| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
анубан̃н̃ад̇д̇иван̣н̣анаа
Anupaññattivaṇṇanā
д̇иражчаанзсу г̇ад̇ааяаад̇и д̇иражчаанзсу уббаннааяа. яасмаа д̇иражчаанаг̇ад̇аа наама ад̇икуд̣̇д̣̇агааби хонд̇и, язсам̣ маг̇г̇зсу д̇илапаламад̇д̇амби бавзсанам̣ наббаход̇и, д̇асмаа на саб̣б̣аава д̇иражчаанаг̇ад̇ид̇т̇ияо баарааж̇игавад̇т̇убхууд̇аад̇и бавзсанаббахонагавасзна лаб̣бхамаанагад̇иражчаанаг̇ад̇ид̇т̇ияо барижчинд̣̇ид̇ваа д̣̇ассзнд̇о ‘‘баарааж̇игавад̇т̇убхууд̇аа зва жзд̇т̇аа’’д̇иаад̣̇имааха. абад̣̇аанам̣ ахимажчаад̇иаад̣̇иг̇аат̇аа баарааж̇игавад̇т̇уунам̣ хздтимабарижчзд̣̇ад̣̇ассанад̇т̇ам̣ бораан̣зхи табид̇аа. д̇ад̇т̇а ахийд̇и ж̇аад̇инид̣̇д̣̇зсзна саб̣б̣ааби саббаж̇аад̇и сан̇г̇ахид̇аад̇и ааха – ‘‘ахиг̇г̇ахан̣зна…бз… д̣̇ийгхаж̇аад̇и сан̇г̇ахид̇аа’’д̇и. д̇ад̇т̇а г̇онасаад̇и саббависзсаа, язсам̣ бидтийсу маханд̇аани ман̣д̣алаани санд̣̇иссанд̇и. мажчаг̇г̇ахан̣ам̣ од̣̇агаж̇аад̇ияаа убалагкан̣абад̣̇анд̇и ааха – ‘‘мажчаг̇г̇ахан̣зна…бз… од̣̇агаж̇аад̇и сан̇г̇ахид̇аа’’д̇и. д̇знзва ман̣д̣уугагажчабаанам̣ сабаад̣̇агад̇д̇зби од̣̇агаж̇аад̇игад̇д̇аа сан̇г̇ахо гад̇о.
Tiracchānesu gatāyāti tiracchānesu uppannāya. Yasmā tiracchānagatā nāma atikhuddakāpi honti, yesaṃ maggesu tilaphalamattampi pavesanaṃ nappahoti, tasmā na sabbāva tiracchānagatitthiyo pārājikavatthubhūtāti pavesanappahonakavasena labbhamānakatiracchānagatitthiyo paricchinditvā dassento ‘‘pārājikavatthubhūtā eva cetthā’’tiādimāha. Apadānaṃ ahimacchātiādigāthā pārājikavatthūnaṃ heṭṭhimaparicchedadassanatthaṃ porāṇehi ṭhapitā. Tattha ahīti jātiniddesena sabbāpi sappajāti saṅgahitāti āha – ‘‘ahiggahaṇena…pe… dīghajāti saṅgahitā’’ti. Tattha gonasāti sappavisesā, yesaṃ piṭṭhīsu mahantāni maṇḍalāni sandissanti. Macchaggahaṇaṃ odakajātiyā upalakkhaṇapadanti āha – ‘‘macchaggahaṇena…pe… odakajāti saṅgahitā’’ti. Teneva maṇḍūkakacchapānaṃ sapādakattepi odakajātikattā saṅgaho kato.
