| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
2. දුතියවග්‌ගො
2. Dutiyavaggo
(18) 9. අනුපුබ්‌බාභිසමයකථා
(18) 9. Anupubbābhisamayakathā
339. අනුපුබ්‌බාභිසමයොති ? ආමන්‌තා. අනුපුබ්‌බෙන සොතාපත්‌තිමග්‌ගං භාවෙතීති? න හෙවං වත්‌තබ්‌බෙ. අනුපුබ්‌බෙන සොතාපත්‌තිමග්‌ගං භාවෙතීති? ආමන්‌තා. අනුපුබ්‌බෙන සොතාපත්‌තිඵලං සච්‌ඡිකරොතීති? න හෙවං වත්‌තබ්‌බෙ.
339. Anupubbābhisamayoti ? Āmantā. Anupubbena sotāpattimaggaṃ bhāvetīti? Na hevaṃ vattabbe. Anupubbena sotāpattimaggaṃ bhāvetīti? Āmantā. Anupubbena sotāpattiphalaṃ sacchikarotīti? Na hevaṃ vattabbe.
අනුපුබ්‌බාභිසමයොති? ආමන්‌තා. අනුපුබ්‌බෙන සකදාගාමිමග්‌ගං භාවෙතීති? න හෙවං වත්‌තබ්‌බෙ. අනුපුබ්‌බෙන සකදාගාමිමග්‌ගං භාවෙතීති? ආමන්‌තා. අනුපුබ්‌බෙන සකදාගාමිඵලං සච්‌ඡිකරොතීති? න හෙවං වත්‌තබ්‌බෙ.
Anupubbābhisamayoti? Āmantā. Anupubbena sakadāgāmimaggaṃ bhāvetīti? Na hevaṃ vattabbe. Anupubbena sakadāgāmimaggaṃ bhāvetīti? Āmantā. Anupubbena sakadāgāmiphalaṃ sacchikarotīti? Na hevaṃ vattabbe.
අනුපුබ්‌බාභිසමයොති? ආමන්‌තා. අනුපුබ්‌බෙන අනාගාමිමග්‌ගං භාවෙතීති? න හෙවං වත්‌තබ්‌බෙ. අනුපුබ්‌බෙන අනාගාමිමග්‌ගං භාවෙතීති? ආමන්‌තා. අනුපුබ්‌බෙන අනාගාමිඵලං සච්‌ඡිකරොතීති? න හෙවං වත්‌තබ්‌බෙ.
Anupubbābhisamayoti? Āmantā. Anupubbena anāgāmimaggaṃ bhāvetīti? Na hevaṃ vattabbe. Anupubbena anāgāmimaggaṃ bhāvetīti? Āmantā. Anupubbena anāgāmiphalaṃ sacchikarotīti? Na hevaṃ vattabbe.
අනුපුබ්‌බාභිසමයොති ? ආමන්‌තා. අනුපුබ්‌බෙන අරහත්‌තමග්‌ගං භාවෙතීති? න හෙවං වත්‌තබ්‌බෙ. අනුපුබ්‌බෙන අරහත්‌තමග්‌ගං භාවෙතීති? ආමන්‌තා. අනුපුබ්‌බෙන අරහත්‌තඵලං සච්‌ඡිකරොතීති? න හෙවං වත්‌තබ්‌බෙ.
Anupubbābhisamayoti ? Āmantā. Anupubbena arahattamaggaṃ bhāvetīti? Na hevaṃ vattabbe. Anupubbena arahattamaggaṃ bhāvetīti? Āmantā. Anupubbena arahattaphalaṃ sacchikarotīti? Na hevaṃ vattabbe.
340. සොතාපත්‌තිඵලසච්‌ඡිකිරියාය පටිපන්‌නො පුග්‌ගලො දුක්‌ඛදස්‌සනෙන කිං ජහතීති? සක්‌කායදිට්‌ඨිං, විචිකිච්‌ඡං, සීලබ්‌බතපරාමාසං, තදෙකට්‌ඨෙ ච කිලෙසෙ චතුභාගං ජහතීති. චතුභාගං සොතාපන්‌නො, චතුභාගං න සොතාපන්‌නො, චතුභාගං සොතාපත්‌තිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරති, චතුභාගං සත්‌තක්‌ඛත්‌තුපරමො කොලඞ්‌කොලො එකබීජී බුද්‌ධෙ අවෙච්‌චප්‌පසාදෙන සමන්‌නාගතො, ධම්‌මෙ…පෙ.… සඞ්‌ඝෙ…පෙ.… අරියකන්‌තෙහි සීලෙහි සමන්‌නාගතො චතුභාගං න අරියකන්‌තෙහි සීලෙහි සමන්‌නාගතොති? න හෙවං වත්‌තබ්‌බෙ.
