| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. அனுராத⁴ஸுத்தங்
4. Anurādhasuttaṃ
86. ஏவங் மே ஸுதங் – ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். தேன கோ² பன ஸமயேன ஆயஸ்மா அனுராதோ⁴ ப⁴க³வதோ அவிதூ³ரே அரஞ்ஞகுடிகாயங் விஹரதி. அத² கோ² ஸம்ப³ஹுலா அஞ்ஞதித்தி²யா பரிப்³பா³ஜகா யேன ஆயஸ்மா அனுராதோ⁴ தேனுபஸங்கமிங்ஸு; உபஸங்கமித்வா ஆயஸ்மதா அனுராதே⁴ன ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே அஞ்ஞதித்தி²யா பரிப்³பா³ஜகா ஆயஸ்மந்தங் அனுராத⁴ங் ஏதத³வோசுங் – ‘‘யோ ஸோ, ஆவுஸோ அனுராத⁴, ததா²க³தோ உத்தமபுரிஸோ பரமபுரிஸோ பரமபத்திபத்தோ, தங் ததா²க³தோ இமேஸு சதூஸு டா²னேஸு பஞ்ஞாபயமானோ பஞ்ஞாபேதி – ‘ஹோதி ததா²க³தோ பரங் மரணா’தி வா, ‘ந ஹோதி ததா²க³தோ பரங் மரணா’தி வா, ‘ஹோதி ச ந ச ஹோதி ததா²க³தோ பரங் மரணா’தி வா, ‘நேவ ஹோதி ந ந ஹோதி ததா²க³தோ பரங் மரணா’தி வா’’தி?
86. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Tena kho pana samayena āyasmā anurādho bhagavato avidūre araññakuṭikāyaṃ viharati. Atha kho sambahulā aññatitthiyā paribbājakā yena āyasmā anurādho tenupasaṅkamiṃsu; upasaṅkamitvā āyasmatā anurādhena saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Ekamantaṃ nisinnā kho te aññatitthiyā paribbājakā āyasmantaṃ anurādhaṃ etadavocuṃ – ‘‘yo so, āvuso anurādha, tathāgato uttamapuriso paramapuriso paramapattipatto, taṃ tathāgato imesu catūsu ṭhānesu paññāpayamāno paññāpeti – ‘hoti tathāgato paraṃ maraṇā’ti vā, ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā’’ti?
ஏவங் வுத்தே, ஆயஸ்மா அனுராதோ⁴ தே அஞ்ஞதித்தி²யே பரிப்³பா³ஜகே ஏதத³வோச – ‘‘யோ ஸோ ஆவுஸோ ததா²க³தோ உத்தமபுரிஸோ பரமபுரிஸோ பரமபத்திபத்தோ தங் ததா²க³தோ அஞ்ஞத்ர இமேஹி சதூஹி டா²னேஹி பஞ்ஞாபயமானோ பஞ்ஞாபேதி – ‘ஹோதி ததா²க³தோ பரங் மரணா’தி வா, ‘ந ஹோதி ததா²க³தோ பரங் மரணா’தி வா, ‘ஹோதி ச ந ச ஹோதி ததா²க³தோ பரங் மரணா’தி வா, ‘நேவ ஹோதி ந ந ஹோதி ததா²க³தோ பரங் மரணா’தி வா’’தி. ஏவங் வுத்தே, அஞ்ஞதித்தி²யா பரிப்³பா³ஜகா ஆயஸ்மந்தங் அனுராத⁴ங் ஏதத³வோசுங் – ‘‘ஸோ சாயங் பி⁴க்கு² நவோ ப⁴விஸ்ஸதி அசிரபப்³ப³ஜிதோ, தே²ரோ வா பன பா³லோ அப்³யத்தோ’’தி. அத² கோ² அஞ்ஞதித்தி²யா பரிப்³பா³ஜகா ஆயஸ்மந்தங் அனுராத⁴ங் நவவாதே³ன ச பா³லவாதே³ன ச அபஸாதெ³த்வா உட்டா²யாஸனா பக்கமிங்ஸு.
Evaṃ vutte, āyasmā anurādho te aññatitthiye paribbājake etadavoca – ‘‘yo so āvuso tathāgato uttamapuriso paramapuriso paramapattipatto taṃ tathāgato aññatra imehi catūhi ṭhānehi paññāpayamāno paññāpeti – ‘hoti tathāgato paraṃ maraṇā’ti vā, ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā’’ti. Evaṃ vutte, aññatitthiyā paribbājakā āyasmantaṃ anurādhaṃ etadavocuṃ – ‘‘so cāyaṃ bhikkhu navo bhavissati acirapabbajito, thero vā pana bālo abyatto’’ti. Atha kho aññatitthiyā paribbājakā āyasmantaṃ anurādhaṃ navavādena ca bālavādena ca apasādetvā uṭṭhāyāsanā pakkamiṃsu.
அத² கோ² ஆயஸ்மதோ அனுராத⁴ஸ்ஸ அசிரபக்கந்தேஸு தேஸு அஞ்ஞதித்தி²யேஸு பரிப்³பா³ஜகேஸு ஏதத³ஹோஸி – ‘‘ஸசே கோ² மங் தே அஞ்ஞதித்தி²யா பரிப்³பா³ஜகா உத்தரிங் பஞ்ஹங் புச்செ²ய்யுங். கத²ங் ப்³யாகரமானோ நு க்²வாஹங் தேஸங் அஞ்ஞதித்தி²யானங் பரிப்³பா³ஜகானங் வுத்தவாதீ³ சேவ ப⁴க³வதோ அஸ்ஸங், ந ச ப⁴க³வந்தங் அபூ⁴தேன அப்³பா⁴சிக்கெ²ய்யங், த⁴ம்மஸ்ஸ சானுத⁴ம்மங் ப்³யாகரெய்யங், ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்செ²ய்யா’’தி?
Atha kho āyasmato anurādhassa acirapakkantesu tesu aññatitthiyesu paribbājakesu etadahosi – ‘‘sace kho maṃ te aññatitthiyā paribbājakā uttariṃ pañhaṃ puccheyyuṃ. Kathaṃ byākaramāno nu khvāhaṃ tesaṃ aññatitthiyānaṃ paribbājakānaṃ vuttavādī ceva bhagavato assaṃ, na ca bhagavantaṃ abhūtena abbhācikkheyyaṃ, dhammassa cānudhammaṃ byākareyyaṃ, na ca koci sahadhammiko vādānuvādo gārayhaṃ ṭhānaṃ āgaccheyyā’’ti?
அத² கோ² ஆயஸ்மா அனுராதோ⁴ யேன ப⁴க³வா தேனுபஸங்கமி; உபஸங்கமித்வா…பே॰… ஏகமந்தங் நிஸின்னோ கோ² ஆயஸ்மா அனுராதோ⁴ ப⁴க³வந்தங் ஏதத³வோச – ‘‘இதா⁴ஹங், ப⁴ந்தே, ப⁴க³வதோ அவிதூ³ரே அரஞ்ஞகுடிகாயங் விஹராமி. அத² கோ², ப⁴ந்தே, ஸம்ப³ஹுலா அஞ்ஞதித்தி²யா பரிப்³பா³ஜகா யேனாஹங் தேனுபஸங்கமிங்ஸு …பே॰… மங் ஏதத³வோசுங் – ‘யோ ஸோ, ஆவுஸோ அனுராத⁴, ததா²க³தோ உத்தமபுரிஸோ பரமபுரிஸோ பரமபத்திபத்தோ தங் ததா²க³தோ இமேஸு சதூஸு டா²னேஸு பஞ்ஞாபயமானோ பஞ்ஞாபேதி – ஹோதி ததா²க³தோ பரங் மரணாதி வா, ந ஹோதி… ஹோதி ச ந ச ஹோதி, நேவ ஹோதி ந ந ஹோதி ததா²க³தோ பரங் மரணாதி வா’’’தி?
Atha kho āyasmā anurādho yena bhagavā tenupasaṅkami; upasaṅkamitvā…pe… ekamantaṃ nisinno kho āyasmā anurādho bhagavantaṃ etadavoca – ‘‘idhāhaṃ, bhante, bhagavato avidūre araññakuṭikāyaṃ viharāmi. Atha kho, bhante, sambahulā aññatitthiyā paribbājakā yenāhaṃ tenupasaṅkamiṃsu …pe… maṃ etadavocuṃ – ‘yo so, āvuso anurādha, tathāgato uttamapuriso paramapuriso paramapattipatto taṃ tathāgato imesu catūsu ṭhānesu paññāpayamāno paññāpeti – hoti tathāgato paraṃ maraṇāti vā, na hoti… hoti ca na ca hoti, neva hoti na na hoti tathāgato paraṃ maraṇāti vā’’’ti?
