| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២. ទុតិយវគ្គោ
2. Dutiyavaggo
(១៨) ៩. អនុបុព្ពាភិសមយកថា
(18) 9. Anupubbābhisamayakathā
៣៣៩. អនុបុព្ពាភិសមយោតិ ? អាមន្តា។ អនុបុព្ពេន សោតាបត្តិមគ្គំ ភាវេតីតិ? ន ហេវំ វត្តព្ពេ។ អនុបុព្ពេន សោតាបត្តិមគ្គំ ភាវេតីតិ? អាមន្តា។ អនុបុព្ពេន សោតាបត្តិផលំ សច្ឆិករោតីតិ? ន ហេវំ វត្តព្ពេ។
339. Anupubbābhisamayoti ? Āmantā. Anupubbena sotāpattimaggaṃ bhāvetīti? Na hevaṃ vattabbe. Anupubbena sotāpattimaggaṃ bhāvetīti? Āmantā. Anupubbena sotāpattiphalaṃ sacchikarotīti? Na hevaṃ vattabbe.
អនុបុព្ពាភិសមយោតិ? អាមន្តា។ អនុបុព្ពេន សកទាគាមិមគ្គំ ភាវេតីតិ? ន ហេវំ វត្តព្ពេ។ អនុបុព្ពេន សកទាគាមិមគ្គំ ភាវេតីតិ? អាមន្តា។ អនុបុព្ពេន សកទាគាមិផលំ សច្ឆិករោតីតិ? ន ហេវំ វត្តព្ពេ។
Anupubbābhisamayoti? Āmantā. Anupubbena sakadāgāmimaggaṃ bhāvetīti? Na hevaṃ vattabbe. Anupubbena sakadāgāmimaggaṃ bhāvetīti? Āmantā. Anupubbena sakadāgāmiphalaṃ sacchikarotīti? Na hevaṃ vattabbe.
អនុបុព្ពាភិសមយោតិ? អាមន្តា។ អនុបុព្ពេន អនាគាមិមគ្គំ ភាវេតីតិ? ន ហេវំ វត្តព្ពេ។ អនុបុព្ពេន អនាគាមិមគ្គំ ភាវេតីតិ? អាមន្តា។ អនុបុព្ពេន អនាគាមិផលំ សច្ឆិករោតីតិ? ន ហេវំ វត្តព្ពេ។
Anupubbābhisamayoti? Āmantā. Anupubbena anāgāmimaggaṃ bhāvetīti? Na hevaṃ vattabbe. Anupubbena anāgāmimaggaṃ bhāvetīti? Āmantā. Anupubbena anāgāmiphalaṃ sacchikarotīti? Na hevaṃ vattabbe.
អនុបុព្ពាភិសមយោតិ ? អាមន្តា។ អនុបុព្ពេន អរហត្តមគ្គំ ភាវេតីតិ? ន ហេវំ វត្តព្ពេ។ អនុបុព្ពេន អរហត្តមគ្គំ ភាវេតីតិ? អាមន្តា។ អនុបុព្ពេន អរហត្តផលំ សច្ឆិករោតីតិ? ន ហេវំ វត្តព្ពេ។
Anupubbābhisamayoti ? Āmantā. Anupubbena arahattamaggaṃ bhāvetīti? Na hevaṃ vattabbe. Anupubbena arahattamaggaṃ bhāvetīti? Āmantā. Anupubbena arahattaphalaṃ sacchikarotīti? Na hevaṃ vattabbe.
៣៤០. សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? សក្កាយទិដ្ឋិំ, វិចិកិច្ឆំ, សីលព្ពតបរាមាសំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ សោតាបន្នោ, ចតុភាគំ ន សោតាបន្នោ, ចតុភាគំ សោតាបត្តិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ សត្តក្ខត្តុបរមោ កោលង្កោលោ ឯកពីជី ពុទ្ធេ អវេច្ចប្បសាទេន សមន្នាគតោ, ធម្មេ…បេ.… សង្ឃេ…បេ.… អរិយកន្តេហិ សីលេហិ សមន្នាគតោ ចតុភាគំ ន អរិយកន្តេហិ សីលេហិ សមន្នាគតោតិ? ន ហេវំ វត្តព្ពេ។
340. Sotāpattiphalasacchikiriyāya paṭipanno puggalo dukkhadassanena kiṃ jahatīti? Sakkāyadiṭṭhiṃ, vicikicchaṃ, sīlabbataparāmāsaṃ, tadekaṭṭhe ca kilese catubhāgaṃ jahatīti. Catubhāgaṃ sotāpanno, catubhāgaṃ na sotāpanno, catubhāgaṃ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ sattakkhattuparamo kolaṅkolo ekabījī buddhe aveccappasādena samannāgato, dhamme…pe… saṅghe…pe… ariyakantehi sīlehi samannāgato catubhāgaṃ na ariyakantehi sīlehi samannāgatoti? Na hevaṃ vattabbe.