340. Sotāpattiphalasacchikiriyāya paṭipanno puggalo dukkhadassanena kiṃ jahatīti? Sakkāyadiṭṭhiṃ, vicikicchaṃ, sīlabbataparāmāsaṃ, tadekaṭṭhe ca kilese catubhāgaṃ jahatīti. Catubhāgaṃ sotāpanno, catubhāgaṃ na sotāpanno, catubhāgaṃ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ sattakkhattuparamo kolaṅkolo ekabījī buddhe aveccappasādena samannāgato, dhamme…pe… saṅghe…pe… ariyakantehi sīlehi samannāgato catubhāgaṃ na ariyakantehi sīlehi samannāgatoti? Na hevaṃ vattabbe.
සමුදයදස්‌සනෙන…පෙ.… නිරොධදස්‌සනෙන…පෙ.… මග්‌ගදස්‌සනෙන කිං ජහතීති? සක්‌කායදිට්‌ඨිං, විචිකිච්‌ඡං, සීලබ්‌බතපරාමාසං, තදෙකට්‌ඨෙ ච කිලෙසෙ චතුභාගං ජහතීති. චතුභාගං සොතාපන්‌නො, චතුභාගං න සොතාපන්‌නො, චතුභාගං සොතාපත්‌තිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරති, චතුභාගං සත්‌තක්‌ඛත්‌තුපරමො කොලඞ්‌කොලො එකබීජී බුද්‌ධෙ අවෙච්‌චප්‌පසාදෙන සමන්‌නාගතො, ධම්‌මෙ…පෙ.… සඞ්‌ඝෙ…පෙ.… අරියකන්‌තෙහි සීලෙහි සමන්‌නාගතො, චතුභාගං න අරියකන්‌තෙහි සීලෙහි සමන්‌නාගතොති? න හෙවං වත්‌තබ්‌බෙ…පෙ.….
Samudayadassanena…pe… nirodhadassanena…pe… maggadassanena kiṃ jahatīti? Sakkāyadiṭṭhiṃ, vicikicchaṃ, sīlabbataparāmāsaṃ, tadekaṭṭhe ca kilese catubhāgaṃ jahatīti. Catubhāgaṃ sotāpanno, catubhāgaṃ na sotāpanno, catubhāgaṃ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ sattakkhattuparamo kolaṅkolo ekabījī buddhe aveccappasādena samannāgato, dhamme…pe… saṅghe…pe… ariyakantehi sīlehi samannāgato, catubhāgaṃ na ariyakantehi sīlehi samannāgatoti? Na hevaṃ vattabbe…pe….
341. සකදාගාමිඵලසච්‌ඡිකිරියාය පටිපන්‌නො පුග්‌ගලො දුක්‌ඛදස්‌සනෙන කිං ජහතීති? ඔළාරිකං කාමරාගං, ඔළාරිකං බ්‍යාපාදං, තදෙකට්‌ඨෙ ච කිලෙසෙ චතුභාගං ජහතීති. චතුභාගං සකදාගාමී, චතුභාගං න සකදාගාමී, චතුභාගං සකදාගාමිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරතීති? න හෙවං වත්‌තබ්‌බෙ…පෙ.… සමුදයදස්‌සනෙන…පෙ.… නිරොධදස්‌සනෙන…පෙ.… මග්‌ගදස්‌සනෙන කිං ජහතීති? ඔළාරිකං කාමරාගං, ඔළාරිකං බ්‍යාපාදං, තදෙකට්‌ඨෙ ච කිලෙසෙ චතුභාගං ජහතීති. චතුභාගං සකදාගාමී, චතුභාගං න සකදාගාමී, චතුභාගං සකදාගාමිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති , කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරතීති? න හෙවං වත්‌තබ්‌බෙ…පෙ.….
341. Sakadāgāmiphalasacchikiriyāya paṭipanno puggalo dukkhadassanena kiṃ jahatīti? Oḷārikaṃ kāmarāgaṃ, oḷārikaṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ sakadāgāmī, catubhāgaṃ na sakadāgāmī, catubhāgaṃ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharatīti? Na hevaṃ vattabbe…pe… samudayadassanena…pe… nirodhadassanena…pe… maggadassanena kiṃ jahatīti? Oḷārikaṃ kāmarāgaṃ, oḷārikaṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ sakadāgāmī, catubhāgaṃ na sakadāgāmī, catubhāgaṃ sakadāgāmiphalappatto paṭiladdho adhigato sacchikato upasampajja viharati , kāyena phusitvā viharati, catubhāgaṃ na kāyena phusitvā viharatīti? Na hevaṃ vattabbe…pe….
342. අනාගාමිඵලසච්‌ඡිකිරියාය පටිපන්‌නො පුග්‌ගලො දුක්‌ඛදස්‌සනෙන කිං ජහතීති? අණුසහගතං කාමරාගං, අණුසහගතං බ්‍යාපාදං, තදෙකට්‌ඨෙ ච කිලෙසෙ චතුභාගං ජහතීති. චතුභාගං අනාගාමී, චතුභාගං න අනාගාමී, චතුභාගං අනාගාමිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරති, චතුභාගං අන්‌තරාපරිනිබ්‌බායී…පෙ.… උපහච්‌චපරිනිබ්‌බායී… අසඞ්‌ඛාරපරිනිබ්‌බායී… සසඞ්‌ඛාරපරිනිබ්‌බායී… උද්‌ධංසොතො අකනිට්‌ඨගාමී, චතුභාගං න උද්‌ධංසොතො න අකනිට්‌ඨගාමීති? න හෙවං වත්‌තබ්‌බෙ…පෙ.….
