| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၅. အနုသောတသုတ္တဝဏ္ဏနာ
5. Anusotasuttavaṇṇanā
၅. ပဉ္စမေ အနုသောတံ ဂစ္ဆတီတိ သံသာရသောတသ္သ အနုကူလဘာဝေန ဂစ္ဆတိ။ ပစ္စနီကပဋိပတ္တိယာတိ သံသာရသောတသ္သ ပဋိကူလဝသေန ပဝတ္တနိဗ္ဗိဒာနုပသ္သနာဒိပဋိပတ္တိယာ ။ ဌိတသဘာဝောတိ အစလပ္ပသာဒာဒိသမန္နာဂမေန ဌိတသဘာဝော။ အနာဂာမီ ဟိ အသ္သဒ္ဓိယေဟိ ကာမရာဂဗ္ယာပာဒေဟိ အကမ္ပနိယစိတ္တတာယ တမ္ဟာ လောကာ အနာဝတ္တိဓမ္မတာယ စ ဌိတသဘာဝော နာမ။ ဩဃံ တရိတ္ဝာတိ ကာမောဃာဒိစတုဗ္ဗိဓံ ဩဃံ အတိက္ကမိတ္ဝာ။ ပရတီရံ ဂတောတိ နိဗ္ဗာနပာရံ ဂတော။ ဗ္ရာဟ္မဏောတိ ဗာဟိတပာပတာယ ဗ္ရာဟ္မဏောတိ သင္ခံ ဂတော ခီဏာသဝော။ တေနာဟ ‘‘သေဋ္ဌော နိဒ္ဒောသော’’တိ။ ပဉ္စဝေရကမ္မန္တိ ပာဏာတိပာတာဒိပဉ္စဒုစ္စရိတံ။ သဟာပိ ဒုက္ခေန သဟာပိ ဒောမနသ္သေနာတိ ကိလေသပရိယုဋ္ဌာနေ သတိ ဥပ္ပန္နေန ဒုက္ခဒောမနသ္သေန သဒ္ဓိမ္ပိ။ ပရိပုဏ္ဏန္တိ တိသ္သန္နံ သိက္ခာနံ ဧကာယပိ အနူနံ။ ပရိသုဒ္ဓန္တိ နိရုပက္ကိလေသံ။ ဗ္ရဟ္မစရိယန္တိ သေဋ္ဌစရိယံ။ ဣမိနာ ဝာရေန သောတာပန္နသကဒာဂာမိနော ကထိတာ။ ကိံ ပန တေ ရုဒန္တာ ဗ္ရဟ္မစရိယံ စရန္တီတိ? အာမ, ကိလေသရောဒနေန ရောဒန္တာ စရန္တိ နာမ, သီလသမ္ပန္နော ပုထုဇ္ဇနဘိက္ခု ဧတ္ထေဝ သင္ဂဟိတော။
5. Pañcame anusotaṃ gacchatīti saṃsārasotassa anukūlabhāvena gacchati. Paccanīkapaṭipattiyāti saṃsārasotassa paṭikūlavasena pavattanibbidānupassanādipaṭipattiyā . Ṭhitasabhāvoti acalappasādādisamannāgamena ṭhitasabhāvo. Anāgāmī hi assaddhiyehi kāmarāgabyāpādehi akampaniyacittatāya tamhā lokā anāvattidhammatāya ca ṭhitasabhāvo nāma. Oghaṃ taritvāti kāmoghādicatubbidhaṃ oghaṃ atikkamitvā. Paratīraṃ gatoti nibbānapāraṃ gato. Brāhmaṇoti bāhitapāpatāya brāhmaṇoti saṅkhaṃ gato khīṇāsavo. Tenāha ‘‘seṭṭho niddoso’’ti. Pañcaverakammanti pāṇātipātādipañcaduccaritaṃ. Sahāpi dukkhena sahāpi domanassenāti kilesapariyuṭṭhāne sati uppannena dukkhadomanassena saddhimpi. Paripuṇṇanti tissannaṃ sikkhānaṃ ekāyapi anūnaṃ. Parisuddhanti nirupakkilesaṃ. Brahmacariyanti seṭṭhacariyaṃ. Iminā vārena sotāpannasakadāgāmino kathitā. Kiṃ pana te rudantā brahmacariyaṃ carantīti? Āma, kilesarodanena rodantā caranti nāma, sīlasampanno puthujjanabhikkhu ettheva saṅgahito.
စေတောဝိမုတ္တိန္တိ ဖလသမာဓိံ။ ပညာဝိမုတ္တိန္တိ ဖလဉာဏံ။ ဆဟာကာရေဟိ ပာရဂတောတိ အဘိညာပာရဂူ, ပရိညာပာရဂူ, ဘာဝနာပာရဂူ, ပဟာနပာရဂူ, သစ္ဆိကိရိယာပာရဂူ, သမာပတ္တိပာရဂူတိ ဧဝံ ဆဟိ အာကာရေဟိ သဗ္ဗဓမ္မာနံ ပာရံ ပရိယောသာနံ ဂတော။ သေသမေတ္ထ သုဝိညေယ္ယမေဝ။
Cetovimuttinti phalasamādhiṃ. Paññāvimuttinti phalañāṇaṃ. Chahākārehi pāragatoti abhiññāpāragū, pariññāpāragū, bhāvanāpāragū, pahānapāragū, sacchikiriyāpāragū, samāpattipāragūti evaṃ chahi ākārehi sabbadhammānaṃ pāraṃ pariyosānaṃ gato. Sesamettha suviññeyyameva.
အနုသောတသုတ္တဝဏ္ဏနာ နိဋ္ဌိတာ။
Anusotasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. အနုသောတသုတ္တံ • 5. Anusotasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. အနုသောတသုတ္တဝဏ္ဏနာ • 5. Anusotasuttavaṇṇanā
