| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
অনুপঞ্ঞত্তিৰণ্ণনা
Anupaññattivaṇṇanā
তিরচ্ছানেসু গতাযাতি তিরচ্ছানেসু উপ্পন্নায। যস্মা তিরচ্ছানগতা নাম অতিখুদ্দকাপি হোন্তি, যেসং মগ্গেসু তিলফলমত্তম্পি পৰেসনং নপ্পহোতি, তস্মা ন সব্বাৰ তিরচ্ছানগতিত্থিযো পারাজিকৰত্থুভূতাতি পৰেসনপ্পহোনকৰসেন লব্ভমানকতিরচ্ছানগতিত্থিযো পরিচ্ছিন্দিত্ৰা দস্সেন্তো ‘‘পারাজিকৰত্থুভূতা এৰ চেত্থা’’তিআদিমাহ। অপদানং অহিমচ্ছাতিআদিগাথা পারাজিকৰত্থূনং হেট্ঠিমপরিচ্ছেদদস্সনত্থং পোরাণেহি ঠপিতা। তত্থ অহীতি জাতিনিদ্দেসেন সব্বাপি সপ্পজাতি সঙ্গহিতাতি আহ – ‘‘অহিগ্গহণেন…পে॰… দীঘজাতি সঙ্গহিতা’’তি। তত্থ গোনসাতি সপ্পৰিসেসা, যেসং পিট্ঠীসু মহন্তানি মণ্ডলানি সন্দিস্সন্তি। মচ্ছগ্গহণং ওদকজাতিযা উপলক্খণপদন্তি আহ – ‘‘মচ্ছগ্গহণেন…পে॰… ওদকজাতি সঙ্গহিতা’’তি। তেনেৰ মণ্ডূককচ্ছপানং সপাদকত্তেপি ওদকজাতিকত্তা সঙ্গহো কতো।
Tiracchānesu gatāyāti tiracchānesu uppannāya. Yasmā tiracchānagatā nāma atikhuddakāpi honti, yesaṃ maggesu tilaphalamattampi pavesanaṃ nappahoti, tasmā na sabbāva tiracchānagatitthiyo pārājikavatthubhūtāti pavesanappahonakavasena labbhamānakatiracchānagatitthiyo paricchinditvā dassento ‘‘pārājikavatthubhūtā eva cetthā’’tiādimāha. Apadānaṃ ahimacchātiādigāthā pārājikavatthūnaṃ heṭṭhimaparicchedadassanatthaṃ porāṇehi ṭhapitā. Tattha ahīti jātiniddesena sabbāpi sappajāti saṅgahitāti āha – ‘‘ahiggahaṇena…pe… dīghajāti saṅgahitā’’ti. Tattha gonasāti sappavisesā, yesaṃ piṭṭhīsu mahantāni maṇḍalāni sandissanti. Macchaggahaṇaṃ odakajātiyā upalakkhaṇapadanti āha – ‘‘macchaggahaṇena…pe… odakajāti saṅgahitā’’ti. Teneva maṇḍūkakacchapānaṃ sapādakattepi odakajātikattā saṅgaho kato.
