| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
анубан̃н̃ад̇д̇иван̣н̣анаа
Anupaññattivaṇṇanā
баарааж̇игавад̇т̇убхууд̇аад̇и язсам̣ д̇ийсу маг̇г̇зсу д̇илаб̣ийж̇амад̇д̇амби нимид̇д̇асса бавзсогаасо ход̇и, д̇з ид̇т̇ибурисаад̣̇ибхзд̣̇аа саб̣б̣з сан̇г̇аяханд̇и, на ид̇арз. ид̇ха бана д̇иражчаанаг̇ад̇ааяаад̇и-баал̣ибад̣̇аануруубад̇о на саб̣б̣аад̇иаад̣̇инаа ид̇т̇илин̇г̇авасзна вуд̇д̇ам̣. г̇онасаад̇и саббависзсаа, язсам̣ бидтийсу маханд̇амаханд̇аани ман̣д̣алаани хонд̇и. гажчабаман̣д̣уугаанам̣ жад̇уббад̣̇ад̇д̇зби од̣̇агад̇аасааман̃н̃зна абад̣̇зхи саха г̇ахан̣ам̣. мукасан̣таананд̇и одтажаммасан̣таанам̣. ван̣асан̇кзбанд̇и ван̣асан̇г̇ахам̣. ван̣з т̇уллажжаяан̃жа ‘‘амаг̇г̇зна амаг̇г̇ам̣ бавзсзд̇и, аабад̇д̇и т̇уллажжаяассаа’’д̇и (баараа. 66) имасса суд̇д̇асса васзна взд̣̇ид̇аб̣б̣ам̣. ман̇г̇усаад̇и нагулаа. зд̇амзва хи ад̇т̇анд̇и яо нам̣ аж̇жхаабаж̇ж̇ад̇и, д̇ам̣ барааж̇зд̇ийд̇и имамад̇т̇ам̣ вуд̇д̇аанам̣язва баарааж̇игаад̣̇исад̣̇д̣̇аанам̣ ниб̣б̣ажанаббасан̇г̇з имиссаа бариваараг̇аат̇ааяа бавад̇д̇ад̇д̇аа. бхадтод̇и саасанад̇о барихийно. ниран̇гад̇од̇и нираагад̇о. зд̇анд̇и аабад̇д̇ируубам̣ баарааж̇игам̣. чиннод̇и анд̇араакан̣д̣ид̇о.
Pārājikavatthubhūtāti yesaṃ tīsu maggesu tilabījamattampi nimittassa pavesokāso hoti, te itthipurisādibhedā sabbe saṅgayhanti, na itare. Idha pana tiracchānagatāyāti-pāḷipadānurūpato na sabbātiādinā itthiliṅgavasena vuttaṃ. Gonasāti sappavisesā, yesaṃ piṭṭhīsu mahantamahantāni maṇḍalāni honti. Kacchapamaṇḍūkānaṃ catuppadattepi odakatāsāmaññena apadehi saha gahaṇaṃ. Mukhasaṇṭhānanti oṭṭhacammasaṇṭhānaṃ. Vaṇasaṅkhepanti vaṇasaṅgahaṃ. Vaṇe thullaccayañca ‘‘amaggena amaggaṃ paveseti, āpatti thullaccayassā’’ti (pārā. 66) imassa suttassa vasena veditabbaṃ. Maṅgusāti nakulā. Etameva hi atthanti yo naṃ ajjhāpajjati, taṃ parājetīti imamatthaṃ vuttānaṃyeva pārājikādisaddānaṃ nibbacanappasaṅge imissā parivāragāthāya pavattattā. Bhaṭṭhoti sāsanato parihīno. Niraṅkatoti nirākato. Etanti āpattirūpaṃ pārājikaṃ. Chinnoti antarākhaṇḍito.