мукасан̣таананд̇и одтажаммасан̣таанам̣. ван̣асан̇кзбам̣ г̇ажчад̇ийд̇и ван̣асан̇г̇ахам̣ г̇ажчад̇и навасу ван̣амукзсу сан̇г̇ахид̇ад̇д̇аад̇и ад̇хиббааяо. ван̣з т̇уллажжаяан̃жа ‘‘амаг̇г̇зна амаг̇г̇ам̣ бавзсзд̇и, аабад̇д̇и т̇уллажжаяассаа’’д̇и имасса васзна взд̣̇ид̇аб̣б̣ам̣. д̇асмин̃хи суд̇д̇з д̣̇вийсу самбхиннаван̣зсу згзна ван̣зна бавзсзд̇ваа д̣̇уд̇иязна нийхаранд̇асса т̇уллажжаяам̣ вуд̇д̇ам̣. вагкад̇и жа ‘‘имасса суд̇д̇асса ануломавасзна саб̣б̣ад̇т̇а ван̣асан̇кзбз т̇уллажжаяам̣ взд̣̇ид̇аб̣б̣а’’нд̇и (баараа. адта. 1.66). гуггудиг̇г̇ахан̣амби саб̣б̣ааяа багкиж̇аад̇ияаа убалагкан̣абад̣̇анд̇и ааха – ‘‘гуггудиг̇г̇ахан̣зна…бз… багкиж̇аад̇и сан̇г̇ахид̇аа’’д̇и. маж̇ж̇аариг̇г̇ахан̣амби жад̇уббад̣̇аж̇аад̇ияаа убалагкан̣абад̣̇анд̇и д̣̇адтаб̣б̣ам̣. д̇знааха – ‘‘маж̇ж̇аариг̇г̇ахан̣зна…бз… жад̇уббад̣̇аж̇аад̇и сан̇г̇ахид̇аа’’д̇и. ругкасунакаа наама галанд̣̇агаад̇иби вад̣̇анд̇и. ман̇г̇усаад̇и нан̇г̇улаа.
Mukhasaṇṭhānanti oṭṭhacammasaṇṭhānaṃ. Vaṇasaṅkhepaṃ gacchatīti vaṇasaṅgahaṃ gacchati navasu vaṇamukhesu saṅgahitattāti adhippāyo. Vaṇe thullaccayañca ‘‘amaggena amaggaṃ paveseti, āpatti thullaccayassā’’ti imassa vasena veditabbaṃ. Tasmiñhi sutte dvīsu sambhinnavaṇesu ekena vaṇena pavesetvā dutiyena nīharantassa thullaccayaṃ vuttaṃ. Vakkhati ca ‘‘imassa suttassa anulomavasena sabbattha vaṇasaṅkhepe thullaccayaṃ veditabba’’nti (pārā. aṭṭha. 1.66). Kukkuṭiggahaṇampi sabbāya pakkhijātiyā upalakkhaṇapadanti āha – ‘‘kukkuṭiggahaṇena…pe… pakkhijāti saṅgahitā’’ti. Majjāriggahaṇampi catuppadajātiyā upalakkhaṇapadanti daṭṭhabbaṃ. Tenāha – ‘‘majjāriggahaṇena…pe… catuppadajāti saṅgahitā’’ti. Rukkhasunakhā nāma kalandakātipi vadanti. Maṅgusāti naṅgulā.
барааж̇ид̇а-сад̣̇д̣̇о убасаг̇г̇асса вуд̣̇д̇хим̣ гад̇ваа д̇а-гаарасса жа га-гаарам̣ гад̇ваа баарааж̇игод̇и нид̣̇д̣̇идтод̇и ааха ‘‘баарааж̇игод̇и барааж̇ид̇о’’д̇и. ‘‘гад̇т̇ажи аабад̇д̇ийд̇и ‘баарааж̇игзна д̇хаммзна ануд̣̇д̇хам̣сзяяаа’д̇иаад̣̇ийсу (баараа. 384, 391), гад̇т̇ажи сигкаабад̣̇анд̇и ид̣̇ам̣ бана д̣̇исваа ж̇аанид̇аб̣б̣а’’нд̇и г̇ан̣тибад̣̇зсу вуд̇д̇ам̣. барааж̇аяад̇ийд̇и баарааж̇игам̣, баарааж̇игаад̇и жа гад̇д̇усаад̇ханзна баарааж̇ига-сад̣̇д̣̇зна сигкаабад̣̇ам̣ аабад̇д̇и жа вужжад̇ийд̇и д̣̇ассзнд̇о ааха ‘‘яо д̇ам̣ ад̇иггамад̇ий’’д̇иаад̣̇и. буг̇г̇ало бана гаммасаад̇ханзна баарааж̇ига-сад̣̇д̣̇зна вужжад̇ийд̇и д̣̇ассзнд̇о ааха ‘‘буг̇г̇ало яасмаа барааж̇ид̇о’’д̇иаад̣̇и.
