| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৫. অনুমানসুত্তৰণ্ণনা
5. Anumānasuttavaṇṇanā
১৮১. এৰং মে সুতন্তি অনুমানসুত্তং। তত্থ ভগ্গেসূতি এৰংনামকে জনপদে, ৰচনত্থো পনেত্থ ৰুত্তানুসারেনেৰ ৰেদিতব্বো। সুসুমারগিরেতি এৰংনামকে নগরে। তস্স কির নগরস্স ৰত্থুপরিগ্গহদিৰসে অৰিদূরে উদকরহদে সুংসুমারো সদ্দমকাসি, গিরং নিচ্ছারেসি। অথ নগরে নিট্ঠিতে সুংসুমারগিরং ত্ৰেৰস্স নামং অকংসু। ভেসকল়াৰনেতি ভেসকল়ানামকে ৰনে। ‘‘ভেসগল়াৰনে’’তিপি পাঠো। মিগদাযেতি তং ৰনং মিগপক্খীনং অভযদিন্নট্ঠানে জাতং, তস্মা মিগদাযোতি ৰুচ্চতি।
181.Evaṃme sutanti anumānasuttaṃ. Tattha bhaggesūti evaṃnāmake janapade, vacanattho panettha vuttānusāreneva veditabbo. Susumāragireti evaṃnāmake nagare. Tassa kira nagarassa vatthupariggahadivase avidūre udakarahade suṃsumāro saddamakāsi, giraṃ nicchāresi. Atha nagare niṭṭhite suṃsumāragiraṃ tvevassa nāmaṃ akaṃsu. Bhesakaḷāvaneti bhesakaḷānāmake vane. ‘‘Bhesagaḷāvane’’tipi pāṭho. Migadāyeti taṃ vanaṃ migapakkhīnaṃ abhayadinnaṭṭhāne jātaṃ, tasmā migadāyoti vuccati.
পৰারেতীতি ইচ্ছাপেতি। ৰদন্তূতি ওৰাদানুসাসনিৰসেন ৰদন্তু, অনুসাসন্তূতি অত্থো। ৰচনীযোম্হীতি অহং তুম্হেহি ৰত্তব্বো, অনুসাসিতব্বো ওৰদিতব্বোতি অত্থো। সো চ হোতি দুব্বচোতি সো চ দুক্খেন ৰত্তব্বো হোতি, ৰুত্তো ন সহতি। দোৰচস্সকরণেহীতি দুব্বচভাৰকারকেহি উপরি আগতেহি সোল়সহি ধম্মেহি। অপ্পদক্খিণগ্গাহী অনুসাসনিন্তি যো হি ৰুচ্চমানো তুম্হে মং কস্মা ৰদথ, অহং অত্তনো কপ্পিযাকপ্পিযং সাৰজ্জানৰজ্জং অত্থানত্থং জানামীতি ৰদতি। অযং অনুসাসনিং পদক্খিণতো ন গণ্হাতি, ৰামতো গণ্হাতি, তস্মা অপ্পদক্খিণগ্গাহীতি ৰুচ্চতি।
Pavāretīti icchāpeti. Vadantūti ovādānusāsanivasena vadantu, anusāsantūti attho. Vacanīyomhīti ahaṃ tumhehi vattabbo, anusāsitabbo ovaditabboti attho. So ca hoti dubbacoti so ca dukkhena vattabbo hoti, vutto na sahati. Dovacassakaraṇehīti dubbacabhāvakārakehi upari āgatehi soḷasahi dhammehi. Appadakkhiṇaggāhī anusāsaninti yo hi vuccamāno tumhe maṃ kasmā vadatha, ahaṃ attano kappiyākappiyaṃ sāvajjānavajjaṃ atthānatthaṃ jānāmīti vadati. Ayaṃ anusāsaniṃ padakkhiṇato na gaṇhāti, vāmato gaṇhāti, tasmā appadakkhiṇaggāhīti vuccati.
