Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā

9. ануруд̣̇д̇хад̇т̇зраг̇аат̇ааван̣н̣анаа

9. Anuruddhattheragāthāvaṇṇanā

бахааяа маад̇аабид̇арод̇иаад̣̇игаа ааяасмад̇о ануруд̣̇д̇хад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро бад̣̇умуд̇д̇арасса бхаг̇авад̇о гаалз вибхавасамбанно гудумб̣иго худ̇ваа ниб̣б̣ад̇д̇и. со згад̣̇ивасам̣ вихаарам̣ г̇анд̇ваа сад̇т̇у санд̇игз д̇хаммам̣ сун̣анд̇о сад̇т̇аарам̣ згам̣ бхигкум̣ д̣̇иб̣б̣ажагкугаанам̣ аг̇г̇адтаанз табзнд̇ам̣ д̣̇исваа саяамби д̇ам̣ таананд̇арам̣ бад̇т̇зд̇ваа сад̇асахассабхигкубариваарасса бхаг̇авад̇о сад̇д̇аахам̣ махаад̣̇аанам̣ бавад̇д̇зд̇ваа сад̇д̇амз д̣̇ивасз бхаг̇авад̇о, бхигкусан̇гхасса жа уд̇д̇амаани вад̇т̇аани д̣̇ад̇ваа бан̣ид̇хаанамагааси. сад̇т̇аабисса ананд̇арааязна самиж̇жханабхаавам̣ д̣̇исваа ‘‘анааг̇ад̇з г̇од̇амасса наама саммаасамб̣уд̣̇д̇хасса саасанз д̣̇иб̣б̣ажагкугаанам̣ аг̇г̇о бхависсад̇ий’’д̇и б̣яаагааси. соби д̇ад̇т̇а бун̃н̃аани гаронд̇о сад̇т̇ари бариниб̣б̣уд̇з нидтид̇з сад̇д̇аяож̇анигз суван̣н̣ажзд̇ияз анзгасахассзхи д̣̇ийбаругкзхи д̣̇ийбагабаллигаахи жа ‘‘д̣̇иб̣б̣ажагкун̃аан̣асса убаниссаяабажжаяо ход̇уу’’д̇и ул̣аарам̣ д̣̇ийбабууж̇ам̣ агааси.

Pahāyamātāpitarotiādikā āyasmato anuruddhattherassa gāthā. Kā uppatti? Ayampi purimabuddhesu katādhikāro padumuttarassa bhagavato kāle vibhavasampanno kuṭumbiko hutvā nibbatti. So ekadivasaṃ vihāraṃ gantvā satthu santike dhammaṃ suṇanto satthāraṃ ekaṃ bhikkhuṃ dibbacakkhukānaṃ aggaṭṭhāne ṭhapentaṃ disvā sayampi taṃ ṭhānantaraṃ patthetvā satasahassabhikkhuparivārassa bhagavato sattāhaṃ mahādānaṃ pavattetvā sattame divase bhagavato, bhikkhusaṅghassa ca uttamāni vatthāni datvā paṇidhānamakāsi. Satthāpissa anantarāyena samijjhanabhāvaṃ disvā ‘‘anāgate gotamassa nāma sammāsambuddhassa sāsane dibbacakkhukānaṃ aggo bhavissatī’’ti byākāsi. Sopi tattha puññāni karonto satthari parinibbute niṭṭhite sattayojanike suvaṇṇacetiye anekasahassehi dīparukkhehi dīpakapallikāhi ca ‘‘dibbacakkhuñāṇassa upanissayapaccayo hotū’’ti uḷāraṃ dīpapūjaṃ akāsi.

звам̣ яааваж̇ийвам̣ бун̃н̃аани гад̇ваа д̣̇звамануссзсу сам̣саранд̇о гассабасса бхаг̇авад̇о гаалз б̣аараан̣асияам̣ гудумб̣игаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о сад̇т̇ари бариниб̣б̣уд̇з нидтид̇з яож̇анигз ганагат̇уубз б̣ахуу гам̣сабаад̇ияо гаарзд̇ваа саббиман̣д̣асса буурзд̇ваа маж̇жхз згзгам̣ г̇ул̣абин̣д̣ам̣ табзд̇ваа мукаваддияаа мукаваддим̣ пусаабзнд̇о жзд̇ияам̣ баригкибаабзд̇ваа ад̇д̇анаа згам̣ махад̇им̣ гам̣сабаад̇им̣ гаарзд̇ваа саббиман̣д̣асса буурзд̇ваа сахассаваддияо ж̇аалаабзд̇ваа сийсз табзд̇ваа саб̣б̣арад̇д̇им̣ жзд̇ияам̣ анубарияааяи.

Evaṃ yāvajīvaṃ puññāni katvā devamanussesu saṃsaranto kassapassa bhagavato kāle bārāṇasiyaṃ kuṭumbikagehe nibbattitvā viññutaṃ patto satthari parinibbute niṭṭhite yojanike kanakathūpe bahū kaṃsapātiyo kāretvā sappimaṇḍassa pūretvā majjhe ekekaṃ guḷapiṇḍaṃ ṭhapetvā mukhavaṭṭiyā mukhavaṭṭiṃ phusāpento cetiyaṃ parikkhipāpetvā attanā ekaṃ mahatiṃ kaṃsapātiṃ kāretvā sappimaṇḍassa pūretvā sahassavaṭṭiyo jālāpetvā sīse ṭhapetvā sabbarattiṃ cetiyaṃ anupariyāyi.

звам̣ д̇асмимби ад̇д̇абхаавз яааваж̇ийвам̣ гусалам̣ гад̇ваа д̇ад̇о жуд̇о д̣̇звалогз ниб̣б̣ад̇д̇ид̇ваа д̇ад̇т̇а яаавад̇ааяугам̣ тад̇ваа д̇ад̇о жуд̇о ануббаннз б̣уд̣̇д̇хз б̣аараан̣асияам̣язва д̣̇уг̇г̇ад̇агулз ниб̣б̣ад̇д̇и, аннабхаарод̇исса наамам̣ ахоси. со суманасздтисса наама г̇зхз гаммам̣ гаронд̇о ж̇ийвад̇и. со згад̣̇ивасам̣ убаридтам̣ наама бажжзгаб̣уд̣̇д̇хам̣ нирод̇хасамаабад̇д̇ид̇о вудтааяа г̇анд̇хамаад̣̇анабаб̣б̣ад̇ад̇о аагаасзнааг̇анд̇ваа б̣аараан̣асийнаг̇арад̣̇ваарз од̇арид̇ваа жийварам̣ баарубид̇ваа наг̇арз бин̣д̣ааяа бависанд̇ам̣ д̣̇исваа басаннажид̇д̇о бад̇д̇ам̣ г̇ахзд̇ваа ад̇д̇ано ад̇т̇ааяа табид̇ам̣ згам̣ бхааг̇абхад̇д̇ам̣ бад̇д̇з багкибид̇ваа бажжзгаб̣уд̣̇д̇хасса д̣̇аад̇угаамо аарабхи. бхарияаабисса ад̇д̇ано бхааг̇абхад̇д̇ам̣ д̇ад̇т̇зва багкиби. со д̇ам̣ нзд̇ваа бажжзгаб̣уд̣̇д̇хасса хад̇т̇з табзси. бажжзгаб̣уд̣̇д̇хо д̇ам̣ г̇ахзд̇ваа анумод̣̇анам̣ гад̇ваа баггаами. д̇ам̣ д̣̇исваа рад̇д̇им̣ суманасздтисса чад̇д̇з ад̇хивад̇т̇аа д̣̇звад̇аа ‘‘ахо д̣̇аанам̣ барамад̣̇аанам̣, убаридтз, суббад̇идтид̇а’’нд̇и махаасад̣̇д̣̇зна анумод̣̇и. д̇ам̣ суд̇ваа суманасздти ‘‘звам̣ д̣̇звад̇ааяа анумод̣̇ид̇ам̣ ид̣̇амзва уд̇д̇амад̣̇аана’’нд̇и жинд̇зд̇ваа д̇ад̇т̇а бад̇д̇им̣ яаажи. аннабхааро бана д̇асса бад̇д̇им̣ ад̣̇ааси. д̇зна басаннажид̇д̇о суманасздти д̇асса сахассам̣ д̣̇ад̇ваа ‘‘ид̇о бадтааяа д̇уяхам̣ сахад̇т̇зна гаммагаран̣агижжам̣ над̇т̇и, бад̇ируубам̣ г̇зхам̣ гад̇ваа нижжам̣ васаахий’’д̇и ааха.

Evaṃ tasmimpi attabhāve yāvajīvaṃ kusalaṃ katvā tato cuto devaloke nibbattitvā tattha yāvatāyukaṃ ṭhatvā tato cuto anuppanne buddhe bārāṇasiyaṃyeva duggatakule nibbatti, annabhārotissa nāmaṃ ahosi. So sumanaseṭṭhissa nāma gehe kammaṃ karonto jīvati. So ekadivasaṃ upariṭṭhaṃ nāma paccekabuddhaṃ nirodhasamāpattito vuṭṭhāya gandhamādanapabbatato ākāsenāgantvā bārāṇasīnagaradvāre otaritvā cīvaraṃ pārupitvā nagare piṇḍāya pavisantaṃ disvā pasannacitto pattaṃ gahetvā attano atthāya ṭhapitaṃ ekaṃ bhāgabhattaṃ patte pakkhipitvā paccekabuddhassa dātukāmo ārabhi. Bhariyāpissa attano bhāgabhattaṃ tattheva pakkhipi. So taṃ netvā paccekabuddhassa hatthe ṭhapesi. Paccekabuddho taṃ gahetvā anumodanaṃ katvā pakkāmi. Taṃ disvā rattiṃ sumanaseṭṭhissa chatte adhivatthā devatā ‘‘aho dānaṃ paramadānaṃ, upariṭṭhe, suppatiṭṭhita’’nti mahāsaddena anumodi. Taṃ sutvā sumanaseṭṭhi ‘‘evaṃ devatāya anumoditaṃ idameva uttamadāna’’nti cintetvā tattha pattiṃ yāci. Annabhāro pana tassa pattiṃ adāsi. Tena pasannacitto sumanaseṭṭhi tassa sahassaṃ datvā ‘‘ito paṭṭhāya tuyhaṃ sahatthena kammakaraṇakiccaṃ natthi, patirūpaṃ gehaṃ katvā niccaṃ vasāhī’’ti āha.

