| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೯. ಅನುಪುಬ್ಬಾಭಿಸಮಯಕಥಾವಣ್ಣನಾ
9. Anupubbābhisamayakathāvaṇṇanā
೩೩೯. ಇದಾನಿ ಅನುಪುಬ್ಬಾಭಿಸಮಯಕಥಾ ನಾಮ ಹೋತಿ। ತತ್ಥ ಯೇಸಂ –
339. Idāni anupubbābhisamayakathā nāma hoti. Tattha yesaṃ –
‘‘ಅನುಪುಬ್ಬೇನ ಮೇಧಾವೀ, ಥೋಕಂ ಥೋಕಂ ಖಣೇ ಖಣೇ।
‘‘Anupubbena medhāvī, thokaṃ thokaṃ khaṇe khaṇe;
ಕಮ್ಮಾರೋ ರಜತಸ್ಸೇವ, ನಿದ್ಧಮೇ ಮಲಮತ್ತನೋ’’ತಿ॥ (ಧ॰ ಪ॰ ೨೩೯) –
Kammāro rajatasseva, niddhame malamattano’’ti. (dha. pa. 239) –
ಆದೀನಿ ಸುತ್ತಾನಿ ಅಯೋನಿಸೋ ಗಹೇತ್ವಾ ‘‘ಸೋತಾಪತ್ತಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಏಕಚ್ಚೇ ಕಿಲೇಸೇ ದುಕ್ಖದಸ್ಸನೇನ ಪಜಹತಿ, ಏಕಚ್ಚೇ ಸಮುದಯನಿರೋಧಮಗ್ಗದಸ್ಸನೇನ, ತಥಾ ಸೇಸಾಪೀತಿ ಏವಂ ಸೋಳಸಹಿ ಕೋಟ್ಠಾಸೇಹಿ ಅನುಪುಬ್ಬೇನ ಕಿಲೇಸಪ್ಪಹಾನಂ ಕತ್ವಾ ಅರಹತ್ತಪಟಿಲಾಭೋ ಹೋತೀ’’ತಿ ಏವರೂಪಾ ನಾನಾಭಿಸಮಯಲದ್ಧಿ ಉಪ್ಪನ್ನಾ, ಸೇಯ್ಯಥಾಪಿ ಏತರಹಿ ಅನ್ಧಕಸಬ್ಬತ್ಥಿಕಸಮ್ಮಿತಿಯಭದ್ರಯಾನಿಕಾನಂ; ತೇಸಂ ಲದ್ಧಿವಿವೇಚನತ್ಥಂ ಅನುಪುಬ್ಬಾಭಿಸಮಯೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅನುಪುಬ್ಬೇನ ಸೋತಾಪತ್ತಿಮಗ್ಗನ್ತಿ ಪುಟ್ಠೋ ಪನ ಏಕಸ್ಸ ಮಗ್ಗಸ್ಸ ಬಹುಭಾವಾಪತ್ತಿಭಯೇನ ಪಟಿಕ್ಖಿಪತಿ। ದುತಿಯಂ ಪುಟ್ಠೋ ದುಕ್ಖದಸ್ಸನಾದಿವಸೇನ ಪಟಿಜಾನಾತಿ। ತಾನಿ ವಾ ಚತ್ತಾರಿಪಿ ಞಾಣಾನಿ ಏಕೋ ಸೋತಾಪತ್ತಿಮಗ್ಗೋಯೇವಾತಿ ಪಟಿಜಾನಾತಿ, ಫಲಂ ಪನ ಏಕಮೇವ ಇಚ್ಛತಿ, ತಸ್ಮಾ ಪಟಿಕ್ಖಿಪತಿ। ಸಕದಾಗಾಮಿಮಗ್ಗಾದೀಸುಪಿ ಏಸೇವ ನಯೋ।
Ādīni suttāni ayoniso gahetvā ‘‘sotāpattiphalasacchikiriyāya paṭipanno ekacce kilese dukkhadassanena pajahati, ekacce samudayanirodhamaggadassanena, tathā sesāpīti evaṃ soḷasahi koṭṭhāsehi anupubbena kilesappahānaṃ katvā arahattapaṭilābho hotī’’ti evarūpā nānābhisamayaladdhi uppannā, seyyathāpi etarahi andhakasabbatthikasammitiyabhadrayānikānaṃ; tesaṃ laddhivivecanatthaṃ anupubbābhisamayoti pucchā sakavādissa, paṭiññā itarassa. Anupubbena sotāpattimagganti puṭṭho pana ekassa maggassa bahubhāvāpattibhayena paṭikkhipati. Dutiyaṃ puṭṭho dukkhadassanādivasena paṭijānāti. Tāni vā cattāripi ñāṇāni eko sotāpattimaggoyevāti paṭijānāti, phalaṃ pana ekameva icchati, tasmā paṭikkhipati. Sakadāgāmimaggādīsupi eseva nayo.
೩೪೪. ಮಗ್ಗೇ ದಿಟ್ಠೇ ಫಲೇ ಠಿತೋತಿ ಪಞ್ಹೇ ಯಸ್ಮಾ ದುಕ್ಖದಸ್ಸನಾದೀಹಿ ದಸ್ಸನಂ ಅಪರಿನಿಟ್ಠಿತಂ, ಮಗ್ಗದಸ್ಸನೇನ ಪರಿನಿಟ್ಠಿತಂ ನಾಮ ಹೋತಿ, ತದಾ ಸೋ ಫಲೇ ಠಿತೋತಿ ಸಙ್ಖಂ ಗಚ್ಛತಿ, ತಸ್ಮಾ ಪಟಿಜಾನಾತಿ।
344. Magge diṭṭhe phale ṭhitoti pañhe yasmā dukkhadassanādīhi dassanaṃ apariniṭṭhitaṃ, maggadassanena pariniṭṭhitaṃ nāma hoti, tadā so phale ṭhitoti saṅkhaṃ gacchati, tasmā paṭijānāti.
