| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৭. অনুসযযমকং
7. Anusayayamakaṃ
পরিচ্ছেদপরিচ্ছিন্নুদ্দেসৰারৰণ্ণনা
Paricchedaparicchinnuddesavāravaṇṇanā
১. পচ্চযপরিগ্গহপরিযোসানা ঞাতপরিঞ্ঞাতি পচ্চযদীপকেন মূলযমকেন ঞাতপরিঞ্ঞং , খন্ধাদীসু তীরণবাহুল্লতো খন্ধাদিযমকেহি তীরণপরিঞ্ঞঞ্চ ৰিভাৰেত্ৰা অনুসযপহানন্তা পহানপরিঞ্ঞাতি পহাতব্বমুদ্ধভূতেহি অনুসযেহি পহানপরিঞ্ঞং ৰিভাৰেতুং অনুসযযমকং আরদ্ধং। লব্ভমানৰসেনাতি অনুসযভাৰেন লব্ভমানানং ৰসেনাতি অত্থো। তীহাকারেহি অনুসযানং গাহাপনং তেসু তথা অগ্গহিতেসু অনুসযৰারাদিপাল়িযা দুরৰবোধত্তা।
1. Paccayapariggahapariyosānā ñātapariññāti paccayadīpakena mūlayamakena ñātapariññaṃ , khandhādīsu tīraṇabāhullato khandhādiyamakehi tīraṇapariññañca vibhāvetvā anusayapahānantā pahānapariññāti pahātabbamuddhabhūtehi anusayehi pahānapariññaṃ vibhāvetuṃ anusayayamakaṃ āraddhaṃ. Labbhamānavasenāti anusayabhāvena labbhamānānaṃ vasenāti attho. Tīhākārehi anusayānaṃ gāhāpanaṃ tesu tathā aggahitesu anusayavārādipāḷiyā duravabodhattā.
অযং পনেত্থ পুরিমেসূতি এতেসু সানুসযৰারাদীসু পুরিমেসূতি অত্থো। অত্থৰিসেসাভাৰতো ‘‘কামধাতুং ৰা পন উপপজ্জন্তস্স কামধাতুযা চুতস্স, রূপধাতুং ৰা পন উপপজ্জন্তস্স কামধাতুযা চুতস্সা’’তি এৰমাদীহি অৰুচ্চমানে কথমযং যমকদেসনা সিযাতি? নাযং যমকদেসনা, পুরিমৰারেহি পন যমকৰসেন দেসিতানং অনুসযানং চুতিউপপত্তিৰসেন অনুসযট্ঠানপরিচ্ছেদদস্সনং। যমকদেসনাবাহুল্লতো পন সব্বৰারসমুদাযস্স অনুসযযমকন্তি নামং দট্ঠব্বং। অথ ৰা পটিলোমপুচ্ছাপি অত্থৰসেন লব্ভন্তি, অত্থৰিসেসাভাৰতো পন ন ৰুত্তাতি লব্ভমানতাৰসেন এতিস্সাপি দেসনায যমকদেসনতা ৰেদিতব্বা।
Ayaṃ panettha purimesūti etesu sānusayavārādīsu purimesūti attho. Atthavisesābhāvato ‘‘kāmadhātuṃ vā pana upapajjantassa kāmadhātuyā cutassa, rūpadhātuṃ vā pana upapajjantassa kāmadhātuyā cutassā’’ti evamādīhi avuccamāne kathamayaṃ yamakadesanā siyāti? Nāyaṃ yamakadesanā, purimavārehi pana yamakavasena desitānaṃ anusayānaṃ cutiupapattivasena anusayaṭṭhānaparicchedadassanaṃ. Yamakadesanābāhullato pana sabbavārasamudāyassa anusayayamakanti nāmaṃ daṭṭhabbaṃ. Atha vā paṭilomapucchāpi atthavasena labbhanti, atthavisesābhāvato pana na vuttāti labbhamānatāvasena etissāpi desanāya yamakadesanatā veditabbā.
অনুরূপং কারণং লভিত্ৰা উপ্পজ্জন্তীতি এতেন কারণলাভে উপ্পত্তিঅরহতং দস্সেতি। অপ্পহীনা হি অনুসযা কারণলাভে সতি উপ্পজ্জন্তি। যাৰ চ মগ্গেন তেসং অনুপ্পত্তিঅরহতা ন কতা হোতি, তাৰ তে এৰংপকারা এৰাতি ‘‘অনুসযা’’তি ৰুচ্চন্তি। সো এৰংপকারো উপ্পজ্জতি-সদ্দেন গহিতো, ন খন্ধযমকাদীসু ৰিয উপ্পজ্জমানতা। তেনেৰ ‘‘যস্স কামরাগানুসযো উপ্পজ্জতি, তস্স পটিঘানুসযো উপ্পজ্জতীতি? আমন্তা’’তিআদিনা উপ্পজ্জনৰারো অনুসযৰারেন নিন্নানাকরণো ৰিভত্তো। অনুরূপং কারণং পন লভিত্ৰা যে উপ্পজ্জিংসু উপ্পজ্জমানা চ, তেপি অপ্পহীনট্ঠেন থামগতা অহেসুং ভৰন্তি চ। উপ্পত্তিঅরহতায এৰ চ তে উপ্পজ্জিংসু উপ্পজ্জন্তি চ, ন চ অতীতানাগতপচ্চুপ্পন্নতো অঞ্ঞে উপ্পত্তিঅরহা নাম অত্থি, তস্মা সব্বে অতীতানাগতপচ্চুপ্পন্না কামরাগাদযো ‘‘অনুসযা’’তি ৰুচ্চন্তি। অপ্পহীনট্ঠেনেৰ হি অনুসযা, অপ্পহীনা চ অতীতাদযো এৰ, মগ্গস্স পন তাদিসানং অনুপ্পত্তিঅরহতাপাদনেন অনুসযপ্পহানং হোতীতি। অপ্পহীনাকারো নাম ধম্মাকারো, ন ধম্মো, ধম্মো এৰ চ উপ্পজ্জতীতি ইমিনা অধিপ্পাযেনাহ ‘‘অপ্পহীনাকারো চ উপ্পজ্জতীতি ৰত্তুং ন যুজ্জতী’’তি। সত্তানুসযাতি এত্থ যদি অপ্পহীনট্ঠেন সন্তানে অনুসেন্তীতি অনুসযা, অথ কস্মা সত্তেৰ ৰুত্তা, ননু সত্তানুসযতো অঞ্ঞেসম্পি কিলেসানং অপ্পহীনত্তা অনুসযভাৰো আপজ্জতীতি চে? নাপজ্জতি, অপ্পহীনমত্তস্সেৰ অনুসযভাৰস্স অৰুত্তত্তা। ৰুত্তঞ্হি ‘‘অনুসযোতি পন অপ্পহীনট্ঠেন থামগতকিলেসো ৰুচ্চতী’’তি (যম॰ অট্ঠ॰ অনুসযযমক ১), তস্মা অপ্পহীনট্ঠেন থামগতো কিলেসোযেৰ অনুসযো নামাতি যুত্তং। থামগতন্তি চ অঞ্ঞেহি অসাধারণো সভাৰো দট্ঠব্বো। তথা হি ধম্মসভাৰবোধিনা তথাগতেন ইমেযেৰ ‘‘অনুসযা’’তি ৰুত্তা। থামগতোতি অনুসযসমঙ্গীতি অত্থো।
Anurūpaṃ kāraṇaṃ labhitvā uppajjantīti etena kāraṇalābhe uppattiarahataṃ dasseti. Appahīnā hi anusayā kāraṇalābhe sati uppajjanti. Yāva ca maggena tesaṃ anuppattiarahatā na katā hoti, tāva te evaṃpakārā evāti ‘‘anusayā’’ti vuccanti. So evaṃpakāro uppajjati-saddena gahito, na khandhayamakādīsu viya uppajjamānatā. Teneva ‘‘yassa kāmarāgānusayo uppajjati, tassa paṭighānusayo uppajjatīti? Āmantā’’tiādinā uppajjanavāro anusayavārena ninnānākaraṇo vibhatto. Anurūpaṃ kāraṇaṃ pana labhitvā ye uppajjiṃsu uppajjamānā ca, tepi appahīnaṭṭhena thāmagatā ahesuṃ bhavanti ca. Uppattiarahatāya eva ca te uppajjiṃsu uppajjanti ca, na ca atītānāgatapaccuppannato aññe uppattiarahā nāma atthi, tasmā sabbe atītānāgatapaccuppannā kāmarāgādayo ‘‘anusayā’’ti vuccanti. Appahīnaṭṭheneva hi anusayā, appahīnā ca atītādayo eva, maggassa pana tādisānaṃ anuppattiarahatāpādanena anusayappahānaṃ hotīti. Appahīnākāro nāma dhammākāro, na dhammo, dhammo eva ca uppajjatīti iminā adhippāyenāha ‘‘appahīnākāro ca uppajjatīti vattuṃ na yujjatī’’ti. Sattānusayāti ettha yadi appahīnaṭṭhena santāne anusentīti anusayā, atha kasmā satteva vuttā, nanu sattānusayato aññesampi kilesānaṃ appahīnattā anusayabhāvo āpajjatīti ce? Nāpajjati, appahīnamattasseva anusayabhāvassa avuttattā. Vuttañhi ‘‘anusayoti pana appahīnaṭṭhena thāmagatakileso vuccatī’’ti (yama. aṭṭha. anusayayamaka 1), tasmā appahīnaṭṭhena thāmagato kilesoyeva anusayo nāmāti yuttaṃ. Thāmagatanti ca aññehi asādhāraṇo sabhāvo daṭṭhabbo. Tathā hi dhammasabhāvabodhinā tathāgatena imeyeva ‘‘anusayā’’ti vuttā. Thāmagatoti anusayasamaṅgīti attho.
