| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. அனுருத்³த⁴மஹாவிதக்கஸுத்தவண்ணனா
10. Anuruddhamahāvitakkasuttavaṇṇanā
30. த³ஸமே சேதீஸூதி சேதினாமகானங் ராஜூனங் நிவாஸட்டா²னத்தா ஏவங்லத்³த⁴வோஹாரே ரட்டே². பாசீனவங்ஸதா³யேதி த³ஸப³லஸ்ஸ வஸனட்டா²னதோ பாசீனதி³ஸாய டி²தே வங்ஸதா³யே நீலோபா⁴ஸேஹி வேளூஹி ஸஞ்ச²ன்னே அரஞ்ஞே. ஏவங் சேதஸோ பரிவிதக்கோ உத³பாதீ³தி தே²ரோ கிர பப்³ப³ஜித்வா பட²மஅந்தோவஸ்ஸம்ஹியேவ ஸமாபத்திலாபீ⁴ ஹுத்வா ஸஹஸ்ஸலோகதா⁴துத³ஸ்ஸனஸமத்த²ங் தி³ப்³ப³சக்கு²ஞாணங் உப்பாதே³ஸி. ஸோ ஸாரிபுத்தத்தே²ரஸ்ஸ ஸந்திகங் க³ந்த்வா ஏவமாஹ – ‘‘இதா⁴ஹங், ஆவுஸோ ஸாரிபுத்த, தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸஹஸ்ஸலோகங் ஓலோகேமி. ஆரத்³த⁴ங் கோ² பன மே வீரியங் அஸல்லீனங், உபட்டி²தா ஸதி அஸம்முட்டா², பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³ங். அத² ச பன மே அனுபாதா³ய ஆஸவேஹி சித்தங் ந விமுச்சதீ’’தி. அத² நங் தே²ரோ ஆஹ – ‘‘யங் கோ² தே, ஆவுஸோ அனுருத்³த⁴, ஏவங் ஹோதி ‘அஹங் தி³ப்³பே³ன சக்கு²னா…பே॰… ஓலோகேமீ’தி, இத³ங் தே மானஸ்மிங். யம்பி தே, ஆவுஸோ, அனுருத்³த⁴ ஏவங் ஹோதி ‘ஆரத்³த⁴ங் கோ² பன மே வீரியங்…பே॰… ஏகக்³க³’ந்தி, இத³ங் தே உத்³த⁴ச்சஸ்மிங். யம்பி தே, ஆவுஸோ அனுருத்³த⁴, ஏவங் ஹோதி ‘அத² ச பன மே அனுபாதா³ய ஆஸவேஹி சித்தங் ந விமுச்சதீ’தி, இத³ங் தே குக்குச்சஸ்மிங். ஸாது⁴ வதாயஸ்மா அனுருத்³தோ⁴ இமே தயோ த⁴ம்மே பஹாய இமே தயோ த⁴ம்மே அமனஸிகரித்வா அமதாய தா⁴துயா சித்தங் உபஸங்ஹரதூ’’தி ஏவமஸ்ஸ தே²ரோ கம்மட்டா²னங் கதே²ஸி. ஸோ கம்மட்டா²னங் க³ஹெத்வா ஸத்தா²ரங் ஆபுச்சி²த்வா சேதிரட்ட²ங் க³ந்த்வா ஸமணத⁴ம்மங் கரொந்தோ அட்ட²மாஸங் சங்கமேன வீதினாமேஸி. ஸோ பதா⁴னவேக³னிம்மதி²தத்தா கிலந்தகாயோ ஏகஸ்ஸ வேளுகு³ம்ப³ஸ்ஸ ஹெட்டா² நிஸீதி³. அத²ஸ்ஸாயங் ஏவங் சேதஸோ பரிவிதக்கோ உத³பாதி³, ஏஸ மஹாபுரிஸவிதக்கோ உப்பஜ்ஜீதி அத்தோ².