পাপিকানং ইচ্ছানন্তি লামকানং অসন্তসম্ভৰনপত্থনানং। পটিপ্ফরতীতি পটিৰিরুদ্ধো, পচ্চনীকো হুত্ৰা তিট্ঠতি, অপসাদেতীতি কিং নু খো তুয্হং বালস্স অব্যত্তস্স ভণিতেন, ত্ৰম্পি নাম ভণিতব্বং মঞ্ঞিস্সসীতি এৰং ঘট্টেতি। পচ্চারোপেতীতি, ত্ৰম্পি খোসি ইত্থন্নামং আপত্তিং আপন্নো, তং তাৰ পটিকরোহীতি এৰং পটিআরোপেতি।
Pāpikānaṃ icchānanti lāmakānaṃ asantasambhavanapatthanānaṃ. Paṭippharatīti paṭiviruddho, paccanīko hutvā tiṭṭhati, apasādetīti kiṃ nu kho tuyhaṃ bālassa abyattassa bhaṇitena, tvampi nāma bhaṇitabbaṃ maññissasīti evaṃ ghaṭṭeti. Paccāropetīti, tvampi khosi itthannāmaṃ āpattiṃ āpanno, taṃ tāva paṭikarohīti evaṃ paṭiāropeti.
অঞ্ঞেনঞ্ঞং পটিচরতীতি অঞ্ঞেন কারণেন ৰচনেন ৰা অঞ্ঞং কারণং ৰচনং ৰা পটিচ্ছাদেতি। ‘‘আপত্তিং আপন্নোসী’’তি ৰুত্তে ‘‘কো আপন্নো, কিং আপন্নো, কিস্মিং আপন্নো, কং ভণথ, কিং ভণথা’’তি ৰা ৰদতি। ‘‘এৰরূপং কিঞ্চি তযা দিট্ঠ’’ন্তি ৰুত্তে ‘‘ন সুণামী’’তি সোতং ৰা উপনেতি। বহিদ্ধা কথং অপনামেতীতি ‘‘ইত্থন্নামং আপত্তিং আপন্নোসী’’তি পুট্ঠো ‘‘পাটলিপুত্তং গতোম্হী’’তি ৰত্ৰা পুন ‘‘ন তৰ পাটলিপুত্তগমনং পুচ্ছাম, আপত্তিং পুচ্ছামা’’তি ৰুত্তে ‘‘ততো রাজগেহং গতোম্হী’’তি, রাজগেহং ৰা যাহি ব্রাহ্মণগেহং ৰা, আপত্তিং আপন্নোসীতি। তত্থ মে সূকরমংসং লদ্ধন্তিআদীনি ৰদন্তো কথং বহিদ্ধা ৰিক্খিপতি।
Aññenaññaṃ paṭicaratīti aññena kāraṇena vacanena vā aññaṃ kāraṇaṃ vacanaṃ vā paṭicchādeti. ‘‘Āpattiṃ āpannosī’’ti vutte ‘‘ko āpanno, kiṃ āpanno, kismiṃ āpanno, kaṃ bhaṇatha, kiṃ bhaṇathā’’ti vā vadati. ‘‘Evarūpaṃ kiñci tayā diṭṭha’’nti vutte ‘‘na suṇāmī’’ti sotaṃ vā upaneti. Bahiddhā kathaṃ apanāmetīti ‘‘itthannāmaṃ āpattiṃ āpannosī’’ti puṭṭho ‘‘pāṭaliputtaṃ gatomhī’’ti vatvā puna ‘‘na tava pāṭaliputtagamanaṃ pucchāma, āpattiṃ pucchāmā’’ti vutte ‘‘tato rājagehaṃ gatomhī’’ti, rājagehaṃ vā yāhi brāhmaṇagehaṃ vā, āpattiṃ āpannosīti. Tattha me sūkaramaṃsaṃ laddhantiādīni vadanto kathaṃ bahiddhā vikkhipati.
