| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. අනුපාදාපරිනිබ්‌බානසුත්‌තං
8. Anupādāparinibbānasuttaṃ
48. සාවත්‌ථිනිදානං. ‘‘සචෙ වො, භික්‌ඛවෙ, අඤ්‌ඤතිත්‌ථියා පරිබ්‌බාජකා එවං පුච්‌ඡෙය්‍යුං – ‘කිමත්‌ථියං, ආවුසො, සමණෙ ගොතමෙ බ්‍රහ්‌මචරියං වුස්‌සතී’ති, එවං පුට්‌ඨා තුම්‌හෙ, භික්‌ඛවෙ, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ – ‘අනුපාදාපරිනිබ්‌බානත්‌ථං ඛො, ආවුසො, භගවති බ්‍රහ්‌මචරියං වුස්‌සතී’ති. සචෙ පන වො, භික්‌ඛවෙ, අඤ්‌ඤතිත්‌ථියා පරිබ්‌බාජකා එවං පුච්‌ඡෙය්‍යුං – ‘අත්‌ථි පනාවුසො, මග්‌ගො, අත්‌ථි පටිපදා අනුපාදාපරිනිබ්‌බානායා’ති, එවං පුට්‌ඨා තුම්‌හෙ, භික්‌ඛවෙ, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථ – ‘අත්‌ථි ඛො, ආවුසො, මග්‌ගො, අත්‌ථි පටිපදා අනුපාදාපරිනිබ්‌බානායා’ති . කතමො ච, භික්‌ඛවෙ, මග්‌ගො, කතමා ච පටිපදා අනුපාදාපරිනිබ්‌බානාය? අයමෙව අරියො අට්‌ඨඞ්‌ගිකො මග්‌ගො, සෙය්‍යථිදං – සම්‌මාදිට්‌ඨි…පෙ.… සම්‌මාසමාධි. අයං, භික්‌ඛවෙ, මග්‌ගො, අයං පටිපදා අනුපාදාපරිනිබ්‌බානායාති. එවං පුට්‌ඨා තුම්‌හෙ, භික්‌ඛවෙ, තෙසං අඤ්‌ඤතිත්‌ථියානං පරිබ්‌බාජකානං එවං බ්‍යාකරෙය්‍යාථා’’ති. අට්‌ඨමං.
48. Sāvatthinidānaṃ. ‘‘Sace vo, bhikkhave, aññatitthiyā paribbājakā evaṃ puccheyyuṃ – ‘kimatthiyaṃ, āvuso, samaṇe gotame brahmacariyaṃ vussatī’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘anupādāparinibbānatthaṃ kho, āvuso, bhagavati brahmacariyaṃ vussatī’ti. Sace pana vo, bhikkhave, aññatitthiyā paribbājakā evaṃ puccheyyuṃ – ‘atthi panāvuso, maggo, atthi paṭipadā anupādāparinibbānāyā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘atthi kho, āvuso, maggo, atthi paṭipadā anupādāparinibbānāyā’ti . Katamo ca, bhikkhave, maggo, katamā ca paṭipadā anupādāparinibbānāya? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi. Ayaṃ, bhikkhave, maggo, ayaṃ paṭipadā anupādāparinibbānāyāti. Evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyāthā’’ti. Aṭṭhamaṃ.
අඤ්‌ඤතිත්‌ථියපෙය්‍යාලවග්‌ගො පඤ්‌චමො.
Aññatitthiyapeyyālavaggo pañcamo.
තස්‌සුද්‌දානං –
Tassuddānaṃ –
විරාගසංයොජනං අනුසයං, අද්‌ධානං ආසවා ඛයා;
Virāgasaṃyojanaṃ anusayaṃ, addhānaṃ āsavā khayā;
විජ්‌ජාවිමුත්‌තිඤාණඤ්‌ච, අනුපාදාය අට්‌ඨමී.
Vijjāvimuttiñāṇañca, anupādāya aṭṭhamī.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. අඤ්‌ඤතිත්‌ථියපෙය්‍යාලවග්‌ගවණ්‌ණනා • 5. Aññatitthiyapeyyālavaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. අඤ්‌ඤතිත්‌ථියපෙය්‍යාලවග්‌ගවණ්‌ණනා • 5. Aññatitthiyapeyyālavaggavaṇṇanā