30. Dasame cetīsūti cetināmakānaṃ rājūnaṃ nivāsaṭṭhānattā evaṃladdhavohāre raṭṭhe. Pācīnavaṃsadāyeti dasabalassa vasanaṭṭhānato pācīnadisāya ṭhite vaṃsadāye nīlobhāsehi veḷūhi sañchanne araññe. Evaṃ cetaso parivitakko udapādīti thero kira pabbajitvā paṭhamaantovassamhiyeva samāpattilābhī hutvā sahassalokadhātudassanasamatthaṃ dibbacakkhuñāṇaṃ uppādesi. So sāriputtattherassa santikaṃ gantvā evamāha – ‘‘idhāhaṃ, āvuso sāriputta, dibbena cakkhunā visuddhena atikkantamānusakena sahassalokaṃ olokemi. Āraddhaṃ kho pana me vīriyaṃ asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekaggaṃ. Atha ca pana me anupādāya āsavehi cittaṃ na vimuccatī’’ti. Atha naṃ thero āha – ‘‘yaṃ kho te, āvuso anuruddha, evaṃ hoti ‘ahaṃ dibbena cakkhunā…pe… olokemī’ti, idaṃ te mānasmiṃ. Yampi te, āvuso, anuruddha evaṃ hoti ‘āraddhaṃ kho pana me vīriyaṃ…pe… ekagga’nti, idaṃ te uddhaccasmiṃ. Yampi te, āvuso anuruddha, evaṃ hoti ‘atha ca pana me anupādāya āsavehi cittaṃ na vimuccatī’ti, idaṃ te kukkuccasmiṃ. Sādhu vatāyasmā anuruddho ime tayo dhamme pahāya ime tayo dhamme amanasikaritvā amatāya dhātuyā cittaṃ upasaṃharatū’’ti evamassa thero kammaṭṭhānaṃ kathesi. So kammaṭṭhānaṃ gahetvā satthāraṃ āpucchitvā cetiraṭṭhaṃ gantvā samaṇadhammaṃ karonto aṭṭhamāsaṃ caṅkamena vītināmesi. So padhānaveganimmathitattā kilantakāyo ekassa veḷugumbassa heṭṭhā nisīdi. Athassāyaṃ evaṃ cetaso parivitakko udapādi, esa mahāpurisavitakko uppajjīti attho.
அப்பிச்ச²ஸ்ஸாதி எத்த² பச்சயப்பிச்சோ², அதி⁴க³மப்பிச்சோ², பரியத்திஅப்பிச்சோ², து⁴தங்க³ப்பிச்சோ²தி சத்தாரோ அப்பிச்சா². தத்த² பச்சயப்பிச்சோ² ப³ஹுங் தெ³ந்தே அப்பங் க³ண்ஹாதி, அப்பங் தெ³ந்தே அப்பதரங் க³ண்ஹாதி, ந அனவஸேஸக்³கா³ஹீ ஹோதி. அதி⁴க³மப்பிச்சோ² மஜ்ஜ²ந்திகத்தே²ரோ விய அத்தனோ அதி⁴க³மங் அஞ்ஞேஸங் ஜானிதுங் ந தே³தி. பரியத்திஅப்பிச்சோ² தேபிடகோபி ஸமானோ ந ப³ஹுஸ்ஸுதபா⁴வங் ஜானாபேதுகாமோ ஹோதி ஸாகேததிஸ்ஸத்தே²ரோ விய. து⁴தங்க³ப்பிச்சோ² து⁴தங்க³பரிஹரணபா⁴வங் அஞ்ஞேஸங் ஜானிதுங் ந தே³தி த்³வேபா⁴திகத்தே²ரேஸு ஜெட்ட²த்தே²ரோ விய. வத்து² விஸுத்³தி⁴மக்³கே³ கதி²தங். அயங் த⁴ம்மோதி ஏவங் ஸந்தகு³ணனிகு³ஹனேன ச படிக்³க³ஹணே மத்தஞ்ஞுதாய ச அப்பிச்ச²ஸ்ஸ புக்³க³லஸ்ஸ அயங் நவலோகுத்தரத⁴ம்மோ ஸம்பஜ்ஜதி, நோ மஹிச்ச²ஸ்ஸ. ஏவங் ஸப்³ப³த்த² யோஜேதப்³ப³ங்.
Appicchassāti ettha paccayappiccho, adhigamappiccho, pariyattiappiccho, dhutaṅgappicchoti cattāro appicchā. Tattha paccayappiccho bahuṃ dente appaṃ gaṇhāti, appaṃ dente appataraṃ gaṇhāti, na anavasesaggāhī hoti. Adhigamappiccho majjhantikatthero viya attano adhigamaṃ aññesaṃ jānituṃ na deti. Pariyattiappiccho tepiṭakopi samāno na bahussutabhāvaṃ jānāpetukāmo hoti sāketatissatthero viya. Dhutaṅgappiccho dhutaṅgapariharaṇabhāvaṃ aññesaṃ jānituṃ na deti dvebhātikattheresu jeṭṭhatthero viya. Vatthu visuddhimagge kathitaṃ. Ayaṃ dhammoti evaṃ santaguṇaniguhanena ca paṭiggahaṇe mattaññutāya ca appicchassa puggalassa ayaṃ navalokuttaradhammo sampajjati, no mahicchassa. Evaṃ sabbattha yojetabbaṃ.
ஸந்துட்ட²ஸ்ஸாதி சதூஸு பச்சயேஸு தீஹி ஸந்தோஸேஹி ஸந்துட்ட²ஸ்ஸ. பவிவித்தஸ்ஸாதி காயசித்தஉபதி⁴விவேகேஹி விவித்தஸ்ஸ. தத்த² காயவிவேகோ நாம க³ணஸங்க³ணிகங் வினோதெ³த்வா ஆரம்ப⁴வத்து²வஸேன ஏகீபா⁴வோ. ஏகீபா⁴வமத்தேனேவ கம்மங் ந நிப்ப²ஜ்ஜதீதி கஸிணபரிகம்மங் கத்வா அட்ட² ஸமாபத்தியோ நிப்³ப³த்தேதி, அயங் சித்தவிவேகோ நாம. ஸமாபத்திமத்தேனேவ கம்மங் ந நிப்ப²ஜ்ஜதீதி ஜா²னங் பாத³கங் கத்வா ஸங்கா²ரே ஸம்மஸித்வா ஸஹ படிஸம்பி⁴தா³ஹி அரஹத்தங் பாபுணாதி, அயங் ஸப்³பா³காரதோ உபதி⁴விவேகோ நாம. தேனாஹ ப⁴க³வா – ‘‘காயவிவேகோ ச விவேகட்ட²காயானங் நெக்க²ம்மாபி⁴ரதானங், சித்தவிவேகோ ச பரிஸுத்³த⁴சித்தானங் பரமவோதா³னப்பத்தானங், உபதி⁴விவேகோ ச நிருபதீ⁴னங் புக்³க³லானங் விஸங்கா²ரக³தான’’ந்தி (மஹானி॰ 7, 49).
Santuṭṭhassāti catūsu paccayesu tīhi santosehi santuṭṭhassa. Pavivittassāti kāyacittaupadhivivekehi vivittassa. Tattha kāyaviveko nāma gaṇasaṅgaṇikaṃ vinodetvā ārambhavatthuvasena ekībhāvo. Ekībhāvamatteneva kammaṃ na nipphajjatīti kasiṇaparikammaṃ katvā aṭṭha samāpattiyo nibbatteti, ayaṃ cittaviveko nāma. Samāpattimatteneva kammaṃ na nipphajjatīti jhānaṃ pādakaṃ katvā saṅkhāre sammasitvā saha paṭisambhidāhi arahattaṃ pāpuṇāti, ayaṃ sabbākārato upadhiviveko nāma. Tenāha bhagavā – ‘‘kāyaviveko ca vivekaṭṭhakāyānaṃ nekkhammābhiratānaṃ, cittaviveko ca parisuddhacittānaṃ paramavodānappattānaṃ, upadhiviveko ca nirupadhīnaṃ puggalānaṃ visaṅkhāragatāna’’nti (mahāni. 7, 49).
ஸங்க³ணிகாராமஸ்ஸாதி க³ணஸங்க³ணிகாய சேவ கிலேஸஸங்க³ணிகாய ச ரதஸ்ஸ. ஆரத்³த⁴வீரியஸ்ஸாதி காயிகசேதஸிகவீரியவஸேன ஆரத்³த⁴வீரியஸ்ஸ. உபட்டி²தஸ்ஸதிஸ்ஸாதி சதுஸதிபட்டா²னவஸேன உபட்டி²தஸ்ஸதிஸ்ஸ. ஸமாஹிதஸ்ஸாதி ஏகக்³க³சித்தஸ்ஸ. பஞ்ஞவதோதி கம்மஸ்ஸகதபஞ்ஞாய பஞ்ஞவதோ.
Saṅgaṇikārāmassāti gaṇasaṅgaṇikāya ceva kilesasaṅgaṇikāya ca ratassa. Āraddhavīriyassāti kāyikacetasikavīriyavasena āraddhavīriyassa. Upaṭṭhitassatissāti catusatipaṭṭhānavasena upaṭṭhitassatissa. Samāhitassāti ekaggacittassa. Paññavatoti kammassakatapaññāya paññavato.
ஸாது⁴ ஸாதூ⁴தி தே²ரஸ்ஸ விதக்கங் ஸம்பஹங்ஸெந்தோ ஏவமாஹ. இமங் அட்ட²மந்தி ஸத்த நிதீ⁴ லத்³த⁴புரிஸஸ்ஸ அட்ட²மங் தெ³ந்தோ விய, ஸத்த மணிரதனானி, ஸத்த ஹத்தி²ரதனானி, ஸத்த அஸ்ஸரதனானி லத்³த⁴புரிஸஸ்ஸ அட்ட²மங் தெ³ந்தோ விய ஸத்த மஹாபுரிஸவிதக்கே விதக்கெத்வா டி²தஸ்ஸ அட்ட²மங் ஆசிக்க²ந்தோ ஏவமாஹ. நிப்பபஞ்சாராமஸ்ஸாதி தண்ஹாமானதி³ட்டி²பபஞ்சரஹிதத்தா நிப்பபஞ்சஸங்கா²தே நிப்³பா³னபதே³ அபி⁴ரதஸ்ஸ. இதரங் தஸ்ஸேவ வேவசனங். பபஞ்சாராமஸ்ஸாதி யதா²வுத்தேஸு பபஞ்சேஸு அபி⁴ரதஸ்ஸ. இதரங் தஸ்ஸேவ வேவசனங்.
Sādhu sādhūti therassa vitakkaṃ sampahaṃsento evamāha. Imaṃ aṭṭhamanti satta nidhī laddhapurisassa aṭṭhamaṃ dento viya, satta maṇiratanāni, satta hatthiratanāni, satta assaratanāni laddhapurisassa aṭṭhamaṃ dento viya satta mahāpurisavitakke vitakketvā ṭhitassa aṭṭhamaṃ ācikkhanto evamāha. Nippapañcārāmassāti taṇhāmānadiṭṭhipapañcarahitattā nippapañcasaṅkhāte nibbānapade abhiratassa. Itaraṃ tasseva vevacanaṃ. Papañcārāmassāti yathāvuttesu papañcesu abhiratassa. Itaraṃ tasseva vevacanaṃ.
யதோதி யதா³. ததோதி ததா³. நானாரத்தானந்தி நிலபீதலோஹிதோதா³தவண்ணேஹி நானாரஜனேஹி ரத்தானங். பங்ஸுகூலந்தி தேவீஸதியா கெ²த்தேஸு டி²தபங்ஸுகூலசீவரங். கா²யிஸ்ஸதீதி யதா² தஸ்ஸ புப்³ப³ண்ஹஸமயாதீ³ஸு யஸ்மிங் ஸமயே யங் இச்ச²தி, தஸ்மிங் ஸமயே தங் பாருபந்தஸ்ஸ ஸோ து³ஸ்ஸகரண்ட³கோ மனாபோ ஹுத்வா கா²யதி, ஏவங் துய்ஹம்பி சீவரஸந்தோஸமஹாஅரியவங்ஸேன துட்ட²ஸ்ஸ விஹரதோ பங்ஸுகூலசீவரங் கா²யிஸ்ஸதி உபட்ட²ஹிஸ்ஸதி. ரதியாதி ரதிஅத்தா²ய. அபரிதஸ்ஸாயாதி தண்ஹாதி³ட்டி²பரிதஸ்ஸனாஹி அபரிதஸ்ஸனத்தா²ய. பா²ஸுவிஹாராயாதி ஸுக²விஹாரத்தா²ய. ஓக்கமனாய நிப்³பா³னஸ்ஸாதி அமதங் நிப்³பா³னங் ஓதரணத்தா²ய.
Yatoti yadā. Tatoti tadā. Nānārattānanti nilapītalohitodātavaṇṇehi nānārajanehi rattānaṃ. Paṃsukūlanti tevīsatiyā khettesu ṭhitapaṃsukūlacīvaraṃ. Khāyissatīti yathā tassa pubbaṇhasamayādīsu yasmiṃ samaye yaṃ icchati, tasmiṃ samaye taṃ pārupantassa so dussakaraṇḍako manāpo hutvā khāyati, evaṃ tuyhampi cīvarasantosamahāariyavaṃsena tuṭṭhassa viharato paṃsukūlacīvaraṃ khāyissati upaṭṭhahissati. Ratiyāti ratiatthāya. Aparitassāyāti taṇhādiṭṭhiparitassanāhi aparitassanatthāya. Phāsuvihārāyāti sukhavihāratthāya. Okkamanāya nibbānassāti amataṃ nibbānaṃ otaraṇatthāya.
பிண்டி³யாலோபபோ⁴ஜனந்தி கா³மனிக³மராஜதா⁴னீஸு ஜங்கா⁴ப³லங் நிஸ்ஸாய க⁴ரபடிபாடியா சரந்தேன லத்³த⁴பிண்டி³யாலோபபோ⁴ஜனங். கா²யிஸ்ஸதீதி தஸ்ஸ க³ஹபதினோ நானக்³க³ரஸபோ⁴ஜனங் விய உபட்ட²ஹிஸ்ஸதி . ஸந்துட்ட²ஸ்ஸ விஹரதோதி பிண்ட³பாதஸந்தோஸமஹாஅரியவங்ஸேன ஸந்துட்ட²ஸ்ஸ விஹரதோ. ருக்க²மூலஸேனாஸனங் கா²யிஸ்ஸதீதி தஸ்ஸ க³ஹபதினோ தேபூ⁴மகபாஸாதே³ க³ந்த⁴குஸுமவாஸஸுக³ந்த⁴ங் கூடாகா³ரங் விய ருக்க²மூலங் உபட்ட²ஹிஸ்ஸதி. ஸந்துட்ட²ஸ்ஸாதி ஸேனாஸனஸந்தோஸமஹாஅரியவங்ஸேன ஸந்துட்ட²ஸ்ஸ. திணஸந்தா²ரகோதி திணேஹி வா பண்ணேஹி வா பூ⁴மியங் வா ப²லகபாஸாணதலானி வா அஞ்ஞதரஸ்மிங் ஸந்த²தஸந்த²தோ. பூதிமுத்தந்தி யங்கிஞ்சி முத்தங். தங்க²ணே க³ஹிதம்பி பூதிமுத்தமேவ வுச்சதி து³க்³க³ந்த⁴த்தா. ஸந்துட்ட²ஸ்ஸ விஹரதோதி கி³லானபச்சயபே⁴ஸஜ்ஜபரிக்கா²ரஸந்தோஸேன ஸந்துட்ட²ஸ்ஸ விஹரதோ.
Piṇḍiyālopabhojananti gāmanigamarājadhānīsu jaṅghābalaṃ nissāya gharapaṭipāṭiyā carantena laddhapiṇḍiyālopabhojanaṃ. Khāyissatīti tassa gahapatino nānaggarasabhojanaṃ viya upaṭṭhahissati . Santuṭṭhassa viharatoti piṇḍapātasantosamahāariyavaṃsena santuṭṭhassa viharato. Rukkhamūlasenāsanaṃ khāyissatīti tassa gahapatino tebhūmakapāsāde gandhakusumavāsasugandhaṃ kūṭāgāraṃ viya rukkhamūlaṃ upaṭṭhahissati. Santuṭṭhassāti senāsanasantosamahāariyavaṃsena santuṭṭhassa. Tiṇasanthārakoti tiṇehi vā paṇṇehi vā bhūmiyaṃ vā phalakapāsāṇatalāni vā aññatarasmiṃ santhatasanthato. Pūtimuttanti yaṃkiñci muttaṃ. Taṅkhaṇe gahitampi pūtimuttameva vuccati duggandhattā. Santuṭṭhassa viharatoti gilānapaccayabhesajjaparikkhārasantosena santuṭṭhassa viharato.
இதி ப⁴க³வா சதூஸு டா²னேஸு அரஹத்தங் பக்கி²பந்தோ கம்மட்டா²னங் கதெ²த்வா ‘‘கதரஸேனாஸனே நு கோ² வஸந்தஸ்ஸ கம்மட்டா²னங் ஸப்பாயங் ப⁴விஸ்ஸதீ’’தி ஆவஜ்ஜெந்தோ ‘‘தஸ்மிஞ்ஞேவ வஸந்தஸ்ஸா’’தி ஞத்வா தேன ஹி த்வங், அனுருத்³தா⁴திஆதி³மாஹ. பவிவித்தஸ்ஸ விஹரதோதி தீஹி விவேகேஹி விவித்தஸ்ஸ விஹரந்தஸ்ஸ. உய்யோஜனிகபடிஸங்யுத்தந்தி உய்யோஜனிகேஹேவ வசனேஹி படிஸங்யுத்தங், தேஸங் உபட்டா²னக³மனகங்யேவாதி அத்தோ². பபஞ்சனிரோதே⁴தி நிப்³பா³னபதே³ . பக்க²ந்த³தீதி ஆரம்மணகரணவஸேன பக்க²ந்த³தி. பஸீத³தீதிஆதீ³ஸுபி ஆரம்மணவஸேனேவ பஸீத³னஸந்திட்ட²னமுச்சனா வேதி³தப்³பா³. இதி ப⁴க³வா சேதிரட்டே² பாசீனவங்ஸதா³யே ஆயஸ்மதோ அனுருத்³த⁴ஸ்ஸ கதி²தே அட்ட² மஹாபுரிஸவிதக்கே புன பே⁴ஸகளாவனமஹாவிஹாரே நிஸீதி³த்வா பி⁴க்கு²ஸங்க⁴ஸ்ஸ வித்தா²ரேன கதே²ஸி.
Iti bhagavā catūsu ṭhānesu arahattaṃ pakkhipanto kammaṭṭhānaṃ kathetvā ‘‘katarasenāsane nu kho vasantassa kammaṭṭhānaṃ sappāyaṃ bhavissatī’’ti āvajjento ‘‘tasmiññeva vasantassā’’ti ñatvā tena hi tvaṃ, anuruddhātiādimāha. Pavivittassa viharatoti tīhi vivekehi vivittassa viharantassa. Uyyojanikapaṭisaṃyuttanti uyyojanikeheva vacanehi paṭisaṃyuttaṃ, tesaṃ upaṭṭhānagamanakaṃyevāti attho. Papañcanirodheti nibbānapade . Pakkhandatīti ārammaṇakaraṇavasena pakkhandati. Pasīdatītiādīsupi ārammaṇavaseneva pasīdanasantiṭṭhanamuccanā veditabbā. Iti bhagavā cetiraṭṭhe pācīnavaṃsadāye āyasmato anuruddhassa kathite aṭṭha mahāpurisavitakke puna bhesakaḷāvanamahāvihāre nisīditvā bhikkhusaṅghassa vitthārena kathesi.
மனோமயேனாதி மனேன நிப்³ப³த்திதகாயோபி மனோமயோதி வுச்சதி மனேன க³தகாயோபி, இத⁴ மனேன க³தகாயங் ஸந்தா⁴யேவமாஹ. யதா² மே அஹு ஸங்கப்போதி யதா² மய்ஹங் விதக்கோ அஹோஸி, ததோ உத்தரி அட்ட²மங் மஹாபுரிஸவிதக்கங் த³ஸ்ஸெந்தோ ததோ உத்தரிங் தே³ஸயி. ஸேஸங் ஸப்³ப³த்த² உத்தானமேவாதி.
Manomayenāti manena nibbattitakāyopi manomayoti vuccati manena gatakāyopi, idha manena gatakāyaṃ sandhāyevamāha. Yathā me ahu saṅkappoti yathā mayhaṃ vitakko ahosi, tato uttari aṭṭhamaṃ mahāpurisavitakkaṃ dassento tato uttariṃ desayi. Sesaṃ sabbattha uttānamevāti.
க³ஹபதிவக்³கோ³ ததியோ.
Gahapativaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. அனுருத்³த⁴மஹாவிதக்கஸுத்தங் • 10. Anuruddhamahāvitakkasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. அனுருத்³த⁴மஹாவிதக்கஸுத்தவண்ணனா • 10. Anuruddhamahāvitakkasuttavaṇṇanā