яасмаа нирод̇хад̇о вудтид̇асса бажжзгаб̣уд̣̇д̇хасса д̣̇иннабин̣д̣абаад̇о д̇ам̣д̣̇ивасамзва ул̣аарад̇аравибааго ход̇и, д̇асмаа д̇ам̣д̣̇ивасам̣ суманасздти ран̃н̃о санд̇игам̣ г̇ажчанд̇о д̇ам̣ г̇ахзд̇ваа аг̇амааси. рааж̇аа бана д̇ам̣ аад̣̇аравасзна ологзси. сздти ‘‘махаарааж̇а, аяам̣ ологзд̇аб̣б̣аяуд̇д̇оязваа’’д̇и вад̇ваа д̇ад̣̇аа д̇зна гад̇абун̃н̃ам̣ ад̇д̇анаабисса сахассам̣ д̣̇иннабхаавам̣ гат̇зси. д̇ам̣ суд̇ваа рааж̇аа д̇уссид̇ваа сахассам̣ д̣̇ад̇ваа асугасмим̣ наама таанз г̇зхам̣ гад̇ваа васаа’’д̇и г̇зхадтаанамасса аан̣аабзси. д̇асса д̇ам̣ таанам̣ сод̇хаабзнд̇асса маханд̇ияо нид̇хигумбхияо удтахим̣су. д̇аа д̣̇исваа со ран̃н̃о аарожзси. рааж̇аа саб̣б̣ам̣ д̇ханам̣ уд̣̇д̇хараабзд̇ваа раасигад̇ам̣ д̣̇исваа ‘‘зд̇д̇агам̣ д̇ханам̣ имасмим̣ наг̇арз гасса г̇зхз ад̇т̇ий’’д̇и? ‘‘на гассажи, д̣̇зваа’’д̇и. ‘‘д̇зна хи аяам̣ аннабхааро имасмим̣ наг̇арз махаад̇ханасздти наама ход̇уу’’д̇и д̇ам̣д̣̇ивасамзва д̇асса сздтичад̇д̇ам̣ уссаабзси.

Yasmā nirodhato vuṭṭhitassa paccekabuddhassa dinnapiṇḍapāto taṃdivasameva uḷārataravipāko hoti, tasmā taṃdivasaṃ sumanaseṭṭhi rañño santikaṃ gacchanto taṃ gahetvā agamāsi. Rājā pana taṃ ādaravasena olokesi. Seṭṭhi ‘‘mahārāja, ayaṃ oloketabbayuttoyevā’’ti vatvā tadā tena katapuññaṃ attanāpissa sahassaṃ dinnabhāvaṃ kathesi. Taṃ sutvā rājā tussitvā sahassaṃ datvā asukasmiṃ nāma ṭhāne gehaṃ katvā vasā’’ti gehaṭṭhānamassa āṇāpesi. Tassa taṃ ṭhānaṃ sodhāpentassa mahantiyo nidhikumbhiyo uṭṭhahiṃsu. Tā disvā so rañño ārocesi. Rājā sabbaṃ dhanaṃ uddharāpetvā rāsikataṃ disvā ‘‘ettakaṃ dhanaṃ imasmiṃ nagare kassa gehe atthī’’ti? ‘‘Na kassaci, devā’’ti. ‘‘Tena hi ayaṃ annabhāro imasmiṃ nagare mahādhanaseṭṭhi nāma hotū’’ti taṃdivasameva tassa seṭṭhichattaṃ ussāpesi.

со д̇ад̇о бадтааяа яааваж̇ийвам̣ гусалагаммам̣ гад̇ваа д̇ад̇о жуд̇о д̣̇звамануссзсу сам̣сарид̇ваа имасмим̣ б̣уд̣̇д̇хуббаад̣̇з габилавад̇т̇унаг̇арз суггод̣̇анасаггасса г̇зхз бадисанд̇хим̣ г̇ан̣хи, ануруд̣̇д̇ход̇исса наамам̣ ахоси. со махаанаамасса саггасса ганидтабхаад̇аа, сад̇т̇у жуул̣абид̇у буд̇д̇о барамасукумаало махаабун̃н̃о д̇ин̣н̣ам̣ уд̇уунам̣ анужчавигзсу д̇ийсу баасаад̣̇зсу алан̇гад̇анаадагид̇т̇ийхи баривуд̇о д̣̇зво вияа самбад̇д̇им̣ анубхаванд̇о суд̣̇д̇ход̣̇анамахаарааж̇зна уссаахид̇зхи сагяарааж̇уухи сад̇т̇у бариваарад̇т̇ам̣ бзсид̇зхи бхад̣̇д̣̇ияагумаараад̣̇ийхи анубияамб̣аванз вихаранд̇ам̣ сад̇т̇аарам̣ убасан̇гамид̇ваа сад̇т̇у санд̇игз баб̣б̣аж̇ид̇ваа анд̇овассзязва д̣̇иб̣б̣ажагкум̣ ниб̣б̣ад̇д̇зд̇ваа, буна д̇хаммасзнаабад̇исса санд̇игз гаммадтаанам̣ г̇ахзд̇ваа жзд̇ияарадтз баажийнавам̣сад̣̇ааяам̣ г̇анд̇ваа саман̣ад̇хаммам̣ гаронд̇о сад̇д̇амахаабурисавид̇аггз вид̇аггзд̇ваа адтамам̣ ж̇аанид̇ум̣ наасагки. д̇асса д̇ам̣ бавад̇д̇им̣ н̃ад̇ваа сад̇т̇аа адтамам̣ махаабурисавид̇аггам̣ гат̇зд̇ваа жад̇убажжаяасанд̇осабхааванаараамабадиман̣д̣ид̇ам̣ махааарияавам̣сабадибад̣̇ам̣ д̣̇зсзд̇и. со д̣̇зсанаанусаарзна вибассанам̣ вад̣дхзд̇ваа абхин̃н̃аабадисамбхид̣̇аабариваарам̣ арахад̇д̇ам̣ сажчаагааси. д̇зна вуд̇д̇ам̣ абад̣̇аанз (аба. т̇зра 1.1.421-433) –

So tato paṭṭhāya yāvajīvaṃ kusalakammaṃ katvā tato cuto devamanussesu saṃsaritvā imasmiṃ buddhuppāde kapilavatthunagare sukkodanasakkassa gehe paṭisandhiṃ gaṇhi, anuruddhotissa nāmaṃ ahosi. So mahānāmassa sakkassa kaniṭṭhabhātā, satthu cūḷapitu putto paramasukhumālo mahāpuñño tiṇṇaṃ utūnaṃ anucchavikesu tīsu pāsādesu alaṅkatanāṭakitthīhi parivuto devo viya sampattiṃ anubhavanto suddhodanamahārājena ussāhitehi sakyarājūhi satthu parivāratthaṃ pesitehi bhaddiyakumārādīhi anupiyambavane viharantaṃ satthāraṃ upasaṅkamitvā satthu santike pabbajitvā antovasseyeva dibbacakkhuṃ nibbattetvā, puna dhammasenāpatissa santike kammaṭṭhānaṃ gahetvā cetiyaraṭṭhe pācīnavaṃsadāyaṃ gantvā samaṇadhammaṃ karonto sattamahāpurisavitakke vitakketvā aṭṭhamaṃ jānituṃ nāsakkhi. Tassa taṃ pavattiṃ ñatvā satthā aṭṭhamaṃ mahāpurisavitakkaṃ kathetvā catupaccayasantosabhāvanārāmapaṭimaṇḍitaṃ mahāariyavaṃsapaṭipadaṃ deseti. So desanānusārena vipassanaṃ vaḍḍhetvā abhiññāpaṭisambhidāparivāraṃ arahattaṃ sacchākāsi. Tena vuttaṃ apadāne (apa. thera 1.1.421-433) –

‘‘сумзд̇хам̣ бхаг̇аванд̇аахам̣, логаж̇здтам̣ нараасабхам̣;

‘‘Sumedhaṃ bhagavantāhaṃ, lokajeṭṭhaṃ narāsabhaṃ;

вуубагадтам̣ вихаранд̇ам̣, ад̣̇д̣̇асам̣ логанааяагам̣.

Vūpakaṭṭhaṃ viharantaṃ, addasaṃ lokanāyakaṃ.

‘‘убаг̇анд̇ваана самб̣уд̣̇д̇хам̣, сумзд̇хам̣ логанааяагам̣;

‘‘Upagantvāna sambuddhaṃ, sumedhaṃ lokanāyakaṃ;

ан̃ж̇алим̣ баг̇г̇ахзд̇ваана, б̣уд̣̇д̇хасздтамаяаажахам̣.

Añjaliṃ paggahetvāna, buddhaseṭṭhamayācahaṃ.

‘‘анугамба махаавийра, логаж̇здта нараасабха;

‘‘Anukampa mahāvīra, lokajeṭṭha narāsabha;

бад̣̇ийбам̣ д̇з бад̣̇ассаами, ругкамууламхи жхааяад̇о.

Padīpaṃ te padassāmi, rukkhamūlamhi jhāyato.

‘‘ад̇хиваасзси со д̇хийро, саяамбхуу вад̣̇ад̇ам̣ варо;

‘‘Adhivāsesi so dhīro, sayambhū vadataṃ varo;

д̣̇умзсу винивиж̇жхид̇ваа, яанд̇ам̣ яож̇ияахам̣ д̇ад̣̇аа.

Dumesu vinivijjhitvā, yantaṃ yojiyahaṃ tadā.

‘‘сахассаваддим̣ баад̣̇аасим̣, б̣уд̣̇д̇хасса логаб̣анд̇хуно;

‘‘Sahassavaṭṭiṃ pādāsiṃ, buddhassa lokabandhuno;

сад̇д̇аахам̣ баж̇ж̇алид̇ваана, д̣̇ийбаа вуубасамим̣су мз.

Sattāhaṃ pajjalitvāna, dīpā vūpasamiṃsu me.

‘‘д̇зна жид̇д̇аббасаад̣̇зна, жзд̇анаабан̣ид̇хийхи жа;

‘‘Tena cittappasādena, cetanāpaṇidhīhi ca;

ж̇ахид̇ваа маанусам̣ д̣̇зхам̣, вимаанамубабаж̇ж̇ахам̣.

Jahitvā mānusaṃ dehaṃ, vimānamupapajjahaṃ.

‘‘убабаннасса д̣̇звад̇д̇ам̣, б̣яамхам̣ ааси суниммид̇ам̣;

‘‘Upapannassa devattaṃ, byamhaṃ āsi sunimmitaṃ;

саманд̇ад̇о баж̇ж̇алад̇и, д̣̇ийбад̣̇аанассид̣̇ам̣ палам̣.

