| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அனுபஞ்ஞத்திவண்ணனா
Anupaññattivaṇṇanā
பாராஜிகவத்து²பூ⁴தாதி யேஸங் தீஸு மக்³கே³ஸு திலபீ³ஜமத்தம்பி நிமித்தஸ்ஸ பவேஸோகாஸோ ஹோதி, தே இத்தி²புரிஸாதி³பே⁴தா³ ஸப்³பே³ ஸங்க³ய்ஹந்தி, ந இதரே. இத⁴ பன திரச்சா²னக³தாயாதி-பாளிபதா³னுரூபதோ ந ஸப்³பா³திஆதி³னா இத்தி²லிங்க³வஸேன வுத்தங். கோ³னஸாதி ஸப்பவிஸேஸா, யேஸங் பிட்டீ²ஸு மஹந்தமஹந்தானி மண்ட³லானி ஹொந்தி. கச்ச²பமண்டூ³கானங் சதுப்பத³த்தேபி ஓத³கதாஸாமஞ்ஞேன அபதே³ஹி ஸஹ க³ஹணங். முக²ஸண்டா²னந்தி ஒட்ட²சம்மஸண்டா²னங். வணஸங்கே²பந்தி வணஸங்க³ஹங். வணே து²ல்லச்சயஞ்ச ‘‘அமக்³கே³ன அமக்³க³ங் பவேஸேதி, ஆபத்தி து²ல்லச்சயஸ்ஸா’’தி (பாரா॰ 66) இமஸ்ஸ ஸுத்தஸ்ஸ வஸேன வேதி³தப்³ப³ங். மங்கு³ஸாதி நகுலா. ஏதமேவ ஹி அத்த²ந்தி யோ நங் அஜ்ஜா²பஜ்ஜதி, தங் பராஜேதீதி இமமத்த²ங் வுத்தானங்யேவ பாராஜிகாதி³ஸத்³தா³னங் நிப்³ப³சனப்பஸங்கே³ இமிஸ்ஸா பரிவாரகா³தா²ய பவத்தத்தா. ப⁴ட்டோ²தி ஸாஸனதோ பரிஹீனோ. நிரங்கதோதி நிராகதோ. ஏதந்தி ஆபத்திரூபங் பாராஜிகங். சி²ன்னோதி அந்தராக²ண்டி³தோ.
Pārājikavatthubhūtāti yesaṃ tīsu maggesu tilabījamattampi nimittassa pavesokāso hoti, te itthipurisādibhedā sabbe saṅgayhanti, na itare. Idha pana tiracchānagatāyāti-pāḷipadānurūpato na sabbātiādinā itthiliṅgavasena vuttaṃ. Gonasāti sappavisesā, yesaṃ piṭṭhīsu mahantamahantāni maṇḍalāni honti. Kacchapamaṇḍūkānaṃ catuppadattepi odakatāsāmaññena apadehi saha gahaṇaṃ. Mukhasaṇṭhānanti oṭṭhacammasaṇṭhānaṃ. Vaṇasaṅkhepanti vaṇasaṅgahaṃ. Vaṇe thullaccayañca ‘‘amaggena amaggaṃ paveseti, āpatti thullaccayassā’’ti (pārā. 66) imassa suttassa vasena veditabbaṃ. Maṅgusāti nakulā. Etameva hi atthanti yo naṃ ajjhāpajjati, taṃ parājetīti imamatthaṃ vuttānaṃyeva pārājikādisaddānaṃ nibbacanappasaṅge imissā parivāragāthāya pavattattā. Bhaṭṭhoti sāsanato parihīno. Niraṅkatoti nirākato. Etanti āpattirūpaṃ pārājikaṃ. Chinnoti antarākhaṇḍito.
