| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༥. ཨནུམཱནསུཏྟཝཎྞནཱ
5. Anumānasuttavaṇṇanā
༡༨༡. ཨེཝཾ མེ སུཏནྟི ཨནུམཱནསུཏྟཾ། ཏཏྠ བྷགྒེསཱུཏི ཨེཝཾནཱམཀེ ཛནཔདེ, ཝཙནཏྠོ པནེཏྠ ཝུཏྟཱནུསཱརེནེཝ ཝེདིཏབྦོ། སུསུམཱརགིརེཏི ཨེཝཾནཱམཀེ ནགརེ། ཏསྶ ཀིར ནགརསྶ ཝཏྠུཔརིགྒཧདིཝསེ ཨཝིདཱུརེ ཨུདཀརཧདེ སུཾསུམཱརོ སདྡམཀཱསི, གིརཾ ནིཙྪཱརེསི། ཨཐ ནགརེ ནིཊྛིཏེ སུཾསུམཱརགིརཾ ཏྭེཝསྶ ནཱམཾ ཨཀཾསུ། བྷེསཀལཱ༹ཝནེཏི བྷེསཀལཱ༹ནཱམཀེ ཝནེ། ‘‘བྷེསགལཱ༹ཝནེ’’ཏིཔི པཱཋོ། མིགདཱཡེཏི ཏཾ ཝནཾ མིགཔཀྑཱིནཾ ཨབྷཡདིནྣཊྛཱནེ ཛཱཏཾ, ཏསྨཱ མིགདཱཡོཏི ཝུཙྩཏི།
181.Evaṃme sutanti anumānasuttaṃ. Tattha bhaggesūti evaṃnāmake janapade, vacanattho panettha vuttānusāreneva veditabbo. Susumāragireti evaṃnāmake nagare. Tassa kira nagarassa vatthupariggahadivase avidūre udakarahade suṃsumāro saddamakāsi, giraṃ nicchāresi. Atha nagare niṭṭhite suṃsumāragiraṃ tvevassa nāmaṃ akaṃsu. Bhesakaḷāvaneti bhesakaḷānāmake vane. ‘‘Bhesagaḷāvane’’tipi pāṭho. Migadāyeti taṃ vanaṃ migapakkhīnaṃ abhayadinnaṭṭhāne jātaṃ, tasmā migadāyoti vuccati.
པཝཱརེཏཱིཏི ཨིཙྪཱཔེཏི། ཝདནྟཱུཏི ཨོཝཱདཱནུསཱསནིཝསེན ཝདནྟུ, ཨནུསཱསནྟཱུཏི ཨཏྠོ། ཝཙནཱིཡོམྷཱིཏི ཨཧཾ ཏུམྷེཧི ཝཏྟབྦོ, ཨནུསཱསིཏབྦོ ཨོཝདིཏབྦོཏི ཨཏྠོ། སོ ཙ ཧོཏི དུབྦཙོཏི སོ ཙ དུཀྑེན ཝཏྟབྦོ ཧོཏི, ཝུཏྟོ ན སཧཏི། དོཝཙསྶཀརཎེཧཱིཏི དུབྦཙབྷཱཝཀཱརཀེཧི ཨུཔརི ཨཱགཏེཧི སོལ༹སཧི དྷམྨེཧི། ཨཔྤདཀྑིཎགྒཱཧཱི ཨནུསཱསནིནྟི ཡོ ཧི ཝུཙྩམཱནོ ཏུམྷེ མཾ ཀསྨཱ ཝདཐ, ཨཧཾ ཨཏྟནོ ཀཔྤིཡཱཀཔྤིཡཾ སཱཝཛྫཱནཝཛྫཾ ཨཏྠཱནཏྠཾ ཛཱནཱམཱིཏི ཝདཏི། ཨཡཾ ཨནུསཱསནིཾ པདཀྑིཎཏོ ན གཎྷཱཏི, ཝཱམཏོ གཎྷཱཏི, ཏསྨཱ ཨཔྤདཀྑིཎགྒཱཧཱིཏི ཝུཙྩཏི།
Pavāretīti icchāpeti. Vadantūti ovādānusāsanivasena vadantu, anusāsantūti attho. Vacanīyomhīti ahaṃ tumhehi vattabbo, anusāsitabbo ovaditabboti attho. So ca hoti dubbacoti so ca dukkhena vattabbo hoti, vutto na sahati. Dovacassakaraṇehīti dubbacabhāvakārakehi upari āgatehi soḷasahi dhammehi. Appadakkhiṇaggāhī anusāsaninti yo hi vuccamāno tumhe maṃ kasmā vadatha, ahaṃ attano kappiyākappiyaṃ sāvajjānavajjaṃ atthānatthaṃ jānāmīti vadati. Ayaṃ anusāsaniṃ padakkhiṇato na gaṇhāti, vāmato gaṇhāti, tasmā appadakkhiṇaggāhīti vuccati.