অনুসযউপ্পজ্জনৰারানং সমানগতিকত্তা যথা ‘‘অনুসেতী’’তি ৰচনং অপ্পহীনাকারদীপকং, এৰং ‘‘উপ্পজ্জতী’’তি ৰচনং সিযাতি উপ্পজ্জনৰারেন ‘‘উপ্পজ্জতী’’তি ৰচনস্স অৰুত্ততা সক্কা ৰত্তুন্তি চে? তং ন, ৰচনত্থৰিসেসেন তংদ্ৰযস্স ৰুত্তত্তা। ‘‘অনুরূপং কারণং লভিত্ৰা উপ্পজ্জতী’’তি হি এতস্মিং অত্থে অৰিসিট্ঠেপি ‘‘অনুসেতী’’তি ৰচনং সন্তানে অনুসযিততং থামগতভাৰং দীপেতি। যদি তমেৰ ‘‘উপ্পজ্জতী’’তি ৰচনং দীপেয্য, কস্সচি ৰিসেসস্স অভাৰা উপ্পজ্জনৰারো ন ৰত্তব্বো সিযা, ‘‘উপ্পজ্জতী’’তি ৰচনং পন উপ্পত্তিযোগ্গং দীপেতি। কস্মা? উপ্পজ্জনৰারেন উপ্পত্তিযোগ্গস্স দস্সিতত্তা, অনুসযসদ্দস্স সব্বদা ৰিজ্জমানানং অপরিনিপ্ফন্নসযনত্থতায নিৰারণত্থং উপ্পত্তিঅরহতায থামগতভাৰসঙ্খাতস্স যথাধিপ্পেতসযনত্থস্স দস্সনত্থং ‘‘অনুসেন্তীতি অনুরূপং কারণং লভিত্ৰা উপ্পজ্জন্তী’’তি যং উপ্পত্তিযোগ্গৰচনং ৰুত্তং, তং সুৰুত্তমেৰাতি অধিপ্পাযো। তম্পি সুৰুত্তমেৰ ইমিনা তন্তিপ্পমাণেনাতি সম্বন্ধো। তন্তিত্তযেনপি হি চিত্তসম্পযুত্ততা দীপিতা হোতি।
Anusayauppajjanavārānaṃ samānagatikattā yathā ‘‘anusetī’’ti vacanaṃ appahīnākāradīpakaṃ, evaṃ ‘‘uppajjatī’’ti vacanaṃ siyāti uppajjanavārena ‘‘uppajjatī’’ti vacanassa avuttatā sakkā vattunti ce? Taṃ na, vacanatthavisesena taṃdvayassa vuttattā. ‘‘Anurūpaṃ kāraṇaṃ labhitvā uppajjatī’’ti hi etasmiṃ atthe avisiṭṭhepi ‘‘anusetī’’ti vacanaṃ santāne anusayitataṃ thāmagatabhāvaṃ dīpeti. Yadi tameva ‘‘uppajjatī’’ti vacanaṃ dīpeyya, kassaci visesassa abhāvā uppajjanavāro na vattabbo siyā, ‘‘uppajjatī’’ti vacanaṃ pana uppattiyoggaṃ dīpeti. Kasmā? Uppajjanavārena uppattiyoggassa dassitattā, anusayasaddassa sabbadā vijjamānānaṃ aparinipphannasayanatthatāya nivāraṇatthaṃ uppattiarahatāya thāmagatabhāvasaṅkhātassa yathādhippetasayanatthassa dassanatthaṃ ‘‘anusentīti anurūpaṃ kāraṇaṃ labhitvā uppajjantī’’ti yaṃ uppattiyoggavacanaṃ vuttaṃ, taṃ suvuttamevāti adhippāyo. Tampi suvuttameva iminā tantippamāṇenāti sambandho. Tantittayenapi hi cittasampayuttatā dīpitā hoti.
পরিচ্ছেদপরিচ্ছিন্নুদ্দেসৰারৰণ্ণনা নিট্ঠিতা।
Paricchedaparicchinnuddesavāravaṇṇanā niṭṭhitā.
উপ্পত্তিট্ঠানৰারৰণ্ণনা
Uppattiṭṭhānavāravaṇṇanā
২. কামধাতুযা দ্ৰীসু ৰেদনাসূতি কামাৰচরভূমিযং সুখায চ উপেক্খায চাতি অট্ঠকথাযং কামধাতুগ্গহণং দ্ৰিন্নং ৰেদনানং ৰিসেসনভাৰেন ৰুত্তং, এৰং সতি কামধাতুযা কামরাগানুসযস্স অনুসযট্ঠানতা ন ৰুত্তা হোতি। দ্ৰীসু পন রাগেসু ভৰরাগস্স তীসু ধাতূসু রূপারূপধাতূনং অনুসযট্ঠানতা ৰুত্তাতি কামধাতুযা কামরাগস্স অনুসযট্ঠানতা ৰত্তব্বা। ধাতুৰেদনাসব্বসক্কাযপরিযাপন্নৰসেন হি তিপ্পকারং অনুসযানং অনুসযট্ঠানং ৰুত্তন্তি। তস্মা তীসু ধাতূসু কামধাতুযা তীসু ৰেদনাসু দ্ৰীসু ৰেদনাসু এত্থ কামরাগানুসযো অনুসেতীতি ৰিসুং অনুসযট্ঠানতা ধাতুযা ৰেদনানঞ্চ যোজেতব্বা। দ্ৰীসু ৰেদনাসূতি ইদঞ্চ ৰেদনাসু অনুসযমানো কামরাগানুসযো দ্ৰীস্ৰেৰ অনুসেতি, ন তীসূতি তিণ্ণম্পি ঠানতানিৰারণত্থমেৰ ৰুত্তন্তি ন সব্বাসু দ্ৰীসু অনুসযনপ্পত্তো অত্থি, তেন ৰেদনাৰিসেসনত্থং ন কামধাতুগ্গহণেন কোচি অত্থো। ভৰরাগানুসযনট্ঠানঞ্হি অট্ঠানঞ্চ অনুসযানং অপরিযাপন্নং সক্কাযে কামরাগানুসযস্স অনুসযট্ঠানং ন হোতীতি পাকটমেতং। যথা চ ‘‘দ্ৰীসু ৰেদনাসূ’’তি ৰুত্তে পটিঘানুসযানুসযট্ঠানতো অঞ্ঞা দ্ৰে ৰেদনা গয্হন্তি, এৰং ভৰরাগানুসযানুসযনট্ঠানতো চ অঞ্ঞা তা গয্হন্তীতি।
2. Kāmadhātuyā dvīsu vedanāsūti kāmāvacarabhūmiyaṃ sukhāya ca upekkhāya cāti aṭṭhakathāyaṃ kāmadhātuggahaṇaṃ dvinnaṃ vedanānaṃ visesanabhāvena vuttaṃ, evaṃ sati kāmadhātuyā kāmarāgānusayassa anusayaṭṭhānatā na vuttā hoti. Dvīsu pana rāgesu bhavarāgassa tīsu dhātūsu rūpārūpadhātūnaṃ anusayaṭṭhānatā vuttāti kāmadhātuyā kāmarāgassa anusayaṭṭhānatā vattabbā. Dhātuvedanāsabbasakkāyapariyāpannavasena hi tippakāraṃ anusayānaṃ anusayaṭṭhānaṃ vuttanti. Tasmā tīsu dhātūsu kāmadhātuyā tīsu vedanāsu dvīsu vedanāsu ettha kāmarāgānusayo anusetīti visuṃ anusayaṭṭhānatā dhātuyā vedanānañca yojetabbā. Dvīsu vedanāsūti idañca vedanāsu anusayamāno kāmarāgānusayo dvīsveva anuseti, na tīsūti tiṇṇampi ṭhānatānivāraṇatthameva vuttanti na sabbāsu dvīsu anusayanappatto atthi, tena vedanāvisesanatthaṃ na kāmadhātuggahaṇena koci attho. Bhavarāgānusayanaṭṭhānañhi aṭṭhānañca anusayānaṃ apariyāpannaṃ sakkāye kāmarāgānusayassa anusayaṭṭhānaṃ na hotīti pākaṭametaṃ. Yathā ca ‘‘dvīsu vedanāsū’’ti vutte paṭighānusayānusayaṭṭhānato aññā dve vedanā gayhanti, evaṃ bhavarāgānusayānusayanaṭṭhānato ca aññā tā gayhantīti.