Parājita-saddo upasaggassa vuddhiṃ katvā ta-kārassa ca ka-kāraṃ katvā pārājikoti niddiṭṭhoti āha ‘‘pārājikoti parājito’’ti. ‘‘Katthaci āpattīti ‘pārājikena dhammena anuddhaṃseyyā’tiādīsu (pārā. 384, 391), katthaci sikkhāpadanti idaṃ pana disvā jānitabba’’nti gaṇṭhipadesu vuttaṃ. Parājayatīti pārājikaṃ, pārājikāti ca kattusādhanena pārājika-saddena sikkhāpadaṃ āpatti ca vuccatīti dassento āha ‘‘yo taṃ atikkamatī’’tiādi. Puggalo pana kammasādhanena pārājika-saddena vuccatīti dassento āha ‘‘puggalo yasmā parājito’’tiādi.
зд̇амзва хи ад̇т̇ам̣ санд̇хааяаад̇и ‘‘д̇ам̣ аабад̇д̇им̣ аабанно буг̇г̇ало барааж̇ид̇о ход̇и барааж̇аяамаабанно’’д̇и зд̇амад̇т̇ам̣ санд̇хааяа. жуд̇о барад̣̇д̇ход̇иаад̣̇инаа хи д̇ам̣ аабад̇д̇им̣ аабаннабуг̇г̇ало жуд̇о ход̇и барааж̇ид̇о барааж̇аяам̣ аабаннод̇и аяамад̇т̇о вин̃н̃ааяад̇и, на бана буг̇г̇ало баарааж̇иго наама ход̇ийд̇и зд̇амад̇т̇ам̣ санд̇хааяаад̇и звамад̇т̇о г̇ахзд̇аб̣б̣о. на хи бариваарзби г̇аат̇аа буг̇г̇алавуд̇д̇ибаарааж̇игасад̣̇д̣̇аниб̣б̣ажанад̣̇ассанад̇т̇ам̣ вуд̇д̇аа аабад̇д̇ивуд̇д̇ийнам̣ баарааж̇игаа-д̣̇исад̣̇д̣̇аанам̣ ниб̣б̣ажанавибхааг̇аббасан̇г̇з вуд̇д̇ад̇д̇аа. аяан̃хи бариваараг̇аат̇ааяа ад̇т̇о (бари. адта. 339) – яад̣̇ид̣̇ам̣ буг̇г̇алаабад̇д̇исигкаабад̣̇абаарааж̇игзсу аабад̇д̇ибаарааж̇игам̣ наама вуд̇д̇ам̣, д̇ам̣ аабаж̇ж̇анд̇о буг̇г̇ало яасмаа барааж̇ид̇о барааж̇аяамаабанно сад̣̇д̇хамаа жуд̇о барад̣̇д̇хо бхадто ниран̇гад̇о жа ход̇и, анийхадз д̇асмим̣ буг̇г̇алз буна убосат̇абавааран̣аад̣̇ибхзд̣̇о сам̣ваасо над̇т̇и, д̇знзд̇ам̣ ид̇и вужжад̇и д̇зна гааран̣зна зд̇ам̣ аабад̇д̇ибаарааж̇игам̣ ид̇и вужжад̇ийд̇и. аяам̣ банзд̇т̇а сан̇кзбад̇т̇о – яасмаа барааж̇ид̇о ход̇и зд̇зна, д̇асмаа зд̇ам̣ баарааж̇иганд̇и вужжад̇ийд̇и. барибхадтод̇и саасанад̇о бхадто, барихийнод̇и ад̇т̇о. чиннод̇и анд̇араа кан̣д̣ид̇о.
