| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৭. অনুরুদ্ধসুত্তং
7. Anuruddhasuttaṃ
২২৯. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো পঞ্চকঙ্গো থপতি অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস, যেনাযস্মা অনুরুদ্ধো তেনুপসঙ্কম; উপসঙ্কমিত্ৰা মম ৰচনেন আযস্মতো অনুরুদ্ধস্স পাদে সিরসা ৰন্দাহি 1 – ‘পঞ্চকঙ্গো, ভন্তে, থপতি আযস্মতো অনুরুদ্ধস্স পাদে সিরসা ৰন্দতী’তি; এৰঞ্চ ৰদেহি 2 – ‘অধিৰাসেতু কির, ভন্তে, আযস্মা অনুরুদ্ধো পঞ্চকঙ্গস্স থপতিস্স স্ৰাতনায অত্তচতুত্থো ভত্তং; যেন চ কির, ভন্তে, আযস্মা অনুরুদ্ধো পগেৰতরং আগচ্ছেয্য; পঞ্চকঙ্গো, ভন্তে, থপতি 3 বহুকিচ্চো বহুকরণীযো রাজকরণীযেনা’’’তি। ‘‘এৰং, ভন্তে’’তি খো সো পুরিসো পঞ্চকঙ্গস্স থপতিস্স পটিস্সুত্ৰা যেনাযস্মা অনুরুদ্ধো তেনুপসঙ্কমি; উপসঙ্কমিত্ৰা আযস্মন্তং অনুরুদ্ধং অভিৰাদেত্ৰা একমন্তং নিসীদি। একমন্তং নিসিন্নো খো সো পুরিসো আযস্মন্তং অনুরুদ্ধং এতদৰোচ – ‘‘পঞ্চকঙ্গো, ভন্তে, থপতি আযস্মতো অনুরুদ্ধস্স পাদে সিরসা ৰন্দতি, এৰঞ্চ ৰদেতি – ‘অধিৰাসেতু কির, ভন্তে, আযস্মা অনুরুদ্ধো পঞ্চকঙ্গস্স থপতিস্স স্ৰাতনায অত্তচতুত্থো ভত্তং; যেন চ কির, ভন্তে, আযস্মা অনুরুদ্ধো পগেৰতরং আগচ্ছেয্য; পঞ্চকঙ্গো, ভন্তে, থপতি বহুকিচ্চো বহুকরণীযো রাজকরণীযেনা’’’তি। অধিৰাসেসি খো আযস্মা অনুরুদ্ধো তুণ্হীভাৰেন।
229. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho pañcakaṅgo thapati aññataraṃ purisaṃ āmantesi – ‘‘ehi tvaṃ, ambho purisa, yenāyasmā anuruddho tenupasaṅkama; upasaṅkamitvā mama vacanena āyasmato anuruddhassa pāde sirasā vandāhi 4 – ‘pañcakaṅgo, bhante, thapati āyasmato anuruddhassa pāde sirasā vandatī’ti; evañca vadehi 5 – ‘adhivāsetu kira, bhante, āyasmā anuruddho pañcakaṅgassa thapatissa svātanāya attacatuttho bhattaṃ; yena ca kira, bhante, āyasmā anuruddho pagevataraṃ āgaccheyya; pañcakaṅgo, bhante, thapati 6 bahukicco bahukaraṇīyo rājakaraṇīyenā’’’ti. ‘‘Evaṃ, bhante’’ti kho so puriso pañcakaṅgassa thapatissa paṭissutvā yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ abhivādetvā ekamantaṃ nisīdi. Ekamantaṃ nisinno kho so puriso āyasmantaṃ anuruddhaṃ etadavoca – ‘‘pañcakaṅgo, bhante, thapati āyasmato anuruddhassa pāde sirasā vandati, evañca vadeti – ‘adhivāsetu kira, bhante, āyasmā anuruddho pañcakaṅgassa thapatissa svātanāya attacatuttho bhattaṃ; yena ca kira, bhante, āyasmā anuruddho pagevataraṃ āgaccheyya; pañcakaṅgo, bhante, thapati bahukicco bahukaraṇīyo rājakaraṇīyenā’’’ti. Adhivāsesi kho āyasmā anuruddho tuṇhībhāvena.