এত্থ চ দ্ৰীহি ৰেদনাহি সম্পযুত্তেসু অঞ্ঞেসু চ পিযরূপসাতরূপেসু ইট্ঠরূপাদীসু উপ্পজ্জমানো কামরাগানুসযো সাতসন্তসুখগিদ্ধিযা পৰত্ততীতি দ্ৰীসু ৰেদনাসু তস্স অনুসযনং ৰুত্তং। অঞ্ঞত্থ উপ্পজ্জমানোপি হি সো ইমাসু দ্ৰীসু ৰেদনাসু অনুগতো হুত্ৰা সেতি সুখমিচ্চেৰ অভিলভতীতি। এৰং পটিঘানুসযো চ দুক্খৰেদনাসম্পযুত্তেসু অঞ্ঞেসু চ অপ্পিযরূপাসাতরূপেসু অনিট্ঠরূপাদীসু উপ্পজ্জমানো দুক্খপটিকূলতো দুক্খমিচ্চেৰ পটিহঞ্ঞতীতি দুক্খৰেদনমেৰ অনুগতো হুত্ৰা সেতি, তেন পন তস্মিং অনুসযনং ৰুত্তং। এৰং কামরাগপটিঘানং তীসু ৰেদনাসু অনুসযৰচনেন ইট্ঠইট্ঠমজ্ঝত্তঅনিট্ঠেসু আরম্মণপকতিযা ৰিপরীতসঞ্ঞায চ ৰসেন ইট্ঠাদিভাৰেন গহিতেসু কামরাগপটিঘানং উপ্পত্তি দস্সিতা হোতি। তত্থ উপ্পজ্জমানা হি তে তীসু ৰেদনাসু অনুসেন্তি নাম। ৰেদনাত্তযমুখেন ৰা এত্থ ইট্ঠাদীনং আরম্মণানং গহণং ৰেদিতব্বং, কামধাতুআদিগ্গহণেন কামস্সাদাদিৰত্থুভূতানং কামভৰাদীনং। তত্থ কামরাগানুসযো ভৰস্সাদৰসেন অনুসযমানো কামধাতুযা অনুসেতি, কামসুখস্সাদৰসেন অনুসযমানো সুখোপেক্খাৰেদনাসু। পটিঘো দুক্খপটিঘাতৰসেনেৰ পৰত্ততীতি যত্থ তত্থ পটিহঞ্ঞমানোপি দুক্খৰেদনায এৰ অনুসেতি। রূপারূপভৰেসু পন রূপারূপাৰচরধম্মেসু চ কামস্সাদস্স পৰত্তি নত্থীতি তত্থ অনুসযমানো রাগো ভৰরাগোইচ্চেৰ ৰেদিতব্বো। ধাতুত্তযৰেদনাত্তযগ্গহণেন চ সব্বসক্কাযপরিযাপন্নানং গহিতত্তা ‘‘যত্থ কামরাগানুসযো নানুসেতি, তত্থ দিট্ঠানুসযো নানুসেতী’’তি (যম॰ ২.অনুসযযমক.৪৬) এৰমাদীনং ৰিস্সজ্জনেসু ধাতুত্তযৰেদনাত্তযৰিনিমুত্তং দিট্ঠানুসযাদীনং অনুসযট্ঠানং ন ৰুত্তন্তি দট্ঠব্বং। ননু চ অনুত্তরেসু ৰিমোক্খেসু পিহং উপট্ঠাপযতো পিহপচ্চযা উপ্পন্নদোমনস্সে পটিঘানুসযো নানুসেতি, তথা নেক্খম্মস্সিতসোমনস্সুপেক্খাসু কামরাগেন নানুসযিতব্বন্তি তদনুসযনট্ঠানতো অঞ্ঞাপি দিট্ঠানুসযানুসযনট্ঠানভূতা কামাৰচরৰেদনা সন্তীতি? হোন্তু, ন পন ধাতুত্তযৰেদনাত্তযতো অঞ্ঞং তদনুসযনট্ঠানং অত্থি, তস্মা তং ন ৰুত্তং। যস্মা পন ‘‘যত্থ কামরাগানুসযো চ পটিঘানুসযো চ মানানুসযো চ নানুসেন্তি, তত্থ দিট্ঠানুসযো ৰিচিকিচ্ছানুসযো নানুসেতীতি? আমন্তা’’তি (যম॰ ২.অনুসযযমক.৫২) ৰুত্তং, তস্মা অৰিসেসেন দুক্খং পটিঘানুসযস্স অনুসযনট্ঠানন্তি সমুদাযৰসেন গহেত্ৰা ৰুত্তন্তি ৰেদিতব্বং। তথা লোকিযসুখোপেক্খা কামরাগমানানুসযনট্ঠানন্তি।
Ettha ca dvīhi vedanāhi sampayuttesu aññesu ca piyarūpasātarūpesu iṭṭharūpādīsu uppajjamāno kāmarāgānusayo sātasantasukhagiddhiyā pavattatīti dvīsu vedanāsu tassa anusayanaṃ vuttaṃ. Aññattha uppajjamānopi hi so imāsu dvīsu vedanāsu anugato hutvā seti sukhamicceva abhilabhatīti. Evaṃ paṭighānusayo ca dukkhavedanāsampayuttesu aññesu ca appiyarūpāsātarūpesu aniṭṭharūpādīsu uppajjamāno dukkhapaṭikūlato dukkhamicceva paṭihaññatīti dukkhavedanameva anugato hutvā seti, tena pana tasmiṃ anusayanaṃ vuttaṃ. Evaṃ kāmarāgapaṭighānaṃ tīsu vedanāsu anusayavacanena iṭṭhaiṭṭhamajjhattaaniṭṭhesu ārammaṇapakatiyā viparītasaññāya ca vasena iṭṭhādibhāvena gahitesu kāmarāgapaṭighānaṃ uppatti dassitā hoti. Tattha uppajjamānā hi te tīsu vedanāsu anusenti nāma. Vedanāttayamukhena vā ettha iṭṭhādīnaṃ ārammaṇānaṃ gahaṇaṃ veditabbaṃ, kāmadhātuādiggahaṇena kāmassādādivatthubhūtānaṃ kāmabhavādīnaṃ. Tattha kāmarāgānusayo bhavassādavasena anusayamāno kāmadhātuyā anuseti, kāmasukhassādavasena anusayamāno sukhopekkhāvedanāsu. Paṭigho dukkhapaṭighātavaseneva pavattatīti yattha tattha paṭihaññamānopi dukkhavedanāya eva anuseti. Rūpārūpabhavesu pana rūpārūpāvacaradhammesu ca kāmassādassa pavatti natthīti tattha anusayamāno rāgo bhavarāgoicceva veditabbo. Dhātuttayavedanāttayaggahaṇena ca sabbasakkāyapariyāpannānaṃ gahitattā ‘‘yattha kāmarāgānusayo nānuseti, tattha diṭṭhānusayo nānusetī’’ti (yama. 2.anusayayamaka.46) evamādīnaṃ vissajjanesu dhātuttayavedanāttayavinimuttaṃ diṭṭhānusayādīnaṃ anusayaṭṭhānaṃ na vuttanti daṭṭhabbaṃ. Nanu ca anuttaresu vimokkhesu pihaṃ upaṭṭhāpayato pihapaccayā uppannadomanasse paṭighānusayo nānuseti, tathā nekkhammassitasomanassupekkhāsu kāmarāgena nānusayitabbanti tadanusayanaṭṭhānato aññāpi diṭṭhānusayānusayanaṭṭhānabhūtā kāmāvacaravedanā santīti? Hontu, na pana dhātuttayavedanāttayato aññaṃ tadanusayanaṭṭhānaṃ atthi, tasmā taṃ na vuttaṃ. Yasmā pana ‘‘yattha kāmarāgānusayo ca paṭighānusayo ca mānānusayo ca nānusenti, tattha diṭṭhānusayo vicikicchānusayo nānusetīti? Āmantā’’ti (yama. 2.anusayayamaka.52) vuttaṃ, tasmā avisesena dukkhaṃ paṭighānusayassa anusayanaṭṭhānanti samudāyavasena gahetvā vuttanti veditabbaṃ. Tathā lokiyasukhopekkhā kāmarāgamānānusayanaṭṭhānanti.