Etameva hi atthaṃ sandhāyāti ‘‘taṃ āpattiṃ āpanno puggalo parājito hoti parājayamāpanno’’ti etamatthaṃ sandhāya. Cuto paraddhotiādinā hi taṃ āpattiṃ āpannapuggalo cuto hoti parājito parājayaṃ āpannoti ayamattho viññāyati, na pana puggalo pārājiko nāma hotīti etamatthaṃ sandhāyāti evamattho gahetabbo. Na hi parivārepi gāthā puggalavuttipārājikasaddanibbacanadassanatthaṃ vuttā āpattivuttīnaṃ pārājikā-disaddānaṃ nibbacanavibhāgappasaṅge vuttattā. Ayañhi parivāragāthāya attho (pari. aṭṭha. 339) – yadidaṃ puggalāpattisikkhāpadapārājikesu āpattipārājikaṃ nāma vuttaṃ, taṃ āpajjanto puggalo yasmā parājito parājayamāpanno saddhamā cuto paraddho bhaṭṭho niraṅkato ca hoti, anīhaṭe tasmiṃ puggale puna uposathapavāraṇādibhedo saṃvāso natthi, tenetaṃ iti vuccati tena kāraṇena etaṃ āpattipārājikaṃ iti vuccatīti. Ayaṃ panettha saṅkhepattho – yasmā parājito hoti etena, tasmā etaṃ pārājikanti vuccatīti. Paribhaṭṭhoti sāsanato bhaṭṭho, parihīnoti attho. Chinnoti antarā khaṇḍito.
сад̣̇д̇хим̣ яож̇анааяаад̇и бад̣̇аяож̇анааяа сад̣̇д̇хим̣. жад̇уб̣б̣ид̇хам̣ сан̇гхагамманд̇и абалоганаад̣̇ивасзна жад̇уб̣б̣ид̇хам̣ гаммам̣. сиймаабарижчиннзхийд̇и згасиймаабарияаабаннзхи. багад̇ад̇д̇аа наама баарааж̇игам̣ анаабаннаа анугкид̇д̇аа жа. бан̃жавид̇хобийд̇и нид̣̇аануд̣̇д̣̇зсаад̣̇ивасзна бан̃жавид̇хоби. нахаабид̇абуб̣б̣агаанам̣ вияа од̇хисаанун̃н̃аад̇ам̣ табзд̇ваа авасзсам̣ саб̣б̣амби сигкаабад̣̇ам̣ саб̣б̣зхиби лаж̇ж̇ийбуг̇г̇алзхи анад̇иггаманийяад̇д̇аа вуд̇д̇ам̣ ‘‘саб̣б̣зхиби лаж̇ж̇ийбуг̇г̇алзхи самам̣ сигкид̇аб̣б̣абхаавад̇о’’д̇и. саманд̇и сад̣̇д̇хим̣, згаббахаарзна ваа. сигкид̇аб̣б̣абхаавад̇од̇и анад̇иггаманавасзна уг̇г̇ахабарибужчаад̣̇инаа жа сигкид̇аб̣б̣абхаавад̇о. сааман̃н̃асигкаабад̣̇зсу ‘‘ид̣̇ам̣ д̇аяаа на сигкид̇аб̣б̣а’’нд̇и звам̣ аб̣ахигаад̇аб̣б̣ад̇о ‘‘на згоби д̇ад̇о б̣ахид̣̇д̇хаа санд̣̇иссад̇ий’’д̇и вуд̇д̇ам̣. яам̣ д̇ам̣ вуд̇д̇анд̇и самб̣анд̇хо.
