| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3-4. ануруд̣̇д̇хад̇т̇зраабад̣̇аанаван̣н̣анаа
3-4. Anuruddhattheraapadānavaṇṇanā
сумзд̇хам̣ бхаг̇аванд̇ааханд̇иаад̣̇игам̣ ааяасмад̇о ануруд̣̇д̇хад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о бад̣̇умуд̇д̇арасса бхаг̇авад̇о гаалз вибхавасамбаннз гудумб̣игагулз ниб̣б̣ад̇д̇и. ваяаббад̇д̇о згад̣̇ивасам̣ вихаарам̣ г̇анд̇ваа сад̇т̇у санд̇игз д̇хаммам̣ сун̣анд̇о сад̇т̇аараа згам̣ бхигкум̣ д̣̇иб̣б̣ажагкугаанам̣ аг̇г̇адтаанз табзнд̇ам̣ д̣̇исваа саяамби д̇ам̣ д̣̇аанам̣ бад̇т̇зд̇ваа сад̇асахассабхигкубариваарасса бхаг̇авад̇о сад̇д̇аахам̣ махаад̣̇аанам̣ бавад̇д̇зд̇ваа сад̇д̇амз д̣̇ивасз бхаг̇авад̇о бхигкусан̇гхасса жа уд̇д̇амаани вад̇т̇аани д̣̇ад̇ваа бан̣ид̇хаанам̣ агааси. сад̇т̇аабисса ананд̇арааязна самиж̇жханабхаавам̣ д̣̇исваа ‘‘анааг̇ад̇з г̇од̇амасса саммаасамб̣уд̣̇д̇хасса саасанз д̣̇иб̣б̣ажагкугаанам̣ аг̇г̇о бхависсад̇ий’’д̇и б̣яаагааси. соби д̇ад̇т̇а бун̃н̃аани гаронд̇о сад̇т̇ари бариниб̣б̣уд̇з сад̇д̇аяож̇анигз ганагат̇уубз б̣ахугам̣сабаад̇ияо д̣̇ийбаругкзхи д̣̇ийбагабаллигаахи жа ‘‘д̣̇иб̣б̣ажагкун̃аан̣асса убаниссаяо ход̇уу’’д̇и ул̣аарам̣ д̣̇ийбабууж̇ам̣ агааси. звам̣ яааваж̇ийвам̣ бун̃н̃аани гад̇ваа д̣̇звамануссзсу сам̣саранд̇о гассабасса бхаг̇авад̇о гаалз б̣аараан̣асияам̣ гудумб̣игаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о сад̇т̇ари бариниб̣б̣уд̇з нидтид̇з яож̇анигз ганагат̇уубз б̣ахугам̣сабаад̇ияо саббиман̣д̣асса буурзд̇ваа маж̇жхз жа згзгам̣ г̇ул̣абин̣д̣ам̣ табзд̇ваа мукаваддияаа мукаваддим̣ пусаабзнд̇о жзд̇ияам̣ баригкибаабзси. ад̇д̇анаа г̇ахид̇агам̣сабаад̇им̣ саббиман̣д̣асса буурзд̇ваа сахассаваддияо ж̇аалаабзд̇ваа сийсз табзд̇ваа саб̣б̣арад̇д̇им̣ жзд̇ияам̣ анубарияааяи.
Sumedhaṃbhagavantāhantiādikaṃ āyasmato anuruddhattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle vibhavasampanne kuṭumbikakule nibbatti. Vayappatto ekadivasaṃ vihāraṃ gantvā satthu santike dhammaṃ suṇanto satthārā ekaṃ bhikkhuṃ dibbacakkhukānaṃ aggaṭṭhāne ṭhapentaṃ disvā sayampi taṃ dānaṃ patthetvā satasahassabhikkhuparivārassa bhagavato sattāhaṃ mahādānaṃ pavattetvā sattame divase bhagavato bhikkhusaṅghassa ca uttamāni vatthāni datvā paṇidhānaṃ akāsi. Satthāpissa anantarāyena samijjhanabhāvaṃ disvā ‘‘anāgate gotamassa sammāsambuddhassa sāsane dibbacakkhukānaṃ aggo bhavissatī’’ti byākāsi. Sopi tattha puññāni karonto satthari parinibbute sattayojanike kanakathūpe bahukaṃsapātiyo dīparukkhehi dīpakapallikāhi ca ‘‘dibbacakkhuñāṇassa upanissayo hotū’’ti uḷāraṃ dīpapūjaṃ akāsi. Evaṃ yāvajīvaṃ puññāni katvā devamanussesu saṃsaranto kassapassa bhagavato kāle bārāṇasiyaṃ kuṭumbikagehe nibbattitvā viññutaṃ patto satthari parinibbute niṭṭhite yojanike kanakathūpe bahukaṃsapātiyo sappimaṇḍassa pūretvā majjhe ca ekekaṃ guḷapiṇḍaṃ ṭhapetvā mukhavaṭṭiyā mukhavaṭṭiṃ phusāpento cetiyaṃ parikkhipāpesi. Attanā gahitakaṃsapātiṃ sappimaṇḍassa pūretvā sahassavaṭṭiyo jālāpetvā sīse ṭhapetvā sabbarattiṃ cetiyaṃ anupariyāyi.
