| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. அனுபாதா³பரினிப்³பா³னஸுத்தங்
8. Anupādāparinibbānasuttaṃ
48. ஸாவத்தி²னிதா³னங். ‘‘ஸசே வோ, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘கிமத்தி²யங், ஆவுஸோ, ஸமணே கோ³தமே ப்³ரஹ்மசரியங் வுஸ்ஸதீ’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘அனுபாதா³பரினிப்³பா³னத்த²ங் கோ², ஆவுஸோ, ப⁴க³வதி ப்³ரஹ்மசரியங் வுஸ்ஸதீ’தி. ஸசே பன வோ, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘அத்தி² பனாவுஸோ, மக்³கோ³, அத்தி² படிபதா³ அனுபாதா³பரினிப்³பா³னாயா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘அத்தி² கோ², ஆவுஸோ, மக்³கோ³, அத்தி² படிபதா³ அனுபாதா³பரினிப்³பா³னாயா’தி . கதமோ ச, பி⁴க்க²வே, மக்³கோ³, கதமா ச படிபதா³ அனுபாதா³பரினிப்³பா³னாய? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴. அயங், பி⁴க்க²வே, மக்³கோ³, அயங் படிபதா³ அனுபாதா³பரினிப்³பா³னாயாதி. ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாதா²’’தி. அட்ட²மங்.
48. Sāvatthinidānaṃ. ‘‘Sace vo, bhikkhave, aññatitthiyā paribbājakā evaṃ puccheyyuṃ – ‘kimatthiyaṃ, āvuso, samaṇe gotame brahmacariyaṃ vussatī’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘anupādāparinibbānatthaṃ kho, āvuso, bhagavati brahmacariyaṃ vussatī’ti. Sace pana vo, bhikkhave, aññatitthiyā paribbājakā evaṃ puccheyyuṃ – ‘atthi panāvuso, maggo, atthi paṭipadā anupādāparinibbānāyā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘atthi kho, āvuso, maggo, atthi paṭipadā anupādāparinibbānāyā’ti . Katamo ca, bhikkhave, maggo, katamā ca paṭipadā anupādāparinibbānāya? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Ayaṃ, bhikkhave, maggo, ayaṃ paṭipadā anupādāparinibbānāyāti. Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyāthā’’ti. Aṭṭhamaṃ.
அஞ்ஞதித்தி²யபெய்யாலவக்³கோ³ பஞ்சமோ.
Aññatitthiyapeyyālavaggo pañcamo.
தஸ்ஸுத்³தா³னங் –
Tassuddānaṃ –
விராக³ஸங்யோஜனங் அனுஸயங், அத்³தா⁴னங் ஆஸவா க²யா;
Virāgasaṃyojanaṃ anusayaṃ, addhānaṃ āsavā khayā;
விஜ்ஜாவிமுத்திஞாணஞ்ச, அனுபாதா³ய அட்ட²மீ.
Vijjāvimuttiñāṇañca, anupādāya aṭṭhamī.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. அஞ்ஞதித்தி²யபெய்யாலவக்³க³வண்ணனா • 5. Aññatitthiyapeyyālavaggavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. அஞ்ஞதித்தி²யபெய்யாலவக்³க³வண்ணனா • 5. Aññatitthiyapeyyālavaggavaṇṇanā