অপদানেতি অত্তনো চরিযায। ন সম্পাযতীতি, আৰুসো, ত্ৰং কুহিং ৰসসি, কং নিস্সায ৰসসীতি ৰা, যং ত্ৰং ৰদেসি ‘‘মযা এস আপত্তিং আপজ্জন্নো দিট্ঠো’’তি। ত্ৰং তস্মিং সমযে কিং করোসি, অযং কিং করোতি, কত্থ ৰা ত্ৰং অচ্ছসি কত্থ ৰা অযন্তিআদিনা নযেন চরিযং পুট্ঠো সম্পাদেত্ৰা কথেতুং ন সক্কোতি।
Apadāneti attano cariyāya. Na sampāyatīti, āvuso, tvaṃ kuhiṃ vasasi, kaṃ nissāya vasasīti vā, yaṃ tvaṃ vadesi ‘‘mayā esa āpattiṃ āpajjanno diṭṭho’’ti. Tvaṃ tasmiṃ samaye kiṃ karosi, ayaṃ kiṃ karoti, kattha vā tvaṃ acchasi kattha vā ayantiādinā nayena cariyaṃ puṭṭho sampādetvā kathetuṃ na sakkoti.
১৮৩. তত্রাৰুসোতি , আৰুসো, তেসু সোল়সসু ধম্মেসু। অত্তনাৰ অত্তানং এৰং অনুমিনিতব্বন্তি এৰং অত্তনাৰ অত্তা অনুমেতব্বো তুলেতব্বো তীরেতব্বো।
183.Tatrāvusoti , āvuso, tesu soḷasasu dhammesu. Attanāva attānaṃ evaṃ anuminitabbanti evaṃ attanāva attā anumetabbo tuletabbo tīretabbo.
১৮৪. পচ্চৰেক্খিতব্বন্তি পচ্চৰেক্খিতব্বো। অহোরত্তানুসিক্খিনাতি দিৰাপি রত্তিম্পি সিক্খন্তেন, রতিঞ্চ দিৰা চ কুসলেসু ধম্মেসু সিক্খন্তেন পীতিপামোজ্জমেৰ উপ্পাদেতব্বন্তি অত্থো।
184.Paccavekkhitabbanti paccavekkhitabbo. Ahorattānusikkhināti divāpi rattimpi sikkhantena, ratiñca divā ca kusalesu dhammesu sikkhantena pītipāmojjameva uppādetabbanti attho.
অচ্ছে ৰা উদকপত্তেতি পসন্নে ৰা উদকভাজনে। মুখনিমিত্তন্তি মুখপটিবিম্বং। রজন্তি আগন্তুকরজং। অঙ্গণন্তি তত্থ জাতকং তিলকং ৰা পিল়কং ৰা। সব্বেপিমে পাপকে অকুসলে ধম্মে পহীনেতি ইমিনা সব্বপ্পহানং কথেসি। কথং? এত্তকা অকুসলা ধম্মা পব্বজিতস্স নানুচ্ছৰিকাতি পটিসঙ্খানং উপ্পাদযতো হি পটিসঙ্খানপ্পহানংকথিতং হোতি। সীলং পদট্ঠানং কত্ৰা কসিণপরিকম্মং আরভিত্ৰা অট্ঠ সমাপত্তিযো নিব্বত্তেন্তস্স ৰিক্খম্ভনপ্পহানং কথিতং। সমাপত্তিং পদট্ঠানং কত্ৰা ৰিপস্সনং ৰড্ঢেন্তস্স তদঙ্গপ্পহানং কথিতং। ৰিপস্সনং ৰড্ঢেত্ৰা মগ্গং ভাৰেন্তস্স সমুচ্ছেদপ্পহানং কথিতং। ফলে আগতে পটিপ্পস্সদ্ধিপ্পহানং, নিব্বানে আগতে নিস্সরণপ্পহানন্তি এৰং ইমস্মিং সুত্তে সব্বপ্পহানং কথিতংৰ হোতি।
Acche vā udakapatteti pasanne vā udakabhājane. Mukhanimittanti mukhapaṭibimbaṃ. Rajanti āgantukarajaṃ. Aṅgaṇanti tattha jātakaṃ tilakaṃ vā piḷakaṃ vā. Sabbepime pāpake akusale dhamme pahīneti iminā sabbappahānaṃ kathesi. Kathaṃ? Ettakā akusalā dhammā pabbajitassa nānucchavikāti paṭisaṅkhānaṃ uppādayato hi paṭisaṅkhānappahānaṃkathitaṃ hoti. Sīlaṃ padaṭṭhānaṃ katvā kasiṇaparikammaṃ ārabhitvā aṭṭha samāpattiyo nibbattentassa vikkhambhanappahānaṃ kathitaṃ. Samāpattiṃ padaṭṭhānaṃ katvā vipassanaṃ vaḍḍhentassa tadaṅgappahānaṃ kathitaṃ. Vipassanaṃ vaḍḍhetvā maggaṃ bhāventassa samucchedappahānaṃ kathitaṃ. Phale āgate paṭippassaddhippahānaṃ, nibbāne āgate nissaraṇappahānanti evaṃ imasmiṃ sutte sabbappahānaṃ kathitaṃva hoti.
