋਤਿ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ। ਯਮ੍ਪਾવੁਸੋ, ਭਿਕ੍ਖੁ ਸਨ੍ਦਿਟ੍ਠਿਪਰਾਮਾਸੀ ਹੋਤਿ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ – ਅਯਮ੍ਪਿ ਧਮ੍ਮੋ ਦੋવਚਸ੍ਸਕਰਣੋ। ਇਮੇ વੁਚ੍ਚਨ੍ਤਾવੁਸੋ, ਦੋવਚਸ੍ਸਕਰਣਾ ਧਮ੍ਮਾ।
‘‘Puna caparaṃ, āvuso, bhikkhu sandiṭṭhiparāmāsī hoti ādhānaggāhī duppaṭinissaggī. Yampāvuso, bhikkhu sandiṭṭhiparāmāsī hoti ādhānaggāhī duppaṭinissaggī – ayampi dhammo dovacassakaraṇo. Ime vuccantāvuso, dovacassakaraṇā dhammā.
੧੮੨. ‘‘ਨੋ ਚੇਪਿ, ਆવੁਸੋ, ਭਿਕ੍ਖੁ ਪવਾਰੇਤਿ – ‘વਦਨ੍ਤੁ ਮਂ ਆਯਸ੍ਮਨ੍ਤੋ, વਚਨੀਯੋਮ੍ਹਿ ਆਯਸ੍ਮਨ੍ਤੇਹੀ’ਤਿ, ਸੋ ਚ ਹੋਤਿ ਸੁવਚੋ, ਸੋવਚਸ੍ਸਕਰਣੇਹਿ ਧਮ੍ਮੇਹਿ ਸਮਨ੍ਨਾਗਤੋ, ਖਮੋ ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਂ, ਅਥ ਖੋ ਨਂ ਸਬ੍ਰਹ੍ਮਚਾਰੀ વਤ੍ਤਬ੍ਬਞ੍ਚੇવ ਮਞ੍ਞਨ੍ਤਿ, ਅਨੁਸਾਸਿਤਬ੍ਬਞ੍ਚ ਮਞ੍ਞਨ੍ਤਿ, ਤਸ੍ਮਿਞ੍ਚ ਪੁਗ੍ਗਲੇ વਿਸ੍ਸਾਸਂ ਆਪਜ੍ਜਿਤਬ੍ਬਂ ਮਞ੍ਞਨ੍ਤਿ।
182. ‘‘No cepi, āvuso, bhikkhu pavāreti – ‘vadantu maṃ āyasmanto, vacanīyomhi āyasmantehī’ti, so ca hoti suvaco, sovacassakaraṇehi dhammehi samannāgato, khamo padakkhiṇaggāhī anusāsaniṃ, atha kho naṃ sabrahmacārī vattabbañceva maññanti, anusāsitabbañca maññanti, tasmiñca puggale vissāsaṃ āpajjitabbaṃ maññanti.
‘‘ਕਤਮੇ ਚਾવੁਸੋ, ਸੋવਚਸ੍ਸਕਰਣਾ ਧਮ੍ਮਾ? ਇਧਾવੁਸੋ, ਭਿਕ੍ਖੁ ਨ ਪਾਪਿਚ੍ਛੋ ਹੋਤਿ, ਨ ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ। ਯਮ੍ਪਾવੁਸੋ, ਭਿਕ੍ਖੁ ਨ ਪਾਪਿਚ੍ਛੋ ਹੋਤਿ ਨ ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Katame cāvuso, sovacassakaraṇā dhammā? Idhāvuso, bhikkhu na pāpiccho hoti, na pāpikānaṃ icchānaṃ vasaṃ gato. Yampāvuso, bhikkhu na pāpiccho hoti na pāpikānaṃ icchānaṃ vasaṃ gato – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਨਤ੍ਤੁਕ੍ਕਂਸਕੋ ਹੋਤਿ ਅਪਰવਮ੍ਭੀ। ਯਮ੍ਪਾવੁਸੋ, ਭਿਕ੍ਖੁ ਅਨਤ੍ਤੁਕ੍ਕਂਸਕੋ ਹੋਤਿ ਅਪਰવਮ੍ਭੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu anattukkaṃsako hoti aparavambhī. Yampāvuso, bhikkhu anattukkaṃsako hoti aparavambhī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਾਭਿਭੂਤੋ। ਯਮ੍ਪਾવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਾਭਿਭੂਤੋ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu na kodhano hoti na kodhābhibhūto. Yampāvuso, bhikkhu na kodhano hoti na kodhābhibhūto – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਹੇਤੁ ਉਪਨਾਹੀ। ਯਮ੍ਪਾવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਹੇਤੁ ਉਪਨਾਹੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu na kodhano hoti na kodhahetu upanāhī. Yampāvuso, bhikkhu na kodhano hoti na kodhahetu upanāhī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਹੇਤੁ ਅਭਿਸਙ੍ਗੀ। ਯਮ੍ਪਾવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਹੇਤੁ ਅਭਿਸਙ੍ਗੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu na kodhano hoti na kodhahetu abhisaṅgī. Yampāvuso, bhikkhu na kodhano hoti na kodhahetu abhisaṅgī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ। ਯਮ੍ਪਾવੁਸੋ , ਭਿਕ੍ਖੁ ਨ ਕੋਧਨੋ ਹੋਤਿ ਨ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu na kodhano hoti na kodhasāmantā vācaṃ nicchāretā. Yampāvuso , bhikkhu na kodhano hoti na kodhasāmantā vācaṃ nicchāretā – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਨਪ੍ਪਟਿਪ੍ਫਰਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਨਪ੍ਪਟਿਪ੍ਫਰਤਿ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ ।
‘‘Puna caparaṃ, āvuso, bhikkhu codito codakena codakaṃ nappaṭippharati. Yampāvuso, bhikkhu codito codakena codakaṃ nappaṭippharati – ayampi dhammo sovacassakaraṇo .
