| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੪. ਅਨੁਸਯਾ ਅਨਾਰਮ੍ਮਣਕਥਾવਣ੍ਣਨਾ
4. Anusayā anārammaṇakathāvaṇṇanā
੫੫੪-੫੫੬. ਇਦਾਨਿ ਅਨੁਸਯਾ ਅਨਾਰਮ੍ਮਣਾਤਿਕਥਾ ਨਾਮ ਹੋਤਿ। ਤਤ੍ਥ ਯੇਸਂ ਅਨੁਸਯਾ ਨਾਮ ਚਿਤ੍ਤવਿਪ੍ਪਯੁਤ੍ਤਾ ਅਹੇਤੁਕਾ ਅਬ੍ਯਾਕਤਾ, ਤੇਨੇવ ਚ ਅਨਾਰਮ੍ਮਣਾਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇવ ਏਕਚ੍ਚਾਨਞ੍ਚ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਨੁਸਯਾਤਿ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ। ਅਥ ਨਂ ਅਨਾਰਮ੍ਮਣੇਨ ਨਾਮ ਏવਂવਿਧੇਨ ਭવਿਤਬ੍ਬਨ੍ਤਿ ਚੋਦੇਤੁਂ ਰੂਪਨ੍ਤਿਆਦਿਮਾਹ। ਕਾਮਰਾਗੋਤਿਆਦਿ ਕਾਮਰਾਗਾਨੁਸਯਤੋ ਅਨਞ੍ਞਤ੍ਤਾ ਦਸ੍ਸਿਤਂ। ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ ਪਞ੍ਹੇ ਚਿਤ੍ਤਸਮ੍ਪਯੁਤ੍ਤਸਙ੍ਖਾਰਕ੍ਖਨ੍ਧਂ ਸਨ੍ਧਾਯ ਪਟਿਕ੍ਖਿਪਤਿ। ਅਨੁਸਯਂ ਜੀવਿਤਿਨ੍ਦ੍ਰਿਯਂ ਕਾਯਕਮ੍ਮਾਦਿਰੂਪਞ੍ਚ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ, ਤਂ ਸਨ੍ਧਾਯ ਪਟਿਜਾਨਾਤਿ। ਇਮਿਨਾવੁਪਾਯੇਨ ਸਬ੍ਬવਾਰੇਸੁ ਅਤ੍ਥੋ વੇਦਿਤਬ੍ਬੋ। ਸਾਨੁਸਯੋਤਿ ਪਞ੍ਹੇ ਪਨ ਅਪ੍ਪਹੀਨਾਨੁਸਯਤ੍ਤਾ ਸਾਨੁਸਯਤਾ ਅਨੁਞ੍ਞਾਤਾ। ਨ ਅਨੁਸਯਾਨਂ ਪવਤ੍ਤਿਸਬ੍ਭਾવਾ। ਯੋ ਹਿ ਅਪ੍ਪਹੀਨੋ, ਨ ਸੋ ਅਤੀਤੋ, ਨਾਨਾਗਤੋ, ਨ ਪਚ੍ਚੁਪ੍ਪਨ੍ਨੋ ਚ। ਮਗ੍ਗવਜ੍ਝਕਿਲੇਸੋ ਪਨੇਸ ਅਪ੍ਪਹੀਨਤ੍ਤਾવ ਅਤ੍ਥੀਤਿ વੁਚ੍ਚਤਿ। ਏવਰੂਪਸ੍ਸ ਚ ਇਦਂ ਨਾਮ ਆਰਮ੍ਮਣਨ੍ਤਿ ਨ વਤ੍ਤਬ੍ਬਂ। ਤਸ੍ਮਾ ਤਂ ਪਟਿਕ੍ਖਿਤ੍ਤਂ। ਤਂ ਪਨੇਤਂ ਨ ਕੇવਲਂ ਅਨੁਸਯਸ੍ਸ, ਰਾਗਾਦੀਨਮ੍ਪਿ ਤਾਦਿਸਮੇવ, ਤਸ੍ਮਾ ਅਨੁਸਯਾਨਂ ਅਨਾਰਮ੍ਮਣਤਾਸਾਧਕਂ ਨ ਹੋਤੀਤਿ।
554-556. Idāni anusayā anārammaṇātikathā nāma hoti. Tattha yesaṃ anusayā nāma cittavippayuttā ahetukā abyākatā, teneva ca anārammaṇāti laddhi, seyyathāpi andhakānañceva ekaccānañca uttarāpathakānaṃ; te sandhāya anusayāti pucchā sakavādissa, paṭiññā itarassa. Atha naṃ anārammaṇena nāma evaṃvidhena bhavitabbanti codetuṃ rūpantiādimāha. Kāmarāgotiādi kāmarāgānusayato anaññattā dassitaṃ. Saṅkhārakkhandho anārammaṇoti pañhe cittasampayuttasaṅkhārakkhandhaṃ sandhāya paṭikkhipati. Anusayaṃ jīvitindriyaṃ kāyakammādirūpañca saṅkhārakkhandhapariyāpannaṃ, taṃ sandhāya paṭijānāti. Imināvupāyena sabbavāresu attho veditabbo. Sānusayoti pañhe pana appahīnānusayattā sānusayatā anuññātā. Na anusayānaṃ pavattisabbhāvā. Yo hi appahīno, na so atīto, nānāgato, na paccuppanno ca. Maggavajjhakileso panesa appahīnattāva atthīti vuccati. Evarūpassa ca idaṃ nāma ārammaṇanti na vattabbaṃ. Tasmā taṃ paṭikkhittaṃ. Taṃ panetaṃ na kevalaṃ anusayassa, rāgādīnampi tādisameva, tasmā anusayānaṃ anārammaṇatāsādhakaṃ na hotīti.
ਅਨੁਸਯਾ ਅਨਾਰਮ੍ਮਣਾਤਿਕਥਾવਣ੍ਣਨਾ।
Anusayā anārammaṇātikathāvaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / (੮੭) ੪. ਅਨੁਸਯਾ ਅਨਾਰਮ੍ਮਣਕਥਾ • (87) 4. Anusayā anārammaṇakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੪. ਅਨੁਸਯਾਅਨਾਰਮ੍ਮਣਾਤਿਕਥਾવਣ੍ਣਨਾ • 4. Anusayāanārammaṇātikathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੪. ਅਨੁਸਯਾਅਨਾਰਮ੍ਮਣਾਤਿਕਥਾવਣ੍ਣਨਾ • 4. Anusayāanārammaṇātikathāvaṇṇanā
