| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
அனுமோத³னவத்தகதா²
Anumodanavattakathā
362. அனுமோத³னவத்து²ஸ்மிங் இத்³த⁴ங் அஹோஸீதி ஸம்பன்னங் அஹோஸி. சதூஹி பஞ்சஹீதி ஸங்க⁴த்தே²ரேன அனுமோத³னத்தா²ய நிஸின்னே ஹெட்டா² படிபாடியா சதூஹி நிஸீதி³தப்³ப³ங். அனுதே²ரே நிஸின்னே மஹாதே²ரேன ச ஹெட்டா² ச தீஹி நிஸீதி³தப்³ப³ங். பஞ்சமே நிஸின்னே உபரி சதூஹி நிஸீதி³தப்³ப³ங். ஸங்க⁴த்தே²ரேன ஹெட்டா² த³ஹரபி⁴க்கு²ஸ்மிங் அஜ்ஜி²ட்டே²பி ஸங்க⁴த்தே²ரதோ பட்டா²ய சதூஹி நிஸீதி³தப்³ப³மேவ. ஸசே பன அனுமோத³கோ பி⁴க்கு² ‘‘க³ச்ச²த² ப⁴ந்தே, ஆக³மேதப்³ப³கிச்சங் நத்தீ²’’தி வத³தி, க³ந்துங் வட்டதி. மஹாதே²ரேன ‘‘க³ச்சா²ம ஆவுஸோ’’தி வுத்தே ‘‘க³ச்ச²தா²’’தி வத³தி, ஏவம்பி வட்டதி. ‘‘ப³ஹிகா³மே ஆக³மெஸ்ஸாமா’’தி ஆபோ⁴க³ங் கத்வாபி ப³ஹிகா³மங் க³ந்த்வா அத்தனோ நிஸ்ஸிதகே ‘‘தும்ஹே தஸ்ஸ ஆக³மனங் ஆக³மேதா²’’தி வத்வாபி க³ந்துங் வட்டதியேவ. ஸசே பன மனுஸ்ஸா அத்தனோ ருசிகேன ஏகேன அனுமோத³னங் காரெந்தி, நேவ தஸ்ஸ அனுமோத³தோ ஆபத்தி, ந மஹாதே²ரஸ்ஸ பா⁴ரோ ஹோதி. உபனிஸின்னகதா²யமேவ ஹி மனுஸ்ஸேஸு கதா²பெந்தேஸு மஹாதே²ரோ ஆபுச்சி²தப்³போ³, மஹாதே²ரேன ச அனுமோத³னாய அஜ்ஜி²ட்டோ²வ ஆக³மேதப்³போ³தி இத³மெத்த² லக்க²ணங். வச்சிதோதி ஸஞ்ஜாதவச்சோ; வச்சபீளிதோதி அதி⁴ப்பாயோ.
362. Anumodanavatthusmiṃ iddhaṃ ahosīti sampannaṃ ahosi. Catūhi pañcahīti saṅghattherena anumodanatthāya nisinne heṭṭhā paṭipāṭiyā catūhi nisīditabbaṃ. Anuthere nisinne mahātherena ca heṭṭhā ca tīhi nisīditabbaṃ. Pañcame nisinne upari catūhi nisīditabbaṃ. Saṅghattherena heṭṭhā daharabhikkhusmiṃ ajjhiṭṭhepi saṅghattherato paṭṭhāya catūhi nisīditabbameva. Sace pana anumodako bhikkhu ‘‘gacchatha bhante, āgametabbakiccaṃ natthī’’ti vadati, gantuṃ vaṭṭati. Mahātherena ‘‘gacchāma āvuso’’ti vutte ‘‘gacchathā’’ti vadati, evampi vaṭṭati. ‘‘Bahigāme āgamessāmā’’ti ābhogaṃ katvāpi bahigāmaṃ gantvā attano nissitake ‘‘tumhe tassa āgamanaṃ āgamethā’’ti vatvāpi gantuṃ vaṭṭatiyeva. Sace pana manussā attano rucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo, mahātherena ca anumodanāya ajjhiṭṭhova āgametabboti idamettha lakkhaṇaṃ. Vaccitoti sañjātavacco; vaccapīḷitoti adhippāyo.
அனுமோத³னவத்தகதா² நிட்டி²தா.
Anumodanavattakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 4. அனுமோத³னவத்தகதா² • 4. Anumodanavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அனுமோத³னவத்தகதா²வண்ணனா • Anumodanavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுமோத³னவத்தகதா²வண்ணனா • Anumodanavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அனுமோத³னவத்தகதா²வண்ணனா • Anumodanavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. அனுமோத³னவத்தகதா² • 4. Anumodanavattakathā
