| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
4. අනුසයා අනාරම්‌මණකථාවණ්‌ණනා
4. Anusayā anārammaṇakathāvaṇṇanā
554-556. ඉදානි අනුසයා අනාරම්‌මණාතිකථා නාම හොති. තත්‌ථ යෙසං අනුසයා නාම චිත්‌තවිප්‌පයුත්‌තා අහෙතුකා අබ්‍යාකතා, තෙනෙව ච අනාරම්‌මණාති ලද්‌ධි, සෙය්‍යථාපි අන්‌ධකානඤ්‌චෙව එකච්‌චානඤ්‌ච උත්‌තරාපථකානං; තෙ සන්‌ධාය අනුසයාති පුච්‌ඡා සකවාදිස්‌ස, පටිඤ්‌ඤා ඉතරස්‌ස. අථ නං අනාරම්‌මණෙන නාම එවංවිධෙන භවිතබ්‌බන්‌ති චොදෙතුං රූපන්‌තිආදිමාහ. කාමරාගොතිආදි කාමරාගානුසයතො අනඤ්‌ඤත්‌තා දස්‌සිතං. සඞ්‌ඛාරක්‌ඛන්‌ධො අනාරම්‌මණොති පඤ්‌හෙ චිත්‌තසම්‌පයුත්‌තසඞ්‌ඛාරක්‌ඛන්‌ධං සන්‌ධාය පටික්‌ඛිපති. අනුසයං ජීවිතින්‌ද්‍රියං කායකම්‌මාදිරූපඤ්‌ච සඞ්‌ඛාරක්‌ඛන්‌ධපරියාපන්‌නං, තං සන්‌ධාය පටිජානාති. ඉමිනාවුපායෙන සබ්‌බවාරෙසු අත්‌ථො වෙදිතබ්‌බො. සානුසයොති පඤ්‌හෙ පන අප්‌පහීනානුසයත්‌තා සානුසයතා අනුඤ්‌ඤාතා. න අනුසයානං පවත්‌තිසබ්‌භාවා. යො හි අප්‌පහීනො, න සො අතීතො, නානාගතො, න පච්‌චුප්‌පන්‌නො ච. මග්‌ගවජ්‌ඣකිලෙසො පනෙස අප්‌පහීනත්‌තාව අත්‌ථීති වුච්‌චති. එවරූපස්‌ස ච ඉදං නාම ආරම්‌මණන්‌ති න වත්‌තබ්‌බං. තස්‌මා තං පටික්‌ඛිත්‌තං. තං පනෙතං න කෙවලං අනුසයස්‌ස, රාගාදීනම්‌පි තාදිසමෙව, තස්‌මා අනුසයානං අනාරම්‌මණතාසාධකං න හොතීති.
554-556. Idāni anusayā anārammaṇātikathā nāma hoti. Tattha yesaṃ anusayā nāma cittavippayuttā ahetukā abyākatā, teneva ca anārammaṇāti laddhi, seyyathāpi andhakānañceva ekaccānañca uttarāpathakānaṃ; te sandhāya anusayāti pucchā sakavādissa, paṭiññā itarassa. Atha naṃ anārammaṇena nāma evaṃvidhena bhavitabbanti codetuṃ rūpantiādimāha. Kāmarāgotiādi kāmarāgānusayato anaññattā dassitaṃ. Saṅkhārakkhandho anārammaṇoti pañhe cittasampayuttasaṅkhārakkhandhaṃ sandhāya paṭikkhipati. Anusayaṃ jīvitindriyaṃ kāyakammādirūpañca saṅkhārakkhandhapariyāpannaṃ, taṃ sandhāya paṭijānāti. Imināvupāyena sabbavāresu attho veditabbo. Sānusayoti pañhe pana appahīnānusayattā sānusayatā anuññātā. Na anusayānaṃ pavattisabbhāvā. Yo hi appahīno, na so atīto, nānāgato, na paccuppanno ca. Maggavajjhakileso panesa appahīnattāva atthīti vuccati. Evarūpassa ca idaṃ nāma ārammaṇanti na vattabbaṃ. Tasmā taṃ paṭikkhittaṃ. Taṃ panetaṃ na kevalaṃ anusayassa, rāgādīnampi tādisameva, tasmā anusayānaṃ anārammaṇatāsādhakaṃ na hotīti.
අනුසයා අනාරම්‌මණාතිකථාවණ්‌ණනා.
Anusayā anārammaṇātikathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (87) 4. අනුසයා අනාරම්‌මණකථා • (87) 4. Anusayā anārammaṇakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. අනුසයාඅනාරම්‌මණාතිකථාවණ්‌ණනා • 4. Anusayāanārammaṇātikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 4. අනුසයාඅනාරම්‌මණාතිකථාවණ්‌ණනා • 4. Anusayāanārammaṇātikathāvaṇṇanā
