| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
6. அனுபக²ஜ்ஜஸிக்கா²பத³வண்ணனா
6. Anupakhajjasikkhāpadavaṇṇanā
‘‘ஜான’’ந்தி வுத்தே ‘‘அனுட்டா²பனீயோ ‘அய’ந்தி ஜானந்தோ’’தி அயங் விஸேஸோ குதோ லப்³ப⁴தீதி ஆஹ ‘‘தேனேவஸ்ஸா’’திஆதி³. நனு பத³பா⁴ஜனேபி வுட்³ட⁴பா⁴வாதி³ஜானநமேவ வுத்தங், ந து அனுட்டா²பனீயபா⁴வந்தி அனுயோக³ங் ஸந்தா⁴யாஹ ‘‘வுட்³டோ⁴ ஹீ’’திஆதி³. ப³ஹூபகாரதந்தி ‘‘ப⁴ண்டா³கா³ரிகத்தாதி³ப³ஹுஉபகாரபா⁴வங்’’. ந கேவலங் இத³மேவாதி ஆஹ ‘‘கு³ணவிஸிட்ட²தஞ்சா’’திஆதி³, தேன ப³ஹூபகாரத்தேபி கு³ணவிஸிட்ட²த்தாபா⁴வே, கு³ணவிஸிட்ட²த்தேபி ப³ஹூபகாரத்தாபா⁴வே தா³துங் ந வட்டதீதி த³ஸ்ஸேதி. ‘‘ப⁴ண்டா³கா³ரிகஸ்ஸ ப³ஹூபகாரதங், த⁴ம்மகதி²காதீ³னங் கு³ணவிஸிட்ட²தஞ்ச ஸல்லக்கெ²த்வா’’தி (ஸாரத்த²॰ டீ॰ பாசித்திய 3.119-121) கேசி. து⁴வவாஸத்தா²யாதி நிச்சவாஸத்தா²ய. ஸம்மன்னித்வாதி அபலோகனேன கம்மேன ஸம்மன்னித்வா. காமஞ்செத்த² கி³லானஸ்ஸாபி ஸங்கோ⁴யேவ அனுச்ச²விகங் ஸேனாஸனங் தே³தி, கி³லானோ பன அபலோகெத்வா ஸங்கே⁴ன அதி³ன்னஸேனாஸனோபி ந பீளேதப்³போ³ அனுகம்பிதப்³போ³தி த³ஸ்ஸேதுங் விஸுங் வுத்தோ.
‘‘Jāna’’nti vutte ‘‘anuṭṭhāpanīyo ‘aya’nti jānanto’’ti ayaṃ viseso kuto labbhatīti āha ‘‘tenevassā’’tiādi. Nanu padabhājanepi vuḍḍhabhāvādijānanameva vuttaṃ, na tu anuṭṭhāpanīyabhāvanti anuyogaṃ sandhāyāha ‘‘vuḍḍho hī’’tiādi. Bahūpakāratanti ‘‘bhaṇḍāgārikattādibahuupakārabhāvaṃ’’. Na kevalaṃ idamevāti āha ‘‘guṇavisiṭṭhatañcā’’tiādi, tena bahūpakārattepi guṇavisiṭṭhattābhāve, guṇavisiṭṭhattepi bahūpakārattābhāve dātuṃ na vaṭṭatīti dasseti. ‘‘Bhaṇḍāgārikassa bahūpakārataṃ, dhammakathikādīnaṃ guṇavisiṭṭhatañca sallakkhetvā’’ti (sārattha. ṭī. pācittiya 3.119-121) keci. Dhuvavāsatthāyāti niccavāsatthāya. Sammannitvāti apalokanena kammena sammannitvā. Kāmañcettha gilānassāpi saṅghoyeva anucchavikaṃ senāsanaṃ deti, gilāno pana apaloketvā saṅghena adinnasenāsanopi na pīḷetabbo anukampitabboti dassetuṃ visuṃ vutto.
ஸமந்தா தி³யட்³டோ⁴ ஹத்தோ²தி மஜ்ஜே² பஞ்ஞத்தங் மஞ்சபீட²ங் ஸந்தா⁴ய வுத்தங். ஏகபஸ்ஸேன சே பஹோனகதி³ஸா தி³ஸ்ஸதி, ததோ க³ஹேதப்³ப³ங். பாத³தோ⁴வனபாஸாணதோதி த்³வாரே நிக்கி²த்தபாத³தோ⁴வனபாஸாணதோ. நிஸீத³ந்தஸ்ஸ வா நிபஜ்ஜந்தஸ்ஸ வா பாசித்தியந்தி எத்த² நிஸீத³னமத்தேன, நிபஜ்ஜனமத்தேனேவ வா பாசித்தியங். புனப்புனங் கரொந்தஸ்ஸாதி உட்டா²யுட்டா²ய நிஸீத³தோ வா நிபஜ்ஜதோ வா.
Samantā diyaḍḍho hatthoti majjhe paññattaṃ mañcapīṭhaṃ sandhāya vuttaṃ. Ekapassena ce pahonakadisā dissati, tato gahetabbaṃ. Pādadhovanapāsāṇatoti dvāre nikkhittapādadhovanapāsāṇato. Nisīdantassa vā nipajjantassa vā pācittiyanti ettha nisīdanamattena, nipajjanamatteneva vā pācittiyaṃ. Punappunaṃ karontassāti uṭṭhāyuṭṭhāya nisīdato vā nipajjato vā.
ஸங்கி⁴கே ஸங்கி⁴கஸஞ்ஞிவேமதிகபுக்³க³லிகஸஞ்ஞீனங் வஸேன திகபாசித்தியங் வேதி³தப்³ப³ங். திகது³க்கடங் பன புக்³க³லிகே ஸங்கி⁴கஸஞ்ஞிவேமதிகஅஞ்ஞபுக்³க³லிகஸஞ்ஞீனங் வஸேன. விஹாரஸ்ஸ உபசாரேதி தஸ்ஸ ப³ஹி ஆஸன்னப்பதே³ஸே.
Saṅghike saṅghikasaññivematikapuggalikasaññīnaṃ vasena tikapācittiyaṃ veditabbaṃ. Tikadukkaṭaṃ pana puggalike saṅghikasaññivematikaaññapuggalikasaññīnaṃ vasena. Vihārassa upacāreti tassa bahi āsannappadese.
அனுபக²ஜ்ஜஸிக்கா²பத³வண்ணனா நிட்டி²தா.
Anupakhajjasikkhāpadavaṇṇanā niṭṭhitā.