অপিচ সুত্তে ‘‘ইধাৰুসো ৰিসাখ, ভিক্খু ইতি পটিসঞ্চিক্খতি ‘কুদাস্সু নামাহং দোমনস্সং পজহেয্য’ন্তি, সো ইতি পটিসঞ্চিক্খিত্ৰা পটিঘং তেন পজহতি, ন তত্থ পটিঘানুসযো অনুসেতী’’তি নেক্খম্মস্সিতং দোমনস্সং উপ্পাদেত্ৰা তং ৰিক্খম্ভেত্ৰা ৰীরিযং কত্ৰা অনাগামিমগ্গেন পটিঘস্স সমুগ্ঘাতনং সন্ধায ৰুত্তং। ন হি পটিঘেনেৰ পটিঘপ্পহানং, দোমনস্সেন ৰা দোমনস্সপ্পহানং অত্থীতি। পটিঘুপ্পত্তিরহট্ঠানতায পন ইধ সব্বং দুক্খং ‘‘পটিঘানুসযস্স অনুসযনট্ঠান’’ন্তি ৰুত্তন্তি দট্ঠব্বং। নিপ্পরিযাযদেসনা হেসা, সা পন পরিযাযদেসনা। এৰঞ্চ কত্ৰা পঠমজ্ঝানৰিক্খম্ভিতং কামরাগানুসযং তথা ৰিক্খম্ভিতমেৰ কত্ৰা অনাগামিমগ্গেন সমুগ্ঘাতনং সন্ধায ‘‘ৰিৰিচ্চেৰ…পে॰… পঠমং ঝানং উপসম্পজ্জ ৰিহরতি, রাগং তেন পজহতি, ন তত্থ রাগানুসযো অনুসেতী’’তি ৰুত্তং। এৰং চতুত্থজ্ঝানৰিক্খম্ভিতং অৰিজ্জানুসযং তথা ৰিক্খম্ভিতমেৰ কত্ৰা অরহত্তমগ্গেন সমুগ্ঘাতনং সন্ধায ‘‘সুখস্স চ পহানা…পে॰… চতুত্থং ঝানং উপসম্পজ্জ ৰিহরতি, অৰিজ্জং তেন পজহতি, ন তত্থ অৰিজ্জানুসযো অনুসেতী’’তি (ম॰ নি॰ ১.৪৬৫) ৰুত্তং। ন হি লোকিযচতুত্থজ্ঝানুপেক্খায অৰিজ্জানুসযো সব্বথা নানুসেতীতি সক্কা ৰত্তুং ‘‘সব্বসক্কাযপরিযাপন্নেসু ধম্মেসু এত্থ অৰিজ্জানুসযো অনুসেতী’’তি (যম॰ অট্ঠ॰ অনুসযযমক ২) ৰুত্তত্তা, তস্মা অৰিজ্জানুসযস্সেৰ ৰত্থু চতুত্থজ্ঝানুপেক্খা, নেক্খম্মস্সিতদোমনস্সঞ্চ পটিঘানুসযস্স ৰত্থু ন ন হোতীতি তত্থাপি তস্স অনুসযনং ৰেদিতব্বং। অৰত্থুভাৰতো হি ইধ অনুসযনং ন ৰুচ্চতি, ন সুত্তন্তেসু ৰিয ৰুত্তনযেন তংপটিপক্খভাৰতো তংসমুগ্ঘাতকমগ্গস্স বলৰূপনিস্সযভাৰতো চাতি।
Apica sutte ‘‘idhāvuso visākha, bhikkhu iti paṭisañcikkhati ‘kudāssu nāmāhaṃ domanassaṃ pajaheyya’nti, so iti paṭisañcikkhitvā paṭighaṃ tena pajahati, na tattha paṭighānusayo anusetī’’ti nekkhammassitaṃ domanassaṃ uppādetvā taṃ vikkhambhetvā vīriyaṃ katvā anāgāmimaggena paṭighassa samugghātanaṃ sandhāya vuttaṃ. Na hi paṭigheneva paṭighappahānaṃ, domanassena vā domanassappahānaṃ atthīti. Paṭighuppattirahaṭṭhānatāya pana idha sabbaṃ dukkhaṃ ‘‘paṭighānusayassa anusayanaṭṭhāna’’nti vuttanti daṭṭhabbaṃ. Nippariyāyadesanā hesā, sā pana pariyāyadesanā. Evañca katvā paṭhamajjhānavikkhambhitaṃ kāmarāgānusayaṃ tathā vikkhambhitameva katvā anāgāmimaggena samugghātanaṃ sandhāya ‘‘vivicceva…pe… paṭhamaṃ jhānaṃ upasampajja viharati, rāgaṃ tena pajahati, na tattha rāgānusayo anusetī’’ti vuttaṃ. Evaṃ catutthajjhānavikkhambhitaṃ avijjānusayaṃ tathā vikkhambhitameva katvā arahattamaggena samugghātanaṃ sandhāya ‘‘sukhassa ca pahānā…pe… catutthaṃ jhānaṃ upasampajja viharati, avijjaṃ tena pajahati, na tattha avijjānusayo anusetī’’ti (ma. ni. 1.465) vuttaṃ. Na hi lokiyacatutthajjhānupekkhāya avijjānusayo sabbathā nānusetīti sakkā vattuṃ ‘‘sabbasakkāyapariyāpannesu dhammesu ettha avijjānusayo anusetī’’ti (yama. aṭṭha. anusayayamaka 2) vuttattā, tasmā avijjānusayasseva vatthu catutthajjhānupekkhā, nekkhammassitadomanassañca paṭighānusayassa vatthu na na hotīti tatthāpi tassa anusayanaṃ veditabbaṃ. Avatthubhāvato hi idha anusayanaṃ na vuccati, na suttantesu viya vuttanayena taṃpaṭipakkhabhāvato taṃsamugghātakamaggassa balavūpanissayabhāvato cāti.