པཱཔིཀཱནཾ ཨིཙྪཱནནྟི ལཱམཀཱནཾ ཨསནྟསམྦྷཝནཔཏྠནཱནཾ། པཊིཔྥརཏཱིཏི པཊིཝིརུདྡྷོ, པཙྩནཱིཀོ ཧུཏྭཱ ཏིཊྛཏི, ཨཔསཱདེཏཱིཏི ཀིཾ ནུ ཁོ ཏུཡ྄ཧཾ བཱལསྶ ཨབྱཏྟསྶ བྷཎིཏེན, ཏྭམྤི ནཱམ བྷཎིཏབྦཾ མཉྙིསྶསཱིཏི ཨེཝཾ གྷཊྚེཏི། པཙྩཱརོཔེཏཱིཏི, ཏྭམྤི ཁོསི ཨིཏྠནྣཱམཾ ཨཱཔཏྟིཾ ཨཱཔནྣོ, ཏཾ ཏཱཝ པཊིཀརོཧཱིཏི ཨེཝཾ པཊིཨཱརོཔེཏི།
Pāpikānaṃ icchānanti lāmakānaṃ asantasambhavanapatthanānaṃ. Paṭippharatīti paṭiviruddho, paccanīko hutvā tiṭṭhati, apasādetīti kiṃ nu kho tuyhaṃ bālassa abyattassa bhaṇitena, tvampi nāma bhaṇitabbaṃ maññissasīti evaṃ ghaṭṭeti. Paccāropetīti, tvampi khosi itthannāmaṃ āpattiṃ āpanno, taṃ tāva paṭikarohīti evaṃ paṭiāropeti.
ཨཉྙེནཉྙཾ པཊིཙརཏཱིཏི ཨཉྙེན ཀཱརཎེན ཝཙནེན ཝཱ ཨཉྙཾ ཀཱརཎཾ ཝཙནཾ ཝཱ པཊིཙྪཱདེཏི། ‘‘ཨཱཔཏྟིཾ ཨཱཔནྣོསཱི’’ཏི ཝུཏྟེ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི ཝཱ ཝདཏི། ‘‘ཨེཝརཱུཔཾ ཀིཉྩི ཏཡཱ དིཊྛ’’ནྟི ཝུཏྟེ ‘‘ན སུཎཱམཱི’’ཏི སོཏཾ ཝཱ ཨུཔནེཏི། བཧིདྡྷཱ ཀཐཾ ཨཔནཱམེཏཱིཏི ‘‘ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི པུཊྛོ ‘‘པཱཊལིཔུཏྟཾ གཏོམྷཱི’’ཏི ཝཏྭཱ པུན ‘‘ན ཏཝ པཱཊལིཔུཏྟགམནཾ པུཙྪཱམ, ཨཱཔཏྟིཾ པུཙྪཱམཱ’’ཏི ཝུཏྟེ ‘‘ཏཏོ རཱཛགེཧཾ གཏོམྷཱི’’ཏི, རཱཛགེཧཾ ཝཱ ཡཱཧི བྲཱཧྨཎགེཧཾ ཝཱ, ཨཱཔཏྟིཾ ཨཱཔནྣོསཱིཏི། ཏཏྠ མེ སཱུཀརམཾསཾ ལདྡྷནྟིཨཱདཱིནི ཝདནྟོ ཀཐཾ བཧིདྡྷཱ ཝིཀྑིཔཏི།