звам̣ д̇асмимби ад̇д̇абхаавз яааваж̇ийвам̣ гусалам̣ гад̇ваа д̣̇звалогз ниб̣б̣ад̇д̇ид̇ваа д̇ад̇т̇а яаавад̇ааяугам̣ тад̇ваа д̇ад̇о жуд̇о ануббаннз б̣уд̣̇д̇хз б̣аараан̣асияам̣язва д̣̇уг̇г̇ад̇агулз ниб̣б̣ад̇д̇и, ‘‘аннабхааро’’д̇исса наамам̣ ахоси. со суманасздтисса наама г̇зхз гаммам̣ гаронд̇о ж̇ийвад̇и. згад̣̇ивасам̣ со убаридтам̣ наама бажжзгаб̣уд̣̇д̇хам̣ нирод̇хасамаабад̇д̇ид̇о вудтааяа г̇анд̇хамаад̣̇анабаб̣б̣ад̇ад̇о аагаасзнааг̇анд̇ваа б̣аараан̣асийнаг̇арад̣̇ваарз од̇арид̇ваа жийварам̣ баарубид̇ваа наг̇арз бин̣д̣ааяа жаранд̇ам̣ д̣̇исваа басаннамаанасо бад̇д̇ам̣ г̇ахзд̇ваа ад̇д̇ано ад̇т̇ааяа табид̇ам̣ бхааг̇абхад̇д̇ам̣ бад̇д̇з багкибид̇ваа бажжзгаб̣уд̣̇д̇хасса д̣̇аад̇угаамо аарабхи. бхарияаабисса ад̇д̇ано бхааг̇абхад̇д̇ан̃жа д̇ад̇т̇зва багкиби. со д̇ам̣ нзд̇ваа бажжзгаб̣уд̣̇д̇хасса хад̇т̇з табзси. бажжзгаб̣уд̣̇д̇хо д̇ам̣ г̇ахзд̇ваа анумод̣̇анам̣ гад̇ваа баггаами. д̇ам̣ д̣̇ивасам̣ суманасздтисса чад̇д̇з ад̇хивад̇т̇аа д̣̇звад̇аа – ‘‘ахо д̣̇аанам̣, барамад̣̇аанам̣, убаридтз суббад̇идтид̇а’’нд̇и махаасад̣̇д̣̇зна анумод̣̇и. д̇ам̣ суд̇ваа суманасздти – ‘‘звам̣ д̣̇звад̇ааяа анумод̣̇ид̇ам̣ ид̣̇амзва уд̇д̇амад̣̇аана’’нд̇и жинд̇зд̇ваа д̇ад̇т̇а бад̇д̇им̣ яаажи. аннабхааро бана д̇асса бад̇д̇им̣ ад̣̇ааси. д̇зна басаннажид̇д̇о суманасздти д̇асса сахассам̣ д̣̇ад̇ваа ‘‘ид̇о бадтааяа д̇уяхам̣ сахад̇т̇зна гаммагаран̣агижжам̣ над̇т̇и, бад̇ируубам̣ г̇зхам̣ гад̇ваа нижжам̣ васаахий’’д̇и ааха.
Evaṃ tasmimpi attabhāve yāvajīvaṃ kusalaṃ katvā devaloke nibbattitvā tattha yāvatāyukaṃ ṭhatvā tato cuto anuppanne buddhe bārāṇasiyaṃyeva duggatakule nibbatti, ‘‘annabhāro’’tissa nāmaṃ ahosi. So sumanaseṭṭhissa nāma gehe kammaṃ karonto jīvati. Ekadivasaṃ so upariṭṭhaṃ nāma paccekabuddhaṃ nirodhasamāpattito vuṭṭhāya gandhamādanapabbatato ākāsenāgantvā bārāṇasīnagaradvāre otaritvā cīvaraṃ pārupitvā nagare piṇḍāya carantaṃ disvā pasannamānaso pattaṃ gahetvā attano atthāya ṭhapitaṃ bhāgabhattaṃ patte pakkhipitvā paccekabuddhassa dātukāmo ārabhi. Bhariyāpissa attano bhāgabhattañca tattheva pakkhipi. So taṃ netvā paccekabuddhassa hatthe ṭhapesi. Paccekabuddho taṃ gahetvā anumodanaṃ katvā pakkāmi. Taṃ divasaṃ sumanaseṭṭhissa chatte adhivatthā devatā – ‘‘aho dānaṃ, paramadānaṃ, upariṭṭhe suppatiṭṭhita’’nti mahāsaddena anumodi. Taṃ sutvā sumanaseṭṭhi – ‘‘evaṃ devatāya anumoditaṃ idameva uttamadāna’’nti cintetvā tattha pattiṃ yāci. Annabhāro pana tassa pattiṃ adāsi. Tena pasannacitto sumanaseṭṭhi tassa sahassaṃ datvā ‘‘ito paṭṭhāya tuyhaṃ sahatthena kammakaraṇakiccaṃ natthi, patirūpaṃ gehaṃ katvā niccaṃ vasāhī’’ti āha.
