| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. அனுஸோதஸுத்தவண்ணனா
5. Anusotasuttavaṇṇanā
5. பஞ்சமே அனுஸோதங் க³ச்ச²தீதி அனுஸோதகா³மீ. கிலேஸஸோதஸ்ஸ பச்சனீகபடிபத்தியா படிஸோதங் க³ச்ச²தீதி படிஸோதகா³மீ. டி²தத்தோதி டி²தஸபா⁴வோ. திண்ணோதி ஓக⁴ங் தரித்வா டி²தோ. பாரங்க³தோதி பரதீரங் க³தோ. த²லே திட்ட²தீதி நிப்³பா³னத²லே திட்ட²தி. ப்³ராஹ்மணோதி ஸெட்டோ² நித்³தோ³ஸோ. இதா⁴தி இமஸ்மிங் லோகே. காமே ச படிஸேவதீதி கிலேஸகாமேஹி வத்து²காமே படிஸேவதி. பாபஞ்ச கம்மங் கரோதீதி பாபஞ்ச பாணாதிபாதாதி³கம்மங் கரோதி. பாபஞ்ச கம்மங் ந கரோதீதி பஞ்சவேரகம்மங் ந கரோதி. அயங் வுச்சதி, பி⁴க்க²வே, டி²தத்தோதி அயங் அனாகா³மீ புக்³க³லோ தஸ்மா லோகா புன படிஸந்தி⁴வஸேன அனாக³மனதோ டி²தத்தோ நாம.
5. Pañcame anusotaṃ gacchatīti anusotagāmī. Kilesasotassa paccanīkapaṭipattiyā paṭisotaṃ gacchatīti paṭisotagāmī. Ṭhitattoti ṭhitasabhāvo. Tiṇṇoti oghaṃ taritvā ṭhito. Pāraṅgatoti paratīraṃ gato. Thale tiṭṭhatīti nibbānathale tiṭṭhati. Brāhmaṇoti seṭṭho niddoso. Idhāti imasmiṃ loke. Kāme ca paṭisevatīti kilesakāmehi vatthukāme paṭisevati. Pāpañca kammaṃ karotīti pāpañca pāṇātipātādikammaṃ karoti. Pāpañca kammaṃ na karotīti pañcaverakammaṃ na karoti. Ayaṃ vuccati, bhikkhave, ṭhitattoti ayaṃ anāgāmī puggalo tasmā lokā puna paṭisandhivasena anāgamanato ṭhitatto nāma.
தண்ஹாதி⁴பன்னாதி தண்ஹாய அதி⁴பன்னா அஜ்ஜொ²த்த²டா, தண்ஹங் வா அதி⁴பன்னா அஜ்ஜோ²கா³ள்ஹா. பரிபுண்ணஸேகோ²தி ஸிக்கா²பாரிபூரியா டி²தோ. அபரிஹானத⁴ம்மோதி அபரிஹீனஸபா⁴வோ. சேதோவஸிப்பத்தோதி சித்தவஸீபா⁴வங் பத்தோ. ஏவரூபோ கீ²ணாஸவோ ஹோதி, இத⁴ பன அனாகா³மீ கதி²தோ. ஸமாஹிதிந்த்³ரியோதி ஸமாஹிதச²ளிந்த்³ரியோ. பரோபராதி பரோவரா உத்தமலாமகா, குஸலாகுஸலாதி அத்தோ². ஸமேச்சாதி ஞாணேன ஸமாக³ந்த்வா. விதூ⁴பிதாதி வித்³த⁴ங்ஸிதா ஜா²பிதா வா. வுஸிதப்³ரஹ்மசரியோதி மக்³க³ப்³ரஹ்மசரியங் வஸித்வா டி²தோ. லோகந்தகூ³தி திவித⁴ஸ்ஸாபி லோகஸ்ஸ அந்தங் க³தோ. பாரக³தோதி ச²ஹாகாரேஹி பாரக³தோ. இத⁴ கீ²ணாஸவோவ கதி²தோ. இதி ஸுத்தேபி கா³தா²ஸுபி வட்டவிவட்டமேவ கதி²தங்.
Taṇhādhipannāti taṇhāya adhipannā ajjhotthaṭā, taṇhaṃ vā adhipannā ajjhogāḷhā. Paripuṇṇasekhoti sikkhāpāripūriyā ṭhito. Aparihānadhammoti aparihīnasabhāvo. Cetovasippattoti cittavasībhāvaṃ patto. Evarūpo khīṇāsavo hoti, idha pana anāgāmī kathito. Samāhitindriyoti samāhitachaḷindriyo. Paroparāti parovarā uttamalāmakā, kusalākusalāti attho. Sameccāti ñāṇena samāgantvā. Vidhūpitāti viddhaṃsitā jhāpitā vā. Vusitabrahmacariyoti maggabrahmacariyaṃ vasitvā ṭhito. Lokantagūti tividhassāpi lokassa antaṃ gato. Pāragatoti chahākārehi pāragato. Idha khīṇāsavova kathito. Iti suttepi gāthāsupi vaṭṭavivaṭṭameva kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. அனுஸோதஸுத்தங் • 5. Anusotasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. அனுஸோதஸுத்தவண்ணனா • 5. Anusotasuttavaṇṇanā