Aññenaññaṃ paṭicaratīti aññena kāraṇena vacanena vā aññaṃ kāraṇaṃ vacanaṃ vā paṭicchādeti. ‘‘Āpattiṃ āpannosī’’ti vutte ‘‘ko āpanno, kiṃ āpanno, kismiṃ āpanno, kaṃ bhaṇatha, kiṃ bhaṇathā’’ti vā vadati. ‘‘Evarūpaṃ kiñci tayā diṭṭha’’nti vutte ‘‘na suṇāmī’’ti sotaṃ vā upaneti. Bahiddhā kathaṃ apanāmetīti ‘‘itthannāmaṃ āpattiṃ āpannosī’’ti puṭṭho ‘‘pāṭaliputtaṃ gatomhī’’ti vatvā puna ‘‘na tava pāṭaliputtagamanaṃ pucchāma, āpattiṃ pucchāmā’’ti vutte ‘‘tato rājagehaṃ gatomhī’’ti, rājagehaṃ vā yāhi brāhmaṇagehaṃ vā, āpattiṃ āpannosīti. Tattha me sūkaramaṃsaṃ laddhantiādīni vadanto kathaṃ bahiddhā vikkhipati.
ཨཔདཱནེཏི ཨཏྟནོ ཙརིཡཱཡ། ན སམྤཱཡཏཱིཏི, ཨཱཝུསོ, ཏྭཾ ཀུཧིཾ ཝསསི, ཀཾ ནིསྶཱཡ ཝསསཱིཏི ཝཱ, ཡཾ ཏྭཾ ཝདེསི ‘‘མཡཱ ཨེས ཨཱཔཏྟིཾ ཨཱཔཛྫནྣོ དིཊྛོ’’ཏི། ཏྭཾ ཏསྨིཾ སམཡེ ཀིཾ ཀརོསི, ཨཡཾ ཀིཾ ཀརོཏི, ཀཏྠ ཝཱ ཏྭཾ ཨཙྪསི ཀཏྠ ཝཱ ཨཡནྟིཨཱདིནཱ ནཡེན ཙརིཡཾ པུཊྛོ སམྤཱདེཏྭཱ ཀཐེཏུཾ ན སཀྐོཏི།
Apadāneti attano cariyāya. Na sampāyatīti, āvuso, tvaṃ kuhiṃ vasasi, kaṃ nissāya vasasīti vā, yaṃ tvaṃ vadesi ‘‘mayā esa āpattiṃ āpajjanno diṭṭho’’ti. Tvaṃ tasmiṃ samaye kiṃ karosi, ayaṃ kiṃ karoti, kattha vā tvaṃ acchasi kattha vā ayantiādinā nayena cariyaṃ puṭṭho sampādetvā kathetuṃ na sakkoti.
༡༨༣. ཏཏྲཱཝུསོཏི , ཨཱཝུསོ, ཏེསུ སོལ༹སསུ དྷམྨེསུ། ཨཏྟནཱཝ ཨཏྟཱནཾ ཨེཝཾ ཨནུམིནིཏབྦནྟི ཨེཝཾ ཨཏྟནཱཝ ཨཏྟཱ ཨནུམེཏབྦོ ཏུལེཏབྦོ ཏཱིརེཏབྦོ།
183.Tatrāvusoti , āvuso, tesu soḷasasu dhammesu. Attanāva attānaṃ evaṃ anuminitabbanti evaṃ attanāva attā anumetabbo tuletabbo tīretabbo.