яасмаа нирод̇хасамаабад̇д̇ид̇о вудтид̇асса бажжзгаб̣уд̣̇д̇хасса д̣̇иннабин̣д̣абаад̇о д̇ам̣ д̣̇ивасамзва ул̣ааравибааго ход̇и, д̇асмаа суманасздти ран̃н̃о санд̇игам̣ г̇ажчанд̇о д̇ам̣ г̇ахзд̇ваа аг̇амааси. рааж̇аа бана д̇ам̣ аад̣̇аравасзна ологзси. сздти – ‘‘махаарааж̇а, аяам̣ ологзд̇аб̣б̣аяуд̇д̇оязваа’’д̇и вад̇ваа д̇ад̣̇аа д̇зна гад̇агаммам̣ ад̇д̇анаабисса сахассад̣̇иннабхааван̃жа гат̇зси. д̇ам̣ суд̇ваа рааж̇аа д̇асса д̇уссид̇ваа сахассам̣ д̣̇ад̇ваа ‘‘асугасмим̣ таанз г̇зхам̣ гад̇ваа васаахий’’д̇и г̇зхадтаанамасса аан̣аабзси. д̇асса д̇ам̣ таанам̣ сод̇хаабзнд̇асса маханд̇аа маханд̇аа нид̇хигумбхияо удтахим̣су. со д̇аа д̣̇исваа ран̃н̃о аарожзси. рааж̇аа саб̣б̣ам̣ д̇ханам̣ уд̣̇д̇хараабзд̇ваа раасигад̇ам̣ д̣̇исваа – ‘‘зд̇д̇агам̣ д̇ханам̣ имасмим̣ наг̇арз гасса г̇зхз ад̇т̇ий’’д̇и бужчи. ‘‘на гассажи, д̣̇зваа’’д̇и. ‘‘д̇зна хи аяам̣ аннабхааро имасмим̣ наг̇арз махаад̇ханасздти наама ход̇уу’’д̇и д̇ам̣ д̣̇ивасамзва д̇асса сздтичад̇д̇ам̣ уссаабзси.
Yasmā nirodhasamāpattito vuṭṭhitassa paccekabuddhassa dinnapiṇḍapāto taṃ divasameva uḷāravipāko hoti, tasmā sumanaseṭṭhi rañño santikaṃ gacchanto taṃ gahetvā agamāsi. Rājā pana taṃ ādaravasena olokesi. Seṭṭhi – ‘‘mahārāja, ayaṃ oloketabbayuttoyevā’’ti vatvā tadā tena katakammaṃ attanāpissa sahassadinnabhāvañca kathesi. Taṃ sutvā rājā tassa tussitvā sahassaṃ datvā ‘‘asukasmiṃ ṭhāne gehaṃ katvā vasāhī’’ti gehaṭṭhānamassa āṇāpesi. Tassa taṃ ṭhānaṃ sodhāpentassa mahantā mahantā nidhikumbhiyo uṭṭhahiṃsu. So tā disvā rañño ārocesi. Rājā sabbaṃ dhanaṃ uddharāpetvā rāsikataṃ disvā – ‘‘ettakaṃ dhanaṃ imasmiṃ nagare kassa gehe atthī’’ti pucchi. ‘‘Na kassaci, devā’’ti. ‘‘Tena hi ayaṃ annabhāro imasmiṃ nagare mahādhanaseṭṭhi nāma hotū’’ti taṃ divasameva tassa seṭṭhichattaṃ ussāpesi.