Samantato pajjalati, dīpadānassidaṃ phalaṃ.

‘‘саманд̇аа яож̇анасад̇ам̣, вирожзсимахам̣ д̇ад̣̇аа;

‘‘Samantā yojanasataṃ, virocesimahaṃ tadā;

саб̣б̣з д̣̇звз абхибхоми, д̣̇ийбад̣̇аанассид̣̇ам̣ палам̣.

Sabbe deve abhibhomi, dīpadānassidaṃ phalaṃ.

‘‘д̇им̣сагаббаани д̣̇звинд̣̇о, д̣̇звараж̇ж̇амагаараяим̣;

‘‘Tiṃsakappāni devindo, devarajjamakārayiṃ;

на мам̣ гзжийд̇иман̃н̃анд̇и, д̣̇ийбад̣̇аанассид̣̇ам̣ палам̣.

Na maṃ kecītimaññanti, dīpadānassidaṃ phalaṃ.

‘‘адтавийсад̇игкад̇д̇ун̃жа, жаггавад̇д̇ий ахосахам̣;

‘‘Aṭṭhavīsatikkhattuñca, cakkavattī ahosahaṃ;

д̣̇иваа рад̇д̇ин̃жа бассаами, саманд̇аа яож̇анам̣ д̇ад̣̇аа.

Divā rattiñca passāmi, samantā yojanaṃ tadā.

‘‘сахассалогам̣ н̃аан̣зна, бассаами сад̇т̇у саасанз;

‘‘Sahassalokaṃ ñāṇena, passāmi satthu sāsane;

д̣̇иб̣б̣ажагкумануббад̇д̇о, д̣̇ийбад̣̇аанассид̣̇ам̣ палам̣.

Dibbacakkhumanuppatto, dīpadānassidaṃ phalaṃ.

‘‘сумзд̇хо наама самб̣уд̣̇д̇хо, д̇им̣сагаббасахассид̇о;

‘‘Sumedho nāma sambuddho, tiṃsakappasahassito;

д̇асса д̣̇ийбо маяаа д̣̇инно, виббасаннзна жзд̇асаа.

Tassa dīpo mayā dinno, vippasannena cetasā.

‘‘бадисамбхид̣̇аа жад̇ассо…бз… гад̇ам̣ б̣уд̣̇д̇хасса саасана’’нд̇и.

‘‘Paṭisambhidā catasso…pe… kataṃ buddhassa sāsana’’nti.

ат̇а нам̣ сад̇т̇аа абарабхааг̇з ж̇зд̇аванамахаавихаарз арияаг̇ан̣амаж̇жхз нисинно д̣̇иб̣б̣ажагкугаанам̣ аг̇г̇адтаанз табзси ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ д̣̇иб̣б̣ажагкугаанам̣ яад̣̇ид̣̇ам̣ ануруд̣̇д̇хо’’д̇и (а. ни. 1.180, 192).

Atha naṃ satthā aparabhāge jetavanamahāvihāre ariyagaṇamajjhe nisinno dibbacakkhukānaṃ aggaṭṭhāne ṭhapesi ‘‘etadaggaṃ, bhikkhave, mama sāvakānaṃ bhikkhūnaṃ dibbacakkhukānaṃ yadidaṃ anuruddho’’ti (a. ni. 1.180, 192).

со вимуд̇д̇исукам̣ бадисам̣взд̣̇ий вихаранд̇о згад̣̇ивасам̣ ад̇д̇ано бадибад̇д̇им̣ бажжавзгкид̇ваа бийд̇исоманассаж̇аад̇о уд̣̇аанавасзна ‘‘бахааяа маад̇аабид̇аро’’д̇иаад̣̇игаа г̇аат̇аа абхааси. гзжи бана ‘‘т̇зрасса баб̣б̣аж̇ж̇ам̣ арахад̇д̇аббад̇д̇ин̃жа багаасзнд̇зхи сан̇г̇ийд̇игаарзхи аад̣̇ид̇о жад̇ассо г̇аат̇аа бхаасид̇аа. д̇ад̇о бараа т̇зрасса арияавам̣сабадибад̇д̇ияаа аараад̇хид̇ажид̇д̇зна бхаг̇авад̇аа бхаасид̇аа. ид̇араа саб̣б̣ааби д̇зна д̇зна гааран̣зна т̇зрзнзва бхаасид̇аа’’д̇и вад̣̇анд̇и. ид̇и саб̣б̣ат̇ааби имаа г̇аат̇аа т̇зрзна бхаасид̇ааби, т̇зрам̣ уд̣̇д̣̇исса бхаасид̇ааби т̇зрасса жзд̇аа г̇аат̇аад̇и взд̣̇ид̇аб̣б̣аа. сзяяат̇ид̣̇ам̣ –

So vimuttisukhaṃ paṭisaṃvedī viharanto ekadivasaṃ attano paṭipattiṃ paccavekkhitvā pītisomanassajāto udānavasena ‘‘pahāya mātāpitaro’’tiādikā gāthā abhāsi. Keci pana ‘‘therassa pabbajjaṃ arahattappattiñca pakāsentehi saṅgītikārehi ādito catasso gāthā bhāsitā. Tato parā therassa ariyavaṃsapaṭipattiyā ārādhitacittena bhagavatā bhāsitā. Itarā sabbāpi tena tena kāraṇena thereneva bhāsitā’’ti vadanti. Iti sabbathāpi imā gāthā therena bhāsitāpi, theraṃ uddissa bhāsitāpi therassa cetā gāthāti veditabbā. Seyyathidaṃ –

892.

‘‘бахааяа маад̇аабид̇аро, бхаг̇иний н̃аад̇ибхаад̇аро;

‘‘Pahāya mātāpitaro, bhaginī ñātibhātaro;

бан̃жа гаамаг̇ун̣з хид̇ваа, ануруд̣̇д̇хова жхааяад̇и.

Pañca kāmaguṇe hitvā, anuruddhova jhāyati.

893.

‘‘самзд̇о нажжаг̇ийд̇зхи, саммад̇аал̣аббаб̣од̇хано;

‘‘Sameto naccagītehi, sammatāḷappabodhano;

на д̇зна суд̣̇д̇химаж̇жхаг̇ам̣, маарасса висаяз рад̇о.

Na tena suddhimajjhagaṃ, mārassa visaye rato.

894.

‘‘зд̇ан̃жа самад̇иггамма, рад̇о б̣уд̣̇д̇хасса саасанз;

‘‘Etañca samatikkamma, rato buddhassa sāsane;

саб̣б̣огхам̣ самад̇иггамма, ануруд̣̇д̇хова жхааяад̇и.

Sabboghaṃ samatikkamma, anuruddhova jhāyati.

895.

‘‘руубаа сад̣̇д̣̇аа расаа г̇анд̇хаа, подтаб̣б̣аа жа манорамаа;

‘‘Rūpā saddā rasā gandhā, phoṭṭhabbā ca manoramā;

зд̇з жа самад̇иггамма, ануруд̣̇д̇хова жхааяад̇и.

Ete ca samatikkamma, anuruddhova jhāyati.

896.

‘‘бин̣д̣абаад̇амад̇игганд̇о, зго ад̣̇уд̇ияо муни;

‘‘Piṇḍapātamatikkanto, eko adutiyo muni;

зсад̇и бам̣сугуулаани ануруд̣̇д̇хо анаасаво.

Esati paṃsukūlāni anuruddho anāsavo.

897.

‘‘вижиний аг̇г̇ахий д̇хови, раж̇аяий д̇хаараяий муни;

‘‘Vicinī aggahī dhovi, rajayī dhārayī muni;

бам̣сугуулаани мад̇имаа, ануруд̣̇д̇хо анаасаво.

Paṃsukūlāni matimā, anuruddho anāsavo.

898.

‘‘махижчо жа асанд̇удто, сам̣садто яо жа уд̣̇д̇хад̇о;

‘‘Mahiccho ca asantuṭṭho, saṃsaṭṭho yo ca uddhato;

д̇асса д̇хаммаа имз хонд̇и, баабагаа сам̣гилзсигаа.

Tassa dhammā ime honti, pāpakā saṃkilesikā.

899.

‘‘сад̇о жа ход̇и аббижчо, санд̇удто авигхаад̇аваа;

‘‘Sato ca hoti appiccho, santuṭṭho avighātavā;

бавивзгарад̇о вид̇д̇о, нижжамаарад̣̇д̇хавийрияо.

Pavivekarato vitto, niccamāraddhavīriyo.

900.

‘‘д̇асса д̇хаммаа имз хонд̇и, гусалаа б̣од̇хибагкигаа;

‘‘Tassa dhammā ime honti, kusalā bodhipakkhikā;

анаасаво жа со ход̇и, ид̇и вуд̇д̇ам̣ махзсинаа.

Anāsavo ca so hoti, iti vuttaṃ mahesinā.

901.

‘‘мама сан̇габбаман̃н̃ааяа, сад̇т̇аа логз ануд̇д̇аро;

‘‘Mama saṅkappamaññāya, satthā loke anuttaro;

маномаязна гааязна, ид̣̇д̇хияаа убасан̇гами.

Manomayena kāyena, iddhiyā upasaṅkami.

902.

‘‘яад̣̇аа мз аху сан̇габбо, д̇ад̇о уд̇д̇ари д̣̇зсаяи;

‘‘Yadā me ahu saṅkappo, tato uttari desayi;

ниббабан̃жарад̇о б̣уд̣̇д̇хо, ниббабан̃жамад̣̇зсаяи.

Nippapañcarato buddho, nippapañcamadesayi.

903.

‘‘д̇ассаахам̣ д̇хаммаман̃н̃ааяа, вихаасим̣ саасанз рад̇о;

‘‘Tassāhaṃ dhammamaññāya, vihāsiṃ sāsane rato;

д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасанам̣.

Tisso vijjā anuppattā, kataṃ buddhassa sāsanaṃ.

904.

‘‘бан̃жабан̃н̃аасавассаани, яад̇о нзсаж̇ж̇иго ахам̣;

‘‘Pañcapaññāsavassāni, yato nesajjiko ahaṃ;

бан̃жавийсад̇ивассаани, яад̇о мид̣̇д̇хам̣ самуухад̇ам̣.

Pañcavīsativassāni, yato middhaṃ samūhataṃ.

905.

‘‘нааху ассаасабассаасаа, тид̇ажид̇д̇асса д̇аад̣̇ино;

‘‘Nāhu assāsapassāsā, ṭhitacittassa tādino;

анзж̇о санд̇имаараб̣бха, жагкумаа бариниб̣б̣уд̇о.

Anejo santimārabbha, cakkhumā parinibbuto.