༡༨༤. པཙྩཝེཀྑིཏབྦནྟི པཙྩཝེཀྑིཏབྦོ། ཨཧོརཏྟཱནུསིཀྑིནཱཏི དིཝཱཔི རཏྟིམྤི སིཀྑནྟེན, རཏིཉྩ དིཝཱ ཙ ཀུསལེསུ དྷམྨེསུ སིཀྑནྟེན པཱིཏིཔཱམོཛྫམེཝ ཨུཔྤཱདེཏབྦནྟི ཨཏྠོ།
184.Paccavekkhitabbanti paccavekkhitabbo. Ahorattānusikkhināti divāpi rattimpi sikkhantena, ratiñca divā ca kusalesu dhammesu sikkhantena pītipāmojjameva uppādetabbanti attho.
ཨཙྪེ ཝཱ ཨུདཀཔཏྟེཏི པསནྣེ ཝཱ ཨུདཀབྷཱཛནེ། མུཁནིམིཏྟནྟི མུཁཔཊིབིམྦཾ། རཛནྟི ཨཱགནྟུཀརཛཾ། ཨངྒཎནྟི ཏཏྠ ཛཱཏཀཾ ཏིལཀཾ ཝཱ པིལ༹ཀཾ ཝཱ། སབྦེཔིམེ པཱཔཀེ ཨཀུསལེ དྷམྨེ པཧཱིནེཏི ཨིམིནཱ སབྦཔྤཧཱནཾ ཀཐེསི། ཀཐཾ? ཨེཏྟཀཱ ཨཀུསལཱ དྷམྨཱ པབྦཛིཏསྶ ནཱནུཙྪཝིཀཱཏི པཊིསངྑཱནཾ ཨུཔྤཱདཡཏོ ཧི པཊིསངྑཱནཔྤཧཱནཾཀཐིཏཾ ཧོཏི། སཱིལཾ པདཊྛཱནཾ ཀཏྭཱ ཀསིཎཔརིཀམྨཾ ཨཱརབྷིཏྭཱ ཨཊྛ སམཱཔཏྟིཡོ ནིབྦཏྟེནྟསྶ ཝིཀྑམྦྷནཔྤཧཱནཾ ཀཐིཏཾ། སམཱཔཏྟིཾ པདཊྛཱནཾ ཀཏྭཱ ཝིཔསྶནཾ ཝཌྜྷེནྟསྶ ཏདངྒཔྤཧཱནཾ ཀཐིཏཾ། ཝིཔསྶནཾ ཝཌྜྷེཏྭཱ མགྒཾ བྷཱཝེནྟསྶ སམུཙྪེདཔྤཧཱནཾ ཀཐིཏཾ། ཕལེ ཨཱགཏེ པཊིཔྤསྶདྡྷིཔྤཧཱནཾ, ནིབྦཱནེ ཨཱགཏེ ནིསྶརཎཔྤཧཱནནྟི ཨེཝཾ ཨིམསྨིཾ སུཏྟེ སབྦཔྤཧཱནཾ ཀཐིཏཾཝ ཧོཏི།
Acche vā udakapatteti pasanne vā udakabhājane. Mukhanimittanti mukhapaṭibimbaṃ. Rajanti āgantukarajaṃ. Aṅgaṇanti tattha jātakaṃ tilakaṃ vā piḷakaṃ vā. Sabbepime pāpake akusale dhamme pahīneti iminā sabbappahānaṃ kathesi. Kathaṃ? Ettakā akusalā dhammā pabbajitassa nānucchavikāti paṭisaṅkhānaṃ uppādayato hi paṭisaṅkhānappahānaṃkathitaṃ hoti. Sīlaṃ padaṭṭhānaṃ katvā kasiṇaparikammaṃ ārabhitvā aṭṭha samāpattiyo nibbattentassa vikkhambhanappahānaṃ kathitaṃ. Samāpattiṃ padaṭṭhānaṃ katvā vipassanaṃ vaḍḍhentassa tadaṅgappahānaṃ kathitaṃ. Vipassanaṃ vaḍḍhetvā maggaṃ bhāventassa samucchedappahānaṃ kathitaṃ. Phale āgate paṭippassaddhippahānaṃ, nibbāne āgate nissaraṇappahānanti evaṃ imasmiṃ sutte sabbappahānaṃ kathitaṃva hoti.