со сздти худ̇ваа яааваж̇ийвам̣ галяаан̣агаммам̣ гад̇ваа д̣̇звалогз ниб̣б̣ад̇д̇о, д̣̇ийгхарад̇д̇ам̣ д̣̇звамануссзсу сам̣сарид̇ваа амхаагам̣ бхаг̇авад̇о уббаж̇ж̇анагагаалз габилавад̇т̇унаг̇арз суггод̣̇анасаггасса г̇зхз бадисанд̇хим̣ г̇ан̣хи. д̇асса ж̇аад̇асса ануруд̣̇д̇ход̇и наамам̣ агам̣су. со махаанаамасаггасса ганидтабхаад̇аа бхаг̇авад̇о жуул̣абид̇у буд̇д̇о барамасукумаало махаабун̃н̃о ахоси. суван̣н̣абаад̇ияам̣язва жасса бхад̇д̇ам̣ уббаж̇ж̇и. ат̇асса маад̇аа згад̣̇ивасам̣ ‘‘мама буд̇д̇о над̇т̇ийд̇и бад̣̇ам̣ на ж̇аанаад̇и, д̇ам̣ ж̇аанаабзссаамий’’д̇и жинд̇зд̇ваа згам̣ суван̣н̣абаад̇им̣ д̇ужчагам̣язва ан̃н̃ааяа суван̣н̣абаад̇ияаа бид̣̇ахид̇ваа д̇асса бзсзси, анд̇араамаг̇г̇з д̣̇звад̇аа д̇ам̣, д̣̇иб̣б̣абуувзхи буурзсум̣. звам̣ махаабун̃н̃о д̇ин̣н̣ам̣ уд̇уунам̣ анужчавигзсу д̇ийсу баасаад̣̇зсу алан̇гад̇анаадагид̇т̇ийхи баривуд̇о д̣̇зво вияа махаасамбад̇д̇им̣ анубхави.
So seṭṭhi hutvā yāvajīvaṃ kalyāṇakammaṃ katvā devaloke nibbatto, dīgharattaṃ devamanussesu saṃsaritvā amhākaṃ bhagavato uppajjanakakāle kapilavatthunagare sukkodanasakkassa gehe paṭisandhiṃ gaṇhi. Tassa jātassa anuruddhoti nāmaṃ akaṃsu. So mahānāmasakkassa kaniṭṭhabhātā bhagavato cūḷapitu putto paramasukhumālo mahāpuñño ahosi. Suvaṇṇapātiyaṃyeva cassa bhattaṃ uppajji. Athassa mātā ekadivasaṃ ‘‘mama putto natthīti padaṃ na jānāti, taṃ jānāpessāmī’’ti cintetvā ekaṃ suvaṇṇapātiṃ tucchakaṃyeva aññāya suvaṇṇapātiyā pidahitvā tassa pesesi, antarāmagge devatā taṃ, dibbapūvehi pūresuṃ. Evaṃ mahāpuñño tiṇṇaṃ utūnaṃ anucchavikesu tīsu pāsādesu alaṅkatanāṭakitthīhi parivuto devo viya mahāsampattiṃ anubhavi.
амхаагамби б̣од̇хисад̇д̇о д̇асмим̣ самаяз д̇усид̇абураа жавид̇ваа суд̣̇д̇ход̣̇анамахаарааж̇асса аг̇г̇амахзсияаа гужчимхи ниб̣б̣ад̇д̇ид̇ваа ануггамзна вуд̣̇д̇хиббад̇д̇о згуунад̇им̣са вассаани аг̇аарамаж̇жхз васид̇ваа махаабхинигкаманам̣ нигкамид̇ваа ануггамзна бадивид̣̇д̇хасаб̣б̣ан̃н̃уд̇ан̃н̃аан̣о б̣од̇химан̣д̣з сад̇д̇асад̇д̇аахам̣ вийд̇инаамзд̇ваа исибад̇анз миг̇ад̣̇ааяз д̇хаммажаггам̣ бавад̇д̇зд̇ваа логаануг̇г̇ахам̣ гаронд̇о рааж̇аг̇ахам̣ г̇анд̇ваа взл̣уванз вихааси. д̇ад̣̇аа суд̣̇д̇ход̣̇анамахаарааж̇аа – ‘‘буд̇д̇о гира мз рааж̇аг̇ахам̣ ануббад̇д̇о; г̇ажчат̇а, бхан̣з, мама буд̇д̇ам̣ аанзт̇аа’’д̇и сахассасахассабариваарз д̣̇аса амажжз бзсзси. д̇з саб̣б̣з зхибхигкубаб̣б̣аж̇ж̇ааяа баб̣б̣аж̇им̣су. д̇зсу уд̣̇ааяид̇т̇зрзна жааригааг̇аманам̣ ааяаажид̇о бхаг̇аваа вийсад̇исахассакийн̣аасавабаривуд̇о рааж̇аг̇ахад̇о нигкамид̇ваа габилавад̇т̇убурам̣ г̇анд̇ваа н̃аад̇исамааг̇амз анзгаани баадихаарияаани д̣̇ассзд̇ваа баадихаарияавижид̇д̇ам̣ д̇хаммад̣̇зсанам̣ гат̇зд̇ваа махааж̇анам̣ амад̇абаанам̣ бааязд̇ваа д̣̇уд̇ияад̣̇ивасз бад̇д̇ажийварамаад̣̇ааяа наг̇арад̣̇ваарз тад̇ваа ‘‘гим̣ ну ко гуланаг̇арам̣ ааг̇ад̇аанам̣ саб̣б̣аб̣уд̣̇д̇хаанам̣ аажин̣н̣а’’нд̇и ааваж̇ж̇амаано ‘‘сабад̣̇аанам̣ бин̣д̣ааяа жаран̣ам̣ аажин̣н̣а’’нд̇и н̃ад̇ваа сабад̣̇аанам̣ бин̣д̣ааяа жарад̇и. рааж̇аа ‘‘буд̇д̇о д̇з бин̣д̣ааяа жарад̇ий’’д̇и суд̇ваа д̇урид̇ад̇урид̇о ааг̇анд̇ваа анд̇аравийт̇ияам̣ д̇хаммам̣ суд̇ваа ад̇д̇ано нивзсанам̣ бавзсзд̇ваа маханд̇ам̣ саггаарасаммаанам̣ агааси. бхаг̇аваа д̇ад̇т̇а гад̇д̇аб̣б̣ам̣ н̃аад̇исан̇г̇ахам̣ гад̇ваа раахулагумаарам̣ баб̣б̣ааж̇зд̇ваа нажирассзва габилавад̇т̇унаг̇арад̇о малларадтз жааригам̣ жарамаано анубияамб̣аванам̣ баабун̣и.