багад̇ад̇д̇зхи бхигкуухийд̇и зд̇т̇а багад̇ад̇д̇аа наама баарааж̇игам̣ анаабаннаа анугкид̇д̇аа жа. гзжи бана ‘‘багад̇ад̇д̇зхи бхигкуухи згад̇о гад̇д̇аб̣б̣ад̇д̇аад̇и адтагат̇ааяам̣ вуд̇д̇ад̇д̇аа багад̇ад̇д̇абхууд̇зхи алаж̇ж̇ийхиби сад̣̇д̇хим̣ убосат̇аад̣̇исан̇гхагаммагаран̣з д̣̇осо над̇т̇ий’’д̇и вад̣̇анд̇и, д̇ам̣ на яуд̇д̇ам̣, иминаа важанзна д̇асса ад̇т̇асса асиж̇жханад̇о. яад̣̇и хи сан̇гхагаммам̣ гарийяад̇и, багад̇ад̇д̇зхзва гарийяад̇и, на абагад̇ад̇д̇зхийд̇и звам̣ абагад̇ад̇д̇зхи сахасам̣ваасабадигкзбабарам̣ ид̣̇ам̣ важанам̣, на бана багад̇ад̇д̇зхи саб̣б̣зхи алаж̇ж̇ийаад̣̇ийхи згад̇о сан̇гхагаммам̣ гад̇д̇аб̣б̣амзваад̇и. звам̣ сам̣ваасавид̇хаанабарам̣ багад̇ад̇д̇зсуби сабхааг̇аабад̇д̇им̣ аабаннзхи ан̃н̃аман̃н̃ан̃жа алаж̇ж̇ийхи жа сад̣̇д̇хим̣ згад̇о гаммагаран̣асса бадигкид̇д̇ад̇д̇аа. вуд̇д̇ан̃хи ‘‘сажз саб̣б̣о сан̇гхо сабхааг̇аабад̇д̇ияаа сад̇и вуд̇д̇авид̇хим̣ агад̇ваа убосат̇ам̣ гарод̇и, вуд̇д̇анаязнзва саб̣б̣о сан̇гхо аабад̇д̇им̣ аабаж̇ж̇ад̇ий’’д̇иаад̣̇и (ган̇каа. адта. нид̣̇аанаван̣н̣анаа). ‘‘яад̇т̇а аамисабарибхог̇о ваддад̇и, д̇хаммабарибхог̇оби д̇ад̇т̇а ваддад̇ий’’д̇и алаж̇ж̇ийхи саха барибхог̇о жа адтагат̇ааяам̣ бадигкид̇д̇о згад̇о гаммагаран̣ассааби д̇хаммабарибхог̇ад̇д̇аа. д̇асмаа яат̇аа хи баал̣ияам̣ баарааж̇игаабад̇д̇иаабаж̇ж̇анагабуг̇г̇аланияамад̇т̇ам̣ явааяам̣ н̃ад̇д̇ижад̇уд̇т̇зна гаммзна…бз… убасамбанно, аяам̣ имасмим̣ ад̇т̇з ад̇хиббзд̇о бхигкууд̇и имасмим̣ важанз саб̣б̣зби н̃ад̇д̇ижад̇уд̇т̇агаммзна убасамбаннаа баарааж̇игаабаж̇ж̇анагабуг̇г̇алааязваад̇и нияамо на сиж̇жхад̇и баарааж̇игаанаабаж̇ж̇анагаанамби сзгкаад̣̇ийнам̣ самбхаваа, ат̇а ко н̃ад̇д̇ижад̇уд̇т̇агаммзна убасамбаннзсуязва баарааж̇игаабад̇д̇иаабаж̇ж̇анагаа алаж̇ж̇ий б̣аалабут̇уж̇ж̇анаа лаб̣бханд̇и, на бана зхибхигкуаад̣̇ийсууд̇и звам̣ нияамо сиж̇жхад̇и, звамид̇хааби багад̇ад̇д̇зсуязва згад̇о гаммагаран̣аарахаа анаабад̇д̇игаа лаж̇ж̇ий гуггужжагаа сигкаагаамаа убалаб̣бханд̇и , на абагад̇ад̇д̇зсууд̇и звамзва нияамо сиж̇жхад̇и абагад̇ад̇д̇аанам̣ г̇ан̣абууран̣ад̇д̇аабхаавзна асам̣ваасигад̇д̇анияамад̇о. алаж̇ж̇ино бана г̇ан̣абуурагаа худ̇ваа гаммасса саад̇ханад̇о асам̣ваасигзсу на г̇ахид̇аа гад̇д̇аб̣б̣авид̇хим̣ агад̇ваа д̇зхи саха мад̣̇д̣̇ид̇ваа гаммам̣ гаронд̇аанам̣ аабад̇д̇и алаж̇ж̇ид̇аа жа на виг̇ажчад̇ийд̇и взд̣̇ид̇аб̣б̣ам̣. ‘‘зго алаж̇ж̇ий алаж̇ж̇ийсад̇амби гарод̇ий’’д̇и (баараа. адта. 2.585) хи вуд̇д̇ам̣, д̇знзва вагкад̇и ‘‘саб̣б̣зби лаж̇ж̇ино зд̇зсу гаммаад̣̇ийсу саха васанд̇ий’’д̇иаад̣̇и. аяан̃жад̇т̇о убари вид̇т̇аарад̇о аави бхависсад̇и.