សមុទយទស្សនេន…បេ.… និរោធទស្សនេន…បេ.… មគ្គទស្សនេន កិំ ជហតីតិ? សក្កាយទិដ្ឋិំ, វិចិកិច្ឆំ, សីលព្ពតបរាមាសំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ សោតាបន្នោ, ចតុភាគំ ន សោតាបន្នោ, ចតុភាគំ សោតាបត្តិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ សត្តក្ខត្តុបរមោ កោលង្កោលោ ឯកពីជី ពុទ្ធេ អវេច្ចប្បសាទេន សមន្នាគតោ, ធម្មេ…បេ.… សង្ឃេ…បេ.… អរិយកន្តេហិ សីលេហិ សមន្នាគតោ, ចតុភាគំ ន អរិយកន្តេហិ សីលេហិ សមន្នាគតោតិ? ន ហេវំ វត្តព្ពេ…បេ.…។
Samudayadassanena…pe… nirodhadassanena…pe… maggadassanena kiṃ jahatīti? Sakkāyadiṭṭhiṃ, vicikicchaṃ, sīlabbataparāmāsaṃ, tadekaṭṭhe ca kilese catubhāgaṃ jahatīti. Catubhāgaṃ sotāpanno, catubhāgaṃ na sotāpanno, catubhāgaṃ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ sattakkhattuparamo kolaṅkolo ekabījī buddhe aveccappasādena samannāgato, dhamme…pe… saṅghe…pe… ariyakantehi sīlehi samannāgato, catubhāgaṃ na ariyakantehi sīlehi samannāgatoti? Na hevaṃ vattabbe…pe….
៣៤១. សកទាគាមិផលសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? ឱឡារិកំ កាមរាគំ, ឱឡារិកំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ សកទាគាមី, ចតុភាគំ ន សកទាគាមី, ចតុភាគំ សកទាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតីតិ? ន ហេវំ វត្តព្ពេ…បេ.… សមុទយទស្សនេន…បេ.… និរោធទស្សនេន…បេ.… មគ្គទស្សនេន កិំ ជហតីតិ? ឱឡារិកំ កាមរាគំ, ឱឡារិកំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ សកទាគាមី, ចតុភាគំ ន សកទាគាមី, ចតុភាគំ សកទាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ , កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតីតិ? ន ហេវំ វត្តព្ពេ…បេ.…។
341. Sakadāgāmiphalasacchikiriyāya paṭipanno puggalo dukkhadassanena kiṃ jahatīti? Oḷārikaṃ kāmarāgaṃ, oḷārikaṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ sakadāgāmī, catubhāgaṃ na sakadāgāmī, catubhāgaṃ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharatīti? Na hevaṃ vattabbe…pe… samudayadassanena…pe… nirodhadassanena…pe… maggadassanena kiṃ jahatīti? Oḷārikaṃ kāmarāgaṃ, oḷārikaṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ sakadāgāmī, catubhāgaṃ na sakadāgāmī, catubhāgaṃ sakadāgāmiphalappatto paṭiladdho adhigato sacchikato upasampajja viharati , kāyena phusitvā viharati, catubhāgaṃ na kāyena phusitvā viharatīti? Na hevaṃ vattabbe…pe….