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਨ ਅਪਸਾਦੇਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਂ ਨ ਅਪਸਾਦੇਤਿ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena codakaṃ na apasādeti. Yampāvuso, bhikkhu codito codakena codakaṃ na apasādeti – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਸ੍ਸ ਨ ਪਚ੍ਚਾਰੋਪੇਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਚੋਦਕਸ੍ਸ ਨ ਪਚ੍ਚਾਰੋਪੇਤਿ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena codakassa na paccāropeti. Yampāvuso, bhikkhu codito codakena codakassa na paccāropeti – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਨ ਅਞ੍ਞੇਨਞ੍ਞਂ ਪਟਿਚਰਤਿ, ਨ ਬਹਿਦ੍ਧਾ ਕਥਂ ਅਪਨਾਮੇਤਿ, ਨ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਨ ਅਞ੍ਞੇਨਞ੍ਞਂ ਪਟਿਚਰਤਿ, ਨ ਬਹਿਦ੍ਧਾ ਕਥਂ ਅਪਨਾਮੇਤਿ, ਨ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਤਿ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena na aññenaññaṃ paṭicarati, na bahiddhā kathaṃ apanāmeti, na kopañca dosañca appaccayañca pātukaroti. Yampāvuso, bhikkhu codito codakena na aññenaññaṃ paṭicarati, na bahiddhā kathaṃ apanāmeti, na kopañca dosañca appaccayañca pātukaroti – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਅਪਦਾਨੇ ਸਮ੍ਪਾਯਤਿ। ਯਮ੍ਪਾવੁਸੋ, ਭਿਕ੍ਖੁ ਚੋਦਿਤੋ ਚੋਦਕੇਨ ਅਪਦਾਨੇ ਸਮ੍ਪਾਯਤਿ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu codito codakena apadāne sampāyati. Yampāvuso, bhikkhu codito codakena apadāne sampāyati – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਮਕ੍ਖੀ ਹੋਤਿ ਅਪਲ਼ਾਸੀ। ਯਮ੍ਪਾવੁਸੋ, ਭਿਕ੍ਖੁ ਅਮਕ੍ਖੀ ਹੋਤਿ ਅਪਲ਼ਾਸੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu amakkhī hoti apaḷāsī. Yampāvuso, bhikkhu amakkhī hoti apaḷāsī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਨਿਸ੍ਸੁਕੀ ਹੋਤਿ ਅਮਚ੍ਛਰੀ। ਯਮ੍ਪਾવੁਸੋ, ਭਿਕ੍ਖੁ ਅਨਿਸ੍ਸੁਕੀ ਹੋਤਿ ਅਮਚ੍ਛਰੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu anissukī hoti amaccharī. Yampāvuso, bhikkhu anissukī hoti amaccharī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਸਠੋ ਹੋਤਿ ਅਮਾਯਾવੀ। ਯਮ੍ਪਾવੁਸੋ, ਭਿਕ੍ਖੁ ਅਸਠੋ ਹੋਤਿ ਅਮਾਯਾવੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu asaṭho hoti amāyāvī. Yampāvuso, bhikkhu asaṭho hoti amāyāvī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਤ੍ਥਦ੍ਧੋ ਹੋਤਿ ਅਨਤਿਮਾਨੀ। ਯਮ੍ਪਾવੁਸੋ, ਭਿਕ੍ਖੁ ਅਤ੍ਥਦ੍ਧੋ ਹੋਤਿ ਅਨਤਿਮਾਨੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ।
‘‘Puna caparaṃ, āvuso, bhikkhu atthaddho hoti anatimānī. Yampāvuso, bhikkhu atthaddho hoti anatimānī – ayampi dhammo sovacassakaraṇo.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁ ਅਸਨ੍ਦਿਟ੍ਠਿਪਰਾਮਾਸੀ ਹੋਤਿ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ। ਯਮ੍ਪਾવੁਸੋ, ਭਿਕ੍ਖੁ ਅਸਨ੍ਦਿਟ੍ਠਿਪਰਾਮਾਸੀ ਹੋਤਿ, ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ – ਅਯਮ੍ਪਿ ਧਮ੍ਮੋ ਸੋવਚਸ੍ਸਕਰਣੋ। ਇਮੇ વੁਚ੍ਚਨ੍ਤਾવੁਸੋ, ਸੋવਚਸ੍ਸਕਰਣਾ ਧਮ੍ਮਾ।
‘‘Puna caparaṃ, āvuso, bhikkhu asandiṭṭhiparāmāsī hoti anādhānaggāhī suppaṭinissaggī. Yampāvuso, bhikkhu asandiṭṭhiparāmāsī hoti, anādhānaggāhī suppaṭinissaggī – ayampi dhammo sovacassakaraṇo. Ime vuccantāvuso, sovacassakaraṇā dhammā.