এত্থ চ আরম্মণে অনুসযট্ঠানে সতি ভৰরাগৰজ্জো সব্বো লোভো কামরাগানুসযোতি ন সক্কা ৰত্তুং। দুক্খায হি ৰেদনায রূপারূপধাতূসু চ অনুসযমানেন দিট্ঠানুসযেন সম্পযুত্তোপি লোভো লোভো এৰ, ন কামরাগানুসযো। যদি সিযা, দিট্ঠানুসযস্স ৰিয এতস্সপি ঠানং ৰত্তব্বং সিযাতি। অথ পন অজ্ঝাসযৰসেন তন্নিন্নতায অনুসযনট্ঠানং ৰুত্তং। যথা ইট্ঠানং রূপাদীনং সুখায চ ৰেদনায অপ্পটিলদ্ধং ৰা অপ্পটিলাভতো সমনুপস্সতো, পটিলদ্ধপুব্বং ৰা অতীতং নিরুদ্ধং ৰিগতং পরিণতং সমনুপস্সতো উপ্পজ্জমানো পটিঘো দুক্খে পটিহঞ্ঞনৰসেনেৰ পৰত্ততীতি দুক্খমেৰ তস্স অনুসযনট্ঠানং ৰুত্তং, নালম্বিতং, এৰং দুক্খাদীসু অভিনিৰেসনৰসেন উপ্পজ্জমানেন দিট্ঠানুসযেন সম্পযুত্তোপি লোভো সুখাভিসঙ্গৰসেনেৰ পৰত্ততীতি সাতসন্তসুখদ্ৰযমেৰস্স অনুসযট্ঠানং ৰুত্তন্তি ভৰরাগৰজ্জস্স সব্বলোভস্স কামরাগানুসযতা ন ৰিরুজ্ঝতি, একস্মিংযেৰ চ আরম্মণে রজ্জন্তি দুস্সন্তি চ। তত্থ রাগো সুখজ্ঝাসযো পটিঘো দুক্খজ্ঝাসযোতি তেসং নানানুসযট্ঠানতা হোতি।
Ettha ca ārammaṇe anusayaṭṭhāne sati bhavarāgavajjo sabbo lobho kāmarāgānusayoti na sakkā vattuṃ. Dukkhāya hi vedanāya rūpārūpadhātūsu ca anusayamānena diṭṭhānusayena sampayuttopi lobho lobho eva, na kāmarāgānusayo. Yadi siyā, diṭṭhānusayassa viya etassapi ṭhānaṃ vattabbaṃ siyāti. Atha pana ajjhāsayavasena tanninnatāya anusayanaṭṭhānaṃ vuttaṃ. Yathā iṭṭhānaṃ rūpādīnaṃ sukhāya ca vedanāya appaṭiladdhaṃ vā appaṭilābhato samanupassato, paṭiladdhapubbaṃ vā atītaṃ niruddhaṃ vigataṃ pariṇataṃ samanupassato uppajjamāno paṭigho dukkhe paṭihaññanavaseneva pavattatīti dukkhameva tassa anusayanaṭṭhānaṃ vuttaṃ, nālambitaṃ, evaṃ dukkhādīsu abhinivesanavasena uppajjamānena diṭṭhānusayena sampayuttopi lobho sukhābhisaṅgavaseneva pavattatīti sātasantasukhadvayamevassa anusayaṭṭhānaṃ vuttanti bhavarāgavajjassa sabbalobhassa kāmarāgānusayatā na virujjhati, ekasmiṃyeva ca ārammaṇe rajjanti dussanti ca. Tattha rāgo sukhajjhāsayo paṭigho dukkhajjhāsayoti tesaṃ nānānusayaṭṭhānatā hoti.
এৰঞ্চ কত্ৰা ‘‘যত্থ কামরাগানুসযো অনুসেতি, তত্থ পটিঘানুসযো অনুসেতীতি? নো’’তি (যম॰ ২.অনুসযযমক.১৪) ৰুত্তন্তি। অট্ঠকথাযং পন দ্ৰীসু ৰেদনাসু ইট্ঠারম্মণে চ দোমনস্সুপ্পত্তিং ৰত্ৰা ‘‘দোমনস্সমত্তমেৰ পন তং হোতি, ন পটিঘানুসযো’’তি (যম॰ অট্ঠ॰ অনুসযযমক ২) ৰুত্তত্তা যথা তত্থ পটিঘো পটিঘানুসযো ন হোতি, এৰং দুক্খাদীসু উপ্পজ্জমানেন দিট্ঠানুসযেন সহজাতো লোভো কামরাগানুসযো ন হোতিচ্চেৰ ৰিঞ্ঞাযতীতি। যং পনেতং ৰুত্তং ‘‘দোমনস্সমত্তমেৰ পন তং হোতি, ন পটিঘানুসযো’’তি, এত্থ ন পটিঘানুসযোতি নত্থি পটিঘানুসযোতি অত্থো দট্ঠব্বো। ন হি দোমনস্সস্স পটিঘানুসযভাৰাসঙ্কা অত্থীতি।
Evañca katvā ‘‘yattha kāmarāgānusayo anuseti, tattha paṭighānusayo anusetīti? No’’ti (yama. 2.anusayayamaka.14) vuttanti. Aṭṭhakathāyaṃ pana dvīsu vedanāsu iṭṭhārammaṇe ca domanassuppattiṃ vatvā ‘‘domanassamattameva pana taṃ hoti, na paṭighānusayo’’ti (yama. aṭṭha. anusayayamaka 2) vuttattā yathā tattha paṭigho paṭighānusayo na hoti, evaṃ dukkhādīsu uppajjamānena diṭṭhānusayena sahajāto lobho kāmarāgānusayo na hoticceva viññāyatīti. Yaṃ panetaṃ vuttaṃ ‘‘domanassamattameva pana taṃ hoti, na paṭighānusayo’’ti, ettha na paṭighānusayoti natthi paṭighānusayoti attho daṭṭhabbo. Na hi domanassassa paṭighānusayabhāvāsaṅkā atthīti.
দেসনা সংকিণ্ণা ৰিয ভৰেয্যাতি ভৰরাগস্সপি কামধাতুযা দ্ৰীসু ৰেদনাসু আরম্মণকরণৰসেনেৰ উপ্পত্তি ৰুত্তা ৰিয ভৰেয্য, তস্মা আরম্মণৰিসেসেন ৰিসেসদস্সনত্থং এৰং দেসনা কতা সহজাতৰেদনাৰিসেসাভাৰতোতি অধিপ্পাযো।
Desanā saṃkiṇṇā viya bhaveyyāti bhavarāgassapi kāmadhātuyā dvīsu vedanāsu ārammaṇakaraṇavaseneva uppatti vuttā viya bhaveyya, tasmā ārammaṇavisesena visesadassanatthaṃ evaṃ desanā katā sahajātavedanāvisesābhāvatoti adhippāyo.
উপ্পত্তিট্ঠানৰারৰণ্ণনা নিট্ঠিতা।
Uppattiṭṭhānavāravaṇṇanā niṭṭhitā.
মহাৰারো
Mahāvāro
১. অনুসযৰারৰণ্ণনা
1. Anusayavāravaṇṇanā
৩. অনুসেতি উপ্পজ্জতীতি পচ্চুপ্পন্নৰোহারা পৰত্তাৰিরামৰসেন ৰেদিতব্বা। মগ্গেনেৰ হি অনুসযানং ৰিরামো ৰিচ্ছেদো হোতি, ন ততো পুব্বেতি।
3. Anusetiuppajjatīti paccuppannavohārā pavattāvirāmavasena veditabbā. Maggeneva hi anusayānaṃ virāmo vicchedo hoti, na tato pubbeti.
২০. নাপি একস্মিং ঠানে উপ্পজ্জন্তি, ন একং ধম্মং আরম্মণং করোন্তীতি এত্থ পুরিমেন একস্মিং চিত্তুপ্পাদে উপ্পত্তি নিৰারিতা, পচ্ছিমেন একস্মিং আরম্মণেতি অযং ৰিসেসো। পুগ্গলোকাসৰারস্স পটিলোমে তেসং তেসং পুগ্গলানং তস্স তস্স অনুসযস্স অননুসযনট্ঠানং পকতিযা পহানেন চ ৰেদিতব্বং, ‘‘তিণ্ণং পুগ্গলানং দুক্খায ৰেদনায তেসং তত্থ কামরাগানুসযো নানুসেতি, নো চ তেসং তত্থ পটিঘানুসযো নানুসেতি, তেসঞ্ঞেৰ পুগ্গলানং রূপধাতুযা অরূপধাতুযা অপরিযাপন্নে তেসং তত্থ কামরাগানুসযো চ নানুসেতি, পটিঘানুসযো চ নানুসেতী’’তি পকতিযা দুক্খাদীনং কামরাগাদীনং অননুসযট্ঠানতং সন্ধায ৰুত্তং, ‘‘দ্ৰিন্নং পুগ্গলানং সব্বত্থ কামরাগানুসযো চ নানুসেতি, পটিঘানুসযো চ নানুসেতী’’তি (যম॰ ২.অনুসযযমক.৫৬) অনুসযপ্পহানেন। এত্থ পুরিমনযেন ওকাসং অৰেক্খিত্ৰা পুগ্গলস্স ৰিজ্জমানানং অনুসযানং অননুসযনং ৰুত্তং, পচ্ছিমনযেন পুগ্গলং অৰেক্খিত্ৰা ওকাসস্স কামধাতুআদিকস্স অনোকাসতাতি।
20. Nāpi ekasmiṃ ṭhāne uppajjanti, na ekaṃ dhammaṃ ārammaṇaṃ karontīti ettha purimena ekasmiṃ cittuppāde uppatti nivāritā, pacchimena ekasmiṃ ārammaṇeti ayaṃ viseso. Puggalokāsavārassa paṭilome tesaṃ tesaṃ puggalānaṃ tassa tassa anusayassa ananusayanaṭṭhānaṃ pakatiyā pahānena ca veditabbaṃ, ‘‘tiṇṇaṃ puggalānaṃ dukkhāya vedanāya tesaṃ tattha kāmarāgānusayo nānuseti, no ca tesaṃ tattha paṭighānusayo nānuseti, tesaññeva puggalānaṃ rūpadhātuyā arūpadhātuyā apariyāpanne tesaṃ tattha kāmarāgānusayo ca nānuseti, paṭighānusayo ca nānusetī’’ti pakatiyā dukkhādīnaṃ kāmarāgādīnaṃ ananusayaṭṭhānataṃ sandhāya vuttaṃ, ‘‘dvinnaṃ puggalānaṃ sabbattha kāmarāgānusayo ca nānuseti, paṭighānusayo ca nānusetī’’ti (yama. 2.anusayayamaka.56) anusayappahānena. Ettha purimanayena okāsaṃ avekkhitvā puggalassa vijjamānānaṃ anusayānaṃ ananusayanaṃ vuttaṃ, pacchimanayena puggalaṃ avekkhitvā okāsassa kāmadhātuādikassa anokāsatāti.