៣៤២. អនាគាមិផលសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? អណុសហគតំ កាមរាគំ, អណុសហគតំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ អនាគាមី, ចតុភាគំ ន អនាគាមី, ចតុភាគំ អនាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ អន្តរាបរិនិព្ពាយី…បេ.… ឧបហច្ចបរិនិព្ពាយី… អសង្ខារបរិនិព្ពាយី… សសង្ខារបរិនិព្ពាយី… ឧទ្ធំសោតោ អកនិដ្ឋគាមី, ចតុភាគំ ន ឧទ្ធំសោតោ ន អកនិដ្ឋគាមីតិ? ន ហេវំ វត្តព្ពេ…បេ.…។
342. Anāgāmiphalasacchikiriyāya paṭipanno puggalo dukkhadassanena kiṃ jahatīti? Aṇusahagataṃ kāmarāgaṃ, aṇusahagataṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ anāgāmī, catubhāgaṃ na anāgāmī, catubhāgaṃ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ antarāparinibbāyī…pe… upahaccaparinibbāyī… asaṅkhāraparinibbāyī… sasaṅkhāraparinibbāyī… uddhaṃsoto akaniṭṭhagāmī, catubhāgaṃ na uddhaṃsoto na akaniṭṭhagāmīti? Na hevaṃ vattabbe…pe….
សមុទយទស្សនេន…បេ.… និរោធទស្សនេន…បេ.… មគ្គទស្សនេន កិំ ជហតីតិ? អណុសហគតំ កាមរាគំ, អណុសហគតំ ព្យាបាទំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ អនាគាមី, ចតុភាគំ ន អនាគាមី, ចតុភាគំ អនាគាមិផលប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ អន្តរាបរិនិព្ពាយី…បេ.… ឧបហច្ចបរិនិព្ពាយី… អសង្ខារបរិនិព្ពាយី… សសង្ខារបរិនិព្ពាយី… ឧទ្ធំសោតោ អកនិដ្ឋគាមី, ចតុភាគំ ន ឧទ្ធំសោតោ អកនិដ្ឋគាមីតិ? ន ហេវំ វត្តព្ពេ…បេ.…។
Samudayadassanena…pe… nirodhadassanena…pe… maggadassanena kiṃ jahatīti? Aṇusahagataṃ kāmarāgaṃ, aṇusahagataṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ anāgāmī, catubhāgaṃ na anāgāmī, catubhāgaṃ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ antarāparinibbāyī…pe… upahaccaparinibbāyī… asaṅkhāraparinibbāyī… sasaṅkhāraparinibbāyī… uddhaṃsoto akaniṭṭhagāmī, catubhāgaṃ na uddhaṃsoto akaniṭṭhagāmīti? Na hevaṃ vattabbe…pe….
៣៤៣. អរហត្តសច្ឆិកិរិយាយ បដិបន្នោ បុគ្គលោ ទុក្ខទស្សនេន កិំ ជហតីតិ? រូបរាគំ, អរូបរាគំ, មានំ, ឧទ្ធច្ចំ, អវិជ្ជំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ អរហា, ចតុភាគំ ន អរហា, ចតុភាគំ អរហត្តប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ វីតរាគោ…បេ.… វីតទោសោ… វីតមោហោ…បេ.… កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ ឧក្ខិត្តបលិឃោ សង្កិណ្ណបរិខោ អព្ពូឡ្ហេសិកោ និរគ្គឡោ អរិយោ បន្នទ្ធជោ បន្នភារោ វិសញ្ញុត្តោ សុវិជិតវិជយោ, ទុក្ខំ តស្ស បរិញ្ញាតំ, សមុទយោ បហីនោ, និរោធោ សច្ឆិកតោ, មគ្គោ ភាវិតោ, អភិញ្ញេយ្យំ អភិញ្ញាតំ, បរិញ្ញេយ្យំ បរិញ្ញាតំ, បហាតព្ពំ បហីនំ, ភាវេតព្ពំ ភាវិតំ…បេ.… សច្ឆិកាតព្ពំ សច្ឆិកតំ, ចតុភាគំ សច្ឆិកាតព្ពំ ន សច្ឆិកតន្តិ? ន ហេវំ វត្តព្ពេ…បេ.…។
343. Arahattasacchikiriyāya paṭipanno puggalo dukkhadassanena kiṃ jahatīti? Rūparāgaṃ, arūparāgaṃ, mānaṃ, uddhaccaṃ, avijjaṃ, tadekaṭṭhe ca kilese catubhāgaṃ jahatīti. Catubhāgaṃ arahā, catubhāgaṃ na arahā, catubhāgaṃ arahattappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ vītarāgo…pe… vītadoso… vītamoho…pe… katakaraṇīyo ohitabhāro anuppattasadattho parikkhīṇabhavasaṃyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṃ tassa pariññātaṃ, samudayo pahīno, nirodho sacchikato, maggo bhāvito, abhiññeyyaṃ abhiññātaṃ, pariññeyyaṃ pariññātaṃ, pahātabbaṃ pahīnaṃ, bhāvetabbaṃ bhāvitaṃ…pe… sacchikātabbaṃ sacchikataṃ, catubhāgaṃ sacchikātabbaṃ na sacchikatanti? Na hevaṃ vattabbe…pe….
