Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. အနုရုဒ္ဓသုတ္တဝဏ္ဏနာ
6. Anuruddhasuttavaṇṇanā
၂၂၆. အနန္တရေ အတ္တဘာဝေတိ အတီတာနန္တရေ ဒေဝတ္တဘာဝေ။ ထေရော ဟိ တာဝတိံသဒေဝလောကာ စဝိတ္ဝာ ဣဓူပပန္နော။ အဂ္ဂမဟေသီတိ ကာစိ ပရိစာရိကာ ဒေဝဓီတာ စိတ္တပဏိဓာနမတ္တေန ဣဒာနိပိ ဒေဝကာယေ ဘဝိသ္သတိ ဥပစိတကုသလဓမ္မတ္တာတိ မညမာနာ တသ္မိံ ဝတ္တမာနံ ဝိယ ကထေန္တီ ‘‘သောဘသီ’’တိ အာဟ။ ဧဝံ အတီတမ္ပိသ္သ ဒိဗ္ဗသောတံ ပစ္စုပ္ပန္နံ ဝိယ မညေယ္ယ နာတိစိရကာလတ္တာတိ ဒသ္သေန္တော ‘‘ပုဗ္ဗေပိ သောဘသီ’’တိ အာဟ။ သုဂတိနိရယာဒိဒုဂ္ဂတိယာ ဝသေန ဒုဂ္ဂတာ ဧတရဟီတိ အဓိပ္ပာယော။ ပဋိပတ္တိဒုဂ္ဂတိယာ ကာမေသု သမ္မုစ္ဆိတဘာဝတော။
226.Anantareattabhāveti atītānantare devattabhāve. Thero hi tāvatiṃsadevalokā cavitvā idhūpapanno. Aggamahesīti kāci paricārikā devadhītā cittapaṇidhānamattena idānipi devakāye bhavissati upacitakusaladhammattāti maññamānā tasmiṃ vattamānaṃ viya kathentī ‘‘sobhasī’’ti āha. Evaṃ atītampissa dibbasotaṃ paccuppannaṃ viya maññeyya nāticirakālattāti dassento ‘‘pubbepi sobhasī’’ti āha. Sugatinirayādiduggatiyā vasena duggatā etarahīti adhippāyo. Paṭipattiduggatiyā kāmesu sammucchitabhāvato.
ပတိဋ္ဌဟန္တောတိ နိဝိသန္တော။ အဋ္ဌဟိ ကာရဏေဟီတိ စိရကာလပရိဘာဝနာယ ဝိရုဠ္ဟမူလေဟိ အယောနိသောမနသိကာရာဒိပစ္စယမူလကေဟိ ဝုစ္စမာနေဟိ အဋ္ဌဟိ ကာရဏေဟိ။ ရတ္တော ရာဂဝသေနာတိ သဘာဝတော သင္ကပ္ပတော စ ယထာသမီဟိတေ ဣဋ္ဌာကာရေ သက္ကာယေ သဉ္ဇာတရာဂဝသာ ရတ္တော ဂိဒ္ဓော ဂဓိတော။ ပတိဋ္ဌာတီတိ ဩရုယ္ဟ တိဋ္ဌတိ။ ဒုဋ္ဌော ဒောသဝသေနာတိ သဘာဝတော သင္ကပ္ပတော စ ယထာသမီဟိတေ အနိဋ္ဌာကာရေ သက္ကာယေ သဉ္ဇာတဒောသဝသေန ဒုဋ္ဌော ရုပိတစိတ္တော။ မူဠ္ဟော မောဟဝသေနာတိ အသမပေက္ခနေန မူဠ္ဟော မုယ္ဟနဝသေန။ ဝိနိဗဒ္ဓောတိ အဟံကာရေန ဝိသေသတော နိဗန္ဓနတော မာနဝတ္ထုသ္မိံ ဗန္ဓိတော။ မာနဝသေနာတိ တေန တေန မညနာကာရေန။ ပရာမဋ္ဌောတိ ဓမ္မသဘာဝံ နိစ္စာဒိဝသေန ပရတော အာမဋ္ဌော။ ဒိဋ္ဌိဝသေနာတိ မိစ္ဆာဒသ္သနဝသေန။ ထာမဂတောတိ ရာဂာဒိကိလေသဝသေန ထာမံ ထိရဘာဝံ ဥပဂတော။ အနုသယဝသေနာတိ မဂ္ဂေန အပ္ပဟီနတာယ အနု အနု သန္တာနေ သယနဝသေန။ အပ္ပဟီနဋ္ဌော ဟိ တေသံ အနုသယဋ္ဌော။ အနိဋ္ဌင္ဂတောတိ သံသယိတော။ ဝိက္ခေပဂတောတိ ဝိက္ခိတ္တဘာဝံ ဥပဂတော။ ဥဒ္ဓစ္စဝသေနာတိ စိတ္တသ္သ ဥဒ္ဓတဘာဝဝသေန။ တာပီတိ တာပိ ဒေဝကညာယော။ ဧဝံ ပတိဋ္ဌိတာဝာတိ ယထာဝုတ္တနယေန ရတ္တဘာဝာဒိနာ သက္ကာယသ္မိံ ပတိဋ္ဌိတာ ဧဝ။ နရဒေဝာနန္တိ ပုရိသဘူတဒေဝာနံ။
