| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. অনুসযা অনারম্মণকথাৰণ্ণনা
4. Anusayā anārammaṇakathāvaṇṇanā
৫৫৪-৫৫৬. ইদানি অনুসযা অনারম্মণাতিকথা নাম হোতি। তত্থ যেসং অনুসযা নাম চিত্তৰিপ্পযুত্তা অহেতুকা অব্যাকতা, তেনেৰ চ অনারম্মণাতি লদ্ধি, সেয্যথাপি অন্ধকানঞ্চেৰ একচ্চানঞ্চ উত্তরাপথকানং; তে সন্ধায অনুসযাতি পুচ্ছা সকৰাদিস্স, পটিঞ্ঞা ইতরস্স। অথ নং অনারম্মণেন নাম এৰংৰিধেন ভৰিতব্বন্তি চোদেতুং রূপন্তিআদিমাহ। কামরাগোতিআদি কামরাগানুসযতো অনঞ্ঞত্তা দস্সিতং। সঙ্খারক্খন্ধো অনারম্মণোতি পঞ্হে চিত্তসম্পযুত্তসঙ্খারক্খন্ধং সন্ধায পটিক্খিপতি। অনুসযং জীৰিতিন্দ্রিযং কাযকম্মাদিরূপঞ্চ সঙ্খারক্খন্ধপরিযাপন্নং, তং সন্ধায পটিজানাতি। ইমিনাৰুপাযেন সব্বৰারেসু অত্থো ৰেদিতব্বো। সানুসযোতি পঞ্হে পন অপ্পহীনানুসযত্তা সানুসযতা অনুঞ্ঞাতা। ন অনুসযানং পৰত্তিসব্ভাৰা। যো হি অপ্পহীনো, ন সো অতীতো, নানাগতো, ন পচ্চুপ্পন্নো চ। মগ্গৰজ্ঝকিলেসো পনেস অপ্পহীনত্তাৰ অত্থীতি ৰুচ্চতি। এৰরূপস্স চ ইদং নাম আরম্মণন্তি ন ৰত্তব্বং। তস্মা তং পটিক্খিত্তং। তং পনেতং ন কেৰলং অনুসযস্স, রাগাদীনম্পি তাদিসমেৰ, তস্মা অনুসযানং অনারম্মণতাসাধকং ন হোতীতি।
554-556. Idāni anusayā anārammaṇātikathā nāma hoti. Tattha yesaṃ anusayā nāma cittavippayuttā ahetukā abyākatā, teneva ca anārammaṇāti laddhi, seyyathāpi andhakānañceva ekaccānañca uttarāpathakānaṃ; te sandhāya anusayāti pucchā sakavādissa, paṭiññā itarassa. Atha naṃ anārammaṇena nāma evaṃvidhena bhavitabbanti codetuṃ rūpantiādimāha. Kāmarāgotiādi kāmarāgānusayato anaññattā dassitaṃ. Saṅkhārakkhandho anārammaṇoti pañhe cittasampayuttasaṅkhārakkhandhaṃ sandhāya paṭikkhipati. Anusayaṃ jīvitindriyaṃ kāyakammādirūpañca saṅkhārakkhandhapariyāpannaṃ, taṃ sandhāya paṭijānāti. Imināvupāyena sabbavāresu attho veditabbo. Sānusayoti pañhe pana appahīnānusayattā sānusayatā anuññātā. Na anusayānaṃ pavattisabbhāvā. Yo hi appahīno, na so atīto, nānāgato, na paccuppanno ca. Maggavajjhakileso panesa appahīnattāva atthīti vuccati. Evarūpassa ca idaṃ nāma ārammaṇanti na vattabbaṃ. Tasmā taṃ paṭikkhittaṃ. Taṃ panetaṃ na kevalaṃ anusayassa, rāgādīnampi tādisameva, tasmā anusayānaṃ anārammaṇatāsādhakaṃ na hotīti.
অনুসযা অনারম্মণাতিকথাৰণ্ণনা।
Anusayā anārammaṇātikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৮৭) ৪. অনুসযা অনারম্মণকথা • (87) 4. Anusayā anārammaṇakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. অনুসযাঅনারম্মণাতিকথাৰণ্ণনা • 4. Anusayāanārammaṇātikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. অনুসযাঅনারম্মণাতিকথাৰণ্ণনা • 4. Anusayāanārammaṇātikathāvaṇṇanā