২৩০. অথ খো আযস্মা অনুরুদ্ধো তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন পঞ্চকঙ্গস্স থপতিস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো পঞ্চকঙ্গো থপতি আযস্মন্তং অনুরুদ্ধং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি। অথ খো পঞ্চকঙ্গো থপতি আযস্মন্তং অনুরুদ্ধং ভুত্তাৰিং ওনীতপত্তপাণিং অঞ্ঞতরং নীচং আসনং গহেত্ৰা একমন্তং নিসীদি। একমন্তং নিসিন্নো খো পঞ্চকঙ্গো থপতি আযস্মন্তং অনুরুদ্ধং এতদৰোচ –
230. Atha kho āyasmā anuruddho tassā rattiyā accayena pubbaṇhasamayaṃ nivāsetvā pattacīvaramādāya yena pañcakaṅgassa thapatissa nivesanaṃ tenupasaṅkami; upasaṅkamitvā paññatte āsane nisīdi. Atha kho pañcakaṅgo thapati āyasmantaṃ anuruddhaṃ paṇītena khādanīyena bhojanīyena sahatthā santappesi sampavāresi. Atha kho pañcakaṅgo thapati āyasmantaṃ anuruddhaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi. Ekamantaṃ nisinno kho pañcakaṅgo thapati āyasmantaṃ anuruddhaṃ etadavoca –
‘‘ইধ মং, ভন্তে, থেরা ভিক্খূ উপসঙ্কমিত্ৰা এৰমাহংসু – ‘অপ্পমাণং, গহপতি, চেতোৰিমুত্তিং ভাৰেহী’তি 7। একচ্চে থেরা এৰমাহংসু – ‘মহগ্গতং, গহপতি, চেতোৰিমুত্তিং ভাৰেহী’তি। যা চাযং, ভন্তে, অপ্পমাণা চেতোৰিমুত্তি যা চ মহগ্গতা চেতোৰিমুত্তি – ইমে ধম্মা নানত্থা চেৰ নানাব্যঞ্জনা চ, উদাহু একত্থা ব্যঞ্জনমেৰ নান’’ন্তি? ‘‘তেন হি, গহপতি, তং যেৰেত্থ পটিভাতু। অপণ্ণকন্তে ইতো ভৰিস্সতী’’তি। ‘‘ময্হং খো, ভন্তে, এৰং হোতি – ‘যা চাযং অপ্পমাণা চেতোৰিমুত্তি যা চ মহগ্গতা চেতোৰিমুত্তি ইমে ধম্মা একত্থা ব্যঞ্জনমেৰ নান’’’ন্তি। ‘‘যা চাযং, গহপতি, অপ্পমাণা চেতোৰিমুত্তি যা চ মহগ্গতা চেতোৰিমুত্তি ইমে ধম্মা নানত্থা চেৰ নানাব্যঞ্জনা চ । তদমিনাপেতং, গহপতি, পরিযাযেন ৰেদিতব্বং যথা ইমে ধম্মা নানত্থা চেৰ নানাব্যঞ্জনা চ’’।
‘‘Idha maṃ, bhante, therā bhikkhū upasaṅkamitvā evamāhaṃsu – ‘appamāṇaṃ, gahapati, cetovimuttiṃ bhāvehī’ti 8. Ekacce therā evamāhaṃsu – ‘mahaggataṃ, gahapati, cetovimuttiṃ bhāvehī’ti. Yā cāyaṃ, bhante, appamāṇā cetovimutti yā ca mahaggatā cetovimutti – ime dhammā nānatthā ceva nānābyañjanā ca, udāhu ekatthā byañjanameva nāna’’nti? ‘‘Tena hi, gahapati, taṃ yevettha paṭibhātu. Apaṇṇakante ito bhavissatī’’ti. ‘‘Mayhaṃ kho, bhante, evaṃ hoti – ‘yā cāyaṃ appamāṇā cetovimutti yā ca mahaggatā cetovimutti ime dhammā ekatthā byañjanameva nāna’’’nti. ‘‘Yā cāyaṃ, gahapati, appamāṇā cetovimutti yā ca mahaggatā cetovimutti ime dhammā nānatthā ceva nānābyañjanā ca . Tadamināpetaṃ, gahapati, pariyāyena veditabbaṃ yathā ime dhammā nānatthā ceva nānābyañjanā ca’’.
‘‘কতমা চ, গহপতি, অপ্পমাণা চেতোৰিমুত্তি? ইধ, গহপতি, ভিক্খু মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং তথা ততিযং তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরতি। করুণাসহগতেন চেতসা… মুদিতাসহগতেন চেতসা… উপেক্খাসহগতেন চেতসা একং দিসং ফরিত্ৰা ৰিহরতি, তথা দুতিযং তথা ততিযং তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরতি। অযং ৰুচ্চতি, গহপতি, অপ্পমাণা চেতোৰিমুত্তি।
‘‘Katamā ca, gahapati, appamāṇā cetovimutti? Idha, gahapati, bhikkhu mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ; iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā viharati. Karuṇāsahagatena cetasā… muditāsahagatena cetasā… upekkhāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ; iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā viharati. Ayaṃ vuccati, gahapati, appamāṇā cetovimutti.