ஏவங் வுத்தாஹங், ப⁴ந்தே, தே அஞ்ஞதித்தி²யே பரிப்³பா³ஜகே ஏதத³வோசங் – ‘‘யோ ஸோ, ஆவுஸோ, ததா²க³தோ உத்தமபுரிஸோ பரமபுரிஸோ பரமபத்திபத்தோ, தங் ததா²க³தோ அஞ்ஞத்ர இமேஹி சதூஹி டா²னேஹி பஞ்ஞாபயமானோ பஞ்ஞாபேதி – ‘ஹோதி ததா²க³தோ பரங் மரணா’தி வா…பே॰… ‘நேவ ஹோதி ந ந ஹோதி ததா²க³தோ பரங் மரணா’தி வாதி. ஏவங் வுத்தே, ப⁴ந்தே, தே அஞ்ஞதித்தி²யா பரிப்³பா³ஜகா மங் ஏதத³வோசுங் – ‘ஸோ சாயங் பி⁴க்கு² ந வோ ப⁴விஸ்ஸதி அசிரபப்³ப³ஜிதோ தே²ரோ வா பன பா³லோ அப்³யத்தோ’தி. அத² கோ² மங், ப⁴ந்தே, தே அஞ்ஞதித்தி²யா பரிப்³பா³ஜகா நவவாதே³ன பா³லவாதே³ன ச அபஸாதெ³த்வா உட்டா²யாஸனா பக்கமிங்ஸு’’.
Evaṃ vuttāhaṃ, bhante, te aññatitthiye paribbājake etadavocaṃ – ‘‘yo so, āvuso, tathāgato uttamapuriso paramapuriso paramapattipatto, taṃ tathāgato aññatra imehi catūhi ṭhānehi paññāpayamāno paññāpeti – ‘hoti tathāgato paraṃ maraṇā’ti vā…pe… ‘neva hoti na na hoti tathāgato paraṃ maraṇā’ti vāti. Evaṃ vutte, bhante, te aññatitthiyā paribbājakā maṃ etadavocuṃ – ‘so cāyaṃ bhikkhu na vo bhavissati acirapabbajito thero vā pana bālo abyatto’ti. Atha kho maṃ, bhante, te aññatitthiyā paribbājakā navavādena bālavādena ca apasādetvā uṭṭhāyāsanā pakkamiṃsu’’.
‘‘தஸ்ஸ மய்ஹங், ப⁴ந்தே, அசிரபக்கந்தேஸு தேஸு அஞ்ஞதித்தி²யேஸு பரிப்³பா³ஜகேஸு ஏதத³ஹோஸி – ‘ஸசே கோ² மங் தே அஞ்ஞதித்தி²யா பரிப்³பா³ஜகா உத்தரிங் பஞ்ஹங் புச்செ²ய்யுங். கத²ங் ப்³யாகரமானோ நு க்²வாஹங் தேஸங் அஞ்ஞதித்தி²யானங் பரிப்³பா³ஜகானங் வுத்தவாதீ³ சேவ ப⁴க³வதோ அஸ்ஸங், ந ச ப⁴க³வந்தங் அபூ⁴தேன அப்³பா⁴சிக்கெ²ய்யங், த⁴ம்மஸ்ஸ சானுத⁴ம்மங் ப்³யாகரெய்யங், ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்செ²ய்யா’’’தி?
‘‘Tassa mayhaṃ, bhante, acirapakkantesu tesu aññatitthiyesu paribbājakesu etadahosi – ‘sace kho maṃ te aññatitthiyā paribbājakā uttariṃ pañhaṃ puccheyyuṃ. Kathaṃ byākaramāno nu khvāhaṃ tesaṃ aññatitthiyānaṃ paribbājakānaṃ vuttavādī ceva bhagavato assaṃ, na ca bhagavantaṃ abhūtena abbhācikkheyyaṃ, dhammassa cānudhammaṃ byākareyyaṃ, na ca koci sahadhammiko vādānuvādo gārayhaṃ ṭhānaṃ āgaccheyyā’’’ti?
‘‘தங் கிங் மஞ்ஞஸி, அனுராத⁴, ரூபங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங் கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங் , ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணங் நிச்சங் வா அனிச்சங் வா’’தி? ‘‘அனிச்சங் ப⁴ந்தே’’…பே॰… தஸ்மாதிஹ…பே॰… ஏவங் பஸ்ஸங்…பே॰… நாபரங் இத்த²த்தாயாதி பஜானாதி’’.
‘‘Taṃ kiṃ maññasi, anurādha, rūpaṃ niccaṃ vā aniccaṃ vā’’ti? ‘‘Aniccaṃ, bhante’’. ‘‘Yaṃ panāniccaṃ dukkhaṃ vā taṃ sukhaṃ vā’’ti? ‘‘Dukkhaṃ, bhante’’. ‘‘Yaṃ panāniccaṃ dukkhaṃ vipariṇāmadhammaṃ kallaṃ nu taṃ samanupassituṃ – ‘etaṃ mama, esohamasmi, eso me attā’’’ti? ‘‘No hetaṃ , bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ bhante’’…pe… tasmātiha…pe… evaṃ passaṃ…pe… nāparaṃ itthattāyāti pajānāti’’.
‘‘தங் கிங் மஞ்ஞஸி, அனுராத⁴, ரூபங் ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’. ‘‘வேத³னங்… ஸஞ்ஞங்… ஸங்கா²ரே… விஞ்ஞாணங் ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññasi, anurādha, rūpaṃ tathāgatoti samanupassasī’’ti? ‘‘No hetaṃ, bhante’’. ‘‘Vedanaṃ… saññaṃ… saṅkhāre… viññāṇaṃ tathāgatoti samanupassasī’’ti? ‘‘No hetaṃ, bhante’’.
‘‘தங் கிங் மஞ்ஞஸி, அனுராத⁴, ரூபஸ்மிங் ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’. ‘‘அஞ்ஞத்ர ரூபா ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’. ‘‘வேத³னாய…பே॰… அஞ்ஞத்ர வேத³னாய…பே॰… ஸஞ்ஞாய… அஞ்ஞத்ர ஸஞ்ஞாய… ஸங்கா²ரேஸு… அஞ்ஞத்ர ஸங்கா²ரேஹி… விஞ்ஞாணஸ்மிங்… அஞ்ஞத்ர விஞ்ஞாணா ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññasi, anurādha, rūpasmiṃ tathāgatoti samanupassasī’’ti? ‘‘No hetaṃ, bhante’’. ‘‘Aññatra rūpā tathāgatoti samanupassasī’’ti? ‘‘No hetaṃ, bhante’’. ‘‘Vedanāya…pe… aññatra vedanāya…pe… saññāya… aññatra saññāya… saṅkhāresu… aññatra saṅkhārehi… viññāṇasmiṃ… aññatra viññāṇā tathāgatoti samanupassasī’’ti? ‘‘No hetaṃ, bhante’’.
‘‘தங் கிங் மஞ்ஞஸி, அனுராத⁴, ரூபங்… வேத³னா… ஸஞ்ஞா… ஸங்கா²ரா… விஞ்ஞாணங் ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññasi, anurādha, rūpaṃ… vedanā… saññā… saṅkhārā… viññāṇaṃ tathāgatoti samanupassasī’’ti? ‘‘No hetaṃ, bhante’’.
‘‘தங் கிங் மஞ்ஞஸி, அனுராத⁴, அயங் ஸோ அரூபீ அவேத³னோ அஸஞ்ஞீ அஸங்கா²ரோ அவிஞ்ஞாணோ ததா²க³தோதி ஸமனுபஸ்ஸஸீ’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññasi, anurādha, ayaṃ so arūpī avedano asaññī asaṅkhāro aviññāṇo tathāgatoti samanupassasī’’ti? ‘‘No hetaṃ, bhante’’.
‘‘எத்த² ச தே, அனுராத⁴, தி³ட்டே²வ த⁴ம்மே ஸச்சதோ தே²ததோ ததா²க³தே அனுபலப்³பி⁴யமானே கல்லங் நு தே தங் வெய்யாகரணங் – ‘யோ ஸோ, ஆவுஸோ, ததா²க³தோ உத்தமபுரிஸோ பரமபுரிஸோ பரமபத்திபத்தோ தங் ததா²க³தோ அஞ்ஞத்ர இமேஹி சதூஹி டா²னேஹி பஞ்ஞாபயமானோ பஞ்ஞாபேதி – ஹோதி ததா²க³தோ பரங் மரணாதி வா… நேவ ஹோதி ந ந ஹோதி ததா²க³தோ பரங் மரணாதி வா’’’தி? ‘‘நோ ஹேதங், ப⁴ந்தே’’.
‘‘Ettha ca te, anurādha, diṭṭheva dhamme saccato thetato tathāgate anupalabbhiyamāne kallaṃ nu te taṃ veyyākaraṇaṃ – ‘yo so, āvuso, tathāgato uttamapuriso paramapuriso paramapattipatto taṃ tathāgato aññatra imehi catūhi ṭhānehi paññāpayamāno paññāpeti – hoti tathāgato paraṃ maraṇāti vā… neva hoti na na hoti tathāgato paraṃ maraṇāti vā’’’ti? ‘‘No hetaṃ, bhante’’.
‘‘ஸாது⁴ ஸாது⁴, அனுராத⁴! புப்³பே³ சாஹங், அனுராத⁴, ஏதரஹி ச து³க்க²ஞ்சேவ பஞ்ஞபேமி, து³க்க²ஸ்ஸ ச நிரோத⁴’’ந்தி. சதுத்த²ங்.
‘‘Sādhu sādhu, anurādha! Pubbe cāhaṃ, anurādha, etarahi ca dukkhañceva paññapemi, dukkhassa ca nirodha’’nti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அனுராத⁴ஸுத்தவண்ணனா • 4. Anurādhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. அனுராத⁴ஸுத்தவண்ணனா • 4. Anurādhasuttavaṇṇanā