பகதத்தேஹி பி⁴க்கூ²ஹீதி எத்த² பகதத்தா நாம பாராஜிகங் அனாபன்னா அனுக்கி²த்தா ச. கேசி பன ‘‘பகதத்தேஹி பி⁴க்கூ²ஹி ஏகதோ கத்தப்³ப³த்தாதி அட்ட²கதா²யங் வுத்தத்தா பகதத்தபூ⁴தேஹி அலஜ்ஜீஹிபி ஸத்³தி⁴ங் உபோஸதா²தி³ஸங்க⁴கம்மகரணே தோ³ஸோ நத்தீ²’’தி வத³ந்தி, தங் ந யுத்தங், இமினா வசனேன தஸ்ஸ அத்த²ஸ்ஸ அஸிஜ்ஜ²னதோ. யதி³ ஹி ஸங்க⁴கம்மங் கரீயதி, பகதத்தேஹேவ கரீயதி, ந அபகதத்தேஹீதி ஏவங் அபகதத்தேஹி ஸஹஸங்வாஸபடிக்கே²பபரங் இத³ங் வசனங், ந பன பகதத்தேஹி ஸப்³பே³ஹி அலஜ்ஜீஆதீ³ஹி ஏகதோ ஸங்க⁴கம்மங் கத்தப்³ப³மேவாதி. ஏவங் ஸங்வாஸவிதா⁴னபரங் பகதத்தேஸுபி ஸபா⁴கா³பத்திங் ஆபன்னேஹி அஞ்ஞமஞ்ஞஞ்ச அலஜ்ஜீஹி ச ஸத்³தி⁴ங் ஏகதோ கம்மகரணஸ்ஸ படிக்கி²த்தத்தா. வுத்தஞ்ஹி ‘‘ஸசே ஸப்³போ³ ஸங்கோ⁴ ஸபா⁴கா³பத்தியா ஸதி வுத்தவிதி⁴ங் அகத்வா உபோஸத²ங் கரோதி, வுத்தனயேனேவ ஸப்³போ³ ஸங்கோ⁴ ஆபத்திங் ஆபஜ்ஜதீ’’திஆதி³ (கங்கா²॰ அட்ட²॰ நிதா³னவண்ணனா). ‘‘யத்த² ஆமிஸபரிபோ⁴கோ³ வட்டதி, த⁴ம்மபரிபோ⁴கோ³பி தத்த² வட்டதீ’’தி அலஜ்ஜீஹி ஸஹ பரிபோ⁴கோ³ ச அட்ட²கதா²யங் படிக்கி²த்தோ ஏகதோ கம்மகரணஸ்ஸாபி த⁴ம்மபரிபோ⁴க³த்தா. தஸ்மா யதா² ஹி பாளியங் பாராஜிகாபத்திஆபஜ்ஜனகபுக்³க³லனியமத்த²ங் ய்வாயங் ஞத்திசதுத்தே²ன கம்மேன…பே॰… உபஸம்பன்னோ, அயங் இமஸ்மிங் அத்தே² அதி⁴ப்பேதோ பி⁴க்கூ²தி இமஸ்மிங் வசனே ஸப்³பே³பி ஞத்திசதுத்த²கம்மேன உபஸம்பன்னா பாராஜிகாபஜ்ஜனகபுக்³க³லாயேவாதி நியமோ ந ஸிஜ்ஜ²தி பாராஜிகானாபஜ்ஜனகானம்பி ஸெக்கா²தீ³னங் ஸம்ப⁴வா, அத² கோ² ஞத்திசதுத்த²கம்மேன உபஸம்பன்னேஸுயேவ பாராஜிகாபத்திஆபஜ்ஜனகா அலஜ்ஜீ பா³லபுது²ஜ்ஜனா லப்³ப⁴ந்தி, ந பன ஏஹிபி⁴க்கு²ஆதீ³ஸூதி ஏவங் நியமோ ஸிஜ்ஜ²தி, ஏவமிதா⁴பி பகதத்தேஸுயேவ ஏகதோ கம்மகரணாரஹா அனாபத்திகா லஜ்ஜீ குக்குச்சகா ஸிக்கா²காமா உபலப்³ப⁴ந்தி , ந அபகதத்தேஸூதி ஏவமேவ நியமோ ஸிஜ்ஜ²தி அபகதத்தானங் க³ணபூரணத்தாபா⁴வேன அஸங்வாஸிகத்தனியமதோ. அலஜ்ஜினோ பன க³ணபூரகா ஹுத்வா கம்மஸ்ஸ ஸாத⁴னதோ அஸங்வாஸிகேஸு ந க³ஹிதா கத்தப்³ப³விதி⁴ங் அகத்வா தேஹி ஸஹ மத்³தி³த்வா கம்மங் கரொந்தானங் ஆபத்தி அலஜ்ஜிதா ச ந விக³ச்ச²தீதி வேதி³தப்³ப³ங். ‘‘ஏகோ அலஜ்ஜீ அலஜ்ஜீஸதம்பி கரோதீ’’தி (பாரா॰ அட்ட²॰ 2.585) ஹி வுத்தங், தேனேவ வக்க²தி ‘‘ஸப்³பே³பி லஜ்ஜினோ ஏதேஸு கம்மாதீ³ஸு ஸஹ வஸந்தீ’’திஆதி³. அயஞ்சத்தோ² உபரி வித்தா²ரதோ ஆவி ப⁴விஸ்ஸதி.