অনুসযৰারৰণ্ণনা নিট্ঠিতা।
Anusayavāravaṇṇanā niṭṭhitā.
২. সানুসযৰারৰণ্ণনা
2. Sānusayavāravaṇṇanā
৬৬-১৩১. সানুসযপজহনপরিঞ্ঞাৰারেসু ‘‘সানুসযো, পজহতি, পরিজানাতী’’তি পুগ্গলো ৰুত্তো। পুগ্গলস্স চ ইমস্মিং ভৰে সানুসযোতি এৰং ভৰৰিসেসেন ৰা, ইমস্মিং কামরাগানুসযেন সানুসযো ইমস্মিং ইতরেসু কেনচীতি এৰং ভৰানুসযৰিসেসেন ৰা সানুসযতানিরনুসযতাদিকা নত্থি। তথা দ্ৰীসু ৰেদনাসু কামরাগানুসযেন সানুসযো, দুক্খায ৰেদনায নিরনুসযোতি ইদম্পি নত্থি। ন হি পুগ্গলস্স ৰেদনা ওকাসো, অথ খো অনুসযানন্তি। অনুসযস্স পন তস্স তস্স সো সো অনুসযনোকাসো পুগ্গলস্স তেন তেন অনুসযেন সানুসযতায, তস্স তস্স পজহনপরিজাননানঞ্চ নিমিত্তং হোতি, অননুসযনোকাসো চ নিরনুসযতাদীনং, তস্মা ওকাসৰারেসু ভুম্মনিদ্দেসং অকত্ৰা ‘‘যতো ততো’’তি নিমিত্তত্থে নিস্সক্কৰচনং কতং, পজহনপরিঞ্ঞাৰারেসু অপাদানত্থে এৰ ৰা। ততো ততো হি ওকাসতো অপগমকরণং ৰিনাসনং পজহনং পরিজাননঞ্চাতি।
66-131. Sānusayapajahanapariññāvāresu ‘‘sānusayo, pajahati, parijānātī’’ti puggalo vutto. Puggalassa ca imasmiṃ bhave sānusayoti evaṃ bhavavisesena vā, imasmiṃ kāmarāgānusayena sānusayo imasmiṃ itaresu kenacīti evaṃ bhavānusayavisesena vā sānusayatāniranusayatādikā natthi. Tathā dvīsu vedanāsu kāmarāgānusayena sānusayo, dukkhāya vedanāya niranusayoti idampi natthi. Na hi puggalassa vedanā okāso, atha kho anusayānanti. Anusayassa pana tassa tassa so so anusayanokāso puggalassa tena tena anusayena sānusayatāya, tassa tassa pajahanaparijānanānañca nimittaṃ hoti, ananusayanokāso ca niranusayatādīnaṃ, tasmā okāsavāresu bhummaniddesaṃ akatvā ‘‘yato tato’’ti nimittatthe nissakkavacanaṃ kataṃ, pajahanapariññāvāresu apādānatthe eva vā. Tato tato hi okāsato apagamakaraṇaṃ vināsanaṃ pajahanaṃ parijānanañcāti.
তত্থ যতোতি যতো অনুসযট্ঠানতো অনুলোমে, পটিলোমে অননুসযট্ঠানতোতি অত্থো। অনুসযানানুসযস্সেৰ হি নিমিত্তাপাদানভাৰদস্সনত্থং ‘‘রূপধাতুযা অরূপধাতুযা ততো মানানুসযেন সানুসযোতি (যম॰২.অনুসযযমক.৭৭), পজহতী’’তি (যম॰ ২.অনুসযযমক.১৪৩) চ ‘‘দুক্খায ৰেদনায ততো কামরাগানুসযেন নিরনুসযোতি (যম॰ ২.অনুসযযমক.১১০), ন পজহতী’’তি (যম॰ ২.অনুসযযমক.১৭৪-১৭৬) চ এৰমাদীসু রূপধাতুআদযো এৰ ভুম্মনিদ্দেসেনেৰ নিদ্দিট্ঠাতি। অট্ঠকথাযং পন চতুত্থপঞ্হৰিস্সজ্জনেন সরূপতো অনুসযনট্ঠানস্স দস্সিতত্তা তদত্থে আদিপঞ্হেপি ‘‘যতো’’তি অনুসযনট্ঠানং ৰুত্তন্তি ইমমত্থং ৰিভাৰেত্ৰা পুন ‘‘যতো’’তি এতস্স ৰচনত্থং দস্সেতুং ‘‘উপ্পন্নেন কামরাগানুসযেন সানুসযো’’তি ৰুত্তং, তং পমাদলিখিতং ৰিয দিস্সতি। ন হি উপ্পন্নেনেৰ অনুসযেন সানুসযো, উপ্পত্তিরহট্ঠানতঞ্চ সন্ধাযেৰ নিস্সক্কৰচনং ন সক্কা ৰত্তুং। ন হি অপরিযাপন্নানং অনুসযুপ্পত্তিরহট্ঠানতাতি তং তথেৰ দিস্সতি। এৰং পনেত্থ অত্থো দট্ঠব্বো – যতো উপ্পন্নেনাতি যতো উপ্পন্নেন ভৰিতব্বং, তেনাতি উপ্পত্তিরহট্ঠানে নিস্সক্কৰচনং কতন্তি। তথা সব্বধম্মেসু উপ্পজ্জনকেনাতি। উপ্পত্তিপটিসেধে অকতে অনুপ্পত্তিযা অনিচ্ছিতত্তা সব্বধম্মেসু উপ্পজ্জনকভাৰং আপন্নেন অনুপ্পজ্জনভাৰং অপনেতি নাম। সব্বত্থাতি এতস্স পন সব্বট্ঠানতোতি অযমত্থো ন ন সম্ভৰতি। ত্থ-কারঞ্হি ভুম্মতো অঞ্ঞত্থাপি সদ্দৰিদূ ইচ্ছন্তীতি।
Tattha yatoti yato anusayaṭṭhānato anulome, paṭilome ananusayaṭṭhānatoti attho. Anusayānānusayasseva hi nimittāpādānabhāvadassanatthaṃ ‘‘rūpadhātuyā arūpadhātuyā tato mānānusayena sānusayoti (yama.2.anusayayamaka.77), pajahatī’’ti (yama. 2.anusayayamaka.143) ca ‘‘dukkhāya vedanāya tato kāmarāgānusayena niranusayoti (yama. 2.anusayayamaka.110), na pajahatī’’ti (yama. 2.anusayayamaka.174-176) ca evamādīsu rūpadhātuādayo eva bhummaniddeseneva niddiṭṭhāti. Aṭṭhakathāyaṃ pana catutthapañhavissajjanena sarūpato anusayanaṭṭhānassa dassitattā tadatthe ādipañhepi ‘‘yato’’ti anusayanaṭṭhānaṃ vuttanti imamatthaṃ vibhāvetvā puna ‘‘yato’’ti etassa vacanatthaṃ dassetuṃ ‘‘uppannena kāmarāgānusayena sānusayo’’ti vuttaṃ, taṃ pamādalikhitaṃ viya dissati. Na hi uppanneneva anusayena sānusayo, uppattirahaṭṭhānatañca sandhāyeva nissakkavacanaṃ na sakkā vattuṃ. Na hi apariyāpannānaṃ anusayuppattirahaṭṭhānatāti taṃ tatheva dissati. Evaṃ panettha attho daṭṭhabbo – yato uppannenāti yato uppannena bhavitabbaṃ, tenāti uppattirahaṭṭhāne nissakkavacanaṃ katanti. Tathā sabbadhammesu uppajjanakenāti. Uppattipaṭisedhe akate anuppattiyā anicchitattā sabbadhammesu uppajjanakabhāvaṃ āpannena anuppajjanabhāvaṃ apaneti nāma. Sabbatthāti etassa pana sabbaṭṭhānatoti ayamattho na na sambhavati. Ttha-kārañhi bhummato aññatthāpi saddavidū icchantīti.