906.

‘‘асаллийнзна жид̇д̇зна, взд̣̇анам̣ аж̇жхаваасаяи;

‘‘Asallīnena cittena, vedanaṃ ajjhavāsayi;

баж̇ж̇од̇ассзва ниб̣б̣аанам̣, вимогко жзд̇асо аху.

Pajjotasseva nibbānaṃ, vimokkho cetaso ahu.

907.

‘‘зд̇з бажчимагаа д̣̇аани, мунино пассабан̃жамаа;

‘‘Ete pacchimakā dāni, munino phassapañcamā;

наан̃н̃з д̇хаммаа бхависсанд̇и, самб̣уд̣̇д̇хз бариниб̣б̣уд̇з.

Nāññe dhammā bhavissanti, sambuddhe parinibbute.

908.

‘‘над̇т̇и д̣̇аани бунааваасо, д̣̇звагааяасми ж̇аалини;

‘‘Natthi dāni punāvāso, devakāyasmi jālini;

вигкийн̣о ж̇аад̇исам̣сааро, над̇т̇и д̣̇аани бунаб̣бхаво.

Vikkhīṇo jātisaṃsāro, natthi dāni punabbhavo.

909.

‘‘яасса мухуд̇д̇зна сахассад̇хаа, лого сам̣вид̣̇ид̇о саб̣рахмагаббо;

‘‘Yassa muhuttena sahassadhā, loko saṃvidito sabrahmakappo;

васий ид̣̇д̇хиг̇ун̣з жуд̇уубабаад̇з, гаалз бассад̇и д̣̇звад̇аа са бхигку.

Vasī iddhiguṇe cutūpapāte, kāle passati devatā sa bhikkhu.

910.

‘‘аннабхааро бурз аасим̣, д̣̇алид̣̇д̣̇о гхаасахаараго;

‘‘Annabhāro pure āsiṃ, daliddo ghāsahārako;

саман̣ам̣ бадибаад̣̇зсим̣, убаридтам̣ яасассинам̣.

Samaṇaṃ paṭipādesiṃ, upariṭṭhaṃ yasassinaṃ.

911.

‘‘сомхи сагяагулз ж̇аад̇о, ануруд̣̇д̇ход̇и мам̣ вид̣̇уу;

‘‘Somhi sakyakule jāto, anuruddhoti maṃ vidū;

убзд̇о нажжаг̇ийд̇зхи, саммад̇аал̣аббаб̣од̇хано.

Upeto naccagītehi, sammatāḷappabodhano.

912.

‘‘ат̇ад̣̇д̣̇асаасим̣ самб̣уд̣̇д̇хам̣, сад̇т̇аарам̣ агуд̇обхаяам̣;

‘‘Athaddasāsiṃ sambuddhaṃ, satthāraṃ akutobhayaṃ;

д̇асмим̣ жид̇д̇ам̣ басаад̣̇зд̇ваа, баб̣б̣аж̇им̣ анаг̇аарияам̣.

Tasmiṃ cittaṃ pasādetvā, pabbajiṃ anagāriyaṃ.

913.

‘‘буб̣б̣зниваасам̣ ж̇аанаами, яад̇т̇а мз вусид̇ам̣ бурз;

‘‘Pubbenivāsaṃ jānāmi, yattha me vusitaṃ pure;

д̇аавад̇им̣сзсу д̣̇звзсу, адтаасим̣ саггаж̇аад̇ияаа.

Tāvatiṃsesu devesu, aṭṭhāsiṃ sakkajātiyā.

914.

‘‘сад̇д̇агкад̇д̇ум̣ мануссинд̣̇о, ахам̣ раж̇ж̇амагаараяим̣;

‘‘Sattakkhattuṃ manussindo, ahaṃ rajjamakārayiṃ;

жаад̇уранд̇о виж̇ид̇аавий, ж̇амб̣усан̣д̣асса иссаро;

Cāturanto vijitāvī, jambusaṇḍassa issaro;

ад̣̇ан̣д̣зна асад̇т̇зна, д̇хаммзна анусаасаяим̣.

Adaṇḍena asatthena, dhammena anusāsayiṃ.

915.

‘‘ид̇о сад̇д̇а д̇ад̇о сад̇д̇а, сам̣саараани жад̇уд̣̇д̣̇аса;

‘‘Ito satta tato satta, saṃsārāni catuddasa;

ниваасамабхиж̇ааниссам̣, д̣̇звалогз тид̇о д̇ад̣̇аа.

Nivāsamabhijānissaṃ, devaloke ṭhito tadā.

916.

‘‘бан̃жан̇г̇игз самаад̇химхи, санд̇з згод̣̇ибхаавид̇з;

‘‘Pañcaṅgike samādhimhi, sante ekodibhāvite;

бадиббассад̣̇д̇хилад̣̇д̇хамхи, д̣̇иб̣б̣ажагку висуж̇жхи мз.

Paṭippassaddhiladdhamhi, dibbacakkhu visujjhi me.

917.

‘‘жуд̇уубабаад̇ам̣ ж̇аанаами, сад̇д̇аанам̣ ааг̇ад̇им̣ г̇ад̇им̣;

‘‘Cutūpapātaṃ jānāmi, sattānaṃ āgatiṃ gatiṃ;

ид̇т̇абхааван̃н̃ат̇аабхаавам̣, жхаанз бан̃жан̇г̇игз тид̇о.

Itthabhāvaññathābhāvaṃ, jhāne pañcaṅgike ṭhito.

918.

‘‘барижин̣н̣о маяаа сад̇т̇аа…бз… бхаванзд̇д̇и самуухад̇аа.

‘‘Pariciṇṇo mayā satthā…pe… bhavanetti samūhatā.

919.

‘‘важ̇ж̇ийнам̣ взл̣уваг̇аамз, ахам̣ ж̇ийвид̇асан̇каяаа;

‘‘Vajjīnaṃ veḷuvagāme, ahaṃ jīvitasaṅkhayā;

хздтад̇о взл̣уг̇умб̣асмим̣, ниб̣б̣ааяиссам̣ анаасаво’’д̇и.

Heṭṭhato veḷugumbasmiṃ, nibbāyissaṃ anāsavo’’ti.

д̇ад̇т̇а бахааяаад̇и баж̇ахид̇ваа. маад̇аабид̇арод̇и маад̇аран̃жа бид̇аран̃жа. аяан̃хзд̇т̇а ад̇хиббааяо – яат̇аа ан̃н̃з гзжи н̃аад̇ибаариж̇ун̃н̃зна ваа бхог̇абаариж̇ун̃н̃зна ваа абхибхууд̇аа баб̣б̣аж̇анд̇и, баб̣б̣аж̇ид̇аа жа гижжанд̇арабасуд̇аа вихаранд̇и, на звам̣ маяам̣. маяам̣ бана маханд̇ам̣ н̃аад̇ибариваддам̣, маханд̇ан̃жа бхог̇агканд̇хам̣ бахааяа гаамзсу нирабзгкаа баб̣б̣аж̇ид̇аад̇и. жхааяад̇ийд̇и аарамман̣уубаниж̇жхаанам̣ лагкан̣уубаниж̇жхаанан̃жаад̇и, д̣̇увид̇хамби жхаанам̣ ануяуд̇д̇о вихарад̇и.

Tattha pahāyāti pajahitvā. Mātāpitaroti mātarañca pitarañca. Ayañhettha adhippāyo – yathā aññe keci ñātipārijuññena vā bhogapārijuññena vā abhibhūtā pabbajanti, pabbajitā ca kiccantarapasutā viharanti, na evaṃ mayaṃ. Mayaṃ pana mahantaṃ ñātiparivaṭṭaṃ, mahantañca bhogakkhandhaṃ pahāya kāmesu nirapekkhā pabbajitāti. Jhāyatīti ārammaṇūpanijjhānaṃ lakkhaṇūpanijjhānañcāti, duvidhampi jhānaṃ anuyutto viharati.

самзд̇о нажжаг̇ийд̇зхийд̇и нажжзхи жа г̇ийд̇зхи жа саман̇г̇ийбхууд̇о, нажжаани бассанд̇о г̇ийд̇аани сун̣анд̇од̇и ад̇т̇о. ‘‘саммад̇о’’д̇и жа батанд̇и, нажжаг̇ийд̇зхи бууж̇ид̇од̇и ад̇т̇о. саммад̇аал̣аббаб̣од̇ханод̇и саммад̇аал̣асад̣̇д̣̇зхи бажжуусагаалз баб̣од̇хзд̇аб̣б̣о. на д̇зна суд̣̇д̇химаж̇жхаг̇анд̇и д̇зна гаамабхог̇зна сам̣саарасуд̣̇д̇хим̣ наад̇хиг̇ажчим̣. маарасса висаяз рад̇од̇и гилзсамаарасса висаяабхууд̇з гаамаг̇ун̣з рад̇о. ‘‘гилзсамаарасса висаяабхууд̇зна гаамаг̇ун̣абхог̇зна сам̣саарасуд̣̇д̇хи ход̇ий’’д̇и звам̣д̣̇идтиго ахуд̇ваад̇и ад̇т̇о. д̇знааха ‘‘зд̇ан̃жа самад̇иггаммаа’’д̇иаад̣̇и. д̇ад̇т̇а зд̇анд̇и зд̇ам̣ бан̃жавид̇хамби гаамаг̇ун̣ам̣. самад̇иггаммаад̇и самад̇иггамид̇ваа, анабзгко чад̣д̣зд̇ваад̇и ад̇т̇о. саб̣б̣огханд̇и гаамогхаад̣̇игам̣ саб̣б̣амби огхам̣.

Sameto naccagītehīti naccehi ca gītehi ca samaṅgībhūto, naccāni passanto gītāni suṇantoti attho. ‘‘Sammato’’ti ca paṭhanti, naccagītehi pūjitoti attho. Sammatāḷappabodhanoti sammatāḷasaddehi paccūsakāle pabodhetabbo. Na tena suddhimajjhaganti tena kāmabhogena saṃsārasuddhiṃ nādhigacchiṃ. Mārassa visaye ratoti kilesamārassa visayabhūte kāmaguṇe rato. ‘‘Kilesamārassa visayabhūtena kāmaguṇabhogena saṃsārasuddhi hotī’’ti evaṃdiṭṭhiko ahutvāti attho. Tenāha ‘‘etañca samatikkammā’’tiādi. Tattha etanti etaṃ pañcavidhampi kāmaguṇaṃ. Samatikkammāti samatikkamitvā, anapekkho chaḍḍetvāti attho. Sabboghanti kāmoghādikaṃ sabbampi oghaṃ.