ཨིདཉྷི སུཏྟཾ བྷིཀྑུཔཱཏིམོཀྑཾ ནཱམཱཏི པོརཱཎཱ ཝདནྟི། ཨིདཾ དིཝསསྶ ཏིཀྑཏྟུཾ པཙྩཝེཀྑིཏབྦཾ། པཱཏོ ཨེཝ ཝསནཊྛཱནཾ པཝིསིཏྭཱ ནིསིནྣེན ‘‘ཨིམེ ཨེཏྟཀཱ ཀིལེསཱ ཨཏྠི ནུ ཁོ མཡ྄ཧཾ ནཏྠཱི’’ཏི པཙྩཝེཀྑིཏབྦཱ། སཙེ ཨཏྠཱིཏི པསྶཏི, ཏེསཾ པཧཱནཱཡ ཝཱཡམིཏབྦཾ། ནོ ཙེ པསྶཏི, སུཔབྦཛིཏོསྨཱིཏི ཨཏྟམནེན བྷཝིཏབྦཾ། བྷཏྟཀིཙྩཾ ཀཏྭཱ རཏྟིཊྛཱནེ ཝཱ དིཝཱཊྛཱནེ ཝཱ ནིསཱིདིཏྭཱཔི པཙྩཝེཀྑིཏབྦཾ། སཱཡཾ ཝསནཊྛཱནེ ནིསཱིདིཏྭཱཔི པཙྩཝེཀྑིཏབྦཾ། ཏིཀྑཏྟུཾ ཨསཀྐོནྟེན དྭེ ཝཱརེ པཙྩཝེཀྑིཏབྦཾ། དྭེ ཝཱརེ ཨསཀྐོནྟེན པན ཨཝསྶཾ ཨེཀཝཱརཾ པཙྩཝེཀྑིཏབྦཾ, ཨཔྤཙྩཝེཀྑིཏུཾ ན ཝཊྚཏཱིཏི ཝདནྟི། སེསཾ སབྦཏྠ ཨུཏྟཱནཏྠམེཝཱཏི།
Idañhi suttaṃ bhikkhupātimokkhaṃ nāmāti porāṇā vadanti. Idaṃ divasassa tikkhattuṃ paccavekkhitabbaṃ. Pāto eva vasanaṭṭhānaṃ pavisitvā nisinnena ‘‘ime ettakā kilesā atthi nu kho mayhaṃ natthī’’ti paccavekkhitabbā. Sace atthīti passati, tesaṃ pahānāya vāyamitabbaṃ. No ce passati, supabbajitosmīti attamanena bhavitabbaṃ. Bhattakiccaṃ katvā rattiṭṭhāne vā divāṭṭhāne vā nisīditvāpi paccavekkhitabbaṃ. Sāyaṃ vasanaṭṭhāne nisīditvāpi paccavekkhitabbaṃ. Tikkhattuṃ asakkontena dve vāre paccavekkhitabbaṃ. Dve vāre asakkontena pana avassaṃ ekavāraṃ paccavekkhitabbaṃ, appaccavekkhituṃ na vaṭṭatīti vadanti. Sesaṃ sabbattha uttānatthamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཨནུམཱནསུཏྟཝཎྞནཱ ནིཊྛིཏཱ།
Anumānasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༥. ཨནུམཱནསུཏྟཾ • 5. Anumānasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༥. ཨནུམཱནསུཏྟཝཎྞནཱ • 5. Anumānasuttavaṇṇanā