੧੮੩. ‘‘ਤਤ੍ਰਾવੁਸੋ , ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਅਨੁਮਿਨਿਤਬ੍ਬਂ 7 – ‘ਯੋ ਖ੍વਾਯਂ ਪੁਗ੍ਗਲੋ ਪਾਪਿਚ੍ਛੋ, ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਪਾਪਿਚ੍ਛੋ ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਨ ਪਾਪਿਚ੍ਛੋ ਭવਿਸ੍ਸਾਮਿ, ਨ ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
183. ‘‘Tatrāvuso , bhikkhunā attanāva attānaṃ evaṃ anuminitabbaṃ 8 – ‘yo khvāyaṃ puggalo pāpiccho, pāpikānaṃ icchānaṃ vasaṃ gato, ayaṃ me puggalo appiyo amanāpo; ahañceva kho panassaṃ pāpiccho pāpikānaṃ icchānaṃ vasaṃ gato, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na pāpiccho bhavissāmi, na pāpikānaṃ icchānaṃ vasaṃ gato’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਅਤ੍ਤੁਕ੍ਕਂਸਕੋ ਪਰવਮ੍ਭੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਅਤ੍ਤੁਕ੍ਕਂਸਕੋ ਪਰવਮ੍ਭੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਅਨਤ੍ਤੁਕ੍ਕਂਸਕੋ ਭવਿਸ੍ਸਾਮਿ ਅਪਰવਮ੍ਭੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo attukkaṃsako paravambhī, ayaṃ me puggalo appiyo amanāpo; ahañceva kho panassaṃ attukkaṃsako paravambhī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘anattukkaṃsako bhavissāmi aparavambhī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਕੋਧਨੋ ਕੋਧਾਭਿਭੂਤੋ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ। ਅਹਞ੍ਚੇવ ਖੋ ਪਨਸ੍ਸਂ ਕੋਧਨੋ ਕੋਧਾਭਿਭੂਤੋ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਨ ਕੋਧਨੋ ਭવਿਸ੍ਸਾਮਿ ਨ ਕੋਧਾਭਿਭੂਤੋ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo kodhano kodhābhibhūto, ayaṃ me puggalo appiyo amanāpo. Ahañceva kho panassaṃ kodhano kodhābhibhūto, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhābhibhūto’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਕੋਧਨੋ ਕੋਧਹੇਤੁ ਉਪਨਾਹੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਕੋਧਨੋ ਕੋਧਹੇਤੁ ਉਪਨਾਹੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਨ ਕੋਧਨੋ ਭવਿਸ੍ਸਾਮਿ ਨ ਕੋਧਹੇਤੁ ਉਪਨਾਹੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo kodhano kodhahetu upanāhī, ayaṃ me puggalo appiyo amanāpo; ahañceva kho panassaṃ kodhano kodhahetu upanāhī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhahetu upanāhī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਕੋਧਨੋ ਕੋਧਹੇਤੁ ਅਭਿਸਙ੍ਗੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਕੋਧਨੋ ਕੋਧਹੇਤੁ ਅਭਿਸਙ੍ਗੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਨ ਕੋਧਨੋ ਭવਿਸ੍ਸਾਮਿ ਨ ਕੋਧਹੇਤੁ ਅਭਿਸਙ੍ਗੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo kodhano kodhahetu abhisaṅgī, ayaṃ me puggalo appiyo amanāpo; ahañceva kho panassaṃ kodhano kodhahetu abhisaṅgī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhahetu abhisaṅgī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਕੋਧਨੋ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਕੋਧਨੋ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਨ ਕੋਧਨੋ ਭવਿਸ੍ਸਾਮਿ ਨ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo kodhano kodhasāmantā vācaṃ nicchāretā, ayaṃ me puggalo appiyo amanāpo; ahañceva kho panassaṃ kodhano kodhasāmantā vācaṃ nicchāretā, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘na kodhano bhavissāmi na kodhasāmantā vācaṃ nicchāressāmī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਚੋਦਿਤੋ ਚੋਦਕੇਨ ਚੋਦਕਂ ਪਟਿਪ੍ਫਰਤਿ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨ ਚੋਦਿਤੋ ਚੋਦਕੇਨ ਚੋਦਕਂ ਪਟਿਪ੍ਫਰੇਯ੍ਯਂ , ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਚੋਦਿਤੋ ਚੋਦਕੇਨ ਚੋਦਕਂ ਨਪ੍ਪਟਿਪ੍ਫਰਿਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo codito codakena codakaṃ paṭippharati, ayaṃ me puggalo appiyo amanāpo; ahañceva kho pana codito codakena codakaṃ paṭipphareyyaṃ , ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakaṃ nappaṭippharissāmī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਚੋਦਿਤੋ ਚੋਦਕੇਨ ਚੋਦਕਂ ਅਪਸਾਦੇਤਿ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨ ਚੋਦਿਤੋ ਚੋਦਕੇਨ ਚੋਦਕਂ ਅਪਸਾਦੇਯ੍ਯਂ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਚੋਦਿਤੋ ਚੋਦਕੇਨ ਚੋਦਕਂ ਨ ਅਪਸਾਦੇਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo codito codakena codakaṃ apasādeti, ayaṃ me puggalo appiyo amanāpo; ahañceva