| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā |
ཨནུམོདནཝཏྟཀཐཱ
Anumodanavattakathā
༣༦༢. ཨནུམོདནཝཏྠུསྨིཾ ཨིདྡྷཾ ཨཧོསཱིཏི སམྤནྣཾ ཨཧོསི། ཙཏཱུཧི པཉྩཧཱིཏི སངྒྷཏྠེརེན ཨནུམོདནཏྠཱཡ ནིསིནྣེ ཧེཊྛཱ པཊིཔཱཊིཡཱ ཙཏཱུཧི ནིསཱིདིཏབྦཾ། ཨནུཐེརེ ནིསིནྣེ མཧཱཐེརེན ཙ ཧེཊྛཱ ཙ ཏཱིཧི ནིསཱིདིཏབྦཾ། པཉྩམེ ནིསིནྣེ ཨུཔརི ཙཏཱུཧི ནིསཱིདིཏབྦཾ། སངྒྷཏྠེརེན ཧེཊྛཱ དཧརབྷིཀྑུསྨིཾ ཨཛ྄ཛྷིཊྛེཔི སངྒྷཏྠེརཏོ པཊྛཱཡ ཙཏཱུཧི ནིསཱིདིཏབྦམེཝ། སཙེ པན ཨནུམོདཀོ བྷིཀྑུ ‘‘གཙྪཐ བྷནྟེ, ཨཱགམེཏབྦཀིཙྩཾ ནཏྠཱི’’ཏི ཝདཏི, གནྟུཾ ཝཊྚཏི། མཧཱཐེརེན ‘‘གཙྪཱམ ཨཱཝུསོ’’ཏི ཝུཏྟེ ‘‘གཙྪཐཱ’’ཏི ཝདཏི, ཨེཝམྤི ཝཊྚཏི། ‘‘བཧིགཱམེ ཨཱགམེསྶཱམཱ’’ཏི ཨཱབྷོགཾ ཀཏྭཱཔི བཧིགཱམཾ གནྟྭཱ ཨཏྟནོ ནིསྶིཏཀེ ‘‘ཏུམྷེ ཏསྶ ཨཱགམནཾ ཨཱགམེཐཱ’’ཏི ཝཏྭཱཔི གནྟུཾ ཝཊྚཏིཡེཝ། སཙེ པན མནུསྶཱ ཨཏྟནོ རུཙིཀེན ཨེཀེན ཨནུམོདནཾ ཀཱརེནྟི, ནེཝ ཏསྶ ཨནུམོདཏོ ཨཱཔཏྟི, ན མཧཱཐེརསྶ བྷཱརོ ཧོཏི། ཨུཔནིསིནྣཀཐཱཡམེཝ ཧི མནུསྶེསུ ཀཐཱཔེནྟེསུ མཧཱཐེརོ ཨཱཔུཙྪིཏབྦོ, མཧཱཐེརེན ཙ ཨནུམོདནཱཡ ཨཛ྄ཛྷིཊྛོཝ ཨཱགམེཏབྦོཏི ཨིདམེཏྠ ལཀྑཎཾ། ཝཙྩིཏོཏི སཉྫཱཏཝཙྩོ; ཝཙྩཔཱིལི༹ཏོཏི ཨདྷིཔྤཱཡོ།
362. Anumodanavatthusmiṃ iddhaṃ ahosīti sampannaṃ ahosi. Catūhi pañcahīti saṅghattherena anumodanatthāya nisinne heṭṭhā paṭipāṭiyā catūhi nisīditabbaṃ. Anuthere nisinne mahātherena ca heṭṭhā ca tīhi nisīditabbaṃ. Pañcame nisinne upari catūhi nisīditabbaṃ. Saṅghattherena heṭṭhā daharabhikkhusmiṃ ajjhiṭṭhepi saṅghattherato paṭṭhāya catūhi nisīditabbameva. Sace pana anumodako bhikkhu ‘‘gacchatha bhante, āgametabbakiccaṃ natthī’’ti vadati, gantuṃ vaṭṭati. Mahātherena ‘‘gacchāma āvuso’’ti vutte ‘‘gacchathā’’ti vadati, evampi vaṭṭati. ‘‘Bahigāme āgamessāmā’’ti ābhogaṃ katvāpi bahigāmaṃ gantvā attano nissitake ‘‘tumhe tassa āgamanaṃ āgamethā’’ti vatvāpi gantuṃ vaṭṭatiyeva. Sace pana manussā attano rucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo, mahātherena ca anumodanāya ajjhiṭṭhova āgametabboti idamettha lakkhaṇaṃ. Vaccitoti sañjātavacco; vaccapīḷitoti adhippāyo.
ཨནུམོདནཝཏྟཀཐཱ ནིཊྛིཏཱ།
Anumodanavattakathā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ༤. ཨནུམོདནཝཏྟཀཐཱ • 4. Anumodanavattakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨནུམོདནཝཏྟཀཐཱཝཎྞནཱ • Anumodanavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨནུམོདནཝཏྟཀཐཱཝཎྞནཱ • Anumodanavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨནུམོདནཝཏྟཀཐཱཝཎྞནཱ • Anumodanavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༤. ཨནུམོདནཝཏྟཀཐཱ • 4. Anumodanavattakathā
