| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
9. அனுபுப்³பா³பி⁴ஸமயகதா²வண்ணனா
9. Anupubbābhisamayakathāvaṇṇanā
339. இதா³னி அனுபுப்³பா³பி⁴ஸமயகதா² நாம ஹோதி. தத்த² யேஸங் –
339. Idāni anupubbābhisamayakathā nāma hoti. Tattha yesaṃ –
‘‘அனுபுப்³பே³ன மேதா⁴வீ, தோ²கங் தோ²கங் க²ணே க²ணே;
‘‘Anupubbena medhāvī, thokaṃ thokaṃ khaṇe khaṇe;
கம்மாரோ ரஜதஸ்ஸேவ, நித்³த⁴மே மலமத்தனோ’’தி. (த⁴॰ ப॰ 239) –
Kammāro rajatasseva, niddhame malamattano’’ti. (dha. pa. 239) –
ஆதீ³னி ஸுத்தானி அயோனிஸோ க³ஹெத்வா ‘‘ஸோதாபத்திப²லஸச்சி²கிரியாய படிபன்னோ ஏகச்சே கிலேஸே து³க்க²த³ஸ்ஸனேன பஜஹதி, ஏகச்சே ஸமுத³யனிரோத⁴மக்³க³த³ஸ்ஸனேன, ததா² ஸேஸாபீதி ஏவங் ஸோளஸஹி கொட்டா²ஸேஹி அனுபுப்³பே³ன கிலேஸப்பஹானங் கத்வா அரஹத்தபடிலாபோ⁴ ஹோதீ’’தி ஏவரூபா நானாபி⁴ஸமயலத்³தி⁴ உப்பன்னா, ஸெய்யதா²பி ஏதரஹி அந்த⁴கஸப்³ப³த்தி²கஸம்மிதியப⁴த்³ரயானிகானங்; தேஸங் லத்³தி⁴விவேசனத்த²ங் அனுபுப்³பா³பி⁴ஸமயோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அனுபுப்³பே³ன ஸோதாபத்திமக்³க³ந்தி புட்டோ² பன ஏகஸ்ஸ மக்³க³ஸ்ஸ ப³ஹுபா⁴வாபத்திப⁴யேன படிக்கி²பதி. து³தியங் புட்டோ² து³க்க²த³ஸ்ஸனாதி³வஸேன படிஜானாதி. தானி வா சத்தாரிபி ஞாணானி ஏகோ ஸோதாபத்திமக்³கோ³யேவாதி படிஜானாதி, ப²லங் பன ஏகமேவ இச்ச²தி, தஸ்மா படிக்கி²பதி. ஸகதா³கா³மிமக்³கா³தீ³ஸுபி ஏஸேவ நயோ.
Ādīni suttāni ayoniso gahetvā ‘‘sotāpattiphalasacchikiriyāya paṭipanno ekacce kilese dukkhadassanena pajahati, ekacce samudayanirodhamaggadassanena, tathā sesāpīti evaṃ soḷasahi koṭṭhāsehi anupubbena kilesappahānaṃ katvā arahattapaṭilābho hotī’’ti evarūpā nānābhisamayaladdhi uppannā, seyyathāpi etarahi andhakasabbatthikasammitiyabhadrayānikānaṃ; tesaṃ laddhivivecanatthaṃ anupubbābhisamayoti pucchā sakavādissa, paṭiññā itarassa. Anupubbena sotāpattimagganti puṭṭho pana ekassa maggassa bahubhāvāpattibhayena paṭikkhipati. Dutiyaṃ puṭṭho dukkhadassanādivasena paṭijānāti. Tāni vā cattāripi ñāṇāni eko sotāpattimaggoyevāti paṭijānāti, phalaṃ pana ekameva icchati, tasmā paṭikkhipati. Sakadāgāmimaggādīsupi eseva nayo.
344. மக்³கே³ தி³ட்டே² ப²லே டி²தோதி பஞ்ஹே யஸ்மா து³க்க²த³ஸ்ஸனாதீ³ஹி த³ஸ்ஸனங் அபரினிட்டி²தங், மக்³க³த³ஸ்ஸனேன பரினிட்டி²தங் நாம ஹோதி, ததா³ ஸோ ப²லே டி²தோதி ஸங்க²ங் க³ச்ச²தி, தஸ்மா படிஜானாதி.
344. Magge diṭṭhe phale ṭhitoti pañhe yasmā dukkhadassanādīhi dassanaṃ apariniṭṭhitaṃ, maggadassanena pariniṭṭhitaṃ nāma hoti, tadā so phale ṭhitoti saṅkhaṃ gacchati, tasmā paṭijānāti.