សមុទយទស្សនេន … និរោធទស្សនេន… មគ្គទស្សនេន កិំ ជហតីតិ? រូបរាគំ, អរូបរាគំ, មានំ, ឧទ្ធច្ចំ, អវិជ្ជំ, តទេកដ្ឋេ ច កិលេសេ ចតុភាគំ ជហតីតិ។ ចតុភាគំ អរហា, ចតុភាគំ ន អរហា, ចតុភាគំ អរហត្តប្បត្តោ បដិលទ្ធោ អធិគតោ សច្ឆិកតោ ឧបសម្បជ្ជ វិហរតិ, កាយេន ផុសិត្វា វិហរតិ, ចតុភាគំ ន កាយេន ផុសិត្វា វិហរតិ, ចតុភាគំ វីតរាគោ… វីតទោសោ… វីតមោហោ… កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ ឧក្ខិត្តបលិឃោ សង្កិណ្ណបរិខោ អព្ពូឡ្ហេសិកោ និរគ្គឡោ អរិយោ បន្នទ្ធជោ បន្នភារោ វិសញ្ញុត្តោ សុវិជិតវិជយោ, ទុក្ខំ តស្ស បរិញ្ញាតំ, សមុទយោ បហីនោ, និរោធោ សច្ឆិកតោ, មគ្គោ ភាវិតោ, អភិញ្ញេយ្យំ អភិញ្ញាតំ, បរិញ្ញេយ្យំ បរិញ្ញាតំ, បហាតព្ពំ បហីនំ, ភាវេតព្ពំ ភាវិតំ…បេ.… សច្ឆិកាតព្ពំ សច្ឆិកតំ, ចតុភាគំ សច្ឆិកាតព្ពំ ន សច្ឆិកតន្តិ? ន ហេវំ វត្តព្ពេ…បេ.…។
Samudayadassanena … nirodhadassanena… maggadassanena kiṃ jahatīti? Rūparāgaṃ, arūparāgaṃ, mānaṃ, uddhaccaṃ, avijjaṃ, tadekaṭṭhe ca kilese catubhāgaṃ jahatīti. Catubhāgaṃ arahā, catubhāgaṃ na arahā, catubhāgaṃ arahattappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ vītarāgo… vītadoso… vītamoho… katakaraṇīyo ohitabhāro anuppattasadattho parikkhīṇabhavasaṃyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṃ tassa pariññātaṃ, samudayo pahīno, nirodho sacchikato, maggo bhāvito, abhiññeyyaṃ abhiññātaṃ, pariññeyyaṃ pariññātaṃ, pahātabbaṃ pahīnaṃ, bhāvetabbaṃ bhāvitaṃ…pe… sacchikātabbaṃ sacchikataṃ, catubhāgaṃ sacchikātabbaṃ na sacchikatanti? Na hevaṃ vattabbe…pe….
៣៤៤. សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខំ ទក្ខន្តោ បដិបន្នកោតិ វត្តព្ពោតិ? អាមន្តា។ ទុក្ខេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ។ សមុទយំ ទក្ខន្តោ…បេ.… និរោធំ ទក្ខន្តោ បដិបន្នកោតិ វត្តព្ពោតិ? អាមន្តា ។ និរោធេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ។
344. Sotāpattiphalasacchikiriyāya paṭipanno puggalo dukkhaṃ dakkhanto paṭipannakoti vattabboti? Āmantā. Dukkhe diṭṭhe phale ṭhitoti vattabboti? Na hevaṃ vattabbe. Samudayaṃ dakkhanto…pe… nirodhaṃ dakkhanto paṭipannakoti vattabboti? Āmantā . Nirodhe diṭṭhe phale ṭhitoti vattabboti? Na hevaṃ vattabbe.
