| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
6. අනුපඛජ්‌ජසික්‌ඛාපදං
6. Anupakhajjasikkhāpadaṃ
119. ඡට්‌ඨෙ රූම්‌භිත්‌වාති නිවාරෙත්‌වා, ආවරණං කත්‌වාති අත්‌ථො. වස්‌සග්‌ගෙනාති වස්‌සගණනාය. අනුපඛජ්‌ජාති එත්‌ථ ඛද හිංසායන්‌ති ධාතුපාඨෙසු (සද්‌දනීතිධාතුමාලායං 15 දකාරන්‌තධාතු) වුත්‌තත්‌තා ඛදසද්‌දො හිංසත්‌ථො හොති. අනුසමීපං උපගන්‌ත්‌වා ඛදනං හිං සනං නාම අනුසමීපං පවිසනමෙවාති දස්‌සෙන්‌තො ආහ ‘‘අනුපවිසිත්‌වා’’ති.
119. Chaṭṭhe rūmbhitvāti nivāretvā, āvaraṇaṃ katvāti attho. Vassaggenāti vassagaṇanāya. Anupakhajjāti ettha khada hiṃsāyanti dhātupāṭhesu (saddanītidhātumālāyaṃ 15 dakārantadhātu) vuttattā khadasaddo hiṃsattho hoti. Anusamīpaṃ upagantvā khadanaṃ hiṃ sanaṃ nāma anusamīpaṃ pavisanamevāti dassento āha ‘‘anupavisitvā’’ti.
120. ‘‘ජාන’’න්‌ති එත්‌ථ ජානනාකාරං දස්‌සෙතුං වුත්‌තං ‘‘අනුට්‌ඨාපනීයො අය’’න්‌ති. තෙනෙවාති ජානනහෙතුනා එව. අස්‌සාති ‘‘ජාන’’න්‌තිපදස්‌ස. හීති විත්‌ථාරජොතකො. සඞ්‌ඝො පන දෙතීති සම්‌බන්‌ධො. යස්‌සාති වුඩ්‌ඪාදීසු අඤ්‌ඤතරස්‌ස. එත්‌ථාති වුඩ්‌ඪගිලානාදීසු. ගිලානස්‌සපි දෙතීති යොජනා. ‘‘ගිලානො’’ති පදං ‘‘න පීළෙතබ්‌බො, අනුකම්‌පිතබ්‌බො’’තිපදද්‌වයෙ වුත්‌තකම්‌මං. ‘‘කාමඤ්‌චා’’ති පදස්‌ස අනුග්‌ගහත්‌ථජොතකත්‌තා පනසද්‌දො ගරහත්‌ථජොතකො.
120. ‘‘Jāna’’nti ettha jānanākāraṃ dassetuṃ vuttaṃ ‘‘anuṭṭhāpanīyo aya’’nti. Tenevāti jānanahetunā eva. Assāti ‘‘jāna’’ntipadassa. Hīti vitthārajotako. Saṅgho pana detīti sambandho. Yassāti vuḍḍhādīsu aññatarassa. Etthāti vuḍḍhagilānādīsu. Gilānassapi detīti yojanā. ‘‘Gilāno’’ti padaṃ ‘‘na pīḷetabbo, anukampitabbo’’tipadadvaye vuttakammaṃ. ‘‘Kāmañcā’’ti padassa anuggahatthajotakattā panasaddo garahatthajotako.
121. මඤ්‌චපීඨානං උපචාරො නාමාති සම්‌බන්‌ධො. යතොති යතො කුතොචි ඨානතො. යාව මඤ්‌චපීඨං අත්‌ථි, තාව උපචාරො නාමාති යොජනා. තස්‌මිං උපචාරෙ ඨිතස්‌ස භික්‌ඛුනො උපචාරෙති සම්‌බන්‌ධො.
121. Mañcapīṭhānaṃ upacāro nāmāti sambandho. Yatoti yato kutoci ṭhānato. Yāva mañcapīṭhaṃ atthi, tāva upacāro nāmāti yojanā. Tasmiṃ upacāre ṭhitassa bhikkhuno upacāreti sambandho.
‘‘අභිනිසීදති වා අභිනිපජ්‌ජති වා’’ති එත්‌ථ වාසද්‌දස්‌ස අනියමවිකප්‌පත්‌ථං දස්‌සෙතුං වුත්‌තං ‘‘අභිනිසීදනමත්‌තෙනා’’තිආදි.
‘‘Abhinisīdati vā abhinipajjati vā’’ti ettha vāsaddassa aniyamavikappatthaṃ dassetuṃ vuttaṃ ‘‘abhinisīdanamattenā’’tiādi.
122. ඉතොති වාරතො. ඉධාති ඉමස්‌මිං පාචිත්‌තියවාරෙ. යථා වුත්‌තො, එවන්‌ති සම්‌බන්‌ධො. සබ්‌බත්‌ථෙවාති සබ්‌බෙසු එව විහාරපරිවෙණෙසු. අස්‌සාති විසභාගපුග්‌ගලස්‌ස. ඉධාපීති ඉමස්‌මිම්‌පි සික්‌ඛාපදෙ. තත්‌ථාති විස්‌සාසිකපුග්‌ගලෙ.
122.Itoti vārato. Idhāti imasmiṃ pācittiyavāre. Yathā vutto, evanti sambandho. Sabbatthevāti sabbesu eva vihārapariveṇesu. Assāti visabhāgapuggalassa. Idhāpīti imasmimpi sikkhāpade. Tatthāti vissāsikapuggale.
123. පාළියං ‘‘ආපදාසූ’’තිපදං ‘‘පවිසතී’’ති අජ්‌ඣාහාරපදෙන සම්‌බන්‌ධිතබ්‌බන්‌ති ආහ ‘‘ආපදාසූතිආදී’’ති. ඡට්‌ඨං.
123. Pāḷiyaṃ ‘‘āpadāsū’’tipadaṃ ‘‘pavisatī’’ti ajjhāhārapadena sambandhitabbanti āha ‘‘āpadāsūtiādī’’ti. Chaṭṭhaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 2. භූතගාමවග්‌ගො • 2. Bhūtagāmavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. අනුපඛජ්‌ජසික්‌ඛාපදවණ්‌ණනා • 6. Anupakhajjasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. අනුපඛජ්‌ජසික්‌ඛාපදවණ්‌ණනා • 6. Anupakhajjasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. අනුපඛජ්‌ජසික්‌ඛාපදවණ්‌ණනා • 6. Anupakhajjasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. අනුපඛජ්‌ජසික්‌ඛාපදවණ්‌ණනා • 6. Anupakhajjasikkhāpadavaṇṇanā
