| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. দুতিযৰগ্গো
2. Dutiyavaggo
১১. অনুসযসুত্তৰণ্ণনা
11. Anusayasuttavaṇṇanā
২০০. দুতিযৰগ্গে অত্তনোতি আযস্মা রাহুলো অত্তনো সৰিঞ্ঞাণকং কাযং দস্সেতি। পরস্সাতি পরস্স অৰিঞ্ঞাণককাযং দস্সেতি। পরসন্তানে ৰা অরূপে ধম্মে অগ্গহেত্ৰা রূপকাযমেৰ গণ্হন্তো ৰদতি। অপরে ‘‘অসঞ্ঞসত্তানং অত্তভাৰং সন্ধায তথা ৰুত্ত’’ন্তি ৰদন্তি। পুরিমেনাতি ‘‘ইমস্মিং সৰিঞ্ঞাণকে কাযে’’তি ইমিনা পদেন। পচ্ছিমেনাতি ‘‘বহিদ্ধা’’তি ইমিনা পদেন। এতে কিলেসাতি এতে দিট্ঠিতণ্হামানসঞ্ঞিতা কিলেসা। এতেসু ৰত্থূসূতি অজ্ঝত্তবহিদ্ধাৰত্থূসু। সম্ম…পে॰… পস্সতীতি পুব্বভাগে ৰিপস্সনাঞাণেন সম্মসনৰসেন, মগ্গক্খণে অভিসমযৰসেন সুট্ঠু অত্তপচ্চক্খেন ঞাণেন পস্সতি।
200. Dutiyavagge attanoti āyasmā rāhulo attano saviññāṇakaṃ kāyaṃ dasseti. Parassāti parassa aviññāṇakakāyaṃ dasseti. Parasantāne vā arūpe dhamme aggahetvā rūpakāyameva gaṇhanto vadati. Apare ‘‘asaññasattānaṃ attabhāvaṃ sandhāya tathā vutta’’nti vadanti. Purimenāti ‘‘imasmiṃ saviññāṇake kāye’’ti iminā padena. Pacchimenāti ‘‘bahiddhā’’ti iminā padena. Ete kilesāti ete diṭṭhitaṇhāmānasaññitā kilesā. Etesu vatthūsūti ajjhattabahiddhāvatthūsu. Samma…pe… passatīti pubbabhāge vipassanāñāṇena sammasanavasena, maggakkhaṇe abhisamayavasena suṭṭhu attapaccakkhena ñāṇena passati.
অনুসযসুত্তৰণ্ণনা নিট্ঠিতা।
Anusayasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১১. অনুসযসুত্তং • 11. Anusayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১১. অনুসযসুত্তৰণ্ণনা • 11. Anusayasuttavaṇṇanā