бан̃жа гаамаг̇ун̣з саруубад̇о д̣̇ассзд̇ум̣ ‘‘руубаа сад̣̇д̣̇аа’’д̇иаад̣̇и вуд̇д̇ам̣. д̇ад̇т̇а манорамаад̇и лобханийяадтзна манам̣ рамаяанд̇ийд̇и манорамаа, манаабияаад̇и вуд̇д̇ам̣ ход̇и. яат̇ааха ‘‘гад̇амз бан̃жа манаабияаа руубаа, манаабияаа сад̣̇д̣̇аа’’д̇иаад̣̇и (ма. ни. 3.328 ад̇т̇ад̇о самаанам̣).

Pañca kāmaguṇe sarūpato dassetuṃ ‘‘rūpā saddā’’tiādi vuttaṃ. Tattha manoramāti lobhanīyaṭṭhena manaṃ ramayantīti manoramā, manāpiyāti vuttaṃ hoti. Yathāha ‘‘katame pañca manāpiyā rūpā, manāpiyā saddā’’tiādi (ma. ni. 3.328 atthato samānaṃ).

бин̣д̣абаад̇амад̇игганд̇од̇и бин̣д̣абаад̇аг̇г̇ахан̣ам̣ ад̇игганд̇о, бин̣д̣абаад̇аг̇г̇ахан̣ад̇о нивад̇д̇знд̇од̇и ад̇т̇о. згод̇и згаагий абажчаасаман̣о. ад̣̇уд̇ияод̇и нид̇д̇ан̣хо. д̇ан̣хаа хи бурисасса д̣̇уд̇ияо наама. яат̇ааха ‘‘д̇ан̣хаад̣̇уд̇ияо бурисо’’д̇и (ид̇иву. 15, 105; махаани. 191). зсад̇ийд̇и бариязсад̇и.

Piṇḍapātamatikkantoti piṇḍapātaggahaṇaṃ atikkanto, piṇḍapātaggahaṇato nivattentoti attho. Ekoti ekākī apacchāsamaṇo. Adutiyoti nittaṇho. Taṇhā hi purisassa dutiyo nāma. Yathāha ‘‘taṇhādutiyo puriso’’ti (itivu. 15, 105; mahāni. 191). Esatīti pariyesati.

вижинийд̇и зсанд̇ова д̇ад̇т̇а д̇ад̇т̇а сан̇гаарагуудаад̣̇игз бам̣сугуулуббад̇д̇идтаанз вижини. аг̇г̇ахийд̇и вижинид̇ваа асужимагкид̇амби аж̇иг̇ужчанд̇о г̇ан̣хи. д̇ховийд̇и, вигкаалзси. раж̇аяийд̇и д̇ховид̇ваа г̇ахид̇ам̣ сиб̣б̣ид̇ваа габбияараж̇анзна раж̇аяи. д̇хаараяийд̇и раж̇ид̇ваа габбаб̣инд̣̇ум̣ д̣̇ад̇ваа д̇хаарзси, ниваасзси жзва бааруби жа.

Vicinīti esantova tattha tattha saṅkārakūṭādike paṃsukūluppattiṭṭhāne vicini. Aggahīti vicinitvā asucimakkhitampi ajigucchanto gaṇhi. Dhovīti, vikkhālesi. Rajayīti dhovitvā gahitaṃ sibbitvā kappiyarajanena rajayi. Dhārayīti rajitvā kappabinduṃ datvā dhāresi, nivāsesi ceva pārupi ca.

ид̣̇аани баажийнавам̣сад̣̇ааяз сад̇т̇аараа д̣̇иннаоваад̣̇ам̣ д̇асса жа ад̇д̇анаа мад̇т̇агаббад̇д̇абхаавам̣ д̣̇ийбзнд̇о ‘‘махижчо жа асанд̇удто’’д̇иаад̣̇игаа г̇аат̇аа абхааси. д̇ад̇т̇а махижчод̇и махад̇ияаа бажжаяижчааяа саманнааг̇ад̇о, ул̣аарул̣аарз б̣ахуу жа бажжаяз ижчанд̇од̇и ад̇т̇о. асанд̇удтод̇и ниссанд̇удто, яат̇аалаабхасанд̇осаад̣̇инаа санд̇осзна вирахид̇о. сам̣садтод̇и г̇ихийхи жзва баб̣б̣аж̇ид̇зхи жа анануломигзна сам̣саг̇г̇зна сам̣садто. уд̣̇д̇хад̇од̇и угкид̇д̇о. д̇ассаад̇и ‘‘махижчо’’д̇иаад̣̇инаа вуд̇д̇абуг̇г̇аласса. д̇хаммаад̇и махижчад̇аа асанд̇осо, сам̣садтад̇аа вигкзбод̇и ийд̣̇исаа. лаамагадтзна баабагаа. сам̣гилзсигаад̇и д̇асса жид̇д̇асса малийнабхаавагаран̣ад̇о сам̣гилзсигаа д̇хаммаа хонд̇и.

Idāni pācīnavaṃsadāye satthārā dinnaovādaṃ tassa ca attanā matthakappattabhāvaṃ dīpento ‘‘mahiccho ca asantuṭṭho’’tiādikā gāthā abhāsi. Tattha mahicchoti mahatiyā paccayicchāya samannāgato, uḷāruḷāre bahū ca paccaye icchantoti attho. Asantuṭṭhoti nissantuṭṭho, yathālābhasantosādinā santosena virahito. Saṃsaṭṭhoti gihīhi ceva pabbajitehi ca ananulomikena saṃsaggena saṃsaṭṭho. Uddhatoti ukkhitto. Tassāti ‘‘mahiccho’’tiādinā vuttapuggalassa. Dhammāti mahicchatā asantoso, saṃsaṭṭhatā vikkhepoti īdisā. Lāmakaṭṭhena pāpakā. Saṃkilesikāti tassa cittassa malīnabhāvakaraṇato saṃkilesikā dhammā honti.

сад̇о жа ход̇и аббижчод̇и яад̣̇аа банааяам̣ буг̇г̇ало галяаан̣амид̇д̇з сзванд̇о бхаж̇анд̇о баяирубаасанд̇о сад̣̇д̇хаммам̣ сун̣анд̇о яонисо манаси гаронд̇о сад̇имаа жа махижчад̇ам̣ бахааяа аббижчо жа ход̇и. асанд̇осам̣ бахааяа санд̇удто, жид̇д̇асса вигхаад̇агарам̣ вигкзбам̣ бахааяа авигхаад̇аваа авигкид̇д̇о самаахид̇о, г̇ан̣асан̇г̇ан̣игам̣ бахааяа бавивзгарад̇о, вивзгаабхирад̇ияаа ниб̣б̣ид̣̇ааяа д̇хаммабийд̇ияаа вид̇д̇о сумано д̇удтажид̇д̇о, саб̣б̣асо госаж̇ж̇абахаанзна аарад̣̇д̇хавийрияо.

Satoca hoti appicchoti yadā panāyaṃ puggalo kalyāṇamitte sevanto bhajanto payirupāsanto saddhammaṃ suṇanto yoniso manasi karonto satimā ca mahicchataṃ pahāya appiccho ca hoti. Asantosaṃ pahāya santuṭṭho, cittassa vighātakaraṃ vikkhepaṃ pahāya avighātavā avikkhitto samāhito, gaṇasaṅgaṇikaṃ pahāya pavivekarato, vivekābhiratiyā nibbidāya dhammapītiyā vitto sumano tuṭṭhacitto, sabbaso kosajjapahānena āraddhavīriyo.

д̇асса звам̣ аббижчад̇аад̣̇иг̇ун̣асаманнааг̇ад̇асса имз сад̇ибадтаанаад̣̇аяо сад̇д̇ад̇им̣саббабхзд̣̇аа д̇ивид̇хавибассанаасан̇г̇ахаа госалласамбхууд̇адтзна гусалаа, маг̇г̇абарияаабаннаа б̣од̇хибагкигаа д̇хаммаа хонд̇и. со д̇зхи саманнааг̇ад̇о саб̣б̣асо аасаваанам̣ кзбанзна аг̇г̇амаг̇г̇агкан̣ад̇о бадтааяа анаасаво жа ход̇и. ид̇и звам̣ вуд̇д̇ам̣ махзсинаа саммаасамб̣уд̣̇д̇хзна баажийнавам̣сад̣̇ааяз махаабурисавид̇аггз мад̇т̇агам̣ баабанавасзнаад̇и ад̇хиббааяо.

Tassa evaṃ appicchatādiguṇasamannāgatassa ime satipaṭṭhānādayo sattatiṃsappabhedā tividhavipassanāsaṅgahā kosallasambhūtaṭṭhena kusalā, maggapariyāpannā bodhipakkhikā dhammā honti. So tehi samannāgato sabbaso āsavānaṃ khepanena aggamaggakkhaṇato paṭṭhāya anāsavo ca hoti. Iti evaṃ vuttaṃ mahesinā sammāsambuddhena pācīnavaṃsadāye mahāpurisavitakke matthakaṃ pāpanavasenāti adhippāyo.

мама сан̇габбаман̃н̃ааяаад̇и ‘‘абижчассааяам̣, бхигкавз, д̇хаммо, нааяам̣ д̇хаммо махижчассаа’’д̇иаад̣̇инаа (а. ни. 8.30) махаабурисавид̇аггавасзна аарад̣̇д̇хам̣, д̇з жа мад̇т̇агам̣ баабзд̇ум̣ асамад̇т̇абхаавзна тид̇ам̣ мама сан̇габбам̣ ж̇аанид̇ваа. маномаязнаад̇и маномаязна вияа, манасаа ниммид̇асад̣̇исзна барин̣аамид̇знаад̇и ад̇т̇о. ид̣̇д̇хияаад̇и ‘‘аяам̣ гааяо ид̣̇ам̣ жид̇д̇ам̣ вияа ход̇уу’’д̇и звам̣ бавад̇д̇аад̇хидтаанид̣̇д̇хияаа.

Mamasaṅkappamaññāyāti ‘‘apicchassāyaṃ, bhikkhave, dhammo, nāyaṃ dhammo mahicchassā’’tiādinā (a. ni. 8.30) mahāpurisavitakkavasena āraddhaṃ, te ca matthakaṃ pāpetuṃ asamatthabhāvena ṭhitaṃ mama saṅkappaṃ jānitvā. Manomayenāti manomayena viya, manasā nimmitasadisena pariṇāmitenāti attho. Iddhiyāti ‘‘ayaṃ kāyo idaṃ cittaṃ viya hotū’’ti evaṃ pavattaadhiṭṭhāniddhiyā.