Patiṭṭhahantoti nivisanto. Aṭṭhahi kāraṇehīti cirakālaparibhāvanāya viruḷhamūlehi ayonisomanasikārādipaccayamūlakehi vuccamānehi aṭṭhahi kāraṇehi. Ratto rāgavasenāti sabhāvato saṅkappato ca yathāsamīhite iṭṭhākāre sakkāye sañjātarāgavasā ratto giddho gadhito. Patiṭṭhātīti oruyha tiṭṭhati. Duṭṭho dosavasenāti sabhāvato saṅkappato ca yathāsamīhite aniṭṭhākāre sakkāye sañjātadosavasena duṭṭho rupitacitto. Mūḷho mohavasenāti asamapekkhanena mūḷho muyhanavasena. Vinibaddhoti ahaṃkārena visesato nibandhanato mānavatthusmiṃ bandhito. Mānavasenāti tena tena maññanākārena. Parāmaṭṭhoti dhammasabhāvaṃ niccādivasena parato āmaṭṭho. Diṭṭhivasenāti micchādassanavasena. Thāmagatoti rāgādikilesavasena thāmaṃ thirabhāvaṃ upagato. Anusayavasenāti maggena appahīnatāya anu anu santāne sayanavasena. Appahīnaṭṭho hi tesaṃ anusayaṭṭho. Aniṭṭhaṅgatoti saṃsayito. Vikkhepagatoti vikkhittabhāvaṃ upagato. Uddhaccavasenāti cittassa uddhatabhāvavasena. Tāpīti tāpi devakaññāyo. Evaṃ patiṭṭhitāvāti yathāvuttanayena rattabhāvādinā sakkāyasmiṃ patiṭṭhitā eva. Naradevānanti purisabhūtadevānaṃ.
ပဋိဂန္တုန္တိ အပေက္ခာဝသေန တတော အပဂန္တုံ အပေက္ခံ ဝိသ္သဇ္ဇေတုံ။ ဒုသ္သန္တန္တိ ဒသန္တံ, ‘‘ဝတ္ထ’’န္တိ ကေစိ။ သူစိံ ယောဇေတ္ဝာတိ သိဗ္ဗနသုတ္တေန သူစိံ ယောဇေတ္ဝာ ပာသေ စ ပဝေသေတ္ဝာ။ မနာပကာယေ ဒေဝနိကာယေ ဇာတာ မနာပကာယိကာ။ တေသံ ပဘာဝံ ဒသ္သေတုံ ‘‘မနသာ’’တိအာဒိ ဝုတ္တံ။ သမဇ္ဇန္တိ သံဟိတံ။ ဂမနဘာဝန္တိ ဂမနဇ္ဈာသယံ။ ဝိက္ခီဏောတိ ဝိစ္ဆိန္ဒနဝသေန ခီဏော။ ဒေဝတာနံ ဥတ္တရိမနုသ္သဓမ္မာရောစနေ ဒောသော နတ္ထီတိ တာသံ ပုန အနာဂမနတ္ထံ အရဟတ္တံ ဗ္ယာကာသိ။
Paṭigantunti apekkhāvasena tato apagantuṃ apekkhaṃ vissajjetuṃ. Dussantanti dasantaṃ, ‘‘vattha’’nti keci. Sūciṃ yojetvāti sibbanasuttena sūciṃ yojetvā pāse ca pavesetvā. Manāpakāye devanikāye jātā manāpakāyikā. Tesaṃ pabhāvaṃ dassetuṃ ‘‘manasā’’tiādi vuttaṃ. Samajjanti saṃhitaṃ. Gamanabhāvanti gamanajjhāsayaṃ. Vikkhīṇoti vicchindanavasena khīṇo. Devatānaṃ uttarimanussadhammārocane doso natthīti tāsaṃ puna anāgamanatthaṃ arahattaṃ byākāsi.
အနုရုဒ္ဓသုတ္တဝဏ္ဏနာ နိဋ္ဌိတာ။
Anuruddhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. အနုရုဒ္ဓသုတ္တံ • 6. Anuruddhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. အနုရုဒ္ဓသုတ္တဝဏ္ဏနာ • 6. Anuruddhasuttavaṇṇanā