Amhākampi bodhisatto tasmiṃ samaye tusitapurā cavitvā suddhodanamahārājassa aggamahesiyā kucchimhi nibbattitvā anukkamena vuddhippatto ekūnatiṃsa vassāni agāramajjhe vasitvā mahābhinikkhamanaṃ nikkhamitvā anukkamena paṭividdhasabbaññutaññāṇo bodhimaṇḍe sattasattāhaṃ vītināmetvā isipatane migadāye dhammacakkaṃ pavattetvā lokānuggahaṃ karonto rājagahaṃ gantvā veḷuvane vihāsi. Tadā suddhodanamahārājā – ‘‘putto kira me rājagahaṃ anuppatto; gacchatha, bhaṇe, mama puttaṃ ānethā’’ti sahassasahassaparivāre dasa amacce pesesi. Te sabbe ehibhikkhupabbajjāya pabbajiṃsu. Tesu udāyittherena cārikāgamanaṃ āyācito bhagavā vīsatisahassakhīṇāsavaparivuto rājagahato nikkhamitvā kapilavatthupuraṃ gantvā ñātisamāgame anekāni pāṭihāriyāni dassetvā pāṭihāriyavicittaṃ dhammadesanaṃ kathetvā mahājanaṃ amatapānaṃ pāyetvā dutiyadivase pattacīvaramādāya nagaradvāre ṭhatvā ‘‘kiṃ nu kho kulanagaraṃ āgatānaṃ sabbabuddhānaṃ āciṇṇa’’nti āvajjamāno ‘‘sapadānaṃ piṇḍāya caraṇaṃ āciṇṇa’’nti ñatvā sapadānaṃ piṇḍāya carati. Rājā ‘‘putto te piṇḍāya caratī’’ti sutvā turitaturito āgantvā antaravīthiyaṃ dhammaṃ sutvā attano nivesanaṃ pavesetvā mahantaṃ sakkārasammānaṃ akāsi. Bhagavā tattha kattabbaṃ ñātisaṅgahaṃ katvā rāhulakumāraṃ pabbājetvā nacirasseva kapilavatthunagarato mallaraṭṭhe cārikaṃ caramāno anupiyambavanaṃ pāpuṇi.
д̇асмим̣ самаяз суд̣̇д̇ход̣̇анамахаарааж̇аа саагияаг̇ан̣ам̣ саннибаад̇зд̇ваа ааха – ‘‘сажз мама буд̇д̇о аг̇аарам̣ аж̇жхаавасисса, рааж̇аа абхависса жаггавад̇д̇ий сад̇д̇арад̇анасамбанно кад̇д̇ияаг̇ан̣абаривааро, над̇д̇ааби мз раахулагумааро кад̇д̇ияаг̇ан̣зна сад̣̇д̇хим̣ д̇ам̣ бариваарзд̇ваа ажарисса, д̇умхзби зд̇амад̇т̇ам̣ ж̇аанаат̇а. ид̣̇аани бана мама буд̇д̇о б̣уд̣̇д̇хо ж̇аад̇о, кад̇д̇ияааваасса бариваараа хонд̇у, д̇умхз згзгагулад̇о згзгам̣ д̣̇аарагам̣ д̣̇зт̇аа’’д̇и. звам̣ вуд̇д̇з згаббахаарзнзва д̣̇взасийд̇исахассакад̇д̇ияагумаараа баб̣б̣аж̇им̣су.