សោតាបត្តិផលសច្ឆិកិរិយាយ បដិបន្នោ បុគ្គលោ មគ្គំ ទក្ខន្តោ បដិបន្នកោតិ វត្តព្ពោ, មគ្គេ ទិដ្ឋេ ផលេ ឋិតោតិ វត្តព្ពោតិ? អាមន្តា។ ទុក្ខំ ទក្ខន្តោ បដិបន្នកោតិ វត្តព្ពោ, ទុក្ខេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ…បេ.… មគ្គំ ទក្ខន្តោ បដិបន្នកោតិ វត្តព្ពោ, មគ្គេ ទិដ្ឋេ ផលេ ឋិតោតិ វត្តព្ពោតិ? អាមន្តា។ សមុទយំ ទក្ខន្តោ…បេ.… និរោធំ ទក្ខន្តោ បដិបន្នកោតិ វត្តព្ពោ, និរោធេ ទិដ្ឋេ ផលេ ឋិតោតិ វត្តព្ពោតិ? ន ហេវំ វត្តព្ពេ…បេ.…។
Sotāpattiphalasacchikiriyāya paṭipanno puggalo maggaṃ dakkhanto paṭipannakoti vattabbo, magge diṭṭhe phale ṭhitoti vattabboti? Āmantā. Dukkhaṃ dakkhanto paṭipannakoti vattabbo, dukkhe diṭṭhe phale ṭhitoti vattabboti? Na hevaṃ vattabbe…pe… maggaṃ dakkhanto paṭipannakoti vattabbo, magge diṭṭhe phale ṭhitoti vattabboti? Āmantā. Samudayaṃ dakkhanto…pe… nirodhaṃ dakkhanto paṭipannakoti vattabbo, nirodhe diṭṭhe phale ṭhitoti vattabboti? Na hevaṃ vattabbe…pe….
សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខំ ទក្ខន្តោ បដិបន្នកោតិ វត្តព្ពោ, ទុក្ខេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា។ មគ្គំ ទក្ខន្តោ បដិបន្នកោតិ វត្តព្ពោ, មគ្គេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? ន ហេវំ វត្តព្ពេ…បេ.… សមុទយំ ទក្ខន្តោ… និរោធំ ទក្ខន្តោ បដិបន្នកោតិ វត្តព្ពោ, និរោធេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា។ មគ្គំ ទក្ខន្តោ ‘‘បដិបន្នកោ’’តិ វត្តព្ពោ, មគ្គេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? ន ហេវំ វត្តព្ពេ…បេ.…។
Sotāpattiphalasacchikiriyāya paṭipanno puggalo dukkhaṃ dakkhanto paṭipannakoti vattabbo, dukkhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Maggaṃ dakkhanto paṭipannakoti vattabbo, magge diṭṭhe na vattabbaṃ – ‘‘phale ṭhitoti vattabbo’’ti? Na hevaṃ vattabbe…pe… samudayaṃ dakkhanto… nirodhaṃ dakkhanto paṭipannakoti vattabbo, nirodhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Maggaṃ dakkhanto ‘‘paṭipannako’’ti vattabbo, magge diṭṭhe na vattabbaṃ – ‘‘phale ṭhitoti vattabbo’’ti? Na hevaṃ vattabbe…pe….
1 សោតាបត្តិផលសច្ឆិកិរិយាយ បដិបន្នោ បុគ្គលោ ទុក្ខំ ទក្ខន្តោ បដិបន្នកោតិ វត្តព្ពោ, ទុក្ខេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា។ និរត្ថិយំ ទុក្ខទស្សនន្តិ? ន ហេវំ វត្តព្ពេ…បេ.… សមុទយំ ទក្ខន្តោ…បេ.… និរោធំ ទក្ខន្តោ បដិបន្នកោតិ វត្តព្ពោ, និរោធេ ទិដ្ឋេ ន វត្តព្ពំ – ‘‘ផលេ ឋិតោតិ វត្តព្ពោ’’តិ? អាមន្តា។ និរត្ថិយំ និរោធទស្សនន្តិ? ន ហេវំ វត្តព្ពេ…បេ.…។
2 Sotāpattiphalasacchikiriyāya paṭipanno puggalo dukkhaṃ dakkhanto paṭipannakoti vattabbo, dukkhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Niratthiyaṃ dukkhadassananti? Na hevaṃ vattabbe…pe… samudayaṃ dakkhanto…pe… nirodhaṃ dakkhanto paṭipannakoti vattabbo, nirodhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Niratthiyaṃ nirodhadassananti? Na hevaṃ vattabbe…pe….