মুখসণ্ঠানন্তি ওট্ঠচম্মসণ্ঠানং। ৰণসঙ্খেপং গচ্ছতীতি ৰণসঙ্গহং গচ্ছতি নৰসু ৰণমুখেসু সঙ্গহিতত্তাতি অধিপ্পাযো। ৰণে থুল্লচ্চযঞ্চ ‘‘অমগ্গেন অমগ্গং পৰেসেতি, আপত্তি থুল্লচ্চযস্সা’’তি ইমস্স ৰসেন ৰেদিতব্বং। তস্মিঞ্হি সুত্তে দ্ৰীসু সম্ভিন্নৰণেসু একেন ৰণেন পৰেসেত্ৰা দুতিযেন নীহরন্তস্স থুল্লচ্চযং ৰুত্তং। ৰক্খতি চ ‘‘ইমস্স সুত্তস্স অনুলোমৰসেন সব্বত্থ ৰণসঙ্খেপে থুল্লচ্চযং ৰেদিতব্ব’’ন্তি (পারা॰ অট্ঠ॰ ১.৬৬)। কুক্কুটিগ্গহণম্পি সব্বায পক্খিজাতিযা উপলক্খণপদন্তি আহ – ‘‘কুক্কুটিগ্গহণেন…পে॰… পক্খিজাতি সঙ্গহিতা’’তি। মজ্জারিগ্গহণম্পি চতুপ্পদজাতিযা উপলক্খণপদন্তি দট্ঠব্বং। তেনাহ – ‘‘মজ্জারিগ্গহণেন…পে॰… চতুপ্পদজাতি সঙ্গহিতা’’তি। রুক্খসুনখা নাম কলন্দকাতিপি ৰদন্তি। মঙ্গুসাতি নঙ্গুলা।
Mukhasaṇṭhānanti oṭṭhacammasaṇṭhānaṃ. Vaṇasaṅkhepaṃ gacchatīti vaṇasaṅgahaṃ gacchati navasu vaṇamukhesu saṅgahitattāti adhippāyo. Vaṇe thullaccayañca ‘‘amaggena amaggaṃ paveseti, āpatti thullaccayassā’’ti imassa vasena veditabbaṃ. Tasmiñhi sutte dvīsu sambhinnavaṇesu ekena vaṇena pavesetvā dutiyena nīharantassa thullaccayaṃ vuttaṃ. Vakkhati ca ‘‘imassa suttassa anulomavasena sabbattha vaṇasaṅkhepe thullaccayaṃ veditabba’’nti (pārā. aṭṭha. 1.66). Kukkuṭiggahaṇampi sabbāya pakkhijātiyā upalakkhaṇapadanti āha – ‘‘kukkuṭiggahaṇena…pe… pakkhijāti saṅgahitā’’ti. Majjāriggahaṇampi catuppadajātiyā upalakkhaṇapadanti daṭṭhabbaṃ. Tenāha – ‘‘majjāriggahaṇena…pe… catuppadajāti saṅgahitā’’ti. Rukkhasunakhā nāma kalandakātipi vadanti. Maṅgusāti naṅgulā.
পরাজিত-সদ্দো উপসগ্গস্স ৰুদ্ধিং কত্ৰা ত-কারস্স চ ক-কারং কত্ৰা পারাজিকোতি নিদ্দিট্ঠোতি আহ ‘‘পারাজিকোতি পরাজিতো’’তি। ‘‘কত্থচি আপত্তীতি ‘পারাজিকেন ধম্মেন অনুদ্ধংসেয্যা’তিআদীসু (পারা॰ ৩৮৪, ৩৯১), কত্থচি সিক্খাপদন্তি ইদং পন দিস্ৰা জানিতব্ব’’ন্তি গণ্ঠিপদেসু ৰুত্তং। পরাজযতীতি পারাজিকং, পারাজিকাতি চ কত্তুসাধনেন পারাজিক-সদ্দেন সিক্খাপদং আপত্তি চ ৰুচ্চতীতি দস্সেন্তো আহ ‘‘যো তং অতিক্কমতী’’তিআদি। পুগ্গলো পন কম্মসাধনেন পারাজিক-সদ্দেন ৰুচ্চতীতি দস্সেন্তো আহ ‘‘পুগ্গলো যস্মা পরাজিতো’’তিআদি।
Parājita-saddo upasaggassa vuddhiṃ katvā ta-kārassa ca ka-kāraṃ katvā pārājikoti niddiṭṭhoti āha ‘‘pārājikoti parājito’’ti. ‘‘Katthaci āpattīti ‘pārājikena dhammena anuddhaṃseyyā’tiādīsu (pārā. 384, 391), katthaci sikkhāpadanti idaṃ pana disvā jānitabba’’nti gaṇṭhipadesu vuttaṃ. Parājayatīti pārājikaṃ, pārājikāti ca kattusādhanena pārājika-saddena sikkhāpadaṃ āpatti ca vuccatīti dassento āha ‘‘yo taṃ atikkamatī’’tiādi. Puggalo pana kammasādhanena pārājika-saddena vuccatīti dassento āha ‘‘puggalo yasmā parājito’’tiādi.
এতমেৰ হি অত্থং সন্ধাযাতি ‘‘তং আপত্তিং আপন্নো পুগ্গলো পরাজিতো হোতি পরাজযমাপন্নো’’তি এতমত্থং সন্ধায। চুতো পরদ্ধোতিআদিনা হি তং আপত্তিং আপন্নপুগ্গলো চুতো হোতি পরাজিতো পরাজযং আপন্নোতি অযমত্থো ৰিঞ্ঞাযতি, ন পন পুগ্গলো পারাজিকো নাম হোতীতি এতমত্থং সন্ধাযাতি এৰমত্থো গহেতব্বো। ন হি পরিৰারেপি গাথা পুগ্গলৰুত্তিপারাজিকসদ্দনিব্বচনদস্সনত্থং ৰুত্তা আপত্তিৰুত্তীনং পারাজিকা-দিসদ্দানং নিব্বচনৰিভাগপ্পসঙ্গে ৰুত্তত্তা। অযঞ্হি পরিৰারগাথায অত্থো (পরি॰ অট্ঠ॰ ৩৩৯) – যদিদং পুগ্গলাপত্তিসিক্খাপদপারাজিকেসু আপত্তিপারাজিকং নাম ৰুত্তং, তং আপজ্জন্তো পুগ্গলো যস্মা পরাজিতো পরাজযমাপন্নো সদ্ধমা চুতো পরদ্ধো ভট্ঠো নিরঙ্কতো চ হোতি, অনীহটে তস্মিং পুগ্গলে পুন উপোসথপৰারণাদিভেদো সংৰাসো নত্থি, তেনেতং ইতি ৰুচ্চতি তেন কারণেন এতং আপত্তিপারাজিকং ইতি ৰুচ্চতীতি। অযং পনেত্থ সঙ্খেপত্থো – যস্মা পরাজিতো হোতি এতেন, তস্মা এতং পারাজিকন্তি ৰুচ্চতীতি। পরিভট্ঠোতি সাসনতো ভট্ঠো, পরিহীনোতি অত্থো। ছিন্নোতি অন্তরা খণ্ডিতো।
Etameva hi atthaṃ sandhāyāti ‘‘taṃ āpattiṃ āpanno puggalo parājito hoti parājayamāpanno’’ti etamatthaṃ sandhāya. Cuto paraddhotiādinā hi taṃ āpattiṃ āpannapuggalo cuto hoti parājito parājayaṃ āpannoti ayamattho viññāyati, na pana puggalo pārājiko nāma hotīti etamatthaṃ sandhāyāti evamattho gahetabbo. Na hi parivārepi gāthā puggalavuttipārājikasaddanibbacanadassanatthaṃ vuttā āpattivuttīnaṃ pārājikā-disaddānaṃ nibbacanavibhāgappasaṅge vuttattā. Ayañhi parivāragāthāya attho (pari. aṭṭha. 339) – yadidaṃ puggalāpattisikkhāpadapārājikesu āpattipārājikaṃ nāma vuttaṃ, taṃ āpajjanto puggalo yasmā parājito parājayamāpanno saddhamā cuto paraddho bhaṭṭho niraṅkato ca hoti, anīhaṭe tasmiṃ puggale puna uposathapavāraṇādibhedo saṃvāso natthi, tenetaṃ iti vuccati tena kāraṇena etaṃ āpattipārājikaṃ iti vuccatīti. Ayaṃ panettha saṅkhepattho – yasmā parājito hoti etena, tasmā etaṃ pārājikanti vuccatīti. Paribhaṭṭhoti sāsanato bhaṭṭho, parihīnoti attho. Chinnoti antarā khaṇḍito.
সদ্ধিং যোজনাযাতি পদযোজনায সদ্ধিং। চতুব্বিধং সঙ্ঘকম্মন্তি অপলোকনাদিৰসেন চতুব্বিধং কম্মং। সীমাপরিচ্ছিন্নেহীতি একসীমাপরিযাপন্নেহি। পকতত্তা নাম পারাজিকং অনাপন্না অনুক্খিত্তা চ। পঞ্চৰিধোপীতি নিদানুদ্দেসাদিৰসেন পঞ্চৰিধোপি। নহাপিতপুব্বকানং ৰিয ওধিসঅনুঞ্ঞাতং ঠপেত্ৰা অৰসেসং সব্বম্পি সিক্খাপদং সব্বেহিপি লজ্জীপুগ্গলেহি অনতিক্কমনীযত্তা ৰুত্তং ‘‘সব্বেহিপি লজ্জীপুগ্গলেহি সমং সিক্খিতব্বভাৰতো’’তি। সমন্তি সদ্ধিং, একপ্পহারেন ৰা। সিক্খিতব্বভাৰতোতি অনতিক্কমনৰসেন উগ্গহপরিপুচ্ছাদিনা চ সিক্খিতব্বভাৰতো। সামঞ্ঞসিক্খাপদেসু ‘‘ইদং তযা ন সিক্খিতব্ব’’ন্তি এৰং অবহিকাতব্বতো ‘‘ন একোপি ততো বহিদ্ধা সন্দিস্সতী’’তি ৰুত্তং। যং তং ৰুত্তন্তি সম্বন্ধো।
Saddhiṃ yojanāyāti padayojanāya saddhiṃ. Catubbidhaṃ saṅghakammanti apalokanādivasena catubbidhaṃ kammaṃ. Sīmāparicchinnehīti ekasīmāpariyāpannehi. Pakatattā nāma pārājikaṃ anāpannā anukkhittā ca. Pañcavidhopīti nidānuddesādivasena pañcavidhopi. Nahāpitapubbakānaṃ viya odhisaanuññātaṃ ṭhapetvā avasesaṃ sabbampi sikkhāpadaṃ sabbehipi lajjīpuggalehi anatikkamanīyattā vuttaṃ ‘‘sabbehipi lajjīpuggalehi samaṃ sikkhitabbabhāvato’’ti. Samanti saddhiṃ, ekappahārena vā. Sikkhitabbabhāvatoti anatikkamanavasena uggahaparipucchādinā ca sikkhitabbabhāvato. Sāmaññasikkhāpadesu ‘‘idaṃ tayā na sikkhitabba’’nti evaṃ abahikātabbato ‘‘na ekopi tato bahiddhā sandissatī’’ti vuttaṃ. Yaṃ taṃ vuttanti sambandho.
৫৬. ন কেৰলং ইত্থিযা এৰ নিমিত্তং পারাজিকৰত্থূতি ইমিনা কেৰলং ইত্থিযা এৰ নিমিত্তং পারাজিকৰত্থু ন হোতি, অথ খো উভতোব্যঞ্জনকপণ্ডকপুরিসানম্পি নিমিত্তং পারাজিকৰত্থূতি দস্সেতি। ন চ মনুস্সিত্থিযা এৰাতি ইমিনা পন মনুস্সিত্থিযা এৰ নিমিত্তং পারাজিকৰত্থু ন হোতি, অমনুস্সিত্থিতিরচ্ছানগতিত্থিঅমনুস্সুভতোব্যঞ্জনকাদীনম্পি নিমিত্তং পারাজিকৰত্থূতি দস্সেতি। ‘‘ৰত্থুমেৰ ন হোতীতি অমনুস্সিত্থিপসঙ্গেন আগতং সুৰণ্ণরজতাদিমযং পটিক্খিপতী’’তি তীসুপি গণ্ঠিপদেসু ৰুত্তং, তং যুত্তং ৰিয ন দিস্সতি। ন হি ইতো পুব্বে অমনুস্সিত্থিগ্গহণং কতং অত্থি, যেন তপ্পসঙ্গো সিযা। ইদানেৰ হি ‘‘তিস্সো ইত্থিযো’’তিআদিনা অমনুস্সিত্থিগ্গহণং কতং, ন চ অমনুস্সিত্থিগ্গহণেন সুৰণ্ণরজতাদিমযানং পসঙ্গো যুত্তো। মনুস্সামনুস্সতিরচ্ছানজাতিৰসেন তিৰিধা কত্ৰা পারাজিকৰত্থুভূতসত্তানং নিদ্দেসেন সুৰণ্ণরজতাদিমযানং পসঙ্গস্স নিৰত্তিতত্তা। তথা হি ইত্থিপুরিসাদীসু মনুস্সামনুস্সাদীসু ৰা কঞ্চি অনামসিত্ৰা অৰিসেসেন ‘‘মেথুনং ধম্মং পটিসেৰেয্যা’’তি এত্তকমেৰ মাতিকাযং ৰুত্তং। তস্স পদভাজনে চ ‘‘পটিসেৰতি নামা’’তি মাতিকং পদং উদ্ধরিত্ৰা ‘‘যো নিমিত্তেন নিমিত্তং অঙ্গজাতেন অঙ্গজাতং অন্তমসো তিলফলমত্তম্পি পৰেসেতি, এসো পটিসেৰতি নামা’’তি পটিসেৰনাকারোৰ দস্সিতো, ন পন পারাজিকৰত্থুভূতনিমিত্তনিস্সযা মনুস্সামনুস্সতিরচ্ছানগতা ইত্থিপুরিসপণ্ডকউভতোব্যঞ্জনকা নিযমেত্ৰা দস্সিতা, তস্মা ‘‘ইত্থিযা এৰ নু খো নিমিত্তং পারাজিকৰত্থু, উদাহু অঞ্ঞেসম্পী’’তি এৰমাদি সন্দেহো সিযা, নিমিত্তৰোহারো চ সুৰণ্ণরজতাদিমযরূপকেসু চ লব্ভতিযেৰ। তেনেৰ ৰিনীতৰত্থূসু (পারা॰ ৭১) ‘‘লেপচিত্তস্স নিমিত্তং অঙ্গজাতেন ছুপি, দারুধীতলিকায নিমিত্তং অঙ্গজাতেন ছুপী’’তি ৰুত্তং, তস্মা নিমিত্তসামঞ্ঞতো ‘‘সুৰণ্ণরজতাদিমযানম্পি নিমিত্তং পারাজিকৰত্থু হোতি, ন হোতী’’তি কস্সচি আসঙ্কা সিযা। তেনেৰ ‘‘লেপচিত্তাদিৰত্থূসু তস্স কুক্কুচ্চং অহোসী’’তি ৰুত্তং। তস্মা তদাসঙ্কানিৰত্তনত্থং পারাজিকৰত্থুভূতসত্তনিযমনত্থঞ্চ জাতিৰসেন মনুস্সামনুস্সাদিতো তিধা কত্ৰা পারাজিকৰত্থুভূতে সত্তে ভগৰা ৰিভজিত্ৰা দস্সেতি, তস্মা ‘‘ৰত্থুমেৰ ন হোতী’’তি নিমিত্তসামঞ্ঞতো পসঙ্গাগতং সুৰণ্ণরজতাদিমযানং নিমিত্তং পটিক্খিপতীতি ৰত্তব্বং।
56.Na kevalaṃ itthiyā eva nimittaṃ pārājikavatthūti iminā kevalaṃ itthiyā eva nimittaṃ pārājikavatthu na hoti, atha kho ubhatobyañjanakapaṇḍakapurisānampi nimittaṃ pārājikavatthūti dasseti. Na ca manussitthiyā evāti iminā pana manussitthiyā eva nimittaṃ pārājikavatthu na hoti, amanussitthitiracchānagatitthiamanussubhatobyañjanakādīnampi nimittaṃ pārājikavatthūti dasseti. ‘‘Vatthumeva na hotīti amanussitthipasaṅgena āgataṃ suvaṇṇarajatādimayaṃ paṭikkhipatī’’ti tīsupi gaṇṭhipadesu vuttaṃ, taṃ yuttaṃ viya na dissati. Na hi ito pubbe amanussitthiggahaṇaṃ kataṃ atthi, yena tappasaṅgo siyā. Idāneva hi ‘‘tisso itthiyo’’tiādinā amanussitthiggahaṇaṃ kataṃ, na ca amanussitthiggahaṇena suvaṇṇarajatādimayānaṃ pasaṅgo yutto. Manussāmanussatiracchānajātivasena tividhā katvā pārājikavatthubhūtasattānaṃ niddesena suvaṇṇarajatādimayānaṃ pasaṅgassa nivattitattā. Tathā hi itthipurisādīsu manussāmanussādīsu vā kañci anāmasitvā avisesena ‘‘methunaṃ dhammaṃ paṭiseveyyā’’ti ettakameva mātikāyaṃ vuttaṃ. Tassa padabhājane ca ‘‘paṭisevati nāmā’’ti mātikaṃ padaṃ uddharitvā ‘‘yo nimittena nimittaṃ aṅgajātena aṅgajātaṃ antamaso tilaphalamattampi paveseti, eso paṭisevati nāmā’’ti paṭisevanākārova dassito, na pana pārājikavatthubhūtanimittanissayā manussāmanussatiracchānagatā itthipurisapaṇḍakaubhatobyañjanakā niyametvā dassitā, tasmā ‘‘itthiyā eva nu kho nimittaṃ pārājikavatthu, udāhu aññesampī’’ti evamādi sandeho siyā, nimittavohāro ca suvaṇṇarajatādimayarūpakesu ca labbhatiyeva. Teneva vinītavatthūsu (pārā. 71) ‘‘lepacittassa nimittaṃ aṅgajātena chupi, dārudhītalikāya nimittaṃ aṅgajātena chupī’’ti vuttaṃ, tasmā nimittasāmaññato ‘‘suvaṇṇarajatādimayānampi nimittaṃ pārājikavatthu hoti, na hotī’’ti kassaci āsaṅkā siyā. Teneva ‘‘lepacittādivatthūsu tassa kukkuccaṃ ahosī’’ti vuttaṃ. Tasmā tadāsaṅkānivattanatthaṃ pārājikavatthubhūtasattaniyamanatthañca jātivasena manussāmanussādito tidhā katvā pārājikavatthubhūte satte bhagavā vibhajitvā dasseti, tasmā ‘‘vatthumeva na hotī’’ti nimittasāmaññato pasaṅgāgataṃ suvaṇṇarajatādimayānaṃ nimittaṃ paṭikkhipatīti vattabbaṃ.
তযো মগ্গেতি ভুম্মত্থে উপযোগৰচনন্তি আহ ‘‘তীসু মগ্গেসূতি অত্থো ৰেদিতব্বো’’তি। এৰং সব্বত্থাতি ইমিনা ‘‘দ্ৰে মগ্গে’’তি এত্থাপি দ্ৰীসু মগ্গেসূতি অত্থো ৰেদিতব্বোতি অতিদিস্সতি।
Tayo maggeti bhummatthe upayogavacananti āha ‘‘tīsu maggesūti attho veditabbo’’ti. Evaṃ sabbatthāti iminā ‘‘dve magge’’ti etthāpi dvīsu maggesūti attho veditabboti atidissati.
অনুপঞ্ঞত্তিৰণ্ণনা নিট্ঠিতা।
Anupaññattivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পঠমপারাজিকং • 1. Paṭhamapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. পঠমপারাজিকং • 1. Paṭhamapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অনুপঞ্ঞত্তিৰণ্ণনা • Anupaññattivaṇṇanā