Tasmiṃ samaye suddhodanamahārājā sākiyagaṇaṃ sannipātetvā āha – ‘‘sace mama putto agāraṃ ajjhāvasissa, rājā abhavissa cakkavattī sattaratanasampanno khattiyagaṇaparivāro, nattāpi me rāhulakumāro khattiyagaṇena saddhiṃ taṃ parivāretvā acarissa, tumhepi etamatthaṃ jānātha. Idāni pana mama putto buddho jāto, khattiyāvāssa parivārā hontu, tumhe ekekakulato ekekaṃ dārakaṃ dethā’’ti. Evaṃ vutte ekappahāreneva dveasītisahassakhattiyakumārā pabbajiṃsu.
д̇асмим̣ самаяз махаанаамо сагго гудумб̣асаамиго, со ад̇д̇ано ганидтам̣ ануруд̣̇д̇хам̣ саггам̣ убасан̇гамид̇ваа зд̇ад̣̇авожа – ‘‘зд̇арахи, д̇аад̇а ануруд̣̇д̇ха, абхин̃н̃аад̇аа абхин̃н̃аад̇аа сагяагумаараа бхаг̇аванд̇ам̣ баб̣б̣аж̇ид̇ам̣ анубаб̣б̣аж̇анд̇и, амхааган̃жа гулаа над̇т̇и гожи аг̇аарасмаа анаг̇аарияам̣ баб̣б̣аж̇ид̇о, д̇зна хи д̇вам̣ ваа баб̣б̣аж̇аахи, ахам̣ ваа баб̣б̣аж̇иссаамий’’д̇и. д̇ам̣ суд̇ваа ануруд̣̇д̇хо гхарааваасз ружим̣ агад̇ваа ад̇д̇асад̇д̇амо аг̇аарасмаа анаг̇аарияам̣ баб̣б̣аж̇ид̇о. д̇асса баб̣б̣аж̇ж̇аануггамо сан̇гхабхзд̣̇агагканд̇хагз (жуул̣ава. 330 аад̣̇аяо) ааг̇ад̇оязва. звам̣ анубияам̣ г̇анд̇ваа баб̣б̣аж̇ид̇зсу бана д̇зсу д̇асмим̣язва анд̇овассз бхад̣̇д̣̇ияад̇т̇зро арахад̇д̇ам̣ баабун̣и, ануруд̣̇д̇хад̇т̇зро д̣̇иб̣б̣ажагкум̣ ниб̣б̣ад̇д̇зси, д̣̇звад̣̇ад̇д̇о адта самаабад̇д̇ияо ниб̣б̣ад̇д̇зси, аананд̣̇ад̇т̇зро сод̇аабад̇д̇ипалз бад̇идтааси, бхаг̇уд̇т̇зро жа гимилад̇т̇зро жа бажчаа арахад̇д̇ам̣ баабун̣им̣су. д̇зсам̣ саб̣б̣зсамби т̇зраанам̣ ад̇д̇ано ад̇д̇ано ааг̇ад̇адтаанзсу буб̣б̣абад̇т̇анаабхинийхааро аави бхависсад̇и. аяам̣ ануруд̣̇д̇хад̇т̇зро д̇хаммасзнаабад̇исса санд̇игз гаммадтаанам̣ г̇ахзд̇ваа жзд̇ияарадтз баажийнавам̣сад̣̇ааяам̣ г̇анд̇ваа саман̣ад̇хаммам̣ гаронд̇о сад̇д̇а махаабурисавид̇аггз вид̇аггзси, адтамз гиламад̇и. сад̇т̇аа ‘‘ануруд̣̇д̇хо адтамз махаабурисавид̇аггз гиламад̇ий’’д̇и н̃ад̇ваа ‘‘д̇асса сан̇габбам̣ буурзссаамий’’д̇и д̇ад̇т̇а г̇анд̇ваа бан̃н̃ад̇д̇авараб̣уд̣̇д̇хаасанз нисинно адтамам̣ махаабурисавид̇аггам̣ буурзд̇ваа жад̇убажжаяасанд̇осабхааванаараамабадиман̣д̣ид̇ам̣ махааарияавам̣сабадибад̣̇ам̣ гат̇зд̇ваа аагаасз уббад̇ид̇ваа бхзсагалааванамзва г̇ад̇о.