яад̣̇аа мз аху сан̇габбод̇и яасмим̣ гаалз маяхам̣ ‘‘гийд̣̇исо ну ко адтамо махаабурисавид̇агго’’д̇и баривид̇агго ахоси. д̇ад̇о мама сан̇габбаман̃н̃ааяа ид̣̇д̇хияаа убасан̇гамийд̇и яож̇анаа. уд̇д̇ари д̣̇зсаяийд̇и ‘‘ниббабан̃жаараамассааяам̣, бхигкавз, д̇хаммо ниббабан̃жарад̇ино, нааяам̣д̇хаммо бабан̃жаараамасса бабан̃жарад̇ино’’д̇и (а. ни. 8.30) имамадтамам̣ махаабурисавид̇аггам̣ буурзнд̇о убари д̣̇зсаяи. д̇ам̣ бана д̣̇зсид̇ам̣ д̇хаммам̣ д̣̇зсзнд̇о ааха ‘‘ниббабан̃жарад̇о б̣уд̣̇д̇хо, ниббабан̃жамад̣̇зсаяий’’д̇и. бабан̃жаа наама рааг̇аад̣̇аяо гилзсаа, д̇зсам̣ вуубасамад̇ааяа, д̇ад̣̇абхаавад̇о жа логуд̇д̇арад̇хаммаа ниббабан̃жаа наама. д̇асмим̣ ниббабан̃жз рад̇о абхирад̇о саммаасамб̣уд̣̇д̇хо яат̇аа д̇ам̣ баабун̣аами, д̇ат̇аа д̇аад̣̇исам̣ д̇хаммам̣ ад̣̇зсаяи, саамуггам̣сигам̣ жад̇усажжад̇хаммад̣̇зсанам̣ багаасаяийд̇и ад̇т̇о.

Yadāme ahu saṅkappoti yasmiṃ kāle mayhaṃ ‘‘kīdiso nu kho aṭṭhamo mahāpurisavitakko’’ti parivitakko ahosi. Tato mama saṅkappamaññāya iddhiyā upasaṅkamīti yojanā. Uttari desayīti ‘‘nippapañcārāmassāyaṃ, bhikkhave, dhammo nippapañcaratino, nāyaṃdhammo papañcārāmassa papañcaratino’’ti (a. ni. 8.30) imamaṭṭhamaṃ mahāpurisavitakkaṃ pūrento upari desayi. Taṃ pana desitaṃ dhammaṃ desento āha ‘‘nippapañcarato buddho, nippapañcamadesayī’’ti. Papañcā nāma rāgādayo kilesā, tesaṃ vūpasamatāya, tadabhāvato ca lokuttaradhammā nippapañcā nāma. Tasmiṃ nippapañce rato abhirato sammāsambuddho yathā taṃ pāpuṇāmi, tathā tādisaṃ dhammaṃ adesayi, sāmukkaṃsikaṃ catusaccadhammadesanaṃ pakāsayīti attho.

д̇ассаахам̣ д̇хаммаман̃н̃ааяаад̇и д̇ассаа сад̇т̇у д̣̇зсанааяа д̇хаммам̣ ж̇аанид̇ваа яат̇аанусидтам̣ бадибаж̇ж̇анд̇о вихаасим̣ сигкад̇д̇аяасан̇г̇ахз саасанз рад̇о абхирад̇о худ̇ваад̇и ад̇т̇о.

Tassāhaṃ dhammamaññāyāti tassā satthu desanāya dhammaṃ jānitvā yathānusiṭṭhaṃ paṭipajjanto vihāsiṃ sikkhattayasaṅgahe sāsane rato abhirato hutvāti attho.

сад̇т̇аараа ад̇д̇ано самааг̇амам̣ д̇зна саад̇хид̇амад̇т̇ам̣ д̣̇ассзд̇ваа ид̣̇аани ад̇д̇ано баб̣б̣аж̇ид̇агаалад̇о бадтааяа аарад̣̇д̇хавийрияад̇ам̣, гааяз анабзгкад̇ааяа сзяяасукабассасукаанам̣ барижжааг̇ам̣, аббамид̣̇д̇хагаалад̇о бадтааяа аарад̣̇д̇хавийрияад̇ан̃жа д̣̇ассзнд̇о ‘‘бан̃жабан̃н̃аасавассааний’’д̇и г̇аат̇амааха. д̇ад̇т̇а яад̇о нзсаж̇ж̇иго аханд̇и яад̇о бадтааяа ‘‘яог̇аанугуулад̇аа гаммадтаанабарияудтид̇асаббурисажарияаа саллзкавуд̇д̇ий’’д̇и звамаад̣̇иг̇ун̣з д̣̇исваа нзсаж̇ж̇иго ахосим̣ д̇аани бан̃жабан̃н̃ааса вассаани. яад̇о мид̣̇д̇хам̣ самуухад̇анд̇и яад̇о бадтааяа маяаа нид̣̇д̣̇аа барижжад̇д̇аа д̇аани бан̃жавийсад̇ивассаани. ‘‘т̇зрасса бан̃жабан̃н̃аасааяа вассзсу нзсаж̇ж̇игасса сад̇о аад̣̇ид̇о бан̃жавийсад̇ивассаани нид̣̇д̣̇аа наахоси, д̇ад̇о барам̣ сарийрагиламат̇зна бажчимаяаамз нид̣̇д̣̇аа ахосий’’д̇и вад̣̇анд̇и.

Satthārā attano samāgamaṃ tena sādhitamatthaṃ dassetvā idāni attano pabbajitakālato paṭṭhāya āraddhavīriyataṃ, kāye anapekkhatāya seyyasukhapassasukhānaṃ pariccāgaṃ, appamiddhakālato paṭṭhāya āraddhavīriyatañca dassento ‘‘pañcapaññāsavassānī’’ti gāthamāha. Tattha yato nesajjiko ahanti yato paṭṭhāya ‘‘yogānukūlatā kammaṭṭhānapariyuṭṭhitasappurisacariyā sallekhavuttī’’ti evamādiguṇe disvā nesajjiko ahosiṃ tāni pañcapaññāsa vassāni. Yato middhaṃ samūhatanti yato paṭṭhāya mayā niddā pariccattā tāni pañcavīsativassāni. ‘‘Therassa pañcapaññāsāya vassesu nesajjikassa sato ādito pañcavīsativassāni niddā nāhosi, tato paraṃ sarīrakilamathena pacchimayāme niddā ahosī’’ti vadanti.

‘‘нааху ассаасабассаасаа’’ д̇иаад̣̇игаа д̇иссо г̇аат̇аа сад̇т̇у бариниб̣б̣аанагаалз бхигкуухи ‘‘гим̣ бхаг̇аваа бариниб̣б̣уд̇о’’д̇и будто бариниб̣б̣аанабхаавам̣ бавзд̣̇знд̇о ааха. д̇ад̇т̇а нааху ассаасабассаасаа, тид̇ажид̇д̇асса д̇аад̣̇инод̇и ануломабадиломад̇о анзгаагааравогаараа саб̣б̣аа самаабад̇д̇ияо самаабаж̇ж̇ид̇ваа вудтааяа саб̣б̣абажчаа жад̇уд̇т̇аж̇жхаанз тид̇ажид̇д̇асса д̇аад̣̇ино б̣уд̣̇д̇хасса бхаг̇авад̇о ассаасабассаасаа нааху наахзсунд̇и ад̇т̇о. зд̇зна яасмаа жад̇уд̇т̇аж̇жхаанам̣ самаабаннасса гааяасан̇каараа нируж̇жханд̇и. гааяасан̇каараад̇и жа ассаасабассаасаа вужжанд̇и, д̇асмаа жад̇уд̇т̇аж̇жхаанагкан̣ад̇о бадтааяа ассаасабассаасаа наахзсунд̇и д̣̇ассзд̇и. д̇ан̣хаасан̇каад̇ааяа зж̇ааяа абхаавад̇о анзж̇о, самаад̇хисмим̣ тид̇ад̇д̇аа ваа анзж̇о. санд̇имаараб̣бхаад̇и анубаад̣̇исзсам̣ ниб̣б̣аанам̣ аараб̣бха бадижжа санд̇хааяа. жагкумаад̇и бан̃жахи жагкуухи жагкумаа. бариниб̣б̣уд̇од̇и бариниб̣б̣ааяи. аяан̃хзд̇т̇а ад̇т̇о – ниб̣б̣аанаарамман̣ажад̇уд̇т̇аж̇жхаанапаласамаабад̇д̇им̣ самаабаж̇ж̇ид̇ваа д̇ад̣̇ананд̇арамзва анубаад̣̇исзсааяа ниб̣б̣аанад̇хаад̇уяаа бариниб̣б̣уд̇од̇и.

‘‘Nāhu assāsapassāsā’’ tiādikā tisso gāthā satthu parinibbānakāle bhikkhūhi ‘‘kiṃ bhagavā parinibbuto’’ti puṭṭho parinibbānabhāvaṃ pavedento āha. Tattha nāhu assāsapassāsā, ṭhitacittassa tādinoti anulomapaṭilomato anekākāravokārā sabbā samāpattiyo samāpajjitvā vuṭṭhāya sabbapacchā catutthajjhāne ṭhitacittassa tādino buddhassa bhagavato assāsapassāsā nāhu nāhesunti attho. Etena yasmā catutthajjhānaṃ samāpannassa kāyasaṅkhārā nirujjhanti. Kāyasaṅkhārāti ca assāsapassāsā vuccanti, tasmā catutthajjhānakkhaṇato paṭṭhāya assāsapassāsā nāhesunti dasseti. Taṇhāsaṅkhātāya ejāya abhāvato anejo, samādhismiṃ ṭhitattā vā anejo. Santimārabbhāti anupādisesaṃ nibbānaṃ ārabbha paṭicca sandhāya. Cakkhumāti pañcahi cakkhūhi cakkhumā. Parinibbutoti parinibbāyi. Ayañhettha attho – nibbānārammaṇacatutthajjhānaphalasamāpattiṃ samāpajjitvā tadanantarameva anupādisesāya nibbānadhātuyā parinibbutoti.