342. Anāgāmiphalasacchikiriyāya paṭipanno puggalo dukkhadassanena kiṃ jahatīti? Aṇusahagataṃ kāmarāgaṃ, aṇusahagataṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ anāgāmī, catubhāgaṃ na anāgāmī, catubhāgaṃ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ antarāparinibbāyī…pe… upahaccaparinibbāyī… asaṅkhāraparinibbāyī… sasaṅkhāraparinibbāyī… uddhaṃsoto akaniṭṭhagāmī, catubhāgaṃ na uddhaṃsoto na akaniṭṭhagāmīti? Na hevaṃ vattabbe…pe….
සමුදයදස්‌සනෙන…පෙ.… නිරොධදස්‌සනෙන…පෙ.… මග්‌ගදස්‌සනෙන කිං ජහතීති? අණුසහගතං කාමරාගං, අණුසහගතං බ්‍යාපාදං, තදෙකට්‌ඨෙ ච කිලෙසෙ චතුභාගං ජහතීති. චතුභාගං අනාගාමී, චතුභාගං න අනාගාමී, චතුභාගං අනාගාමිඵලප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරති, චතුභාගං අන්‌තරාපරිනිබ්‌බායී…පෙ.… උපහච්‌චපරිනිබ්‌බායී… අසඞ්‌ඛාරපරිනිබ්‌බායී… සසඞ්‌ඛාරපරිනිබ්‌බායී… උද්‌ධංසොතො අකනිට්‌ඨගාමී, චතුභාගං න උද්‌ධංසොතො අකනිට්‌ඨගාමීති? න හෙවං වත්‌තබ්‌බෙ…පෙ.….
Samudayadassanena…pe… nirodhadassanena…pe… maggadassanena kiṃ jahatīti? Aṇusahagataṃ kāmarāgaṃ, aṇusahagataṃ byāpādaṃ, tadekaṭṭhe ca kilese catubhāgaṃ jahatīti. Catubhāgaṃ anāgāmī, catubhāgaṃ na anāgāmī, catubhāgaṃ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ antarāparinibbāyī…pe… upahaccaparinibbāyī… asaṅkhāraparinibbāyī… sasaṅkhāraparinibbāyī… uddhaṃsoto akaniṭṭhagāmī, catubhāgaṃ na uddhaṃsoto akaniṭṭhagāmīti? Na hevaṃ vattabbe…pe….
343. අරහත්‌තසච්‌ඡිකිරියාය පටිපන්‌නො පුග්‌ගලො දුක්‌ඛදස්‌සනෙන කිං ජහතීති? රූපරාගං, අරූපරාගං, මානං, උද්‌ධච්‌චං, අවිජ්‌ජං, තදෙකට්‌ඨෙ ච කිලෙසෙ චතුභාගං ජහතීති. චතුභාගං අරහා, චතුභාගං න අරහා, චතුභාගං අරහත්‌තප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරති, චතුභාගං වීතරාගො…පෙ.… වීතදොසො… වීතමොහො…පෙ.… කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤාවිමුත්‌තො උක්‌ඛිත්‌තපලිඝො සඞ්‌කිණ්‌ණපරිඛො අබ්‌බූළ්‌හෙසිකො නිරග්‌ගළො අරියො පන්‌නද්‌ධජො පන්‌නභාරො විසඤ්‌ඤුත්‌තො සුවිජිතවිජයො, දුක්‌ඛං තස්‌ස පරිඤ්‌ඤාතං, සමුදයො පහීනො, නිරොධො සච්‌ඡිකතො, මග්‌ගො භාවිතො, අභිඤ්‌ඤෙය්‍යං අභිඤ්‌ඤාතං, පරිඤ්‌ඤෙය්‍යං පරිඤ්‌ඤාතං, පහාතබ්‌බං පහීනං, භාවෙතබ්‌බං භාවිතං…පෙ.… සච්‌ඡිකාතබ්‌බං සච්‌ඡිකතං, චතුභාගං සච්‌ඡිකාතබ්‌බං න සච්‌ඡිකතන්‌ති? න හෙවං වත්‌තබ්‌බෙ…පෙ.….
343. Arahattasacchikiriyāya paṭipanno puggalo dukkhadassanena kiṃ jahatīti? Rūparāgaṃ, arūparāgaṃ, mānaṃ, uddhaccaṃ, avijjaṃ, tadekaṭṭhe ca kilese catubhāgaṃ jahatīti. Catubhāgaṃ arahā, catubhāgaṃ na arahā, catubhāgaṃ arahattappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ vītarāgo…pe… vītadoso… vītamoho…pe… katakaraṇīyo ohitabhāro anuppattasadattho parikkhīṇabhavasaṃyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṃ tassa pariññātaṃ, samudayo pahīno, nirodho sacchikato, maggo bhāvito, abhiññeyyaṃ abhiññātaṃ, pariññeyyaṃ pariññātaṃ, pahātabbaṃ pahīnaṃ, bhāvetabbaṃ bhāvitaṃ…pe… sacchikātabbaṃ sacchikataṃ, catubhāgaṃ sacchikātabbaṃ na sacchikatanti? Na hevaṃ vattabbe…pe….