সানুসযৰারৰণ্ণনা নিট্ঠিতা।
Sānusayavāravaṇṇanā niṭṭhitā.
৩. পজহনৰারৰণ্ণনা
3. Pajahanavāravaṇṇanā
১৩২-১৯৭. পজহনৰারে যেন কামরাগানুসযাদযো সাৰসেসা পহীযন্তি, সো তে পজহতীতি সন্নিট্ঠানং কত্ৰা ৰত্তব্বো ন হোতি অপজহনসব্ভাৰা, তস্মা সন্নিট্ঠানে নিরৰসেসপ্পজহনকোযেৰ পজহতীতি ৰুত্তো, তস্মা ‘‘যো ৰা পন মানানুসযং পজহতি, সো কামরাগানুসযং পজহতীতি? নো’’তি (যম॰ ২.অনুসযযমক.১৩২) ৰুত্তং। যস্মা পন সংসযপদেন পহানকরণমত্তমেৰ পুচ্ছতি, ন সন্নিট্ঠানং করোতি, তস্মা যথাৰিজ্জমানং পহানং সন্ধায ‘‘যো কামরাগানুসযং পজহতি, সো মানানুসযং পজহতীতি? তদেকট্ঠং পজহতী’’তি ৰুত্তং। পটিলোমে পন ‘‘নপ্পজহতী’’তি পজহনাভাৰো এৰ সন্নিট্ঠানপদেন সংসযপদেন চ ৰিনিচ্ছিতো পুচ্ছিতো চ, তস্মা যেসং পজহনং নত্থি নিরৰসেসৰসেন পজহনকানং, তে ঠপেত্ৰা অৰসেসা অপ্পজহনসব্ভাৰেনেৰ নপ্পজহন্তীতি ৰুত্তা, ন চ যথাৰিজ্জমানেন পহানেনেৰ ৰজ্জিতাতি দট্ঠব্বাতি। ‘‘অনাগামিমগ্গসমঙ্গিঞ্চ অট্ঠমকঞ্চ ঠপেত্ৰা অৰসেসা পুগ্গলা কামরাগানুসযঞ্চ নপ্পজহন্তি ৰিচিকিচ্ছানুসযঞ্চ নপ্পজহন্তী’’তি (যম॰ ২.অনুসযযমক.১৬৫) এত্থ অট্ঠকথাযং ‘‘পুথুজ্জনো পহানপরিঞ্ঞায অভাৰেন নপ্পজহতি, সেসা তেসং অনুসযানং পহীনত্তা’’তি (যম॰ অট্ঠ॰ অনুসযযমক ১৩২-১৯৭) ৰুত্তং।
132-197. Pajahanavāre yena kāmarāgānusayādayo sāvasesā pahīyanti, so te pajahatīti sanniṭṭhānaṃ katvā vattabbo na hoti apajahanasabbhāvā, tasmā sanniṭṭhāne niravasesappajahanakoyeva pajahatīti vutto, tasmā ‘‘yo vā pana mānānusayaṃ pajahati, so kāmarāgānusayaṃ pajahatīti? No’’ti (yama. 2.anusayayamaka.132) vuttaṃ. Yasmā pana saṃsayapadena pahānakaraṇamattameva pucchati, na sanniṭṭhānaṃ karoti, tasmā yathāvijjamānaṃ pahānaṃ sandhāya ‘‘yo kāmarāgānusayaṃ pajahati, so mānānusayaṃ pajahatīti? Tadekaṭṭhaṃ pajahatī’’ti vuttaṃ. Paṭilome pana ‘‘nappajahatī’’ti pajahanābhāvo eva sanniṭṭhānapadena saṃsayapadena ca vinicchito pucchito ca, tasmā yesaṃ pajahanaṃ natthi niravasesavasena pajahanakānaṃ, te ṭhapetvā avasesā appajahanasabbhāveneva nappajahantīti vuttā, na ca yathāvijjamānena pahāneneva vajjitāti daṭṭhabbāti. ‘‘Anāgāmimaggasamaṅgiñca aṭṭhamakañca ṭhapetvā avasesā puggalā kāmarāgānusayañca nappajahanti vicikicchānusayañca nappajahantī’’ti (yama. 2.anusayayamaka.165) ettha aṭṭhakathāyaṃ ‘‘puthujjano pahānapariññāya abhāvena nappajahati, sesā tesaṃ anusayānaṃ pahīnattā’’ti (yama. aṭṭha. anusayayamaka 132-197) vuttaṃ.
তত্থ কিঞ্চাপি কেসঞ্চি ৰিচিকিচ্ছানুসযো কেসঞ্চি উভযন্তি সেসানং তেসং পহীনতা অত্থি, তথাপি সোতাপন্নাদীনং ৰিচিকিচ্ছানুসযস্স পহীনতা উভযাপজহনস্স কারণং ন হোতীতি তেসং পহীনত্তা ‘‘নপ্পজহন্তী’’তি ন সক্কা ৰত্তুং, অথ পন কামরাগানুসযঞ্চ নপ্পজহন্তীতি ইমং সন্নিট্ঠানেন তেসং পুগ্গলানং সঙ্গহিততাদস্সনত্থং ৰুত্তন্তি ন তত্থ কারণং ৰত্তব্বং, পুচ্ছিতস্স পন সংসযত্থস্স কারণং ৰত্তব্বং। এৰং সতি ‘‘সেসা তস্স অনুসযস্স পহীনত্তা’’তি ৰত্তব্বন্তি? ন ৰত্তব্বং ‘‘যো কামরাগানুসযং নপ্পজহতি, সো দিট্ঠানুসযং ৰিচিকিচ্ছানুসযং নপ্পজহতী’’তি পটিক্খিপিত্ৰা পুচ্ছিতে সদিসৰিস্সজ্জনকে দিট্ঠিৰিচিকিচ্ছানুসযে সন্ধায কারণস্স ৰত্তব্বত্তা, তস্মা তেসং অনুসযানং পহীনত্তাতি তেসং দিট্ঠিৰিচিকিচ্ছানুসযানং পহীনত্তা তে সংসযত্থসঙ্গহিতে অনুসযে নপ্পজহন্তীতি অত্থো দট্ঠব্বো।
Tattha kiñcāpi kesañci vicikicchānusayo kesañci ubhayanti sesānaṃ tesaṃ pahīnatā atthi, tathāpi sotāpannādīnaṃ vicikicchānusayassa pahīnatā ubhayāpajahanassa kāraṇaṃ na hotīti tesaṃ pahīnattā ‘‘nappajahantī’’ti na sakkā vattuṃ, atha pana kāmarāgānusayañca nappajahantīti imaṃ sanniṭṭhānena tesaṃ puggalānaṃ saṅgahitatādassanatthaṃ vuttanti na tattha kāraṇaṃ vattabbaṃ, pucchitassa pana saṃsayatthassa kāraṇaṃ vattabbaṃ. Evaṃ sati ‘‘sesā tassa anusayassa pahīnattā’’ti vattabbanti? Na vattabbaṃ ‘‘yo kāmarāgānusayaṃ nappajahati, so diṭṭhānusayaṃ vicikicchānusayaṃ nappajahatī’’ti paṭikkhipitvā pucchite sadisavissajjanake diṭṭhivicikicchānusaye sandhāya kāraṇassa vattabbattā, tasmā tesaṃ anusayānaṃ pahīnattāti tesaṃ diṭṭhivicikicchānusayānaṃ pahīnattā te saṃsayatthasaṅgahite anusaye nappajahantīti attho daṭṭhabbo.
পজহনৰারৰণ্ণনা নিট্ঠিতা।
Pajahanavāravaṇṇanā niṭṭhitā.