асаллийнзнаад̇и алийнзна асам̣гудид̇зна сувигасид̇знзва жид̇д̇зна. взд̣̇анам̣ аж̇жхаваасаяийд̇и сад̇о самбаж̇аано худ̇ваа мааран̣анд̇игам̣ взд̣̇анам̣ ад̇хиваасзси, на взд̣̇анаанувад̇д̇ий худ̇ваа ид̇о жид̇о жа самбаривад̇д̇и. баж̇ж̇од̇ассзва ниб̣б̣аанам̣, вимогко жзд̇асо ахууд̇и яат̇аа д̇злан̃жа бадижжа, ваддин̃жа бадижжа баж̇ж̇аланд̇о баж̇ж̇од̇о бад̣̇ийбо д̇зсам̣ баригкаяз ниб̣б̣ааяад̇и. ниб̣б̣уд̇о жа гад̇т̇ажи г̇анд̇ваа на д̇идтад̇и, ан̃н̃ад̣̇ад̇т̇у анд̇арад̇хааяад̇и, ад̣̇ассанамзва г̇ажчад̇и; звам̣ гилзсаабхисан̇каарз ниссааяа бавад̇д̇амаано канд̇хасанд̇аано д̇зсам̣ баригкаяз ниб̣б̣ааяад̇и, ниб̣б̣уд̇о жа гад̇т̇ажи г̇анд̇ваа на д̇идтад̇и, ан̃н̃ад̣̇ад̇т̇у анд̇арад̇хааяад̇и, ад̣̇ассанамзва г̇ажчад̇ийд̇и д̣̇ассзд̇и. д̇зна вуд̇д̇ам̣ ‘‘ниб̣б̣анд̇и д̇хийраа яат̇ааяам̣ бад̣̇ийбо’’д̇и (ку. баа. 6.15), ‘‘ажжий яат̇аа ваад̇авзг̇зна кид̇д̇аа’’д̇и (су. ни. 1080) жа аад̣̇и.

Asallīnenāti alīnena asaṃkuṭitena suvikasiteneva cittena. Vedanaṃ ajjhavāsayīti sato sampajāno hutvā māraṇantikaṃ vedanaṃ adhivāsesi, na vedanānuvattī hutvā ito cito ca samparivatti. Pajjotasseva nibbānaṃ, vimokkho cetaso ahūti yathā telañca paṭicca, vaṭṭiñca paṭicca pajjalanto pajjoto padīpo tesaṃ parikkhaye nibbāyati. Nibbuto ca katthaci gantvā na tiṭṭhati, aññadatthu antaradhāyati, adassanameva gacchati; evaṃ kilesābhisaṅkhāre nissāya pavattamāno khandhasantāno tesaṃ parikkhaye nibbāyati, nibbuto ca katthaci gantvā na tiṭṭhati, aññadatthu antaradhāyati, adassanameva gacchatīti dasseti. Tena vuttaṃ ‘‘nibbanti dhīrā yathāyaṃ padīpo’’ti (khu. pā. 6.15), ‘‘accī yathā vātavegena khittā’’ti (su. ni. 1080) ca ādi.

зд̇зд̇и бариниб̣б̣аанагкан̣з сад̇т̇у санд̇аанз бавад̇д̇амаанаанам̣ д̇хаммаанам̣ ад̇д̇ано бажжагкад̇ааяа вуд̇д̇ам̣. бажчимагаа д̇ад̇о барам̣ жид̇д̇уббаад̣̇аабхаавад̇о. д̣̇аанийд̇и зд̇арахи. пассабан̃жамаад̇и пассабан̃жамагаанам̣ д̇хаммаанам̣ баагадабхаавад̇о вуд̇д̇ам̣. д̇ат̇аа хи жид̇д̇уббаад̣̇агат̇ааяамби пассабан̃жамагаава аад̣̇ид̇о вуд̇д̇аа. ан̃н̃з д̇хаммаад̇и саха ниссаязна ан̃н̃з жид̇д̇ажзд̇асигаа д̇хаммаа, на бариниб̣б̣аанажид̇д̇ажзд̇асигаа. нану д̇зби на бхависсанд̇зваад̇и? сажжам̣ на бхависсанд̇и, аасан̇гаабхаавад̇о бана д̇з санд̇хааяа ‘‘на бхависсанд̇ий’’д̇и на вад̇д̇аб̣б̣амзва. ‘‘ид̇арз бана сзгкабут̇уж̇ж̇анаанам̣ вияа бхависсанд̇и ну ко’’д̇и сияаа аасан̇гаад̇и д̇ад̣̇аасан̇гаанивад̇д̇анад̇т̇ам̣ ‘‘наан̃н̃з д̇хаммаа бхависсанд̇ий’’д̇и вуд̇д̇ам̣.

Eteti parinibbānakkhaṇe satthu santāne pavattamānānaṃ dhammānaṃ attano paccakkhatāya vuttaṃ. Pacchimakā tato paraṃ cittuppādābhāvato. Dānīti etarahi. Phassapañcamāti phassapañcamakānaṃ dhammānaṃ pākaṭabhāvato vuttaṃ. Tathā hi cittuppādakathāyampi phassapañcamakāva ādito vuttā. Aññe dhammāti saha nissayena aññe cittacetasikā dhammā, na parinibbānacittacetasikā. Nanu tepi na bhavissantevāti? Saccaṃ na bhavissanti, āsaṅkābhāvato pana te sandhāya ‘‘na bhavissantī’’ti na vattabbameva. ‘‘Itare pana sekkhaputhujjanānaṃ viya bhavissanti nu kho’’ti siyā āsaṅkāti tadāsaṅkānivattanatthaṃ ‘‘nāññe dhammā bhavissantī’’ti vuttaṃ.

над̇т̇и д̣̇аани бунааваасо, д̣̇звагааяасми ж̇аалинийд̇и, зд̇т̇а ж̇аалинийд̇и д̣̇звад̇ам̣ аалабад̇и, д̣̇звад̇з д̣̇звагааяасмим̣ д̣̇звасамуухз убабаж̇ж̇анавасзна буна ааваасо аавасанам̣ ид̣̇аани маяхам̣ над̇т̇ийд̇и ад̇т̇о. д̇ад̇т̇а гааран̣амааха ‘‘вигкийн̣о’’д̇иаад̣̇инаа. саа гира д̣̇звад̇аа буримад̇д̇абхаавз т̇зрасса баад̣̇абарижааригаа, д̇асмаа ид̣̇аани т̇зрам̣ ж̇ин̣н̣ам̣ вуд̣̇д̇хам̣ д̣̇исваа буримасинзхзна ааг̇анд̇ваа ‘‘д̇ад̇т̇а жид̇д̇ам̣ бан̣ид̇хзхи, яад̇т̇а д̇з вусид̇ам̣ бурз’’д̇и д̣̇звуубабад̇д̇им̣ яаажи. ат̇а ‘‘д̣̇аани над̇т̇ий’’д̇иаад̣̇инаа т̇зро д̇ассаа бадиважанам̣ ад̣̇ааси. д̇ам̣ суд̇ваа д̣̇звад̇аа вихад̇аасаа д̇ад̇т̇званд̇арад̇хааяи.

Natthidāni punāvāso, devakāyasmi jālinīti, ettha jālinīti devataṃ ālapati, devate devakāyasmiṃ devasamūhe upapajjanavasena puna āvāso āvasanaṃ idāni mayhaṃ natthīti attho. Tattha kāraṇamāha ‘‘vikkhīṇo’’tiādinā. Sā kira devatā purimattabhāve therassa pādaparicārikā, tasmā idāni theraṃ jiṇṇaṃ vuddhaṃ disvā purimasinehena āgantvā ‘‘tattha cittaṃ paṇidhehi, yattha te vusitaṃ pure’’ti devūpapattiṃ yāci. Atha ‘‘dāni natthī’’tiādinā thero tassā paṭivacanaṃ adāsi. Taṃ sutvā devatā vihatāsā tatthevantaradhāyi.

ат̇а т̇зро взхаасам̣ аб̣бхуг̇г̇анд̇ваа ад̇д̇ано аанубхаавам̣ саб̣рахмажаарийнам̣ багаасзнд̇о ‘‘яасса мухуд̇д̇знаа’’д̇и г̇аат̇амааха. д̇ассад̇т̇о – яасса кийн̣аасавабхигкуно мухуд̇д̇амад̇д̇зна зва сахассад̇хаа сахассаббагааро д̇исахассимахаасахассибабхзд̣̇о, лого саб̣рахмагаббо сахаб̣рахмалого, сам̣вид̣̇ид̇о саммад̣̇зва вид̣̇ид̇о н̃аад̇о бажжагкам̣ гад̇о, звам̣ ид̣̇д̇хиг̇ун̣з ид̣̇д̇хисамбад̣̇ааяа жуд̇уубабаад̇з жа васийбхааваббад̇д̇о со бхигку убаг̇ад̇агаалз д̣̇звад̇аа бассад̇и, на д̇асса д̣̇звад̇аанам̣ д̣̇ассанз барихаанийд̇и. т̇зрзна гира ж̇аалинияаа д̣̇звад̇ааяа бадиважанад̣̇аанавасзна ‘‘над̇т̇и д̣̇ааний’’д̇и г̇аат̇ааяа вуд̇д̇ааяа бхигкуу ж̇аалиним̣ абассанд̇аа ‘‘гим̣ ну ко т̇зро д̇хаммаалабанавасзна гин̃жи аалабад̇ий’’д̇и жинд̇зсум̣. д̇зсам̣ жид̇д̇аажаарам̣ н̃ад̇ваа т̇зро ‘‘яасса мухуд̇д̇знаа’’д̇и имам̣ г̇аат̇амааха.

Atha thero vehāsaṃ abbhuggantvā attano ānubhāvaṃ sabrahmacārīnaṃ pakāsento ‘‘yassa muhuttenā’’ti gāthamāha. Tassattho – yassa khīṇāsavabhikkhuno muhuttamattena eva sahassadhā sahassappakāro tisahassimahāsahassipabhedo, loko sabrahmakappo sahabrahmaloko, saṃvidito sammadeva vidito ñāto paccakkhaṃ kato, evaṃ iddhiguṇe iddhisampadāya cutūpapāte ca vasībhāvappatto so bhikkhu upagatakāle devatā passati, na tassa devatānaṃ dassane parihānīti. Therena kira jāliniyā devatāya paṭivacanadānavasena ‘‘natthi dānī’’ti gāthāya vuttāya bhikkhū jāliniṃ apassantā ‘‘kiṃ nu kho thero dhammālapanavasena kiñci ālapatī’’ti cintesuṃ. Tesaṃ cittācāraṃ ñatvā thero ‘‘yassa muhuttenā’’ti imaṃ gāthamāha.