៣៤៥. 3 ទុក្ខេ ទិដ្ឋេ ចត្តារិ សច្ចានិ ទិដ្ឋានិ ហោន្តីតិ? អាមន្តា។ ទុក្ខសច្ចំ ចត្តារិ សច្ចានីតិ? ន ហេវំ វត្តព្ពេ…បេ.…។
345. 4 Dukkhe diṭṭhe cattāri saccāni diṭṭhāni hontīti? Āmantā. Dukkhasaccaṃ cattāri saccānīti? Na hevaṃ vattabbe…pe….
5 រូបក្ខន្ធេ អនិច្ចតោ ទិដ្ឋេ បញ្ចក្ខន្ធា អនិច្ចតោ ទិដ្ឋា ហោន្តីតិ? អាមន្តា។ រូបក្ខន្ធោ បញ្ចក្ខន្ធាតិ? ន ហេវំ វត្តព្ពេ…បេ.…។
6 Rūpakkhandhe aniccato diṭṭhe pañcakkhandhā aniccato diṭṭhā hontīti? Āmantā. Rūpakkhandho pañcakkhandhāti? Na hevaṃ vattabbe…pe….
7 ចក្ខាយតនេ អនិច្ចតោ ទិដ្ឋេ ទ្វាទសាយតនានិ អនិច្ចតោ ទិដ្ឋានិ ហោន្តីតិ? អាមន្តា។ ចក្ខាយតនំ ទ្វាទសាយតនានីតិ? ន ហេវំ វត្តព្ពេ…បេ.…។
8 Cakkhāyatane aniccato diṭṭhe dvādasāyatanāni aniccato diṭṭhāni hontīti? Āmantā. Cakkhāyatanaṃ dvādasāyatanānīti? Na hevaṃ vattabbe…pe….
9 ចក្ខុធាតុយា អនិច្ចតោ ទិដ្ឋាយ អដ្ឋារស ធាតុយោ អនិច្ចតោ ទិដ្ឋា ហោន្តីតិ? អាមន្តា។ ចក្ខុធាតុ អដ្ឋារស ធាតុយោតិ? ន ហេវំ វត្តព្ពេ…បេ.…។
10 Cakkhudhātuyā aniccato diṭṭhāya aṭṭhārasa dhātuyo aniccato diṭṭhā hontīti? Āmantā. Cakkhudhātu aṭṭhārasa dhātuyoti? Na hevaṃ vattabbe…pe….
11 ចក្ខុន្ទ្រិយេ អនិច្ចតោ ទិដ្ឋេ ពាវីសតិន្ទ្រិយានិ អនិច្ចតោ ទិដ្ឋានិ ហោន្តីតិ? អាមន្តា។ ចក្ខុន្ទ្រិយំ ពាវីសតិន្ទ្រិយានីតិ? ន ហេវំ វត្តព្ពេ…បេ.…។
12 Cakkhundriye aniccato diṭṭhe bāvīsatindriyāni aniccato diṭṭhāni hontīti? Āmantā. Cakkhundriyaṃ bāvīsatindriyānīti? Na hevaṃ vattabbe…pe….
13 ចតូហិ ញាណេហិ សោតាបត្តិផលំ សច្ឆិករោតីតិ? អាមន្តា។ ចត្តារិ សោតាបត្តិផលានីតិ? ន ហេវំ វត្តព្ពេ…បេ.… អដ្ឋហិ ញាណេហិ សោតាបត្តិផលំ សច្ឆិករោតីតិ? អាមន្តា ។ អដ្ឋ សោតាបត្តិផលានីតិ? ន ហេវំ វត្តព្ពេ…បេ.… ទ្វាទសហិ ញាណេហិ សោតាបត្តិផលំ សច្ឆិករោតីតិ? អាមន្តា។ ទ្វាទស សោតាបត្តិផលានីតិ? ន ហេវំ វត្តព្ពេ…បេ.… ចតុចត្តារីសាយ ញាណេហិ សោតាបត្តិផលំ សច្ឆិករោតីតិ ? អាមន្តា។ ចតុចត្តារីសំ សោតាបត្តិផលានីតិ? ន ហេវំ វត្តព្ពេ…បេ.… សត្តសត្តតិយា ញាណេហិ សោតាបត្តិផលំ សច្ឆិករោតីតិ? អាមន្តា។ សត្តសត្តតិ សោតាបត្តិផលានីតិ? ន ហេវំ វត្តព្ពេ…បេ.…។
14 Catūhi ñāṇehi sotāpattiphalaṃ sacchikarotīti? Āmantā. Cattāri sotāpattiphalānīti? Na hevaṃ vattabbe…pe… aṭṭhahi ñāṇehi sotāpattiphalaṃ sacchikarotīti? Āmantā . Aṭṭha sotāpattiphalānīti? Na hevaṃ vattabbe…pe… dvādasahi ñāṇehi sotāpattiphalaṃ sacchikarotīti? Āmantā. Dvādasa sotāpattiphalānīti? Na hevaṃ vattabbe…pe… catucattārīsāya ñāṇehi sotāpattiphalaṃ sacchikarotīti ? Āmantā. Catucattārīsaṃ sotāpattiphalānīti? Na hevaṃ vattabbe…pe… sattasattatiyā ñāṇehi sotāpattiphalaṃ sacchikarotīti? Āmantā. Sattasattati sotāpattiphalānīti? Na hevaṃ vattabbe…pe….
៣៤៦. ន វត្តព្ពំ – ‘‘អនុបុព្ពាភិសមយោ’’តិ? អាមន្តា។ ននុ វុត្តំ ភគវតា – ‘‘សេយ្យថាបិ, ភិក្ខវេ, មហាសមុទ្ទោ អនុបុព្ពនិន្នោ អនុបុព្ពបោណោ អនុបុព្ពបព្ភារោ, ន អាយតកេនេវ បបាតោ; ឯវមេវ ខោ, ភិក្ខវេ, ឥមស្មិំ ធម្មវិនយេ អនុបុព្ពសិក្ខា អនុបុព្ពកិរិយា អនុបុព្ពបដិបទា, ន អាយតកេនេវ អញ្ញាបដិវេធោ’’តិ 15។ អត្ថេវ សុត្តន្តោតិ? អាមន្តា។ តេន ហិ អនុបុព្ពាភិសមយោតិ។
346. Na vattabbaṃ – ‘‘anupubbābhisamayo’’ti? Āmantā. Nanu vuttaṃ bhagavatā – ‘‘seyyathāpi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto; evameva kho, bhikkhave, imasmiṃ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho’’ti 16. Attheva suttantoti? Āmantā. Tena hi anupubbābhisamayoti.
ន វត្តព្ពំ – ‘‘អនុបុព្ពាភិសមយោ’’តិ? អាមន្តា។ ននុ វុត្តំ ភគវតា –
Na vattabbaṃ – ‘‘anupubbābhisamayo’’ti? Āmantā. Nanu vuttaṃ bhagavatā –
‘‘អនុបុព្ពេន មេធាវី, ថោកំ ថោកំ ខណេ ខណេ;
‘‘Anupubbena medhāvī, thokaṃ thokaṃ khaṇe khaṇe;
អត្ថេវ សុត្តន្តោតិ? អាមន្តា។ តេន ហិ អនុបុព្ពាភិសមយោតិ។
Attheva suttantoti? Āmantā. Tena hi anupubbābhisamayoti.
អនុបុព្ពាភិសមយោតិ ? អាមន្តា។ នន្វាយស្មា គវម្បតិ ថេរោ ភិក្ខូ ឯតទវោច – ‘‘សម្មុខា មេតំ, អាវុសោ, ភគវតោ សុតំ សម្មុខា បដិគ្គហិតំ – ‘យោ, ភិក្ខវេ, ទុក្ខំ បស្សតិ ទុក្ខសមុទយម្បិ សោ បស្សតិ, ទុក្ខនិរោធម្បិ បស្សតិ, ទុក្ខនិរោធគាមិនិំ បដិបទម្បិ បស្សតិ; យោ ទុក្ខសមុទយំ បស្សតិ ទុក្ខម្បិ សោ បស្សតិ, ទុក្ខនិរោធម្បិ បស្សតិ, ទុក្ខនិរោធគាមិនិំ បដិបទម្បិ បស្សតិ; យោ ទុក្ខនិរោធំ បស្សតិ ទុក្ខម្បិ សោ បស្សតិ, ទុក្ខសមុទយម្បិ បស្សតិ, ទុក្ខនិរោធគាមិនិំ បដិបទម្បិ បស្សតិ; យោ ទុក្ខនិរោធគាមិនិំ បដិបទំ បស្សតិ ទុក្ខម្បិ សោ បស្សតិ, ទុក្ខសមុទយម្បិ បស្សតិ, ទុក្ខនិរោធម្បិ បស្សតី’’’តិ 19! អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘អនុបុព្ពាភិសមយោ’’តិ។
Anupubbābhisamayoti ? Āmantā. Nanvāyasmā gavampati thero bhikkhū etadavoca – ‘‘sammukhā metaṃ, āvuso, bhagavato sutaṃ sammukhā paṭiggahitaṃ – ‘yo, bhikkhave, dukkhaṃ passati dukkhasamudayampi so passati, dukkhanirodhampi passati, dukkhanirodhagāminiṃ paṭipadampi passati; yo dukkhasamudayaṃ passati dukkhampi so passati, dukkhanirodhampi passati, dukkhanirodhagāminiṃ paṭipadampi passati; yo dukkhanirodhaṃ passati dukkhampi so passati, dukkhasamudayampi passati, dukkhanirodhagāminiṃ paṭipadampi passati; yo dukkhanirodhagāminiṃ paṭipadaṃ passati dukkhampi so passati, dukkhasamudayampi passati, dukkhanirodhampi passatī’’’ti 20! Attheva suttantoti? Āmantā. Tena hi na vattabbaṃ – ‘‘anupubbābhisamayo’’ti.