kho pana codito codakena codakaṃ apasādeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakaṃ na apasādessāmī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਚੋਦਿਤੋ ਚੋਦਕੇਨ ਚੋਦਕਸ੍ਸ ਪਚ੍ਚਾਰੋਪੇਤਿ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨ ਚੋਦਿਤੋ ਚੋਦਕੇਨ ਚੋਦਕਸ੍ਸ ਪਚ੍ਚਾਰੋਪੇਯ੍ਯਂ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਚੋਦਿਤੋ ਚੋਦਕੇਨ ਚੋਦਕਸ੍ਸ ਨ ਪਚ੍ਚਾਰੋਪੇਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo codito codakena codakassa paccāropeti, ayaṃ me puggalo appiyo amanāpo; ahañceva kho pana codito codakena codakassa paccāropeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena codakassa na paccāropessāmī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਚੋਦਿਤੋ ਚੋਦਕੇਨ ਅਞ੍ਞੇਨਞ੍ਞਂ ਪਟਿਚਰਤਿ, ਬਹਿਦ੍ਧਾ ਕਥਂ ਅਪਨਾਮੇਤਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਤਿ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨ ਚੋਦਿਤੋ ਚੋਦਕੇਨ ਅਞ੍ਞੇਨਞ੍ਞਂ ਪਟਿਚਰੇਯ੍ਯਂ, ਬਹਿਦ੍ਧਾ ਕਥਂ ਅਪਨਾਮੇਯ੍ਯਂ , ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੇਯ੍ਯਂ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਚੋਦਿਤੋ ਚੋਦਕੇਨ ਨ ਅਞ੍ਞੇਨਞ੍ਞਂ ਪਟਿਚਰਿਸ੍ਸਾਮਿ, ਨ ਬਹਿਦ੍ਧਾ ਕਥਂ ਅਪਨਾਮੇਸ੍ਸਾਮਿ, ਨ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰਿਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo codito codakena aññenaññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti, ayaṃ me puggalo appiyo amanāpo; ahañceva kho pana codito codakena aññenaññaṃ paṭicareyyaṃ, bahiddhā kathaṃ apanāmeyyaṃ , kopañca dosañca appaccayañca pātukareyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena na aññenaññaṃ paṭicarissāmi, na bahiddhā kathaṃ apanāmessāmi, na kopañca dosañca appaccayañca pātukarissāmī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਚੋਦਿਤੋ ਚੋਦਕੇਨ ਅਪਦਾਨੇ ਨ ਸਮ੍ਪਾਯਤਿ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨ ਚੋਦਿਤੋ ਚੋਦਕੇਨ ਅਪਦਾਨੇ ਨ ਸਮ੍ਪਾਯੇਯ੍ਯਂ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਚੋਦਿਤੋ ਚੋਦਕੇਨ ਅਪਦਾਨੇ ਸਮ੍ਪਾਯਿਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo codito codakena apadāne na sampāyati, ayaṃ me puggalo appiyo amanāpo; ahañceva kho pana codito codakena apadāne na sampāyeyyaṃ, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘codito codakena apadāne sampāyissāmī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਮਕ੍ਖੀ ਪਲ਼ਾਸੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਮਕ੍ਖੀ ਪਲ਼ਾਸੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਅਮਕ੍ਖੀ ਭવਿਸ੍ਸਾਮਿ ਅਪਲ਼ਾਸੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo makkhī paḷāsī, ayaṃ me puggalo appiyo amanāpo; ahañceva kho panassaṃ makkhī paḷāsī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘amakkhī bhavissāmi apaḷāsī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਇਸ੍ਸੁਕੀ ਮਚ੍ਛਰੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਇਸ੍ਸੁਕੀ ਮਚ੍ਛਰੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਅਨਿਸ੍ਸੁਕੀ ਭવਿਸ੍ਸਾਮਿ ਅਮਚ੍ਛਰੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo issukī maccharī, ayaṃ me puggalo appiyo amanāpo; ahañceva kho panassaṃ issukī maccharī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘anissukī bhavissāmi amaccharī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਸਠੋ ਮਾਯਾવੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਸਠੋ ਮਾਯਾવੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਅਸਠੋ ਭવਿਸ੍ਸਾਮਿ ਅਮਾਯਾવੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo saṭho māyāvī, ayaṃ me puggalo appiyo amanāpo; ahañceva kho panassaṃ saṭho māyāvī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘asaṭho bhavissāmi amāyāvī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਥਦ੍ਧੋ ਅਤਿਮਾਨੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਥਦ੍ਧੋ ਅਤਿਮਾਨੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਅਤ੍ਥਦ੍ਧੋ ਭવਿਸ੍ਸਾਮਿ ਅਨਤਿਮਾਨੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo thaddho atimānī, ayaṃ me puggalo appiyo amanāpo; ahañceva kho panassaṃ thaddho atimānī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘atthaddho bhavissāmi anatimānī’ti cittaṃ uppādetabbaṃ.