Pakatattehi bhikkhūhīti ettha pakatattā nāma pārājikaṃ anāpannā anukkhittā ca. Keci pana ‘‘pakatattehi bhikkhūhi ekato kattabbattāti aṭṭhakathāyaṃ vuttattā pakatattabhūtehi alajjīhipi saddhiṃ uposathādisaṅghakammakaraṇe doso natthī’’ti vadanti, taṃ na yuttaṃ, iminā vacanena tassa atthassa asijjhanato. Yadi hi saṅghakammaṃ karīyati, pakatatteheva karīyati, na apakatattehīti evaṃ apakatattehi sahasaṃvāsapaṭikkhepaparaṃ idaṃ vacanaṃ, na pana pakatattehi sabbehi alajjīādīhi ekato saṅghakammaṃ kattabbamevāti. Evaṃ saṃvāsavidhānaparaṃ pakatattesupi sabhāgāpattiṃ āpannehi aññamaññañca alajjīhi ca saddhiṃ ekato kammakaraṇassa paṭikkhittattā. Vuttañhi ‘‘sace sabbo saṅgho sabhāgāpattiyā sati vuttavidhiṃ akatvā uposathaṃ karoti, vuttanayeneva sabbo saṅgho āpattiṃ āpajjatī’’tiādi (kaṅkhā. aṭṭha. nidānavaṇṇanā). ‘‘Yattha āmisaparibhogo vaṭṭati, dhammaparibhogopi tattha vaṭṭatī’’ti alajjīhi saha paribhogo ca aṭṭhakathāyaṃ paṭikkhitto ekato kammakaraṇassāpi dhammaparibhogattā. Tasmā yathā hi pāḷiyaṃ pārājikāpattiāpajjanakapuggalaniyamatthaṃ yvāyaṃ ñatticatutthena kammena…pe… upasampanno, ayaṃ imasmiṃ atthe adhippeto bhikkhūti imasmiṃ vacane sabbepi ñatticatutthakammena upasampannā pārājikāpajjanakapuggalāyevāti niyamo na sijjhati pārājikānāpajjanakānampi sekkhādīnaṃ sambhavā, atha kho ñatticatutthakammena upasampannesuyeva pārājikāpattiāpajjanakā alajjī bālaputhujjanā labbhanti, na pana ehibhikkhuādīsūti evaṃ niyamo sijjhati, evamidhāpi pakatattesuyeva ekato kammakaraṇārahā anāpattikā lajjī kukkuccakā sikkhākāmā upalabbhanti , na apakatattesūti evameva niyamo sijjhati apakatattānaṃ gaṇapūraṇattābhāvena asaṃvāsikattaniyamato. Alajjino pana gaṇapūrakā hutvā kammassa sādhanato asaṃvāsikesu na gahitā kattabbavidhiṃ akatvā tehi saha madditvā kammaṃ karontānaṃ āpatti alajjitā ca na vigacchatīti veditabbaṃ. ‘‘Eko alajjī alajjīsatampi karotī’’ti (pārā. aṭṭha. 2.585) hi vuttaṃ, teneva vakkhati ‘‘sabbepi lajjino etesu kammādīsu saha vasantī’’tiādi. Ayañcattho upari vitthārato āvi bhavissati.