೩೪೫. ದುಕ್ಖೇ ದಿಟ್ಠೇ ಚತ್ತಾರಿ ಸಚ್ಚಾನೀತಿ ಪುಚ್ಛಾ ಪರವಾದಿಸ್ಸ, ಏಕಾಭಿಸಮಯವಸೇನ ಪಟಿಞ್ಞಾ ಸಕವಾದಿಸ್ಸ। ಪುನ ದುಕ್ಖಸಚ್ಚಂ ಚತ್ತಾರಿ ಸಚ್ಚಾನೀತಿ ಅನುಯೋಗೇ ಚತುನ್ನಮ್ಪಿ ನಾನಾಸಭಾವತ್ತಾ ಪಟಿಕ್ಖೇಪೋ ತಸ್ಸೇವ।
345. Dukkhediṭṭhe cattāri saccānīti pucchā paravādissa, ekābhisamayavasena paṭiññā sakavādissa. Puna dukkhasaccaṃ cattāri saccānīti anuyoge catunnampi nānāsabhāvattā paṭikkhepo tasseva.
ರೂಪಕ್ಖನ್ಧೇ ಅನಿಚ್ಚತೋ ದಿಟ್ಠೇತಿ ಪುಚ್ಛಾ ಸಕವಾದಿಸ್ಸ, ಸಮುದ್ದತೋ ಏಕಬಿನ್ದುಸ್ಸ ರಸೇ ಪಟಿವಿದ್ಧೇ ಸೇಸಉದಕಸ್ಸ ಪಟಿವೇಧೋ ವಿಯ ಏಕಧಮ್ಮೇ ಅನಿಚ್ಚಾದಿತೋ ಪಟಿವಿದ್ಧೇ ಸಬ್ಬೇಪಿ ಪಟಿವಿದ್ಧಾ ಹೋನ್ತೀತಿ ಲದ್ಧಿಯಾ ಪಟಿಞ್ಞಾ ಪರವಾದಿಸ್ಸ।
Rūpakkhandhe aniccato diṭṭheti pucchā sakavādissa, samuddato ekabindussa rase paṭividdhe sesaudakassa paṭivedho viya ekadhamme aniccādito paṭividdhe sabbepi paṭividdhā hontīti laddhiyā paṭiññā paravādissa.
ಚತೂಹಿ ಞಾಣೇಹೀತಿ ದುಕ್ಖೇ ಞಾಣಾದೀಹಿ। ಅಟ್ಠಹಿ ಞಾಣೇಹೀತಿ ಸಾವಕಾನಂ ಸಾಧಾರಣೇಹಿ ಸಚ್ಚಞಾಣೇಹಿ ಚೇವ ಪಟಿಸಮ್ಭಿದಾಞಾಣೇಹಿ ಚ। ದ್ವಾದಸಹಿ ಞಾಣೇಹೀತಿ ದ್ವಾದಸಙ್ಗಪಟಿಚ್ಚಸಮುಪ್ಪಾದಞಾಣೇಹಿ। ಚತುಚತ್ತಾರೀಸಾಯ ಞಾಣೇಹೀತಿ ‘‘ಜರಾಮರಣೇ ಞಾಣಂ, ಜರಾಮರಣಸಮುದಯೇ ಞಾಣ’’ನ್ತಿ ಏವಂ ನಿದಾನವಗ್ಗೇ ವುತ್ತಞಾಣೇಹಿ। ಸತ್ತಸತ್ತತಿಯಾ ಞಾಣೇಹೀತಿ ‘‘ಜರಾಮರಣಂ, ಭಿಕ್ಖವೇ, ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮ’’ನ್ತಿ (ಸಂ॰ ನಿ॰ ೨.೨೦) ಏವಂ ತತ್ಥೇವ ವುತ್ತಞಾಣೇಹಿ। ಸೇಸಮೇತ್ಥ ಪಾಳಿನಯೇನೇವ ವೇದಿತಬ್ಬಂ ಸದ್ಧಿಂ ಸುತ್ತಸಾಧನೇನಾತಿ।
Catūhi ñāṇehīti dukkhe ñāṇādīhi. Aṭṭhahi ñāṇehīti sāvakānaṃ sādhāraṇehi saccañāṇehi ceva paṭisambhidāñāṇehi ca. Dvādasahi ñāṇehīti dvādasaṅgapaṭiccasamuppādañāṇehi. Catucattārīsāya ñāṇehīti ‘‘jarāmaraṇe ñāṇaṃ, jarāmaraṇasamudaye ñāṇa’’nti evaṃ nidānavagge vuttañāṇehi. Sattasattatiyā ñāṇehīti ‘‘jarāmaraṇaṃ, bhikkhave, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhamma’’nti (saṃ. ni. 2.20) evaṃ tattheva vuttañāṇehi. Sesamettha pāḷinayeneva veditabbaṃ saddhiṃ suttasādhanenāti.
ಅನುಪುಬ್ಬಾಭಿಸಮಯಕಥಾವಣ್ಣನಾ।
Anupubbābhisamayakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೮) ೯. ಅನುಪುಬ್ಬಾಭಿಸಮಯಕಥಾ • (18) 9. Anupubbābhisamayakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೯. ಅನುಪುಬ್ಬಾಭಿಸಮಯಕಥಾವಣ್ಣನಾ • 9. Anupubbābhisamayakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೯. ಅನುಪುಬ್ಬಾಭಿಸಮಯಕಥಾವಣ್ಣನಾ • 9. Anupubbābhisamayakathāvaṇṇanā