ইদঞ্হি সুত্তং ভিক্খুপাতিমোক্খং নামাতি পোরাণা ৰদন্তি। ইদং দিৰসস্স তিক্খত্তুং পচ্চৰেক্খিতব্বং। পাতো এৰ ৰসনট্ঠানং পৰিসিত্ৰা নিসিন্নেন ‘‘ইমে এত্তকা কিলেসা অত্থি নু খো ময্হং নত্থী’’তি পচ্চৰেক্খিতব্বা। সচে অত্থীতি পস্সতি, তেসং পহানায ৰাযমিতব্বং। নো চে পস্সতি, সুপব্বজিতোস্মীতি অত্তমনেন ভৰিতব্বং। ভত্তকিচ্চং কত্ৰা রত্তিট্ঠানে ৰা দিৰাট্ঠানে ৰা নিসীদিত্ৰাপি পচ্চৰেক্খিতব্বং। সাযং ৰসনট্ঠানে নিসীদিত্ৰাপি পচ্চৰেক্খিতব্বং। তিক্খত্তুং অসক্কোন্তেন দ্ৰে ৰারে পচ্চৰেক্খিতব্বং। দ্ৰে ৰারে অসক্কোন্তেন পন অৰস্সং একৰারং পচ্চৰেক্খিতব্বং, অপ্পচ্চৰেক্খিতুং ন ৰট্টতীতি ৰদন্তি। সেসং সব্বত্থ উত্তানত্থমেৰাতি।
Idañhi suttaṃ bhikkhupātimokkhaṃ nāmāti porāṇā vadanti. Idaṃ divasassa tikkhattuṃ paccavekkhitabbaṃ. Pāto eva vasanaṭṭhānaṃ pavisitvā nisinnena ‘‘ime ettakā kilesā atthi nu kho mayhaṃ natthī’’ti paccavekkhitabbā. Sace atthīti passati, tesaṃ pahānāya vāyamitabbaṃ. No ce passati, supabbajitosmīti attamanena bhavitabbaṃ. Bhattakiccaṃ katvā rattiṭṭhāne vā divāṭṭhāne vā nisīditvāpi paccavekkhitabbaṃ. Sāyaṃ vasanaṭṭhāne nisīditvāpi paccavekkhitabbaṃ. Tikkhattuṃ asakkontena dve vāre paccavekkhitabbaṃ. Dve vāre asakkontena pana avassaṃ ekavāraṃ paccavekkhitabbaṃ, appaccavekkhituṃ na vaṭṭatīti vadanti. Sesaṃ sabbattha uttānatthamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
অনুমানসুত্তৰণ্ণনা নিট্ঠিতা।
Anumānasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৫. অনুমানসুত্তং • 5. Anumānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৫. অনুমানসুত্তৰণ্ণনা • 5. Anumānasuttavaṇṇanā
