| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. அனுபக²ஜ்ஜஸிக்கா²பத³வண்ணனா
6. Anupakhajjasikkhāpadavaṇṇanā
119. ச²ட்ட²ஸிக்கா²பதே³ – பலிபு³ந்தெ⁴ந்தீதி பட²மதரங் க³ந்த்வா பத்தசீவரங் அதிஹரித்வா ரும்பி⁴த்வா திட்ட²ந்தி. தே²ரா பி⁴க்கூ² வுட்டா²பெந்தீதி ‘‘அம்ஹாகங் ஆவுஸோ பாபுணாதீ’’தி வஸ்ஸக்³கே³ன க³ஹெத்வா வுட்டா²பெந்தி. அனுபக²ஜ்ஜ ஸெய்யங் கப்பெந்தீதி ‘‘தும்ஹாகங் ப⁴ந்தே மஞ்சட்டா²னங்யேவ பாபுணாதி, ந ஸப்³போ³ விஹாரோ. அம்ஹாகங் தா³னி இத³ங் டா²னங் பாபுணாதீ’’தி அனுபவிஸித்வா மஞ்சபீட²ங் பஞ்ஞபெத்வா நிஸீத³ந்திபி நிபஜ்ஜந்திபி ஸஜ்ஜா²யம்பி கரொந்தி.
119. Chaṭṭhasikkhāpade – palibundhentīti paṭhamataraṃ gantvā pattacīvaraṃ atiharitvā rumbhitvā tiṭṭhanti. Therā bhikkhū vuṭṭhāpentīti ‘‘amhākaṃ āvuso pāpuṇātī’’ti vassaggena gahetvā vuṭṭhāpenti. Anupakhajja seyyaṃ kappentīti ‘‘tumhākaṃ bhante mañcaṭṭhānaṃyeva pāpuṇāti, na sabbo vihāro. Amhākaṃ dāni idaṃ ṭhānaṃ pāpuṇātī’’ti anupavisitvā mañcapīṭhaṃ paññapetvā nisīdantipi nipajjantipi sajjhāyampi karonti.
120. ஜானந்தி ‘‘அனுட்டா²பனீயோ அய’’ந்தி ஜானந்தோ; தேனேவஸ்ஸ விப⁴ங்கே³ ‘‘வுட்³டோ⁴தி ஜானாதீ’’திஆதி³ வுத்தங். வுட்³டோ⁴ ஹி அத்தனோ வுட்³ட⁴தாய அனுட்டா²பனீயோ , கி³லானோ கி³லானதாய, ஸங்கோ⁴ பன ப⁴ண்டா³கா³ரிகஸ்ஸ வா த⁴ம்மகதி²கவினயத⁴ராதீ³னங் வா க³ணவாசகஆசரியஸ்ஸ வா ப³ஹூபகாரதங் கு³ணவிஸிட்ட²தஞ்ச ஸல்லக்கெ²ந்தோ து⁴வவாஸத்தா²ய விஹாரங் ஸம்மன்னித்வா தே³தி, தஸ்மா யஸ்ஸ ஸங்கே⁴ன தி³ன்னோ, ஸோபி அனுட்டா²பனீயோ. காமஞ்செத்த² கி³லானஸ்ஸாபி ஸங்கோ⁴யேவ அனுச்ச²விகங் ஸேனாஸனங் தே³தி, கி³லானோ பன ‘‘அபலோகெத்வா ஸங்கே⁴ன அதி³ன்னஸேனாஸனோபி ந பீளேதப்³போ³ அனுகம்பிதப்³போ³’’தி த³ஸ்ஸேதுங் விஸுங் வுத்தோ.
120.Jānanti ‘‘anuṭṭhāpanīyo aya’’nti jānanto; tenevassa vibhaṅge ‘‘vuḍḍhoti jānātī’’tiādi vuttaṃ. Vuḍḍho hi attano vuḍḍhatāya anuṭṭhāpanīyo , gilāno gilānatāya, saṅgho pana bhaṇḍāgārikassa vā dhammakathikavinayadharādīnaṃ vā gaṇavācakaācariyassa vā bahūpakārataṃ guṇavisiṭṭhatañca sallakkhento dhuvavāsatthāya vihāraṃ sammannitvā deti, tasmā yassa saṅghena dinno, sopi anuṭṭhāpanīyo. Kāmañcettha gilānassāpi saṅghoyeva anucchavikaṃ senāsanaṃ deti, gilāno pana ‘‘apaloketvā saṅghena adinnasenāsanopi na pīḷetabbo anukampitabbo’’ti dassetuṃ visuṃ vutto.
121. உபசாரேதி எத்த² மஞ்சபீடா²னங் தாவ மஹல்லகே விஹாரே ஸமந்தா தி³யட்³டோ⁴ ஹத்தோ² உபசாரோ, கு²த்³த³கே யதோ பஹோதி ததோ தி³யட்³டோ⁴ ஹத்தோ², பாதே³ தோ⁴வித்வா பவிஸந்தஸ்ஸ பஸ்ஸாவத்தா²ய நிக்க²மந்தஸ்ஸ ச யாவ த்³வாரே நிக்கி²த்தபாத³தோ⁴வனபாஸாணதோ பஸ்ஸாவட்டா²னதோ ச மஞ்சபீட²ங், தாவ தி³யட்³ட⁴ஹத்த²வித்தா²ரோ மக்³கோ³ உபசாரோ நாம. தஸ்மிங் மஞ்சஸ்ஸ வா பீட²ஸ்ஸ வா உபசாரே டி²தஸ்ஸ வா பி⁴க்கு²னோ பவிஸந்தஸ்ஸ வா நிக்க²மந்தஸ்ஸ வா உபசாரே யோ அனுபக²ஜ்ஜ ஸெய்யங் கப்பேதுகாமோ ஸெய்யங் ஸந்த²ரதி வா ஸந்த²ராபேதி வா, ஆபத்தி து³க்கடஸ்ஸ.