‘‘‘ਯੋ ਖ੍વਾਯਂ ਪੁਗ੍ਗਲੋ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ, ਅਯਂ ਮੇ ਪੁਗ੍ਗਲੋ ਅਪ੍ਪਿਯੋ ਅਮਨਾਪੋ; ਅਹਞ੍ਚੇવ ਖੋ ਪਨਸ੍ਸਂ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ, ਅਹਂਪਾਸ੍ਸਂ ਪਰੇਸਂ ਅਪ੍ਪਿਯੋ ਅਮਨਾਪੋ’ਤਿ। ਏવਂ ਜਾਨਨ੍ਤੇਨਾવੁਸੋ, ਭਿਕ੍ਖੁਨਾ ‘ਅਸਨ੍ਦਿਟ੍ਠਿਪਰਾਮਾਸੀ ਭવਿਸ੍ਸਾਮਿ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
‘‘‘Yo khvāyaṃ puggalo sandiṭṭhiparāmāsī ādhānaggāhī duppaṭinissaggī, ayaṃ me puggalo appiyo amanāpo; ahañceva kho panassaṃ sandiṭṭhiparāmāsī ādhānaggāhī duppaṭinissaggī, ahaṃpāssaṃ paresaṃ appiyo amanāpo’ti. Evaṃ jānantenāvuso, bhikkhunā ‘asandiṭṭhiparāmāsī bhavissāmi anādhānaggāhī suppaṭinissaggī’ti cittaṃ uppādetabbaṃ.
੧੮੪. ‘‘ਤਤ੍ਰਾવੁਸੋ , ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਪਾਪਿਚ੍ਛੋ, ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ’ਤਿ? ਸਚੇ, ਆવੁਸੋ , ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਪਾਪਿਚ੍ਛੋ ਖੋਮ੍ਹਿ, ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਨ ਖੋਮ੍ਹਿ ਪਾਪਿਚ੍ਛੋ, ਨ ਪਾਪਿਕਾਨਂ ਇਚ੍ਛਾਨਂ વਸਂ ਗਤੋ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
184. ‘‘Tatrāvuso , bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi pāpiccho, pāpikānaṃ icchānaṃ vasaṃ gato’ti? Sace, āvuso , bhikkhu paccavekkhamāno evaṃ jānāti – ‘pāpiccho khomhi, pāpikānaṃ icchānaṃ vasaṃ gato’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi pāpiccho, na pāpikānaṃ icchānaṃ vasaṃ gato’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਅਤ੍ਤੁਕ੍ਕਂਸਕੋ ਪਰવਮ੍ਭੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਤ੍ਤੁਕ੍ਕਂਸਕੋ ਖੋਮ੍ਹਿ ਪਰવਮ੍ਭੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਨਤ੍ਤੁਕ੍ਕਂਸਕੋ ਖੋਮ੍ਹਿ ਅਪਰવਮ੍ਭੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi attukkaṃsako paravambhī’ti? Sace, āvuso, bhikkhu paccavekkhamāno evaṃ jānāti – ‘attukkaṃsako khomhi paravambhī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘anattukkaṃsako khomhi aparavambhī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਕੋਧਨੋ ਕੋਧਾਭਿਭੂਤੋ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਕੋਧਨੋ ਖੋਮ੍ਹਿ ਕੋਧਾਭਿਭੂਤੋ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਨ ਖੋਮ੍ਹਿ ਕੋਧਨੋ ਕੋਧਾਭਿਭੂਤੋ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhābhibhūto’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhābhibhūto’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhābhibhūto’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਕੋਧਨੋ ਕੋਧਹੇਤੁ ਉਪਨਾਹੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ ‘ਕੋਧਨੋ ਖੋਮ੍ਹਿ ਕੋਧਹੇਤੁ ਉਪਨਾਹੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ ‘ਨ ਖੋਮ੍ਹਿ ਕੋਧਨੋ ਕੋਧਹੇਤੁ ਉਪਨਾਹੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhahetu upanāhī’ti? Sace, āvuso, bhikkhu paccavekkhamāno evaṃ jānāti ‘kodhano khomhi kodhahetu upanāhī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti ‘na khomhi kodhano kodhahetu upanāhī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਕੋਧਨੋ ਕੋਧਹੇਤੁ ਅਭਿਸਙ੍ਗੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਕੋਧਨੋ ਖੋਮ੍ਹਿ ਕੋਧਹੇਤੁ ਅਭਿਸਙ੍ਗੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਨ ਖੋਮ੍ਹਿ ਕੋਧਨੋ ਕੋਧਹੇਤੁ ਅਭਿਸਙ੍ਗੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhahetu abhisaṅgī’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhahetu abhisaṅgī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhahetu abhisaṅgī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਕੋਧਨੋ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਕੋਧਨੋ ਖੋਮ੍ਹਿ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਨ ਖੋਮ੍ਹਿ ਕੋਧਨੋ ਕੋਧਸਾਮਨ੍ਤਾ વਾਚਂ ਨਿਚ੍ਛਾਰੇਤਾ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi kodhano kodhasāmantā vācaṃ nicchāretā’ti? Sace, āvuso, bhikkhu paccavekkhamāno evaṃ jānāti – ‘kodhano khomhi kodhasāmantā vācaṃ nicchāretā’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘na khomhi kodhano kodhasāmantā vācaṃ nicchāretā’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਚੋਦਿਤੋ ਚੋਦਕੇਨ ਚੋਦਕਂ ਪਟਿਪ੍ਫਰਾਮੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ ‘ਚੋਦਿਤੋ ਖੋਮ੍ਹਿ ਚੋਦਕੇਨ ਚੋਦਕਂ ਪਟਿਪ੍ਫਰਾਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਚੋਦਕਂ ਨਪ੍ਪਟਿਪ੍ਫਰਾਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakaṃ paṭippharāmī’ti? Sace, āvuso, bhikkhu paccavekkhamāno evaṃ jānāti ‘codito khomhi codakena codakaṃ paṭippharāmī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakaṃ nappaṭippharāmī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਚੋਦਿਤੋ ਚੋਦਕੇਨ ਚੋਦਕਂ ਅਪਸਾਦੇਮੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ ‘ਚੋਦਿਤੋ ਖੋਮ੍ਹਿ ਚੋਦਕੇਨ ਚੋਦਕਂ ਅਪਸਾਦੇਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਚੋਦਕਂ ਨ ਅਪਸਾਦੇਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakaṃ apasādemī’ti? Sace, āvuso, bhikkhu paccavekkhamāno evaṃ jānāti ‘codito khomhi codakena codakaṃ apasādemī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakaṃ na apasādemī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਚੋਦਿਤੋ ਚੋਦਕੇਨ ਚੋਦਕਸ੍ਸ ਪਚ੍ਚਾਰੋਪੇਮੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਚੋਦਕਸ੍ਸ ਪਚ੍ਚਾਰੋਪੇਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਚੋਦਕਸ੍ਸ ਨ ਪਚ੍ਚਾਰੋਪੇਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena codakassa paccāropemī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena codakassa paccāropemī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena codakassa na paccāropemī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਚੋਦਿਤੋ ਚੋਦਕੇਨ ਅਞ੍ਞੇਨਞ੍ਞਂ ਪਟਿਚਰਾਮਿ, ਬਹਿਦ੍ਧਾ ਕਥਂ ਅਪਨਾਮੇਮਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਮੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਅਞ੍ਞੇਨਞ੍ਞਂ ਪਟਿਚਰਾਮਿ, ਬਹਿਦ੍ਧਾ ਕਥਂ ਅਪਨਾਮੇਮਿ, ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਨ ਅਞ੍ਞੇਨਞ੍ਞਂ ਪਟਿਚਰਾਮਿ, ਨ ਬਹਿਦ੍ਧਾ ਕਥਂ ਅਪਨਾਮੇਮਿ, ਨ ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤੁਕਰੋਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena aññenaññaṃ paṭicarāmi, bahiddhā kathaṃ apanāmemi, kopañca dosañca appaccayañca pātukaromī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena aññenaññaṃ paṭicarāmi, bahiddhā kathaṃ apanāmemi, kopañca dosañca appaccayañca pātukaromī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena na aññenaññaṃ paṭicarāmi, na bahiddhā kathaṃ apanāmemi, na kopañca dosañca appaccayañca pātukaromī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਚੋਦਿਤੋ ਚੋਦਕੇਨ ਅਪਦਾਨੇ ਨ ਸਮ੍ਪਾਯਾਮੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਅਪਦਾਨੇ ਨ ਸਮ੍ਪਾਯਾਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਚੋਦਿਤੋ ਖੋਮ੍ਹਿ ਚੋਦਕੇਨ ਅਪਦਾਨੇ ਸਮ੍ਪਾਯਾਮੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi codito codakena apadāne na sampāyāmī’ti? Sace, āvuso, bhikkhu paccavekkhamāno evaṃ jānāti – ‘codito khomhi codakena apadāne na sampāyāmī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘codito khomhi codakena apadāne sampāyāmī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ , ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਮਕ੍ਖੀ ਪਲ਼ਾਸੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਮਕ੍ਖੀ ਖੋਮ੍ਹਿ ਪਲ਼ਾਸੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਮਕ੍ਖੀ ਖੋਮ੍ਹਿ ਅਪਲ਼ਾਸੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ , āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi makkhī paḷāsī’ti? Sace, āvuso, bhikkhu paccavekkhamāno evaṃ jānāti – ‘makkhī khomhi paḷāsī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘amakkhī khomhi apaḷāsī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਇਸ੍ਸੁਕੀ ਮਚ੍ਛਰੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਇਸ੍ਸੁਕੀ ਖੋਮ੍ਹਿ ਮਚ੍ਛਰੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਨਿਸ੍ਸੁਕੀ ਖੋਮ੍ਹਿ ਅਮਚ੍ਛਰੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi issukī maccharī’ti? Sace, āvuso, bhikkhu paccavekkhamāno evaṃ jānāti – ‘issukī khomhi maccharī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘anissukī khomhi amaccharī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਸਠੋ ਮਾਯਾવੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਸਠੋ ਖੋਮ੍ਹਿ ਮਾਯਾવੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਸਠੋ ਖੋਮ੍ਹਿ ਅਮਾਯਾવੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi saṭho māyāvī’ti? Sace, āvuso, bhikkhu paccavekkhamāno evaṃ jānāti – ‘saṭho khomhi māyāvī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘asaṭho khomhi amāyāvī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਥਦ੍ਧੋ ਅਤਿਮਾਨੀ’ਤਿ? ਸਚੇ, ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਥਦ੍ਧੋ ਖੋਮ੍ਹਿ ਅਤਿਮਾਨੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਤ੍ਥਦ੍ਧੋ ਖੋਮ੍ਹਿ ਅਨਤਿਮਾਨੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi thaddho atimānī’ti? Sace, āvuso, bhikkhu paccavekkhamāno evaṃ jānāti – ‘thaddho khomhi atimānī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘atthaddho khomhi anatimānī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਪੁਨ ਚਪਰਂ, ਆવੁਸੋ, ਭਿਕ੍ਖੁਨਾ ਅਤ੍ਤਨਾવ ਅਤ੍ਤਾਨਂ ਏવਂ ਪਚ੍ਚવੇਕ੍ਖਿਤਬ੍ਬਂ – ‘ਕਿਂ ਨੁ ਖੋਮ੍ਹਿ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ’ਤਿ? ਸਚੇ, ਆવੁਸੋ , ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਸਨ੍ਦਿਟ੍ਠਿਪਰਾਮਾਸੀ ਖੋਮ੍ਹਿ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਸਂਯੇવ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਏવਂ ਜਾਨਾਤਿ – ‘ਅਸਨ੍ਦਿਟ੍ਠਿਪਰਾਮਾਸੀ ਖੋਮ੍ਹਿ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ’ਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Puna caparaṃ, āvuso, bhikkhunā attanāva attānaṃ evaṃ paccavekkhitabbaṃ – ‘kiṃ nu khomhi sandiṭṭhiparāmāsī ādhānaggāhī duppaṭinissaggī’ti? Sace, āvuso , bhikkhu paccavekkhamāno evaṃ jānāti – ‘sandiṭṭhiparāmāsī khomhi ādhānaggāhī duppaṭinissaggī’ti, tenāvuso, bhikkhunā tesaṃyeva pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno evaṃ jānāti – ‘asandiṭṭhiparāmāsī khomhi anādhānaggāhī suppaṭinissaggī’ti, tenāvuso, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ਸਚੇ , ਆવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਸਬ੍ਬੇਪਿਮੇ ਪਾਪਕੇ ਅਕੁਸਲੇ ਧਮ੍ਮੇ ਅਪ੍ਪਹੀਨੇ ਅਤ੍ਤਨਿ ਸਮਨੁਪਸ੍ਸਤਿ, ਤੇਨਾવੁਸੋ, ਭਿਕ੍ਖੁਨਾ ਸਬ੍ਬੇਸਂਯੇવ ਇਮੇਸਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਸਬ੍ਬੇਪਿਮੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇ ਅਤ੍ਤਨਿ ਸਮਨੁਪਸ੍ਸਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ, ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੁ।
‘‘Sace , āvuso, bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṃyeva imesaṃ pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṃ, ahorattānusikkhinā kusalesu dhammesu.
