| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ಅನುಸಯಾ ಅನಾರಮ್ಮಣಕಥಾವಣ್ಣನಾ
4. Anusayā anārammaṇakathāvaṇṇanā
೫೫೪-೫೫೬. ಇದಾನಿ ಅನುಸಯಾ ಅನಾರಮ್ಮಣಾತಿಕಥಾ ನಾಮ ಹೋತಿ। ತತ್ಥ ಯೇಸಂ ಅನುಸಯಾ ನಾಮ ಚಿತ್ತವಿಪ್ಪಯುತ್ತಾ ಅಹೇತುಕಾ ಅಬ್ಯಾಕತಾ, ತೇನೇವ ಚ ಅನಾರಮ್ಮಣಾತಿ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಞ್ಚೇವ ಏಕಚ್ಚಾನಞ್ಚ ಉತ್ತರಾಪಥಕಾನಂ; ತೇ ಸನ್ಧಾಯ ಅನುಸಯಾತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ಅನಾರಮ್ಮಣೇನ ನಾಮ ಏವಂವಿಧೇನ ಭವಿತಬ್ಬನ್ತಿ ಚೋದೇತುಂ ರೂಪನ್ತಿಆದಿಮಾಹ। ಕಾಮರಾಗೋತಿಆದಿ ಕಾಮರಾಗಾನುಸಯತೋ ಅನಞ್ಞತ್ತಾ ದಸ್ಸಿತಂ। ಸಙ್ಖಾರಕ್ಖನ್ಧೋ ಅನಾರಮ್ಮಣೋತಿ ಪಞ್ಹೇ ಚಿತ್ತಸಮ್ಪಯುತ್ತಸಙ್ಖಾರಕ್ಖನ್ಧಂ ಸನ್ಧಾಯ ಪಟಿಕ್ಖಿಪತಿ। ಅನುಸಯಂ ಜೀವಿತಿನ್ದ್ರಿಯಂ ಕಾಯಕಮ್ಮಾದಿರೂಪಞ್ಚ ಸಙ್ಖಾರಕ್ಖನ್ಧಪರಿಯಾಪನ್ನಂ, ತಂ ಸನ್ಧಾಯ ಪಟಿಜಾನಾತಿ। ಇಮಿನಾವುಪಾಯೇನ ಸಬ್ಬವಾರೇಸು ಅತ್ಥೋ ವೇದಿತಬ್ಬೋ। ಸಾನುಸಯೋತಿ ಪಞ್ಹೇ ಪನ ಅಪ್ಪಹೀನಾನುಸಯತ್ತಾ ಸಾನುಸಯತಾ ಅನುಞ್ಞಾತಾ। ನ ಅನುಸಯಾನಂ ಪವತ್ತಿಸಬ್ಭಾವಾ। ಯೋ ಹಿ ಅಪ್ಪಹೀನೋ, ನ ಸೋ ಅತೀತೋ, ನಾನಾಗತೋ, ನ ಪಚ್ಚುಪ್ಪನ್ನೋ ಚ। ಮಗ್ಗವಜ್ಝಕಿಲೇಸೋ ಪನೇಸ ಅಪ್ಪಹೀನತ್ತಾವ ಅತ್ಥೀತಿ ವುಚ್ಚತಿ। ಏವರೂಪಸ್ಸ ಚ ಇದಂ ನಾಮ ಆರಮ್ಮಣನ್ತಿ ನ ವತ್ತಬ್ಬಂ। ತಸ್ಮಾ ತಂ ಪಟಿಕ್ಖಿತ್ತಂ। ತಂ ಪನೇತಂ ನ ಕೇವಲಂ ಅನುಸಯಸ್ಸ, ರಾಗಾದೀನಮ್ಪಿ ತಾದಿಸಮೇವ, ತಸ್ಮಾ ಅನುಸಯಾನಂ ಅನಾರಮ್ಮಣತಾಸಾಧಕಂ ನ ಹೋತೀತಿ।
554-556. Idāni anusayā anārammaṇātikathā nāma hoti. Tattha yesaṃ anusayā nāma cittavippayuttā ahetukā abyākatā, teneva ca anārammaṇāti laddhi, seyyathāpi andhakānañceva ekaccānañca uttarāpathakānaṃ; te sandhāya anusayāti pucchā sakavādissa, paṭiññā itarassa. Atha naṃ anārammaṇena nāma evaṃvidhena bhavitabbanti codetuṃ rūpantiādimāha. Kāmarāgotiādi kāmarāgānusayato anaññattā dassitaṃ. Saṅkhārakkhandho anārammaṇoti pañhe cittasampayuttasaṅkhārakkhandhaṃ sandhāya paṭikkhipati. Anusayaṃ jīvitindriyaṃ kāyakammādirūpañca saṅkhārakkhandhapariyāpannaṃ, taṃ sandhāya paṭijānāti. Imināvupāyena sabbavāresu attho veditabbo. Sānusayoti pañhe pana appahīnānusayattā sānusayatā anuññātā. Na anusayānaṃ pavattisabbhāvā. Yo hi appahīno, na so atīto, nānāgato, na paccuppanno ca. Maggavajjhakileso panesa appahīnattāva atthīti vuccati. Evarūpassa ca idaṃ nāma ārammaṇanti na vattabbaṃ. Tasmā taṃ paṭikkhittaṃ. Taṃ panetaṃ na kevalaṃ anusayassa, rāgādīnampi tādisameva, tasmā anusayānaṃ anārammaṇatāsādhakaṃ na hotīti.
ಅನುಸಯಾ ಅನಾರಮ್ಮಣಾತಿಕಥಾವಣ್ಣನಾ।
Anusayā anārammaṇātikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೮೭) ೪. ಅನುಸಯಾ ಅನಾರಮ್ಮಣಕಥಾ • (87) 4. Anusayā anārammaṇakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೪. ಅನುಸಯಾಅನಾರಮ್ಮಣಾತಿಕಥಾವಣ್ಣನಾ • 4. Anusayāanārammaṇātikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೪. ಅನುಸಯಾಅನಾರಮ್ಮಣಾತಿಕಥಾವಣ್ಣನಾ • 4. Anusayāanārammaṇātikathāvaṇṇanā
