| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫. অনুসোতসুত্তৰণ্ণনা
5. Anusotasuttavaṇṇanā
৫. পঞ্চমে অনুসোতং গচ্ছতীতি সংসারসোতস্স অনুকূলভাৰেন গচ্ছতি। পচ্চনীকপটিপত্তিযাতি সংসারসোতস্স পটিকূলৰসেন পৰত্তনিব্বিদানুপস্সনাদিপটিপত্তিযা । ঠিতসভাৰোতি অচলপ্পসাদাদিসমন্নাগমেন ঠিতসভাৰো। অনাগামী হি অস্সদ্ধিযেহি কামরাগব্যাপাদেহি অকম্পনিযচিত্ততায তম্হা লোকা অনাৰত্তিধম্মতায চ ঠিতসভাৰো নাম। ওঘং তরিত্ৰাতি কামোঘাদিচতুব্বিধং ওঘং অতিক্কমিত্ৰা। পরতীরং গতোতি নিব্বানপারং গতো। ব্রাহ্মণোতি বাহিতপাপতায ব্রাহ্মণোতি সঙ্খং গতো খীণাসৰো। তেনাহ ‘‘সেট্ঠো নিদ্দোসো’’তি। পঞ্চৰেরকম্মন্তি পাণাতিপাতাদিপঞ্চদুচ্চরিতং। সহাপি দুক্খেন সহাপি দোমনস্সেনাতি কিলেসপরিযুট্ঠানে সতি উপ্পন্নেন দুক্খদোমনস্সেন সদ্ধিম্পি। পরিপুণ্ণন্তি তিস্সন্নং সিক্খানং একাযপি অনূনং। পরিসুদ্ধন্তি নিরুপক্কিলেসং। ব্রহ্মচরিযন্তি সেট্ঠচরিযং। ইমিনা ৰারেন সোতাপন্নসকদাগামিনো কথিতা। কিং পন তে রুদন্তা ব্রহ্মচরিযং চরন্তীতি? আম, কিলেসরোদনেন রোদন্তা চরন্তি নাম, সীলসম্পন্নো পুথুজ্জনভিক্খু এত্থেৰ সঙ্গহিতো।
5. Pañcame anusotaṃ gacchatīti saṃsārasotassa anukūlabhāvena gacchati. Paccanīkapaṭipattiyāti saṃsārasotassa paṭikūlavasena pavattanibbidānupassanādipaṭipattiyā . Ṭhitasabhāvoti acalappasādādisamannāgamena ṭhitasabhāvo. Anāgāmī hi assaddhiyehi kāmarāgabyāpādehi akampaniyacittatāya tamhā lokā anāvattidhammatāya ca ṭhitasabhāvo nāma. Oghaṃ taritvāti kāmoghādicatubbidhaṃ oghaṃ atikkamitvā. Paratīraṃ gatoti nibbānapāraṃ gato. Brāhmaṇoti bāhitapāpatāya brāhmaṇoti saṅkhaṃ gato khīṇāsavo. Tenāha ‘‘seṭṭho niddoso’’ti. Pañcaverakammanti pāṇātipātādipañcaduccaritaṃ. Sahāpi dukkhena sahāpi domanassenāti kilesapariyuṭṭhāne sati uppannena dukkhadomanassena saddhimpi. Paripuṇṇanti tissannaṃ sikkhānaṃ ekāyapi anūnaṃ. Parisuddhanti nirupakkilesaṃ. Brahmacariyanti seṭṭhacariyaṃ. Iminā vārena sotāpannasakadāgāmino kathitā. Kiṃ pana te rudantā brahmacariyaṃ carantīti? Āma, kilesarodanena rodantā caranti nāma, sīlasampanno puthujjanabhikkhu ettheva saṅgahito.
চেতোৰিমুত্তিন্তি ফলসমাধিং। পঞ্ঞাৰিমুত্তিন্তি ফলঞাণং। ছহাকারেহি পারগতোতি অভিঞ্ঞাপারগূ, পরিঞ্ঞাপারগূ, ভাৰনাপারগূ, পহানপারগূ, সচ্ছিকিরিযাপারগূ, সমাপত্তিপারগূতি এৰং ছহি আকারেহি সব্বধম্মানং পারং পরিযোসানং গতো। সেসমেত্থ সুৰিঞ্ঞেয্যমেৰ।
Cetovimuttinti phalasamādhiṃ. Paññāvimuttinti phalañāṇaṃ. Chahākārehi pāragatoti abhiññāpāragū, pariññāpāragū, bhāvanāpāragū, pahānapāragū, sacchikiriyāpāragū, samāpattipāragūti evaṃ chahi ākārehi sabbadhammānaṃ pāraṃ pariyosānaṃ gato. Sesamettha suviññeyyameva.
অনুসোতসুত্তৰণ্ণনা নিট্ঠিতা।
Anusotasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৫. অনুসোতসুত্তং • 5. Anusotasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. অনুসোতসুত্তৰণ্ণনা • 5. Anusotasuttavaṇṇanā