සමුදයදස්‌සනෙන … නිරොධදස්‌සනෙන… මග්‌ගදස්‌සනෙන කිං ජහතීති? රූපරාගං, අරූපරාගං, මානං, උද්‌ධච්‌චං, අවිජ්‌ජං, තදෙකට්‌ඨෙ ච කිලෙසෙ චතුභාගං ජහතීති. චතුභාගං අරහා, චතුභාගං න අරහා, චතුභාගං අරහත්‌තප්‌පත්‌තො පටිලද්‌ධො අධිගතො සච්‌ඡිකතො උපසම්‌පජ්‌ජ විහරති, කායෙන ඵුසිත්‌වා විහරති, චතුභාගං න කායෙන ඵුසිත්‌වා විහරති, චතුභාගං වීතරාගො… වීතදොසො… වීතමොහො… කතකරණීයො ඔහිතභාරො අනුප්‌පත්‌තසදත්‌ථො පරික්‌ඛීණභවසංයොජනො සම්‌මදඤ්‌ඤාවිමුත්‌තො උක්‌ඛිත්‌තපලිඝො සඞ්‌කිණ්‌ණපරිඛො අබ්‌බූළ්‌හෙසිකො නිරග්‌ගළො අරියො පන්‌නද්‌ධජො පන්‌නභාරො විසඤ්‌ඤුත්‌තො සුවිජිතවිජයො, දුක්‌ඛං තස්‌ස පරිඤ්‌ඤාතං, සමුදයො පහීනො, නිරොධො සච්‌ඡිකතො, මග්‌ගො භාවිතො, අභිඤ්‌ඤෙය්‍යං අභිඤ්‌ඤාතං, පරිඤ්‌ඤෙය්‍යං පරිඤ්‌ඤාතං, පහාතබ්‌බං පහීනං, භාවෙතබ්‌බං භාවිතං…පෙ.… සච්‌ඡිකාතබ්‌බං සච්‌ඡිකතං, චතුභාගං සච්‌ඡිකාතබ්‌බං න සච්‌ඡිකතන්‌ති? න හෙවං වත්‌තබ්‌බෙ…පෙ.….
Samudayadassanena … nirodhadassanena… maggadassanena kiṃ jahatīti? Rūparāgaṃ, arūparāgaṃ, mānaṃ, uddhaccaṃ, avijjaṃ, tadekaṭṭhe ca kilese catubhāgaṃ jahatīti. Catubhāgaṃ arahā, catubhāgaṃ na arahā, catubhāgaṃ arahattappatto paṭiladdho adhigato sacchikato upasampajja viharati, kāyena phusitvā viharati, catubhāgaṃ na kāyena phusitvā viharati, catubhāgaṃ vītarāgo… vītadoso… vītamoho… katakaraṇīyo ohitabhāro anuppattasadattho parikkhīṇabhavasaṃyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṃ tassa pariññātaṃ, samudayo pahīno, nirodho sacchikato, maggo bhāvito, abhiññeyyaṃ abhiññātaṃ, pariññeyyaṃ pariññātaṃ, pahātabbaṃ pahīnaṃ, bhāvetabbaṃ bhāvitaṃ…pe… sacchikātabbaṃ sacchikataṃ, catubhāgaṃ sacchikātabbaṃ na sacchikatanti? Na hevaṃ vattabbe…pe….
344. සොතාපත්‌තිඵලසච්‌ඡිකිරියාය පටිපන්‌නො පුග්‌ගලො දුක්‌ඛං දක්‌ඛන්‌තො පටිපන්‌නකොති වත්‌තබ්‌බොති? ආමන්‌තා. දුක්‌ඛෙ දිට්‌ඨෙ ඵලෙ ඨිතොති වත්‌තබ්‌බොති? න හෙවං වත්‌තබ්‌බෙ. සමුදයං දක්‌ඛන්‌තො…පෙ.… නිරොධං දක්‌ඛන්‌තො පටිපන්‌නකොති වත්‌තබ්‌බොති? ආමන්‌තා . නිරොධෙ දිට්‌ඨෙ ඵලෙ ඨිතොති වත්‌තබ්‌බොති? න හෙවං වත්‌තබ්‌බෙ.
344. Sotāpattiphalasacchikiriyāya paṭipanno puggalo dukkhaṃ dakkhanto paṭipannakoti vattabboti? Āmantā. Dukkhe diṭṭhe phale ṭhitoti vattabboti? Na hevaṃ vattabbe. Samudayaṃ dakkhanto…pe… nirodhaṃ dakkhanto paṭipannakoti vattabboti? Āmantā . Nirodhe diṭṭhe phale ṭhitoti vattabboti? Na hevaṃ vattabbe.
සොතාපත්‌තිඵලසච්‌ඡිකිරියාය පටිපන්‌නො පුග්‌ගලො මග්‌ගං දක්‌ඛන්‌තො පටිපන්‌නකොති වත්‌තබ්‌බො, මග්‌ගෙ දිට්‌ඨෙ ඵලෙ ඨිතොති වත්‌තබ්‌බොති? ආමන්‌තා. දුක්‌ඛං දක්‌ඛන්‌තො පටිපන්‌නකොති වත්‌තබ්‌බො, දුක්‌ඛෙ දිට්‌ඨෙ ඵලෙ ඨිතොති වත්‌තබ්‌බොති? න හෙවං වත්‌තබ්‌බෙ…පෙ.… මග්‌ගං දක්‌ඛන්‌තො පටිපන්‌නකොති වත්‌තබ්‌බො, මග්‌ගෙ දිට්‌ඨෙ ඵලෙ ඨිතොති වත්‌තබ්‌බොති? ආමන්‌තා. සමුදයං දක්‌ඛන්‌තො…පෙ.… නිරොධං දක්‌ඛන්‌තො පටිපන්‌නකොති වත්‌තබ්‌බො, නිරොධෙ දිට්‌ඨෙ ඵලෙ ඨිතොති වත්‌තබ්‌බොති? න හෙවං වත්‌තබ්‌බෙ…පෙ.….
Sotāpattiphalasacchikiriyāya paṭipanno puggalo maggaṃ dakkhanto paṭipannakoti vattabbo, magge diṭṭhe phale ṭhitoti vattabboti? Āmantā. Dukkhaṃ dakkhanto paṭipannakoti vattabbo, dukkhe diṭṭhe phale ṭhitoti vattabboti? Na hevaṃ vattabbe…pe… maggaṃ dakkhanto paṭipannakoti vattabbo, magge diṭṭhe phale ṭhitoti vattabboti? Āmantā. Samudayaṃ dakkhanto…pe… nirodhaṃ dakkhanto paṭipannakoti vattabbo, nirodhe diṭṭhe phale ṭhitoti vattabboti? Na hevaṃ vattabbe…pe….
සොතාපත්‌තිඵලසච්‌ඡිකිරියාය පටිපන්‌නො පුග්‌ගලො දුක්‌ඛං දක්‌ඛන්‌තො පටිපන්‌නකොති වත්‌තබ්‌බො, දුක්‌ඛෙ දිට්‌ඨෙ න වත්‌තබ්‌බං – ‘‘ඵලෙ ඨිතොති වත්‌තබ්‌බො’’ති? ආමන්‌තා. මග්‌ගං දක්‌ඛන්‌තො පටිපන්‌නකොති වත්‌තබ්‌බො, මග්‌ගෙ දිට්‌ඨෙ න වත්‌තබ්‌බං – ‘‘ඵලෙ ඨිතොති වත්‌තබ්‌බො’’ති? න හෙවං වත්‌තබ්‌බෙ…පෙ.… සමුදයං දක්‌ඛන්‌තො… නිරොධං දක්‌ඛන්‌තො පටිපන්‌නකොති වත්‌තබ්‌බො, නිරොධෙ දිට්‌ඨෙ න වත්‌තබ්‌බං – ‘‘ඵලෙ ඨිතොති වත්‌තබ්‌බො’’ති? ආමන්‌තා. මග්‌ගං දක්‌ඛන්‌තො ‘‘පටිපන්‌නකො’’ති වත්‌තබ්‌බො, මග්‌ගෙ දිට්‌ඨෙ න වත්‌තබ්‌බං – ‘‘ඵලෙ ඨිතොති වත්‌තබ්‌බො’’ති? න හෙවං වත්‌තබ්‌බෙ…පෙ.….
Sotāpattiphalasacchikiriyāya paṭipanno puggalo dukkhaṃ dakkhanto paṭipannakoti vattabbo, dukkhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Maggaṃ dakkhanto paṭipannakoti vattabbo, magge diṭṭhe na vattabbaṃ – ‘‘phale ṭhitoti vattabbo’’ti? Na hevaṃ vattabbe…pe… samudayaṃ dakkhanto… nirodhaṃ dakkhanto paṭipannakoti vattabbo, nirodhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Maggaṃ dakkhanto ‘‘paṭipannako’’ti vattabbo, magge diṭṭhe na vattabbaṃ – ‘‘phale ṭhitoti vattabbo’’ti? Na hevaṃ vattabbe…pe….
1 සොතාපත්‌තිඵලසච්‌ඡිකිරියාය පටිපන්‌නො පුග්‌ගලො දුක්‌ඛං දක්‌ඛන්‌තො පටිපන්‌නකොති වත්‌තබ්‌බො, දුක්‌ඛෙ දිට්‌ඨෙ න වත්‌තබ්‌බං – ‘‘ඵලෙ ඨිතොති වත්‌තබ්‌බො’’ති? ආමන්‌තා. නිරත්‌ථියං දුක්‌ඛදස්‌සනන්‌ති? න හෙවං වත්‌තබ්‌බෙ…පෙ.… සමුදයං දක්‌ඛන්‌තො…පෙ.… නිරොධං දක්‌ඛන්‌තො පටිපන්‌නකොති වත්‌තබ්‌බො, නිරොධෙ දිට්‌ඨෙ න වත්‌තබ්‌බං – ‘‘ඵලෙ ඨිතොති වත්‌තබ්‌බො’’ති? ආමන්‌තා. නිරත්‌ථියං නිරොධදස්‌සනන්‌ති? න හෙවං වත්‌තබ්‌බෙ…පෙ.….
2 Sotāpattiphalasacchikiriyāya paṭipanno puggalo dukkhaṃ dakkhanto paṭipannakoti vattabbo, dukkhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Niratthiyaṃ dukkhadassananti? Na hevaṃ vattabbe…pe… samudayaṃ dakkhanto…pe… nirodhaṃ dakkhanto paṭipannakoti vattabbo, nirodhe diṭṭhe na vattabbaṃ – ‘‘phale ṭhitoti vattabbo’’ti? Āmantā. Niratthiyaṃ nirodhadassananti? Na hevaṃ vattabbe…pe….
345. 3 දුක්‌ඛෙ දිට්‌ඨෙ චත්‌තාරි සච්‌චානි දිට්‌ඨානි හොන්‌තීති? ආමන්‌තා. දුක්‌ඛසච්‌චං චත්‌තාරි සච්‌චානීති? න හෙවං වත්‌තබ්‌බෙ…පෙ.….
345. 4 Dukkhe diṭṭhe cattāri saccāni diṭṭhāni hontīti? Āmantā. Dukkhasaccaṃ cattāri saccānīti? Na hevaṃ vattabbe…pe….
5 රූපක්‌ඛන්‌ධෙ අනිච්‌චතො දිට්‌ඨෙ පඤ්‌චක්‌ඛන්‌ධා අනිච්‌චතො දිට්‌ඨා හොන්‌තීති? ආමන්‌තා. රූපක්‌ඛන්‌ධො පඤ්‌චක්‌ඛන්‌ධාති? න හෙවං වත්‌තබ්‌බෙ…පෙ.….
6 Rūpakkhandhe aniccato diṭṭhe pañcakkhandhā aniccato diṭṭhā hontīti? Āmantā. Rūpakkhandho pañcakkhandhāti? Na hevaṃ vattabbe…pe….
7 චක්‌ඛායතනෙ අනිච්‌චතො දිට්‌ඨෙ ද්‌වාදසායතනානි අනිච්‌චතො දිට්‌ඨානි හොන්‌තීති? ආමන්‌තා. චක්‌ඛායතනං ද්‌වාදසායතනානීති? න හෙවං වත්‌තබ්‌බෙ…පෙ.….
8 Cakkhāyatane aniccato diṭṭhe dvādasāyatanāni aniccato diṭṭhāni hontīti? Āmantā. Cakkhāyatanaṃ dvādasāyatanānīti? Na hevaṃ vattabbe…pe….
9 චක්‌ඛුධාතුයා අනිච්‌චතො දිට්‌ඨාය අට්‌ඨාරස ධාතුයො අනිච්‌චතො දිට්‌ඨා හොන්‌තීති? ආමන්‌තා. චක්‌ඛුධාතු අට්‌ඨාරස ධාතුයොති? න හෙවං වත්‌තබ්‌බෙ…පෙ.….
10 Cakkhudhātuyā aniccato diṭṭhāya aṭṭhārasa dhātuyo aniccato diṭṭhā hontīti? Āmantā. Cakkhudhātu aṭṭhārasa dhātuyoti? Na hevaṃ vattabbe…pe….
11 චක්‌ඛුන්‌ද්‍රියෙ අනිච්‌චතො දිට්‌ඨෙ බාවීසතින්‌ද්‍රියානි අනිච්‌චතො දිට්‌ඨානි හොන්‌තීති? ආමන්‌තා. චක්‌ඛුන්‌ද්‍රියං බාවීසතින්‌ද්‍රියානීති? න හෙවං වත්‌තබ්‌බෙ…පෙ.….
12 Cakkhundriye aniccato diṭṭhe bāvīsatindriyāni aniccato diṭṭhāni hontīti? Āmantā. Cakkhundriyaṃ bāvīsatindriyānīti? Na hevaṃ vattabbe…pe….
