| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
အနုသာသနီကထာဝဏ္ဏနာ
Anusāsanīkathāvaṇṇanā
ပရာဇိတကိလေသေနာတိ သန္တာနေ ပုန အနုပ္ပတ္တိဓမ္မတာပာဒနေန စတူဟိ မဂ္ဂဉာဏေဟိ သဟ ဝာသနာယ သမုစ္ဆိန္နသဗ္ဗကိလေသေန။ ဣဓာတိ ဣမသ္မိံ သာသနေ။ တေန သိက္ခာပဒေန သမံ အညံ အနေကနယဝောကိဏ္ဏံ ဂမ္ဘီရတ္ထဝိနိစ္ဆယံ ကိဉ္စိ သိက္ခာပဒံ န ဝိဇ္ဇတီတိ ယောဇေတဗ္ဗံ။ အတ္ထော စ ဝိနိစ္ဆယော စ အတ္ထဝိနိစ္ဆယာ, ဂမ္ဘီရာ အတ္ထဝိနိစ္ဆယာ အသ္သာတိ ဂမ္ဘီရတ္ထဝိနိစ္ဆယံ။ ဝတ္ထုမ္ဟိ ဩတိဏ္ဏေတိ စောဒနာဝတ္ထုမ္ဟိ သင္ဃမဇ္ဈံ ဩတိဏ္ဏေ, ဧကေန ဧကသ္မိံ စောဒိတေ, သယမေဝ ဝာ အာဂန္တ္ဝာ အတ္တနော ကတဝီတိက္ကမေ အာရောစိတေတိ ဝုတ္တံ ဟောတိ။ ဧတ္ထာတိ ဩတိဏ္ဏေ ဝတ္ထုမ္ဟိ။
Parājitakilesenāti santāne puna anuppattidhammatāpādanena catūhi maggañāṇehi saha vāsanāya samucchinnasabbakilesena. Idhāti imasmiṃ sāsane. Tena sikkhāpadena samaṃ aññaṃ anekanayavokiṇṇaṃ gambhīratthavinicchayaṃ kiñci sikkhāpadaṃ na vijjatīti yojetabbaṃ. Attho ca vinicchayo ca atthavinicchayā, gambhīrā atthavinicchayā assāti gambhīratthavinicchayaṃ. Vatthumhi otiṇṇeti codanāvatthumhi saṅghamajjhaṃ otiṇṇe, ekena ekasmiṃ codite, sayameva vā āgantvā attano katavītikkame ārociteti vuttaṃ hoti. Etthāti otiṇṇe vatthumhi.
ဝိနိစ္ဆယံ ကရောန္တေန သဟသာ ‘‘ပာရာဇိက’’န္တိ အဝတ္ဝာ ယံ ကတ္တဗ္ဗံ, တံ ဒသ္သေတုံ ‘‘ပာဠိ’’န္တိအာဒိမာဟ။ ဝိနိစ္ဆယောတိ ပာရာဇိကာပတ္တိဝိနိစ္ဆယော။ အဝတ္ဝာဝာတိ ‘‘တ္ဝံ ပာရာဇိကံ အာပန္နော’’တိ အဝတ္ဝာဝ။ ကပ္ပိယေပိ စ ဝတ္ထုသ္မိန္တိ အဝတ္ဝာပိ ဂဏ္ဟိတုံ ကပ္ပိယေ မာတုပိတုသန္တကေပိ ဝတ္ထုသ္မိံ။ လဟုဝတ္တိနောတိ ထေယ္ယစိတ္တုပ္ပာဒေန လဟုပရိဝတ္တိနော။ အာသီဝိသန္တိ သီဃမေဝ သကလသရီရေ ဖရဏသမတ္ထဝိသံ။
Vinicchayaṃ karontena sahasā ‘‘pārājika’’nti avatvā yaṃ kattabbaṃ, taṃ dassetuṃ ‘‘pāḷi’’ntiādimāha. Vinicchayoti pārājikāpattivinicchayo. Avatvāvāti ‘‘tvaṃ pārājikaṃ āpanno’’ti avatvāva. Kappiyepi ca vatthusminti avatvāpi gaṇhituṃ kappiye mātupitusantakepi vatthusmiṃ. Lahuvattinoti theyyacittuppādena lahuparivattino. Āsīvisanti sīghameva sakalasarīre pharaṇasamatthavisaṃ.
အနုသာသနီကထာဝဏ္ဏနာ နိဋ္ဌိတာ။
Anusāsanīkathāvaṇṇanā niṭṭhitā.
ပာရာဇိကကဏ္ဍဋ္ဌကထာယ ပဌမဘာဂဝဏ္ဏနာ သမတ္တာ။
Pārājikakaṇḍaṭṭhakathāya paṭhamabhāgavaṇṇanā samattā.