Saddhiṃ yojanāyāti padayojanāya saddhiṃ. Catubbidhaṃ saṅghakammanti apalokanādivasena catubbidhaṃ kammaṃ. Sīmāparicchinnehīti ekasīmāpariyāpannehi. Pakatattā nāma pārājikaṃ anāpannā anukkhittā ca. Pañcavidhopīti nidānuddesādivasena pañcavidhopi. Nahāpitapubbakānaṃ viya odhisaanuññātaṃ ṭhapetvā avasesaṃ sabbampi sikkhāpadaṃ sabbehipi lajjīpuggalehi anatikkamanīyattā vuttaṃ ‘‘sabbehipi lajjīpuggalehi samaṃ sikkhitabbabhāvato’’ti. Samanti saddhiṃ, ekappahārena vā. Sikkhitabbabhāvatoti anatikkamanavasena uggahaparipucchādinā ca sikkhitabbabhāvato. Sāmaññasikkhāpadesu ‘‘idaṃ tayā na sikkhitabba’’nti evaṃ abahikātabbato ‘‘na ekopi tato bahiddhā sandissatī’’ti vuttaṃ. Yaṃ taṃ vuttanti sambandho.
56. на гзвалам̣ ид̇т̇ияаа зва нимид̇д̇ам̣ баарааж̇игавад̇т̇ууд̇и иминаа гзвалам̣ ид̇т̇ияаа зва нимид̇д̇ам̣ баарааж̇игавад̇т̇у на ход̇и, ат̇а ко убхад̇об̣яан̃ж̇анагабан̣д̣агабурисаанамби нимид̇д̇ам̣ баарааж̇игавад̇т̇ууд̇и д̣̇ассзд̇и. на жа мануссид̇т̇ияаа зваад̇и иминаа бана мануссид̇т̇ияаа зва нимид̇д̇ам̣ баарааж̇игавад̇т̇у на ход̇и, амануссид̇т̇ид̇иражчаанаг̇ад̇ид̇т̇иамануссубхад̇об̣яан̃ж̇анагаад̣̇ийнамби нимид̇д̇ам̣ баарааж̇игавад̇т̇ууд̇и д̣̇ассзд̇и. ‘‘вад̇т̇умзва на ход̇ийд̇и амануссид̇т̇ибасан̇г̇зна ааг̇ад̇ам̣ суван̣н̣араж̇ад̇аад̣̇имаяам̣ бадигкибад̇ий’’д̇и д̇ийсуби г̇ан̣тибад̣̇зсу вуд̇д̇ам̣, д̇ам̣ яуд̇д̇ам̣ вияа на д̣̇иссад̇и. на хи ид̇о буб̣б̣з амануссид̇т̇иг̇г̇ахан̣ам̣ гад̇ам̣ ад̇т̇и, язна д̇аббасан̇г̇о сияаа. ид̣̇аанзва хи ‘‘д̇иссо ид̇т̇ияо’’д̇иаад̣̇инаа амануссид̇т̇иг̇г̇ахан̣ам̣ гад̇ам̣, на жа амануссид̇т̇иг̇г̇ахан̣зна суван̣н̣араж̇ад̇аад̣̇имаяаанам̣ басан̇г̇о яуд̇д̇о. мануссаамануссад̇иражчаанаж̇аад̇ивасзна д̇ивид̇хаа