13 චතූහි ඤාණෙහි සොතාපත්‌තිඵලං සච්‌ඡිකරොතීති? ආමන්‌තා. චත්‌තාරි සොතාපත්‌තිඵලානීති? න හෙවං වත්‌තබ්‌බෙ…පෙ.… අට්‌ඨහි ඤාණෙහි සොතාපත්‌තිඵලං සච්‌ඡිකරොතීති? ආමන්‌තා . අට්‌ඨ සොතාපත්‌තිඵලානීති? න හෙවං වත්‌තබ්‌බෙ…පෙ.… ද්‌වාදසහි ඤාණෙහි සොතාපත්‌තිඵලං සච්‌ඡිකරොතීති? ආමන්‌තා. ද්‌වාදස සොතාපත්‌තිඵලානීති? න හෙවං වත්‌තබ්‌බෙ…පෙ.… චතුචත්‌තාරීසාය ඤාණෙහි සොතාපත්‌තිඵලං සච්‌ඡිකරොතීති ? ආමන්‌තා. චතුචත්‌තාරීසං සොතාපත්‌තිඵලානීති? න හෙවං වත්‌තබ්‌බෙ…පෙ.… සත්‌තසත්‌තතියා ඤාණෙහි සොතාපත්‌තිඵලං සච්‌ඡිකරොතීති? ආමන්‌තා. සත්‌තසත්‌තති සොතාපත්‌තිඵලානීති? න හෙවං වත්‌තබ්‌බෙ…පෙ.….
14 Catūhi ñāṇehi sotāpattiphalaṃ sacchikarotīti? Āmantā. Cattāri sotāpattiphalānīti? Na hevaṃ vattabbe…pe… aṭṭhahi ñāṇehi sotāpattiphalaṃ sacchikarotīti? Āmantā . Aṭṭha sotāpattiphalānīti? Na hevaṃ vattabbe…pe… dvādasahi ñāṇehi sotāpattiphalaṃ sacchikarotīti? Āmantā. Dvādasa sotāpattiphalānīti? Na hevaṃ vattabbe…pe… catucattārīsāya ñāṇehi sotāpattiphalaṃ sacchikarotīti ? Āmantā. Catucattārīsaṃ sotāpattiphalānīti? Na hevaṃ vattabbe…pe… sattasattatiyā ñāṇehi sotāpattiphalaṃ sacchikarotīti? Āmantā. Sattasattati sotāpattiphalānīti? Na hevaṃ vattabbe…pe….
346. න වත්‌තබ්‌බං – ‘‘අනුපුබ්‌බාභිසමයො’’ති? ආමන්‌තා. නනු වුත්‌තං භගවතා – ‘‘සෙය්‍යථාපි, භික්‌ඛවෙ, මහාසමුද්‌දො අනුපුබ්‌බනින්‌නො අනුපුබ්‌බපොණො අනුපුබ්‌බපබ්‌භාරො, න ආයතකෙනෙව පපාතො; එවමෙව ඛො, භික්‌ඛවෙ, ඉමස්‌මිං ධම්‌මවිනයෙ අනුපුබ්‌බසික්‌ඛා අනුපුබ්‌බකිරියා අනුපුබ්‌බපටිපදා, න ආයතකෙනෙව අඤ්‌ඤාපටිවෙධො’’ති 15. අත්‌ථෙව සුත්‌තන්‌තොති? ආමන්‌තා. තෙන හි අනුපුබ්‌බාභිසමයොති.
346. Na vattabbaṃ – ‘‘anupubbābhisamayo’’ti? Āmantā. Nanu vuttaṃ bhagavatā – ‘‘seyyathāpi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto; evameva kho, bhikkhave, imasmiṃ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho’’ti 16. Attheva suttantoti? Āmantā. Tena hi anupubbābhisamayoti.
න වත්‌තබ්‌බං – ‘‘අනුපුබ්‌බාභිසමයො’’ති? ආමන්‌තා. නනු වුත්‌තං භගවතා –
Na vattabbaṃ – ‘‘anupubbābhisamayo’’ti? Āmantā. Nanu vuttaṃ bhagavatā –
‘‘අනුපුබ්‌බෙන මෙධාවී, ථොකං ථොකං ඛණෙ ඛණෙ;
‘‘Anupubbena medhāvī, thokaṃ thokaṃ khaṇe khaṇe;
අත්‌ථෙව සුත්‌තන්‌තොති? ආමන්‌තා. තෙන හි අනුපුබ්‌බාභිසමයොති.
Attheva suttantoti? Āmantā. Tena hi anupubbābhisamayoti.
අනුපුබ්‌බාභිසමයොති ? ආමන්‌තා. නන්‌වායස්‌මා ගවම්‌පති ථෙරො භික්‌ඛූ එතදවොච – ‘‘සම්‌මුඛා මෙතං, ආවුසො, භගවතො සුතං සම්‌මුඛා පටිග්‌ගහිතං – ‘යො, භික්‌ඛවෙ, දුක්‌ඛං පස්‌සති දුක්‌ඛසමුදයම්‌පි සො පස්‌සති, දුක්‌ඛනිරොධම්‌පි පස්‌සති, දුක්‌ඛනිරොධගාමිනිං පටිපදම්‌පි පස්‌සති; යො දුක්‌ඛසමුදයං පස්‌සති දුක්‌ඛම්‌පි සො පස්‌සති, දුක්‌ඛනිරොධම්‌පි පස්‌සති, දුක්‌ඛනිරොධගාමිනිං පටිපදම්‌පි පස්‌සති; යො දුක්‌ඛනිරොධං පස්‌සති දුක්‌ඛම්‌පි සො පස්‌සති, දුක්‌ඛසමුදයම්‌පි පස්‌සති, දුක්‌ඛනිරොධගාමිනිං පටිපදම්‌පි පස්‌සති; යො දුක්‌ඛනිරොධගාමිනිං පටිපදං පස්‌සති දුක්‌ඛම්‌පි සො පස්‌සති, දුක්‌ඛසමුදයම්‌පි පස්‌සති, දුක්‌ඛනිරොධම්‌පි පස්‌සතී’’’ති 19! අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘අනුපුබ්‌බාභිසමයො’’ති.