Tasmiṃ samaye mahānāmo sakko kuṭumbasāmiko, so attano kaniṭṭhaṃ anuruddhaṃ sakkaṃ upasaṅkamitvā etadavoca – ‘‘etarahi, tāta anuruddha, abhiññātā abhiññātā sakyakumārā bhagavantaṃ pabbajitaṃ anupabbajanti, amhākañca kulā natthi koci agārasmā anagāriyaṃ pabbajito, tena hi tvaṃ vā pabbajāhi, ahaṃ vā pabbajissāmī’’ti. Taṃ sutvā anuruddho gharāvāse ruciṃ akatvā attasattamo agārasmā anagāriyaṃ pabbajito. Tassa pabbajjānukkamo saṅghabhedakakkhandhake (cūḷava. 330 ādayo) āgatoyeva. Evaṃ anupiyaṃ gantvā pabbajitesu pana tesu tasmiṃyeva antovasse bhaddiyatthero arahattaṃ pāpuṇi, anuruddhatthero dibbacakkhuṃ nibbattesi, devadatto aṭṭha samāpattiyo nibbattesi, ānandatthero sotāpattiphale patiṭṭhāsi, bhagutthero ca kimilatthero ca pacchā arahattaṃ pāpuṇiṃsu. Tesaṃ sabbesampi therānaṃ attano attano āgataṭṭhānesu pubbapatthanābhinīhāro āvi bhavissati. Ayaṃ anuruddhatthero dhammasenāpatissa santike kammaṭṭhānaṃ gahetvā cetiyaraṭṭhe pācīnavaṃsadāyaṃ gantvā samaṇadhammaṃ karonto satta mahāpurisavitakke vitakkesi, aṭṭhame kilamati. Satthā ‘‘anuruddho aṭṭhame mahāpurisavitakke kilamatī’’ti ñatvā ‘‘tassa saṅkappaṃ pūressāmī’’ti tattha gantvā paññattavarabuddhāsane nisinno aṭṭhamaṃ mahāpurisavitakkaṃ pūretvā catupaccayasantosabhāvanārāmapaṭimaṇḍitaṃ mahāariyavaṃsapaṭipadaṃ kathetvā ākāse uppatitvā bhesakalāvanameva gato.
т̇зро д̇ат̇ааг̇ад̇з г̇ад̇амад̇д̇зязва д̇звиж̇ж̇о махаакийн̣аасаво худ̇ваа ‘‘сад̇т̇аа маяхам̣ манам̣ ж̇аанид̇ваа ааг̇анд̇ваа адтамам̣ махаабурисавид̇аггам̣ буурзд̇ваа ад̣̇ааси, со жа мз манорат̇о мад̇т̇агам̣ бад̇д̇о’’д̇и б̣уд̣̇д̇хаанам̣ д̇хаммад̣̇зсанам̣ ад̇д̇ано жа бадивзд̇хад̇хаммам̣ аараб̣бха имаа уд̣̇аанаг̇аат̇аа абхааси –
Thero tathāgate gatamatteyeva tevijjo mahākhīṇāsavo hutvā ‘‘satthā mayhaṃ manaṃ jānitvā āgantvā aṭṭhamaṃ mahāpurisavitakkaṃ pūretvā adāsi, so ca me manoratho matthakaṃ patto’’ti buddhānaṃ dhammadesanaṃ attano ca paṭivedhadhammaṃ ārabbha imā udānagāthā abhāsi –
‘‘мама сан̇габбаман̃н̃ааяа, сад̇т̇аа логз ануд̇д̇аро;
‘‘Mama saṅkappamaññāya, satthā loke anuttaro;
маномаязна гааязна, ид̣̇д̇хияаа убасан̇гами.
Manomayena kāyena, iddhiyā upasaṅkami.
‘‘яад̣̇аа мз аху сан̇габбо, д̇ад̇о уд̇д̇ари д̣̇зсаяи;
‘‘Yadā me ahu saṅkappo, tato uttari desayi;
ниббабан̃жарад̇о б̣уд̣̇д̇хо, ниббабан̃жамад̣̇зсаяи.
Nippapañcarato buddho, nippapañcamadesayi.
‘‘д̇ассаахам̣ д̇хаммаман̃н̃ааяа, вихаасим̣ саасанз рад̇о;
‘‘Tassāhaṃ dhammamaññāya, vihāsiṃ sāsane rato;
д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасана’’нд̇и. (т̇зраг̇аа. 901-903);
Tisso vijjā anuppattā, kataṃ buddhassa sāsana’’nti. (theragā. 901-903);
ат̇а нам̣ абарабхааг̇з сад̇т̇аа ж̇зд̇аванз махаавихаарз вихаранд̇о ‘‘д̣̇иб̣б̣ажагкугаанам̣ бхигкуунам̣ ануруд̣̇д̇хо аг̇г̇о’’д̇и (а. ни. 1.192) аг̇г̇адтаанз табзси.
Atha naṃ aparabhāge satthā jetavane mahāvihāre viharanto ‘‘dibbacakkhukānaṃ bhikkhūnaṃ anuruddho aggo’’ti (a. ni. 1.192) aggaṭṭhāne ṭhapesi.