гад̇ваа баарааж̇игавад̇т̇убхууд̇асад̇д̇аанам̣ нид̣̇д̣̇зсзна суван̣н̣араж̇ад̇аад̣̇имаяаанам̣ басан̇г̇асса нивад̇д̇ид̇ад̇д̇аа. д̇ат̇аа хи ид̇т̇ибурисаад̣̇ийсу мануссаамануссаад̣̇ийсу ваа ган̃жи анаамасид̇ваа ависзсзна ‘‘мзт̇унам̣ д̇хаммам̣ бадисзвзяяаа’’д̇и зд̇д̇агамзва маад̇игааяам̣ вуд̇д̇ам̣. д̇асса бад̣̇абхааж̇анз жа ‘‘бадисзвад̇и наамаа’’д̇и маад̇игам̣ бад̣̇ам̣ уд̣̇д̇харид̇ваа ‘‘яо нимид̇д̇зна нимид̇д̇ам̣ ан̇г̇аж̇аад̇зна ан̇г̇аж̇аад̇ам̣ анд̇амасо д̇илапаламад̇д̇амби бавзсзд̇и, зсо бадисзвад̇и наамаа’’д̇и бадисзванаагаарова д̣̇ассид̇о, на бана баарааж̇игавад̇т̇убхууд̇анимид̇д̇аниссаяаа мануссаамануссад̇иражчаанаг̇ад̇аа ид̇т̇ибурисабан̣д̣агаубхад̇об̣яан̃ж̇анагаа нияамзд̇ваа д̣̇ассид̇аа, д̇асмаа ‘‘ид̇т̇ияаа зва ну ко нимид̇д̇ам̣ баарааж̇игавад̇т̇у, уд̣̇ааху ан̃н̃зсамбий’’д̇и звамаад̣̇и санд̣̇зхо сияаа, нимид̇д̇авохааро жа суван̣н̣араж̇ад̇аад̣̇имаяаруубагзсу жа лаб̣бхад̇иязва. д̇знзва винийд̇авад̇т̇уусу (баараа. 71) ‘‘лзбажид̇д̇асса нимид̇д̇ам̣ ан̇г̇аж̇аад̇зна чуби, д̣̇ааруд̇хийд̇алигааяа нимид̇д̇ам̣ ан̇г̇аж̇аад̇зна чубий’’д̇и вуд̇д̇ам̣, д̇асмаа нимид̇д̇асааман̃н̃ад̇о ‘‘суван̣н̣араж̇ад̇аад̣̇имаяаанамби нимид̇д̇ам̣ баарааж̇игавад̇т̇у ход̇и, на ход̇ий’’д̇и гассажи аасан̇гаа сияаа. д̇знзва ‘‘лзбажид̇д̇аад̣̇ивад̇т̇уусу д̇асса гуггужжам̣ ахосий’’д̇и вуд̇д̇ам̣. д̇асмаа д̇ад̣̇аасан̇гаанивад̇д̇анад̇т̇ам̣ баарааж̇игавад̇т̇убхууд̇асад̇д̇анияаманад̇т̇ан̃жа ж̇аад̇ивасзна мануссаамануссаад̣̇ид̇о д̇ид̇хаа гад̇ваа баарааж̇игавад̇т̇убхууд̇з сад̇д̇з бхаг̇аваа вибхаж̇ид̇ваа д̣̇ассзд̇и, д̇асмаа ‘‘вад̇т̇умзва на ход̇ий’’д̇и нимид̇д̇асааман̃н̃ад̇о басан̇г̇ааг̇ад̇ам̣ суван̣н̣араж̇ад̇аад̣̇имаяаанам̣ нимид̇д̇ам̣ бадигкибад̇ийд̇и вад̇д̇аб̣б̣ам̣.