৫. পহীনৰারৰণ্ণনা
5. Pahīnavāravaṇṇanā
২৬৪-২৭৪. পহীনৰারে ফলট্ঠৰসেনেৰ দেসনা আরদ্ধাতি অনুলোমং সন্ধায ৰুত্তং। পটিলোমে হি পুথুজ্জনৰসেনপি দেসনা গহিতাতি। ‘‘ফলট্ঠৰসেনেৰা’’তি চ সাধারণৰচনেন মগ্গসমঙ্গীনং অগ্গহিততং দীপেতি। অনুসযচ্চন্তপটিপক্খেকচিত্তক্খণিকানঞ্হি মগ্গসমঙ্গীনং ন কোচি অনুসযো উপ্পত্তিরহো, নাপি অনুপ্পত্তিরহতং আপাদিতো, তস্মা তে ন অনুসযসানুসযপহীনউপ্পজ্জনৰারেসু গহিতাতি।
264-274. Pahīnavārephalaṭṭhavaseneva desanā āraddhāti anulomaṃ sandhāya vuttaṃ. Paṭilome hi puthujjanavasenapi desanā gahitāti. ‘‘Phalaṭṭhavasenevā’’ti ca sādhāraṇavacanena maggasamaṅgīnaṃ aggahitataṃ dīpeti. Anusayaccantapaṭipakkhekacittakkhaṇikānañhi maggasamaṅgīnaṃ na koci anusayo uppattiraho, nāpi anuppattirahataṃ āpādito, tasmā te na anusayasānusayapahīnauppajjanavāresu gahitāti.
২৭৫-২৯৬. ওকাসৰারে সো সো অনুসযো অত্তনো অত্তনো ওকাসে এৰ অনুপ্পত্তিধম্মতং আপাদিতো পহীনো, অনাপাদিতো চ অপ্পহীনোতি পহীনাপ্পহীনৰচনানি তদোকাসমেৰ দীপেন্তি, তস্মা অনোকাসে তদুভযাৰত্তব্বতা ৰুত্তাতি। সাধারণট্ঠানে তেন সদ্ধিং পহীনো নাম হোতীতি তেন সদ্ধিং সমানোকাসে পহীনো নামাতি অত্থো, ন সমানকালে পহীনোতি।
275-296. Okāsavāre so so anusayo attano attano okāse eva anuppattidhammataṃ āpādito pahīno, anāpādito ca appahīnoti pahīnāppahīnavacanāni tadokāsameva dīpenti, tasmā anokāse tadubhayāvattabbatā vuttāti. Sādhāraṇaṭṭhāne tena saddhiṃ pahīno nāma hotīti tena saddhiṃ samānokāse pahīno nāmāti attho, na samānakāle pahīnoti.
পহীনৰারৰণ্ণনা নিট্ঠিতা।
Pahīnavāravaṇṇanā niṭṭhitā.
৭. ধাতুৰারৰণ্ণনা
7. Dhātuvāravaṇṇanā
৩৩২-৩৪০. ধাতুৰারে সন্তানং অনুগতা হুত্ৰা সযন্তীতি যস্মিং সন্তানে অপ্পহীনা, তংসন্তানে অপ্পহীনভাৰেন অনুগন্ত্ৰা উপ্পত্তিঅরহভাৰেন সযন্তীতি অত্থো। উপ্পত্তিরহতা এৰ হি অনুরূপং কারণং লভিত্ৰা উপ্পজ্জন্তীতি ইধাপি যুত্তাতি। এত্থ চ ন কামধাতুআদীনি ছ পটিনিসেধৰচনানি ধাতুৰিসেসনিদ্ধারণানি ন হোন্তীতি ‘‘ন কামধাতুযা চুতস্স ন কামধাতুং উপপজ্জন্তস্সা’’তিআদিম্হি ৰুচ্চমানে ইমং নাম উপপজ্জন্তস্সাতি ন ৰিঞ্ঞাযেয্য, তস্মা তংমূলিকাসু যোজনাসু ‘‘ন কামধাতুযা চুতস্স কামধাতুং রূপধাতুং অরূপধাতুং উপপজ্জন্তস্সা’’তি পঠমং যোজেত্ৰা পুন অনুক্কমেন ‘‘ন কামধাতুং উপপজ্জন্তস্সা’’তিআদিকা যোজনা কতা। এৰঞ্হি ন কামধাতুআদিপদেহি যথাৰুত্তধাতুযোযেৰ গহিতা, ন কঞ্চীতি ৰিঞ্ঞাযতি। যথা অনুসযৰারে ‘‘অনুসেন্তীতি পদস্স উপ্পজ্জন্তীতি অত্থো গহিতো’’তি ৰুত্তং, তত্থাপি উপ্পজ্জমানমেৰ সন্ধায উপ্পজ্জন্তীতি গহেতুং ন সক্কা ‘‘যস্স কামরাগানুসযো অনুসেতি, তস্স পটিঘানুসযো অনুসেতীতি? আমন্তা’’তিআদিৰচনতো। অথাপি অপ্পহীনতং সন্ধায উপ্পজ্জন্তীতি অত্থো তত্থ গহিতো, ইধাপি সো ন ন যুজ্জতীতি। ভঙ্গাতি ভঞ্জিতব্বা, দ্ৰিধা কাতব্বাতি অত্থো। ননু ন কোচি অনুসযো যত্থ উপ্পজ্জন্তস্স অনুসেতি নানুসেতি চাতি দ্ৰিধা কাতব্বা, তত্থেৰ কস্মা ‘‘কতি অনুসযা ভঙ্গা? অনুসযা ভঙ্গা নত্থী’’তি পুচ্ছাৰিস্সজ্জনানি কতানি। ন হি পকারন্তরাভাৰে সংসযো যুত্তোতি ? ন ন যুত্তো, ‘‘অনুসযা ভঙ্গা নত্থী’’তি অৰুত্তে ভঙ্গাভাৰস্স অৰিঞ্ঞাতত্তাতি।
332-340. Dhātuvāre santānaṃ anugatā hutvā sayantīti yasmiṃ santāne appahīnā, taṃsantāne appahīnabhāvena anugantvā uppattiarahabhāvena sayantīti attho. Uppattirahatā eva hi anurūpaṃ kāraṇaṃ labhitvā uppajjantīti idhāpi yuttāti. Ettha ca na kāmadhātuādīni cha paṭinisedhavacanāni dhātuvisesaniddhāraṇāni na hontīti ‘‘na kāmadhātuyā cutassa na kāmadhātuṃ upapajjantassā’’tiādimhi vuccamāne imaṃ nāma upapajjantassāti na viññāyeyya, tasmā taṃmūlikāsu yojanāsu ‘‘na kāmadhātuyā cutassa kāmadhātuṃ rūpadhātuṃ arūpadhātuṃ upapajjantassā’’ti paṭhamaṃ yojetvā puna anukkamena ‘‘na kāmadhātuṃ upapajjantassā’’tiādikā yojanā katā. Evañhi na kāmadhātuādipadehi yathāvuttadhātuyoyeva gahitā, na kañcīti viññāyati. Yathā anusayavāre ‘‘anusentīti padassa uppajjantīti attho gahito’’ti vuttaṃ, tatthāpi uppajjamānameva sandhāya uppajjantīti gahetuṃ na sakkā ‘‘yassa kāmarāgānusayo anuseti, tassa paṭighānusayo anusetīti? Āmantā’’tiādivacanato. Athāpi appahīnataṃ sandhāya uppajjantīti attho tattha gahito, idhāpi so na na yujjatīti. Bhaṅgāti bhañjitabbā, dvidhā kātabbāti attho. Nanu na koci anusayo yattha uppajjantassa anuseti nānuseti cāti dvidhā kātabbā, tattheva kasmā ‘‘kati anusayā bhaṅgā? Anusayā bhaṅgā natthī’’ti pucchāvissajjanāni katāni. Na hi pakārantarābhāve saṃsayo yuttoti ? Na na yutto, ‘‘anusayā bhaṅgā natthī’’ti avutte bhaṅgābhāvassa aviññātattāti.
ধাতুৰারৰণ্ণনা নিট্ঠিতা।
Dhātuvāravaṇṇanā niṭṭhitā.
অনুসযযমকৰণ্ণনা নিট্ঠিতা।
Anusayayamakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / যমকপাল়ি • Yamakapāḷi / ৬. সঙ্খারযমকং • 6. Saṅkhārayamakaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. অনুসযযমকং • 7. Anusayayamakaṃ
