| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၄. အနုသယာ အနာရမ္မဏကထာဝဏ္ဏနာ
4. Anusayā anārammaṇakathāvaṇṇanā
၅၅၄-၅၅၆. ဣဒာနိ အနုသယာ အနာရမ္မဏာတိကထာ နာမ ဟောတိ။ တတ္ထ ယေသံ အနုသယာ နာမ စိတ္တဝိပ္ပယုတ္တာ အဟေတုကာ အဗ္ယာကတာ, တေနေဝ စ အနာရမ္မဏာတိ လဒ္ဓိ, သေယ္ယထာပိ အန္ဓကာနဉ္စေဝ ဧကစ္စာနဉ္စ ဥတ္တရာပထကာနံ; တေ သန္ဓာယ အနုသယာတိ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ အနာရမ္မဏေန နာမ ဧဝံဝိဓေန ဘဝိတဗ္ဗန္တိ စောဒေတုံ ရူပန္တိအာဒိမာဟ။ ကာမရာဂောတိအာဒိ ကာမရာဂာနုသယတော အနညတ္တာ ဒသ္သိတံ။ သင္ခာရက္ခန္ဓော အနာရမ္မဏောတိ ပဉ္ဟေ စိတ္တသမ္ပယုတ္တသင္ခာရက္ခန္ဓံ သန္ဓာယ ပဋိက္ခိပတိ။ အနုသယံ ဇီဝိတိန္ဒ္ရိယံ ကာယကမ္မာဒိရူပဉ္စ သင္ခာရက္ခန္ဓပရိယာပန္နံ, တံ သန္ဓာယ ပဋိဇာနာတိ။ ဣမိနာဝုပာယေန သဗ္ဗဝာရေသု အတ္ထော ဝေဒိတဗ္ဗော။ သာနုသယောတိ ပဉ္ဟေ ပန အပ္ပဟီနာနုသယတ္တာ သာနုသယတာ အနုညာတာ။ န အနုသယာနံ ပဝတ္တိသဗ္ဘာဝာ။ ယော ဟိ အပ္ပဟီနော, န သော အတီတော, နာနာဂတော, န ပစ္စုပ္ပန္နော စ။ မဂ္ဂဝဇ္ဈကိလေသော ပနေသ အပ္ပဟီနတ္တာဝ အတ္ထီတိ ဝုစ္စတိ။ ဧဝရူပသ္သ စ ဣဒံ နာမ အာရမ္မဏန္တိ န ဝတ္တဗ္ဗံ။ တသ္မာ တံ ပဋိက္ခိတ္တံ။ တံ ပနေတံ န ကေဝလံ အနုသယသ္သ, ရာဂာဒီနမ္ပိ တာဒိသမေဝ, တသ္မာ အနုသယာနံ အနာရမ္မဏတာသာဓကံ န ဟောတီတိ။
554-556. Idāni anusayā anārammaṇātikathā nāma hoti. Tattha yesaṃ anusayā nāma cittavippayuttā ahetukā abyākatā, teneva ca anārammaṇāti laddhi, seyyathāpi andhakānañceva ekaccānañca uttarāpathakānaṃ; te sandhāya anusayāti pucchā sakavādissa, paṭiññā itarassa. Atha naṃ anārammaṇena nāma evaṃvidhena bhavitabbanti codetuṃ rūpantiādimāha. Kāmarāgotiādi kāmarāgānusayato anaññattā dassitaṃ. Saṅkhārakkhandho anārammaṇoti pañhe cittasampayuttasaṅkhārakkhandhaṃ sandhāya paṭikkhipati. Anusayaṃ jīvitindriyaṃ kāyakammādirūpañca saṅkhārakkhandhapariyāpannaṃ, taṃ sandhāya paṭijānāti. Imināvupāyena sabbavāresu attho veditabbo. Sānusayoti pañhe pana appahīnānusayattā sānusayatā anuññātā. Na anusayānaṃ pavattisabbhāvā. Yo hi appahīno, na so atīto, nānāgato, na paccuppanno ca. Maggavajjhakileso panesa appahīnattāva atthīti vuccati. Evarūpassa ca idaṃ nāma ārammaṇanti na vattabbaṃ. Tasmā taṃ paṭikkhittaṃ. Taṃ panetaṃ na kevalaṃ anusayassa, rāgādīnampi tādisameva, tasmā anusayānaṃ anārammaṇatāsādhakaṃ na hotīti.
အနုသယာ အနာရမ္မဏာတိကထာဝဏ္ဏနာ။
Anusayā anārammaṇātikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၈၇) ၄. အနုသယာ အနာရမ္မဏကထာ • (87) 4. Anusayā anārammaṇakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၄. အနုသယာအနာရမ္မဏာတိကထာဝဏ္ဏနာ • 4. Anusayāanārammaṇātikathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၄. အနုသယာအနာရမ္မဏာတိကထာဝဏ္ဏနာ • 4. Anusayāanārammaṇātikathāvaṇṇanā
