| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
7. அனுருத்³த⁴ஸுத்தவண்ணனா
7. Anuruddhasuttavaṇṇanā
230. உபஸங்கமித்வா ஏவமாஹங்ஸூதி வுத்தங் உபஸங்கமனகாரணங் த³ஸ்ஸெந்தோ, ‘‘தஸ்ஸ உபாஸகஸ்ஸ அபா²ஸுககாலோ அஹோஸீ’’தி ஆஹ. அவிராதி⁴தந்தி அவிரஜ்ஜ²னகங். யதி³ வா தே த⁴ம்மா நானத்தா², யதி³ வா ஏகத்தா², யங் தத்த² அவிரஜ்ஜ²னகங், தங் தங்யேவ படிபா⁴தூதி யோஜனா. ஜா²னமேவாதி அப்பமாணஜ்ஜா²னமேவ, ‘‘சேதோவிமுத்தீ’’தி பன வுத்தத்தா சித்தேகக்³க³தாயேவ ஏவங் வுச்சதீதி உபாஸகஸ்ஸ அதி⁴ப்பாயோ.
230.Upasaṅkamitvāevamāhaṃsūti vuttaṃ upasaṅkamanakāraṇaṃ dassento, ‘‘tassa upāsakassa aphāsukakālo ahosī’’ti āha. Avirādhitanti avirajjhanakaṃ. Yadi vā te dhammā nānatthā, yadi vā ekatthā, yaṃ tattha avirajjhanakaṃ, taṃ taṃyeva paṭibhātūti yojanā. Jhānamevāti appamāṇajjhānameva, ‘‘cetovimuttī’’ti pana vuttattā cittekaggatāyeva evaṃ vuccatīti upāsakassa adhippāyo.
231. யாவதா மஜ்ஜ²ன்ஹிகே காலே சா²யா ப²ரதி, நிவாதே பண்ணானி பதந்தி, எத்தாவதா ‘‘ருக்க²மூல’’ந்தி வுச்சதீதி ஏவங் வுத்தங் ஏகருக்க²மூலப்பமாணட்டா²னங். கஸிணனிமித்தேன ஒத்த²ரித்வாதி கஸிணாரம்மணங் ஜா²னங் ஸமாபஜ்ஜந்தோ தஸ்மிங் கஸிண…பே॰… விஹரதீதி வுத்தோ. ஆபோ⁴கோ³ நத்தி² ஜா²னக்க²ணே. காமங் ஸமாபத்திக்க²ணே ஆபோ⁴கோ³ நத்தி² ததோ பன புப்³பே³ வா ஸியா ஸோ ஆபோ⁴கோ³, தம்பி ஸந்தா⁴ய மஹக்³க³தந்தி கேசி. இதா³னி தாஸங் சேதோவிமுத்தீனங் ஸதிபி கேனசி விஸேஸேன அபே⁴தே³ விஸயாதி³தோ லப்³ப⁴மானபே⁴த³ங் த³ஸ்ஸேதுங், ‘‘எத்தா²’’திஆதி³ வுத்தங். நிமித்தங் ந வட்³ட⁴தி வட்³டே⁴தப்³ப³ஸ்ஸ நிமித்தஸ்ஸேவ அபா⁴வதோ. பத²வீகஸிணாதீ³னங் விய ஆகாஸபா⁴வனாய உக்³கா⁴டனங் ந ஜாயதி. தானி ஜா²னானீதி ப்³ரஹ்மவிஹாரஜ்ஜா²னானி. சுத்³த³ஸவிதே⁴ன பரித³மனாபா⁴வதோ அபி⁴ஞ்ஞானங் பாத³கானி ந ஹொந்தி. நிமித்துக்³கா⁴டஸ்ஸேவ அபா⁴வதோ அரூபஜ்ஜா²னானங் அனதி⁴ட்டா²னதாய நிரோத⁴ஸ்ஸ பாத³கானி ந ஹொந்தீதி. கம்மவட்டபா⁴வேன கிலேஸவட்டவிபாகவட்டானங் திண்ணங் வட்டானங் பச்சயபா⁴வோ வட்டபாத³கதா. உபபஜ்ஜனவஸேனேவ தங் தங் ப⁴வங் ஓக்கமதி ஏதேஹீதி ப⁴வோக்கமனானி. து³தியனயஸ்ஸ வுத்தவிபரியாயேன அத்தோ² வேதி³தப்³போ³. உக்³கா⁴டனஸ்ஸ லப்³ப⁴னதோ அரூபஜ்ஜா²னோபரி ஸமதிக்கமோ ஹோதீதி அயமேவ விஸேஸோ. ஏவந்தி யதா²வுத்தேன நிமித்தாவட்³ட⁴னநிமித்தவட்³ட⁴னாதி³ப்பகாரேன. நானத்தா²தி நானாஸபா⁴வா. ஏவந்தி அப்பமாணமஹக்³க³தஸத்³த³வசனீயதாய நானாப்³யஞ்ஜனா. காமஞ்செத்த² அப்பமாணஸமாபத்திதோபி நீஹரித்வா வக்க²மானப⁴வூபபத்திகாரணங் த³ஸ்ஸேதுங் ஸக்கா, அட்ட²கதா²யங் பன கஸிணஜா²னதோவ நீஹரித்வா யோஜனா கதாதி ததா² வுத்தங். அத² வா மஹக்³க³தக³ஹணேனெத்த² அப்பமாணாதி வுத்தப்³ரஹ்மவிஹாரானம்பி ஸங்க³ஹோ வேதி³தப்³போ³ தஸ்ஸா ஸமஞ்ஞாய உப⁴யேஸம்பி ஸாதா⁴ரணபா⁴வதோ.
231. Yāvatā majjhanhike kāle chāyā pharati, nivāte paṇṇāni patanti, ettāvatā ‘‘rukkhamūla’’nti vuccatīti evaṃ vuttaṃ ekarukkhamūlappamāṇaṭṭhānaṃ. Kasiṇanimittena ottharitvāti kasiṇārammaṇaṃ jhānaṃ samāpajjanto tasmiṃ kasiṇa…pe… viharatīti vutto. Ābhogo natthi jhānakkhaṇe. Kāmaṃ samāpattikkhaṇe ābhogo natthi tato pana pubbe vā siyā so ābhogo, tampi sandhāya mahaggatanti keci. Idāni tāsaṃ cetovimuttīnaṃ satipi kenaci visesena abhede visayādito labbhamānabhedaṃ dassetuṃ, ‘‘etthā’’tiādi vuttaṃ. Nimittaṃ na vaḍḍhati vaḍḍhetabbassa nimittasseva abhāvato. Pathavīkasiṇādīnaṃ viya ākāsabhāvanāya ugghāṭanaṃ na jāyati. Tāni jhānānīti brahmavihārajjhānāni. Cuddasavidhena paridamanābhāvato abhiññānaṃ pādakāni na honti. Nimittugghāṭasseva abhāvato arūpajjhānānaṃ anadhiṭṭhānatāya nirodhassa pādakāni na hontīti. Kammavaṭṭabhāvena kilesavaṭṭavipākavaṭṭānaṃ tiṇṇaṃ vaṭṭānaṃ paccayabhāvo vaṭṭapādakatā. Upapajjanavaseneva taṃ taṃ bhavaṃ okkamati etehīti bhavokkamanāni. Dutiyanayassa vuttavipariyāyena attho veditabbo. Ugghāṭanassa labbhanato arūpajjhānopari samatikkamo hotīti ayameva viseso. Evanti yathāvuttena nimittāvaḍḍhananimittavaḍḍhanādippakārena. Nānatthāti nānāsabhāvā. Evanti appamāṇamahaggatasaddavacanīyatāya nānābyañjanā. Kāmañcettha appamāṇasamāpattitopi nīharitvā vakkhamānabhavūpapattikāraṇaṃ dassetuṃ sakkā, aṭṭhakathāyaṃ pana kasiṇajhānatova nīharitvā yojanā katāti tathā vuttaṃ. Atha vā mahaggatagahaṇenettha appamāṇāti vuttabrahmavihārānampi saṅgaho veditabbo tassā samaññāya ubhayesampi sādhāraṇabhāvato.
232. ஏவங் வுத்தோதி அஸதிபி ததா²ரூபே ஆபோ⁴கே³ ‘‘பரித்தாபா⁴தி ப²ரித்வா அதி⁴முச்சித்வா விஹரதீ’’தி வுத்தோ. அப்பமாணங் கத்வா கஸிணங் வட்³டெ⁴ந்தஸ்ஸ கஸிணவட்³ட⁴னவஸேன ப³ஹுலீகாரஸம்ப⁴வதோ ஸியா ஜா²னஸ்ஸ ப³லவதரதா, தத³பா⁴வே ச து³ப்³ப³லதா, ஆசிண்ணவஸிதாய பன பச்சனீகத⁴ம்மானங் ஸம்மா அபரிஸோத⁴னே வத்தப்³ப³மேவ நத்தீ²தி பஞ்சஹாகாரேஹி ஜா²னஸ்ஸ அப்பகு³ணதங் த³ஸ்ஸெந்தோ, ‘‘ஸுப்பமத்தே வா’’திஆதி³மாஹ. ஜா²னஸ்ஸ அப்பானுபா⁴வதாய ஏவ தன்னிமித்தா பபா⁴பி அப்பதரா அபரிஸுத்³தா⁴வ ஹோதீதி ஆஹ – ‘‘வண்ணோ…பே॰… ஸங்கிலிட்டோ² சா’’தி. து³தியனயோ வுத்தவிபரியாயேன வேதி³தப்³போ³. தத்தா²பி கஸிணஸ்ஸ பரித்தபா⁴வேன வண்ணஸ்ஸ பரித்ததா, பரித்தாரம்மணாய அனுரூபதாய வா நிமித்தங் பபா⁴மண்ட³லகம்பி பரித்தமேவ ஸியாதி அதி⁴ப்பாயோ. விபுலபரிகம்மந்தி விபுலபா⁴வேன பரிகம்மங். ஸேஸங் ததியசதுத்த²னயேஸு வத்தப்³ப³ங் பட²மது³தியனயேஸு வுத்தஸதி³ஸமேவ.
232.Evaṃvuttoti asatipi tathārūpe ābhoge ‘‘parittābhāti pharitvā adhimuccitvā viharatī’’ti vutto. Appamāṇaṃ katvā kasiṇaṃ vaḍḍhentassa kasiṇavaḍḍhanavasena bahulīkārasambhavato siyā jhānassa balavataratā, tadabhāve ca dubbalatā, āciṇṇavasitāya pana paccanīkadhammānaṃ sammā aparisodhane vattabbameva natthīti pañcahākārehi jhānassa appaguṇataṃ dassento, ‘‘suppamatte vā’’tiādimāha. Jhānassa appānubhāvatāya eva tannimittā pabhāpi appatarā aparisuddhāva hotīti āha – ‘‘vaṇṇo…pe… saṃkiliṭṭho cā’’ti. Dutiyanayo vuttavipariyāyena veditabbo. Tatthāpi kasiṇassa parittabhāvena vaṇṇassa parittatā, parittārammaṇāya anurūpatāya vā nimittaṃ pabhāmaṇḍalakampi parittameva siyāti adhippāyo. Vipulaparikammanti vipulabhāvena parikammaṃ. Sesaṃ tatiyacatutthanayesu vattabbaṃ paṭhamadutiyanayesu vuttasadisameva.
வண்ணனானத்தந்தி யதி³ பீதங் யதி³ லோஹிதங் யதி³ வா ஓதா³தந்தி ஸரீரவண்ணனானத்தங். ஆபா⁴னானத்தந்தி பரித்தவிபுலதாவஸேன பபா⁴ய நானத்தங். அச்சினானத்தந்தி தேஜோதா⁴துஸ்ஸ தீ³கா⁴தி³வஸேன வேமத்ததா. அபி⁴னிவிஸந்தீதி அபி⁴ரதிவஸேன நிவிஸந்தி நிஸீத³ந்தி திட்ட²ந்தி. தேனாஹ ‘‘வஸந்தீ’’தி.
Vaṇṇanānattanti yadi pītaṃ yadi lohitaṃ yadi vā odātanti sarīravaṇṇanānattaṃ. Ābhānānattanti parittavipulatāvasena pabhāya nānattaṃ. Accinānattanti tejodhātussa dīghādivasena vemattatā. Abhinivisantīti abhirativasena nivisanti nisīdanti tiṭṭhanti. Tenāha ‘‘vasantī’’ti.
234. ஆப⁴ந்தி தி³ப்³ப³ந்தீதி ஆபா⁴தி ஆஹ ‘‘ஆபா⁴ஸம்பன்னா’’தி. தத³ங்கே³னாதி வா தஸ்ஸா பரித்ததாய அப்பமாணதாய ச ஆபா⁴காரணங், தங் பன அத்த²தோ ப⁴வூபபத்திகாரணமேவாதி ஆஹ – ‘‘தஸ்ஸா ப⁴வூபபத்தியா அங்கே³னா’’தி. காயாலஸியபா⁴வோ தந்தீ³ஆதீ³னங் ஹேதுபூ⁴தா காயஸ்ஸ வித்தா²யிததா.
234. Ābhanti dibbantīti ābhāti āha ‘‘ābhāsampannā’’ti. Tadaṅgenāti vā tassā parittatāya appamāṇatāya ca ābhākāraṇaṃ, taṃ pana atthato bhavūpapattikāraṇamevāti āha – ‘‘tassā bhavūpapattiyā aṅgenā’’ti. Kāyālasiyabhāvo tandīādīnaṃ hetubhūtā kāyassa vitthāyitatā.
235. பாரமியோதி மஹாஸாவகஸங்வத்தனிகா ஸாவகபாரமியோ பூரெந்தோ. ப்³ரஹ்மலோகேதி ப்³ரஹ்மத்தபா⁴வே, ப்³ரஹ்மலோகே வா உப்பத்திங் படிலபி⁴, வுத்தம்பி சேதங் தே²ரகா³தா²ஸு. அவோகிண்ணந்தி அஞ்ஞேஹி அஸம்மிஸ்ஸந்தி அத்தோ². புப்³பே³ ஸஞ்சரிதந்தி அதீதப⁴வேஸு ஜாதிவஸேன ஸஞ்சரணங் மம, ஸஞ்சரிதந்தி தங் மமஸ்ஸாதி அத்தோ². ஸேஸங் ஸுவிஞ்ஞெய்யமேவ.
235.Pāramiyoti mahāsāvakasaṃvattanikā sāvakapāramiyo pūrento. Brahmaloketi brahmattabhāve, brahmaloke vā uppattiṃ paṭilabhi, vuttampi cetaṃ theragāthāsu. Avokiṇṇanti aññehi asammissanti attho. Pubbe sañcaritanti atītabhavesu jātivasena sañcaraṇaṃ mama, sañcaritanti taṃ mamassāti attho. Sesaṃ suviññeyyameva.
அனுருத்³த⁴ஸுத்தவண்ணனாய லீனத்த²ப்பகாஸனா ஸமத்தா.
Anuruddhasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. அனுருத்³த⁴ஸுத்தங் • 7. Anuruddhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 7. அனுருத்³த⁴ஸுத்தவண்ணனா • 7. Anuruddhasuttavaṇṇanā