121.Upacāreti ettha mañcapīṭhānaṃ tāva mahallake vihāre samantā diyaḍḍho hattho upacāro, khuddake yato pahoti tato diyaḍḍho hattho, pāde dhovitvā pavisantassa passāvatthāya nikkhamantassa ca yāva dvāre nikkhittapādadhovanapāsāṇato passāvaṭṭhānato ca mañcapīṭhaṃ, tāva diyaḍḍhahatthavitthāro maggo upacāro nāma. Tasmiṃ mañcassa vā pīṭhassa vā upacāre ṭhitassa vā bhikkhuno pavisantassa vā nikkhamantassa vā upacāre yo anupakhajja seyyaṃ kappetukāmo seyyaṃ santharati vā santharāpeti vā, āpatti dukkaṭassa.
அபி⁴னிஸீத³தி வா அபி⁴னிபஜ்ஜதி வாதி எத்த² அபி⁴னிஸீத³னமத்தேன அபி⁴னிபஜ்ஜனமத்தேனேவ வா பாசித்தியங். ஸசே பன த்³வேபி கரோதி, த்³வே பாசித்தியானி. உட்டா²யுட்டா²ய நிஸீத³தோ வா நிபஜ்ஜதோ வா பயோகே³ பயோகே³ பாசித்தியங்.
Abhinisīdativā abhinipajjati vāti ettha abhinisīdanamattena abhinipajjanamatteneva vā pācittiyaṃ. Sace pana dvepi karoti, dve pācittiyāni. Uṭṭhāyuṭṭhāya nisīdato vā nipajjato vā payoge payoge pācittiyaṃ.
122. உபசாரங் ட²பெத்வா ஸெய்யங் ஸந்த²ரதி வா ஸந்த²ராபேதி வாதி இமஸ்மிங் இதோ பரே ச ‘‘விஹாரஸ்ஸ உபசாரே’’திஆதி³கே து³க்கடவாரேபி யதா² இத⁴ அபி⁴னிஸீத³னமத்தே அபி⁴னிபஜ்ஜனமத்தே உப⁴யகரணே பயோக³பே⁴தே³ ச பாசித்தியப்பபே⁴தோ³ வுத்தோ, ஏவங் து³க்கடப்பபே⁴தோ³ வேதி³தப்³போ³. ஏவரூபேன ஹி விஸபா⁴க³புக்³க³லேன ஏகவிஹாரே வா ஏகபரிவேணே வா வஸந்தேன அத்தோ² நத்தி², தஸ்மா ஸப்³ப³த்தே²வஸ்ஸ நிவாஸோ வாரிதோ. அஞ்ஞஸ்ஸ புக்³க³லிகேதி இதா⁴பி விஸ்ஸாஸிகஸ்ஸ புக்³க³லிகங் அத்தனோ புக்³க³லிகஸதி³ஸமேவ, தத்த² அனாபத்தி.
122.Upacāraṃ ṭhapetvā seyyaṃ santharati vā santharāpeti vāti imasmiṃ ito pare ca ‘‘vihārassa upacāre’’tiādike dukkaṭavārepi yathā idha abhinisīdanamatte abhinipajjanamatte ubhayakaraṇe payogabhede ca pācittiyappabhedo vutto, evaṃ dukkaṭappabhedo veditabbo. Evarūpena hi visabhāgapuggalena ekavihāre vā ekapariveṇe vā vasantena attho natthi, tasmā sabbatthevassa nivāso vārito. Aññassa puggaliketi idhāpi vissāsikassa puggalikaṃ attano puggalikasadisameva, tattha anāpatti.
123. ஆபதா³ஸூதி ஸசே ப³ஹி வஸந்தஸ்ஸ ஜீவிதப்³ரஹ்மசரியந்தராயோ ஹோதி, ஏவரூபாஸு ஆபதா³ஸு யோ பவிஸதி, தஸ்ஸாபி அனாபத்தி. ஸேஸங் உத்தானமேவாதி. பட²மபாராஜிகஸமுட்டா²னங், கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், அகுஸலசித்தங், து³க்க²வேத³னந்தி.
123.Āpadāsūti sace bahi vasantassa jīvitabrahmacariyantarāyo hoti, evarūpāsu āpadāsu yo pavisati, tassāpi anāpatti. Sesaṃ uttānamevāti. Paṭhamapārājikasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dukkhavedananti.
அனுபக²ஜ்ஜஸிக்கா²பத³ங் ச²ட்ட²ங்.
Anupakhajjasikkhāpadaṃ chaṭṭhaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. அனுபக²ஜ்ஜஸிக்கா²பத³வண்ணனா • 6. Anupakhajjasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. அனுபக²ஜ்ஜஸிக்கா²பத³வண்ணனா • 6. Anupakhajjasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. அனுபக²ஜ்ஜஸிக்கா²பத³வண்ணனா • 6. Anupakhajjasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. அனுபக²ஜ்ஜஸிக்கா²பத³ங் • 6. Anupakhajjasikkhāpadaṃ