২৩১. ‘‘কতমা চ, গহপতি, মহগ্গতা চেতোৰিমুত্তি? ইধ, গহপতি, ভিক্খু যাৰতা একং রুক্খমূলং মহগ্গতন্তি ফরিত্ৰা অধিমুচ্চিত্ৰা ৰিহরতি। অযং ৰুচ্চতি, গহপতি, মহগ্গতা চেতোৰিমুত্তি। ইধ পন, গহপতি, ভিক্খু যাৰতা দ্ৰে ৰা তীণি ৰা রুক্খমূলানি মহগ্গতন্তি ফরিত্ৰা অধিমুচ্চিত্ৰা ৰিহরতি। অযম্পি 9 ৰুচ্চতি, গহপতি, মহগ্গতা চেতোৰিমুত্তি। ইধ পন, গহপতি, ভিক্খু যাৰতা একং গামক্খেত্তং মহগ্গতন্তি ফরিত্ৰা অধিমুচ্চিত্ৰা ৰিহরতি। অযম্পি ৰুচ্চতি, গহপতি, মহগ্গতা চেতোৰিমুত্তি। ইধ পন, গহপতি , ভিক্খু যাৰতা দ্ৰে ৰা তীণি ৰা গামক্খেত্তানি মহগ্গতন্তি ফরিত্ৰা অধিমুচ্চিত্ৰা ৰিহরতি। অযম্পি ৰুচ্চতি, গহপতি, মহগ্গতা চেতোৰিমুত্তি। ইধ পন, গহপতি, ভিক্খু যাৰতা একং মহারজ্জং মহগ্গতন্তি ফরিত্ৰা অধিমুচ্চিত্ৰা ৰিহরতি। অযম্পি ৰুচ্চতি, গহপতি, মহগ্গতা চেতোৰিমুত্তি। ইধ পন, গহপতি, ভিক্খু যাৰতা দ্ৰে ৰা তীণি ৰা মহারজ্জানি মহগ্গতন্তি ফরিত্ৰা অধিমুচ্চিত্ৰা ৰিহরতি। অযম্পি ৰুচ্চতি, গহপতি, মহগ্গতা চেতোৰিমুত্তি। ইধ পন, গহপতি, ভিক্খু যাৰতা সমুদ্দপরিযন্তং পথৰিং মহগ্গতন্তি ফরিত্ৰা অধিমুচ্চিত্ৰা ৰিহরতি। অযম্পি ৰুচ্চতি, গহপতি, মহগ্গতা চেতোৰিমুত্তি। ইমিনা খো এতং, গহপতি, পরিযাযেন ৰেদিতব্বং যথা ইমে ধম্মা নানত্থা চেৰ নানাব্যঞ্জনা চ।
231. ‘‘Katamā ca, gahapati, mahaggatā cetovimutti? Idha, gahapati, bhikkhu yāvatā ekaṃ rukkhamūlaṃ mahaggatanti pharitvā adhimuccitvā viharati. Ayaṃ vuccati, gahapati, mahaggatā cetovimutti. Idha pana, gahapati, bhikkhu yāvatā dve vā tīṇi vā rukkhamūlāni mahaggatanti pharitvā adhimuccitvā viharati. Ayampi 10 vuccati, gahapati, mahaggatā cetovimutti. Idha pana, gahapati, bhikkhu yāvatā ekaṃ gāmakkhettaṃ mahaggatanti pharitvā adhimuccitvā viharati. Ayampi vuccati, gahapati, mahaggatā cetovimutti. Idha pana, gahapati , bhikkhu yāvatā dve vā tīṇi vā gāmakkhettāni mahaggatanti pharitvā adhimuccitvā viharati. Ayampi vuccati, gahapati, mahaggatā cetovimutti. Idha pana, gahapati, bhikkhu yāvatā ekaṃ mahārajjaṃ mahaggatanti pharitvā adhimuccitvā viharati. Ayampi vuccati, gahapati, mahaggatā cetovimutti. Idha pana, gahapati, bhikkhu yāvatā dve vā tīṇi vā mahārajjāni mahaggatanti pharitvā adhimuccitvā viharati. Ayampi vuccati, gahapati, mahaggatā cetovimutti. Idha pana, gahapati, bhikkhu yāvatā samuddapariyantaṃ pathaviṃ mahaggatanti pharitvā adhimuccitvā viharati. Ayampi vuccati, gahapati, mahaggatā cetovimutti. Iminā kho etaṃ, gahapati, pariyāyena veditabbaṃ yathā ime dhammā nānatthā ceva nānābyañjanā ca.
২৩২. ‘‘চতস্সো খো ইমা গহপতি, ভৰূপপত্তিযো। কতমা চতস্সো? ইধ, গহপতি, একচ্চো ‘পরিত্তাভা’তি ফরিত্ৰা অধিমুচ্চিত্ৰা ৰিহরতি। সো কাযস্স ভেদা পরং মরণা পরিত্তাভানং দেৰানং সহব্যতং উপপজ্জতি। ইধ পন, গহপতি, একচ্চো ‘অপ্পমাণাভা’তি ফরিত্ৰা অধিমুচ্চিত্ৰা ৰিহরতি। সো কাযস্স ভেদা পরং মরণা অপ্পমাণাভানং দেৰানং সহব্যতং উপপজ্জতি। ইধ পন, গহপতি, একচ্চো ‘সংকিলিট্ঠাভা’তি ফরিত্ৰা অধিমুচ্চিত্ৰা ৰিহরতি। সো কাযস্স ভেদা পরং মরণা সংকিলিট্ঠাভানং দেৰানং সহব্যতং উপপজ্জতি। ইধ পন, গহপতি, একচ্চো ‘পরিসুদ্ধাভা’তি ফরিত্ৰা অধিমুচ্চিত্ৰা ৰিহরতি। সো কাযস্স ভেদা পরং মরণা পরিসুদ্ধাভানং দেৰানং সহব্যতং উপপজ্জতি। ইমা খো, গহপতি, চতস্সো ভৰূপপত্তিযো।
232. ‘‘Catasso kho imā gahapati, bhavūpapattiyo. Katamā catasso? Idha, gahapati, ekacco ‘parittābhā’ti pharitvā adhimuccitvā viharati. So kāyassa bhedā paraṃ maraṇā parittābhānaṃ devānaṃ sahabyataṃ upapajjati. Idha pana, gahapati, ekacco ‘appamāṇābhā’ti pharitvā adhimuccitvā viharati. So kāyassa bhedā paraṃ maraṇā appamāṇābhānaṃ devānaṃ sahabyataṃ upapajjati. Idha pana, gahapati, ekacco ‘saṃkiliṭṭhābhā’ti pharitvā adhimuccitvā viharati. So kāyassa bhedā paraṃ maraṇā saṃkiliṭṭhābhānaṃ devānaṃ sahabyataṃ upapajjati. Idha pana, gahapati, ekacco ‘parisuddhābhā’ti pharitvā adhimuccitvā viharati. So kāyassa bhedā paraṃ maraṇā parisuddhābhānaṃ devānaṃ sahabyataṃ upapajjati. Imā kho, gahapati, catasso bhavūpapattiyo.
‘‘হোতি খো সো, গহপতি, সমযো, যা তা দেৰতা একজ্ঝং সন্নিপতন্তি, তাসং একজ্ঝং সন্নিপতিতানং ৰণ্ণনানত্তঞ্হি খো পঞ্ঞাযতি নো চ আভানানত্তং । সেয্যথাপি, গহপতি, পুরিসো সম্বহুলানি তেলপ্পদীপানি একং ঘরং পৰেসেয্য। তেসং একং ঘরং পৰেসিতানং অচ্চিনানত্তঞ্হি খো পঞ্ঞাযেথ, নো চ আভানানত্তং; এৰমেৰ খো, গহপতি, হোতি খো সো সমযো, যা তা দেৰতা একজ্ঝং সন্নিপতন্তি তাসং একজ্ঝং সন্নিপতিতানং ৰণ্ণনানত্তঞ্হি খো পঞ্ঞাযতি, নো চ আভানানত্তং।
‘‘Hoti kho so, gahapati, samayo, yā tā devatā ekajjhaṃ sannipatanti, tāsaṃ ekajjhaṃ sannipatitānaṃ vaṇṇanānattañhi kho paññāyati no ca ābhānānattaṃ . Seyyathāpi, gahapati, puriso sambahulāni telappadīpāni ekaṃ gharaṃ paveseyya. Tesaṃ ekaṃ gharaṃ pavesitānaṃ accinānattañhi kho paññāyetha, no ca ābhānānattaṃ; evameva kho, gahapati, hoti kho so samayo, yā tā devatā ekajjhaṃ sannipatanti tāsaṃ ekajjhaṃ sannipatitānaṃ vaṇṇanānattañhi kho paññāyati, no ca ābhānānattaṃ.
‘‘হোতি খো সো, গহপতি, সমযো, যা তা দেৰতা ততো ৰিপক্কমন্তি, তাসং ততো ৰিপক্কমন্তীনং ৰণ্ণনানত্তঞ্চেৰ পঞ্ঞাযতি আভানানত্তঞ্চ। সেয্যথাপি, গহপতি, পুরিসো তানি সম্বহুলানি তেলপ্পদীপানি তম্হা ঘরা নীহরেয্য। তেসং ততো নীহতানং 11 অচ্চিনানত্তঞ্চেৰ পঞ্ঞাযেথ আভানানত্তঞ্চ; এৰমেৰ খো, গহপতি, হোতি খো সো সমযো, যা তা দেৰতা ততো ৰিপক্কমন্তি, তাসং ততো ৰিপক্কমন্তীনং ৰণ্ণনানত্তঞ্চেৰ পঞ্ঞাযতি আভানানত্তঞ্চ।
‘‘Hoti kho so, gahapati, samayo, yā tā devatā tato vipakkamanti, tāsaṃ tato vipakkamantīnaṃ vaṇṇanānattañceva paññāyati ābhānānattañca. Seyyathāpi, gahapati, puriso tāni sambahulāni telappadīpāni tamhā gharā nīhareyya. Tesaṃ tato nīhatānaṃ 12 accinānattañceva paññāyetha ābhānānattañca; evameva kho, gahapati, hoti kho so samayo, yā tā devatā tato vipakkamanti, tāsaṃ tato vipakkamantīnaṃ vaṇṇanānattañceva paññāyati ābhānānattañca.
‘‘ন খো, গহপতি, তাসং দেৰতানং এৰং হোতি – ‘ইদং অম্হাকং নিচ্চন্তি ৰা ধুৰন্তি ৰা সস্সত’ন্তি ৰা, অপি চ যত্থ যত্থেৰ তা 13 দেৰতা অভিনিৰিসন্তি তত্থ তত্থেৰ তা দেৰতা অভিরমন্তি। সেয্যথাপি, গহপতি, মক্খিকানং কাজেন ৰা পিটকেন ৰা হরীযমানানং ন এৰং হোতি – ‘ইদং অম্হাকং নিচ্চন্তি ৰা ধুৰন্তি ৰা সস্সত’ন্তি ৰা, অপি চ যত্থ যত্থেৰ তা 14 মক্খিকা অভিনিৰিসন্তি তত্থ তত্থেৰ তা মক্খিকা অভিরমন্তি; এৰমেৰ খো, গহপতি, তাসং দেৰতানং ন এৰং হোতি – ‘ইদং অম্হাকং নিচ্চন্তি ৰা ধুৰন্তি ৰা সস্সত’ন্তি ৰা, অপি চ যত্থ যত্থেৰ তা দেৰতা অভিনিৰিসন্তি তত্থ তত্থেৰ তা দেৰতা অভিরমন্তী’’তি।
‘‘Na kho, gahapati, tāsaṃ devatānaṃ evaṃ hoti – ‘idaṃ amhākaṃ niccanti vā dhuvanti vā sassata’nti vā, api ca yattha yattheva tā 15 devatā abhinivisanti tattha tattheva tā devatā abhiramanti. Seyyathāpi, gahapati, makkhikānaṃ kājena vā piṭakena vā harīyamānānaṃ na evaṃ hoti – ‘idaṃ amhākaṃ niccanti vā dhuvanti vā sassata’nti vā, api ca yattha yattheva tā 16 makkhikā abhinivisanti tattha tattheva tā makkhikā abhiramanti; evameva kho, gahapati, tāsaṃ devatānaṃ na evaṃ hoti – ‘idaṃ amhākaṃ niccanti vā dhuvanti vā sassata’nti vā, api ca yattha yattheva tā devatā abhinivisanti tattha tattheva tā devatā abhiramantī’’ti.
২৩৩. এৰং ৰুত্তে, আযস্মা সভিযো কচ্চানো 17 আযস্মন্তং অনুরুদ্ধং এতদৰোচ – ‘‘সাধু, ভন্তে অনুরুদ্ধ! অত্থি চ মে এত্থ উত্তরিং পটিপুচ্ছিতব্বং। যা তা, ভন্তে, দেৰতা আভা সব্বা তা পরিত্তাভা উদাহু সন্তেত্থ একচ্চা দেৰতা অপ্পমাণাভা’’তি? ‘‘তদঙ্গেন খো, আৰুসো কচ্চান, সন্তেত্থ একচ্চা দেৰতা পরিত্তাভা, সন্তি পনেত্থ একচ্চা দেৰতা অপ্পমাণাভা’’তি। ‘‘কো নু খো, ভন্তে অনুরুদ্ধ, হেতু কো পচ্চযো যেন তাসং দেৰতানং একং দেৰনিকাযং উপপন্নানং সন্তেত্থ একচ্চা দেৰতা পরিত্তাভা, সন্তি পনেত্থ একচ্চা দেৰতা অপ্পমাণাভা’’তি?
233. Evaṃ vutte, āyasmā sabhiyo kaccāno 18 āyasmantaṃ anuruddhaṃ etadavoca – ‘‘sādhu, bhante anuruddha! Atthi ca me ettha uttariṃ paṭipucchitabbaṃ. Yā tā, bhante, devatā ābhā sabbā tā parittābhā udāhu santettha ekaccā devatā appamāṇābhā’’ti? ‘‘Tadaṅgena kho, āvuso kaccāna, santettha ekaccā devatā parittābhā, santi panettha ekaccā devatā appamāṇābhā’’ti. ‘‘Ko nu kho, bhante anuruddha, hetu ko paccayo yena tāsaṃ devatānaṃ ekaṃ devanikāyaṃ upapannānaṃ santettha ekaccā devatā parittābhā, santi panettha ekaccā devatā appamāṇābhā’’ti?
‘‘তেন হাৰুসো কচ্চান, তংযেৰেত্থ পটিপুচ্ছিস্সামি। যথা তে খমেয্য তথা নং ব্যাকরেয্যাসি। তং কিং মঞ্ঞসি, আৰুসো কচ্চান , য্ৰাযং ভিক্খু যাৰতা একং রুক্খমূলং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি, যোচাযং 19 ভিক্খু যাৰতা দ্ৰে ৰা তীণি ৰা রুক্খমূলানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – ইমাসং উভিন্নং চিত্তভাৰনানং কতমা চিত্তভাৰনা মহগ্গততরা’’তি? ‘‘য্ৰাযং, ভন্তে, ভিক্খু যাৰতা দ্ৰে ৰা তীণি ৰা রুক্খমূলানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – অযং ইমাসং উভিন্নং চিত্তভাৰনানং মহগ্গততরা’’তি।
‘‘Tena hāvuso kaccāna, taṃyevettha paṭipucchissāmi. Yathā te khameyya tathā naṃ byākareyyāsi. Taṃ kiṃ maññasi, āvuso kaccāna , yvāyaṃ bhikkhu yāvatā ekaṃ rukkhamūlaṃ ‘mahaggata’nti pharitvā adhimuccitvā viharati, yocāyaṃ 20 bhikkhu yāvatā dve vā tīṇi vā rukkhamūlāni ‘mahaggata’nti pharitvā adhimuccitvā viharati – imāsaṃ ubhinnaṃ cittabhāvanānaṃ katamā cittabhāvanā mahaggatatarā’’ti? ‘‘Yvāyaṃ, bhante, bhikkhu yāvatā dve vā tīṇi vā rukkhamūlāni ‘mahaggata’nti pharitvā adhimuccitvā viharati – ayaṃ imāsaṃ ubhinnaṃ cittabhāvanānaṃ mahaggatatarā’’ti.
‘‘তং কিং মঞ্ঞসি, আৰুসো কচ্চান, য্ৰাযং ভিক্খু যাৰতা দ্ৰে ৰা তীণি ৰা রুক্খমূলানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি, যোচাযং ভিক্খু যাৰতা একং গামক্খেত্তং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – ইমাসং উভিন্নং চিত্তভাৰনানং কতমা চিত্তভাৰনা মহগ্গততরা’’তি? ‘‘য্ৰাযং, ভন্তে, ভিক্খু যাৰতা একং গামক্খেত্তং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – অযং ইমাসং উভিন্নং চিত্তভাৰনানং মহগ্গততরা’’তি।
‘‘Taṃ kiṃ maññasi, āvuso kaccāna, yvāyaṃ bhikkhu yāvatā dve vā tīṇi vā rukkhamūlāni ‘mahaggata’nti pharitvā adhimuccitvā viharati, yocāyaṃ bhikkhu yāvatā ekaṃ gāmakkhettaṃ ‘mahaggata’nti pharitvā adhimuccitvā viharati – imāsaṃ ubhinnaṃ cittabhāvanānaṃ katamā cittabhāvanā mahaggatatarā’’ti? ‘‘Yvāyaṃ, bhante, bhikkhu yāvatā ekaṃ gāmakkhettaṃ ‘mahaggata’nti pharitvā adhimuccitvā viharati – ayaṃ imāsaṃ ubhinnaṃ cittabhāvanānaṃ mahaggatatarā’’ti.
‘‘তং কিং মঞ্ঞসি, আৰুসো কচ্চান, য্ৰাযং ভিক্খু যাৰতা একং গামক্খেত্তং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি, যোচাযং ভিক্খু যাৰতা দ্ৰে ৰা তীণি ৰা গামক্খেত্তানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – ইমাসং উভিন্নং চিত্তভাৰনানং কতমা চিত্তভাৰনা মহগ্গততরা’’তি? ‘‘য্ৰাযং, ভন্তে, ভিক্খু যাৰতা দ্ৰে ৰা তীণি ৰা গামক্খেত্তানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – অযং ইমাসং উভিন্নং চিত্তভাৰনানং মহগ্গততরা’’তি।
‘‘Taṃ kiṃ maññasi, āvuso kaccāna, yvāyaṃ bhikkhu yāvatā ekaṃ gāmakkhettaṃ ‘mahaggata’nti pharitvā adhimuccitvā viharati, yocāyaṃ bhikkhu yāvatā dve vā tīṇi vā gāmakkhettāni ‘mahaggata’nti pharitvā adhimuccitvā viharati – imāsaṃ ubhinnaṃ cittabhāvanānaṃ katamā cittabhāvanā mahaggatatarā’’ti? ‘‘Yvāyaṃ, bhante, bhikkhu yāvatā dve vā tīṇi vā gāmakkhettāni ‘mahaggata’nti pharitvā adhimuccitvā viharati – ayaṃ imāsaṃ ubhinnaṃ cittabhāvanānaṃ mahaggatatarā’’ti.
‘‘তং কিং মঞ্ঞসি, আৰুসো কচ্চান, য্ৰাযং ভিক্খু যাৰতা দ্ৰে ৰা তীণি ৰা গামক্খেত্তানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি, যোচাযং ভিক্খু যাৰতা একং মহারজ্জং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – ইমাসং উভিন্নং চিত্তভাৰনানং কতমা চিত্তভাৰনা মহগ্গততরা’’তি? ‘‘য্ৰাযং, ভন্তে, ভিক্খু যাৰতা একং মহারজ্জং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – অযং ইমাসং উভিন্নং চিত্তভাৰনানং মহগ্গততরা’’তি।
‘‘Taṃ kiṃ maññasi, āvuso kaccāna, yvāyaṃ bhikkhu yāvatā dve vā tīṇi vā gāmakkhettāni ‘mahaggata’nti pharitvā adhimuccitvā viharati, yocāyaṃ bhikkhu yāvatā ekaṃ mahārajjaṃ ‘mahaggata’nti pharitvā adhimuccitvā viharati – imāsaṃ ubhinnaṃ cittabhāvanānaṃ katamā cittabhāvanā mahaggatatarā’’ti? ‘‘Yvāyaṃ, bhante, bhikkhu yāvatā ekaṃ mahārajjaṃ ‘mahaggata’nti pharitvā adhimuccitvā viharati – ayaṃ imāsaṃ ubhinnaṃ cittabhāvanānaṃ mahaggatatarā’’ti.
‘‘তং কিং মঞ্ঞসি, আৰুসো কচ্চান, য্ৰাযং ভিক্খু যাৰতা একং মহারজ্জং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি, যোচাযং ভিক্খু যাৰতা দ্ৰে ৰা তীণি ৰা মহারজ্জানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – ইমাসং উভিন্নং চিত্তভাৰনানং কতমা চিত্তভাৰনা মহগ্গততরা’’তি? ‘‘য্ৰাযং, ভন্তে, ভিক্খু যাৰতা দ্ৰে ৰা তীণি ৰা মহারজ্জানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – অযং ইমাসং উভিন্নং চিত্তভাৰনানং মহগ্গততরা’’তি।
‘‘Taṃ kiṃ maññasi, āvuso kaccāna, yvāyaṃ bhikkhu yāvatā ekaṃ mahārajjaṃ ‘mahaggata’nti pharitvā adhimuccitvā viharati, yocāyaṃ bhikkhu yāvatā dve vā tīṇi vā mahārajjāni ‘mahaggata’nti pharitvā adhimuccitvā viharati – imāsaṃ ubhinnaṃ cittabhāvanānaṃ katamā cittabhāvanā mahaggatatarā’’ti? ‘‘Yvāyaṃ, bhante, bhikkhu yāvatā dve vā tīṇi vā mahārajjāni ‘mahaggata’nti pharitvā adhimuccitvā viharati – ayaṃ imāsaṃ ubhinnaṃ cittabhāvanānaṃ mahaggatatarā’’ti.
‘‘তং কিং মঞ্ঞসি, আৰুসো কচ্চান, য্ৰাযং ভিক্খু যাৰতা দ্ৰে ৰা তীণি ৰা মহারজ্জানি ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি, যোচাযং ভিক্খু যাৰতা সমুদ্দপরিযন্তং পথৰিং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – ইমাসং উভিন্নং চিত্তভাৰনানং কতমা চিত্তভাৰনা মহগ্গততরা’’তি? ‘‘য্ৰাযং, ভন্তে, ভিক্খু যাৰতা সমুদ্দপরিযন্তং পথৰিং ‘মহগ্গত’ন্তি ফরিত্ৰা অধিমুচ্চিত্ৰা ৰিহরতি – অযং ইমাসং উভিন্নং চিত্তভাৰনানং মহগ্গততরা’’তি? ‘‘অযং খো, আৰুসো কচ্চান, হেতু অযং পচ্চযো, যেন তাসং দেৰতানং একং দেৰনিকাযং উপপন্নানং সন্তেত্থ একচ্চা দেৰতা পরিত্তাভা, সন্তি পনেত্থ একচ্চা দেৰতা অপ্পমাণাভা’’তি।
‘‘Taṃ kiṃ maññasi, āvuso kaccāna, yvāyaṃ bhikkhu yāvatā dve vā tīṇi vā mahārajjāni ‘mahaggata’nti pharitvā adhimuccitvā viharati, yocāyaṃ bhikkhu yāvatā samuddapariyantaṃ pathaviṃ ‘mahaggata’nti pharitvā adhimuccitvā viharati – imāsaṃ ubhinnaṃ cittabhāvanānaṃ katamā cittabhāvanā mahaggatatarā’’ti? ‘‘Yvāyaṃ, bhante, bhikkhu yāvatā samuddapariyantaṃ pathaviṃ ‘mahaggata’nti pharitvā adhimuccitvā viharati – ayaṃ imāsaṃ ubhinnaṃ cittabhāvanānaṃ mahaggatatarā’’ti? ‘‘Ayaṃ kho, āvuso kaccāna, hetu ayaṃ paccayo, yena tāsaṃ devatānaṃ ekaṃ devanikāyaṃ upapannānaṃ santettha ekaccā devatā parittābhā, santi panettha ekaccā devatā appamāṇābhā’’ti.
২৩৪. ‘‘সাধু, ভন্তে অনুরুদ্ধ! অত্থি চ মে এত্থ উত্তরিং পটিপুচ্ছিতব্বং। যাৰতা 21, ভন্তে, দেৰতা আভা সব্বা তা সংকিলিট্ঠাভা উদাহু সন্তেত্থ একচ্চা দেৰতা পরিসুদ্ধাভা’’তি? ‘‘তদঙ্গেন খো, আৰুসো কচ্চান, সন্তেত্থ একচ্চা দেৰতা সংকিলিট্ঠাভা, সন্তি পনেত্থ একচ্চা দেৰতা পরিসুদ্ধাভা’’তি। ‘‘কো নু খো, ভন্তে, অনুরুদ্ধ, হেতু কো পচ্চযো, যেন তাসং দেৰতানং একং দেৰনিকাযং উপপন্নানং সন্তেত্থ একচ্চা দেৰতা সংকিলিট্ঠাভা, সন্তি পনেত্থ একচ্চা দেৰতা পরিসুদ্ধাভা’’তি?
234. ‘‘Sādhu, bhante anuruddha! Atthi ca me ettha uttariṃ paṭipucchitabbaṃ. Yāvatā 22, bhante, devatā ābhā sabbā tā saṃkiliṭṭhābhā udāhu santettha ekaccā devatā parisuddhābhā’’ti? ‘‘Tadaṅgena kho, āvuso kaccāna, santettha ekaccā devatā saṃkiliṭṭhābhā, santi panettha ekaccā devatā parisuddhābhā’’ti. ‘‘Ko nu kho, bhante, anuruddha, hetu ko paccayo, yena tāsaṃ devatānaṃ ekaṃ devanikāyaṃ upapannānaṃ santettha ekaccā devatā saṃkiliṭṭhābhā, santi panettha ekaccā devatā parisuddhābhā’’ti?
‘‘তেন , হাৰুসো কচ্চান, উপমং তে করিস্সামি। উপমাযপিধেকচ্চে 23 ৰিঞ্ঞূ পুরিসা ভাসিতস্স অত্থং আজানন্তি। সেয্যথাপি, আৰুসো কচ্চান, তেলপ্পদীপস্স ঝাযতো তেলম্পি অপরিসুদ্ধং ৰট্টিপি অপরিসুদ্ধা। সো তেলস্সপি অপরিসুদ্ধত্তা ৰট্টিযাপি অপরিসুদ্ধত্তা অন্ধন্ধং ৰিয ঝাযতি; এৰমেৰ খো, আৰুসো কচ্চান, ইধেকচ্চো ভিক্খু ‘সংকিলিট্ঠাভা’তি ফরিত্ৰা অধিমুচ্চিত্ৰা ৰিহরতি, তস্স কাযদুট্ঠুল্লম্পি ন সুপ্পটিপ্পস্সদ্ধং হোতি, থিনমিদ্ধম্পি ন সুসমূহতং হোতি , উদ্ধচ্চকুক্কুচ্চম্পি ন সুপ্পটিৰিনীতং হোতি। সো কাযদুট্ঠুল্লস্সপি ন সুপ্পটিপ্পস্সদ্ধত্তা থিনমিদ্ধস্সপি ন সুসমূহতত্তা উদ্ধচ্চকুক্কুচ্চস্সপি ন সুপ্পটিৰিনীতত্তা অন্ধন্ধং ৰিয ঝাযতি। সো কাযস্স ভেদা পরং মরণা সংকিলিট্ঠাভানং দেৰানং সহব্যতং উপপজ্জতি। সেয্যথাপি, আৰুসো কচ্চান, তেলপ্পদীপস্স ঝাযতো তেলম্পি পরিসুদ্ধং ৰট্টিপি পরিসুদ্ধা। সো তেলস্সপি পরিসুদ্ধত্তা ৰট্টিযাপি পরিসুদ্ধত্তা ন অন্ধন্ধং ৰিয ঝাযতি; এৰমেৰ খো, আৰুসো কচ্চান, ইধেকচ্চো ভিক্খু ‘পরিসুদ্ধাভা’তি ফরিত্ৰা অধিমুচ্চিত্ৰা ৰিহরতি। তস্স কাযদুট্ঠুল্লম্পি সুপ্পটিপ্পস্সদ্ধং হোতি, থিনমিদ্ধম্পি সুসমূহতং হোতি, উদ্ধচ্চকুক্কুচ্চম্পি সুপ্পটিৰিনীতং হোতি। সো কাযদুট্ঠুল্লস্সপি সুপ্পটিপ্পস্সদ্ধত্তা থিনমিদ্ধস্সপি সুসমূহতত্তা উদ্ধচ্চকুক্কুচ্চস্সপি সুপ্পটিৰিনীতত্তা ন অন্ধন্ধং ৰিয ঝাযতি। সো কাযস্স ভেদা পরং মরণা পরিসুদ্ধাভানং দেৰানং সহব্যতং উপপজ্জতি। অযং খো, আৰুসো কচ্চান, হেতু অযং পচ্চযো যেন তাসং দেৰতানং একং দেৰনিকাযং উপপন্নানং সন্তেত্থ একচ্চা দেৰতা সংকিলিট্ঠাভা, সন্তি পনেত্থ একচ্চা দেৰতা পরিসুদ্ধাভা’’তি।