Pakatattehi bhikkhūhīti ettha pakatattā nāma pārājikaṃ anāpannā anukkhittā ca. Keci pana ‘‘pakatattehi bhikkhūhi ekato kattabbattāti aṭṭhakathāyaṃ vuttattā pakatattabhūtehi alajjīhipi saddhiṃ uposathādisaṅghakammakaraṇe doso natthī’’ti vadanti, taṃ na yuttaṃ, iminā vacanena tassa atthassa asijjhanato. Yadi hi saṅghakammaṃ karīyati, pakatatteheva karīyati, na apakatattehīti evaṃ apakatattehi sahasaṃvāsapaṭikkhepaparaṃ idaṃ vacanaṃ, na pana pakatattehi sabbehi alajjīādīhi ekato saṅghakammaṃ kattabbamevāti. Evaṃ saṃvāsavidhānaparaṃ pakatattesupi sabhāgāpattiṃ āpannehi aññamaññañca alajjīhi ca saddhiṃ ekato kammakaraṇassa paṭikkhittattā. Vuttañhi ‘‘sace sabbo saṅgho sabhāgāpattiyā sati vuttavidhiṃ akatvā uposathaṃ karoti, vuttanayeneva sabbo saṅgho āpattiṃ āpajjatī’’tiādi (kaṅkhā. aṭṭha. nidānavaṇṇanā). ‘‘Yattha āmisaparibhogo vaṭṭati, dhammaparibhogopi tattha vaṭṭatī’’ti alajjīhi saha paribhogo ca aṭṭhakathāyaṃ paṭikkhitto ekato kammakaraṇassāpi dhammaparibhogattā. Tasmā yathā hi pāḷiyaṃ pārājikāpattiāpajjanakapuggalaniyamatthaṃ yvāyaṃ ñatticatutthena kammena…pe… upasampanno, ayaṃ imasmiṃ atthe adhippeto bhikkhūti imasmiṃ vacane sabbepi ñatticatutthakammena upasampannā pārājikāpajjanakapuggalāyevāti niyamo na sijjhati pārājikānāpajjanakānampi sekkhādīnaṃ sambhavā, atha kho ñatticatutthakammena upasampannesuyeva pārājikāpattiāpajjanakā alajjī bālaputhujjanā labbhanti, na pana ehibhikkhuādīsūti evaṃ niyamo sijjhati, evamidhāpi pakatattesuyeva ekato kammakaraṇārahā anāpattikā lajjī kukkuccakā sikkhākāmā upalabbhanti , na apakatattesūti evameva niyamo sijjhati apakatattānaṃ gaṇapūraṇattābhāvena asaṃvāsikattaniyamato. Alajjino pana gaṇapūrakā hutvā kammassa sādhanato asaṃvāsikesu na gahitā kattabbavidhiṃ akatvā tehi saha madditvā kammaṃ karontānaṃ āpatti alajjitā ca na vigacchatīti veditabbaṃ. ‘‘Eko alajjī alajjīsatampi karotī’’ti (pārā. aṭṭha. 2.585) hi vuttaṃ, teneva vakkhati ‘‘sabbepi lajjino etesu kammādīsu saha vasantī’’tiādi. Ayañcattho upari vitthārato āvi bhavissati.