д̇ат̇аад̇и сиймаабарижчиннзхийд̇иаад̣̇им̣ бараамасад̇и. згад̇о ванд̣̇анабхун̃ж̇анаг̇аамаббавзсанавад̇д̇аабадивад̇д̇агаран̣ауг̇г̇ахабарибужчаасаж̇жхааяагаран̣аад̣̇исаамаг̇г̇игирияаавасзна бхаг̇авад̇аа бан̃н̃ад̇д̇асигкаабад̣̇асигканам̣ самасигкад̇аа наама, д̇ан̃жа лаж̇ж̇ийхзва самам̣ сигкид̇аб̣б̣ам̣, на алаж̇ж̇ийхийд̇и д̣̇ассзд̇ум̣ ‘‘бан̃н̃ад̇д̇ам̣ бана…бз… самасигкад̇аа наамаа’’д̇и вуд̇д̇ам̣. д̇ад̇т̇а анад̇иггаманавасзна уг̇г̇ахабарибужчаад̣̇ивасзна жа лаж̇ж̇ийбуг̇г̇алзхи самам̣ згад̇о сигкид̇аб̣б̣аа самасигкаад̇и сигкаабад̣̇аани вуд̇д̇аани, д̇аасам̣ самасигканам̣ яат̇аавуд̇д̇анаязна лаж̇ж̇ийхи сигкид̇аб̣б̣абхааво самасигкад̇аа наамаад̇и ад̇хиббааяо. яат̇аавуд̇д̇зсу згагаммаад̣̇ийсу алаж̇ж̇ийнам̣ лаж̇ж̇ид̇хаммз аногганд̇з лаж̇ж̇ийхи саха сам̣ваасо над̇т̇и, д̇ад̇о б̣ахиязва д̇з санд̣̇иссанд̇ийд̇и ааха саб̣б̣зби лаж̇ж̇инод̇иаад̣̇и.
Tathāti sīmāparicchinnehītiādiṃ parāmasati. Ekato vandanabhuñjanagāmappavesanavattāpaṭivattakaraṇauggahaparipucchāsajjhāyakaraṇādisāmaggikiriyāvasena bhagavatā paññattasikkhāpadasikkhanaṃ samasikkhatā nāma, tañca lajjīheva samaṃ sikkhitabbaṃ, na alajjīhīti dassetuṃ ‘‘paññattaṃ pana…pe… samasikkhatā nāmā’’ti vuttaṃ. Tattha anatikkamanavasena uggahaparipucchādivasena ca lajjīpuggalehi samaṃ ekato sikkhitabbā samasikkhāti sikkhāpadāni vuttāni, tāsaṃ samasikkhanaṃ yathāvuttanayena lajjīhi sikkhitabbabhāvo samasikkhatā nāmāti adhippāyo. Yathāvuttesu ekakammādīsu alajjīnaṃ lajjidhamme anokkante lajjīhi saha saṃvāso natthi, tato bahiyeva te sandissantīti āha sabbepi lajjinotiādi.
56. яам̣ д̇ам̣ вуд̇д̇анд̇и самб̣анд̇хо. вад̇т̇умзва на ход̇ийд̇и суван̣н̣аад̣̇ийхи гад̇аид̇т̇ируубаанам̣ ан̇г̇аж̇аад̇зсуби нимид̇д̇авохаарад̣̇ассанад̇о д̇ад̇т̇а баарааж̇игаасан̇гаанивад̇д̇анад̇т̇ам̣ вуд̇д̇ам̣. д̇знзва винийд̇авад̇т̇уусу лзбажид̇д̇аад̣̇ивад̇т̇уусу сан̃ж̇аад̇агуггужжасса баарааж̇игзна анаабад̇д̇и вуд̇д̇аа.
56. Yaṃ taṃ vuttanti sambandho. Vatthumeva na hotīti suvaṇṇādīhi kataitthirūpānaṃ aṅgajātesupi nimittavohāradassanato tattha pārājikāsaṅkānivattanatthaṃ vuttaṃ. Teneva vinītavatthūsu lepacittādivatthūsu sañjātakukkuccassa pārājikena anāpatti vuttā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. батамабаарааж̇игам̣ • 1. Paṭhamapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. батамабаарааж̇игам̣ • 1. Paṭhamapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / анубан̃н̃ад̇д̇иван̣н̣анаа • Anupaññattivaṇṇanā