‘‘Tena , hāvuso kaccāna, upamaṃ te karissāmi. Upamāyapidhekacce 24 viññū purisā bhāsitassa atthaṃ ājānanti. Seyyathāpi, āvuso kaccāna, telappadīpassa jhāyato telampi aparisuddhaṃ vaṭṭipi aparisuddhā. So telassapi aparisuddhattā vaṭṭiyāpi aparisuddhattā andhandhaṃ viya jhāyati; evameva kho, āvuso kaccāna, idhekacco bhikkhu ‘saṃkiliṭṭhābhā’ti pharitvā adhimuccitvā viharati, tassa kāyaduṭṭhullampi na suppaṭippassaddhaṃ hoti, thinamiddhampi na susamūhataṃ hoti , uddhaccakukkuccampi na suppaṭivinītaṃ hoti. So kāyaduṭṭhullassapi na suppaṭippassaddhattā thinamiddhassapi na susamūhatattā uddhaccakukkuccassapi na suppaṭivinītattā andhandhaṃ viya jhāyati. So kāyassa bhedā paraṃ maraṇā saṃkiliṭṭhābhānaṃ devānaṃ sahabyataṃ upapajjati. Seyyathāpi, āvuso kaccāna, telappadīpassa jhāyato telampi parisuddhaṃ vaṭṭipi parisuddhā. So telassapi parisuddhattā vaṭṭiyāpi parisuddhattā na andhandhaṃ viya jhāyati; evameva kho, āvuso kaccāna, idhekacco bhikkhu ‘parisuddhābhā’ti pharitvā adhimuccitvā viharati. Tassa kāyaduṭṭhullampi suppaṭippassaddhaṃ hoti, thinamiddhampi susamūhataṃ hoti, uddhaccakukkuccampi suppaṭivinītaṃ hoti. So kāyaduṭṭhullassapi suppaṭippassaddhattā thinamiddhassapi susamūhatattā uddhaccakukkuccassapi suppaṭivinītattā na andhandhaṃ viya jhāyati. So kāyassa bhedā paraṃ maraṇā parisuddhābhānaṃ devānaṃ sahabyataṃ upapajjati. Ayaṃ kho, āvuso kaccāna, hetu ayaṃ paccayo yena tāsaṃ devatānaṃ ekaṃ devanikāyaṃ upapannānaṃ santettha ekaccā devatā saṃkiliṭṭhābhā, santi panettha ekaccā devatā parisuddhābhā’’ti.
২৩৫. এৰং ৰুত্তে, আযস্মা সভিযো কচ্চানো আযস্মন্তং অনুরুদ্ধং এতদৰোচ – ‘‘সাধু, ভন্তে অনুরুদ্ধ! ন, ভন্তে, আযস্মা অনুরুদ্ধো এৰমাহ – ‘এৰং মে সুত’ন্তি ৰা ‘এৰং অরহতি ভৰিতু’ন্তি ৰা; অথ চ পন, ভন্তে, আযস্মা অনুরুদ্ধো ‘এৰম্পি তা দেৰতা , ইতিপি তা দেৰতা’ত্ৰেৰ ভাসতি। তস্স ময্হং, ভন্তে, এৰং হোতি – ‘অদ্ধা আযস্মতা অনুরুদ্ধেন তাহি দেৰতাহি সদ্ধিং সন্নিৰুত্থপুব্বঞ্চেৰ সল্লপিতপুব্বঞ্চ সাকচ্ছা চ সমাপজ্জিতপুব্বা’’’তি। ‘‘অদ্ধা খো অযং, আৰুসো কচ্চান, আসজ্জ উপনীয ৰাচা ভাসিতা, অপি চ তে অহং ব্যাকরিস্সামি – ‘দীঘরত্তং খো মে, আৰুসো কচ্চান, তাহি দেৰতাহি সদ্ধিং সন্নিৰুত্থপুব্বঞ্চেৰ সল্লপিতপুব্বঞ্চ সাকচ্ছা চ সমাপজ্জিতপুব্বা’’’তি।
235. Evaṃ vutte, āyasmā sabhiyo kaccāno āyasmantaṃ anuruddhaṃ etadavoca – ‘‘sādhu, bhante anuruddha! Na, bhante, āyasmā anuruddho evamāha – ‘evaṃ me suta’nti vā ‘evaṃ arahati bhavitu’nti vā; atha ca pana, bhante, āyasmā anuruddho ‘evampi tā devatā , itipi tā devatā’tveva bhāsati. Tassa mayhaṃ, bhante, evaṃ hoti – ‘addhā āyasmatā anuruddhena tāhi devatāhi saddhiṃ sannivutthapubbañceva sallapitapubbañca sākacchā ca samāpajjitapubbā’’’ti. ‘‘Addhā kho ayaṃ, āvuso kaccāna, āsajja upanīya vācā bhāsitā, api ca te ahaṃ byākarissāmi – ‘dīgharattaṃ kho me, āvuso kaccāna, tāhi devatāhi saddhiṃ sannivutthapubbañceva sallapitapubbañca sākacchā ca samāpajjitapubbā’’’ti.
অনুরুদ্ধসুত্তং নিট্ঠিতং সত্তমং।
Anuruddhasuttaṃ niṭṭhitaṃ sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. অনুরুদ্ধসুত্তৰণ্ণনা • 7. Anuruddhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. অনুরুদ্ধসুত্তৰণ্ণনা • 7. Anuruddhasuttavaṇṇanā