56.Na kevalaṃ itthiyā eva nimittaṃ pārājikavatthūti iminā kevalaṃ itthiyā eva nimittaṃ pārājikavatthu na hoti, atha kho ubhatobyañjanakapaṇḍakapurisānampi nimittaṃ pārājikavatthūti dasseti. Na ca manussitthiyā evāti iminā pana manussitthiyā eva nimittaṃ pārājikavatthu na hoti, amanussitthitiracchānagatitthiamanussubhatobyañjanakādīnampi nimittaṃ pārājikavatthūti dasseti. ‘‘Vatthumeva na hotīti amanussitthipasaṅgena āgataṃ suvaṇṇarajatādimayaṃ paṭikkhipatī’’ti tīsupi gaṇṭhipadesu vuttaṃ, taṃ yuttaṃ viya na dissati. Na hi ito pubbe amanussitthiggahaṇaṃ kataṃ atthi, yena tappasaṅgo siyā. Idāneva hi ‘‘tisso itthiyo’’tiādinā amanussitthiggahaṇaṃ kataṃ, na ca amanussitthiggahaṇena suvaṇṇarajatādimayānaṃ pasaṅgo yutto. Manussāmanussatiracchānajātivasena tividhā katvā pārājikavatthubhūtasattānaṃ niddesena suvaṇṇarajatādimayānaṃ pasaṅgassa nivattitattā. Tathā hi itthipurisādīsu manussāmanussādīsu vā kañci anāmasitvā avisesena ‘‘methunaṃ dhammaṃ paṭiseveyyā’’ti ettakameva mātikāyaṃ vuttaṃ. Tassa padabhājane ca ‘‘paṭisevati nāmā’’ti mātikaṃ padaṃ uddharitvā ‘‘yo nimittena nimittaṃ aṅgajātena aṅgajātaṃ antamaso tilaphalamattampi paveseti, eso paṭisevati nāmā’’ti paṭisevanākārova dassito, na pana pārājikavatthubhūtanimittanissayā manussāmanussatiracchānagatā itthipurisapaṇḍakaubhatobyañjanakā niyametvā dassitā, tasmā ‘‘itthiyā eva nu kho nimittaṃ pārājikavatthu, udāhu aññesampī’’ti evamādi sandeho siyā, nimittavohāro ca suvaṇṇarajatādimayarūpakesu ca labbhatiyeva. Teneva vinītavatthūsu (pārā. 71) ‘‘lepacittassa nimittaṃ aṅgajātena chupi, dārudhītalikāya nimittaṃ aṅgajātena chupī’’ti vuttaṃ, tasmā nimittasāmaññato ‘‘suvaṇṇarajatādimayānampi nimittaṃ pārājikavatthu hoti, na hotī’’ti kassaci āsaṅkā siyā. Teneva ‘‘lepacittādivatthūsu tassa kukkuccaṃ ahosī’’ti vuttaṃ. Tasmā tadāsaṅkānivattanatthaṃ pārājikavatthubhūtasattaniyamanatthañca jātivasena manussāmanussādito tidhā katvā pārājikavatthubhūte satte bhagavā vibhajitvā dasseti, tasmā ‘‘vatthumeva na hotī’’ti nimittasāmaññato pasaṅgāgataṃ suvaṇṇarajatādimayānaṃ nimittaṃ paṭikkhipatīti vattabbaṃ.
д̇аяо маг̇г̇зд̇и бхуммад̇т̇з убаяог̇аважананд̇и ааха ‘‘д̇ийсу маг̇г̇зсууд̇и ад̇т̇о взд̣̇ид̇аб̣б̣о’’д̇и. звам̣ саб̣б̣ад̇т̇аад̇и иминаа ‘‘д̣̇вз маг̇г̇з’’д̇и зд̇т̇ааби д̣̇вийсу маг̇г̇зсууд̇и ад̇т̇о взд̣̇ид̇аб̣б̣од̇и ад̇ид̣̇иссад̇и.
Tayo maggeti bhummatthe upayogavacananti āha ‘‘tīsu maggesūti attho veditabbo’’ti. Evaṃ sabbatthāti iminā ‘‘dve magge’’ti etthāpi dvīsu maggesūti attho veditabboti atidissati.
анубан̃н̃ад̇д̇иван̣н̣анаа нидтид̇аа.
Anupaññattivaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. батамабаарааж̇игам̣ • 1. Paṭhamapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. батамабаарааж̇игам̣ • 1. Paṭhamapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / анубан̃н̃ад̇д̇иван̣н̣анаа • Anupaññattivaṇṇanā