អនុបុព្ពាភិសមយោតិ ? អាមន្តា។ ននុ វុត្តំ ភគវតា –
Anupubbābhisamayoti ? Āmantā. Nanu vuttaṃ bhagavatā –
‘‘សហាវស្ស ទស្សនសម្បទាយ,
‘‘Sahāvassa dassanasampadāya,
តយស្សុ ធម្មា ជហិតា ភវន្តិ;
Tayassu dhammā jahitā bhavanti;
សក្កាយទិដ្ឋី វិចិកិច្ឆិតញ្ច,
Sakkāyadiṭṭhī vicikicchitañca,
សីលព្ពតំ វាបិ យទត្ថិ កិញ្ចិ;
Sīlabbataṃ vāpi yadatthi kiñci;
ចតូហបាយេហិ ច វិប្បមុត្តោ,
Catūhapāyehi ca vippamutto,
ឆច្ចាភិឋានានិ អភព្ព កាតុ’’ន្តិ។
Chaccābhiṭhānāni abhabba kātu’’nti.
អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘អនុបុព្ពាភិសមយោ’’តិ។
Attheva suttantoti? Āmantā. Tena hi na vattabbaṃ – ‘‘anupubbābhisamayo’’ti.
អនុបុព្ពាភិសមយោតិ? អាមន្តា។ ននុ វុត្តំ ភគវតា – ‘‘យស្មិំ, ភិក្ខវេ, សមយេ អរិយសាវកស្ស វិរជំ វីតមលំ ធម្មចក្ខុំ ឧទបាទិ – ‘យំ កិញ្ចិ សមុទយធម្មំ សព្ពំ តំ និរោធធម្ម’ន្តិ, សហ ទស្សនុប្បាទា, ភិក្ខវេ, អរិយសាវកស្ស តីណិ សំយោជនានិ បហីយន្តិ – សក្កាយទិដ្ឋិ, វិចិកិច្ឆា, សីលព្ពតបរាមាសោ’’តិ! អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘អនុបុព្ពាភិសមយោ’’តិ។
Anupubbābhisamayoti? Āmantā. Nanu vuttaṃ bhagavatā – ‘‘yasmiṃ, bhikkhave, samaye ariyasāvakassa virajaṃ vītamalaṃ dhammacakkhuṃ udapādi – ‘yaṃ kiñci samudayadhammaṃ sabbaṃ taṃ nirodhadhamma’nti, saha dassanuppādā, bhikkhave, ariyasāvakassa tīṇi saṃyojanāni pahīyanti – sakkāyadiṭṭhi, vicikicchā, sīlabbataparāmāso’’ti! Attheva suttantoti? Āmantā. Tena hi na vattabbaṃ – ‘‘anupubbābhisamayo’’ti.
អនុបុព្ពាភិសមយកថា និដ្ឋិតា។
Anupubbābhisamayakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៩. អនុបុព្ពាភិសមយកថាវណ្ណនា • 9. Anupubbābhisamayakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៩. អនុបុព្ពាភិសមយកថាវណ្ណនា • 9. Anupubbābhisamayakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៩. អនុបុព្ពាភិសមយកថាវណ្ណនា • 9. Anupubbābhisamayakathāvaṇṇanā
