| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၄. အနုမောဒနဝတ္တကထာ
4. Anumodanavattakathā
၃၆၂. ဣဒ္ဓံ အဟောသီတိ ဧတ္ထ ဣဓဓာတုယာ ဝဍ္ဎနတ္ထံ ပဋိက္ခိပန္တော အာဟ ‘‘သမ္ပန္နံ အဟောသီ’’တိ။ သင္ဃတ္ထေရေ နိသိန္နေတိ သမ္ဗန္ဓော။ အနုထေရေ အနုမောဒနတ္ထာယ နိသိန္နေတိ ယောဇနာ။ သင္ဃတ္ထေရေန အဇ္ဈိဋ္ဌေပီတိ သမ္ဗန္ဓော။ အနုမောဒကော ဝဒတီတိ သမ္ဗန္ဓော။ အနု ပုနပ္ပုနံ, ပစ္ဆာ ဝာ ဒာယကေ ဓမ္မကထာယ မောဒေတီတိ အနုမောဒကော။ ‘‘ဂစ္ဆထာ’’တိ သစေ ဝဒတိ အနုမောဒကောတိ ယောဇနာ။ တသ္သာတိ အနုမောဒကသ္သ။ မနုသ္သာ ကာရေန္တီတိ သမ္ဗန္ဓော။ ‘‘ဧကေနာ’’တိ ပဒံ ‘‘ကာရေန္တီ’’တိ ပဒေ ကာရိတကမ္မံ။ တသ္သာတိ ကာရိတဘိက္ခုသ္သ။ အနုမောဒနတောတိ အနုမောဒနကာရဏာ။ ဥပနိသိန္နကထာတိ ဥပသမီပေ နိသိန္နာနံ ကထိယတိ ဧတာယာတိ ဥပနိသိန္နကထာ။ အနုမောဒနာယာတိ အနုမောဒနတ္ထာယ။ အဇ္ဈိဋ္ဌောဝာတိ သယံ အဇ္ဈိဋ္ဌော ဧဝ။ ဧတ္ထာတိ အနုမောဒနဝတ္ထုသ္မိံ။ ‘‘သဉ္ဇာတဝစ္စော’’တိ ဣမိနာ ဝစ္စော သဉ္ဇာတော ဣမသ္သာတိ ဝစ္စိတောတိ ကတ္ဝာ သဉ္ဇာတတ္ထေ ဣတ ပစ္စယောတိ ဒသ္သေတိ။
362.Iddhaṃ ahosīti ettha idhadhātuyā vaḍḍhanatthaṃ paṭikkhipanto āha ‘‘sampannaṃ ahosī’’ti. Saṅghatthere nisinneti sambandho. Anuthere anumodanatthāya nisinneti yojanā. Saṅghattherena ajjhiṭṭhepīti sambandho. Anumodako vadatīti sambandho. Anu punappunaṃ, pacchā vā dāyake dhammakathāya modetīti anumodako. ‘‘Gacchathā’’ti sace vadati anumodakoti yojanā. Tassāti anumodakassa. Manussā kārentīti sambandho. ‘‘Ekenā’’ti padaṃ ‘‘kārentī’’ti pade kāritakammaṃ. Tassāti kāritabhikkhussa. Anumodanatoti anumodanakāraṇā. Upanisinnakathāti upasamīpe nisinnānaṃ kathiyati etāyāti upanisinnakathā. Anumodanāyāti anumodanatthāya. Ajjhiṭṭhovāti sayaṃ ajjhiṭṭho eva. Etthāti anumodanavatthusmiṃ. ‘‘Sañjātavacco’’ti iminā vacco sañjāto imassāti vaccitoti katvā sañjātatthe ita paccayoti dasseti.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / ၄. အနုမောဒနဝတ္တကထာ • 4. Anumodanavattakathā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / အနုမောဒနဝတ္တကထာ • Anumodanavattakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အနုမောဒနဝတ္တကထာဝဏ္ဏနာ • Anumodanavattakathāvaṇṇanā