345. து³க்கே² தி³ட்டே² சத்தாரி ஸச்சானீதி புச்சா² பரவாதி³ஸ்ஸ, ஏகாபி⁴ஸமயவஸேன படிஞ்ஞா ஸகவாதி³ஸ்ஸ. புன து³க்க²ஸச்சங் சத்தாரி ஸச்சானீதி அனுயோகே³ சதுன்னம்பி நானாஸபா⁴வத்தா படிக்கே²போ தஸ்ஸேவ.
345. Dukkhediṭṭhe cattāri saccānīti pucchā paravādissa, ekābhisamayavasena paṭiññā sakavādissa. Puna dukkhasaccaṃ cattāri saccānīti anuyoge catunnampi nānāsabhāvattā paṭikkhepo tasseva.
ரூபக்க²ந்தே⁴ அனிச்சதோ தி³ட்டே²தி புச்சா² ஸகவாதி³ஸ்ஸ, ஸமுத்³த³தோ ஏகபி³ந்து³ஸ்ஸ ரஸே படிவித்³தே⁴ ஸேஸஉத³கஸ்ஸ படிவேதோ⁴ விய ஏகத⁴ம்மே அனிச்சாதி³தோ படிவித்³தே⁴ ஸப்³பே³பி படிவித்³தா⁴ ஹொந்தீதி லத்³தி⁴யா படிஞ்ஞா பரவாதி³ஸ்ஸ.
Rūpakkhandhe aniccato diṭṭheti pucchā sakavādissa, samuddato ekabindussa rase paṭividdhe sesaudakassa paṭivedho viya ekadhamme aniccādito paṭividdhe sabbepi paṭividdhā hontīti laddhiyā paṭiññā paravādissa.
சதூஹி ஞாணேஹீதி து³க்கே² ஞாணாதீ³ஹி. அட்ட²ஹி ஞாணேஹீதி ஸாவகானங் ஸாதா⁴ரணேஹி ஸச்சஞாணேஹி சேவ படிஸம்பி⁴தா³ஞாணேஹி ச. த்³வாத³ஸஹி ஞாணேஹீதி த்³வாத³ஸங்க³படிச்சஸமுப்பாத³ஞாணேஹி. சதுசத்தாரீஸாய ஞாணேஹீதி ‘‘ஜராமரணே ஞாணங், ஜராமரணஸமுத³யே ஞாண’’ந்தி ஏவங் நிதா³னவக்³கே³ வுத்தஞாணேஹி. ஸத்தஸத்ததியா ஞாணேஹீதி ‘‘ஜராமரணங், பி⁴க்க²வே, அனிச்சங் ஸங்க²தங் படிச்சஸமுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்ம’’ந்தி (ஸங்॰ நி॰ 2.20) ஏவங் தத்தே²வ வுத்தஞாணேஹி. ஸேஸமெத்த² பாளினயேனேவ வேதி³தப்³ப³ங் ஸத்³தி⁴ங் ஸுத்தஸாத⁴னேனாதி.
Catūhi ñāṇehīti dukkhe ñāṇādīhi. Aṭṭhahi ñāṇehīti sāvakānaṃ sādhāraṇehi saccañāṇehi ceva paṭisambhidāñāṇehi ca. Dvādasahi ñāṇehīti dvādasaṅgapaṭiccasamuppādañāṇehi. Catucattārīsāya ñāṇehīti ‘‘jarāmaraṇe ñāṇaṃ, jarāmaraṇasamudaye ñāṇa’’nti evaṃ nidānavagge vuttañāṇehi. Sattasattatiyā ñāṇehīti ‘‘jarāmaraṇaṃ, bhikkhave, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhamma’’nti (saṃ. ni. 2.20) evaṃ tattheva vuttañāṇehi. Sesamettha pāḷinayeneva veditabbaṃ saddhiṃ suttasādhanenāti.
அனுபுப்³பா³பி⁴ஸமயகதா²வண்ணனா.
Anupubbābhisamayakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (18) 9. அனுபுப்³பா³பி⁴ஸமயகதா² • (18) 9. Anupubbābhisamayakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. அனுபுப்³பா³பி⁴ஸமயகதா²வண்ணனா • 9. Anupubbābhisamayakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 9. அனுபுப்³பா³பி⁴ஸமயகதா²வண்ணனா • 9. Anupubbābhisamayakathāvaṇṇanā