Anupubbābhisamayoti ? Āmantā. Nanvāyasmā gavampati thero bhikkhū etadavoca – ‘‘sammukhā metaṃ, āvuso, bhagavato sutaṃ sammukhā paṭiggahitaṃ – ‘yo, bhikkhave, dukkhaṃ passati dukkhasamudayampi so passati, dukkhanirodhampi passati, dukkhanirodhagāminiṃ paṭipadampi passati; yo dukkhasamudayaṃ passati dukkhampi so passati, dukkhanirodhampi passati, dukkhanirodhagāminiṃ paṭipadampi passati; yo dukkhanirodhaṃ passati dukkhampi so passati, dukkhasamudayampi passati, dukkhanirodhagāminiṃ paṭipadampi passati; yo dukkhanirodhagāminiṃ paṭipadaṃ passati dukkhampi so passati, dukkhasamudayampi passati, dukkhanirodhampi passatī’’’ti 20! Attheva suttantoti? Āmantā. Tena hi na vattabbaṃ – ‘‘anupubbābhisamayo’’ti.
අනුපුබ්‌බාභිසමයොති ? ආමන්‌තා. නනු වුත්‌තං භගවතා –
Anupubbābhisamayoti ? Āmantā. Nanu vuttaṃ bhagavatā –
‘‘සහාවස්‌ස දස්‌සනසම්‌පදාය,
‘‘Sahāvassa dassanasampadāya,
තයස්‌සු ධම්‌මා ජහිතා භවන්‌ති;
Tayassu dhammā jahitā bhavanti;
සක්‌කායදිට්‌ඨී විචිකිච්‌ඡිතඤ්‌ච,
Sakkāyadiṭṭhī vicikicchitañca,
සීලබ්‌බතං වාපි යදත්‌ථි කිඤ්‌චි;
Sīlabbataṃ vāpi yadatthi kiñci;
චතූහපායෙහි ච විප්‌පමුත්‌තො,
Catūhapāyehi ca vippamutto,
ඡච්‌චාභිඨානානි අභබ්‌බ කාතු’’න්‌ති.
Chaccābhiṭhānāni abhabba kātu’’nti.
අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘අනුපුබ්‌බාභිසමයො’’ති.
Attheva suttantoti? Āmantā. Tena hi na vattabbaṃ – ‘‘anupubbābhisamayo’’ti.
අනුපුබ්‌බාභිසමයොති? ආමන්‌තා. නනු වුත්‌තං භගවතා – ‘‘යස්‌මිං, භික්‌ඛවෙ, සමයෙ අරියසාවකස්‌ස විරජං වීතමලං ධම්‌මචක්‌ඛුං උදපාදි – ‘යං කිඤ්‌චි සමුදයධම්‌මං සබ්‌බං තං නිරොධධම්‌ම’න්‌ති, සහ දස්‌සනුප්‌පාදා, භික්‌ඛවෙ, අරියසාවකස්‌ස තීණි සංයොජනානි පහීයන්‌ති – සක්‌කායදිට්‌ඨි, විචිකිච්‌ඡා, සීලබ්‌බතපරාමාසො’’ති! අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘අනුපුබ්‌බාභිසමයො’’ති.
Anupubbābhisamayoti? Āmantā. Nanu vuttaṃ bhagavatā – ‘‘yasmiṃ, bhikkhave, samaye ariyasāvakassa virajaṃ vītamalaṃ dhammacakkhuṃ udapādi – ‘yaṃ kiñci samudayadhammaṃ sabbaṃ taṃ nirodhadhamma’nti, saha dassanuppādā, bhikkhave, ariyasāvakassa tīṇi saṃyojanāni pahīyanti – sakkāyadiṭṭhi, vicikicchā, sīlabbataparāmāso’’ti! Attheva suttantoti? Āmantā. Tena hi na vattabbaṃ – ‘‘anupubbābhisamayo’’ti.
අනුපුබ්‌බාභිසමයකථා නිට්‌ඨිතා.
Anupubbābhisamayakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 9. අනුපුබ්‌බාභිසමයකථාවණ්‌ණනා • 9. Anupubbābhisamayakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 9. අනුපුබ්‌බාභිසමයකථාවණ්‌ණනා • 9. Anupubbābhisamayakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 9. අනුපුබ්‌බාභිසමයකථාවණ්‌ණනා • 9. Anupubbābhisamayakathāvaṇṇanā