421. звам̣ со бхаг̇авад̇о санд̇игаа д̣̇иб̣б̣ажагкугаанам̣ аг̇г̇адтаанам̣ лабхид̇ваа ад̇д̇ано буб̣б̣агаммам̣ сарид̇ваа соманассавасзна буб̣б̣ажарид̇аабад̣̇аанам̣ багаасзнд̇о сумзд̇хам̣ бхаг̇аванд̇ааханд̇иаад̣̇имааха. д̇ад̇т̇а сунд̣̇араа убадтаабанабан̃н̃аа маг̇г̇апалабан̃н̃аа вибассанаабан̃н̃аа жад̇убадисамбхид̣̇аад̣̇исан̇каад̇аа мзд̇хаа яасса бхаг̇авад̇о со сумзд̇хо, д̇ам̣ сумзд̇хам̣ бхааг̇яасамбаннад̇д̇аа бхаг̇аванд̇ам̣ логасса ж̇здтам̣ сздтам̣ бад̇хаанабхууд̇ам̣ сам̣саарад̇о батамам̣ ниг̇г̇ад̇ам̣ нараанам̣ аасабхам̣ бурзжааригам̣ вуубагадтам̣ вивзгабхууд̇ам̣ г̇ан̣асан̇г̇ан̣игаараамад̇о абаг̇ад̇ам̣ вихаранд̇ам̣ ахам̣ ад̣̇д̣̇асанд̇и самб̣анд̇хо.
421. Evaṃ so bhagavato santikā dibbacakkhukānaṃ aggaṭṭhānaṃ labhitvā attano pubbakammaṃ saritvā somanassavasena pubbacaritāpadānaṃ pakāsento sumedhaṃ bhagavantāhantiādimāha. Tattha sundarā upaṭṭhāpanapaññā maggaphalapaññā vipassanāpaññā catupaṭisambhidādisaṅkhātā medhā yassa bhagavato so sumedho, taṃ sumedhaṃ bhāgyasampannattā bhagavantaṃ lokassa jeṭṭhaṃ seṭṭhaṃ padhānabhūtaṃ saṃsārato paṭhamaṃ niggataṃ narānaṃ āsabhaṃ purecārikaṃ vūpakaṭṭhaṃ vivekabhūtaṃ gaṇasaṅgaṇikārāmato apagataṃ viharantaṃ ahaṃ addasanti sambandho.
422. саб̣б̣ад̇хаммаанам̣ саяамзва б̣уд̣̇д̇хад̇д̇аа самб̣уд̣̇д̇хам̣, убаг̇анд̇ваана самийбам̣ г̇анд̇ваад̇и ад̇т̇о. ан̃ж̇алим̣ баг̇г̇ахзд̇ваанаад̇и д̣̇асан̇г̇улибудам̣ муд̣̇д̇хани гад̇ваад̇и ад̇т̇о. сзсам̣ уд̇д̇аанад̇т̇амзва.
422. Sabbadhammānaṃ sayameva buddhattā sambuddhaṃ, upagantvāna samīpaṃ gantvāti attho. Añjaliṃ paggahetvānāti dasaṅgulipuṭaṃ muddhani katvāti attho. Sesaṃ uttānatthameva.
430. д̣̇иваа рад̇д̇ин̃жа бассаамийд̇и д̇ад̣̇аа д̣̇звалогз жа мануссалогз жа уббаннагаалз мам̣сажагкунаа саманд̇ад̇о яож̇анам̣ бассаамийд̇и ад̇т̇о.
430.Divā rattiñca passāmīti tadā devaloke ca manussaloke ca uppannakāle maṃsacakkhunā samantato yojanaṃ passāmīti attho.
431. сахассалогам̣ н̃аан̣знаад̇и бан̃н̃аажагкунаа сахассажаггаваал̣ам̣ бассаамийд̇и ад̇т̇о. сад̇т̇у саасанзд̇и ид̣̇аани г̇од̇амасса бхаг̇авад̇о саасанз. д̣̇ийбад̣̇аанасса д̣̇ийбабууж̇ааяа ид̣̇ам̣ палам̣, иминаа палзна д̣̇иб̣б̣ажагкум̣ ануббад̇д̇о бадилад̣̇д̇хо уббаад̣̇зсинд̇и ад̇т̇о.
431.Sahassalokaṃ ñāṇenāti paññācakkhunā sahassacakkavāḷaṃ passāmīti attho. Satthu sāsaneti idāni gotamassa bhagavato sāsane. Dīpadānassa dīpapūjāya idaṃ phalaṃ, iminā phalena dibbacakkhuṃ anuppatto paṭiladdho uppādesinti attho.
ануруд̣̇д̇хад̇т̇зраабад̣̇аанаван̣н̣анаа самад̇д̇аа.
Anuruddhattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 3-4. ануруд̣̇д̇хад̇т̇зраабад̣̇аанам̣ • 3-4. Anuruddhattheraapadānaṃ
