| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៥. អនុសោតសុត្តវណ្ណនា
5. Anusotasuttavaṇṇanā
៥. បញ្ចមេ អនុសោតំ គច្ឆតីតិ សំសារសោតស្ស អនុកូលភាវេន គច្ឆតិ។ បច្ចនីកបដិបត្តិយាតិ សំសារសោតស្ស បដិកូលវសេន បវត្តនិព្ពិទានុបស្សនាទិបដិបត្តិយា ។ ឋិតសភាវោតិ អចលប្បសាទាទិសមន្នាគមេន ឋិតសភាវោ។ អនាគាមី ហិ អស្សទ្ធិយេហិ កាមរាគព្យាបាទេហិ អកម្បនិយចិត្តតាយ តម្ហា លោកា អនាវត្តិធម្មតាយ ច ឋិតសភាវោ នាម។ ឱឃំ តរិត្វាតិ កាមោឃាទិចតុព្ពិធំ ឱឃំ អតិក្កមិត្វា។ បរតីរំ គតោតិ និព្ពានបារំ គតោ។ ព្រាហ្មណោតិ ពាហិតបាបតាយ ព្រាហ្មណោតិ សង្ខំ គតោ ខីណាសវោ។ តេនាហ ‘‘សេដ្ឋោ និទ្ទោសោ’’តិ។ បញ្ចវេរកម្មន្តិ បាណាតិបាតាទិបញ្ចទុច្ចរិតំ។ សហាបិ ទុក្ខេន សហាបិ ទោមនស្សេនាតិ កិលេសបរិយុដ្ឋានេ សតិ ឧប្បន្នេន ទុក្ខទោមនស្សេន សទ្ធិម្បិ។ បរិបុណ្ណន្តិ តិស្សន្នំ សិក្ខានំ ឯកាយបិ អនូនំ។ បរិសុទ្ធន្តិ និរុបក្កិលេសំ។ ព្រហ្មចរិយន្តិ សេដ្ឋចរិយំ។ ឥមិនា វារេន សោតាបន្នសកទាគាមិនោ កថិតា។ កិំ បន តេ រុទន្តា ព្រហ្មចរិយំ ចរន្តីតិ? អាម, កិលេសរោទនេន រោទន្តា ចរន្តិ នាម, សីលសម្បន្នោ បុថុជ្ជនភិក្ខុ ឯត្ថេវ សង្គហិតោ។
5. Pañcame anusotaṃ gacchatīti saṃsārasotassa anukūlabhāvena gacchati. Paccanīkapaṭipattiyāti saṃsārasotassa paṭikūlavasena pavattanibbidānupassanādipaṭipattiyā . Ṭhitasabhāvoti acalappasādādisamannāgamena ṭhitasabhāvo. Anāgāmī hi assaddhiyehi kāmarāgabyāpādehi akampaniyacittatāya tamhā lokā anāvattidhammatāya ca ṭhitasabhāvo nāma. Oghaṃ taritvāti kāmoghādicatubbidhaṃ oghaṃ atikkamitvā. Paratīraṃ gatoti nibbānapāraṃ gato. Brāhmaṇoti bāhitapāpatāya brāhmaṇoti saṅkhaṃ gato khīṇāsavo. Tenāha ‘‘seṭṭho niddoso’’ti. Pañcaverakammanti pāṇātipātādipañcaduccaritaṃ. Sahāpi dukkhena sahāpi domanassenāti kilesapariyuṭṭhāne sati uppannena dukkhadomanassena saddhimpi. Paripuṇṇanti tissannaṃ sikkhānaṃ ekāyapi anūnaṃ. Parisuddhanti nirupakkilesaṃ. Brahmacariyanti seṭṭhacariyaṃ. Iminā vārena sotāpannasakadāgāmino kathitā. Kiṃ pana te rudantā brahmacariyaṃ carantīti? Āma, kilesarodanena rodantā caranti nāma, sīlasampanno puthujjanabhikkhu ettheva saṅgahito.
ចេតោវិមុត្តិន្តិ ផលសមាធិំ។ បញ្ញាវិមុត្តិន្តិ ផលញាណំ។ ឆហាការេហិ បារគតោតិ អភិញ្ញាបារគូ, បរិញ្ញាបារគូ, ភាវនាបារគូ, បហានបារគូ, សច្ឆិកិរិយាបារគូ, សមាបត្តិបារគូតិ ឯវំ ឆហិ អាការេហិ សព្ពធម្មានំ បារំ បរិយោសានំ គតោ។ សេសមេត្ថ សុវិញ្ញេយ្យមេវ។
Cetovimuttinti phalasamādhiṃ. Paññāvimuttinti phalañāṇaṃ. Chahākārehi pāragatoti abhiññāpāragū, pariññāpāragū, bhāvanāpāragū, pahānapāragū, sacchikiriyāpāragū, samāpattipāragūti evaṃ chahi ākārehi sabbadhammānaṃ pāraṃ pariyosānaṃ gato. Sesamettha suviññeyyameva.
អនុសោតសុត្តវណ្ណនា និដ្ឋិតា។
Anusotasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៥. អនុសោតសុត្តំ • 5. Anusotasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥. អនុសោតសុត្តវណ្ណនា • 5. Anusotasuttavaṇṇanā