‘‘ਸੇਯ੍ਯਥਾਪਿ, ਆવੁਸੋ, ਇਤ੍ਥੀ વਾ ਪੁਰਿਸੋ વਾ, ਦਹਰੋ ਯੁવਾ ਮਣ੍ਡਨਜਾਤਿਕੋ, ਆਦਾਸੇ વਾ ਪਰਿਸੁਦ੍ਧੇ ਪਰਿਯੋਦਾਤੇ, ਅਚ੍ਛੇ વਾ ਉਦਕਪਤ੍ਤੇ, ਸਕਂ ਮੁਖਨਿਮਿਤ੍ਤਂ ਪਚ੍ਚવੇਕ੍ਖਮਾਨੋ, ਸਚੇ ਤਤ੍ਥ ਪਸ੍ਸਤਿ ਰਜਂ વਾ ਅਙ੍ਗਣਂ વਾ, ਤਸ੍ਸੇવ ਰਜਸ੍ਸ વਾ ਅਙ੍ਗਣਸ੍ਸ વਾ ਪਹਾਨਾਯ વਾਯਮਤਿ; ਨੋ ਚੇ ਤਤ੍ਥ ਪਸ੍ਸਤਿ ਰਜਂ વਾ ਅਙ੍ਗਣਂ વਾ, ਤੇਨੇવ ਅਤ੍ਤਮਨੋ ਹੋਤਿ – ‘ਲਾਭਾ વਤ ਮੇ, ਪਰਿਸੁਦ੍ਧਂ વਤ ਮੇ’ਤਿ। ਏવਮੇવ ਖੋ, ਆવੁਸੋ, ਸਚੇ ਭਿਕ੍ਖੁ ਪਚ੍ਚવੇਕ੍ਖਮਾਨੋ ਸਬ੍ਬੇਪਿਮੇ ਪਾਪਕੇ ਅਕੁਸਲੇ ਧਮ੍ਮੇ ਅਪ੍ਪਹੀਨੇ ਅਤ੍ਤਨਿ ਸਮਨੁਪਸ੍ਸਤਿ, ਤੇਨਾવੁਸੋ, ਭਿਕ੍ਖੁਨਾ ਸਬ੍ਬੇਸਂਯੇવ ਇਮੇਸਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ વਾਯਮਿਤਬ੍ਬਂ। ਸਚੇ ਪਨਾવੁਸੋ, ਭਿਕ੍ਖੁ ਪਚ੍ਚવੇਕ੍ਖਮਾਨੋ ਸਬ੍ਬੇਪਿਮੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇ ਅਤ੍ਤਨਿ ਸਮਨੁਪਸ੍ਸਤਿ, ਤੇਨਾવੁਸੋ, ਭਿਕ੍ਖੁਨਾ ਤੇਨੇવ ਪੀਤਿਪਾਮੋਜ੍ਜੇਨ વਿਹਾਤਬ੍ਬਂ, ਅਹੋਰਤ੍ਤਾਨੁਸਿਕ੍ਖਿਨਾ ਕੁਸਲੇਸੁ ਧਮ੍ਮੇਸੂ’’ਤਿ।
‘‘Seyyathāpi, āvuso, itthī vā puriso vā, daharo yuvā maṇḍanajātiko, ādāse vā parisuddhe pariyodāte, acche vā udakapatte, sakaṃ mukhanimittaṃ paccavekkhamāno, sace tattha passati rajaṃ vā aṅgaṇaṃ vā, tasseva rajassa vā aṅgaṇassa vā pahānāya vāyamati; no ce tattha passati rajaṃ vā aṅgaṇaṃ vā, teneva attamano hoti – ‘lābhā vata me, parisuddhaṃ vata me’ti. Evameva kho, āvuso, sace bhikkhu paccavekkhamāno sabbepime pāpake akusale dhamme appahīne attani samanupassati, tenāvuso, bhikkhunā sabbesaṃyeva imesaṃ pāpakānaṃ akusalānaṃ dhammānaṃ pahānāya vāyamitabbaṃ. Sace panāvuso, bhikkhu paccavekkhamāno sabbepime pāpake akusale dhamme pahīne attani samanupassati, tenāvuso, bhikkhunā teneva pītipāmojjena vihātabbaṃ, ahorattānusikkhinā kusalesu dhammesū’’ti.
ਇਦਮવੋਚਾਯਸ੍ਮਾ ਮਹਾਮੋਗ੍ਗਲ੍ਲਾਨੋ। ਅਤ੍ਤਮਨਾ ਤੇ ਭਿਕ੍ਖੂ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਭਾਸਿਤਂ ਅਭਿਨਨ੍ਦੁਨ੍ਤਿ।
Idamavocāyasmā mahāmoggallāno. Attamanā te bhikkhū āyasmato mahāmoggallānassa bhāsitaṃ abhinandunti.
ਅਨੁਮਾਨਸੁਤ੍ਤਂ ਨਿਟ੍ਠਿਤਂ ਪਞ੍ਚਮਂ।
Anumānasuttaṃ niṭṭhitaṃ pañcamaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੫. ਅਨੁਮਾਨਸੁਤ੍ਤવਣ੍ਣਨਾ • 5. Anumānasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੫. ਅਨੁਮਾਨਸੁਤ੍ਤવਣ੍ਣਨਾ • 5. Anumānasuttavaṇṇanā