аннабхааро бурзд̇и звам̣наамо буримад̇д̇абхаавз. гхаасахаарагод̇и гхаасамад̇д̇асса ад̇т̇ааяа бхад̇д̇им̣ гад̇ваа ж̇ийванаго. саман̣анд̇и самид̇абаабам̣. бадибаад̣̇зсинд̇и бадимуко худ̇ваа баад̣̇аасим̣, басаад̣̇зна абхимуко худ̇ваа аахаарад̣̇аанам̣ ад̣̇аасинд̇и ад̇хиббааяо. убаридтанд̇и звам̣наамагам̣ бажжзгаб̣уд̣̇д̇хам̣. яасассинанд̇и гид̇д̇иманд̇ам̣ бад̇т̇адаяасам̣. имааяа г̇аат̇ааяа яаава жаримад̇д̇абхааваа ул̣аарасамбад̇д̇ихзд̇убхууд̇ам̣ ад̇д̇ано буб̣б̣агаммам̣ д̣̇ассзд̇и. д̇знааха ‘‘сомхи сагяагулз ж̇аад̇о’’д̇иаад̣̇и.

Annabhāro pureti evaṃnāmo purimattabhāve. Ghāsahārakoti ghāsamattassa atthāya bhattiṃ katvā jīvanako. Samaṇanti samitapāpaṃ. Paṭipādesinti paṭimukho hutvā pādāsiṃ, pasādena abhimukho hutvā āhāradānaṃ adāsinti adhippāyo. Upariṭṭhanti evaṃnāmakaṃ paccekabuddhaṃ. Yasassinanti kittimantaṃ patthaṭayasaṃ. Imāya gāthāya yāva carimattabhāvā uḷārasampattihetubhūtaṃ attano pubbakammaṃ dasseti. Tenāha ‘‘somhi sakyakule jāto’’tiādi.

ид̇о сад̇д̇аад̇и ид̇о мануссалогад̇о жавид̇ваа д̣̇звалогз д̣̇иб̣б̣зна аад̇хибажжзна сад̇д̇а. д̇ад̇о сад̇д̇аад̇и д̇ад̇о д̣̇звалогад̇о жавид̇ваа мануссалогз жаггавад̇д̇ибхаавзна сад̇д̇а. сам̣саараани жад̇уд̣̇д̣̇асаад̇и жад̇уд̣̇д̣̇аса бхаванд̇арасам̣саран̣аани. ниваасамабхиж̇ааниссанд̇и буб̣б̣зниваасам̣ ан̃н̃аасим̣. д̣̇звалогз тид̇о д̇ад̣̇аад̇и д̇ан̃жа ко на имасмим̣язва ад̇д̇абхаавз, аби жа ко яад̣̇аа ид̇о ананд̇араад̇ийд̇з ад̇д̇абхаавз д̣̇звалогз тид̇о, д̇ад̣̇аа ан̃н̃аасинд̇и ад̇т̇о.

Itosattāti ito manussalokato cavitvā devaloke dibbena ādhipaccena satta. Tato sattāti tato devalokato cavitvā manussaloke cakkavattibhāvena satta. Saṃsārāni catuddasāti catuddasa bhavantarasaṃsaraṇāni. Nivāsamabhijānissanti pubbenivāsaṃ aññāsiṃ. Devaloke ṭhito tadāti tañca kho na imasmiṃyeva attabhāve, api ca kho yadā ito anantarātīte attabhāve devaloke ṭhito, tadā aññāsinti attho.

ид̣̇аани ад̇д̇анаа д̣̇иб̣б̣ажагкун̃аан̣ажуд̇уубабаад̇ан̃аан̣аанам̣ ад̇хиг̇ад̇аагаарам̣ д̣̇ассзнд̇о ‘‘бан̃жан̇г̇игз’’д̇иаад̣̇инаа д̣̇вз г̇аат̇аа абхааси. д̇ад̇т̇а бан̃жан̇г̇игз самаад̇химхийд̇и абхин̃н̃аабаад̣̇агажад̇уд̇т̇аж̇жхаанасамаад̇химхи. со хи бийд̇ипаран̣ад̇аа, сукапаран̣ад̇аа, жзд̇опаран̣ад̇аа, аалогапаран̣ад̇аа , бажжавзгкан̣анимид̇д̇анд̇и имзхи бан̃жахи ан̇г̇зхи саманнааг̇ад̇ад̇д̇аа бан̃жан̇г̇иго самаад̇хийд̇и вужжад̇и. санд̇зд̇и бадибагкавуубасамзна ан̇г̇асанд̇ад̇ааяа жа санд̇з. згод̣̇ибхаавид̇зд̇и згод̣̇ибхааваг̇ад̇з, сужин̣н̣з васийбхааваббад̇д̇зд̇и ад̇т̇о. бадиббассад̣̇д̇хилад̣̇д̇хамхийд̇и гилзсаанам̣ бадиббассад̣̇д̇хияаа лад̣̇д̇хз. д̣̇иб̣б̣ажагку висуж̇жхи мзд̇и звам̣вид̇хз самаад̇химхи самбаад̣̇ид̇з маяхам̣ д̣̇иб̣б̣ажагкун̃аан̣ам̣ висуж̇жхи, згаад̣̇асахи убаггилзсзхи вимуд̇д̇ияаа висуд̣̇д̇хам̣ ахоси.

Idāni attanā dibbacakkhuñāṇacutūpapātañāṇānaṃ adhigatākāraṃ dassento ‘‘pañcaṅgike’’tiādinā dve gāthā abhāsi. Tattha pañcaṅgike samādhimhīti abhiññāpādakacatutthajjhānasamādhimhi. So hi pītipharaṇatā, sukhapharaṇatā, cetopharaṇatā, ālokapharaṇatā , paccavekkhaṇanimittanti imehi pañcahi aṅgehi samannāgatattā pañcaṅgiko samādhīti vuccati. Santeti paṭipakkhavūpasamena aṅgasantatāya ca sante. Ekodibhāviteti ekodibhāvagate, suciṇṇe vasībhāvappatteti attho. Paṭippassaddhiladdhamhīti kilesānaṃ paṭippassaddhiyā laddhe. Dibbacakkhu visujjhi meti evaṃvidhe samādhimhi sampādite mayhaṃ dibbacakkhuñāṇaṃ visujjhi, ekādasahi upakkilesehi vimuttiyā visuddhaṃ ahosi.

жуд̇уубабаад̇ам̣ ж̇аанаамийд̇и сад̇д̇аанам̣ жуд̇ин̃жа убабад̇д̇ин̃жа ж̇аанаами, ж̇аананд̇о жа ‘‘имз сад̇д̇аа амумхаа логамхаа ааг̇анд̇ваа ид̇хуубабаннаа, имамхаа жа логаа г̇анд̇ваа амумхи логз убабаж̇ж̇иссанд̇ий’’д̇и сад̇д̇аанам̣ ааг̇ад̇им̣ г̇ад̇ин̃жа ж̇аанаами, ж̇аананд̇о зва жа нзсам̣ ид̇т̇абхаавам̣ мануссабхаавам̣ д̇ад̇о ан̃н̃ат̇аабхаавам̣ ан̃н̃ат̇аад̇иражчаанабхааван̃жа убабад̇д̇ид̇о бурзд̇арамзва ж̇аанаами. д̇аяид̣̇ам̣ саб̣б̣амби бан̃жан̇г̇игз самаад̇химхи самбаад̣̇ид̇з зваад̇и д̣̇ассзнд̇о ааха ‘‘жхаанз бан̃жан̇г̇игз тид̇о’’д̇и. д̇ад̇т̇а бан̃жан̇г̇игз жхаанз тид̇о бад̇идтид̇о худ̇ваа звам̣ ж̇аанаамийд̇и ад̇т̇о.

Cutūpapātaṃ jānāmīti sattānaṃ cutiñca upapattiñca jānāmi, jānanto ca ‘‘ime sattā amumhā lokamhā āgantvā idhūpapannā, imamhā ca lokā gantvā amumhi loke upapajjissantī’’ti sattānaṃ āgatiṃ gatiñca jānāmi, jānanto eva ca nesaṃ itthabhāvaṃ manussabhāvaṃ tato aññathābhāvaṃ aññathātiracchānabhāvañca upapattito puretarameva jānāmi. Tayidaṃ sabbampi pañcaṅgike samādhimhi sampādite evāti dassento āha ‘‘jhāne pañcaṅgike ṭhito’’ti. Tattha pañcaṅgike jhāne ṭhito patiṭṭhito hutvā evaṃ jānāmīti attho.

звам̣ виж̇ж̇аад̇д̇аяам̣ д̣̇ассзд̇ваа д̇аббасан̇г̇зна буб̣б̣з д̣̇ассид̇амби д̇ад̇ияавиж̇ж̇ам̣ саха гижжанибпад̇д̇ияаа д̣̇ассзнд̇о ‘‘барижин̣н̣о маяаа сад̇т̇аа’’д̇иаад̣̇инаа г̇аат̇аад̣̇ваяамааха. д̇ад̇т̇а важ̇ж̇ийнам̣ взл̣уваг̇аамзд̇и важ̇ж̇ирадтасса взл̣уваг̇аамз, важ̇ж̇ирадтз яад̇т̇а бажчимавассам̣ убаг̇ажчи взл̣уваг̇аамз. хздтад̇о взл̣уг̇умб̣асминд̇и д̇ад̇т̇а ан̃н̃ад̇арасса взл̣уг̇умб̣асса хздтаа. ниб̣б̣ааяиссанд̇и ниб̣б̣ааяиссаами, анубаад̣̇исзсааяа ниб̣б̣аанад̇хаад̇уяаа бариниб̣б̣ааяиссаамийд̇и ад̇т̇о.

Evaṃ vijjāttayaṃ dassetvā tappasaṅgena pubbe dassitampi tatiyavijjaṃ saha kiccanipphattiyā dassento ‘‘pariciṇṇo mayā satthā’’tiādinā gāthādvayamāha. Tattha vajjīnaṃ veḷuvagāmeti vajjiraṭṭhassa veḷuvagāme, vajjiraṭṭhe yattha pacchimavassaṃ upagacchi veḷuvagāme. Heṭṭhato veḷugumbasminti tattha aññatarassa veḷugumbassa heṭṭhā. Nibbāyissanti nibbāyissāmi, anupādisesāya nibbānadhātuyā parinibbāyissāmīti attho.

ануруд̣̇д̇хад̇т̇зраг̇аат̇ааван̣н̣анаа нидтид̇аа.

Anuruddhattheragāthāvaṇṇanā niṭṭhitā.

Next: 10. баараабарияад̇т̇зраг̇аат̇ааван̣н̣анаа • 10. Pārāpariyattheragāthāvaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 9. ануруд̣̇д̇хад̇т̇зраг̇аат̇аа • 9. Anuruddhattheragāthā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact