| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৭. অনুরুদ্ধসুত্তৰণ্ণনা
7. Anuruddhasuttavaṇṇanā
২৩০. এৰং মে সুতন্তি অনুরুদ্ধসুত্তং। তত্থ এৰমাহংসূতি তস্স উপাসকস্স অফাসুককালো অহোসি, তদা উপসঙ্কমিত্ৰা এৰমাহংসু। অপণ্ণকন্তি অৰিরাধিতং। একত্থাতি অপ্পমাণাতি ৰা মহগ্গতাতি ৰা ঝানমেৰ চিত্তেকগ্গতাযেৰ এৰং ৰুচ্চতীতি ইমং সন্ধায এৰমাহ।
230.Evaṃme sutanti anuruddhasuttaṃ. Tattha evamāhaṃsūti tassa upāsakassa aphāsukakālo ahosi, tadā upasaṅkamitvā evamāhaṃsu. Apaṇṇakanti avirādhitaṃ. Ekatthāti appamāṇāti vā mahaggatāti vā jhānameva cittekaggatāyeva evaṃ vuccatīti imaṃ sandhāya evamāha.
২৩১. যাৰতা একং রুক্খমূলং মহগ্গতন্তি ফরিত্ৰা অধিমুচ্চিত্ৰা ৰিহরতীতি একরুক্খমূলপমাণট্ঠানং কসিণনিমিত্তেন ওত্থরিত্ৰা তস্মিং কসিণনিমিত্তে মহগ্গতজ্ঝানং ফরিত্ৰা অধিমুচ্চিত্ৰা ৰিহরতি। মহগ্গতন্তি পনস্স আভোগো নত্থি, কেৰলং মহগ্গতজ্ঝানপৰত্তিৰসেন পনেতং ৰুত্তং। এস নযো সব্বত্থ। ইমিনা খো এতং গহপতি পরিযাযেনাতি ইমিনা কারণেন। এত্থ হি অপ্পমাণাতি ৰুত্তানং ব্রহ্মৰিহারানং নিমিত্তং ন ৰড্ঢতি, উগ্ঘাটনং ন জাযতি, তানি ঝানানি অভিঞ্ঞানং ৰা নিরোধস্স ৰা পাদকানি ন হোন্তি, ৰিপস্সনাপাদকানি পন ৰট্টপাদকানি ভৰোক্কমনানি চ হোন্তি। ‘‘মহগ্গতা’’তি ৰুত্তানং পন কসিণজ্ঝানানং নিমিত্তং ৰড্ঢতি, উগ্ঘাটনং জাযতি, সমতিক্কমা হোন্তি, অভিঞ্ঞাপাদকানি নিরোধপাদকানি ৰট্টপাদকানি ভৰোক্কমনানি চ হোন্তি। এৰমিমে ধম্মা নানত্থা, অপ্পমাণা মহগ্গতাতি এৰং নানাব্যঞ্জনা চ।
231.Yāvatāekaṃ rukkhamūlaṃ mahaggatanti pharitvā adhimuccitvā viharatīti ekarukkhamūlapamāṇaṭṭhānaṃ kasiṇanimittena ottharitvā tasmiṃ kasiṇanimitte mahaggatajjhānaṃ pharitvā adhimuccitvā viharati. Mahaggatanti panassa ābhogo natthi, kevalaṃ mahaggatajjhānapavattivasena panetaṃ vuttaṃ. Esa nayo sabbattha. Iminā kho etaṃ gahapati pariyāyenāti iminā kāraṇena. Ettha hi appamāṇāti vuttānaṃ brahmavihārānaṃ nimittaṃ na vaḍḍhati, ugghāṭanaṃ na jāyati, tāni jhānāni abhiññānaṃ vā nirodhassa vā pādakāni na honti, vipassanāpādakāni pana vaṭṭapādakāni bhavokkamanāni ca honti. ‘‘Mahaggatā’’ti vuttānaṃ pana kasiṇajjhānānaṃ nimittaṃ vaḍḍhati, ugghāṭanaṃ jāyati, samatikkamā honti, abhiññāpādakāni nirodhapādakāni vaṭṭapādakāni bhavokkamanāni ca honti. Evamime dhammā nānatthā, appamāṇā mahaggatāti evaṃ nānābyañjanā ca.
২৩২. ইদানি মহগ্গতসমাপত্তিতো নীহরিত্ৰা ভৰূপপত্তিকারণং দস্সেন্তো চতস্সো খো ইমাতিআদিমাহ। পরিত্তাভাতি ফরিত্ৰা জানন্তস্স অযমাভোগো অত্থি, পরিত্তাভেসু পন দেৰেসু নিব্বত্তিকারণং ঝানং ভাৰেন্তো এৰং ৰুত্তো। এস নযো সব্বত্থ। পরিত্তাভা সিযা সংকিলিট্ঠাভা হোন্তি সিযা পরিসুদ্ধাভা, অপ্পমাণাভা সিযা সংকিলিট্ঠাভা হোন্তি সিযা পরিসুদ্ধাভা। কথং? সুপ্পমত্তে ৰা সরাৰমত্তে ৰা কসিণপরিকম্মং কত্ৰা সমাপত্তিং নিব্বত্তেত্ৰা পঞ্চহাকারেহি আচিণ্ণৰসিভাৰো পচ্চনীকধম্মানং সুট্ঠু অপরিসোধিতত্তা দুব্বলমেৰ সমাপত্তিং ৰল়ঞ্জিত্ৰা অপ্পগুণজ্ঝানে ঠিতো কালং কত্ৰা পরিত্তাভেসু নিব্বত্ততি, ৰণ্ণো পনস্স পরিত্তো চেৰ হোতি সংকিলিট্ঠো চ। পঞ্চহি পনাকারেহি আচিণ্ণৰসিভাৰো পচ্চনীকধম্মানং সুট্ঠু পরিসোধিতত্তা সুৰিসুদ্ধং সমাপত্তিং ৰল়ঞ্জিত্ৰা পগুণজ্ঝানে ঠিতো কালং কত্ৰা পরিত্তাভেসু নিব্বত্ততি, ৰণ্ণো পনস্স পরিত্তো চেৰ হোতি পরিসুদ্ধো চ। এৰং পরিত্তাভা সিযা সংকিলিট্ঠাভা হোন্তি সিযা পরিসুদ্ধাভা। কসিণে পন ৰিপুলপরিকম্মং কত্ৰা সমাপত্তিং নিব্বত্তেত্ৰা পঞ্চহাকারেহি আচিণ্ণৰসিভাৰোতি সব্বং পুরিমসদিসমেৰ ৰেদিতব্বং। এৰং অপ্পমাণাভা সিযা সংকিলিট্ঠাভা হোন্তি সিযা পরিসুদ্ধাভাতি।
232. Idāni mahaggatasamāpattito nīharitvā bhavūpapattikāraṇaṃ dassento catasso kho imātiādimāha. Parittābhāti pharitvā jānantassa ayamābhogo atthi, parittābhesu pana devesu nibbattikāraṇaṃ jhānaṃ bhāvento evaṃ vutto. Esa nayo sabbattha. Parittābhā siyā saṃkiliṭṭhābhā honti siyā parisuddhābhā, appamāṇābhā siyā saṃkiliṭṭhābhā honti siyā parisuddhābhā. Kathaṃ? Suppamatte vā sarāvamatte vā kasiṇaparikammaṃ katvā samāpattiṃ nibbattetvā pañcahākārehi āciṇṇavasibhāvo paccanīkadhammānaṃ suṭṭhu aparisodhitattā dubbalameva samāpattiṃ vaḷañjitvā appaguṇajjhāne ṭhito kālaṃ katvā parittābhesu nibbattati, vaṇṇo panassa paritto ceva hoti saṃkiliṭṭho ca. Pañcahi panākārehi āciṇṇavasibhāvo paccanīkadhammānaṃ suṭṭhu parisodhitattā suvisuddhaṃ samāpattiṃ vaḷañjitvā paguṇajjhāne ṭhito kālaṃ katvā parittābhesu nibbattati, vaṇṇo panassa paritto ceva hoti parisuddho ca. Evaṃ parittābhā siyā saṃkiliṭṭhābhā honti siyā parisuddhābhā. Kasiṇe pana vipulaparikammaṃ katvā samāpattiṃ nibbattetvā pañcahākārehi āciṇṇavasibhāvoti sabbaṃ purimasadisameva veditabbaṃ. Evaṃ appamāṇābhā siyā saṃkiliṭṭhābhā honti siyā parisuddhābhāti.
ৰণ্ণনানত্তন্তি সরীরৰণ্ণস্স নানত্তং। নো চ আভানানত্তন্তি আলোকে নানত্তং ন পঞ্ঞাযতি। অচ্চিনানত্তন্তি দীঘরস্সঅণুথূলৰসেন অচ্চিযা নানত্তং।
Vaṇṇanānattanti sarīravaṇṇassa nānattaṃ. No ca ābhānānattanti āloke nānattaṃ na paññāyati. Accinānattanti dīgharassaaṇuthūlavasena acciyā nānattaṃ.
যত্থ যত্থাতি উয্যানৰিমানকপ্পরুক্খনদীতীরপোক্খরণীতীরেসু যত্থ যত্থ। অভিনিৰিসন্তীতি ৰসন্তি। অভিরমন্তীতি রমন্তি ন উক্কণ্ঠন্তি। কাজেনাতি যাগুভত্ততেলফাণিতমচ্ছমংসকাজেসু যেন কেনচি কাজেন। ‘‘কাচেনাতি’’পি পাঠো, অযমেৰ অত্থো। পিটকেনাতি পচ্ছিযা। তত্থ তত্থেৰাতি সপ্পিমধুফাণিতাদীনং সুলভট্ঠানতো লোণপূতিমচ্ছাদীনং উস্সন্নট্ঠানং নীতা ‘‘পুব্বে অম্হাকং ৰসনট্ঠানং ফাসুকং, তত্থ সুখং ৰসিম্হা, ইধ লোণং ৰা নো বাধতি পূতিমচ্ছগন্ধো ৰা সীসরোগং উপ্পাদেতী’’তি এৰং চিত্তং অনুপ্পাদেত্ৰা তত্থ তত্থেৰ রমন্তি।
Yattha yatthāti uyyānavimānakapparukkhanadītīrapokkharaṇītīresu yattha yattha. Abhinivisantīti vasanti. Abhiramantīti ramanti na ukkaṇṭhanti. Kājenāti yāgubhattatelaphāṇitamacchamaṃsakājesu yena kenaci kājena. ‘‘Kācenāti’’pi pāṭho, ayameva attho. Piṭakenāti pacchiyā. Tattha tatthevāti sappimadhuphāṇitādīnaṃ sulabhaṭṭhānato loṇapūtimacchādīnaṃ ussannaṭṭhānaṃ nītā ‘‘pubbe amhākaṃ vasanaṭṭhānaṃ phāsukaṃ, tattha sukhaṃ vasimhā, idha loṇaṃ vā no bādhati pūtimacchagandho vā sīsarogaṃ uppādetī’’ti evaṃ cittaṃ anuppādetvā tattha tattheva ramanti.
২৩৪. আভাতি আভাসম্পন্না। তদঙ্গেনাতি তস্সা ভৰূপপত্তিযা অঙ্গেন, ভৰূপপত্তিকারণেনাতি অত্থো। ইদানি তং কারণং পুচ্ছন্তো কো নু খো, ভন্তেতিআদিমাহ।
234.Ābhāti ābhāsampannā. Tadaṅgenāti tassā bhavūpapattiyā aṅgena, bhavūpapattikāraṇenāti attho. Idāni taṃ kāraṇaṃ pucchanto ko nu kho, bhantetiādimāha.
কাযদুট্ঠুল্লন্তি কাযালসিযভাৰো। ঝাযতোতি জলতো।
Kāyaduṭṭhullanti kāyālasiyabhāvo. Jhāyatoti jalato.
২৩৫. দীঘরত্তং খো মেতি থেরো কির পারমিযো পূরেন্তো ইসিপব্বজ্জং পব্বজিত্ৰা সমাপত্তিং নিব্বত্তেত্ৰা নিরন্তরং তীণি অত্তভাৰসতানি ব্রহ্মলোকে পটিলভি, তং সন্ধাযেতং আহ। ৰুত্তম্পি চেতং –
235.Dīgharattaṃ kho meti thero kira pāramiyo pūrento isipabbajjaṃ pabbajitvā samāpattiṃ nibbattetvā nirantaraṃ tīṇi attabhāvasatāni brahmaloke paṭilabhi, taṃ sandhāyetaṃ āha. Vuttampi cetaṃ –
‘‘অৰোকিণ্ণং তীণি সতং, যং পব্বজিং ইসিপব্বজ্জং।
‘‘Avokiṇṇaṃ tīṇi sataṃ, yaṃ pabbajiṃ isipabbajjaṃ;
অসঙ্খতং গৰেসন্তো, পুব্বে সঞ্চরিতং মম’’ন্তি॥
Asaṅkhataṃ gavesanto, pubbe sañcaritaṃ mama’’nti.
সেসং সব্বত্থ উত্তানমেৰাতি।
Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
অনুরুদ্ধসুত্তৰণ্ণনা নিট্ঠিতা।
Anuruddhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. অনুরুদ্ধসুত্তং • 7. Anuruddhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. অনুরুদ্ধসুত্তৰণ্ণনা • 7. Anuruddhasuttavaṇṇanā