ததா²தி ஸீமாபரிச்சி²ன்னேஹீதிஆதி³ங் பராமஸதி. ஏகதோ வந்த³னபு⁴ஞ்ஜனகா³மப்பவேஸனவத்தாபடிவத்தகரணஉக்³க³ஹபரிபுச்சா²ஸஜ்ஜா²யகரணாதி³ஸாமக்³கி³கிரியாவஸேன ப⁴க³வதா பஞ்ஞத்தஸிக்கா²பத³ஸிக்க²னங் ஸமஸிக்க²தா நாம, தஞ்ச லஜ்ஜீஹேவ ஸமங் ஸிக்கி²தப்³ப³ங், ந அலஜ்ஜீஹீதி த³ஸ்ஸேதுங் ‘‘பஞ்ஞத்தங் பன…பே॰… ஸமஸிக்க²தா நாமா’’தி வுத்தங். தத்த² அனதிக்கமனவஸேன உக்³க³ஹபரிபுச்சா²தி³வஸேன ச லஜ்ஜீபுக்³க³லேஹி ஸமங் ஏகதோ ஸிக்கி²தப்³பா³ ஸமஸிக்கா²தி ஸிக்கா²பதா³னி வுத்தானி, தாஸங் ஸமஸிக்க²னங் யதா²வுத்தனயேன லஜ்ஜீஹி ஸிக்கி²தப்³ப³பா⁴வோ ஸமஸிக்க²தா நாமாதி அதி⁴ப்பாயோ. யதா²வுத்தேஸு ஏககம்மாதீ³ஸு அலஜ்ஜீனங் லஜ்ஜித⁴ம்மே அனோக்கந்தே லஜ்ஜீஹி ஸஹ ஸங்வாஸோ நத்தி², ததோ ப³ஹியேவ தே ஸந்தி³ஸ்ஸந்தீதி ஆஹ ஸப்³பே³பி லஜ்ஜினோதிஆதி³.
Tathāti sīmāparicchinnehītiādiṃ parāmasati. Ekato vandanabhuñjanagāmappavesanavattāpaṭivattakaraṇauggahaparipucchāsajjhāyakaraṇādisāmaggikiriyāvasena bhagavatā paññattasikkhāpadasikkhanaṃ samasikkhatā nāma, tañca lajjīheva samaṃ sikkhitabbaṃ, na alajjīhīti dassetuṃ ‘‘paññattaṃ pana…pe… samasikkhatā nāmā’’ti vuttaṃ. Tattha anatikkamanavasena uggahaparipucchādivasena ca lajjīpuggalehi samaṃ ekato sikkhitabbā samasikkhāti sikkhāpadāni vuttāni, tāsaṃ samasikkhanaṃ yathāvuttanayena lajjīhi sikkhitabbabhāvo samasikkhatā nāmāti adhippāyo. Yathāvuttesu ekakammādīsu alajjīnaṃ lajjidhamme anokkante lajjīhi saha saṃvāso natthi, tato bahiyeva te sandissantīti āha sabbepi lajjinotiādi.
56. யங் தங் வுத்தந்தி ஸம்ப³ந்தோ⁴. வத்து²மேவ ந ஹோதீதி ஸுவண்ணாதீ³ஹி கதஇத்தி²ரூபானங் அங்க³ஜாதேஸுபி நிமித்தவோஹாரத³ஸ்ஸனதோ தத்த² பாராஜிகாஸங்கானிவத்தனத்த²ங் வுத்தங். தேனேவ வினீதவத்தூ²ஸு லேபசித்தாதி³வத்தூ²ஸு ஸஞ்ஜாதகுக்குச்சஸ்ஸ பாராஜிகேன அனாபத்தி வுத்தா.
56. Yaṃ taṃ vuttanti sambandho. Vatthumeva na hotīti suvaṇṇādīhi kataitthirūpānaṃ aṅgajātesupi nimittavohāradassanato tattha pārājikāsaṅkānivattanatthaṃ vuttaṃ. Teneva vinītavatthūsu lepacittādivatthūsu sañjātakukkuccassa pārājikena anāpatti vuttā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அனுபஞ்ஞத்திவண்ணனா • Anupaññattivaṇṇanā
